Pasiuna sa Ikaupat nga Nephi: Ang Basahon ni Nephi
Nganong tun-an kini nga basahon?
Samtang tun-an sa mga estudyante ang 4 Nephi, sila makat-on kabahin sa mga panalangin nga moabut sa katawhan nga nagkahiusa sa pagsunod sa ebanghelyo ni Jesukristo. Human sa pagpangalagad sa Manluluwas tali sa kaliwatan ni Lehi, ang tanang katawhan sa tibuok yuta nakabig. Samtang nagsunod sila sa mga kasugoan, natagamtaman nila ang kalinaw, kabuhong, ug talagsaon nga espiritwal nga mga panalangin. Mipahayag si Mormon, “Sa pagkamatuod wala nay mga katawhan nga labaw pa ka malipayon sa tanan nga mga katawhan nga gilalang sa kamot sa Dios” (4 Nephi 1:16). Makat-unan usab sa mga estudyante ang importante nga mga leksyon gikan sa hinay-hinay nga pag-us-us sa katawhan ngadto sa kahimtang sa kadautan.
Kinsa ang nagsulat niini nga basahon?
Si Mormon ang nagtigum ug nagpamubo sa mga rekord sa upat ka mga tigsulat aron sa paghimo sa basahon sa 4 Nephi. Ang una niini mao si Nephi, diin ang basahon gipangalan. Si Nephi mao ang anak nga lalaki ni Nephi, kinsa usa sa napulog duha ka mga disipulo nga pinili sa Ginoo panahon sa Iyang pangalagad tali sa kaliwatan ni Lehi (tan-awa sa 3 Nephi 11:18–22; 12:1). Ang ubang tulo ka mga tigsulat mao ang anak nga lalaki ni Nephi nga si Amos ug ang mga anak nga lalaki ni Amos nga sila si Amos ug Ammaron (tan-awa sa 4 Nephi 1:19, 21, 47).
Para kang kinsa kini nga basahon gisulat ug ngano?
Si Mormon wala motumong sa basahon nga 4 Nephi ngadto sa partikular nga grupo, ug wala niya gisulti nganong iya kining gisulat. Bisan pa niana, kini nga basahon nakatampo sa labing mahinungdanon nga mga katuyoan sa Basahon ni Mormon—ang pagsaksi nga si Jesus mao ang Kristo ug pagpahibalo sa mga pakigsaad sa Ginoo (tan-awa ang ulohan nga pahina sa Basahon ni Mormon). Gibuhat kini pinaagi sa paghulagway sa mga panalangin nga maoy resulta kon ang mga tawo mohinulsol, moduol ngadto kang Jesukristo, ug mohimo og mga pakigsaad uban Kaniya. Nagpakita usab kini sa makadaut nga mga sangputanan nga mahitabo kon ang mga tawo molimud sa Manluluwas ug sa Iyang ebanghelyo ug mosalikway sa ilang mga pakigsaad.
Kanus-a ug asa man kini gisulat?
Ang orihinal nga mga talaan nga gigamit nga mga kapanguhaan alang sa basahon nga 4 Nephi lagmit nasulat sulod sa mga panahon A.D. 34 ug A.D. 321. Si Mormon mipamubo niadto nga mga talaan sulod sa mga panahon A.D. 345 ug A.D. 385. Wala mopahibalo si Mormon kon asa siya sa dihang iyang gisulat kini nga basahon.
Unsa man ang pipila ka mga butang nga nakalahi niini nga basahon?
Sa 49 ka mga bersikulo lamang, ang basahon nga 4 Nephi nag-istorya sa panahon sa dul-an 300 ka tuig—hapit ikatulo nga bahin sa tibuok kasaysayan sa Nephite nga gihisgutan sa Basahon ni Mormon. Ang kamubo sa 4 Nephi nakatampo sa gahum niini. Sa daklit kini nag-highlight sa kalainan tali sa kamatarung sa katawhan pagkahuman dayon sa pangalagad sa Manluluwas taliwala kanila ug sa ilang kadautan human sa upat ka henerasyon. Ang unang 18 ka mga bersikulo sa basahon naghulagway sa mga panalangin nga gitagamtam sa katilingban nga gitukod diha sa ebanghelyo ni Jesukristo. Ang nagsunod nga mga bersikulo naghatag og usa ka saksi sa makalaglag nga garbo, nagpakita kon sa unsang paagi kini nga katilingban sa hinay-hinay naluya hangtud nga hapit na kini nalukop sa kasal-anan.
Outline
4 Nephi 1:1–18 Human sa pagpangalagad ni Jesukristo, ang tanang katawhan sa tibuok yuta nakabig ug nabunyagan. Wala na nila bahina ang ilang mga kaugalingon isip mga Nephite ug mga Lamanite. Sila “aduna sa tanan nga mga butang nga alang kanilang tanan” (4 Nephi 1:3), nakasinati sila og daghang mga milagro, ug sila miuswag ug nagpuyo nga naghiusa ug malipayon sulod sa 110 ka tuig.
4 Nephi 1:19–34 Si Nephi namatay, ug ang iyang anak nga lalaki nga si Amos naghupot sa mga talaan. Sa kadugayan gipasa ni Amos ang mga talaan ngadto sa iyang anak nga lalaki nga si Amos. Daghang mga tawo motugot ni Satanas nga “[mo]kupot sa ilang mga kasingkasing” (4 Nephi 1:28). Pagkabahin-bahin, garbo, ug dili tinuod nga mga simbahan mitumaw taliwala sa katawhan. Ang dautan misugod sa paggukod sa mga sakop sa tinuod nga Simbahan ug sa “mga tinun-an ni Jesus kinsa nagpabilin uban kanila” (4 Nephi 1:30).
4 Nephi 1:35–49 Ang katawhan mibahin na usab sa ilang mga kaugalingon isip mga Nephite ug mga Lamanite. Ang mga Lamanite tuyo nga misupak sa ebanghelyo ug mitukod sa tinago nga mga kalihokan ni Gadianton. Sa katapusan, ang mga Nephite usab nahimong dautan. Namatay si Amos, ug ang iyang igsoon nga lalaki nga si Ammaron mitipig sa mga talaan sulod sa usa ka panahon sa wala pa gipugos sa Espiritu Santo sa pagtago niini.