Librarya
Leksyon 132: 3 Nephi 24–26

Leksyon 132

3 Nephi 24–26

Pasiuna

Si Jesukristo mituman sa usa ka sugo sa Langitnong Amahan sa pagpakigbahin sa mga Nephite sa pipila ka mga panagna ni propeta Malaquias (tan-awa sa 3 Nephi 26:2). Kini nga mga panagna nagtudlo nga ang mga sakop sa balay ni Israel kinahanglang maghinulsol ug mobalik ngadto sa Ginoo agi og pagpangandam alang sa Ikaduhang Pag-anhi sa Manluluwas. Si Jesukristo mipatin-aw usab ngadto sa mga Nephite “sa tanan nga mga butang, bisan gikan sa sinugdanan hangtud sa panahon nga siya kinahanglan moanhi diha sa iyang himaya” (3 Nephi 26: 3). Si Mormon mitudlo nga kadtong motuo sa Basahon ni Mormon aduna pay mas dagkong mga butang nga ipakita ngadto kanila (tan-awa sa 3 Nephi 26: 9).

Mga Sugyot alang sa Pagtudlo

3 Nephi 24:1–6

Si Jesukristo mikutlo sa panagna ni Malaquias mahitungod sa Ikaduhang Pag-anhi

Sugdi ang klase pinaagi sa pagpakita og usa ka posporo ug usa ka bareta nga sabon (o pagdrowing diha sa pisara og hulagway sa kalayo ug usa ka bareta nga sabon). Pangutan-a ang mga estudyante kon unsa ang komon sa kalayo ug sa sabon. (Ang sabon ug kalayo magamit isip panglimpyo o panghinlo.)

Ipasabut nga si Jesukristo mituman sa usa ka sugo gikan sa Amahan (tan-awa sa 3 Nephi 26: 2) aron sa paghatag sa mga Nephite sa pipila ka mga panagna ni Malaquias, usa ka propeta sa Daang Tugon kinsa mipuyo sa Balaan nga Yuta mga 170 ka tuig human si Lehi ug ang iyang pamilya mibiya sa Jerusalem. Hangyoa ang mga estudyante sa pagbasa og hilum sa 3 Nephi 24:1–3, nga mangita og tawo kinsa gitandi ni Malaquias ngadto sa usa ka “kalayo sa magtutunaw” ug “sabon sa tiglaba.”

  • Kinsa ang gitandi ngadto sa usa ka kalayo sa magtutunaw ug sabon sa tiglaba? (Si Jesukristo.)

  • Unsa nga panghitabo ang gihulagway niini nga mga bersikulo? (“Ang adlaw sa iyang pag-anhi.” Sa laing pagkasulti, ang Ikaduhang Pag-anhi ni Jesukristo. Aron matabangan ang mga estudyante sa pagtubag niining pangutana, mahimo nimong isugyot nga ilang i-scan ang ulohan sa kapitulo o ang mga footnote.)

  • Unsa ang gisugyot sa pagtandi kang Jesukristo ngadto sa kalayo ug sabon nga mahitabo sa Iyang Ikaduhang Pag-anhi? (Ang mga estudyante mahimong mogamit og lain-laing mga pulong, apan kinahanglan silang mahibalo sa mosunod nga kamatuoran: Sa Iyang Ikaduhang Pag-anhi, si Jesukristo molimpyo sa kalibutan. Mahimo nimong dapiton ang mga estudyante sa pagsulat niining kamatuoran diha sa ilang mga kasulatan tupad sa 3 Nephi 24:2–3.)

Ipasabut nga ang usa ka magtutunaw mogamit og kalayo aron mapainit ang usa ka metal sama sa pilak o bulawan hangtud nga kini matunaw. Ang proseso sa pag-init mopalutaw sa hugaw, sa ibabaw sa natunaw nga metal, diin ang magtutunaw makatangtang niini, sa ingon makuhaan ang metal sa kahugaw niini. Ang tiglaba mao ang tawo nga molimpyo o mopaputi sa mga panapton gamit ang sabon. Mahimo usab nimong ipasabut nga ang “anak nga mga lalaki ni Levi” naghupot sa priesthood sa karaang Israel. Karon ang mga pulong mahimong nagpasabut ngadto sa mga naghupot sa priesthood sa modernong panahon (tan-awa sa D&P 84:33–34).

Dapita ang usa ka estudyante sa pagbasa og kusog sa 3 Nephi 24:5–6. Hangyoa ang klase sa pagsunod ug ilhon kinsa ang maugdaw, o malaglag, sa Ikaduhang Pag-anhi sa Manluluwas ug kinsa ang dili maugdaw. (Mahimo nimong ipasabut nga ang mga pulong nga “anak nga mga lalaki ni Jacob” nagpasabut ngadto sa mga katawhan sa pakigsaad sa Ginoo diha sa balay ni Israel.)

  • Sumala sa 3 Nephi 24:5, unsa ang buhaton ni Jesukristo sa Iyang Ikaduhang Pag-anhi? (Bisan og ang mga estudyante mahimong mogamit og lain-laing mga pulong, kinahanglan silang mahibalo sa mosunod nga kamatuoran: Si Jesukristo molaglag sa mga dautan sa Iyang Ikaduhang Pag-anhi.

3 Nephi 24:7–18

Si Jesukristo mikutlo sa mga pagtulun-an ni Malaquias kalabut sa paagi nga ang balay ni Israel makabalik ngadto sa Ginoo

Dapita ang mga estudyante sa paghunahuna nga sila adunay usa ka suod nga higala o sakop sa pamilya nga naglisud nga mobati sa gugma ug impluwensya sa Ginoo ug magpatunhay sa pagpamatuod sa ebanghelyo.

  • Unsay imong buhaton aron sa pagsulay sa pagtabang niining tawhana?

Dapita ang mga estudyante sa pagbasa og hilum sa 3 Nephi 24:7, ug hangyoa sila sa pag-ila sa mga tambag sa Ginoo ngadto niadtong kinsa misugod sa pagpahilayo gikan Kaniya ug sa pagsunod sa ilang mga pakigsaad ngadto Kaniya.

  • Unsa kaha ang gipasabut sa ang katawhan “mipahilayo” gikan sa mga ordinansa sa Ginoo? (Wala na sila magsunod sa mga pakigsaad ug mga ordinansa sa ebanghelyo.)

  • Unsa nga saad ang gihatag sa Ginoo niadtong kinsa wala na magsunod sa ilang mga pakigsaad? (“Balik ngari kanako ug Ako mobalik nganha kaninyo.”)

  • Unsa kaha ang gipasabut sa “balik” ngadto sa Ginoo? Unsa kaha ang gipasabut sa ang Ginoo “mobalik ngadto” niadtong kinsa mobalik ngadto Kaniya?

Isulat ang mosunod nga baruganan diha sa pisara: Kon kita mobalik ngadto sa Ginoo, Siya mobalik ngari kanato.

  • Unsa ang gitudlo niini nga baruganan diha kaninyo mahitungod sa Langitnong Amahan ug ni Jesukristo?

Diha sa pisara, isulat ang Balik ngadto sa Ginoo. Dapita ang mga estudyante sa pagbasa og hilum sa 3 Nephi 24:8–12, nga mangita sa usa ka paagi nga ang Ginoo mitudlo sa mga katawhan nga makabalik ngadto Kaniya. Samtang motubag ang mga estudyante, isulat ang bayad og ikapulo ug mga halad ubos sa Balik ngadto sa Ginoo.

  • Sa unsang paagi nga ang kaandam sa pagbayad sa ikapulo usa ka timailhan nga ang usa ka tawo mibutang sa ilang gugma ug pagbati ngadto sa Ginoo?

Dapita ang usa ka estudyante sa pagbasa sa mosunod nga pamahayag ni Presidente Gordon B. Hinckley:

“Kita makahimo sa pagbayad sa atong ikapulo. Dili kini mahitungod sa kwarta kon dili mahitungod kini sa hugot nga pagtuo” (“Let Us Move This Work Forward,” Ensign, Nob. 1985, 85).

  • Sa unsang paagi nga ang atong kaandam sa pagbayad sa ikapulo ug mga halad usa ka timailhan sa atong hugot nga pagtuo sa Ginoo?

Hatagi ang mga estudyante og panahon sa pagribyu og hilum sa 3 Nephi 24:10–12. Hangyoa sila sa pag-ila sa mga saad sa Ginoo niadtong kinsa nagbayad og hingpit ug tinud-anay nga ikapulo.

  • Sa unsang paagi nga kamo napanalanginan isip resulta sa pagbayad sa inyong ikapulo? Sa unsang paagi nga kining mga ehemplo sa “ang mga tamboanan sa langit” ablihan alang kaninyo?

I-summarize ang 3 Nephi 24:13–18 pinaagi sa pagpasabut nga dinhi niining mga bersikulo ang Ginoo mipasabut nga ang uban sa karaang Israel mikwestyon sa panginahanglan sa pagsunod sa mga ordinansa sa ebanghelyo. Mireklamo sila nga ang mga mapahitas-on ug dautan ingon og nagmauswagon bisan sa ilang pagkadili matarung. Sa 3 Nephi 24:16, ang Ginoo mitubag nga ang “basahon sa handumanan” pagahimoon diin ang mga ngalan sa mga matinud-anon marekord (tan-awa sa D&P 85:7–9; 128: 6–7; Moises 6:5–8). Ang Ginoo dayon mipasabut nga kon Siya moanhi pag-usab, Siya mopatunhay sa mga matinud-anon ug motagana kanila sa Iyang Kaugalingon isip usa ka bahandi, o “motigum sa [Iyang] mga bililhon nga mga kabtangan.”

  • Sa unsang paagi nga usa man ka panalangin ang pagkahibalo nga ang Ginoo mopatunhay sa matinud-anon ug mohimo kanila nga Iyang bahandi?

  • Sa 3 Nephi 24:16, hain sa mga pulong ang naghulagway niadtong kinsa ipatunhay sa Ginoo isip Iyang bahandi? (“Sila nga may kahadlok sa Ginoo” ug nga “nagpalandong sa iyang ngalan.”)

Isulat ang kahadloki ang Ginoo ug pamalandong sa ngalan sa Ginoo ubos sa Balik ngadto sa Ginoo. (Mahimo nimong ipasabut nga dinhi niining konteksto, ang pulong nga kahadlok nangahulugan og balaang pagtahud o pagrespeto.) Dapita ang mga estudyante sa pagtubag sa mosunod nga pangutana diha sa ilang mga notebook o mga scripture study journal:

  • Ikonsiderar kon kumusta na man ang inyong pagbayad sa ikapulo ug mga halad ug sa paghunahuna kang Kristo kanunay. Sa unsang paagi nga kamo “mobalik” ngadto Kaniya o molambo dinhing dapita?

3 Nephi 25

Si Jesukristo mikutlo sa panagna ni Malaquias nga si Elijah mobalik sa wala pa ang Ikaduhang Pag-anhi

Dapita ang usa ka estudyante sa pagbasa og kusog sa 3 Nephi 25:1–3. Hangyoa ang klase sa pagsunod, nga mangita og usa ka rason nganong ang Ikaduhang Pag-anhi mahimong usa ka panalangin ngadto sa matinud-anon kang Jesukristo. Dapita ang mga estudyante sa pagreport sa unsay ilang nakit-an. Mahimo nimong ipasabut nga diha sa 3 Nephi 25:1, ang pulong nga gamut malagmit nagpasabut nga mga katigulangan ug ang pulong nga sanga nagpasabut nga kaliwatan. Sa ingon, sa sunod nga kinabuhi, ang mga dautan dili makatagamtam sa mga panalangin nga mabugkos ngadto sa ilang mga katigulangan ug mga kaliwatan. Sa 3 Nephi 25:2, ang mga pulong nga “nati nga baka sa toril” nagpasabut sa nati nga baka nga luwas, maayo ang pagpakaon, ug giatiman. Ang Ginoo nagsaad nga Siya sa samang paagi manalipod ug mag-amuma niadtong kinsa “nagtahud sa [Iyang] ngalan.”

Ipasabut nga si Malaquias nanagna sa usa ka panghitabo nga mahitabo sa dili pa ang Ikaduhang Pag-anhi ug nga maglakip sa propeta sa Daang Tugon nga si Elijah. Dapita ang usa ka estudyante sa pagbasa og kusog sa 3 Nephi 25:5–6, ug hangyoa ang klase sa pagpangita kon unsay buhaton ni Elijah aron maandam ang kalibutan alang sa pag-anhi sa Ginoo.

Pangutan-a ang mga estudyante unsa ang ilang nahibaloan mahitungod sa pagbalik ni Elijah sa yuta isip kabahin sa Pagpahiuli sa ebanghelyo. Mahimo nimong dugangan ang ilang mga tubag pinaagi sa pagpasabut nga niadtong Abril 3, 1836, si Elijah mipakita kang Joseph Smith ug Oliver Cowdery didto sa bag-ong gipahinungod nga Templo sa Kirtland (tan-awa sa D&P 110:13–16). Nianang higayuna, gipahiuli ni Elijah ang mga yawe sa priesthood nga gikinahanglan aron sa pagbugkos sa mga pamilya sa kahangturan sa balaan nga mga templo sa Ginoo. Pinaagi sa pagsiksik sa family history, atong mailhan ang mga sakop sa pamilya kang kinsa ang mga ordinansa sa templo mahimong ipahigayon.

  • Unsa kaha ang gipasabut nga si Elijah “mopabalik sa kasingkasing sa mga amahan ngadto sa mga anak, ug ang mga anak ngadto sa ilang mga amahan”?

  • Sa unsang paagi nga usa ka panalangin alang kaninyo ang mahibalo nga kamo mahimong mabugkos ngadto sa inyong pamilya alang sa kahangturan?

Ipamatuod nga samtang ang atong mga kasingkasing mobalik ngadto sa atong mga amahan pinaagi sa family history ug buhat sa templo, nagtabang kita sa pag-andam sa yuta alang sa Ikaduhang Pag-anhi ni Jesukristo.

3 Nephi 26:1–12

Si Jesukristo mipatin-aw sa mga kasulatan, ug si Mormon mitudlo sa unsay angay gayud nga buhaton aron makadawat sa mas dagko nga mga butang nga gipadayag sa Manluluwas

I-summarize ang 3 Nephi 26:1–5 pinaagi sa pagpasabut nga human ang Manluluwas mipakigbahin sa mga panagna ni Malaquias, Siya mitudlo sa mga katawhan sa “tanan nga mga butang nga moabut dinhi sa ibabaw sa yuta” gikan sa Paglalang hangtud sa Katapusang Paghukom (3 Nephi 26:3–4).

Dapita ang usa ka estudyante sa pagbasa og kusog sa 3 Nephi 26:6–8, ug hangyoa ang klase sa pagpangita kon unsa kadaghan ang narekord sa mga natudlo ni Jesukristo diha sa Basahon ni Mormon. Dayon dapita ang mga estudyante sa pagbasa og hilum sa 3 Nephi 26:9–11, nga mangita sa rason nga wala gilakip ni Mormon sa iyang pagminubo sa tanang gitudlo sa Manluluwas sa mga Nephite. Ipasabut nga ang pulong nga mituo dinhi niini nga mga bersikulo nagpasabut nga kita kinahanglan nga molihok diha sa mga doktrina ug mga baruganan nga gipadayag sa Dios ug dili lang molaum nga kini tinuod.

  • Sumala sa 3 Nephi 26:9, unsa ang gisaad sa Ginoo ngadto niadtong kinsa motuo ug molihok sa unsay Iyang gipadayag? (Samtang motubag ang mga estudyante, ipasabut gayud nga kon kita motuo ug molihok sa unsay gipadayag sa Dios, atong giandam ang atong kaugalingon sa pagdawat og mas daghang pagpadayag.)

  • Ngano kaha nga gikinahanglan nga kita motuo sa mga kamatuoran nga atong nadawat sa dili pa kita makadawat og dugang nga kamatuoran?

  • Unsaon nato pagpakita nga kita nagtuo sa unsay gipadayag sa Ginoo?

Isaad sa mga estudyante nga kon sila matinud-anong magtuon ug maggamit sa mga baruganan diha sa Basahon ni Mormon, makadawat sila og dugang nga panabut sa ebanghelyo. Tabangi ang mga estudyante sa pagpamalandong kon unsa kamaayo ang ilang pagdawat sa mga kamatuoran diha sa Basahon ni Mormon pinaagi sa pagdapit kanila sa pagtubag sa mosunod nga mga pangutana diha sa mga notebook o mga scripture study journal (mahimo nimong isulat kini nga mga pangutana diha sa pisara):

  • Unsay imong gibuhat sa imong kinabuhi nga nagpakita sa imong pagtuo diha sa Basahon ni Mormon?

  • Kanus-a ba nahitabo nga ang pagbasa sa Basahon ni Mormon inubanan sa tinuod nga katuyoan migiya kanimo sa pagdawat og personal nga pagpadayag?

3 Nephi 26:13–21

Ang Manluluwas mitapos sa Iyang yutan-ong pagpangalagad sa mga Nephite, ug ang Iyang mga disipulo misunod sa Iyang ehemplo diha sa ilang pagpangalagad

Ipasabut nga diha sa 3 Nephi 26, si Mormon mi-summarize sa tibuok nga pagpangalagad sa Manluluwas sa mga Nephite. Dapita ang mga estudyante sa pagbasa og hilum sa 3 Nephi 26:13–16. Mahimo nimong isugyot nga markahan nila ang pipila sa mga butang nga gihimo sa Manluluwas nga gipili ni Mormon nga ipasabut og maayo.

Kon itugot sa panahon, dapita ang mga estudyante sa pagribyu ug sa pagpamalandong sa ilang mga gisulat ug mga gimarkahan sa kasulatan gikan sa ilang pagtuon sa 3 Nephi 11–25. Awhaga sila sa pagpangita sa mga pagtulun-an ug mga panghitabo gikan sa pangalagad sa Manluluwas diha sa mga Nephite nga mahinungdanon o halandumon ngadto kanila. Dapita ang pipila ka mga estudyante sa pagpakigbahin sa ilang mga hunahuna ug mga pagbati kabahin sa pagpangalagad sa Manluluwas diha sa mga Nephite.

Komentaryo ug Background nga Impormasyon

3 Nephi 24:11. Mga panalangin sa pagsunod sa balaod sa ikapulo

Si Presidente Gordon B. Hinckley mitudlo:

“Ang Ginoo misaad nga siya mobadlong sa mga manunubad alang kanato. … Kana nga pagbadlong sa manunubad wala ba naglakip sa proteksyon sa nagkalain-laing personal nga paningkamot ug mga problema?

“Anaa diha ang dako nga panalangin sa kaalam, kahibalo, gani mga tinago nga bahandi sa kahibalo. Gisaaran kita nga atong maangkon ang yuta nga kahimut-an kon kita magmasulundon niining balaod. Ako makahubad sa pulong nga yuta isip mga katawhan, nga kadtong kinsa magmasulundon mahimo nga usa ka makapahimuot nga mga katawhan. Pagkanindot nga kahimtang nga mahimong usa ka makapahimuot nga mga katawhan kinsa mahulagway sa uban isip bulahan!” (“Tithing: An Opportunity to Prove Our Faithfulness,” Ensign, Mayo 1982, 40).

3 Nephi 25:1–6. “Ako mopadala kaninyo ni Elijah”

Si Presidente Joseph Fielding Smith mikomentaryo sa pagpakita ni Elijah ngadto ni Propeta Joseph Smith ug Oliver Cowdery:

“Makapainteresado nga masayud nga sa ikatulo nga adlaw sa Abril, 1836, ang mga Judeo nagsaulog sa kasaulogan sa Pagpalabay, ug gipasagdan nga abli ang mga pultahan sa ilang mga panimalay alang sa pag-abut ni Elijah. Nianang adlawa si Elijah miabut, apan dili sa mga panimalay sa mga Judeo, apan ngadto sa Templo sa balangay sa Kirtland … ngadto sa duha ka mapainubsanon nga mga sulugoon sa Ginoo” (Church History and Modern Revelation, 4 vols. [1946], 3:84).

Sa paghimo niini nga pamahayag, si Presidente Smith nagpasabut sa usa ka tradisyonal nga mga naandan sa katawhan nga Judeo, kinsa nagtuo sa panagna ni Malaquias mahitungod sa pagbalik ni Elijah (tan-awa sa Malaquias 4:5–6). Matag Pagpalabay, daghang matinud-anong mga pamilya nga Judeo adunay usa ka pagkaon alang sa Pagpalabay ug nag-andam og dugang nga dapit diha sa lamesa alang ni Elijah. Ilang pasagdan nga abli ang ilang pultahan sa higayon nga si Elijah mohukom sa pag-apil kanila.

Si Elder Russell M. Nelson sa Korum sa Napulog Duha ka mga Apostoles mipasabut sa kamahinungdanon sa pagbisita ni Elijah ngadto sa Templo sa Kirtland:

“Ang pagbalik ni Elijah sa kalibutan nahitabo diha sa unang templo nga gitukod niini nga dispensasyon, diin siya ug ang ubang langitnong mga mensahero, ubos sa direksyon sa Ginoo, misalig sa espesyal nga mga yawe sa awtoridad sa priesthood ngadto sa gipahiuli nga Simbahan. …

“Si Elijah mianhi dili lamang aron sa pagdasig sa pagsiksik alang sa mga katigulangan. Nahimo usab niya nga ang mga pamilya masumpay sa kahangturan lapas pa sa mga utlanan sa mortalidad. Sa pagkatinuod, ang oportunidad alang sa mga pamilya nga mabugkos sa kahangturan mao ang tinuod nga rason sa atong pagsiksik” (“A New Harvest Time,” Ensign, Mayo 1998, 34).

3 Nephi 25:1–6. “Pagkat-on ug pagsinati sa Espiritu ni Elijah”

Si Elder David A. Bednar sa Korum sa Napulog Duha ka mga Apostoles miingon:

“Akong dapiton ang kabatan-onan sa Simbahan sa pagkat-on ug pagsinati sa Espiritu ni Elijah. Ako moawhag kaninyo sa pagtuon, sa pagsiksik sa inyong mga katigulangan, ug sa pag-andam sa inyong kaugalingon sa pagpahigayon og proxy nga bunyag sa balay sa Ginoo alang sa inyong kaliwatan nga namatay na (tan-awa sa D&P 124:28–36). Ug awhagon ko kamo sa pagtabang sa ubang tawo sa pag-ila sa ilang mga family history.

“Kon kamo motuman niini nga pagdapit uban sa pagtuo, ang inyong kasingkasing mobati sa inyong mga amahan. Ang saad nga gihimo ngadto nila ni Abraham, Isaac, ug Jacob matisok diha sa inyong mga kasingkasing. Ang inyong patriyarkal nga panalangin, uban sa pamahayag niini sa kaliwatan, mosumpay ninyo ngadto sa mga amahan ug mahimong mas mahinungdanon alang kaninyo. Ang inyong gugma ug pasalamat alang sa inyong mga katigulangan motubo. Ang inyong pagpamatuod ug pagkakabig ngadto sa Manluluwas mahimong lig-on ug malungtaron. Ug ako mosaad nga kamo panalipdan batok sa grabe nga impluwensya sa yawa. Samtang kamo moapil ug mohigugma niining balaan nga buhat, kamo panalipdan sa inyong kabatan-on ug sa tibuok ninyong kinabuhi” (“Ang mga Kasingkasing sa mga Anak Mobati,” Ensign o Liahona, Nob. 2011, 26–27).

3 Nephi 25:6. Ang kasingkasing sa mga anak mobati ngadto sa ilang mga amahan

Niadtong mga 430 B.C., si propeta Malaquias nanagna nga si Elijah mobalik nganhi sa yuta sa “dili pa moabut ang mahinungdanon ug makalilisang nga adlaw sa Ginoo” (Malaquias 4:5). Kini nga panagna importante kaayo nga kini makita diha sa Biblia, sa Basahon ni Mormon, sa Doktrina ug mga Pakigsaad, ug sa Perlas nga Labing Bililhon (tan-awa sa Malaquias 4:5–6; 3 Nephi 25:5–6; D&P 2:1–3; Joseph Smith—Kasaysayan 1:37–39). Kini nga panagna mipadayag nga ang usa ka katuyoan sa pagbalik ni Elijah mao nga mobati ang mga kasingkasing sa mga anak ngadto sa ilang mga amahan.

Si Presidente Joseph Fielding Smith mipasabut sa pipila ka mga paagi diin ang mga kasingkasing sa mga anak mobati sa ilang mga amahan:

“Ang mga amahan mao ang atong nangamatay nga mga katigulangan kinsa namatay nga walay kahigayunan sa pagdawat sa ebanghelyo, apan kinsa midawat sa saad nga moabut ang panahon nga ihatag kana nga pribilehiyo ngadto kanila. Ang mga anak mao kadtong buhi karon kinsa nag-andam sa datos sa genealogy ug kinsa nagpahigayon sa mga ordinansa diha sa mga templo.

“Ang pagpabati sa mga kasingkasing sa mga anak ngadto sa mga amahan mao ang pagbutang o pagtisok diha sa kasingkasing sa mga anak nianang pagbati ug tinguha nga modasig kanila sa pagpangita sa mga rekord sa mga patay. Dugang pa, ang pagtisok sa tinguha ug sa inspirasyon diha sa ilang mga kasingkasing gikinahanglan. Kinahanglan gayud nga aduna sila niini nga sila unta mosulod sa balay sa Ginoo ug mopahigayon sa gikinahanglan nga buhat alang sa ilang mga amahan, kinsa namatay nga walay kahibalo sa ebanghelyo, o walay pribilehiyo sa pagdawat sa kahingpitan sa ebanghelyo” (Doctrines of Salvation, ed. Bruce R. McConkie, 3 vols. [1954–56], 2:127–28).

Iprinta