Librarya
Leksyon 30: 2 Nephi 9:27–54 ug 2 Nephi 10

Leksyon 30

2 Nephi 9:27–54 ug 2 Nephi 10

Pasiuna

Human makapamatuod nga si Jesukristo makapalingkawas sa tanang katawhan gikan sa mga epekto sa Pagkapukan ug mitanyag kanato og kapasayloan sa atong mga sala, gitapos ni Jacob ang iyang wali. Mipasidaan siya batok sa mga kinaiya ug mga lihok nga moresulta nga mahibulag gikan sa Ginoo, ug mipamatuod siya bahin sa mga kinaiya ug mga lihok nga motugot sa katawhan nga mahiduol kang Kristo ug maluwas. Pagkasunod adlaw, gibalik na usab ni Jacob nga bisan kon ang balay ni Israel magkatibulaag tungod sa sala, ang Ginoo mohinumdom sa Iyang mga pakigsaad ngadto kanila ug mopundok kanila kon maghinulsol sila ug mobalik ngadto Kaniya. Nanagna si Jacob bahin sa Paglansang kang Jesukristo sa Krus. Nanagna usab siya nga ang gisaad nga yuta sa iyang katawhan mahimong usa ka dapit sa kalingkawasan, lig-unon batok sa tanang kanasuran ug gawasnon sa pagmando sa mga hari. Giawhag ni Jacob ang iyang katawhan sa pakig-uli sa ilang kaugalingon ngadto sa kabubut-on sa Dios ug hinumduman nga mahimo lamang silang maluwas pinaagi sa grasya sa Dios.

Mga Sugyot alang sa Pagtudlo

2 Nephi 9:27–54

Gidapit ni Jacob ang tanan nga moduol kang Kristo ug mipasidaan bahin sa mga kinaiya ug mga lihok nga makapabulag kanato gikan sa Ginoo

Diha sa pisara, isulat ang mga pulong nga nganong nagkinahanglan ko og tabang ug unsay kinahanglan gayud nakong buhaton. Pahunahunaa ang klase sa usa ka tawo nga dunay grabe kaayo nga sakit.

  • Nganong importante nga masabtan niining tawhana ang panginahanglan nga mangayo og tabang?

  • Nganong importante nga masabtan usab niining tawhana kon unsay buhaton aron makadawat og tabang?

  • Unsay resulta kon ang tawo nakasabut sa panginahanglan alang sa tabang apan wala makasabut kon unsay buhaton aron makadawat niini?

Pahinumdumi ang mga estudyante nga sa miaging leksyon, gitun-an nila ang mga epekto sa Pagkapukan ug ang mga sangputanan sa atong mga sala, nga nakakat-on kon nganong nagkinahanglan kita sa Manluluwas. Ipamatuod nga gusto Niya nga motabang kanato ug mopalingkawas kanato gikan sa atong mga sala. Hangyoa ang mga estudyante sa paghunahuna kon nahibalo ba sila kon unsay kinahanglan gayud nilang buhaton aron makadawat sa tanang mga panalangin sa Pag-ula.

Ipasabut nga gusto ni Jacob nga tabangan ang iyang katawhan nga mopili “sa agianan sa kinabuhi nga dayon” (2 Nephi 10:23). Gitabangan niya nga ilang masabtan nga makadawat lamang sila og kinabuhing dayon kon sila “[mo]duol sa Ginoo” (2 Nephi 9:41). Dapita ang usa ka estudyante sa pagbasa og kusog sa 2 Nephi 9:41. Hangyoa ang klase sa pagpangita sa gihulagway ni Jacob nga “ang dalan” nga kinahanglan natong sundon.

  • Unsay buot ipasabut sa moduol sa Ginoo? (Mahimo nimong awhagon ang mga estudyante sa paghunahuna nga ang ilang kinabuhi usa ka agianan. Ipamalandong nila sa hilum kon asa paingon ang ilang agianan. Ang ila bang mga pagpili mas nakapaduol kanila sa Manluluwas?)

  • Unsa nga mga pulong ang gigamit ni Jacob sa paghulagway sa “ang dalan”? Unsa ang gitudlo sa mga pulong nga mapig-ot ug matul-id bahin sa paagi nga kinahanglan kitang magpakabuhi?

Ipasabut nga kalabut sa mapig-ot ug matul-id nga dalan, gigamit ni Jacob ang imahe sa usa ka ganghaan. Gipasabut niya nga ang Manluluwas mao ang magbalantay sa ganghaan. Ipakigbahin ang imong pagpamatuod nga mahimo kitang mapasaylo sa atong mga sala ug makadawat og kinabuhing dayon pinaagi lamang ni Jesukristo ug sa Iyang Pag-ula. Tanan nga atong gibuhat nga paingon sa kinabuhing dayon—lakip sa mga ordinansa nga atong nadawat, sa mga pag-ampo nga atong gihalad, sa mga pagpamatuod nga atong gipakigbahin, ug sa paagi sa atong pagpakabuhi—kinahanglan gayud nga himuon diha sa pangalan ni Jesukristo.

  • Nganong mahinungdanon alang kaninyo nga ang Manluluwas “wala mogamit og sulugoon didto”? (Mahimo nimong ipasabut nga ang Ginoo nagtawag og mga sulugoon, sama sa mga bishop ug mga stake president, sa paglihok alang kaniya isip mga maghuhukom sa katawhan. Hinoon, Siya ang mahimo natong katapusan nga Maghuhukom ug mohatag sa katapusang pagtugot sumala sa paagi sa atong pagpakabuhi.)

  • Sa unsang paagi nga ang kahibalo nga ang Ginoo “dili malimbongan” makaimpluwensya sa atong mga paningkamot nga moduol Kaniya?

Ipasabut nga sa tibuok nahabilin sa 2 Nephi 9, ang mga pagtulun-an ni Jacob makatabang kanato aron masabtan kon sa unsang paagi nga ang atong mga kinaiya ug mga lihok makaapekto sa atong abilidad nga moduol sa Manluluwas. Ang ubang mga kinaiya ug mga lihok makatabang kanato nga moduol kang Kristo, samtang ang uban makapugong kanato nga moduol Kaniya.

Aron matabangan ang mga estudyante nga madiskubrihan ang pipila niining mga kinaiya ug mga lihok, pagdrowing og vertical nga linya diha sa tunga sa pisara. Diha sa usa ka bahin sa pisara, isulat ang Pagpalayo sa Atong Kaugalingon gikan kang Kristo. Sa ubos niana, isulat ang:

1. 2 Nephi 9:27–33

2. 2 Nephi 9:34–39

Diha sa pikas nga bahin sa linya, isulat ang Pagduol kang Kristo. Sa ubos niana, isulat ang:

3. 2 Nephi 9:23, 39, 42, 45–46

4. 2 Nephi 9:49–52

Pag-assign og usa ka numero tali sa 1 ug 4 ngadto sa matag estudyante. Dapita ang mga estudyante sa pagbasa og hilum sa mga bersikulo nga may kalabutan sa ilang naka-assign nga numero. Hangyoa ang mga estudyante nga na-assign sa mga grupo 1 ug 2 sa pagtino sa mga kinaiya ug mga lihok nga makapalayo kanato gikan sa Manluluwas. Hangyoa ang mga estudyante nga na-assign sa mga grupo 3 ug 4 sa pagtino sa mga kinaiya ug mga lihok nga makatabang kanato nga mahiduol sa Manluluwas ug makadawat sa mga panalangin sa Iyang Pag-ula. Mahimo nimong awhagon ang mga estudyante sa pagmarka sa ilang mga nakit-an diha sa ilang mga kasulatan.

Human sa pipila ka minuto, pagdapit og mga moboluntaryo gikan sa mga grupo 1 ug 2 nga moadto sa pisara ug molista sa mga kinaiya ug mga lihok nga ilang natino nga makapalayo kanato gikan sa Manluluwas. Hisguti ang pipila sa mga pasidaan ni Jacob pinaagi sa pagpangutana sa pipila o sa tanan sa mosunod nga mga pangutana:

  • Gihisgutan ni Jacob ang pagkat-on ug ang kwarta, nga mahimong pareho nga maayo. Sa unsa nga paagi nga ang atong mga pagpili bahin sa pagkat-on ug sa kwarta makapugong kanato sa pagduol sa Ginoo? (Ipasabut nga ang 2 Nephi 9:28–29 usa ka scripture mastery passage. Mahimo nimong awhagon ang mga estudyante nga markahan kini nga tudling.)

  • Sa inyong hunahuna unsa man ang gipasabut sa mahimong bungol o buta sa espirituhanong paagi? (Tan-awa sa 2 Nephi 9:31–32.)

  • Ang mga pulong nga “nagpatig-a sa kasingkasing” (2 Nephi 9:33) nagpasabut niadtong kansang mga kasingkasing dili bukas ngadto sa Dios ug kinsa dili andam nga motuman sa mga pakigsaad uban Kaniya. Sa unsang paagi nga kini nga kahimtang makapugong kanato nga madawat ang kahingpitan sa mga panalangin sa Pag-ula?

  • Unsa ang pipila sa mga matang sa pagsimba sa dios-dios karon? (Tan-awa sa 2 Nephi 9:37.)

Dapita ang mga estudyante gikan sa grupo 3 ug 4 nga moadto sa pisara ug molista sa mga kinaiya ug mga lihok nga ilang nadiskubrihan nga makapaduol kanato ngadto sa Manluluwas ug makatabang kanato nga madawat ang mga panalangin sa Pag-ula. Aron matabangan ang mga estudyante nga maanalisar kon unsay ilang nadiskubrihan, ipangutana ang pipila o ang tanan sa mosunod nga mga pangutana:

  • Diha sa 2 Nephi 9:23, gipahinumduman kita ni Jacob bahin sa sugo sa Ginoo nga maghinulsol ug magpabunyag. Sa unsang paagi nga ang pagbag-o sa mga pakigsaad sa bunyag pinaagi sa sakrament makatabang kanato nga mahiduol sa Ginoo ug makadawat sa mga panalangin sa Iyang Pag-ula?

  • Sa inyong hunahuna unsa man ang gipasabut sa “pagka-espirituhanon sa hunahuna”? (2 Nephi 9:39). Unsa ang pipila ka mga kalihokan nga makatabang kanato sa pagka-espirituhanon sa hunahuna?

  • Unsay gipasabut sa “biya gikan sa inyong mga sala”? (2 Nephi 9:45).

  • Sa inyong hunahuna unsa man ang buot ipasabut ni Jacob sa dihang miingon siya nga moinom, mokaon, ug “mahinangop sa kabuhong”? (Tan-awa sa 2 Nephi 9:50–51. Mahimo nimong ipasabut nga kining mga bersikulo nagpasabut sa espirituhanong pagpabaskog.)

Ipamatuod nga sa atong pagduol sa Ginoo ug sa pagpakabuhi sumala sa Iyang kabubut-on, atong madawat ang kahingpitan sa mga panalangin sa Pag-ula. Isulat kini nga baruganan diha sa pisara ibabaw sa lista nga gihimo sa mga estudyante.

Awhaga ang mga estudyante sa pagpamalandong sa ebidensya nga ilang nakita bahin niini nga baruganan diha sa ilang kinabuhi. Dapita sila sa pagsulat diha sa ilang mga scripture study journal o mga class notebook kon sa unsang paagi sila nahiduol sa Manluluwas pinaagi sa usa o dugang pa sa mga kinaiya ug mga lihok sa ikaduhang lista diha sa pisara. Dapita ang pipila ka mga estudyante sa pagpakigbahin sa unsay ilang gisulat (apan tabangi sila nga makasabut nga dili sila kinahanglang mobati nga obligado nga mopakigbahin og mga kasinatian nga personal o pribado kaayo).

2 Nephi 10

Giawhag ni Jacob ang iyang katawhan nga magmaya ug moduol sa Ginoo

Pangutan-a ang mga estudyante kon nakadawat na ba sila sukad og usa ka gasa nga labihan ka makahuluganon tungod kay ang usa ka tawo grabe og paningkamot o mihimo og sakripisyo aron mahatag ang gasa. Ikonsiderar ang pagdapit sa usa o duha ka mga estudyante nga ipakigbahin ang ilang mga kasinatian.

  • Unsaon nato sa pagpahayag og pasalamat alang sa ingon nga mga gasa?

  • Unsaon nato sa pagpahayag og pasalamat alang sa gasa sa Pag-ula sa Manluluwas?

Ipasabut nga pagkasunod adlaw human mapadangat ni Jacob ang iyang wali bahin sa Pag-ula ni Jesukristo, mipamatuod na usab siya mahitungod sa pagpalingkawas sa Ginoo gikan sa mga sangputanan sa sala. Gitudloan niya ang iyang katawhan kon unsa gayud ang angay nilang itubag sa gasa sa Pag-ula.

I-summarize ang 2 Nephi 10:1–19 pinaagi sa pagpasabut nga gibalik na usab ni Jacob nga bisan kon ang balay ni Israel magkatibulaag tungod sa sala, ang Ginoo mohinumdom sa Iyang mga pakigsaad ngadto kanila ug mopundok kanila kon maghinulsol sila ug mobalik ngadto Kaniya. Mahimo nimong ipasabut nga ang 2 Nephi 10:3 mao ang unang bersikulo diha sa Basahon ni Mormon nga naggamit sa titulo nga Kristo nga nagpasabut sa Manluluwas.

Hangyoa ang usa ka estudyante sa pagbasa og kusog sa 2 Nephi 10:20, 23–25. Dapita ang klase sa pagtino sa unsay giawhag ni Jacob nga atong buhaton agig tubag sa gasa sa Pag-ula. Mahimo nimong isugyot nga markahan sa mga estudyante ang ilang makit-an niini nga mga bersikulo. Dapita sila sa pagpakigbahin sa unsay ilang -nakit-an.

Pag-andam og handout uban sa mosunod nga mga pangutana (o isulat ang mga pangutana diha sa pisara sa dili pa magsugod ang klase). Dapita ang mga estudyante sa pagpili og usa ka pangutana ug ipakigbahin ang ilang mga hunahuna ug mga pagbati bahin niana nga pangutana ngadto sa usa ka kauban.

  • Kalabut sa unsay atong natun-an bahin sa Manluluwas, unsay gusto ninyo nga kanunayng mahinumduman bahin Kaniya?

  • Nganong ang paghinulsol usa man ka importante nga paagi sa pagpakita sa atong pasalamat alang sa unsay nahimo sa Ginoo alang kanato?

  • Unsay inyong nakat-unan bahin sa Manluluwas nga nakatabang kaninyo nga mobati og paglaum?

Tapusa pinaagi sa pagpasabut nga ang pulong nga pakig-uli diha sa 2 Nephi 10:24 nagpasabut nga ipahiangay o ipahiuyon ang mga tawo o mga butang ngadto sa usag usa. Pananglitan, ang duha ka managhigala kinahanglang makig-uli sa usag usa human sa panagsumpaki.

  • Sa inyong hunahuna unsay buot ipasabut sa pakig-uli sa atong kaugalingon ngadto sa kabubut-on sa Dios?

Dapita ang mga estudyante sa pagpamalandong kon unsay ilang nakat-unan ug gibati samtang nagtuon ug naghisgot sila sa 2 Nephi 9–10. Dapita sila sa pagtinguha og giya gikan sa Balaang Espiritu aron matabangan sila nga matino ang butang nga ilang buhaton aron sa pakig-uli sa ilang kaugalingon ngadto sa kabubut-on sa Dios ug mas hingpit nga makaambit sa mga panalangin sa Pag-ula. Pananglitan, usa ka estudyante mahimong mopasalig nga mopatalinghug og piho nga tambag gikan sa Dios (tan-awa sa 2 Nephi 9:29), mopahilayo gikan sa piho nga sala (tan-awa sa 2 Nephi 9:45), o motino og paagi nga mas kanunayng mahinumdom sa Manluluwas sa matag adlaw (tan-awa sa 2 Nephi 10:20). Awhaga ang mga estudyante sa pagbuhat sa bisan unsa nga gikinahanglan sa “pakig-uli sa [ilang] kaugalingon ngadto sa kabubut-on sa Dios” (2 Nephi 10:24). Ipamatuod ang bahin sa mga panalangin sa paghimo sa ingon.

scripture mastery iconScripture Mastery—2 Nephi 9:28–29

Pahinumdom: Ang mosunod nga kalihokan gituyo aron matabangan ang mga estudyante sa ilang pag-master sa 2 Nephi 9:28–29. Tungod sa gitas-on sa leksyon karon, mahimo nimong gamiton ang kalihokan sa laing adlaw, kon kamo dunay sobra nga oras.

Giyahi ang klase sa dungan nga pagbasa og kusog sa 2 Nephi 9:28–29.

  • Unsa ang pipila ka mga lit-ag nga makalaang kanato samtang nagtinguha kita nga makakat-on? Unsaon nato sa pagtinguha nga makakat-on apan makalikay niining mga laang?

  • Unsay makatabang kanato aron “mopatalinghug ngadto sa mga tambag sa Dios” samtang nagtinguha kita nga makakat-on?

Awhaga ang mga estudyante sa pagpadayon sa pag-apil sa seminary karon ug sa pagplano sa pagtambong sa institute human sila makagradwar gikan sa seminary.