Leksyon 76

Alma 11

Pasiuna

Samtang mipadayon sila si Alma ug Amulek sa pagtudlo sa katawhan sa Ammonihah, usa ka magbabalaod nga ginganlan og Zeezrom mitanyag ni Amulek og kwarta aron ilimud ang pagkaanaa sa Dios. Misulay usab si Zeezrom sa pagtuis sa mga pulong ni Amulek ug mipakaulaw sa iyang mga pagtulun-an mahitungod ni Jesukristo. Samtang midepensa si Amulek sa iyang kaugalingon batok sa pagsulay ni Zeezrom sa paglaang kaniya, siya mipamatuod nga ang kaluwasan gikan sa sala moabut lamang pinaagi ni Jesukristo. Mipamatuod usab si Amulek nga ang tanang katawhan mabanhaw ug pagadad-on aron “patubagon sa atubangan sa hukmanan ni Kristo ang Anak, ug ang Dios nga Amahan, ug ang Balaang Espiritu” sa Adlaw sa Paghukom (Alma 11:44).

Dapita ang Espiritu Santo

Awhaga ang mga estudyante sa pagdapit sa impluwensya sa Espiritu Santo samtang magdungan sila sa pagtuon sa mga kasulatan. Pipila sa mga buhat nga magdapit sa Espiritu mao ang sinsero nga pag-ampo, pagtudlo gikan sa mga kasulatan, pagpakigbahin sa pagpamatuod, pagpahayag sa gugma alang sa Dios ug sa uban, ug pagpakigbahin sa espirituhanong mga kasinatian. Kon makahigayon, mahimong maaghat ka sa pagtabang sa mga estudyante nga makaila sa impluwensya sa Espiritu Santo atol sa mga leksyon.

Mga Sugyot alang sa Pagtudlo

Alma 11:1–25

Gisalikway ni Amulek ang tintasyon ni Zeezrom sa paglimud sa pagkaanaa sa Dios

Hangyoa ang mga estudyante sa paghunahuna og usa ka butang nga ilang gipanag-iya nga bililhon kaayo nila nga dili gayud nila kini ikabaligya. Dapita ang pipila ka estudyante sa pagsulti kon unsa ang ilang gihunahuna ug nganong kadtong mga butanga bililhon kaayo kanila.

Ipasabut nga sa Alma 11 nagpadayon ang istorya ni Alma ug Amulek nga nagtudlo sa katawhan sa Ammonihah. Samtang nagtudlo si Amulek, giatubang siya sa usa ka abogado nga ginganlan og Zeezrom, kinsa mitanyag niya og kwarta agi og baylo sa usa ka butang nga bililhon kaayo ngadto ni Amulek.

Dapita ang mga estudyante sa pagsiksik sa Alma 11:21–22 aron sa pagdiskubre kon unsa ka daghan sa kwarta nga gitanyag ni Zeezrom ngadto ni Amulek, ug alang sa unsa nga rason. Ipareport sa mga estudyante kon unsay ilang nakat-unan.

Ipasabut nga ang pagpasabut ni Mormon sa sistema sa pangwarta sa Nephite sa Alma 11:4–19 makatabang kanato sa pagsabut sa gidak-on sa suhol ni Zeezrom. Tabangi ang mga estudyante nga makasabut nga ang usa ka onti mao ang usa ka piraso nga pilak [silver] nga dunay kinadak-ang balor (tan-awa sa Alma 11:6, 11–13). Ang usa ka onti gibana-bana nga sama sa usa ka semana nga swelduhan alang sa usa ka maghuhukom (tan-awa sa Alma 11:3, 11–13), nga nagpasabut nga ang unom ka mga onti sama sa mga unom ka semana nga swelduhan alang sa usa ka maghuhukom.

• Ngano kaha nga ang tanyag ni Zeezrom makapadani kaayo ngadto sa ubang tawo?

Dapita ang usa ka estudyante sa pagbasa og kusog sa Alma 11:23–25.

• Unsa ang tubag ni Amulek nga nagpakita mahitungod kaniya?

• Sumala sa Alma 11:25, unsa ang giplano ni Zeezrom nga buhaton kon midawat pa si Amulek sa iyang tanyag? Sa unsang paagi nga kini susama ngadto sa unsay buhaton ni Satanas kon ang mga tawo magpadala sa iyang mga tintasyon?

Aron matabangan ang mga estudyante sa pag-ila kon sa unsang paagi nga si Amulek nakalikay sa tanyag ni Zeezrom, isulat ang mosunod sa pisara: Ako dili … diin supak sa Espiritu sa Ginoo.

Dapita ang usa ka estudyante sa pagbasa sa Alma 11:22. Hangyoa ang klase sa pagpangita sa pulong nga gigamit ni Amulek aron makompleto kining pamahayag.

• Unsay laing mga pulong nga mahimo natong ibutang sa blangko nga mahimong makatabang kanato nga mosalig sa Espiritu Santo aron malikayan ang tintasyon? (“Buhata,” “hunahunaa,” o “tan-awa.”)

Hangyoa ang mga estudyante sa pagsulti og usa ka baruganan base sa Alma 11:22 nga makatabang kanila nga mahinumdom kon unsaon nila pagbuntog ang tintasyon. Samtang magkalain-lain ang mga tubag sa mga estudyante, kinahanglan nilang hinuklogan ang mosunod nga baruganan: Kon kita mosalig sa Espiritu Santo, makabuntog kita sa tintasyon. (Mahimo nimong isugyot nga isulat sa mga estudyante kini nga baruganan sa ilang mga kasulatan tupad sa Alma 11:22.)

• Sa inyong hunahuna sa unsang paagi nga ang pagkasensitibo sa mga pag-aghat sa Espiritu Santo makatabang kanato nga mabuntog ang tintasyon?

Basaha ang mosunod nga tambag gikan ni Presidente Boyd K. Packer, sa Korum sa Napulog Duha ka mga Apostoles:

“Kon nakahimo mo og mga butang nga dili unta angay, o kon nakigkauban mo sa mga tawo nga nagganoy ninyo sa sayop nga padulngan, mao kana ang panahon sa pagpakita sa inyong pagka-gawasnon, sa inyong kabubut-on. Paminawa ang tingog sa Espiritu, ug dili kamo mahisalaag.

“… Isip sulugoon sa Ginoo, ako mosaad nga kamo mapanalipdan ug maprotektahan gikan sa pagpangataki sa kaaway kon mopatalinghug mo sa mga pag-aghat nga gikan sa Balaang Espiritu.” (“Tambag ngadto sa mga Kabatan-onan,” Ensign o Liahona, Nob. 2011, 18).

Aron matabangan ang mga estudyante nga makasabut ug mabati ang kaimportante sa mosunod nga mga pag-aghat sa Balaang Espiritu, ipangutana ang mosunod:

• Unsa ang pipila ka sitwasyon diin ang kabatan-onan mahimong matintal sa pagbuhat supak sa ilang mga pagpamatuod?

• Unsa ang inyong buhaton aron mosalig sa Espiritu Santo? Sa unsang paagi nga kana makatabang kaninyo?

• Kanus-a man ang Espiritu Santo nakatabang ninyo sa pagbuntog sa tintasyon?

Awhaga ang mga estudyante sa paggamit unsa ang ilang nakat-unan pinaagi sa paghinumdom sa ehemplo ni Amulek sa sunod higayon nga sila matintal nga makompromiso ang ilang mga gituohan. Ipamatuod nga samtang sila magpuyo nga takus sa pagpakig-uban sa Espiritu Santo, sila makasinati og mas dakong kamasaligon sa pagbarug sa kamatuoran ug makabuntog sa tintasyon.

Awhaga ang tigkat-on sa paggamit

Kon ang usa ka baruganan sa ebanghelyo nakat-unan apan wala gamita, ang pagkat-on dili kompleto. Ang paggamit mahitabo kon ang usa ka tawo modawat sa kamatuoran diha sa iyang kasingkasing ug hunahuna ug dayon mobuhat sumala niana nga kamatuoran. Awhaga ang mga estudyante nga buhaton ang espirituhanong mga pag-aghat nga ilang nadawat aron sa paggamit sa mga kamatuoran sa ebanghelyo nga ilang nakat-unan.

Alma 11:26–40

Si Amulek mipamatuod sa Anak sa Dios ug sa pagbuntog sa pagsulay ni Zeezrom sa pagpakaulaw sa iyang mga pulong

Pangutan-a ang mga estudyante kon aduna bay nakasulay sa pagkwestiyon o misupak sa ilang mga gituohan pinaagi sa pagpakiglalis o paglingla. Dapita ang usa o duha ka mga estudyante nga ipakigbahin ang ilang mga kasinatian.

Ipasabut nga human si Zeezrom napakyas aron ilimud ni Amulek ang pagkaanaa sa Dios, iyang giilisan ang iyang mga pamaagi ug nagsugod sa pag-ataki sa hugot nga pagtuo ni Amulek diha ni Jesukristo.

Dapita ang pipila ka estudyante nga magpuli-puli sa pagbasa og kusog sa Alma 11:26–35. Hangyoa ang klase sa pagpangita sa mga paagi ni Zeezrom sa pagsulay aron sa pagtuis sa mga pulong ni Amulek. Hangyoa ang mga estudyante sa pagreport sa ilang nakit-an. Dayon dapita ang usa ka estudyante sa pagbasa og kusog sa Alma 11:36–37. Hangyoa ang klase sa paghinumdom kon giunsa sa pagkorihir ni Amulek ang dili tinuod nga gitudlo ni Zeezrom. Dapita ang mga estudyante nga tan-awon ang footnote 34a. (Mahimo kang mosugyot nga markahan sa mga estudyante kini nga footnote. 34a diha sa ilang mga kasulatan.) Hangyoa ang usa ka estudyante sa pagbasa og kusog sa Helaman 5:10–11.

• Nganong imposible nga maluwas diha sa atong mga sala? Unsa may kalainan tali sa maluwas sa atong mga sala ug sa pagkaluwas gikan sa atong mga sala?

Dapita ang usa ka estudyante sa pagbasa og kusog sa Alma 11:40. Ipasabut nga kining bersikulo naglangkob og baruganan nga kinahanglan natong sundon aron maluwas gikan sa atong mga sala. Isulat ang mosunod nga baruganan diha sa pisara: Kon kita motuo ni Jesukristo, kita matubos sa atong mga sala.

• Unsa man ang buot ipasabut niini kaninyo sa pagtuo diha kang Jesukristo?

• Nganong kita kinahanglan nga motuo kang Jesukristo aron maluwas gikan sa atong mga sala?

Aron matabangan ang mga estudyante nga makasabut kon sa unsang paagi ang hugot nga pagtuo diha ni Jesukristo mosangput sa katubsanan pinaagi sa paghinulsol, basaha ang mosunod nga pamahayag ni Presidente Dieter F. Uchtdorf sa Unang Kapangulohan:

“Nagkinahanglan kita og lig-on nga pagtuo ni Kristo aron makahimo sa paghinulsol. Ang atong pagtuo kinahanglan nga maglakip og usa ka ‘husto nga ideya sa kinaiya, mga kahingpitan, ug mga hiyas sa [Dios]’ (Lectures on Faith [1985], 38). Kon motuo kita nga ang Dios nasayud sa tanang mga butang, mahigugmaon, ug maloloy-on, makahimo kita sa pagbutang sa atong pagsalig diha Kaniya alang sa atong kaluwasan nga dili mapaling-paling. Ang patuo diha kang Kristo mousab sa atong mga hunahuna, mga gituohan, ug mga kinaiya nga wala mahiuyon sa kabubut-on sa Dios” (“Punto sa Luwas nga Pagbalik,” Ensign o Liahona, Mayo 2007, 100).

Ipares-pares ang mga estudyante. Hangyoa ang matag pares nga magpuli-puli sa pagpasabut sa matag usa kon unsaon nila sa pagtubag kon ang usa ka mas bata pa nga tawo mangutana nila sama sa mosunod. (Mahimo nimong isulat kining mga pangutana diha sa pisara.)

• Nganong nagkinahanglan ko nga motuo kang Jesukristo aron makahinulsol ug maluwas gikan sa akong mga sala?

• Sa unsang paagi nga ang hugot nga pagtuo kang Jesukristo nakatabang nimo sa paghinulsol?

Ipamatuod nga pinaagi sa pagbaton og hugot nga pagtuo ni Jesukristo, kita makahinulsol, maluwas gikan sa atong mga sala, ug makadawat og kinabuhing dayon.

Alma 11:41–46

Nagtudlo si Amulek mahitungod sa pagkabanhaw ug paghukom sa tanang katawhan

Aron matabangan ang mga estudyante sa pagkonsiderar kon nganong importante nga masayran nga kita sa katapusan mabanhaw ug mahukman, ipangutana:

• Unsaon kaha sa usa ka tawo pagpuyo ang ilang kinabuhi nga lahi kon sila motuo nga walay kinabuhi human sa kamatayon?

Isulat sa pisara ang pulong nga Pagkabanhaw ug Paghukom. Dapita ang mga estudyante sa pagsiksik sa hilum diha sa Alma 11:41–45, nga mangita og mga impormasyon kutob sa ilang mahimo mahitungod sa pagkabanhaw ug paghukom. Hangyoa ang mga estudyante sa pagreport unsay ilang nakit-an, ug ipasulat ang ilang mga tubag diha sa pisara. Siguroha nga usa sa mga pamahayag diha sa pisara nagpasabut sa kamatuoran nga ang tanang katawhan nga nagpuyo sa yuta sa katapusan mabanhaw. Ipasabut ang yano nga paghulagway sa pagkabanhaw sa Alma 11:45: “Sila dili na mamatay; ang ilang mga espiritu mahiusa uban sa ilang mga lawas, nga dili na gayud pagabulagon.” (Mahimo nimong awhagon nga markahan sa mga estudyante kini nga pamahayag.) Human makareport ang mga estudyante unsa ang ilang nakat-unan, mahimo nimong isugyot nga ilang isulat ang mosunod nga kamatuoran sa ibabaw sa pahina sa ilang mga kasulatan: Pinaagi sa Pag-ula ni Jesukristo, ang tanan mabanhaw ug mahukman sumala sa ilang mga binuhatan.

• Hain sa mga kamatuoran diha sa pisara ang nakapadasig kaninyo sa pag-andam sa pagsugat sa Dios?

• Ngano nga kining kamatuoran mahitungod sa pagkabanhaw makadala og kalinaw ug paglaum ngadto sa mga matarung?

Dapita ang mga estudyante sa pagbasa sa hilum sa Alma 11:46, nga mangita sa epekto sa mga pagtulun-an ni Amulek diha kang Zeezrom.

• Sa inyong hunahuna ngano kaha nga ang tawo mo-react sa ingon niining paagi ngadto sa pagtulun-an ni Amulek?

• Hain sa mga pagtulun-an sa Alma 11:41–45 ang sa imong hunahuna nga nakapalibug ni Zeezrom? Ngano man?

Ipamatuod nga tungod sa Pag-ula ni Jesukristo, tanang katawhan mabanhaw ug mobarug diha sa atubangan sa Dios “aron pagahukman sumala sa ilang mga buhat” (Alma 11:44). Hatagi ang mga estudyante og panahon nga makapamalandong unsa ang ilang nakat-unan karon ug sa unsang paagi kini may kalabutan ngadto nila. Dayon ipasulat nila ang mga tubag sa mosunod nga mga pangutana diha sa ilang notebook o scripture study journal. (Mahimo nimong isulat kining mga pangutana diha sa pisara.)

• Unsa ang imong gibati kon ikaw maghunahuna nga mabanhaw ug mahukman?

• Unsa ang gikinahanglan nimong buhaton aron maandam sa pagbarug sa atubangan sa Dios?

• Sa unsang paagi nga ang imong pagtuo nga ikaw mabanhaw ug mahukman nakaapekto sa paagi nga ikaw mopili sa pagpakabuhi sa matag adlaw?

Komentaryo ug Background nga Impormasyon

Alma 11:28. Aduna pa bay laing Dios?

Ang doktrina sa mga Santos sa Ulahing mga Adlaw bahin sa Dios nga Kapangulohan (nga ang Amahan, ang Anak, ug ang Espiritu Santo tulo ka managlahi nga mga Personahe kinsa hingpit nga nagkahiusa sa katuyoan ug sa doktrina) gi-ataki sa modernong Kristiyanong kalibutan. Ang mga Kristiyano kinsa makasubay sa ilang pagsabut sa Dios gikan sa ikaupat ug ikalima nga siglo sa mga tinuohan nga namahayag nga ang doktrina sa Trinidad (nga ang Amahan, ang Anak, ug ang Espiritu Santo dili managlahi nga binuhat) kanunayng ipangutana sa mga miyembro sa Simbahan mahitungod sa atong lahi nga pagsabut sa Dios. Ang pangutana uban sa nahatag nga tubag sa Alma 11:28–33 nagbilin usab og daghang mga nangutana sa doktrina sa Dios nga Kapangulohan sumala sa nalatid sa gipahiuli nga Simbahan. Si Roy W. Doxey, assistant sa opisina sa Konseho sa Napulog Duha ug dean emeritus sa Religious Instruction, sa Brigham Young University, mipasabut sa usa ka posible nga rason sa tubag ni Amulek nga adunay usa lang ka Dios:

“Aduna pa bay laing Dios? Kanunay kining gipangutana agi og tubag sa Alma kapitulo 11, diin si Zeezrom, usa ka kritiko, nakiglantugi sa misyonaryo nga si Amulek. …

“Aron masabtan ang pamahayag ni Amulek [nga adunay usa lang ug buhi nga Dios], kinahanglan atong tan-awon ang tibuok nga konteksto. Hapit sa tibuok nilang kasaysayan, daghang mga Israelite (mga katigulangan sa mga Nephite) ang matinguhaon sa pagdawat sa daghang pagano nga dios-dios sa mga Egyptian ug mga Canaanite. Bisan og ang Basahon ni Mormon wala maghisgut mahitungod sa pihong hunahuna nga pagbiya sa kamatuoran nga gituohan sa mga tawo sa siyudad ni Zeezrom sa Ammonihah, klaro nga ang pipila ka mga Nephite nga mitalikod sa kamatuoran sa panahon ni Alma mga tigsimba og dios-dios—sama sa ilang mga amahan nga mga Israelite. Sa dihang si Alma, ang kauban nga misyonaryo ni Amulek, mao ang punoang maghuhukom ingon man usab isip halangdong pari sa tibuok Simbahan, siya mitabang sa pag-establisar og usa ka lig-on ug matinud-anong pundok sa mga miyembro sa simbahan. Bisan pa niana, ‘kadto kinsa dili sakop sa ilang simbahan nagtugot sa ilang mga kaugalingon sa mga pagpamarang, ug diha sa pagsimba sa mga dios-dios.’ (Alma 1:32.) Ang Apostasiya usa ka dakong problema nga sa ulahi si Alma mihunong sa pagkamaghuhukom, ‘nga siya sa iyang kaugalingon makig-uban taliwala sa iyang mga katawhan, o taliwala sa mga katawhan ni Nephi, nga sila unta mosangyaw sa pulong sa Dios ngadto kanila.’ (Alma 4:19.)

“Isip usa ka misyonaryo, nakakaplag si Alma nga daghang mga tawo ang nalambigit og maayo sa pagsimba sa mga dios-dios. Iyang nadiskubrihan, sama pananglit, nga ang katawhan sa siyudad sa Zoram ‘mituis sa mga paagi sa Ginoo, ug nga si Zoram, kinsa mao ang ilang pangulo, nangulo sa mga kasingkasing sa mga katawhan sa pagyukbo sa mga amang nga dios-dios.’ (Alma 31:1.)

“Nan, mao kini ang konteksto, sa panaghisgutan ni Alma ug Amulek diha kang Zeezrom. Makita niining konteksto, ang tubag ni Amulek hingpit nga masabtan ug, dayag lang nga, husto: Adunay usa lamang ka ‘tinuod ug buhi nga Dios’—kinsa wala mipakigbahin sa iyang pagkadios uban sa daghang mga mini nga dios-dios nga inimbento sa tawo” (“I Have a Question,” Ensign, Ago. 1985, 11).

Si Elder Jeffrey R. Holland mipasabut kon giunsa ug ngano nga lahi ang gituohan sa mga Santos sa Ulahing mga Adlaw bahin sa Dios nga Kapangulohan gikan sa tradisyonal nga gituohan sa Kristiyanismo bahin sa Trinidad :

“Ang atong una ug pinakaimportante nga artikulo sa Ang Simbahan ni Jesukristo sa mga Santos sa Ulahing mga Adlaw mao nga “Kita nagtuo sa Dios, ang Amahan sa Kahangturan, ug sa Iyang Anak, si Jesukristo, ug sa Espiritu Santo” [Mga Artikulo sa Hugot nga Pagtuo 1:1]. Kita nagtuo nga kining tulo ka balaanong mga personahe nga naglangkob sa usa ka Dios nga Kapangulohan nagkahiusa sa katuyoan, sa pamaagi, sa pagpamatuod, sa misyon. Kita nagtuo nga Sila puno sa samang diosnong pagbati sa kalooy ug gugma, kaangayan ug grasya, pailub, pagpasaylo, ug katubsanan. Sa akong hunahuna tukma lang nga moingon nga kita motuo nga Sila usa ra sa matag mahinungdanon ug mahangturon nga aspeto nga mahunahunaan gawas lang sa pagtuo nga Sila tulo ka personahe nga nagtipon sa usa ka butang, ang Trinitarian nga hunahuna wala gayud mabutang diha sa kasulatan tungod kay kini dili tinuod. …

“Sa tuig A.D. 325 ang Romanong emperor nga si Constantine mipatawag og Konseho sa Nicaea sa paghisgut—lakip sa ubang mga butang—sa nagkadakong isyu kabahin sa giingon nga ‘trinity diha sa panaghiusa’ sa Dios. Unsay mitumaw gikan sa makabingkilon nga argumento sa mga tawo sa simbahan, mga philosopher, ug prominenteng mga opisyales sa simbahan nga nailhan (human sa laing 125 ka tuig ug tulo ka dagkong mga konseho) [Constantinople, A.D. 381; Efesus, A.D. 431; Chalcedon, A.D. 451] nga mao ang Nicene Creed, uban sa giusab nga konsepto [reformulation] sa kaulahian sama sa Athanasian Creed. Kining nagkalain-laing ebolusyon ug mga bersyon sa mga creed—ug ang uban pa nga nahimo sukad nianang panahona—mipahayag nga ang Amahan, Anak, ug Espiritu Santo walay pisikal nga porma, ang labing halangdon ug labing gamhanan sa tanang mga butang, wala diha sa sulod sa universe ug panahon [transcendent], anaa kanunay ug bisan asa [imminent], mahimong maanaa ingon nga lahi nga mga pagkakita sa samang lawas [consubstantial], matag usa mahangturon [coeternal], ug dili mailhan, nga walay lawas, mga parte sa lawas, o mga pagbati nga nagpuyo gawas sa kawanangan ug panahon. Sa ingon nga mga creed, ang tulo ka mga sakop managlahi nga mga tawo, apan usa lang sila ka binuhat, ang kanunayng mahisgutan nga ‘misteryo sa trinidad.’ Sila tulo ka managlahi nga mga tawo, apan dili tulo ka mga Dios apan usa ra. Ang tulo ka mga tawo dili masabtan, apan usa kini ka Dios kinsa dili masabtan.

“Kita mouyon sa atong mga kritiko kabahin sa dili mominus niana nga punto—nga ang ingon nga konsepto alang sa pagkadios sa tinuod dili masabtan. …

“Kita mamahayag nga kini klaro bisan walay lain pa nga pruweba [self-evident] gikan sa mga kasulatan nga ang Amahan, ang Anak, ug ang Espiritu Santo managlahi nga mga tawo, tulo ka balaanong mga binuhat, ug motawag sa pagtagad sa dili masaypan ug klaro nga mga ehemplo niini nga kamatuoran sama sa mahinugdanon nga Mapangaliyupoong Pag-ampo sa Manluluwas … , ang Iyang bunyag sa mga kamot ni Juan, ang kasinatian sa Bukid sa Transpigurasyon, ug ang pagkamatay ni Esteban—sa paghingalan og upat lamang” (“Sa Bugtong Tinuod nga Dios ug kang Jeuskristo Nga Iyang Pinadala,” Ensign o Liahona, Nob. 2007, 40–41).

Alma 11:38–39. Sa unsang paagi si Jesukristo ang Mahangturong Amahan?

Kon ang mga estudyante nagkinahanglan og tabang sa pagsabut kon sa unsang paagi nga si Jesukristo nahimo nga ang Anak sa Dios ug ang Mahangturong Amahan, mahimo nimong itudlo o ribyuhon ang dugang nga ideya sa pagtuon alang sa Mosiah 15:1–9 sa leksyon 60.