Leksyon 73: Alma 6–7

Leksyon 73

Alma 6–7

Pasiuna

Human napahiluna ang Simbahan didto sa Zarahemla, si Alma miadto sa siyudad sa Gideon. Iyang nakita nga ang katawhan didto nahimong mas matinud-anon kay sa niadtong anaa sa Zarahemla. Busa, ang iyang mensahe sa Gideon lahi kay sa iyang mensahe sa Zarahemla. Iyang giawhag ang katawhan sa pagpadayon sa pagsalig sa Ginoo ug sa pagtinguha sa paggamit sa Iyang Pag-ula diha sa ilang mga kinabuhi. Mipamatuod siya nga ang Manluluwas modala diha sa Iyang kaugalingon sa kamatayon ug sa atong mga sala, ug nga Siya modala usab diha sa Iyang kaugalingon sa atong mga kasakit, pag-antus, balatian, ug kakulangan, nga Siya masayud unsaon sa pagtabang kanato.

Mga Sugyot alang sa Pagtudlo

Alma 6

Gipahiluna ni Alma ang Simbahan sa Zarahemla ug miadto sa Gideon aron sa pagsangyaw

Sa dili pa ang leksyon, dapita ang usa ka estudyante nga mag-andam sa pagpakigbahin sa makadiyot diha sa klase og pipila ka paagi nga iyang gibati nga napanalanginan sa iyang mga paningkamot sa pagtambong sa simbahan. Sa pagsugod sa leksyon, hangyoa kini nga estudyante sa pag-adto sa atubangan sa klase ug ipakigbahin ang mga hunahuna nga iyang giandam. Mahimo usab kang mopakigbahin kon sa unsang paagi nga ikaw napanalanginan pinaagi sa pagtambong sa Simbahan.

Ipaila ang Alma 6 pinaagi sa pagpasabut nga kini nga kapitulo nagtudlo kon giunsa ni Alma ug sa ubang mga priesthood lider sa pagpalig-on sa Simbahan didto sa Zarahemla.

Dapita ang usa ka estudyante sa pagbasa og kusog sa Alma 6:4–6. Hangyoa ang klase sa pagsunod, nga mangita sa unsa ang gibuhat sa mga miyembro sa Simbahan sa Zarahemla alang niadtong wala makaila sa Dios. Dapita ang mga estudyante sa pagreport unsa ang ilang nakat-unan.

Isulat sa pisara ang mosunod nga kamatuoran: Ang Simbahan naestablisar alang sa kaayohan sa tanang katawhan. Aron matabangan ang mga estudyante nga maghunahuna mahitungod sa paagi nga kining kamatuoran makaimpluwensya sa ilang mga kinabuhi, ipangutana:

Sa unsang paagi kaha nga ang Simbahan karon makapanalangin niadtong wala makaila sa Dios?

Dapita ang mga estudyante sa paghunahuna og usa ka tawo nga nagkinahanglan nga mas makaila sa Dios. Kini nga tawo mahimong usa ka miyembro sa Simbahan o sakop sa laing tinuohan. Pagpamatuod sa mga panalangin nga atong madawat tungod kay kita mga miyembro sa Simbahan, ug awhaga ang mga estudyante sa pagdapit sa uban sa pagpakigbahin niadto nga mga panalangin.

Alma 7:1–13

Si Alma nanagna sa pag-anhi ni Jesukristo

Ipares-pares ang mga estudyante. Hangyoa ang matag pares sa paghisgot sa ilang mga tubag sa mosunod nga pangutana:

Unsa ang pipila ka panghitabo sa umaabut nga nakapadasig kaayo kaninyo?

Human makahisgot ang mga pares sa ilang mga tubag niining pangutana, hangyoa ang pipila ka estudyante sa pagpakigbahin sa ilang mga tubag diha sa tibuok klase. Dayon ipasabut nga human mapahiluna ni Alma ang Simbahan didto sa Zarahemla, miadto siya sa siyudad sa Gideon. Gisultihan niya ang katawhan didto sa tanang mga butang nga mahitabo sa umaabut, usa ka butang “nga labaw ka mahinungdanon kay kanilang tanan” (Alma 7:7). Mitudlo siya sa mga baruganan nga makatabang sa katawhan nga maandam alang sa mga panalangin nga moabut tungod niining umaabut nga panghitabo.

Dapita ang usa ka estudyante sa pagbasa og kusog sa Alma 7:3–6. Hangyoa ang klase sa pagpangita sa mga gilauman ni Alma kabahin sa katawhan sa Gideon. Dayon dapita ang laing estudyante sa pagbasa og kusog sa Alma 7:18–19. Hangyoa ang mga estudyante sa paghulagway unsa ang nakat-unan ni Alma pinaagi sa inspirasyon mahitungod sa katawhan sa Gideon.

Dapita ang mga estudyante sa pagbasa sa hilum sa Alma 7:7, 9–10, nga mangita sa panghitabo nga nabati ni Alma nga labing importanting mahibaloan sa katawhan.

Sumala sa Alma, unsa ang “usa ka butang nga [kanhi] mas importante” kay sa bisan unsang butang nga umaabut? Ngano kaha nga ang pag-anhi sa Manluluwas mao man ang labing importanting panghitabo sa tanang panahon?
Ngano kaha nga sultihan pa man ni Alma ang katawhan kinsa mituo na ug adunay lig-on nga pagtuo nga sila kinahanglan nga maghinulsol?

Ipasabut nga gitudlo kaniadto ni Alma kon nganong ang pag-anhi ni Jesukristo mao ang labing importanting panghitabo sa tanang kasaysayan sa katawhan. Hangyoa ang pipila ka estudyante nga magpuli-puli sa pagbasa og kusog sa Alma 7:11–13. Dapita ang nahabilin sa klase sa pagsunod ug ilhon unsa ang gidala sa Manluluwas diha sa Iyang kaugalingon alang kanato. (Tingali kinahanglan nimong ipasabut nga ang pulong pagtabang nagpasabut sa paghatag og kahupayan o tabang sa usa ka tawo.)

Ipasabut nga ang Alma 7:11–13 usa ka scripture mastery passage. Mahimo kang mosugyot nga ang mga estudyante momarka niini sa lahi nga paagi aron sayon ra nila kining mapangita.

Ilista ang mga tubag sa mga estudyante isip mga ulohan diha sa ibabaw sa pisara. Ang mga tubag mahimong maglakip sa mga sakit, kasakit, tintasyon, balatian, kamatayon, kahuyang, ug mga sala.

Mahimo nimong isugyot nga markahan sa mga estudyante ang mga pulong nga “sa matag matang” sa Alma 7:11. Hangyoa sila sa paghingalan og mga pananglitan sa matag kahimtang nga nasulat diha sa pisara. Samtang maghatag ang mga estudyante og mga pananglitan, isulat kini ubos sa katugbang nga mga ulohan. (Sama pananglit, ang kanser tingali ilista ubos sa balatian, ug ang pisikal nga kakulangan mahimong ilista ubos sa mga kahuyang.)

Dapita ang usa ka estudyante sa pagbasa sa mosunod nga pamahayag ni Elder Bruce C. Hafen sa Seventy:

“Ang Pag-ula dili lamang alang sa mga makasasala” (“Beauty for Ashes: The Atonement of Jesus Christ,” Ensign, Abr. 1990, 7). Mahimo nimong isulat kining pamahayag sa pisara ug isugyot sa mga estudyante nga isulat kini sa ilang mga kasulatan tupad sa Alma 7:11–13.

Base sa atong nabasa sa Alma 7:11–13, unsa kaha ang gipasabut ni Elder Hafen sa iyang giingon nga “ang Pag-ula dili lamang alang sa mga makasasala”?

Isulat ang mosunod nga kamatuoran diha sa pisara: Si Jesukristo nag-antus aron sa pagluwas kanato gikan sa sala ug kamatayon ug aron matabangan kita diha sa mga hagit sa mortalidad.

Aron matabangan ang mga estudyante nga mas masabtan kon unsaon nga makasalig sila sa Pag-ula sa Manluluwas, basaha ang mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:

Imahe

Elder Jeffrey R. Holland

“Aduna ka bay pakigbugno sa kadautan sa pagka-adik—tabako o drugas o sugal o ang makapaamong nga pagkaylap sa pornograpiya? … Naglibog ka ba sa imong pagkatawo [gender] o nagpangita ka ba og pagsalig sa kaugalingon? Ikaw ba—o imong minahal—nag-antus og sakit o depresyon o kamatayon? Bisan unsa pang mga lakang nga kinahanglan nimong himoon aron pagsulbad niining mga problema, duol una sa ebanghelyo ni Jesukristo. Salig sa mga saad sa langit. …

“Kini nga pagsalig diha sa maloloy-ong kinaiya sa Dios mao gayud ang katuyoan sa ebanghelyo nga gitudlo ni Kristo. Ako nagpamatuod nga ang Pag-ula sa Manluluwas nagabayaw gikan kanato dili lang sa palas-anon sa atong mga sala apan usab sa palas-anon sa atong kapakyasan ug kagul-anan, sa atong kasubo ug ka walay paglaum. [Tan-awa sa Alma 7:11–12.] Gikan sa sinugdanan, ang pagsalig niana nga pagtabang nakahatag nato og hinungdan ug paagi nga molambo, usa ka pagdasig sa paglikay sa atong kaugalingon gikan sa mga sala ug maninguha sa atong kaluwasan” (“Mga Butang nga Guba Mahimong Ayuhon,” Ensign o Liahona, Mayo 2006, 70).

Sa unsa nga paagi ang pagsabut sa Alma 7:11–13 makatabang kanato kon kita nag-atubang og mga hagit?

Aron sa paghulagway sa mga paagi nga kita makadawat og tabang ug kusog pinaagi sa Pag-ula ni Jesukristo, basaha ang mosunod nga mga sitwasyon. Human og basa sa matag usa, hangyoa ang mga estudyante sa pagpasabut kon sa unsang paagi si Jesukristo, pinaagi sa Iyang Pag-ula, makatabang sa usa ka tawo nga mag-atubang og ingon nga hagit.

Usa ka batan-ong babaye naaksidente sa usa ka sakyanan nga nakaparalisa ang iyang mga paa.
Usa ka batan-ong lalaki gikaulaw ang pipila ka dili maayo nga mga pagpili. Mibati siya og kasagmuyo ug kawalay bili.
Ang amahan sa usa ka batan-ong lalaki bag-ohay lang namatay, ug ang batan-ong lalaki mibalhin ngadto sa usa ka lungsod uban sa iyang inahan. Naguol siya ug nag-inusara, ug dili niya makita kon sa unsang paagi nga mahimong matarung og usab ang mga butang.

Ipakigbahin ang imong pagpamatuod sa gahum sa Pag-ula ug ang kahalapad sa maabut niini. Dayon hatagi ang mga estudyante og pipila ka minuto sa pagtubag diha sa ilang mga notebook o mga scripture study journal sa usa sa mosunod nga mga pangutana. (Mahimo nimong isulat kini nga mga pangutana diha sa pisara sa dili pa magklase, pag-andam og handout nga dunay mga pangutana, o basaha og hinay ang mga pangutana aron masulat kini sa mga estudyante.)

Kanus-a ang Pag-ula nakatabang nimo o sa tawo nga imong kaila sa usa sa mga paagi nga nahisgutan sa Alma 7:11–13?
Unsa ang inyong buhaton aron mosalig sa Pag-ula samtang nag-atubang ka sa mga hagit?

Dapita ang pipila ka estudyante sa pagpakigbahin diha sa klase kon unsay ilang gisulat. (Pahinumdumi sila nga dili mopakigbahin og bisan unsa nga personal o pribado kaayo.)

Alma 7:14–27

Nag-awhag si Alma sa mga tawo sa pagpadayon sa dalan ngadto sa gingharian sa Dios

Aron mapahinumduman ang mga estudyante kon giunsa ni Alma sa paghulagway ang espirituhanong kahimtang sa katawhan sa Gideon, dapita ang usa kanila sa pagbasa og kusog sa Alma 7:19. Ipasabut og maayo nga ang katawhan “anaa sa dalan nga padulong sa gingharian sa Dios.” Ipasabut nga gusto ni Alma nga motabang nila nga magpabilin niana nga dalan.

Aron matabangan ang mga estudyante nga makita nga pinaagi sa pagsunod sa mga baruganan sa ebanghelyo, atong gisubay ang dalan ngadto sa gingharian sa Dios, pagdrowing og dalan diha pisara. Sa sinugdanan sa dalan, isulat ang Mortalidad. Sa katapusan sa dalan, isulat ang Gingharian sa Dios. Bahina ang klase ngadto sa duha ka grupo. Dapita ang usa ka grupo sa pagtuon sa Alma 7:14–16 ug ang laing grupo nga magtuon sa Alma 7:22–24. Hangyoa ang mga grupo sa pagtan-aw sa unsay atong kinahanglang buhaton ug unsa ang atong angay nga mahimo aron masubay ang dalan padulong sa gingharian sa Dios.

Human ang mga estudyante adunay igong panahon sa pagbasa, dapita ang pipila kanila sa pagduol sa pisara. Hangyoa sila nga isulat subay sa dalan ang mga buhat ug hiyas nga ilang nakit-an nga paingon sa gingharian sa Dios. Mahimo nimong ikonsiderar ang pagpangutana sa mga estudyante unsa ang kahulugan ngadto kanila sa pipila ka mga buhat o hiyas subay sa dalan. Mahimo usab nimo silang hangyoon sa paghunahuna mahitungod kon unsaon nila pagsubay niining dalan diha sa ilang kinabuhi. Pagpamatuod nga kon magpuyo kita nga magmatinud-anon, anaa kita “sa dalan nga padulong sa gingharian sa Dios” (Alma 7:19).

Scripture Mastery—Alma 7:11–13

Tungod kay ang Alma 7:11–13 taas nga scripture mastery passage, mahimong maglisud ang mga estudyante sa pagmemorya niini. Apan ang pinulongan ni Alma naglangkob sa piho nga mga pulong nga makatabang sa mga estudyante nga mahinumduman sa tibuok nilang kinabuhi ang gahum ug kalapad sa maabtan sa Pag-ula. Aron matabangan sila nga mamemorya kining mahinungdanong mga pulong, isulat ang pulong sa Alma 7:11–13 diha sa pisara sa dili pa magklase, pulihan ang mga lat-ang sa mosunod nga importanting mga pulong kon kini makita: mga sakit, kasakit, tintasyon, balatian, kamatayon, kahuyang, sala, mga kalapasan. (Pananglitan, ang imong isulat sa Alma 7:11 magsugod og sama niini: “Ug siya magpadayon, mag-antus … ug … ug … sa matag matang.”)

Samtang kamo magbasa og kusog isip usa ka klase sa Alma 7:11–13, ipabutang sa mga estudyante ang nawala nga mga pulong. Human nabuhat nimo kini sa pipila ka higayon, hangyoa ang mga estudyante kon ila bang masulat sa laing papel ang mga pulong nga nagpakita unsa ang gidala sa Manluluwas diha sa Iyang kaugalingon alang kanila. Dapita ang mga estudyante sa paghinumdom kanunay unsa ang nabuhat ni Jesukristo alang kanila, aron kon sila makasinati og mga hagit makabaton sila og mas dakong pagtuo sa “gahum sa iyang pagtubos.”

Pahinumdom: Mahimo ka nga mogahin og pipila ka minuto sa sinugdanan sa sunod nimong klase aron makita kon ang mga estudyante nakahinumdom pa ba gihapon niining importanting mga pulong kabahin sa walay kinutuban nga maabtan sa Pag-ula sa Manluluwas.

Komentaryo ug Background nga Impormasyon

Alma 6:6. Pagpuasa ug pag-ampo alang “niadtong kinsa wala makaila sa Dios”

Aron mahatagan og gibug-aton nga ang mga panalangin sa pagkamiyembro sa Simbahan gituyo alang sa tanang anak sa Dios, mahimo nimong basahon ang mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:

“Tanan mag-ampo alang sa mga misyonaryo. Unta mahimo gayud kini. Sa samang diwa, kinahanglan usab kita nga mag-ampo alang niadtong (o kinsa nagkinahanglan nga) mahimamat sa mga misyonaryo. Didto sa Zarahemla, ang mga miyembro gisugo nga ‘makighiusa diha sa pagpuasa ug sa hugot nga pag-ampo’ [Alma 6:6] alang niadtong wala pa mipasakop sa Simbahan sa Dios. Kita makabuhat sa ingon.

“Makaampo usab kita sa inadlaw-adlaw alang sa atong kaugalingong misyonaryo nga mga kasinatian. Pag-ampo nga ubos sa balaanong pagdumala sa ingon nga mga butang, ang misyonaryong oportunidad nga inyong gusto giandam na diha sa kasingkasing sa usa ka tawo nga nangandoy ug nangita sa unsay anaa kaninyo. ‘Aduna pay daghan sa ibabaw sa yuta … kinsa natago gikan sa kamatuoran tungod kay sila wala masayud asa kini pangitaa.’ [D&P 123:12.] Pag-ampo nga kamo ilang makit-an! Ug unya alisto, tungod kay adunay daghan kaayo sa inyong kalibutan nga mibati og kagutom sa ilang mga kinabuhi” (“Witnesses unto Me,” Ensign, Mayo 2001, 15).

Alma 7:1–5. Ang katawhan sa yuta sa Gideon

Ang Alma 7 naglangkob sa mga pagtulun-an ni Alma ngadto sa katawhan kinsa nanimuyo didto sa siyudad sa Gideon, nga nahimutang dapit sa walog sa Gideon, “ingon nga gitawag sunod sa tawo kinsa gipatay pinaagi sa kamot ni Nehor uban sa espada” (Alma 6:7). Si Gideon usa ka matinud-anon nga disipulo ni Jesukristo kinsa nahimong instrumento sa mga kamot sa Dios sa pagtubos sa katawhan ni Limhi gikan sa pagkaulipon. Siya misanta sa doktrina ni Nehor uban sa pulong sa Dios ngadto sa kamatayon. (Tan-awa sa Mosiah 22:3–9; Alma 1:7–9.) Ang katawhan nga nagpuyo sa yuta nga midala sa pangalan niining matinud-anon nga tawo mga matinud-anon usab (tan-awa sa Alma 7:17–20, 26). Si Alma nakapamulong ngadto kanila og balaang mga pulong uban sa kalipay, nasayud nga sila mituo ug mipili sa pagsimba sa tinuod ug buhi nga Dios (tan-awa sa Alma 7:6). Ang ilang kamatinud-anon mahimong miandam kanila sa pagdawat sa gamhanang leksyon ni Alma bahin sa Pag-ula—nga si Jesukristo “modala diha kaniya sa mga sakit ug mga balatian sa iyang mga katawhan,” nga Siya “[mo]tabang sa iyang mga katawhan sumala sa ilang mga kahuyang,” ug nga Siya “modala diha kaniya sa mga sala sa iyang mga katawhan” (Alma 7:11–13).

(Alma 7:10.) Si Jesus natawo “didto sa Jerusalem”

Si Presidente Joseph Fielding Smith mipasabut sa dapit sa natawhan sa Manluluwas sumala sa gipamahayag ni Alma:

“Walay panagsumpaki diha sa Basahon ni Mormon uban sa bisan unsang kamatuoran nga narekord sa Biblia. Ang mainampingon nga pagbasa kon unsa ang gisulti ni Alma mopakita nga siya walay tumong sa pagpahayag nga si Jesus matawo sa Jerusalem. Si Alma mas nakahibalo. Ingon man si Joseph Smith ug kadtong iyang mga kaubanan sa pagpagawas sa Basahon ni Mormon. Kon miingon si Alma nga, ‘natawo sa Jerusalem, ang siyudad sa atong mga amahan,’ nakahimo unta kini sa tanang kalainan sa kalibutan. Moingon unta kita nga nasayop siya. Wala masayop si Alma, ug unsay iyang gisulti tinuod.

“Si Dr. Hugh Nibley, sa iyang pagtuon sa priesthood alang sa 1957, An Approach to the Book of Mormon, sa Leksyon 8, pahina 85, adunay gisulti sa ingon niini nga punto:

“‘… Usa sa paborito nga mga punto sa pag-ataki sa Basahon ni Mormon mao ang gipamahayag sa Alma 7:10 nga ang Manluluwas matawo “didto sa Jerusalem diin mao ang yuta sa atong mga kagikanan.” Dinhi ang Jerusalem dili mao ang siyudad “sa yuta sa atong mga kagikanan,” kini mao ang yuta. Si Kristo natawo sa usa ka balangay mga unom ka milya gikan sa siyudad sa Jerusalem; wala kini sa siyudad, apan anaa kadto sa unsay ato karong nahibaloan nga ang karaang mga tawo mismo nihingalan niini isip “ang yuta sa Jerusalem”’” (Answers to Gospel Questions, comp. Joseph Fielding Smith Jr., 5 vols. [1957–66], 1:174).

Alma 7:11–13. “Mga sakit ug mga kasakit ug mga pagtintal sa matag matang”

Si Presidente Henry B. Eyring sa Unang Kapangulohan mitanyag sa mosunod nga mga panabut kabahin sa kahupay nga atong madawat tungod sa Pag-ula sa Manluluwas:

“Makahupay kanato kini kon kinahanglan gayud kita nga maghulat diha sa kalisdanan alang sa gisaad nga kahupayan sa Manluluwas nga Iyang nasayran, gikan sa kasinatian, kon unsaon sa pag-ayo ug pagtabang kanato. Ang Basahon ni Mormon naghatag kanato og piho nga kasiguroan sa Iyang gahum sa paghupay. Ug ang hugot nga pagtuo niana nga gahum makahatag kanato sa pailub samtang kita nag-ampo ug motrabaho ug maghulat sa tabang. Mahimo unta Niya ang pagkasayud kon unsaon sa pagtabang kanato pinaagi lamang sa pagpadayag, apan Iyang gipili ang pagkat-on pinaagi sa Iyang kaugalingong personal nga kasinatian” (“Kalisdanan,” Ensign o Liahona, Mayo 2009, 24).

Si Elder Dallin H. Oaks sa Korum sa Napulog Duha ka mga Apostoles nagtudlo nga ang Maluluwas makatabang kanato sa bisan unsang matang sa hagit nga atong atubangon:

“Daghan ang nagpas-an og bug-at nga mga palas-anon. Ang uban nawad-an sa usa ka minahal tungod sa kamatayon o sa pag-amuma alang sa usa ka masakiton. Ang uban nasakitan tungod sa diborsyo. May lain nga nangandoy og mahangturong kaminyoon. Ang uban nabiktima sa maka-adik nga butang o mga bisyo sama sa bino, tabako, drugas, o pornograpiya. May lain nga nangabakol o may deperinsya sa panghunahuna. Ang uban naghigwaos tungod sa pagkaibug sa isigka lalaki o isigka babaye. Ang uban may mapait nga pagbati sa pagka-ubos o wala kinahanglana. …

“Ang makaayo nga gahum ni Ginoong Jesukristo—mahimong kini motangtang sa atong alantuson o mopalig-on kanato aron makalahutay ug makadawat kanila … —anaa alang sa matag kalisdanan niining mortalidad” (“Iyang Papahulayon ang Nag-antus,” Ensign o Liahona, Nob. 2006, 6, 8).

Si Elder Jeffrey R. Holland sa Korum sa Napulog Duha ka mga Apostoles misulat sa pagbati ni Kristo ug sa abilidad sa pagtabang kanato:

“Si Kristo naglakaw sa dalan nga ang matag mortal gitawag sa paglakaw aron nga siya masayud kon unsaon sa pagtabang ug pagpalig-on kanato sa atong labing lisud nga panahon. Nasayud siya sa kinahiladman ug sa labing personal nga palas-anon nga atong gidala. Nasayud siya sa labing dayag ug emosyonal nga mga sakit nga atong gidala. Siya mipaubos sa tanang pagbangutan aron nga siya makabayaw kanato ibabaw niini. Walay pagbangutan o kasub-anan o kaguol sa kinabuhi nga wala niya giantus alang kanato ug gidala diha sa iyang kaugalingong lagsik ug maloloy-ong abaga” (Christ and the New Covenant: The Messianic Message of the Book of Mormon [1997], 223–24).