2 Nephi 32

Pasiuna

Human magtudlo bahin sa “higpit ug pig-ot nga dalan nga mopadulong sa kinabuhi nga dayon” (2 Nephi 31:18), nasabtan ni Nephi nga ang iyang katawhan naghunahuna kon unsay kinahanglan nilang buhaton human makasugod niana nga dalan. Gitubag niya ang ilang mga pangutana pinaagi sa pag-awhag kanila sa “pagbusog sa mga pulong ni Kristo” ug “mag-ampo sa kanunay” (2 Nephi 32:3, 9). Gipasaligan niya sila nga kon buhaton nila kining mga butanga, ang Espiritu Santo motabang kanila nga masayud kon unsay buhaton.

Mga Sugyot alang sa Pagtudlo

2 Nephi 32:1–7

Gitambagan kita ni Nephi nga magtinguha og balaanong giya pinaagi sa mga pulong ni Jesukristo ug sa mga pag-aghat sa Espiritu Santo

Dapita ang mga estudyante sa paghunahuna og higayon sa dihang mipasabut sila sa paagi sa pagbalhin gikan sa usa ka dapit ngadto sa lain. Hangyoa sila sa pagpasabut nganong sayon o lisud ang paghatag niadtong mga direksyon.

Pahinumdumi ang mga estudyante nga sa miaging leksyon, gitun-an nila ang mga direksyon nga gihatag ni Nephi sa iyang katawhan. Human sa pagpakigbahin niini nga mga direksyon, miingon siya, “kini mao ang agianan” (2 Nephi 31:21). Aron matabangan ang mga estudyante nga maribyu ang unsay ilang nakat-unan, ipangutana ang mosunod:

Kon sundon nato ang mga direksyon ni Nephi, asa man kini modala kanato? (Sa kinabuhing dayon; tan-awa sa 2 Nephi 31:20.)
Sumala sa 2 Nephi 31:17–18, unsaon man nato sa pagsugod diha sa dalan paingon sa kinabuhing dayon?

Ipasabut nga ang 2 Nephi 32 usa ka sumpay sa mga pagtulun-an ni Nephi diha sa 2 Nephi 31. Hangyoa ang mga estudyante nga mangita diha sa 2 Nephi 32:1 sa usa ka pangutana sa katawhan ni Nephi kalabut sa unsay iyang gitudlo kanila. Dapita ang pipila ka mga estudyante sa pagpahayag niini nga pangutana diha sa kaugalingon nilang mga pulong. (Siguroha nga nasabtan sa mga estudyante nga ang mga tawo naghunahuna kon unsay kinahanglan nilang buhaton human makasugod diha sa dalan paingon sa kinabuhing dayon.)

Dapita ang usa ka estudyante sa pagbasa og kusog sa 2 Nephi 32:2–3. Hangyoa ang klase sa pagpangita sa tubag ni Nephi sa pangutana sa mga tawo. Ipasabut nga ang 2 Nephi 32:3 usa ka scripture mastery passage. Mahimo nimong awhagon ang mga estudyante sa pagmarka niini sa lahi nga paagi aron dali nila kining madumduman.

Unsa nga mga pulong diha sa 2 Nephi 32:3 ang naghulagway kon unsaon nato pagdawat ang mga pulong ni Kristo? Sa unsang paagi nga ang pagbusog lahi kay sa pagtimo-timo?
Sa inyong hunahuna unsa man ang gipasabut sa pagbusog sa mga pulong ni Kristo?
Unsay giingon ni Nephi nga mahimong resulta kon kita magbusog sa mga pulong ni Kristo?
Unsa ang pipila ka mga dapit diin atong makit-an ang mga pulong ni Jesukristo? (Ang mga tubag mahimong maglakip sa mga kasulatan, mga pulong sa moderno nga mga propeta, ug inspirasyon gikan sa Espiritu Santo.)

Siguroha nga nasabtan sa mga estudyante nga kon magbusog kita sa mga pulong ni Kristo, ang mga pulong ni Kristo mosulti kanato sa tanan nga mga butang nga angay natong buhaton.

Aron matabangan ang mga estudyante nga makahunahuna kon unsa kamaayo ang ilang pagbusog sa mga pulong ni Jesukristo, basaha ang mosunod nga lista, nga mohunong human sa matag aytem. Hangyoa ang mga estudyante sa pagsulat sa lista diha sa ilang mga scripture study journal o mga class notebook o sa usa ka piraso nga papel.

Personal nga pagtuon sa kasulatan
Sakrament miting
Kinatibuk-ang komperensya
Pagtuon sa kasulatan isip pamilya
Seminary
Family home evening
Miting sa korum sa Aaronic Priesthood o klase sa Young Women
Personal nga pag-ampo

Dapita ang mga estudyante sa paghunahuna kon unsa kamaayo ang ilang pagtinguha sa mga pulong ni Jesukristo sa matag usa niining mga kahimtang. Alang sa matag aytem, ipasulat nila ang nagbusog, nagtimo-timo, o nagpagutom. Sama pananglit, ang usa ka estudyante mahimong nagbusog diha sa personal nga pagtuon sa kasulatan apan nagtimo-timo lamang diha sa kinatibuk-ang komperensya. Ang estudyante nga dili maminaw diha sa sakrament miting mahimong mosulat sa pulong nga nagpagutom tupad niana nga aytem.

Hangyoa ang estudyante sa pagpili og usa sa mga kalihokan diin sila sa kasamtangan “nagtimo-timo” o “nagpagutom,” ug dapita sila sa paghimo og mga tumong nga makatabang nila sa dugang nga “pagbusog sa mga pulong ni Kristo” niana nga kahimtang. (Mahimo nimo silang awhagon sa paghunahuna bahin sa ilang mga tumong sa Katungdanan ngadto sa Dios o sa Personal nga Kauswagan nga may kalabutan niini nga mga tumong).

Aron maabagan ang panabut sa mga estudyante sa ilang responsibilidad sa pagtinguha og personal nga giya gikan sa Espiritu Santo, ipabasa nila sa hilum ang 2 Nephi 32:4–7. Dayon hangyoa sila sa paghisgot sa mosunod nga mga pangutana uban sa usa ka partner. (Mahimo nimong ihatag kini nga mga pangutana diha sa usa ka handout o isulat kini diha sa pisara sa dili pa magsugod ang klase.)

Diha sa bersikulo 4, unsa man sa inyong hunahuna ang gipasabut sa “mangutana” o “motuktok”? Unsay giingon ni Nephi nga mahimong mga sangputanan alang niadtong dili mangutana o manuktok?
Unsa nga panalangin ang gisaad ni Nephi nga atong mabatunan kon madawat nato ang Espiritu Santo?
Nganong nagbangutan man si Nephi alang sa iyang katawhan?

Ipahayag ang imong pagsalig nga samtang ang mga estudyante magbusog sa mga pulong ni Jesukristo, ang Espiritu Santo motabang kanila nga mosunod sa dalan paingon sa kinabuhing dayon.

2 Nephi 32:8–9

Gitambagan kita ni Nephi nga mag-ampo kanunay

Ipasabut nga sunod nga gi-focus ni Nephi ang usa ka butang nga atong mabuhat aron makadawat sa mga pulong ni Jesukristo. Dapita ang mga estudyante sa pagbasa og hilum sa 2 Nephi 32:8, nga mangita sa unsay giingon ni Nephi nga kinahanglan natong buhaton. Human nila matino ang tubag, ipangutana ang mosunod aron matabangan sila nga makapamalandong sa kaimportante sa pag-ampo:

Sa inyong hunahuna ngano nga ang Espiritu Santo gusto nga mag-ampo kita?
Sa inyong hunahuna ngano nga si Satanas dili gusto nga mag-ampo kita? Sa unsa kaha nga mga paagi nga mosulay si Satanas sa pagkumbinsir sa mga tawo nga dili mag-ampo?

Dapita ang usa ka estudyante sa pagbasa og kusog sa 2 Nephi 32:9. Ipasabut nga ang 2 Nephi 32:8–9 usa ka scripture mastery passage. Mahimo nimong isugyot nga markahan kini sa mga estudyante sa lahi nga paagi aron dali nila kining madumduman.

Kapila kita kinahanglang mag-ampo? Sa inyong hunahuna unsa may gipasabut sa “mag-ampo sa kanunay”?

Basaha ang mosunod nga pamahayag ni Elder David A. Bednar sa Korum sa Napulog Duha ka mga Apostoles. (Kon mahimo, pagpakopya niini nga kinutlo aron ang mga estudyante makasunod og basa ug maka-focus sa mga pulong ni Elder Bednar. Kon magpakopya ka, hinumdumi nga ang kinutlo gipadayon sa unahan diha sa leksyon human sa mubo nga panaghisgutan. Iapil usab kana nga bahin sa pamahayag.) Dapita ang mga estudyante sa pagpaminaw sa tambag ni Elder Bednar kon unsaon nga “mag-ampo sa kanunay.”

“Tingali adunay mga butang sa atong kinaiya, sa atong pamatasan, o kalabut sa atong espirituhanon nga pagtubo diin kita nanginahanglan sa pagpakitambag ngadto sa Langitnong Amahan diha sa pag-ampo sa buntag. …

“Sulod sa dagan sa adlaw, maghupot kita og pag-ampo diha sa atong kasingkasing alang sa mapadayunon nga panabang ug paggiya. …

“Atong namatngunan nga atol gayud niini nga adlaw nga adunay mga higayon diin sa kasagaran kita may purohan sa pagsulti og sakit, ug kita dili mosulti og sakit; o tingali kita may kahilig nga masuko, apan kita dili masuko. Atong mamatikdan ang langitnon nga panabang ug kalig-on ug mapainubsanon nga nakaila sa mga tubag sa atong pag-ampo. Gani diha niana nga higayon sa pag-ila, mohalad kita og hilum nga pag-ampo sa pagpasalamat” (“Pag-ampo sa Kanunay,” Ensign o Liahona, Nob. 2008, 41–42).

Aron matabangan ang mga estudyante nga makapamalandong niini nga tambag, ipangutana:

Makahunahuna ba kamo og mga higayon karon o sa bag-ohay nga mga adlaw sa dihang makasunod unta kamo niining sugyot gikan ni Elder Bednar? (Mahimo nimong hangyuon ang mga estudyante sa pagpamalandong sa hilum niini nga pangutana imbis nga motubag og kusog.)

Padayuna sa pagbasa ang tambag ni Elder Bednar:

“Sa pagkahuman sa atong adlaw, moluhod na usab kita ug motaho pagbalik ngadto sa atong Amahan. Atong balikon pagtan-aw ang mga panghitabo niana nga adlaw ug mopahayag og kinasingkasing nga mga pagpasalamat alang sa mga panalangin nga atong nadawat. Kita maghinulsol ug, uban sa panabang sa Espiritu sa Ginoo, atong ilhon ang mga paagi nga atong mabuhat ug mahimo nga mas labaw pa ka maayo sa pagka-ugma. Sa ingon ang atong pag-ampo sa gabii mapalig-on ug usa ka sumpay sa atong pag-ampo sa buntag. Ug ang atong pag-ampo sa gabii mao usab ang pagpangandam alang sa makahuluganon nga pag-ampo sa buntag.

“Buntag ug gabii nga mga pag-ampo—ug ang tanang mga gisal-ot nga mga pag-ampo—dili walay kalabutan, lahi nga mga panghitabo; hinonoa, sila gisumpay matag adlaw ug daghang mga adlaw, mga semana, mga bulan, ug gani mga katuigan. Mao kini ang kabahin kon giunsa nato sa pagtuman ang tambag gikan sa kasulatan sa ‘pag-ampo sa kanunay’ (Lucas 21:36; 3 Nephi 18:15, 18; D&P 31:12). Ang ingon nga makahuluganon nga mga pag-ampo makatabang sa pagpanag-iya sa labing taas nga mga panalangin ang Dios nagtagana alang sa Iyang matinud-anon nga mga anak” (“Pag-ampo sa Kanunay,” 42).

Aron matabangan ang mga estudyante nga makasabut sa katapusang bahin sa 2 Nephi 32:9, ipasabut nga ang pulong nga pahinungod nagpasabut og “pagbalaan, o sa paghimo nga matarung” (Giya ngadto sa mga Kasulatan, “Balaod sa Pahinungod, Pagpahinungod,” scriptures.lds.org).

Nganong kinahanglan man kitang mag-ampo sa higayon nga kita “magbuhat sa bisan unsa nga butang ngadto sa Ginoo”?
Sa inyong hunahuna unsa man ang gipasabut nga ang Ginoo mopahinungod sa unsay atong buhaton alang sa kaayohan sa atong mga kalag?
Sa unsang paagi nga ang tambag ni Elder Bednar makatabang kanato nga magpuyo og mas gipahinungod nga kinabuhi?

Ipamatuod nga samtang mag-ampo kita kanunay, makahimo kita sa pagbuhat sa tanan nga gusto sa Ginoo nga atong buhaton alang sa kaayohan sa atong mga kalag.

Sa pag-summarize sa unsay gihisgutan sa mga estudyante niini nga leksyon, ipakigbahin ang mosunod nga pamahayag ni Elder Spencer J. Condie sa Seventy:

“Mahimong nag-atubang kamo og mga desisyon kalabut sa usa ka misyon, inyong umaabut nga panarbaho, ug, sa katapusan, kaminyoon. Samtang magbasa kamo sa mga kasulatan ug mag-ampo alang sa giya, mahimong dili ninyo aktwal nga makita ang tubag diha sa pahina sa naprinta nga mga pulong, apan samtang magbasa kamo makadawat kamo og lahi nga mga pagbati, ug mga pag-aghat, ug, sama sa gisaad, ang Espiritu Santo ‘mopakita nganha kaninyo sa tanan nga mga butang nga kinahanglan inyong buhaton.’ [2 Nephi 32:5.]” (“Becoming a Great Benefit to Our Fellow Beings,” Ensign, Mayo 2002, 45).

Scripture Mastery—2 Nephi 32:3

Pangutan-a ang mga estudyante kon sa ilang hunahuna unsa kadugay nilang mamemorya ang 2 Nephi 32:3 kon ila kining gi-recite sa matag higayon nga mokaon sila. Hagita sila sa pagribyu niini nga kasulatan—nga magbusog diha sa mga pulong ni Kristo—sa matag higayon nga mokaon sila sa sunod nga pipila ka adlaw. Human nila mamemorya ang bersikulo, dapita sila sa pagreport kon pila ka kan-anan nga nahimo kini nila.

Scripture Mastery—2 Nephi 32:8–9

Pangutan-a ang mga estudyante kon nakasulay ba sila nga dunay giampo sa ilang kasingkasing sa tibuok adlaw o sa tibuok semana. Dapita sila sa pagpakigbahin sa ilang mga kasinatian. Dapita ang klase sa pagkonsiderar sa mga paagi nga sila mahimong “mag-ampo sa kanunay” sulod sa sunod nga 24 ka oras. Hagita sila sa pagbuhat niini ug sa pagreport sa ilang kasinatian atol sa pagsugod sa sunod nga klase.

Pahinumdom: Kon wala kay panahon sa paggamit niining mga ideya sa pagtudlo niini nga leksyon, ikonsiderar ang paggamit niini isip mga ribyu sa umaabut nga mga leksyon.

Komentaryo ug Background nga Impormasyon

2 Nephi 32:2. Unsay buot ipasabut sa pagpamulong sa pinulongan sa mga anghel?

Ang uban mahimong maghunahuna kon unsay gipasabut sa “pagpamulong sa pinulongan sa mga anghel.” Si Presidente Boyd K. Packer nagtudlo nga ang pagpamulong sa pinulongan sa mga anghel “yanong nagpasabut nga kamo makasulti uban sa gahum sa Espiritu Santo” (“Ang Gasa sa Espiritu Santo: Unsa ang Angay nga Mahibaloan sa Matag Miyembro,” Liahona, Ago. 2006, 21).

2 Nephi 32:3. Unsay buot ipasabut sa pagbusog diha sa mga pulong ni Kristo?

Nagtudlo si Elder Russell M. Nelson sa Korum sa Napulog Duha ka mga Apostoles: “Ang pagbusog nagpasabut og labaw pa kay sa motilaw. Ang pagbusog nagpasabut og pagtagamtam. Atong tagamtamon ang mga kasulatan pinaagi sa pagtuon niini diha sa diwa sa maanindot nga pagdiskubre ug sa matinud-anon nga pagsunod. Kon kita magbusog sa mga pulong ni Kristo, matisok kini ‘diha sa mga papan nga mga kasingkasing sa tawo.’ [2 Mga Taga-Corinto 3:3.] Mahimo na kining mahinungdanong bahin sa atong kinaiyahan” (“Living by Scriptural Guidance,” Ensign, Nob. 2000, 17).

Si Elder Robert D. Hales, usab sa Korum sa Napulog Duha ka mga Apostoles, mitambag, “Kon kamo ug ako magbusog sa mga pulong ni Kristo, kinahanglan gayud kitang magtuon sa mga kasulatan ug mohangup sa Iyang mga pulong pinaagi sa pagpamalandong niini ug paghimo niini nga kabahin sa matag hunahuna ug lihok” (“Healing Soul and Body,” Ensign, Nob. 1998, 15).