Pasiuna saAng Mga Pulong ni Mormon

Ngano nga kinahanglang tun-an kini nga basahon?

Pinaagi sa pagtuon sa Mga Pulong ni Mormon, ang mga estudyante makadugang sa ilang hugot nga pagtuo nga “ang Ginoo nasayud sa tanan nga mga butang” (Mga Pulong ni Mormon 1:7) ug nga Siya naggiya sa Iyang mga sulugoon sa pagpahinabo sa Iyang mga katuyoan. Isip usa ka makasaysayanong istorya, ang basahon nagsilbi isip usa ka taytayan tali sa gagmay nga mga palid ni Nephi (1 Nephi–Omni) ug sa minubo ni Mormon sa dagkong mga palid ni Nephi (Mosiah–4 Nephi). Makatabang kini sa mga estudyante nga mas masabtan og maayo hain nga mga rekord ang gimubo ni Mormon samtang siya nagtipon sa Basahon ni Mormon. Kini nagpaila usab sa mga estudyante ngadto sa pagtuo ug sa mga nabuhat ni Haring Benjamin.

Kinsa ang nagsulat niini nga basahon?

Gisulat ni Mormon kini nga basahon. Usa siya ka propeta, tigtipig sa rekord, ug tigmubo ug tigtipon sa Basahon ni Mormon. Usa usab siya ka matarung nga amahan ug usa ka lider nga militar taliwala sa mga Nephite. Ang propeta nga si Moroni mao ang iyang anak nga lalaki.

Para kang kinsa kini gisulat ug ngano?

Namulong si Mormon sa usa ka umaabut nga tigpaminaw, uban sa paglaum nga ang iyang mga panulat ug ang mga panulat sa iyang anak nga lalaki nga si Moroni “makatabang kanila” (Mga Pulong ni Mormon 1:2). Sa piho, iyang gisulat alang sa kaayohan sa mga Lamanite. Kabahin kanila siya miingon,“Ang akong pag-ampo ngadto sa Dios mahitungod sa akong mga kaigsoonan, nga sila sa makausa pa moabut sa kasayuran sa Dios, oo, ang katubsanan ni Kristo; nga sila sa makausa pa mahimo nga usa ka makapahimuot nga mga katawhan.(Mga Pulong ni Mormon 1:8).

Kanus-a ug diin kini gisulat?

Gisulat kini ni Mormon sa mga A.D. 385, human “nakasaksi hapit sa tanan nga mga kalaglagan sa [iyang] mga katawhan, ang mga Nephite” (Mga Pulong ni Mormon). Wala girekord ni Mormon kon hain siya sa dihang iyang gisulat kini nga basahon.

Unsa ang pipila ka mga butang nga nakalahi niini nga basahon?

Kining mubo nga basahon naghunong sa kronolohiya nga han-ay sa mga basahon diha sa sinugdanan sa Basahon ni Mormon. Gisulat kini ni Mormon sobra sa 500 ka tuig human gitapos ni Amaleki ang basahon ni Omni. Niini nga basahon, daklit nga nagpasabut si Mormon sa iyang pagtipon ug pagmubo sa mga rekord sa iyang mga katawhan. Aron nga masabtan ang iyang pagpasabut, kini makatabang sa paghinumdom nga gisugo sa Ginoo si Nephi sa paghimo og duha ka pundok sa mga palid alang sa usa ka “linain” ug “maalamon ” nga katuyoan (tan-awa sa 1 Nephi 9:3, 5). Ang usa ka pundok sa mga palid, kasagaran nga gitawag og ang dagkong mga palid, naglangkub sa sekular nga kasaysayan sa mga Nephite, samtang ang lain nga pundok, kasagaran nga gitawag og ang gagmay nga mga palid, naglangkub og sagrado nga rekord sa mga pagsangyaw, mga pagpadayag, ug mga panagna sa mga Nephite (tan-awa sa 1 Nephi 9:2–4; Jacob 1:3–4).

Nadiskubrihan ni Mormon ang gagmay nga mga palid ni Nephi human nga nahimo na niya ang minubo nga bahin sa dagkong mga palid (tan-awa sa Mga Pulong ni Mormon 1:3). Giniyahan sa Espiritu sa Ginoo, gilakip ni Mormon ang gagmay nga mga palid uban sa iyang minubo sa dagkong mga palid. Gihimo niya kini “alang sa usa ka maalamon nga katuyoan,” sumala sa kabubut-on sa Ginoo (tan-awa sa Mga Pulong ni Mormon 1:4–7).

Daghang mga katuigan ang milabay, usa ka rason niini nga inspirasyon natataw. Sa dihang gisugdan ni Joseph Smith ang paghubad sa Basahon ni Mormon, misugod siya sa minubo ni Mormon sa dagkong mga palid ni Nephi—ang sekular nga kasaysayan. Si Martin Harris, kinsa mao ang tigsulat sa Propeta alang niini nga bahin sa paghubad, giwala ang 116 ka mga pahina sa manuskrito. Gipadayag sa Ginoo ngadto ni Joseph Smith nga dautang mga tawo ang nakaangkon niadto nga mga pahina ug giusab ang mga pulong (tan-awa sa D&P 10:8–10). Kon gihubad pa ni Joseph Smith ang sama nga materyal pag-usab, kadto nga mga tawo moangkon unta nga siya dili usa ka propeta tungod kay dili siya makahubad sa basahon sa samang paagi og kaduha (tan-awa sa D&P 10:11-19). Gisultihan sa Ginoo si Joseph sa dili paghubad niana nga bahin pag-usab apan sa paghubad sa gagmay nga mga palid ni Nephi nga gilakip ni Mormon sa iyang minubo sa dagkong mga palid (tan-awa sa D&P 10:30–45). Busa, ang Mga Pulong ni Mormon nagtabang kanato sa pagtan-aw kon sa unsa nga paagi giandam sa Ginoo ang paagi sa pagpakyas sa plano sa dautang mga tawo ug sa paglakip og kasulatan nga wala lamang maglakip sa samang yugto sa panahon sama sa nawala nga manuskrito apan naghatag og “dakong katin-awan diha sa ebanghelyo [sa Ginoo] ”(D&P 10:45). Gitudlo ni Elder Jeffrey R. Holland sa Korum sa Napulog Duha ka mga Apostoles: “Kini sa walay duha-duha kulba-hinam kon usa ka adlaw niana usa ka tawo makakaplag sa nawala nga 116 ka mga pahina sa orihinal nga manuskrito sa Basahon ni Mormon. Apan bisan unsa pa ang gilangkub niadto nga mga pahina, kini dili na mas importante o mas kinahanglanon sa katuyoan sa Basahon ni Mormon kay sa mga pagtulun-an … nga girekord diha sa gagmay nga mga palid” (Christ and the New Covenant: The Messianic Message of the Book of Mormon [1997], 35–36).

Agi og dugang sa pagpakigbahin og mga panan-aw mahitungod sa pagtipon sa sagradong mga rekord sa iyang katawhan, mihatag si Mormon og daklit nga paghulagway sa serbisyo ni Haring Benjamin (tan-awa sa Mga Pulong ni Mormon 1:10–18). Kini nga paghulagway nagtabang sa pagsumpay sa gagmay nga mga palid ni Nephi uban sa minubo ni Mormon sa dagkong mga palid. Gihisgutan si Haring Benjamin diha sa konklusyon sa basahon ni Omni, nga mao ang katapusang basahon diha sa gagmay nga mga palid (tan-awa sa Omni 1:23–25). Ang basahon ni Mosiah, ang unang basahon nga kita aduna sa minubo ni Mormon sa dagkong mga palid, nagsugod pinaagi sa pag-asoy sa katapusan sa paghari ug pagpangalagad ni Haring Benjamin (tan-awa sa Mosiah 1:1, 9).

Outline

Mga Pulong ni Mormon 1:1–9 Nadiskubrihan ni Mormon ang gagmay nga mga palid ni Nephi ug gilakip kini uban sa iyang minubo sa dagkong mga palid.

Mga Pulong ni Mormon 1:10–18 Nagsummarize si Mormon sa paghari ni Haring Benjamin.