Leksyon 75: Alma 9–10

Leksyon 75

Alma 9–10

Pasiuna

Si Alma ug Amulek gamay ra og kalampusan nga naangkon sa pagsangyaw ngadto sa mga tawo sa Ammonihah tungod kay si Satanas adunay “dako nga gahum diha sa mga kasingkasing sa mga katawhan” (tan-awa sa Alma 8:9). Daghan kanila nagpatig-a sa ilang mga kasingkasing batok sa ebanghelyo, ug misupak sila sa pagdapit nilang Alma ug Amulek sa paghinulsol. Bisan pa niana, si Alma ug Amulek nagmatinud-anon sa pagtawag kanila ngadto sa paghinulsol, nagpamatuod nga tungod kay sila natudloan sa kamatuoran ug nakasinati sa gahum sa Dios, ang Ginoo naglaum nga sila makahimo og mas matarung kay sa mga Lamanite, kinsa wala matudloi sa kamatuoran. Si Alma ug Amulek mitudlo nga kon ang mga tawo sa Ammonihah dili maghinulsol, masagubang nila ang kalaglagan. Mitudlo usab sila sa mga tawo nga ang katubsanan posible lamang pinaagi ni Jesukristo.

Mga Sugyot alang sa Pagtudlo

Alma 9

Si Alma mipasidaan sa mga tawo sa Ammonihah sa paghinulsol ug sa pag-andam alang sa pag-abut ni Jesukristo

I-presentar ang mosunod nga sitwasyon: Duha ka mga estudyante naabut sa eskwelahan, ug ang ilang magtutudlo mipahibalo nga kinahanglan gayud silang mokuha og usa ka kalit-kalit nga pasulit. Ang unang estudyante nagtambong sa klase kada adlaw, apan ang ikaduhang estudyante nakapalta og duha ka semana tungod kay siya nasakit.

Hain nga estudyante ang inyong gilauman nga makahimo og mas maayo sa pasulit?

Dapita ang mga estudyante sa pagbasa og kadali sa Alma 9:1–7, nga mangita sa mga pulong nga nagpakita kon unsa ka maayo ang pagsabut sa mga tawo sa Ammonihah sa ebanghelyo ug sa gahum sa Dios. Hangyoa sila sa pagreport kon unsay ilang nadiskubrihan.

Dapita ang pipila ka estudyante nga magpuli-puli sa pagbasa og kusog sa Alma 9:8–13. Hangyoa ang klase sa pagpangita sa mga pulong nga nagpakita kon kining mga tawo natudloan ba sa ebanghelyo o nakaangkon og kahibalo sa gahum sa Dios. (Ang mga tubag kinahanglang maglakip sa “kamo nahikalimot” ug “wala ba kamo mahinumdom.”)

Nakat-on ba gayud ang mga tawo sa Ammonihah sa ebanghelyo o natudloan ba mahitungod sa gahum sa Dios?
Unsa ang uban nga mga rason nganong ang mga tawo nga natudloan sa ebanghelyo mahimong mahikalimot unsa ang ilang nakat-unan o wala masabti kon unsa ang gitudlo kanila?

Dapita ang mga estudyante sa pagbasa og kadali sa Alma 8:9, 11; 9:5, 30; ug 12:10–11, nga mangita sa mga pulong nga gisugyot kon nganong ang mga tawo sa Ammonihah nahikalimot o wala makasabut sa mga butang nga gitudlo kanila. (“Si Satanas adunay dako nga gahum diha sa [ilang] mga kasingkasing”; “sila mopatig-a sa ilang mga kasingkasing”; “sila mga tig-a og kasingkasing ug tikig og liog nga mga katawhan”; “[ilang] mga kasingkasing hilabihan kaayo ka tig-a batok sa pulong sa Dios.”)

Kopyaha ang mosunod nga tsart diha sa pisara, ug ipakopya kini sa mga estudyante diha sa notebook o mga scripture study journal. (Siguroha nga dunay daghang bakante nga kasulatan.)

	Ang espirituhanong background sa mga tawo	Unsa ang gilauman sa Ginoo sa mga tawo, ug unsa ang gisaad sa Ginoo sa mga tawo
Mga Lamanite(Alma 9:14–17)
Mga tawo sa Ammonihah (Alma 9:18–24)

Ipares-pares ang mga estudyante. Dapita ang matag pares sa pagkompleto sa tsart gamit ang mga pakisayran sa kasulatan. Human nila makompleto ang tsart, hangyoa ang mga estudyante nga magsulat og usa ka sentence ubos sa ilang tsart nga nag-summarize unsa ang ilang nakat-unan. Dapita ang pipila kanila sa pagpakigbahin unsa ang ilang nasulat. Ang mga estudyante mahimong mogamit og lain-laing mga pulong, apan ang ilang mga tubag kinahanglan magpakita sa mosunod nga kamatuoran: Ang Ginoo naglaum og mas dako nga kamasulundon gikan niadtong kinsa nakadawat sa ebanghelyo ug mga panalangin sa ebanghelyo. Aron matabangan ang mga estudyante nga makita kon sa unsa nga paagi kining baruganan magamit sa ilang mga kinabuhi, ipangutana ang mosunod:

Ngano kaha nga ang Ginoo taas og gilauman sa mga tawo sa Ammonihah?
Nganong makiangayon alang sa Ginoo nga molaum og mas dako niadtong kinsa nakadawat og kahibalo ug mga panalangin sa ebanghelyo?

Ipasabut ang mga pulong “usa ka pinalabi kaayo nga mga katawhan sa Ginoo” sa Alma 9:20. (Mahimo nimong isugyot nga markahan sa mga estudyante kini nga mga pulong.)

Sa unsa nga mga paagi nga ang mga miyembro sa Simbahan karon “usa ka pinalabi kaayo nga mga katawhan sa Ginoo”?
Sumala sa Alma 9:19–23, unsa nga mga gasa ug mga panalangin ang nasinati sa mga Nephite (lakip sa mga katawhan sa Ammonihah) tungod kay sila mga katawhan sa pakigsaad sa Ginoo?
Unsa nga mga gasa ug mga panalangin ang inyong nasinati tungod kay kamo mga miyembro sa Simbahan sa Ginoo?
Unsa ang pipila ka butang nga gilauman sa Ginoo kanato tungod sa mga gasa ug mga panalangin nga atong nadawat gikan Kaniya?

I-assign sa katunga sa klase ang pagtuon sa Alma 9:24–27 sa indibidwal nga paagi ug ang laing katunga sa klase magtuon sa Alma 9:28–30 sa indibidwal nga paagi. Hangyoa ang mga estudyante sa pagpangandam sa pag-summarize sa gi-assign kanila nga mga tudling sa ilang kaugalingong mga pulong. Isulat ang mosunod nga mga pangutana diha sa pisara aron magiyahan sila samtang nag-andam sa ilang mga summary:

Unsa ang mga ebidensya nga inyong makita niining mga bersikulo nga ang Ginoo naglaum og mas dako nga pagkamasulundon gikan niadtong nakaangkon og mas dakong kahibalo sa ebanghelyo?

Unsa nga mga panalangin ang gipahinumdom ni Alma sa mga tawo nga ilang madawat?

Unsa ang gisulti ni Alma nga gikinahanglang buhaton sa mga tawo aron makadawat niining mga panalangin?

Human ang mga estudyante nakabasa og igong panahon, pagtawag og usa ka estudyante gikan sa matag katunga sa klase aron sa pag-summarize sa gi-assign nga mga tudling. Dayon pangutan-a ang klase:

Unsa ang mga paagi nga kita makapabilin nga tinuod ngadto sa kahayag ug kahibalo nga atong nadawat? (Ang mga estudyante mahimong mosugyot sa pagtuon sa kasulatan, pagpahayag og pagpasalamat ngadto sa Dios alang sa atong mga panalangin, regular nga pagpadayag sa atong mga pagpamatuod, pagtambong sa mga miting sa Simbahan kada semana, pagsulat og journal, ug uban pa.)

Alma 10:1–12

Si Amulek mipatalinghug sa tawag sa Ginoo ug mipamatuod sa balaanong tawag ni Alma

Ipasabut nga human nakapamulong si Alma sa katawhan, sila nasuko ug gustong mobalhug niya sa bilanggoan. Maisugon nga namulong si Amulek sa katawhan ug midugang sa iyang pagsaksi ngadto sa pagsaksi ni Alma. (Tan-awa sa Alma 9:31–34.) I-summarize ang Alma 10:1–4 pinaagi sa pagpasabut nga si Amulek usa ka kaliwat ni Nephi. Usa siya ka kugihan nga tawo kinsa nakaangkon og dakong katigayunan. Siya inila usab ug usa ka “dili yano og dungog” sa iyang mga sakop sa pamilya ug sa mga higala (tan-awa sa Alma 10:4). Hinoon, wala siya nagpakabuhi sumala sa mga kamatuoran sa ebanghelyo nga natudlo kaniya.

Ngano kaha nga mahimong makatabang alang kang Amulek, kinsa inila sa komunidad, nga mag-uban ni Alma?

Pangutan-a ang mga estudyante kon giunsa nila sa pagmata niining buntaga. (Sama pananglit, nakamata ba sila pinaagi sa alarm clock, o aduna bay laing sakop sa pamilya ang mipukaw kanila? Kon aduna kay alarm clock o usa ka hulagway sa alarm clock, ikonsiderar ang pagpakita niini.) Ipangutana sa mga estudyante kon pila kanila ang kinahanglang “tawagon” og sobra kausa aron mobangon sa higdaanan.

Dapita ang usa ka estudyante sa pagbasa og kusog sa Alma 10:5–6. Hangyoa ang mga estudyante sa pagpangita sa tubag ni Amulek ngadto sa espirituhanong “tawag sa pagpahigmata” nga iyang nadawat gikan sa Ginoo.

Unsa kaha ang gipasabut ni Amulek sa dihang siya miingon “ako wala mopatalinghug” ug “ako wala masayud”?
Sa unsa nga mga paagi nga ang Ginoo nagtawag kanato? (Ang posible nga mga tubag naglakip sa mga pag-aghat sa Espiritu Santo, mga instruksyon gikan sa mga ginikanan ug mga lider sa Simbahan, ug mga calling sa Simbahan.)

Dapita ang mga estudyante sa pagbasa sa hilum sa Alma 10:7–10, nga mangita sa mahinungdanong punto sa pambukas nga pagpamatuod ni Amulek ngadto sa iyang mga tawo.

Sa unsang paagi nga ang mga kasinatian ni Amulek miandam kaniya nga mamahimong ikaduhang saksi sa mensahe ni Alma ngadto sa katawhan sa Ammonihah?
Sa inyong hunahuna sa unsang paagi nga ang desisyon ni Amulek sa pagsunod nakahimo og kalainan sa iyang kinabuhi?

Dapita ang usa ka estudyante sa pagbasa og kusog sa Alma 10:11–12, ug hangyoa ang klase sa pagpangita og mga paagi nga ang ubang tawo naimpluwensyahan sa desisyon ni Amulek sa pagpatalinghug sa tawag sa Ginoo. Dapita sila sa pagpakigbahin unsay ilang nakit-an.

Isulat ang mosunod nga baruganan diha sa pisara: Kon atong dunggon ug sundon ang tawag sa Ginoo, ang mga panalangin moabut kanato ug ngadto sa uban. (Mahimong mosugyot ka nga ang mga estudyante mosulat niini nga baruganan diha sa ilang mga kasulatan tupad sa Alma 10:11–12.) Aron matabangan ang mga estudyante nga mabati ang kamatuoran ug ang kaimportante niining baruganan, ipangutana:

Kanus-a ang panahon nga inyong nabati nga kamo napanalanginan tungod kay misunod kamo sa tawag gikan sa Ginoo?
Sa unsang paagi nga inyong nakita ang mga panalangin nga moabut ngadto sa uban tungod kay kamo o ang tawo nga inyong kaila mitubag sa tawag sa Ginoo?
Sa unsang paagi kining mga kasinatian nakaimpluwensya sa inyong tinguha sa pagpaminaw ug pagsunod sa mga tawag gikan sa Ginoo?

Alma 10:13–32

Si Amulek mitubag niadtong kinsa misupak kaniya ug miawhag sa mga tawo sa paghinulsol

Isulat sa pisara ang mosunod nga mga pulong:

Mahimong masuko ug magdepensa [managang]
Magduha-duha sa kaimportante sa tambag
Sawayon ang tawo kinsa mihatag sa tambag
Kwestyunon o lantugion ang tambag
Mapainubsanong maminaw ug mosunod

Hangyoa ang mga estudyante nga ikonsiderar sa hilum hain sa mga pulong diha sa pisara ang pareho kon unsa kaha ang ilang reaksyon kon ang usa ka ginikanan o lider sa Simbahan mokorihir kanila o mohangyo kanila sa pag-usab sa usa ka butang nga ilang gibuhat.

Unsa ang pipila ka mga rason nga ang mga tawo motubag sa pagkorihir niining mga paagi?

Isulat ang mosunod nga pakisayran sa kasulatan diha sa pisara: Alma 9:2–3; Alma 9:4–5; Alma 10:13, 16–17; Alma 10:24, 28–30

Dapita ang mga estudyante sa pagpili og usa sa mga tudling diha sa pisara aron matun-an sa tinagsa-tagsa. Hangyoa sila sa pagpangita kon sa unsang paagi nga ang tudling sa kasulatan naghulagway sa katawhan sa Ammonihah nga nagtubag ngadto sa mensahe nilang Alma ug Amulek. Papilia usab sila sa mga pulong diha sa pisara nga nagpakita gayud sa tubag sa mga tawo. Human sa igong panahon, hangyoa ang mga estudyante sa pagpasabut kon hain sa lima ka mga tubag diha sa pisara ang labing maayong napares sa ilang natun-an.

Nganong ang unang upat ka mga tubag diha sa pisara ang makuyaw sa espirituhanong paagi?

Dapita ang pipila ka estudyante nga magpuli-puli sa pagbasa og kusog sa Alma 10:19–23. Awhaga sila sa pagpangita sa unsa ang gitudlo ni Amulek mahitungod sa mga sangputanan sa sala ug sa pagsalikway sa pagkamatarung.

Aron matabangan ang mga estudyante sa pagkonsiderar sa kamalaglagon sa mga sangputanan sa dili paghinulsol sa atong mga sala, basaha ang mosunod nga pamahayag ni Presidente Gordon B. Hinckley:

Imahe

President Gordon B. Hinckley

“Adunay hilabihang kadautan sa bisan asang dapit. Ang tintasyon, uban sa makapahinam kaayong mga impluwensya, mao ang nagpalibut kanato. Nawad-an kita og pipila ka tawo gumikan niining makadaut nga pwersa, subo kaayo. Atong gikaguol ang matag usa nga nawala. Kita motabang kanila, sa pagluwas kanila, apan sa daghang mga kahimtang ang atong mga tabang gisalikway. Makalilisang ang dalan nga ilang gisubay. Mao kana ang dalan nga mosangput sa kalaglagan” (“My Testimony,” Ensign, Mayo 2000, 69).

Unsa ang pipila ka makadaut nga mga sangputanan nga moabut ngadto sa mga indibidwal o grupo sa mga tawo kon sila mosupak sa mga sugo sa Dios?

Kon aduna pay oras, dapita ang mga estudyante sa pagsulat sa mga tubag sa mosunod nga pangutana:

Sa unsang paagi nga ang mga kamatuoran nga inyong nakat-unan karon nga leksyon makapanalangin kaninyo?

Komentaryo ug Background nga Impormasyon

Alma 9:19–23. “Human makaangkon og dako nga kahayag ug daghan nga mga kasayuran nga gihatag ngadto kanila”

Ang katawhan sa Ammonihah nagsagubang og mas dakong sangputanan sa ilang kadautan kay sa mga Lamanite tungod kay ang katawhan sa Ammonihah nakadawat og mas dakong kahibalo sa ebanghelyo. Ang mosunod nga pamahayag ni Sister Sheri L. Dew, kinsa miserbisyo isip sakop sa kinatibuk-ang kapangulohan sa Relief Society, nagpasabut ngadto sa kababayen-an sa Simbahan, apan kini magamit sa tanang miyembro sa Simbahan:

“Lahi kita. Lahi kita tungod sa atong mga pakigsaad, sa atong espirituhanong mga pribilehiyo, ug sa mga responsibilidad nga nalakip sa duha. Natugahan kita sa gahum ug nagasahan sa Espiritu Santo. Kita adunay buhi nga propeta nga naggiya kanato, mga ordinansa nga nagbugkos kanato ngadto sa Ginoo ug sa usag usa, ug ang gahum sa priesthood sa atong taliwala. Nakasabut kita kon asa kita nagbarug diha sa talagsaong plano sa kalipay. Ug nasayud kita nga ang Dios mao ang atong Amahan ug ang Iyang Anak mao ang atong walay kapakyasan nga Tigpataliwala.

“Uban niining mga pribilehiyo moabut ang talagsaong responsibilidad, tungod kay ‘kaniya ngadto kinsa daghan ang gihatag daghan ang gikinahanglan’ (D&P 82:3)” (“We Are Women of God,” Ensign, Nob. 1999, 98).

Alma 10:6–11. Ang pagpatalinghug sa tawag sa Ginoo nagdala og mga panalangin ngadto sa uban

Si Presidente Thomas S. Monson mipakigbahin og usa ka istorya nga nagpakita sa kaimportante sa pagsunod sa pagdasig sa Espiritu Santo:

“Usa ka hapon ako naglangoy sa Deseret Gym, naglantaw sa kisame samtang naglangoy nga patighaya balik-balik sa isigka kilid. Sa hilum nga paagi, apan klaro gayud kaayo, may misantop sa akong hunahuna: ‘Naglangoy-langoy lang ka dinhi nga hapit wala naglisud, samtang ang imong higala nga si Stan nagluya sa iyang higdaanan sa ospital, dili makalihok.’ Akong nabati ang pag-aghat: ‘Adto sa ospital ug hatagi siya og panalangin.’

“Mihunong ako sa paglangoy, nag-ilis, ug nagdali-dali sa pag-adto sa lawak ni Stan sa hospital. Ang iyang higdaanan walay tawo. Usa ka nurse ang miingon nga siya anaa sa iyang wheelchair sa swimming pool, nag-andam alang sa therapy. Nagdali-dali ako ngadto sa dapit, ug didto si Stan, nag-inusara, sa kilid sa lawom nga bahin sa pool. Nagtimbayahay kami sa usag usa ug mibalik sa iyang lawak, diin gihatag ang usa ka panalangin sa priesthood.

“Sa hinay-hinay apan sigurado, ang kusog ug paglihok mibalik sa mga paa ni Stan. …

“Kanunayng mamulong si Stan sa mga miting sa Simbahan ug magsulti sa kaayo sa Ginoo ngadto kaniya. Sa uban nagpadayag siya sa bati kaayo nga paghunahuna gumikan sa depresyon nga miputos kaniya nianang hapona samtang siya milingkod sa iyang wheelchair sa kilid sa pool, mora og gisilutan, ngadto sa usa ka kinabuhi sa pagkadesperado. Siya naghisgut kon giunsa niya pagpamalandong ang kapilian. Sayon kaayo nga itulod ang gikalagutan nga wheelchair ngadto sa malinawong tubig sa lawom nga pool. Ang kinabuhi dayon matapos. Apan nianang tukmang higayon nakit-an ko niya, ang iyang higala. Nianang adlawa si Stan nakat-on sa literal nga paagi nga kita wala mag-inusarang maglakaw. Ako, usab, nakat-on og leksyon nianang adlawa: Ayaw , ayaw, ayaw gayud ilangay ang pagsunod sa usa ka pag-aghat” (“The Spirit Giveth Life,” Ensign, Mayo 1985, 70).

Alma 10:22–23. “Mga pag-ampo sa mga matarung”

Hinumdumi ang epekto sa mga pag-ampo sa mga matarung ngadto sa katawhan sa Ammonihah. Sa kaulahian, ang mga pag-ampo sa mga matarung nakapalikay usab sa mga Nephite gikan sa pagkagun-ob atol sa mga panahon ni Kapitan Moroni ug Samuel nga Lamanite (tan-awa sa Alma 62:40; Helaman 13:12–14).

Si Presidente Spencer W. Kimball misulti sa mosunod mahitungod sa mga pag-ampo nga gihalad sa atong panahon:

“Adunay daghang matarung ug matinud-anon kinsa nagsunod sa tanang kasugoan ug kansang mga kinabuhi ug mga pag-ampo nakapabilin sa kalibutan nga luwas gikan sa kalaglagan” (“Voices of the Past, of the Present, of the Future,” Ensign, Hunyo 1971, 16).

Sa higayon nga ang mga matarung nangamatay o nawala na gikan sa Ammonihah, ang mga pag-ampo sa mga matarung mihunong sa pagpanalipod sa siyudad, ug “matag buhi nga kalag sa mga Ammonihahite namatay” pinaagi sa mga Lamanite (Alma 16:9).