Alma 56–58

Pasiuna

Si Helaman ug si Kapitan Moroni nakig-away sa mga Lamanite sa laing dapit sa yuta. Mipadala og sulat si Helaman ngadto ni Moroni nga naghulagway sa giyera sa iyang kasundalohan batok sa mga Lamanite ug nagpadayag sa iyang pagsalig sa hugot nga pagtuo sa 2,060 ka batan-ong mga manggugubat kinsa miapil sa iyang kasundalohan. Gihulagway usab ni Helaman kon unsa ang gibuhat sa iyang kasundalohan aron makadaug sa giyera ug aron madawat ang paglaum ug kusog panahon sa ilang mga kasakit.

Mga Sugyot alang sa Pagtudlo

Alma 56

Ang mga kasundalohan ni Antipus ug ni Helaman nagmadaugon batok sa kinakusgan nga kasundalohan sa mga Lamanite

Pangutan-a ang mga estudyante kon nakadawat ba sila sukad og sulat o mensahe nga nakapalig-on kanila sa paglahutay sa piho nga kalisdanan. Ipasabut nga ang sulod sa Alma 56–58 gilangkuban sa usa ka epistola, o sulat, nga gisulat ni Helaman ngadto ni Kapitan Moroni atol sa malisud nga panahon sa gubat. Dapita ang mga estudyante sa pagbasa sa hilum sa Alma 59:1–2 aron sa pagdiskubre kon sa unsang paagi mibalos si Kapitan Moroni ngadto sa sulat. Awhaga ang mga estudyante samtang sila magtuon sa sulat sa pag-ila sa mga rason nganong si Kapitan Moroni naglipay bisan anaa pa siya sa lisud nga mga kahimtang.

I-summarize ang Alma 56:2–17 pinaagi sa pagpasabut nga si Helaman mimando og usa ka gamayng pundok sa kasundalohan nga gilangkuban sa 2,000 ka mga anak nga lalaki sa mga Anti-Nephi-Lehi, o katawhan ni Ammon. Kini nga mga sundalo sa kasagaran giila isip ang 2,000 ka batan-ong mga manggugubat. (Mahimong gikinahanglan nimong ipasabut nga ang pulong batan-on [stripling] nagpasabut nga mga bata pa.) Ang mga ginikanan niining batan-ong mga lalaki mihimo og pakigsaad nga dili na mousab sa paggamit sa hinagiban. Ang batan-ong mga lalaki, kinsa wala maapil sa samang pakigsaad, miboluntaryo sa pagpanalipod sa ilang mga ginikanan ug sa uban nga mga Nephite kon sila hulgaon sa mga kasundalohan sa Lamanite.

Ipasabut nga si Helaman nangulo sa 2,000 ka batan-ong mga manggugubat ngadto sa siyudad sa Judea aron sa pagtabang sa kasundalohan sa Nephite nga gipangulohan ni Antipus. Ang mga Lamanite mibihag sa pipila ka siyudad sa Nephite ug mipakunhod og dako sa kasundalohan ni Antipus Nalipay si Antipus sa dihang si Helaman ug ang iyang kasundalohan miabut aron sa pagtabang.

Dapita ang mga estudyante sa pagbasa sa hilum sa Alma 53:17–21 nga mangita sa mga pulong nga naghulagway sa espirituhanon nga kusog nga dala niining batan-ong mga lalaki ngadto sa kasundalohan. Samtang sila nagbasa, kopyaha diha sa pisara ang mosunod nga diagram. Dapita ang pipila ka estudyante sa pag-adto sa pisara ug isulat ang mga pulong nga ilang nakit-an ubos sa ulohan nga “Sa wala pa ang gubat”

Imahe

warrior diagram

Unsa kaha ang gipasabut ni Helaman sa dihang siya mihulagway sa 2,000 ka batan-ong mga manggugubat isip mga “tawo sa kamatuoran ug kaligdong”? (Mahimo nimong ipasabut nga ang pulong kaligdong nagpasabut sa kaseryuso, kakalma, ug pagpugong sa kaugalingon.)
Sa unsang paagi nga ang nalista nga mga pamatasan diha sa pisara makatabang kanato sa pag-atubang sa espirituhanon nga mga giyera ug sa uban pang mga hagit?

I-summarize sa daklit ang sinugdanan sa unang giyera sa batan-ong mga manggugubat sa Alma 56:29–43. Si Antipus migamit ni Helaman ug sa iyang 2,000 ka mga manggugubat isip usa ka laang aron sa pagkuha sa kinakusgan nga kasundalohan sa Lamanite nga mogawas sa siyudad sa Antiparah. Kadaghanan sa kasundalohan sa Lamanite mibiya sa Antipara aron sa paggukod sa kasundalohan ni Helaman, nga naghatag og oportunidad sa kasundalohan ni Antipus sa pagsunod ug pag-ataki nila gikan sa luyo nga bahin. Sa dihang naabtan sa kasundalohan ni Antipus ang kasundalohan sa Lamanite, sila miataki sumala sa ilang giplano. Sa dihang ang kasundalohan sa Lamanite mihunong sa ilang paggukod sa kasundalohan ni Helaman, wala masayud si Helaman kon ang kasundalohan sa Lamanite misulay sa paglingla sa mga manggugubat ngadto sa usa ka laang o kon ang kasundalohan ni Antipus nakiggubat na sa mga Lamanite sa ilang luyo. Si Helaman ug ang iyang batan-ong mga sundalo kinahanglan nang modesider kon magpadayon sa pag-ikyas o moataki sa mga Lamanite.

Dapita ang mga estudyante sa pagbasa sa hilum sa Alma 56:44–48. Hangyoa sila sa pagpangita sa mga pulong nga nagpakita sa ebidensya kon sa unsang paagi nga kining batan-ong mga lalaki milihok uban sa hugot nga pagtuo. Dapita ang pipila ka mga estudyante sa pagsulat kon unsa ang ilang nakit-an diha sa pisara ubos sa ulohan nga “Panahon sa gubat.”

Unsang butanga nga kining batan-ong mga lalaki walay pagduha-duha? (Nga ang Dios moluwas kanila.)
Nganong wala silay pagduha-duha nga ang Dios moluwas kanila?
Sa unsang paagi nga ang mga pamatasan nga ilang gipalambo sa wala pa ang gubat nakatabang nila panahon sa gubat?

Isulat ang mosunod nga kamatuoran diha sa pisara: Kon kita molihok uban sa hugot nga pagtuo, makadawat kita og kusog gikan sa Dios. Dapita ang mga estudyante sa pagpangita og ebidensya niining kamatuoran samtang sila magtuon sa Alma 56.

I-summarize ang Alma 56:49–53 pinaagi sa pagpasabut nga nakaplagan sa kasundalohan ni Helaman ang kasundalohan ni Antipus diha sa malisud nga kahimtang. Si Antipus ug daghan sa mga lider sa ubang kasundalohan nangamatay, ug ang nangaluya ug naglibog nga mga Nephite hapit na malupig.

Dapita ang usa ka estudyante sa pagbasa og kusog sa Alma 56:54–56. Hangyoa ang klase sa pagsunod, nga mangita kon sa unsang paagi nga ang Dios mipanalangin sa mga manggugubat ni Helaman tungod sa ilang hugot nga pagtuo.

Sa inyong hunahuna sa unsang paagi nga ang espirituhanon nga mga kinaiya nga nalista sa pisara nakatampo sa mga panghitabo nga narekord diha sa Alma 56:56?
Kanus-a nga higayon nga kamo o ang tawo nga inyong kaila milihok uban sa hugot nga pagtuo ug nakadawat og kusog gikan sa Dios diha sa malisud nga sitwasyon?

Alma 57

Si Helaman ug ang iyang batan-ong mga manggugubat mikuha pag-usab sa siyudad sa Cumeni ug napreserbar diha sa gubat

Ipasabut nga ang Alma 57 mao ang sumpay sa sulat ni Helaman ngadto ni Kapitan Moroni. Kini nagsugod sa usa ka istorya sa mga Nephite nga mibawi og balik sa duha ka mga siyudad gikan sa mga Lamanite. Niining panahona, si Helaman nakadawat og 6,000 ka mga kalalakin-an aron sa pagpalig-on sa iyang kasundalohan, lakip sa dugang 60 ka mga anak nga lalaki sa katawhan ni Ammon. Ang mga Lamanite nakadawat usab og dugang tabang ug mipadayon sa pagpalig-on sa mga siyudad nga ilang gisakop.

Ipasabut nga diha sa usa ka gubat, ang mga Lamanite hapit na makabuntog sa mga Nephite (tan-awa sa Alma 57:18). Dapita ang mga estudyante sa pagbasa sa hilum sa Alma 57:19–22, nga mangita sa rason nga milampus ang mga Nephite.

Nganong ang mga Nephite milampus batok sa mga Lamanite?
Si Helaman miingon nga ang iyang mga manggugubat “mituman ug naninguha sa pagbuhat sa matag pulong sa sugo nga walay pagkasayop niini” (Alma 57:21). Sa inyong hunahuna unsa kaha ang ipasabut niini? Sa unsang paagi nga kining pagkamasulundon usa ka pagpadayag sa ilang hugot nga pagtuo?

Aron madugangan ang tubag sa mga estudyante niining mga pangutana, basaha ang mosunod nga pamahayag ni Elder Russell M. Nelson sa Korum sa Napulog Duha ka mga Apostoles:

Imahe

Elder Russell M. Nelson

“Makasugat [kamo] og mga tawo nga pilion lang ang mga sugo nga ilang tumanon ug mobaliwala sa uban nga ilang gipiling supakon. Gitawag ko kini nga pangkarinderya nga pagkamasulundon. Kini nga binuhatan sa pagpili-pili dili magsilbi. Mopadulong kini ngadto sa kauyamot. Aron andam nga mosugat sa Dios, kita motuman sa tanan Niyang mga sugo. Nagkinahanglan og hugot nga pagtuo ang pagtuman niini, ug ang pagtuman sa Iyang mga sugo makapalig-on niana nga pagtuo” (“Atubanga ang Umaabut uban sa Hugot nga Pagtuo,” Ensign o Liahona, Mayo 2011, 35).

Dapita ang usa ka estudyante sa pagbasa og kusog sa Alma 57:23–27. Hangyoa ang klase sa pagpangita kon giunsa sa pagpreserbar sa Ginoo ang batan-ong mga sundalo ni Helaman ug nganong mipreserbar Siya kanila. Aron matabangan sila nga hisgutan kon unsa ang ilang nakit-an, ipangutana kining follow-up nga mga pangutana:

Sa iyang mga manggugubat, miingon si Helaman, “Ang ilang mga hunahuna lig-on.” Sa inyong hunahuna unsa kaha ang ipasabut niini? Nganong kinahanglan natong lig-unon ang atong mga hunahuna samtang mag-atubang kita sa atong mga hagit.
Sa unsang paagi nga ang mga sundalo ni Helaman nagpakita nga sila “mibutang sa ilang pagsalig diha sa Dios sa kanunay”?

Tingali makatabang ang pagpasabut nga sa uban nga kahimtang, ang matarung mag-antus o mamatay, sama sa giantus sa batan-ong mga manggugubat ug ingon man usab sa pipila sa kasundalohan sa Nephite nga nangamatay. Hinoon, ang Dios kanunayng mopasidungog niadtong mopasidungog Kaniya, ug ang matarung kinsa mamatay mapanalanginan.

Unsa ang pagkasusama nga inyong nakita tali sa pakiggubat sa batan-ong mga manggugubat sa ilang mga kaaway ug sa atong pakiggubat sa atong kaaway?

Dapita ang usa ka estudyante sa pagbasa og kusog sa mosunod nga pamahayag ni Elder M. Russell Ballard sa Korum sa Napulog Duha ka mga Apostoles:

“Karon kita nakig-away sa usa ka gubat nga sa daghang mga paagi mas peligro … kay sa gubat tali sa mga Nephite ug sa mga Lamanite. Ang atong kaaway maliputon ug maigmat. Kita makig-away batok ni Lucifer, ang amahan sa tanang bakak, ang kaaway sa tanan nga maayo ug matarung ug balaan. …

“… Kita nakiggubat sa tinuoray alang sa mga kalag sa mga tawo. Ang kaaway walay gipasaylo ug walay kalooy. Siya mikuha sa mahangturong mga binilanggo sa makalilisang nga gidaghanon. Ug siya walay gipakita nga timailhan sa pagsurender.

“Samtang kita mapasalamaton kaayo sa daghang mga sakop sa Simbahan kinsa nagbuhat og maayong mga butang sa pagpakiggubat alang sa kamatuoran ug katarung, ako matinuoron nga mosulti kaninyo nga kini dili pa gayud igo. Kita nagkinahanglan og mas dugang pa nga tabang. … Kami nagkinahanglan kaninyo. Sama sa kang Helaman nga mga 2,000 ka batan-ong mga manggugubat, … kamo usab matugahan sa gahum sa paglig-on ug pagpanalipod sa Iyang gingharian. Kami nagkinahanglan kaninyo sa paghimo og sagrado nga mga pakigsaad, sama sa ilang gihimo. Kami nagkinahanglan kaninyo nga mahimong hingpit nga masulundon ug matinud-anon, sama kanila” (“Ang Labing Maayong Henerasyon sa mga Misyonaryo,” Ensign o Liahona, Nob. 2002, 46–47).

Isulat ang mosunod sa pisara: Kon kita mosalig sa Ginoo ug mosunod Kaniya nga walay pagkasayop, …

Base sa unsay inyong nabasa mahitungod sa mga manggugubat ni Helaman, unsaon ninyo sa pagkompleto kining mga pulong? (Kompletuha ang mga pulong sa pisara sumala sa mga isugyot sa mga estudyante. Sama pananglit, mahimo nimong isulat ang mosunod nga kamatuoran: Kon kita mosalig sa Ginoo ug mosunod Kaniya nga walay pagkasayop, Siya motabang kanato sa atong mga gubat.)

Hangyoa ang mga estudyante sa pagpamalandong og usa ka panahon diin sila o ang tawo nga ilang nailhan misunod nga walay pagkasayop diha sa malisud nga kahimtang sa eskwelahan, sa panimalay, o sa sosyal nga sitwasyon. Dapita ang pipila ka estudyante sa pagpakigbahin sa ilang mga kasinatian. Pangutan-a sila kon sa unsang paagi ang Ginoo mitabang kanila sa sitwasyon.

Hatagi ang mga estudyante og panahon sa pagsulat diha sa mga notebook o mga scripture study journal mahitungod kon unsa ang ilang buhaton aron mosunod sa mga sugo sa Dios “nga walay pagkasayop” (Alma 57:21) ug “mibutang sa ilang pagsalig diha sa Dios sa kanunay” (Alma 57:27).

Alma 58

Ang mga sundalo nga Nephite misalig nga ang Dios mopreserbar kanila sa ilang mga kalisdanan

Ipasabut nga ang Alma 58 naglangkob sa katapusan nga sulat ni Helaman ngadto ni Moroni. Misaysay si Helaman kon giunsa sa mga sundalo nga Nephite pagbatok ang malisud nga kahimtang nga mikomplikar sa sukwahi nga mga kondisyon nga ila nang gisagubang. Dapita ang pipila ka estudyante nga magpuli-puli sa pagbasa og kusog sa Alma 58:2, 6–9, ug hangyoa ang klase sa pag-ila niadtong lisud nga mga kahimtang (kulang sa pagkaon, kulang sa tabang, kahadlok nga sila malupig sa ilang mga kaaway).

Hangyoa ang mga estudyante sa pagbasan sa hilum sa Alma 58:10–12, nga mangita sa mga tubag sa mosunod nga mga pangutana. (Isulat ang mga pangutana diha sa pisara sa dili pa sugdan ang klase. Basaha ang mga pangutana ngadto sa klase sa dili pa nila basahon ang tudling sa kasulatan, ug dayon ribyuha sila human nila og basa. Makatabang kini sa mga estudyante nga matutokan kon unsay reaksyon sa kasundalohan ni Helaman niining malisud nga sitwasyon.)

Unsa ang gibuhat sa mga Nephite sa dihang nag-atubang sila niining lisud nga sitwasyon?

Sa unsang paagi nga ang Ginoo mitubag ngadto sa ilang sinsero nga pangamuyo ug mga pag-ampo?

Sa unsang paagi nga ang kasiguraduhan sa Ginoo nakatabang ni Helaman ug sa iyang kasundalohan?

Dapita ang mga estudyante sa pag-summarize sa kamatuoran nga ilang nakat-unan gikan sa Alma 58:10–12. (Mahimong mogamit ang mga estudyante og laing mga pulong, apan siguroha nga sila makaila sa mosunod nga baruganan: Kon kita mobalik ngadto sa Dios sa panahon sa kalisud, makadawat kita og balaanong kasiguraduhan nga makapalig-on sa atong pagtuo ug makahatag kanato og paglaum.)

Kanus-a ang higayon nga ang Ginoo mipanalangin kaninyo og kalinaw ug kasiguraduhan atol sa lisud nga kasinatian?

Ipasabut nga ang nahabilin sa Alma 58 nag-istorya sa malampuson nga mga paningkamot sa kasundalohan sa Nephite aron sa pagbawi sa mga siyudad nga nasakop sa mga Lamanite (tan-awa sa Alma 58:31). Dapita ang usa ka estudyante sa pagbasa og kusog sa Alma 58:39–40.

Sa unsang paagi nga ang batan-ong mga manggugubat ni Helaman nagpakita sa ilang hugot nga pagtuo diha sa Dios, bisan sa “daghang samad” nga ilang nadawat?
Samtang kamo nag-atubang og mga hagit sa kinabuhi, sa unsang paagi kamo nakabenepisyo gikan sa pagsunod sa ehemplo sa mga anak nga lalaki ni Helaman?

Tapusa pinaagi sa pagpakigbahin sa imong pagpamatuod sa mga baruganan nga gitudlo niini nga leksyon.