Pasiuna sa Sukaranan nga mga Doktrina

Ang mosunod nga Sukaranan nga mga Doktrina kinahanglang mapasabut og maayo sa seminary:

• Dios nga Kapangulohan

• Plano sa kaluwasan

• Pag-ula ni Jesukristo

• Dispensasyon, Apostasiya, ug Pagpahiuli

• Mga propeta ug pagpadayag

• Priesthood ug mga yawe sa priesthood

• Mga Ordinansa ug mga pakigsaad

• Kaminyoon ug pamilya

• Mga sugo

Ang mga magtutudlo motabang sa mga estudyante sa pag-ila, pagsabut, pagtuo, pagpasabut, ug sa paggamit niining sukaranang mga doktrina sa ebanghelyo samtang magtuon sila sa mga kasulatan. Ang pagbuhat sa ingon makatabang sa mga estudyante sa paglig-on sa ilang pagpamatuod ug pagdugang sa ilang pagpasalamat sa gipahiuli nga ebanghelyo ni Jesukristo. Ang pagkat-on sa Sukaranang mga Doktrina makatabang usab sa mga estudyante aron mahimong mas andam sa pagsunod sa ebanghelyo ug sa pagtudlo niining importante nga mga kamatuoran ngadto sa uban. Ang mga leksyon niini nga manwal gihimo uban sa hunahuna nga iapil ang Sukaranang mga Doktrina. Importante nga masabtan nga ang ubang importante nga mga doktrina sa ebanghelyo hatagan usab og gibug-aton niini nga manwal, bisan kon wala kini malista diha sa Sukaranang mga Doktrina.

Ang pagtudlo sa sukaranang mga doktrina sa ebanghelyo mahitabo samtang magtuon ka sa mga kasulatan matag adlaw uban sa mga estudyante ug samtang imo silang tabangan nga makasag-ulo sa importanting mga tudling sa kasulatan. Kinahanglang dili ka motipas sa pasunod nga pagtuon sa kasulatan sa pag-focus niini nga mga doktrina. Apan hinoon, kinahanglan nga hatagan nimo kini og pagtagad kon natural kini nga motumaw sa padayon nga pagtuon ug samtang tabangan nimo ang mga estudyante sa pagmemorya sa importanting mga tudling sa kasulatan. Sama pananglit, samtang magtudlo ka sa kamatuoran nga “ang mga propeta mipasidaan batok sa sala ug nagtudlo og kaluwasan pinaagi kang Jesukristo” sa 1 Nephi 1, mahimo nimong ipasabut ngadto sa mga estudyante nga kini nga kamatuoran makatabang nila aron masabtan ang Sukaranan nga mga Doktrina mahitungod sa “mga propeta ug pagpadayag.” Mahimo nimong hangyoon ang mga estudyante sa pagpasabut kon unsa pay ilang nahibaloan mahitungod sa mga propeta ug pagpadayag. Usab, samtang magkat-on ang mga estudyante sa scripture mastery passage nga 2 Nephi 25:23, 26, imo silang matabangan sa pagkakita nga ang tudling naghulagway og usa ka paagi giunsa pagtuman sa mga propeta ang ilang katungdanan nga matudlo ang kaluwasan pinaagi kang Jesukristo. Ang paglambo sa panabut, pagtuo, ug pagsunod sa Sukaranang mga Doktrina usa ka proseso nga mahitabo sulod sa upat ka tuig sa seminary ug magpadayon sa tibuok kinabuhi sa usa ka estudyante.

Mahimo nimong hatagan ang mga estudyante sa lista sa Sukaranang mga Doktrina.

Assessment sa Sukaranang mga Doktrina

Usa ka Assessment sa Sukaranang mga Doktrina gidesinyo sa paghatag sa mga magtutudlo og impormasyon nga ilang magamit aron mas mapanalanginan ang kinabuhi sa ilang mga estudyante. Among girekomendar nga ang mga magtutudlo mopahigayon niini nga assessment atol sa unang semana sa klase ug pagbuhat niini og usab sa dayon na nga pagtapos sa tuig. Sa pagpangita sa Assessment sa Sukaranang mga Doktrina ug uban pang mga assessment diha sa S&I website (si.lds.org), i-search gamit ang keyword nga assessment.

Ang mga magtutudlo nga mopadala sa mga resulta sa assessment sa ilang mga estudyante ngadto sa S&I Office of Research makadawat og report nga makatabang nila sa pagpahiangay sa ilang pagtudlo aron mas matubag ang mga panginahanglan sa ilang mga estudyante. Sama pananglit, kon ang mga resulta nagpakita nga ang mga estudyante wala makasabut sa doktrina sa paghinulsol, ang pipila ka mga leksyon diha sa tinuig nga kurikulum maoy ipaila aron matabangan ang mga estudyante nga mas makasabut niini nga doktrina. Samtang ang mga magtutudlo mainampuong mogamit niini nga impormasyon diha sa ilang pagsunod nga pamaagi sa pagtudlo sa kasulatan, ang atong mga kabatan-onan ug mga young adult mas maandam aron matuman ang Tumong sa Seminaries and Institutes of Religion.