Alma 38

Pasiuna

Si Shiblon miserbisyo uban sa iyang amahan, si Alma, isip usa ka misyonaryo sa mga Zoramite (tan-awa sa Alma 31:7). Human niining misyon, si Alma mipahayag og kalipay diha sa kamakanunayon ug kamatinud-anon nga gipakita ni Shiblon samtang nag-antus og pagpanggukod. Si Alma mipamatuod usab ngadto ni Shiblon sa gahum sa Manluluwas sa katubsanan ug mitanyag og tambag kabahin sa padayong paningkamot ni Shiblon sa pagtudlo sa ebanghelyo.

Mga Sugyot alang sa Pagtudlo

Alma 38:1–3

Si Alma mipahayag og kalipay diha sa kamatinud-anon ni Shiblon

Kon imong gidapit ang mga estudyante sa pagbuhat sa take-home application activity nga naa sa katapusan sa miaging leksyon, pahinumdumi sila sa duha ka pangutana nga ikaw midapit kanila nga ipangutana sa ilang mga ginikanan o laing sinaligan nga hamtong:

Sa unsang paagi nga ang pagkamasulundon ngadto sa kasugoan sa Dios nakatabang kaninyo?
Unsa ang imong ikatambag alang kanako nga makatabang nako nga mahimong mas maalamon sa akong pagkabatan-on?

Hangyoa ang mga estudyante sa pagreport sa ilang mga kasinatian gamit ang kalihokan. Human mopakigbahin ang mga estudyante, ipangutana:

Sa unsang paagi nga kini nga kasinatian nakaimpluwensya sa inyong tinguha sa pagsunod sa mga sugo sa Ginoo?

Ipasabut nga sa Alma 38 narekord ang tambag nga gihatag ni Alma sa iyang anak nga si Shiblon. Dapita ang usa ka estudyante sa pagbasa og kusog sa Alma 38:1–3. Hangyoa ang klase sa pagsunod, nga mangita sa hugpong sa mga pulong nga naghulagway kon unsa ang gibati ni Alma mahitungod ni Shiblon ug ngano. Dapita ang mga estudyante sa pagreport unsa ang ilang nakit-an.

Unsa ang atong makat-unan sa Alma 38:2–3 mahitungod sa epekto nga mahatag sa matarung nga mga anak ngadto sa ilang mga ginikanan? (Ang mga estudyante mahimong magkalain-lain ang ilang mga tubag. Siguroha nga ilang maila ang kamatuoran nga samtang ang mga kabatan-onan nagmakanunayon ug nagmatinud-anon sa paghupot sa kasugoan, sila makahatag og dakong kalipay ngadto sa ilang mga ginikanan.)
Kanus-a nga higayon nga ang inyong mga ginikanan mibati og kalipay tungod sa usa ka maayong desisyon nga inyong gihimo o tungod sa inyong mga paningkamot sa pagsunod sa ebanghelyo?
Sa unsang paagi nga ang inyong mga paningkamot sa pagtuman sa kasugoan nakaimpluwensya sa inyong relasyon sa inyong mga ginikanan?

Mahimo kang mopakigbahin og usa ka ehemplo kon sa unsang paagi nga ang imong pamilya naimpluwensyahan sa matarung nga mga pagpili sa mga anak diha sa pamilya.

Alma 38:4–9

Si Alma mipamatuod sa gahum sa Manluluwas sa pagtubos

Ipasabut nga si Alma mipahinumdom ni Shiblon nga silang duha nakasinati sa gahum sa Manluluwas bahin sa katubsanan. Andama ang mosunod nga tsart isip usa ka handout, o ipakita kini diha sa pisara ug hangyoa ang mga estudyante sa pagkopya niini diha sa mga notebook o scripture study journal.

	Shiblon (Alma 38:4–5)	Alma (Alma 38:6–8)
Sa unsa siya natubos?
Nganong nakadawat siya og panalangin sa katubsanan?
Unsa ang atong makat-unan gikan sa iyang kasinatian?

Kompletuha ang tsart isip usa ka klase, o pag-assign og mga estudyante aron makompleto kini nga magkapares. Ipa-refer sa mga estudyante ngadto sa mga tudling sa kasulatan nga nalista diha sa tsart samtang sila motubag sa mga pangutana. Awhaga sila nga hiusahon unsay ilang nahibaloan na mahitungod sa Ginoo nga nagtubos kang Shiblon (tan-awa sa Alma 38:2–3) ug Alma (tan-awa sa Mosiah 27; Alma 36). Human makompleto sa mga estudyante ang tsart, ipangutana ang mosunod aron matabangan sila sa paghisgot sa mga baruganan nga ilang nakat-unan:

Unsa man ang atong makat-unan gikan sa kasinatian ni Shiblon? (Ang mga estudyante mahimong moila og lain-laing mga baruganan. Siguroha nga makaila sila sa mosunod nga kamatuoran: Kon kita modala sa tanang butang inubanan sa pailub ug pagsalig sa Dios, Siya motubos kanato gikan sa mga pagsulay, kasamok, ug mga kasakit ug mobayaw kanato sa katapusang adlaw.)
Unsa man ang atong makat-unan gikan sa kasinatian ni Alma? (Bisan og ang mga estudyante managlahi ang tubag, siguroha nga ilang mapahayag nga aron makadawat og kapasayloan sa atong mga sala ug makakaplag og kalinaw sa atong mga kalag, kinahanglang ipakita nato ang hugot nga pagtuo diha ni Jesukristo ug magtinguha sa Iyang kalooy.)

Dapita ang usa ka estudyante sa pagbasa og kusog sa Alma 38:9. Hangyoa ang klase sa pagsunod, nga mangita kon unsa ang gusto ni Alma nga makat-unan sa iyang anak nga lalaki mahitungod sa Manluluwas.

Nganong importante nga atong masayran nga si Jesukristo mao lang ang bugtong “agianan o paagi diin [kita] maluwas”?
Sa unsa nga paagi nga inyong nasinati ang katubsanan pinaagi sa gahum sa Manluluwas? (Mahimo nimong hatagan ang mga estudyante og panahon sa pagpamalandong niining pangutana sa dili pa mangayo alang sa ilang mga tubag.) Unsa man ang imong gibuhat sa pagpangita nianang katubsanan?

Hatagi og higayon ang mga estudyante nga makapamalandong kon sa unsang paagi sila nagtinguha sa tabang sa Ginoo uban sa mga personal nga mga hagit.

Alma 38:10–15

Si Alma nagtambag kang Shiblon sa pagpadayon sa pagtudlo sa ebanghelyo ug pagpalambo sa matarung nga mga hiyas

Ipasabut nga si Alma midasig ni Shiblon sa pagpalambo og mga kinaiya nga makatabang kaniya samtang nagpadayon siya sa pagtudlo sa ebanghelyo ug sa pagserbisyo sa uban. Ang tambag ni Alma ngadto ni Shiblon magamit ni bisan kinsa nga gustong moserbisyo, motudlo, o moimpluwensya sa uban alang sa kaayohan. Dapita ang mga estudyante sa pagbasa sa hilum sa Alma 38:10–15, nga mangita sa tambag nga labing makatabang ngadto nila. Mahimo nimong isugyot nga markahan sa mga estudyante ang ilang nakit-an.

Hatagi ang mga estudyante og kopya sa giya sa pagtuon sa katapusan niining leksyon. Ipasabut nga samtang mogamit sila sa giya, ilang makita kon sa unsang paagi nga ang atong mga paningkamot sa pagpalambo og matarung nga mga hiyas makaandam kanato sa pagtudlo ug pagserbisyo sa uban. Dapita sila sa pagpili og usa ka bahin sa tambag ni Alma diha sa wala nga kolum sa giya ug kompletuhon ang katukma nga kalihokan sa pagkat-on diha sa tuo nga kolum. (Kon wala ka makapakopya sa giya sa pagtuon, ipahiangay ang kalihokan pinaagi sa pagpasiugda og panaghisgutan sa klase ug paggamit sa impormasyon diha sa giya sa pagtuon isip kapanguhaan.)

Kon ang mga estudyante adunay igong panahon sa pagkompleto sa usa sa mga kalihokan sa pagkat-on diha sa giya sa pagtuon, ikonsiderar ang paghangyo og pipila nila sa pagpakigbahin kon unsa ang ilang nakat-unan gikan niining kalihokan ug giunsa nila sa pagplano aron magamit kini. Kon imo nang nahatagan ang mga estudyante og mga kopya sa giya sa pagtuon, awhaga sila sa pagdala niini sa balay ug magkat-on og dugang mahitungod sa tambag ni Alma ngadto ni Shiblon.

Giya sa Pagtuon alang sa Alma 38:10–12

Susiha ang lain-laing bahin sa tambag ni Alma nga nalista sa ubos, ug pagpili og usa nga gusto ninyong palamboon. Kompletuha ang natukma nga kalihokan sa pagkat-on aron matabangan kamo sa paggamit niining tambag diha sa inyong kinabuhi.

Tambag ni Alma	Mga Kalihokan sa Pagkat-on
“Magkugi ug magmapugnganon sa tanan nga mga butang” (Alma 38:10).	Ang pagmakugihon mao ang kamakanunayon, maampingon, ug tinuoray nga paningkamot. Ang pagkamapugnganon mao ang “pag-igo-igo sa tanang butang o sa pagpakita og pagpugong sa kaugalingon” (Kent D. Watson, “Mapugnganon sa Tanan nga mga Butang,” Ensign o Liahona, Nob. 2009, 38). Sa inyong scripture study journal, isulat ang mahitungod kon ngano nga kining duha ka mga kinaiya ang gikinahanglan kon ang usa ka tawo nagtudlo sa ebanghelyo ug nagserbisyo sa uban. Isulat usab ang mahitungod sa bisan unsang dapit sa inyong kinabuhi diin kamo mahimong mas makugihon o mapugnganon ug mahitungod kon sa unsang paagi nga ang pagpalambo niadtong mga dapit makatabang ninyo nga magtudlo ug magserbisyo sa uban sa mas epektibo nga paagi.
“Pagmatngon nga ikaw dili madala ngadto sa garbo; … dili manghambog” (Alma 38:11).	Usa ka aspeto sa garbo mao ang pagbutang og mas dakong pagsalig sa kaugalingon kay sa Dios. Ang garbo makita usab kon ang usa ka tawo naghunahuna nga siya ang labaw o mas importante kay sa uban. Isulat diha sa inyong scripture study journal mahitungod kon unsa ang mahimong mahitabo kon ang usa ka miyembro sa Simbahan mapagarbuhon diha sa iyang calling. Si Elder Robert D. Hales sa Korum sa Napulog Duha ka mga Apostoles mitudlo nga, “Ang tinuod nga mga disipulo hilum nga mamulong, dili hinambug nga garbo” (“Kristohanong Kaisug: Ang Bugti sa Pagkadisipulo,” Ensign o Liahona, Nob. 2008, 73). Paghunahuna og usa ka tawo nga inyong nailhan kinsa nagtudlo sa ebanghelyo nga “hilum nga namulong.” Sa inyong scripture study journal, isulat ang mahitungod niini nga tawo ug ang epekto sa iyang pagtudlo diha kaninyo. Pagsulat usab og usa o duha ka mga paagi nga inyong tinguhaon aron malikayan ang garbo.
“Gamita ang imong kaisug, apan dili ang pagpalabi-labi” (Alma 38:12).	Basaha ang mga pulong ni Apostol Pablo sa Mga Taga-Filipos 1:14 (diha sa Bag-ong Tugon) aron makita kon giunsa sa mga sulugoon sa Dios ang pagpakita og kaisug. Si Presidente James E. Faust sa Unang Kapangulohan mitudlo kon unsaon nga makalikay kita sa pagpalabi-labi: “Dili ako motuo nga kita kinahanglang … saba, mapugsanon, o dili sensitibo sa atong pamaagi [sa misyonaryo nga buhat]” (sa James P. Bell, In the Strength of the Lord: The Life and Teachings of James E. Faust [1999], 373). Sa inyong scripture study journal, isulat ang mahitungod sa usa ka tawo nga mahimong maisug apan walay pagpalabi-labi. I-rekord ang usa ka piho nga paagi nga imong magamit ang tambag nga magmaisug apan dili magpalabi-labi. Isulat usab ang mahitungod kon sa unsang paagi nga kining tambag makatabang kaninyo nga magmalampuson sa pagtudlo ug pagserbisyo sa uban.
“Makapugong sa tanan nimo nga mga mainit nga pagbati” (Alma 38:12).	Ang pagpugong nagpasabut nga santaon, giyahan, o kontrolahon. Ang pagbati usa ka kusgan nga emosyon. Pamalandungi ang mosunod nga mga pangutana, ug isulat ang inyong mga tubag diha sa inyong scripture study journal: Ngano kaha nga importante man alang kanato nga pugngan ang atong mga pagbati? Sa inyong hunahuna sa unsa nga paagi nga ang pagpugong sa inyong mga pagbati makatabang kaninyo nga mapuno sa gugma? Unsa ang inyong buhaton aron masunod ang tambag ni Alma sa pagpugong sa tanan ninyong mga pagbati?
“Makapugong gikan sa pagkatapulan” (Alma 38:12).	Ribyuha ang mga tudling sa kasulatan nga nalista diha sa indeks sa triple combination ubos sa “Pagkatapulan, Tapul, Tapulan.” Pangita sa tambag mahitungod sa unsay kahulugan niining pagtapol ug mahitungod sa sukwahi sa tapulan. Pagpili og duha ka mga bersikulo nga nalista ubos sa nasulat ug tun-i kini. Isulat diha sa inyong scriptute study journal ang mahitungod kon unsa ang inyong nakat-unan gikan niining mga bersikulo nga inyong gipili. Pagsulat mahitungod kon sa unsang paagi nga ang tambag nga maglikay sa pagkatapulan makatabang kaninyo sa pagtudlo ug pagserbisyo sa uban sa mas epektibo nga paagi. Sa katapusan, pagsulat og usa ka piho nga paagi nga kamo molikay gikan sa pagkatapulan.