Librarya
Leksyon 139:Mormon 5–6

Leksyon 139

Mormon 5–6

Pasiuna

Nanagna si Mormon nga ang iyang rekord motungha sa katapusang mga adlaw aron sa pagdani niadtong mobasa niini nga si Jesus mao ang Kristo. Miawhag siya niadtong mobasa sa rekord sa paghinulsol ug pagpangandam alang sa ilang kaugalingon nga paghukom sa atubangan sa Dios. Taliwala sa iyang kaugalingong katawhan, gikonsiderar og balik ni Mormon ang iyang pagluwat isip komander sa militar sa mga Nephite, miuyon sa pagpangulo pag-usab kanila sa gubat. Bisan pa man, ang katawhan midumili sa paghinulsol, ug sila gigukod sa mga Lamanite hangtud ang tibuok nasud sa Nephite nalaglag. Samtang gitan-aw ni Mormon kini nga eksena sa kamatayon ug kalaglagan, siya nagbangutan sa pagkahagsa sa iyang katawhan ug sa ilang dili kamatugtanon sa pagbalik ngadto kang Jesukristo.

Mga Sugyot alang sa Pagtudlo

Mormon 5:1–9

Nakadesidir si Mormon sa pagpangulo pag-usab sa kasundalohan sa Nephite, apan midaug ang mga Lamanite

Paghisgot og natural nga katalagman nga makahulga sa inyong dapit—sama pananglit, usa ka linog, tsunami, pagbuto sa bulkan, o bagyo. Hangyoa ang mga estudyante sa paghunahuna nga kini nga natural nga katalagman mahitabo sa ilang komunidad sa pipila lang ka adlaw.

  • Asa kamo mangayo og panabang?

Pahinumdomi ang mga estudyante nga ang mga Nephite nag-atubang og susama nga lebel sa kakuyaw, apan ang ilang umaabut nga katalagman kabahin sa espiritwal. Pahinumdumi usab ang mga estudyante nga ang mga Nephite nakiggubat ug tungod sa ilang kadautan, si Mormon midumili sa pagpangulo sa ilang kasundalohan (tan-awa sa Mormon 3:16).

Dapita ang usa ka estudyante sa pagbasa og kusog sa Mormon 5:1–2. Hangyoa ang klase sa pagsunod ug sa pag-ila kinsa ang gituohan sa mga Nephite nga makaluwas kanila gikan sa ilang mga kasakit.

  • Bisan og tinuod nga si Mormon makapangulo sa mga Nephite sa militar nga gubat, ngano man nga mituo si Mormon nga ang katawhan dili maluwas gikan sa ilang mga kasakit?

  • Unsa man ang atong makat-unan gikan sa Mormon 5:1–2 kabahin kon asa kita unang modangup alang sa tabang sa atong mga kasakit? (Kinahanglan modangup kita og una sa Dios, kinsa motubag niadtong maghinulsol ug motawag Kaniya alang sa tabang sa ilang mga kasakit.)

I-summarize ang Mormon 5:3–7 pinaagi sa pagpasabut nga ubos sa kapangulohan ni Mormon, ang mga Nephite nakasanta sa pipila ka mga pagpang-atake sa mga Lamanite. Apan sa katapusan ang mga Lamanite “miyatak sa mga katawhan sa mga Nephite uban sa ilang mga tiil” (Mormon 5:6). Samtang misibog ang mga Nephite, kadtong wala dayon nakaikyas nangalaglag.

Dapita ang usa ka estudyante sa pagbasa sa Mormon 5:8–9. Hangyoa ang klase sa pagpangita sa rason ni Mormon sa wala pagsulat og tibuok nga istorya sa mga butang nga iyang nakit-an.

  • Ngano man nga si Mormon wala na mohatag og kompleto nga deskripsyon sa iyang nasaksihan?

Mormon 5:10–24

Gipasabut ni Mormon nga ang tumong sa rekord sa Basahon ni Mormon mao ang pagdani sa katawhan sa pagtuo kang Jesukristo

Dapita ang usa ka estudyante sa pagbasa og kusog sa Mormon 5:10–11. Hangyoa ang klase sa pagsunod ug sa pag-ila og usa ka pulong nga katulo gigamit ni Mormon sa paghulagway kon unsay bation sa katawhan sa katapusang mga adlaw samtang ilang masayran ang pagkalaglag sa nasud nga Nephite. (Miingon siya nga kita “magsubo.”)

  • Unsa ang inyong nakit-an nga subo kabahin niini nga istorya?

Dad-a ang atensyon sa mga estudyante ngadto sa pamahayag ni Mormon sa Mormon 5:11 nga kon ang katawhan maghinulsol, sila unta “gakson diha sa mga bukton ni Jesus.”

  • Sa imong hunahuna unsa man ang gipasabut sa “gakson diha sa mga bukton ni Jesus”? (Mahimo nimong ipasabut nga ang pulong nga gakson nagpasabut nga gunitan og maayo o walay kabalaka.)

  • Unsay gitudlo niini nga mga pulong ngari kanato mahitungod sa sangputanan sa atong kaugalingon nga paghinulsol? (Tabangi ang mga estudyante sa pag-ila sa mosunod nga baruganan: Pinaagi sa paghinulsol, mahimo kitang “gakson diha sa mga bukton ni Jesus.” Isulat kini nga baruganan diha sa pisara.)

Aron matabangan ang mga estudyante nga makasabut niini nga baruganan, dapita ang usa kanila sa pagbasa sa mosunod nga pamahayag ni Elder Kent F. Richards sa Seventy:

“Ang tanan nga moduol mahimong ‘gakson diha sa mga bukton ni Jesus.’ [Mormon 5:11.] Ang tanang kalag mamaayo sa Iyang gahum. Ang tanang kasakit mahimong mahupay. Diha Kaniya, kita ‘makakaplag og pahulay alang sa [atong] mga kalag.’ [Mateo 11:29.] Ang atong mortal nga mga kahimtang mahimong dili mausab diha-diha dayon, apan ang atong kasakit, kabalaka, pag-antus, ug kahadlok mahimong matuhop diha sa Iyang kalinaw ug makaayo nga tambal” (“Ang Pag-ula Moayo sa Tanang Kasakit,” Ensign o Liahona, Mayo 2011, 17).

Dapita ang mga estudyante sa pagsulat og tubag sa usa sa mosunod nga mga pangutana diha sa mga notebook o sa mga scripture study journal. (Mahimo nga imong isulat sa pisara kining mga pangutana o basahon kini og hinay aron masulat kini sa mga estudyante.)

  • Kanus-a ka mibati nga “[gigakos] diha sa mga bukton ni Jesus”?

  • Unsay imong mahimo aron labaw pa nimong madawat ang paghupay, proteksyon, ug kapasayloan sa Ginoo?

Ipasabut nga ang Mormon 5:12–13 naglangkob sa panagna ni Mormon nga ang iyang mga gipanulat pagatagoan ug dayon motungha aron mabasa sa tanang katawhan. Dapita ang mga estudyante sa pagbasa sa hilum sa Mormon 5:14–15, nga mangita sa unsay tuyo sa Ginoo nga mabuhat sa mga sinulat ni Mormon alang sa katawhan sa katapusang mga adlaw. Mahimo kang mosugyot nga markahan sa mga estudyante ang mga pulong nga importante kanila.

  • Sumala sa Mormon 5:14–15, unsa ang mga katuyoan sa Basahon ni Mormon? (Siguroa nga makapadayag ang mga estudyante nga ang Basahon ni Mormon gisulat aron sa pagdani sa tanang katawhan nga si Jesus mao ang Kristo, aron sa pagtabang sa Dios nga mapatuman ang Iyang pakigsaad sa balay ni Israel, ug sa pagtabang sa kaliwatan sa mga Lamanite nga mas hingpit nga motuo sa ebanghelyo.)

Samtang magtubag ang mga estudyante nga ang mga sinulat ni Mormon gitumong sa pagdani sa mga katawhan nga si Jesus mao ang Kristo, ipakigbahin ang imong pagpamatuod kabahin niini nga mao ang mahinungdanon nga katuyoan sa Basahon ni Mormon.

  • Sa unsang paagi nga kini nga mahinungdanon nga katuyoan sa Basahon ni Mormon mopanalangin niadtong mobasa niini?

  • Sa unsang paagi ang inyong pagtuon sa Basahon ni Mormon nakatabang kaninyo nga mas hingpit nga motuo ug mohigugma ni Jesukristo?

Itudlo nga ang Basahon ni Mormon sa karon nagtabang sa kadaghanan sa paghinulsol ug aron “gakson diha sa mga bukton ni Jesus” apan naa gihapon daghang mga tawo nga nagdumili sa pagtuo kang Kristo.

Diha sa pisara sunod sa baruganan kabahin sa paghinulsol nga imong gisulat sayo sa leksyon, isulat ang mosunod: Kon magdumili kita sa paghinulsol … Dapita ang usa ka estudyante sa pagbasa og kusog sa Mormon 5:16–19, ug hangyoa ang klase sa pagpangita og mga sangputanan sa pagdumili sa mga Nephite sa paghinulsol. Hangyoa ang mga estudyante sa paggamit sa unsay ilang nadiskubrehan niini nga mga bersikulo aron makompleto ang han-ay sa mga pulong diha sa pisara. Samtang motubag sila, mahimo kang mangutana sa mosunod aron pagtabang kanila nga makasabot sa mga pulong sa mga bersikulo:

  • Unsa kaha ang gipasabut sa “walay Kristo ug Dios niini nga kalibutan”? (Mormon 5:16). (Ang mga tubag mahimong maglakip nga nagpasabut kini sa pagpuyo nga walay pagtuo kang Jesukristo o sa Langitnong Amahan ug walay balaang impluwensya ug paggiya.)

  • Ang tahup usa ka gaan nga panit sa gawas sa lugas. Inig ani sa lugas, ang tahup ilabay. Unsa kaha ang gipasabut sa mga pulong “gipadpad ingon og tahup tungod sa ka kusog sa hangin”? (Mormon 5:16).

  • Sama sa unsa kaha nga maanaa sa barko nga walay layag o timon ug walay angkla? (Tan-awa sa Mormon 5:18). Sa unsang paagi kini nga sitwasyon susama sa mga Nephite?

  • Unsay gitudlo sa mga pulong ni Mormon kabahin niadtong nagdumili sa paghinulsol? (Ang mga tubag sa mga estudyante kinahanglan magpahayag nga ang pagdumili sa paghinulsol mosangpot sa ka walay giya gikan sa Ginoo. Kompletuha ang pamahayag sa pisara pinaagi sa pagsulat sa mosunod nga kamatuoran: Kon magdumili kita sa paghinulsol, ang Espiritu mopahawa ug mawagtang kanato ang paggiya sa Ginoo.)

Hangyoa ang mga estudyante sa pagpamalandong sa hilum kon giunsa nila pagkakita niini nga baruganan sa ilang mga kinabuhi o sa kinabuhi sa uban.

Dapita ang mga estudyante sa pagribyu og dali sa Mormon 5:11, 16–18 ug ang duha ka mga baruganan nga imong gisulat diha sa pisara.

  • Sa imong kaugalingong mga pulong, unsaon man nimo sa pagsulti ang kalainan tali sa sangputanan sa sinsiro nga paghinulsol ug ang sangputanan sa pagdumili sa paghinulsol?

Dapita ang mga estudyante sa pagbasa sa hilum sa Mormon 5:22–24, nga mangita kon unsay giawhag ni Mormon nga buhaton sa mga tawo sa katapusang mga adlaw. Mahimo nimong isugyot nga markahan sa mga estudyante ang ilang nakit-an

Ipamatuod ang kamatuoran sa duha ka managlahi nga baruganan nga anaa sa pisara.

Mormon 6

Si Mormon mihisgot sa katapusan nga gubat sa mga Nephite ug nasubo sa kalaglagan sa iyang katawhan

Ipangutana ang mosunod:

  • Unsa kaha ang inyong bation sa kamatayon sa usa ka hinigugma nga matinud-anon sa Dios sa tibuok niyang kinabuhi?

  • Unsa kaha ang inyong bation sa kamatayon sa usa ka hinigugma nga masinupakon sa mga sugo sa Dios sa tibuok niyang kinabuhi?

Ipasabut nga mibati og hilabihang kasubo si Mormon sa kamatayon sa tanan niyang katawhan tungod kay siya nasayud nga dili sila andam nga moatubang sa Dios. I-summarize ang Mormon 6:1–6 pinaagi sa pagpasabut nga ang mga Lamanite mitugot sa mga Nephite nga magpundok sa yuta sa Cumorah alang sa usa ka gubat. Nagkatigulang na si Mormon, ug siya nasayud nga kini mao ang “katapusan nga pakigbisog sa [iyang] mga katawhan” (Mormon 6:6). Iyang gisalig ang pipila ka sagrado nga mga rekord ngadto sa iyang anak nga lalaki nga si Moroni, ug iyang gitipigan ang uban nga mga rekord sa Bungtod sa Cumorah. Iyang girekord unsa ang iyang nasaksihan sa katapusan nga pagkalaglag sa iyang katawhan. Hangyoa ang mga estudyante sa pagbasa sa hilum sa Mormon 6:7–15, nga maghunahuna kon unsa kaha ang gibati ni Mormon samtang iyang gisulat kini nga mga pulong.

  • Ngano kaha ang mga Nephite nagpaabut sa kamatayon uban sa “mangilngig nga kahadlok”? (Mormon 6:7).

Basaha og kusog ang Mormon 6:16–22 ngadto sa mga estudyante samtang magsunod sila sa ilang mga kasulatan. Dayon hangyoa sila sa pagsulat sa mga notebook o scripture study journal kabahin sa mga hunahuna ug impresyon nga moabut kanila samtang nagbasa sila ug naminaw niini nga mga bersikulo. Human sa igong panahon, mahimo kang mohatag kanila og kahigayunan sa pagpakigbahin sa pipila ka mga hunahuna nga ilang nasulat.

Ipamatuod ngadto sa mga estudyante ang gugma nga aduna ang Langitnong Amahan, si Jesukristo, mga propeta, mga lider, ug mga ginikanan alang kanila. Awhaga sila sa pagbaton og hugot nga pagtuo kang Jesukristo ug paghinulsol sa ilang mga sala aron sila “gakson diha sa mga bukton si Jesus” (Mormon 5:11).

Komentaryo ug Background nga Impormasyon

Mormon 5:11. “Gakson diha sa mga bukton ni Jesus”

Si Elder Russell M. Nelson sa Korum sa Napulog Duha ka mga Apostoles mipasabut sa koneksyon tali sa pulong nga Pag-ula ug ang mga pulong “gakson diha sa mga bukton ni Jesus”:

“Mahinungdanon nga kahulugan makita sa pagtuon sa pulong nga pag-ula diha sa mga pinulongan nga Semitic sa mga panahon sa Daang Tugon. Sa Hebreohanon, ang nag-unang pulong alang sa pag-ula mao ang kaphar, usa ka berbo nga nagpasabut og ‘pagtabon’ o ‘pagpasaylo.’ Duol og koneksyon mao ang Aramaic ug Arabic nga pulong nga kafat, nagpasabut ‘paggakos’—walay duda nga konektado sa ritwal sa Ehipto nga gakos. Ang mga paghisgot niana nga gakos makita diha sa Basahon ni Mormon. Adunay namahayag nga ‘ang Ginoo mitubos sa akong kalag … ; ako nakakita sa iyang himaya, ug ako giliyokan sa kahangturan sa mga bukton sa iyang gugma.’[2 Nephi 1:15.] Dunay lain nga mitanyag sa mahimayaong paglaum sa atong ‘paggakos diha sa mga bukton ni Jesus.’ [Mormon 5:11.]” (“The Atonement,” Ensign, Nob. 1996, 34).

Mormon 5:16. Kon ang Espiritu sa Ginoo mopahawa

Si Presidente Harold B. Lee mitudlo:

“Si Mormon mihulagway sa ubang katawhan, iyang katawhan, diin ang espiritu sa Ginoo mipahawa [tan-awa sa 2 Nephi 26:11]. … Daw tataw ngari kanako nga ang iyang gisulti dili lamang ang pagkawalay kasarangan sa pag-angkon sa pakig-uban o ang gasa sa Espiritu Santo, apan naghisgot siya niana nga kahayag sa kamatuoran [ang Kahayag ni Kristo] diin ang tanan nga natawo dinhi sa kalibutan makaangkon ug dili moundang sa pag-impluwensya sa indibidwal gawas kon mawala kini pinaagi sa iyang pagpakasala” (sa Conference Report, Abr. 1956, 108).

Mormon 6:16–22. Ayaw isalikway ang bukas nga mga bukton ni Kristo

Nagbangutan si Mormon sa kamatayon sa iyang katawhan ug nasubo nga wala sila mausab sa ilang mga pamaagi. Miingon siya nga kon ilang ihikling ang ilang garbo ug maghinulsol sa ilang mga sala, ang ilang pakig-uban pag-usab sa Manluluwas hingpit unta nga kalipay (tan-awa sa Mormon 6:17). Si Presidente James E. Faust sa Unang Kapangulohan mihulagway sa kalipay nga atong bation kon nangandam kita sa atong kaugalingon sa pagbarug sa atubangan sa Ginoo panahon sa Paghukom:

“Nagtinguha kita alang sa katapusan nga panalangin sa Pag-ula—nga mamahimong usa uban Kaniya, nga maanaa sa Iyang balaan nga presensya, aron tagsa-tagsa nga tawagon sa pangalan samtang Siya mahigugmaong mo-welcome kanato sa panimalay uban sa masilaw nga pahiyum, mangamay kanato uban sa bukas nga mga bukton aron gaksun sa Iyang walay kinutuban nga gugma. Unsa ka mahimayaong makapahinuklog nga kasinatian kini kon mobati kita nga takus nga maanaa sa Iyang atubangan! Ang libre nga gasa sa Iyang halangdon nga maulaong sakripisyo alang sa matag usa kanato mao lang ang paagi nga kita mahimaya nga makabarug sa Iyang atubangan ug makakita sa Iyang nawong. Ang madaugon nga mensahe sa Pag-ula mao ang hingpit nga gugma sa Manluluwas alang sa matag usa ug kanatong tanan. Gugma kini nga puno sa kalooy, pailub, grasya, kaangayan, mainantuson, ug, ilabi, pagpasaylo.

“Ang dautang impluwensya ni Satanas moguba sa bisan unsang paglaum nato sa pagbuntog sa atong mga sayop. Iya kitang ipabati nga daw nasalaag kita ug wala nay paglaum. Ang nakalahi, si Jesus mokab-ut kanato aron sa pagbayaw kanato. Pinaagi sa atong paghinulsol ug sa gasa sa Pag-ula, makapangandam kita nga mamahimong takus sa pagbarug sa Iyang presensya” (“The Atonement: Our Greatest Hope,” Ensign, Nob. 2001, 20).