Leksyon 128
3 Nephi 19
Pasiuna
Pagkahuman nga nakompleto sa Manluluwas ang Iyang unang pagbisita sa mga Nephite, ang balita sa Iyang pagbisita mikaylap taliwala sa mga katawhan nianang tibuok gabii. (Ang tanang mga panghitabo nga narekord sa 3 Nephi 11–18 nahitabo sulod sa usa ka adlaw.) Sa tibuok gabii, ang mga katawhan naghago sa “hilabihan … aron unta sila sa pagkabuntag anaa sa dapit” kon asa magpakita pag-usab ang Manluluwas (3 Nephi 19:3). Pagka-buntag, ang napulog duha ka mga disipulo nagtudlo sa mga katawhan ug nag-ampo uban kanila. Si Jesukristo mipakita ug misugo sa mga katawhan sa pag-ampo, samtang Siya nag-ampo ngadto sa Amahan alang kanila. Tungod sa ilang hugot nga pagtuo, ang napulog duha ka mga disipulo nahimong putli. Si Jesus nag-ampo nga ang mga disipulo ug ang tanang mituo sa ilang mga pulong mahimong mahiusa uban Kaniya ug sa Iyang Amahan.
Mga Sugyot alang sa Pagtudlo
3 Nephi 19:1–14
Ang napulog duha ka mga disipulo nangalagad ngadto sa mga katawhan sumala sa gisugo sa Manluluwas
Dapita ang mga estudyante sa paghunahuna kon unsa kaha ang ilang buhaton o unsa kaha ang ilang bation kon sila nasayud nga ugma si Jesukristo moabut ngadto sa templo (o stake center, o sentro sa siyudad, o laing mga dapit nga nagkinahanglan pa nga paningkamutan og biyahe sa mga estudyante).
-
Unsaon ninyo pag-adto didto?
-
Kinsa ang inyong gusto nga ikauban sa pag-adto?
-
Unsa ang inyong buhaton aron makaandam alang niining kasinatian?
Pahinumdumi ang mga estudyante nga sa naghinapos na ang unang adlaw sa pagbisita sa Manluluwas ngadto sa mga Nephite, miawhag Siya sa mga tawo sa pag-adto sa ilang mga panimalay ug mamalandong ug mag-ampo mahitungod sa Iyang mga pagtulun-an aron sa pagpangandam sa Iyang pagbisita sa sunod nga adlaw (tan-awa sa 3 Nephi 17:3). Hangyoa ang mga estudyante sa pagbasa og hilum sa 3 Nephi 19:1–3, nga mangita sa tubag sa mga Nephite ngadto sa gisaad sa Manluluwas nga Siya mobalik pagkasunod adlaw. Human makareport ang mga estudyante sa unsay ilang nakit-an, i-summarize ang 3 Nephi 19:4–8 pinaagi sa pagpasabut nga human nagpundok ang mga katawhan pagkasunod adlaw, ang napulog duha ka mga disipulo mibahin sa mga katawhan ngadto sa napulog duha ka mga grupo ug gisugdan ang pagtudlo kanila. Human sa pagsugo sa pundok sa mga katawhan nga moluhod sa pag-ampo, ang napulog duha ka mga disipulo nag-ampo usab ug dayon mitudlo sa mga katawhan sa samang mga kamatuoran nga gitudlo sa Manluluwas sa miaging adlaw. Dayon ang mga disipulo nangluhod pag-usab aron sa pag-ampo.
Dapita ang usa ka estudyante sa pagbasa og kusog sa 3 Nephi 19:8–9. Hangyoa ang klase sa pagsunod, nga mangita kon unsa ang giampo sa mga disipulo.
-
Unsa ang gitinguha pag-ayo sa mga disipulo?
-
Ang napulog duha ka mga disipulo mao ang modumala sa mga kalihokan sa simbahan taliwala sa mga Nephite human mobiya ang Manluluwas. Ngano kaha nga gikinahanglan nila ang Espiritu Santo diha sa ilang pagpangalagad?
-
Sa inyong gihalad nga mga pag-ampo, unsa ang pipila ka mga butang nga inyong gitinguha pag-ayo?
-
Nag-ampo ba kamo alang sa Espiritu Santo? Ngano o nganong dili man?
Dapita ang usa ka estudyante sa pagbasa og kusog sa 3 Nephi 19:10–12. Pagkahuman sa iyang pagbasa, ipasabut nga kining ikaduhang bunyag usa ka espesyal nga sirkumstansya. Bisan tuod nga ang mga Nephite nabunyagan na kaniadto alang sa kapasayloan sa sala ug nahimong takus nga maanaa sa presensya ni Jesukristo, ang Manluluwas misugo kanila nga magpabunyag pag-usab tungod kay Siya miorganisar pag-usab sa Simbahan.
Dapita ang usa ka estudyante sa pagbasa og kusog sa 3 Nephi 19:13–14. Hangyoa ang klase sa pagsunod, nga mangita sa mga panalangin nga nadawat sa mga disipulo agi og tubag sa ilang matarung nga mga tinguha. Aron matabangan nga madugangan ang tinguha sa mga estudyante alang sa impluwensya sa Espiritu Santo diha sa ilang kinabuhi, buhata ang mosunod nga kalihokan:
Ipares-pares ang mga estudyante. Hangyoa ang matag parisan sa paghimo og lista diha sa mga notebook o mga scripture study journal sa unsay buhaton sa Espiritu Santo alang niadtong nagpakabuhi nga takus. Sunod, dapita ang mga estudyante sa pagkumpara sa ilang mga nalista ngadto sa mosunod nga pamahayag ni Elder Robert D. Hales sa Korum sa Napulog Duha ka mga Apostoles. (Sa dili pa magklase, paghimo og mga kopya sa pamahayag o isulat kini diha sa pisara.) Ipadugang sa mga estudyante ngadto sa ilang mga nalista ang bisan unsang mga ideya nga ilang nakit-an samtang sila nagbasa sa pamahayag.
“Ang Espiritu Santo … mao ang tinubdan sa atong pagpamatuod sa Amahan ug sa Anak. …
“Kita nagkinahanglan sa Espiritu Santo isip atong makanunayon nga kauban aron sa pagtabang kanato nga makahimo og mas maayong pagpili sa mga desisyon nga atong giatubang matag adlaw. … Ang pagpakig-uban sa Espiritu mohatag kanila [atong mga kabatan-onan] og kalig-on sa pagbatok sa dautan ug, kon gikinahanglan, maghinulsol ug mobalik ngadto sa higpit ug pig-ot nga dalan. … Gikinahanglan natong tanan ang pagpalig-on nga mahatag pinaagi sa Espiritu Santo. … Ang pagbaton sa gasa sa Espiritu Santo makatabang sa mga sakop sa pamilya nga mohimo og maalamon nga mga pagpili—mga pagpili nga makatabang kanila nga makabalik uban ang ilang mga pamilya ngadto sa ilang Amahan sa Langit ug sa Iyang Anak, si Jesukristo, aron magpuyo uban Kanila sa kahangturan” (“The Covenant of Baptism: To Be in the Kingdom and of the Kingdom, ” Ensign, Nob. 2000, 8).
-
Sa unsang mga paagi nga ang mga panalangin diha sa inyong lista makatabang sa kabatan-onan sa Simbahan?
Dapita ang mga estudyante sa pagribyu sa lista sa mga panalangin nga ilang nasulat ug ikonsiderar kon unsa ang atong kinahanglang buhaton aron mahimong angayan alang niining mga panalangin. Hangyoa sila sa pagbasa og hilum sa 3 Nephi 19:9, 13, nga mangita og usa ka baruganan mahitungod sa pagdawat sa impluwensya sa Espiritu Santo. Ipasulat sa mga estudyante ang baruganan nga ilang nahibaloan. Hangyoa ang pipila kanila sa pagpakigbahin kon unsa ang ilang nasulat. (Ang mga estudyante mahimong mopakigbahin og sama sa mosunod: Ang atong matarung nga mga tinguha ug mga pag-ampo makapahimo natong angayan nga mapuno sa Espiritu Santo.)
-
Kanus-a nga higayon nga ang inyong matarung nga mga tinguha ug mga pag-ampo nakatabang kaninyo nga mobati sa impluwensya sa Espiritu?
Isulat ang mosunod nga dili kompleto nga pamahayag diha sa pisara. Dapita ang mga estudyante sa pagsulat niining dili kompleto nga pamahayag ug dayon kompletuhon kini diha sa ilang kaugalingong mga pulong.
Akong ipakita sa Langitnong Amahan ang akong tinguha alang sa pakig-uban sa Espiritu Santo pinaagi sa …
3 Nephi 19:15–36
Ang Manluluwas mipakita ug nag-ampo alang sa mga katawhan aron mahimong putli pinaagi sa ilang hugot nga pagtuo
Hangyoa ang usa ka estudyante sa pagbasa og kusog sa 3 Nephi 19:15–16. Ipasabut nga samtang ang mga katawhan nangluhod, nakasaksi sila ni Jesukristo nga mihalad og tulo ka managlahi nga pag-ampo alang sa Iyang mga disipulo ug sa pundok sa mga katawhan. (Ipasabut nga sa ulahing bahin sa leksyon ang klase motuon sa ikatulong pag-ampo sa Manluluwas.)
Isulat ang mosunod nga mga pakisayran sa kasulatan ug mga pangutana diha sa pisara sa dili pa magklase (o andama kini diha sa usa ka handout alang sa matag estudyante):
Unsa ang inyong makat-unan mahitungod sa pag-ampo gikan niining tudling?
Unsaon ninyo paggamit ang inyong nakat-unan niining mga bersikulo ngadto sa inyong personal nga mga pag-ampo?
Bahina ang klase ngadto sa mga grupo nga tinagutlo ka estudyante ang matag usa. (Kon gamay ra ang imong klase, mahimo nimong bahinon ang klase ngadto sa ginagmay nga mga grupo.) Pag-assign og usa ka estudyante sa matag grupo aron mobasa og usa sa mga tudling sa kasulatan nga gisulat sa pisara. Pahibaloa ang mga estudyante nga sila kinahanglang andam sa pagtubag sa mga pangutana diha sa pisara gikan sa ilang mga grupo.
Human sa igong panahon, hangyoa ang mga estudyante sa pagpakigbahin sa ilang mga tubag sa mga pangutana ngadto sa laing mga sakop sa ilang mga grupo. Pangandam sa pagtubag kon ang mga estudyante mangutana kon nganong ang mga disipulo nag-ampo ngadto sa Manluluwas (tan-awa sa 3 Nephi 19:18). Ipasabut nga dinhi niining talagsaon nga hitabo, ang mga disipulo nag-ampo ngadto ni Jesukristo tungod kay Siya mismo nag-uban kanila isip representante sa Amahan (tan-awa sa 3 Nephi 19:22).
Dapita ang usa ka estudyante sa pagbasa og kusog sa 3 Nephi 19:31–34. Hangyoa ang klase sa pagsunod ug ikonsiderar kon nganong nakaapekto og maayo sa mga katawhan ang pag-ampo sa Manluluwas. Dapita ang pipila ka mga estudyante sa pagreport kon unsay ilang nakit-an. Samtang ang mga estudyante mahimong makat-on og daghang kamatuoran gikan sa usag usa samtang sila nagpakigbahin, ang mosunod nga kalihokan mopasabut og duha ka mga baruganan nga tingali ilang madiskubrihan sa ilang pagtuon.
Isulat ang mosunod diha sa pisara: Kon kita mopakita og hugot nga pagtuo diha ni Jesukristo, …
Hangyoa ang mga estudyante nga ribyuhon sa hilum ang 3 Nephi 19:28, nga mangita og mga paagi nga makompleto ang pamahayag nga gisulat sa pisara. (Dapita ang mga estudyante sa pagsulat sa ilang mga tubag. Ang mosunod maoy usa ka paagi nga ang mga estudyante tingali makakompleto sa pamahayag: Kon kita mopakita og hugot nga pagtuo diha ni Jesukristo, kita mahimo nga putli.)
-
Unsa ang gipasabut sa mahimo nga putli? Sa unsang paagi nga ang pagpakita og hugot nga pagtuo diha ni Jesukristo makatabang kanato nga mahimong limpyo?
-
Sa unsang mga paagi nga ang mga disipulo mipakita og hugot nga pagtuo atol sa mga panghitabo nga narekord sa 3 Nephi 19?
Aron matabangan ang mga estudyante nga makasabut nga kita malimpyuhan pinaagi sa Espiritu Santo, pahinumdumi sila nga ang mga disipulo nakadawat na sa Espiritu Santo ug “napuno … uban sa kalayo” (3 Nephi 19:13). Ipasabut nga ang mga pulong nga “napuno … uban sa kalayo” usa ka simbolo, nga nagpasabut ngadto sa panalangin nga nalimpyuhan pinaagi sa impluwensya sa Espiritu Santo.
Hangyoa ang mga estudyante nga usbon pagbasa og hilum ang 3 Nephi 19:23, 29, nga mangita sa laing panalangin nga moabut niadtong kinsa nakabaton sa Espiritu sa Ginoo uban kanila. (Human og basa sa mga estudyante, mahimo nimong isugyot nga ilang markahan diha sa duha ka bersikulo ang mga pulong “nga unta kita magkahiusa.”)
-
Sa unsang paagi nga si Jesukristo ug ang Amahan usa? (Sila managlahi, mahikap nga mga binuhat, apan usa sila sa katuyoan ug doktrina. Hingpit nga nagkahiusa, ilang gipahinabo ang balaang plano sa Langitnong Amahan bahin sa kaluwasan.)
-
Unsay kahulugan niini alang kanato nga mahimong usa uban sa Dios nga Amahan ug sa Anak?
-
Unsay atong makat-unan gikan sa 3 Nephi 19:23, 29 mahitungod sa paagi nga kita mahimong usa uban Kanila? (Pinaagi sa hugot nga pagtuo, kita malimpyo ug mahiusa uban ni Jesukristo, sama nga Siya usa uban sa Amahan.)
Dapita ang usa ka estudyante sa pagbasa sa mosunod nga pamahayag ni Elder D. Todd Christofferson sa Korum sa Napulog Duha ka mga Apostoles. Hangyoa ang klase sa pagpaminaw sa paagi nga kita mahiusa uban sa Amahan ug sa Anak:
“Si Jesus nakakab-ot sa hingpit nga panaghiusa ngadto sa Amahan pinaagi sa pagtugyan sa Iyang kaugalingon, sa lawas ug sa espiritu, ngadto sa kabubut-on sa Amahan. Ang Iyang pangalagad kanunay nga tataw nga nakapokus tungod kay wala siyay mga hunahuna o mga tinguha nga wala mahiuyon sa Amahan . Nagpasabut sa Iyang Amahan, si Jesus miingon, ‘Sa kanunay ginabuhat ko man ang makapahimuot kaniya’ (Juan 8:29). …
“Sa pagkatinuod dili kita mahiusa sa Dios ug ni Kristo hangtud nga atong himoon ang Ilang kabubut-on ug kagustohan nga maoy atong pinakadakong tinguha. Ang ingon ka pagkamanunuton dili mahitabo sa usa ka adlaw, apan pinaagi sa Balaang Espiritu, ang Ginoo maoy motudlo kanato kon kita mouyon hangtud, sa paglabay sa panahon, mamahimong tukma ang pag-ingon nga Siya anaa kanato ingon nga ang Amahan anaa kaniya” (“Aron nga Sila Mausa Ngari Kanato,” Ensign, Nob. 2002, 72, 73).
Dapita ang mga estudyante sa pagbasa og hilum sa 3 Nephi 19:35–36 ug sa pagpamalandong sa kalig-on sa ilang kaugalingong mga pag-ampo. Isaad sa mga estudyante nga kita usab makaangkon og mas mahinungdanon nga espirituhanong mga kasinatian ug molambo ngadto sa pakighiusa uban sa Amahan ug sa Anak kon mopalambo kita sa atong pagtuo ug matinguhaong mag-ampo alang sa pakig-uban sa Espiritu.
Komentaryo ug Background nga Impormasyon
3 Nephi 19:10–13. Nabunyagan pag-usab
Si Presidente Joseph Fielding Smith mipasabut kon nganong ang mga Nephite kinahanglan nga mabunyagan pag-usab:
“Walay katingad-an diha sa kamatuoran nga sa dihang ang Ginoo miadto sa mga Nephite, si Nephi nabunyagan ug ingon man usab ang tanan bisan og nabunyagan na sila kaniadto.
“Ang Simbahan taliwala sa mga Nephite sa wala pa miabut si Kristo wala pa sa kahingpitan niini ug anaa pa ubos sa balaod ni Moises. Ang Manluluwas mipahiuli sa kahingpitan ug mihatag kanila sa tanang mga ordinansa ug mga panalangin sa ebanghelyo. Busa, sa pagkatinuod kini nahimong usa ka bag-ong organisasyon, ug pinaagi sa bunyag sila misulod niini.
“Kita adunay susama nga sitwasyon niini nga dispensasyon. Si Propeta Joseph Smith ug Oliver Cowdery gibunyagan pinaagi sa mando sa Anghel nga si Juan Bautista. Ang pipila sa uban nabunyagan nga wala pa ang pag-organisar sa Simbahan. Hinoon, sa adlaw nga naorganisar ang simbahan, ang tanan nga nabunyagan na gibunyagan pag-usab, dili alang sa kapasayloan sa sala, apan alang sa pagsulod ngadto sa Simbahan. Sa matag sitwasyon ang rason managsama ra” (Answers to Gospel Questions, comp. Joseph Fielding Smith Jr., 5 vols. [1957–66], 3:205–6).
3 Nephi 19:18, 22. “Sila nag-ampo ngadto kang Jesus”
Gikan sa mga kasulatan ug mga pagtulun-an sa mga propeta sa ulahing mga adlaw, nasayud kita nga angay kitang mosimba sa Dios nga Amahan ug mag-ampo ngadto Kaniya lamang. Kita kinahanglang dili mag-ampo ngadto ni Jesukristo. Sama pananglit, ang Manluluwas nagtudlo sa mga Nephite, “Kamo kinahanglan gayud nga mag-ampo sa kanunay ngadto sa Amahan sa akong ngalan” (3 Nephi 18:19). Hinoon, wala madugay human ang Manluluwas mitudlo niini, ang Iyang Nephite nga mga disipulo direktang nag-ampo ngadto Kaniya (tan-awa sa 3 Nephi 19:18). Ila kining gibuhat, Siya miingon, tungod kay Siya nag-uban kanila (tan-awa sa 3 Nephi 19:22). Si Elder Bruce R. McConkie sa Korum sa Napulog Duha ka mga Apostoles mipasabut nga kini usa ka eksepsyon—usa ka lahi nga sitwasyon:
“Adunay usa ka espesyal nga rason nganong gihimo kini niining higayuna ug sa usa lang ka higayon. Si Jesus mitudlo na kanila sa pag-ampo diha sa iyang ngalan ngadto sa Amahan, nga maoy una nilang gibuhat. … Si Jesus anaa sa ilang atubangan isip ang simbolo sa Amahan. Sa pagtan-aw kaniya, ingon og ilang nakita ang Amahan; sa pag-ampo ngadto kaniya, ingon og sila nag-ampo ngadto sa Amahan. Usa kadto ka espesyal ug lahi nga sitwasyon” (The Promised Messiah [1978], 560, 561).