3 Nephi 23

Pasiuna

Paghuman og kutlo sa mga pulong ni Isaias (tan-awa sa 3 Nephi 22), si Jesukristo mimando sa mga Nephite sa pagpangita sa mga pulong niini nga propeta Siya miingon nga ang mga pulong ni Isaias usa ka panalangin tungod kay si Isaias “namulong bahin sa tanan nga mga butang mahitungod sa akong mga katawhan nga sakop sa balay ni Israel” (3 Nephi 23:2). Siya miingon usab nga ang tanang mga gipamulong ni Isaias natuman na o matuman pa. Dayon ang Manluluwas misugo sa mga Nephite sa pagpangita sa mga pulong sa mga propeta ug misugo kanila nga dugangan ang ilang mga rekord.

Mga Sugyot alang sa Pagtudlo

3 Nephi 23:1–5

Si Jesukristo mimando sa mga tawo sa pagsiksik sa mga pulong sa mga propeta

Isulat ang mosunod nga mga pulong diha sa pisara: Mga panalangin gumikan sa akong pagtuon sa kasulatan. Hangyoa ang mga estudyante sa pagpamalandong sa ilang kasinatian sa pagtuon sa Basahon ni Mormon sa panimalay ug sa seminary niining tuiga. Dapita sila sa pagduol sa pisara ug isulat ang usa ka pulong o mubo nga hugpong sa mga pulong nga maghulagway sa usa ka panalangin nga miabut sa ilang kinabuhi isip resulta sa pagtuon sa kasulatan. Mahimo kang mohangyo og pipila ka estudyante sa paghulagway nga may dugang detalye kon unsay ilang gisulat. Dayon tudloa ang mga panalangin nga nasulat diha sa pisara.

Nganong mapanalanginan man kita sa ingon niining mga paagiha kon magbasa kita sa mga kasulatan?

Hangyoa ang mga estudyante sa paghinumdom sa miaging leksyon kon kang kinsang mga pulong ang gikutlo ni Jesukristo samtang nagtudlo Siya sa mga Nephite. (Mga pulong ni Isaias.) Dapita ang usa ka estudyante sa pagbasa og kusog sa 3 Nephi 23:1–3. Hangyoa ang klase sa pagsunod, nga mangita sa unsay gisulti sa Manluluwas nga kinahanglan natong buhaton sa mga pulong ni Isaias. Mahimo nimong isugyot nga markahan sa mga estudyante ang mga pulong niining mga bersikulo nga makahuluganon ngadto kanila. Dapita sila sa pagpakigbahin unsa ang ilang nadiskubrihan.

Nganong gusto man sa Ginoo nga siksikon sa mga katawhan ang mga pulong ni Isaias? (Tan-awa sa 3 Nephi 23:2–3.)
Nganong usa man ka panalangin ang masayud nga ang tanang mga pulong ni Isaias matuman?

Dapita ang usa ka estudyante sa pagbasa og kusog sa 3 Nephi 23:4–5. Ipasabut nga human ang Manluluwas miingon nga siksikon ang mga pulong ni Isaias, Siya miingon nga “siksika ang mga propeta.” Isulat ang mosunod nga kamatuoran diha sa pisara: Ang Manluluwas mimando nato nga magkugi sa pagsiksik sa mga pulong ni Isaias ug sa ubang mga propeta.

Sumala sa 3 Nephi 23:5, unsay angay natong buhaton aron maluwas? Sa unsang paagi nga ang mga pulong sa mga propeta makatabang kanato sa pagsunod niining mga sugo?
Sa unsang mga paagi nga ang makugihon nga pagsiksik sa mga pulong sa mga propeta lahi kay sa pagbasa lang sa mga pulong sa mga propeta? Ngano kaha nga importante ang makugihon nga pagsiksik sa mga pulong ni Isaias ug sa ubang mga propeta?
Unsa nga mga pamaagi sa pagtuon sa kasulatan ang labing maayong makatabang ninyo nga ang pagsiksik sa mga pulong ni Isaias ug sa ubang mga propeta mahimong makahuluganong bahin sa inyong kinabuhi?

Dapita ang usa ka estudyante sa pagbasa sa mosunod nga pamahayag ni Elder Merrill J. Bateman sa Seventy:

“Adunay piho nga mga panalangin nga maangkon kon ang usa ka tawo magsiksik sa mga kasulatan. Kon ang usa ka tawo magtuon sa mga pulong sa Ginoo ug mosunod niini, siya mas mapaduol ngadto sa Manluluwas ug makabaton og mas dakong tinguha sa pagpuyo og matarung nga kinabuhi. Ang gahum sa pagbatok sa tintasyon magkadako, ug ang espirituhanong mga kahuyang mabuntog. Mamaayo ang espirituhanong mga samad” (“Coming unto Christ by Searching the Scriptures,” Ensign, Nob. 1992, 28).

Agig dugang sa mga kasulatan, asa man nato makit-an ang mga pulong sa mga propeta?

Hangyoa ang mga estudyante sa pagtubag sa mosunod nga pangutana diha sa mga notebook o mga scripture study journal:

Unsa nga mga kausaban ang inyong mahimo aron mas makugihon sa pagtuon sa mga pulong sa mga propeta?

Dapita ang pipila ka mga estudyante sa pagpamatuod sa mga panalangin nga moabut gumikan sa pagsiksik sa mga pulong sa mga propeta.

3 Nephi 23:6–14

Ang Manluluwas misugo sa Iyang mga disipulo sa pagdugang og usa ka importante nga panghitabo ngadto sa ilang rekord sa kasulatan

Hangyoa ang pipila ka mga estudyante sa paghingalan sa ilang paborito nga mga istorya diha sa Basahon ni Mormon. Ilista sa pisara ang ilang mga tubag. Unya papasa ang usa sa mga tubag. Hangyoa ang mga estudyante sa paghunahuna nga si Mormon o si Nephi o ang laing tigtipig sa rekord mibaliwala sa paglakip niana nga istorya.

Unsa ang importanting mga leksyon nga mahimong mawala gikan sa Basahon ni Mormon kon kini nga istorya wala gilakip?

Ipasabut nga sa dihang ang Manluluwas mitudlo sa mga Nephite, Siya mipasabut nga ang ilang mga tigtipig sa rekord mibaliwala sa paglakip sa usa ka importanting panghitabo agi og katumanan sa panagna. Hangyoa ang pipila ka estudyante nga magpuli-puli sa pagbasa og kusog sa 3 Nephi 23:6–13. Hangyoa ang klase sa pagsunod, nga mangita kon unsa ang wala marekord sa mga Nephite.

Ang mga Nephite aduna nay rekord sa mga panagna ni Samuel (tan-awa sa Helaman 14:25). Ngano kaha nga kini importante alang kanila nga adunay usa ka rekord sa katumanan niini?

Ipasabut nga bisan og wala kita sugoa sa pagtipig og usa ka rekord sa kasulatan alang sa Simbahan, gitambagan kita sa pagtipig og personal nga mga journal.

Sa unsang paagi nga ang tambag sa Manluluwas diha sa 3 Nephi 23:6–13 magamit sa atong mga paningkamot sa pagtipig og personal nga mga journal?

Aron matabangan ang mga estudyante nga makakita og usa ka paagi nga sila makatipig og usa ka journal, dapita ang usa ka estudyante sa pagbasa og kusog sa mosunod nga kasinatian nga gipakigbahin ni Presidente Henry B. Eyring sa Unang Kapangulohan:

Imahe

President Henry B. Eyring

“Dugay akong nakauli gikan sa usa ka buluhaton sa Simbahan. Mingitngit na. Ang akong ugangang lalaki, kinsa nagpuyo duol namo, misurprisa kanako samtang naglakaw ako padulong sa atubangang pultahan sa akong balay. Nagpas-an siya og mga tubo, kusog kaayong naglakaw ug nagsul-ob sa iyang saput pangtrabaho. Nasayud ko nga siya naghimo og sistema sa pagbomba og tubig gikan sa usa ka tubod sa ubos namo padulong sa among yuta.

“Siya mipahiyom, hinay nga misulti, ug unya nagdaling miagi nako ngadto sa kangitngit aron magpadayon sa iyang gibuhat. Mipaduol ako sa balay og pipila ka lakang, naghunahuna sa unsay iyang gihimo alang kanamo, ug sa akong pag-abut sa pultahan, akong nabati sa akong hunahuna—ang dili akong kaugalingon nga tingog—kining mga pulonga: ‘Wala nako gihatag kanimo kining mga kasinatian alang sa imong kaugalingon. Isulat kini.’

“Misulod ako. Wala ako mohigda. Bisan gikapoy ako, mikuha ko og pipila ka mga papel ug misugod sa pagsulat. Ug sa akong pagsulat, akong nasabtan ang mensahe nga akong nadungog sa akong hunahuna. Angay nakong irekord aron adunay mabasa ang akong mga anak, sa umaabut nga mga adlaw, giunsa pagpanalangin sa Dios ang akong pamilya. Wala kinahanglana ni Lolo nga iyang buhaton ang unsay iyang gibuhat alang kanamo. Mahimo siyang mosugo og lain sa pagbuhat niadto o dili na lamang mohimo niini. Apan siya nag-alagad kanamo, sa iyang pamilya, sa paagi nga kanunayng gibuhat sa mga disipulo ni Jesukristo. Ug busa ako misulat niini, aron ang akong mga anak makaangkon og panumduman sa umaabut nga adlaw kon sila magkinahanglan niini.

“Nagsulat ako og pipila ka mga linya matag adlaw sulod sa mga katuigan. Wala akoy gisal-angan nga adlaw bisan kon unsa ako kakapoy o unsa ako kasayo mosugod pagka-ugma. Sa dili pa ako mosulat, ako mamalandong sa pangutana: “Nakita ba nako ang kamot sa Dios nga nagkab-ot aron paghikap kanamo o sa among mga anak o sa among pamilya karon?” (“O Hinumdumi, Hinumdumi,” Ensign o Liahona, Nob. 2007, 66–67).

Ngano kaha nga importante alang kanato nga mosulat mahitungod sa mga kasinatian nga makapalig-on kanato sa espirituhanon nga paagi?
Sa unsang paagi nga makabenepisyo kita sa pagsunod sa ehemplo ni Presidente Eyring? Sa unsang paagi nga ang atong rekord makatabang sa uban?

Ipasabut nga si Presidente Eyring misulti sa mga panalangin nga iyang nadawat tungod kay siya nagtipig og rekord bahin sa pagpanalangin sa Dios sa iyang pamilya. Hangyoa ang usa ka estudyante sa pagbasa og kusog sa mosunod nga pamahayag. (Tingali imo nang gipakigbahin ang tipik niining pamahayag diha sa leksyon 117. Tingali maayo alang sa mga estudyante nga makadungog pag-usab niini.)

“Samtang nagpadayon ako paghimo niini, adunay butang nga misugod og hitabo. Samtang naghanduraw sa nanghitabo sulod nianang adlawa, akong nakita ang timaan sa unsay gibuhat sa Dios alang sa usa kanamo nga wala nako namatikdi sa kabisi nianang adlawa. Samtang kana nahitabo, ug kana sagad nanghitabo, akong nasabtan nga ang pagsulay og paghinumdom naghatag og higayon sa Dios sa pagpakita kanako unsay Iyang gibuhat.

“Labaw pa kay sa pagpasalamat ang misugod sa paglambo sa akong kasingkasing. Ang pagpamatuod milambo. Nahimo ako nga labaw ka sigurado nga ang atong Langitnong Amahan nakadungog ug nagtubag sa mga pag-ampo. Akong gibati ang labaw nga pagpasalamat alang sa pagpahumok ug sa paglimpyo sa kasingkasing nga miabut tungod sa Pag-ula sa Manluluwas nga si Jesukristo. Ug midako ang akong pagsalig nga ang Espiritu Santo makapahinumdom nato sa tanang butang—bisan sa mga butang nga wala nato namatikdi o tagda sa dihang kini nanghitabo” (“O Hinumdumi, Hinumdumi,” 67).

Unsa nga baruganan ang atong makat-unan gikan sa istorya sa 3 Nephi 23 ug gikan sa kasinatian ni Presidente Eyring? (Ang mga estudyante mahimong motubag niining pangutana sa lain-laing paagi. Ang ilang tubag kinahanglang magpakita sa mosunod nga kamatuoran: Kon kita magrekord sa espirituhanon nga mga kasinatian, mapanalanginan kita sa tagsa-tagsa ug ang atong mga pamilya.)

Ang pipila sa mga estudyante tingali mobati nga sila wala pay mga panghitabo nga mahimong bililhon nga irekord. Aron matabangan sila, mahimo kang modapit og usa ka estudyante sa pagbasa og kusog sa mosunod nga pamahayag ni Elder John H. Groberg sa Seventy:

“Pipila sa mga tawo moingon, ‘wala koy butang nga ikarekord. Walay espirituhanong butang nga mahitabo kanako.’ Ako moingon, ‘Sugdi ang pagrekord, ug ang espirituhanon nga mga butang mahitabo. Anaa ra kini sa tanang panahon, apan mas mahimo kitang sensitibo niini samtang kita magsulat’” (“Writing Your Personal and Family History,” Ensign, Mayo 1980, 48).

Dapita ang mga estudyante sa pagpangutana sa ilang mga kaugalingon kon sila mibaliwala ba sa pagsulat mahitungod sa mga kasinatian nga nakapalig-on kanila sa espirituhanon nga paagi. Awhaga sila sa pagsulat mahitungod niining mga kasinatian ug sa pagpadayon sa pagrekord sa ubang mga kasinatian sa tibuok nilang kinabuhi. Mahimo nimong isugyot nga sundon nila ang ehemplo ni Presidente Eyring, nga adunay isulat kada adlaw.

Ribyu sa Scripture Mastery

Ang pagkat-on unsaon pagsulbad sa mga problema pinaagi sa paggamit sa mga kasulatan makatabang sa mga estudyante sa tibuok nilang kinabuhi. Hatagi ang matag estudyante og usa ka pirasong papel. Dapita sila sa pagsulat mahitungod sa ilang pangutana o hagit nga ilang giatubang. Ipasabut nga imong kolektahon ang mga papel ug mobasa og pipila ngadto sa klase. Sultihi ang mga estudyante nga dili ibutang ang ilang mga pangalan sa papel, ug pahinumdumi sila nga dili maglakip og mga detalye nga personal o dili angay nga hisgutan diha sa klase. (Human makolekta ang mga papel, mahimo nimong ribyuhon sa daklit ang mga gisumiter aron masiguro nga kini tukma ug dili personal kaayo.) Basaha ang usa ka pangutana o hagit ngadto sa klase ug tan-awa kon ang mga estudyante makagamit ba sa mga scripture mastery passage aron matabangan nga matubag ang pangutana o hagit.

Ipasabut nga ang Manluluwas misugo kanato sa pagtudlo sa uban kon unsay Iyang gitudlo kanato (tan-awa sa 3 Nephi 23:14). Sa pagtabang nga maandam ang mga estudyante sa pagtuman niini nga sugo, awhaga sila sa pagpraktis og mga kahanas sa pagtudlo, sama sa pagpasabut sa mga doktrina o baruganan, pagpakigbahin og mga kasinatian, ug pagpamatuod samtang sila mogamit sa mga scripture mastery passage sa pagsulbad og mga problema. Mahimo nimong itagana ang uban nga mga pangutana o mga hagit nga gisumiter sa mga estudyante ug hisguti kini sa samang paagi sa mga adlaw nga kamo aduna pay panahon.

Pahinumdom: Ang gitas-on niining leksyon mahimong makahatag og panahon alang niining scripture mastery review. Mahimo nimong ipahigayon ang kalihokan sa sinugdanan sa klase, isip break tali sa mga seksyon sa leksyon, o sa katapusan sa klase. Pamub-i kining kalihokan aron sa paghatag og panahon alang sa leksyon. Alang sa uban nga mga kalihokan sa pagribyu, tan-awa ang appendix sa katapusan niining manwal.