Leksyon 1

Ang Tahas sa Tigkat-on

Pasiuna

Ang katuyoan niini nga leksyon mao ang pagtabang sa mga estudyante nga makatuman sa ilang tahas sa pagkat-on sa ebanghelyo. Usahay ang mga estudyante naghunahuna nga ang responsibilidad sa ilang pagkat-on anaa lamang sa magtutudlo. Si Presidente Henry B. Eyring sa Unang Kapangulohan namulong mahitungod sa panginahanglan sa tigkat-on ug sa magtutudlo sa pagpaninguha sa paggiya sa Espiritu Santo:

“Ang mga kasamok ug mga tintasyon nga gisagubang sa atong mga estudyante lima lamang ka tuig ang milabay gamay ra kaayo kon ikumpara uban sa unsay atong makita karon, ug gani mas lisud pa nga mga panahon ang anaa sa unahan. Akong gibati … nga kon unsay atong nabuhat ug gibuhat dili pa igo. Nagkinahanglan kita og mas dakong gahum aron matabangan ang mga estudyante sa pagpatuhop sa ebanghelyo aron sila makasabut uban sa ilang kasingkasing ug hunahuna ug mosunod sa mga baruganan niini. …

“Kinahanglan gayud ninyo ang Espiritu isip inyong kanunayng kauban aron magtudlo uban ang gahum, ug ang inyong mga estudyante dili molahutay sa espirituhanon nga paagi kon wala ang Espiritu isip ilang kauban” (“The Spirit Must Be Our Constant Companion” [pamulong ngadto sa mga CES religious educator, Peb. 7, 2003], 1, si.lds.org).

Samtang magtudlo ka pinaagi sa gahum sa Espiritu Santo ug motabang sa mga estudyante nga makat-on pinaagi sa samang gahum, makatabang ka kanila nga mahimong tinud-anay nga nakabig ngadto sa gipahiuli nga ebanghelyo ni Jesukristo. Mahimo nimong kanunayng ribyuhon ang mga baruganan niini nga leksyon sa pagpahinumdom sa mga estudyante sa ilang responsibilidad diha sa klase.

Mga Sugyot alang sa Pagtudlo

Indibidwal nga responsibilidad sa pagkat-on pinaagi sa pagtuon ug pinaagi sa hugot nga pagtuo

Pagdapit og usa ka estudyante ngadto sa atubangan sa classroom. Ipasabut nga gusto kang motabang niana nga estudyante nga mahimong kusgan sa pisikal nga paagi. Dayon hangyoa ang usa ka estudyante nga moduol sa atubangan ug mobuhat og lima ka push-up.

Human naka push-up ang ikaduha nga estudyante, pangutan-a ang unang estudyante:

• Nakapakusgan ba kanimo kadtong mga push-up?

Pangutan-a ang klase:

• Sa unsang paagi kini nga ehemplo sa pisikal nga ehersisyo may kalabutan sa inyong responsibilidad sa pagkat-on sa ebanghelyo? Kinsa ang responsable sa inyong pagkat-on sa ebanghelyo?

Dapita ang usa ka estudyante sa pagbasa og kusog sa Doktrina ug mga Pakigsaad 88:118.

• Unsa kahay gipasabut sa “pagpangita sa pagtulun-an … pinaagi sa pagtuon ug pinaagi sa hugot nga pagtuo”? (Mahimo nimong ipasabut nga ang pagkat-on pinaagi sa pagtuon ug pinaagi sa hugot nga pagtuo nagkinahanglan og indibidwal nga paningkamot.)

Mga scripture study journal ug mga class notebook

Ang usa ka scripture study journal o class notebook mahimong usa ka bound journal, notebook, o mga pahina sa usa ka binder. Diha sa mga scripture study journal, mahimong isulat ug i-rekord sa mga estudyante ang mga impresyon atol sa mga leksyon, atol sa ilang personal nga pagtuon, ug diha sa uban pang mga miting sa Simbahan. Samtang nag-rekord ug nag-organisar sila sa ilang mga hunahuna ug mga impresyon, maandam sila nga moapil diha sa klase, mopalambo sa ilang pagsabut sa ebanghelyo, ug modawat og personal nga pagpadayag.

Elder David A. Bednar

Si Elder David A. Bednar sa Korum sa Napulog Duha ka mga Apostoles namulong mahitungod sa unsay gipasabut sa pagkat-on pinaagi sa hugot nga pagtuo. Awhaga ang mga estudyante nga isulat kini nga pamahayag sa usa ka dapit (tingali sa ilang mga scripture study journal o mga class notebook) aron kanunay silang makadangup niini sa tibuok tuig sa seminary:

“Ang pagkat-on pinaagi sa hugot nga pagtuo nagkinahanglan sa espirituhanon, mental, ug pisikal nga pagpaningkamot ug dili lamang lumalabay nga pagbati. … Ang usa ka estudyante kinahanglang magpakita og hugot nga pagtuo ug molihok aron makabaton og kahibalo alang sa iyang kaugalingon” (“Seek Learning by Faith” [pamulong ngadto sa mga CES religious educator, Peb. 3, 2006], 3, si.lds.org).

Inadlaw nga personal nga pagtuon sa kasulatan

Ipasabut nga ang inadlaw nga personal nga pagtuon sa kasulatan usa ka importante nga bahin sa pagpangita og pagtulun-an pinaagi sa pagtuon ug sa hugot nga pagtuo.

Dapita ang usa ka estudyante sa pagbasa og kusog sa Helaman 3:29–30.

• Unsa kahay kalainan tali sa dili seryuso nga pagbasa sa mga kasulatan ug sa “[pag]sagop diha sa pulong sa Dios”?

• Sumala sa mga bersikulo nga atong nabasa, unsa nga mga panalangin ang moabut gikan sa pagsagop diha sa pulong sa Dios?

• Unsa pay laing mga panalangin nga moabut pinaagi sa pagtuon sa mga kasulatan matag adlaw?

• Kanus-a kamo nakadawat og mga panalangin pinaagi sa inadlaw nga personal nga pagtuon sa kasulatan?

Samtang motubag ang mga estudyante niini nga mga pangutana, siguroa nga makasabut sila nga ang inadlaw nga pagtuon sa kasulatan nagpalig-on sa atong mga pagpamatuod, nagdapit sa Balaang Espiritu nganhi sa atong mga kinabuhi, ug nagtabang kanato nga makat-on sa ebanghelyo.

Dapita ang mga estudyante sa pagtubag sa usa sa mosunod nga mga pangutana diha sa ilang mga scripture study journal:

• Sa unsa kahang paagi nga mapalambo ninyo ang inyong pagtuon sa Basahon ni Mormon karong tuiga?

• Sa unsang mga pamaagi ang pagbasa sa Basahon ni Mormon naka-impluwensya sa inyong mga pagbati mahitungod kang Jesukristo?

Dapita ang mga estudyante sa paghimo og tumong nga tun-an ang Basahon ni Mormon matag adlaw karong tuiga. Dapita usab sila sa paghimo og tumong nga basahon ang tibuok nga Basahon ni Mormon sa sulod sa tuig sa seminary. Mahimo nimong isugyot nga isulat nila kini nga mga tumong diha sa ilang mga scripture study journal. Pahinumdumi sila nga ang mga tumong makatabang nila sa mga gikinahanglan alang sa Katungdanan ngadto sa Dios ug sa Personal nga Kauswagan.

Inadlaw nga pagtuon sa kasulatan

Si Elder Dallin H. Oaks sa Korum sa Napulog Duha ka mga Apostoles mitudlo:

“Ang pagbasa sa kasulatan nagbutang kanato nga mahiangay sa Espiritu sa Ginoo. … Tungod kay nagtuo kita nga ang pagbasa sa kasulatan makatabang kanato nga makadawat og pagpadayag, giawhag kita sa pagbasa og balik-balik sa mga kasulatan. Niining paagiha, atong maangkon ang kasayuran sa unsay gusto sa atong Langitnong Amahan nga atong mahibaloan ug buhaton diha sa atong personal nga kinabuhi karon. Usa kini ka rason nga ang mga Santos sa Ulahing mga Adlaw nagtuo sa inadlaw nga pagtuon sa kasulatan” (“Scripture Reading and Revelation,” Ensign, Ene. 1995, 8).

Pagkat-on pinaagi sa Espiritu

Kopyaha ang mosunod nga diagram diha sa pisara. Ayaw apila ang mga pulong diha sa diagram. Isulat nimo kini samtang nagpadayon ang leksyon.

Triangle Diagram

Dapita ang usa ka estudyante sa pagbasa og kusog sa Doktrina ug mga Pakigsaad 50:17–18.

• Sumala niini nga mga bersikulo, unsa ang gikinahanglan sa Ginoo sa usa ka magtutudlo sa ebanghelyo? (Ang pagtudlo sa kamatuoran pinaagi sa gahum sa Espiritu.)

Isulat ang Espiritu Santo ug Magtutudlo diha sa diagram, sama sa gipakita sa ibabaw. Ipakigbahin ang imong mga hunahuna mahitungod sa pagtinguha sa giya sa Espiritu Santo samtang nagtudlo ka. Tabangi ang mga estudyante nga masayud nga sa imong pagpangandam ug pagtudlo, mohimo ka og sinsero nga paningkamot nga magiyahan sa Espiritu.

Hangyoa ang mga estudyante nga magbutang og usa ka bookmark diha sa Doktrina ug mga Pakigsaad 50 (tungod kay mobalik sila niini nga tudling taud-taud). Hangyoa ang usa ka estudyante sa pagbasa og kusog sa 2 Nephi 33:1.

• Unsay buhaton sa Espiritu Santo alang sa usa ka tigkat-on kon gitudlo ang ebanghelyo?

Ipasabut nga aron makat-on sa ebanghelyo sa pamaagi sa Ginoo, kinahanglan gayud natong dawaton ang responsibilidad sa pagkat-on pinaagi sa gahum sa Espiritu Santo. Dapita ang mga estudyante sa pagbasa sa Doktrina ug mga Pakigsaad 50:19–21 sa hilum nga paagi.

• Unsay angay natong isulat sa may tuo nga bahin sa ubos sa triangulo? (Isulat ang Estudyante.)

• Unsa kahay ipasabut sa pagdawat sa kamatuoran pinaagi sa Espiritu?

Mahimo kang motudlo og pipila ka mga baruganan mahitungod sa pag-ila sa impluwensya sa Balaang Espiritu. Tabangi ang mga estudyante nga makasabut nga sa kasagaran ang Espiritu makigsulti kanato sa hilum nga paagi, pinaagi sa atong mga pagbati ug diha sa atong mga hunahuna (tan-awa sa 1 Nephi 17:45; D&P 8:2–3). Ang Espiritu Santo nagdala usab og mga pagbati sa gugma, kalipay, kalinaw, pailub, kaaghop, pagkamapuanguron, pagkamatinumanon, ug paglaum (tan-awa sa Mga Taga-Galacia 5:22–23; D&P 11:12).

• Unsay mahimo ninyong buhaton diha sa seminary aron sa pag-andam sa inyong kaugalingon nga makat-on pinaagi sa Espiritu?

Isip kabahin niini nga panaghisgot, tabangi ang mga estudyante nga makasabut nga usa sa importante nga pamaagi sa pagkat-on pinaagi sa Espiritu mao ang kaandam sa pagpakigbahin sa atong mga pagpamatuod ngadto sa usag usa. Basaha ang mosunod nga pamahayag ni Elder Richard G. Scott sa Korum sa Napulog Duha ka mga Apostoles:

Elder Richard G. Scott

“Samtang ang mga estudyante mamahayag sa mga kamatuoran gamit ang ilang kaugalingong mga pulong, [kini nga mga kamatuoran] mapahimatud-an diha sa ilang mga kalag ug mopalig-on sa ilang personal nga mga pagpamatuod” (“To Understand and Live Truth” [pamulong ngadto sa mga CES religious educator, Peb. 4, 2005], 3, si.lds.org).

Pahinumdumi ang mga estudyante nga ang mga programa nga Katungdanan ngadto sa Dios ug Personal nga Kauswagan naglakip og mga sugyot sa pagpakigbahin sa mga kamatuoran sa ebanghelyo ngadto sa uban. Awhaga sila sa pagpakigbahin sa ilang mga kasinatian diha sa mga klase sa seminary, diha sa mga miting sa korum o sa klase, ug diha sa mga panag-istoryahanay uban sa mga miyembro sa ilang pamilya ug mga higala. Ipasabut gayud nga samtang naninguha sila sa pagpasabut, pagpakigbahin, ug pagpamatuod sa mga kamatuoran sa ebanghelyo, palambuon sa Dios ang ilang abilidad sa pagpakighisgot sa ebanghelyo ngadto sa uban.

Balik ngadto sa diagram diha sa pisara. Hangyoa ang usa ka estudyante sa pagbasa og kusog sa Doktrina ug mga Pakigsaad 50:14, 22.

• Sa unsang paagi kini nga mga bersikulo nag-summarize sa mga tahas sa Espiritu Santo, sa magtutudlo, ug sa estudyante diha sa pagkat-on sa ebanghelyo? (Tingali kinahanglan nimong ipasabut nga ang Espiritu Santo, gitawag usab og Espiritu ug ang Maghuhupay dinhi niini nga tudling, nagtudlo sa kamatuoran. Ang magtutudlo motudlo pinaagi sa gahum sa Espiritu, ug ang estudyante magkat-on pinaagi sa samang gahum.)

• Unsay mahitabo kon ang estudyante magkat-on pinaagi sa Espiritu ug ang magtutudlo magtudlo pinaagi sa Espiritu? (Tingali kinahanglan nimong ipasabut nga ang paghatag og kaayohan nagkahulugan nga modasig, mopalig-on, molamdag, o molambo.)

Diha sa Basahon ni Mormon, si Enos ug si Alma mga ehemplo sa mga tawo kinsa nakat-on pinaagi sa Espiritu. Hangyoa ang mga estudyante sa pagbasa sa Enos 1:4–10 ug Alma 5:45–47 sa hilum nga paagi. (Mahimo nimong isulat kini nga mga pakisayran diha sa pisara.) Dayon ipangutana:

• Unsay gibuhat ni Enos (o ni Alma) aron makat-on pinaagi sa Espiritu?

• Unsay gibuhat sa Espiritu alang kang Enos (o kang Alma)?

Dapita ang usa ka estudyante sa pagbasa sa mosunod nga pamahayag ni Elder Bednar:

“Kinahanglang hinumduman nato kanunay nga ang Espiritu Santo mao ang magtutudlo kinsa, pinaagi sa husto nga imbitasyon, makasulod diha sa kasingkasing sa nagkat-on” (“Seek Learning by Faith,” 4).

• Sa unsang paagi nga ang atong natun-an magamit sa inyong indibidwal nga mga responsibilidad isip mga sakop niini nga klase? (Samtang motubag ang mga estudyante, siguroa nga makasabut sila nga kon ablihan nato ang atong mga kasingkasing ug mangamuyo sa Dios diha sa hugot nga pagtuo, ang Espiritu Santo motabang kanato nga makasabut sa mga kamatuoran sa ebanghelyo.)

Aron matabangan ang mga estudyante sa pagkonsiderar og mga pamaagi nga makatabang sila sa usag usa nga makat-on pinaagi sa Espiritu, ipangutana:

• Unsay atong buhaton aron makatabang sa pagdapit sa Espiritu nganhi sa atong classroom? (Ang mga tubag mahimong maglakip sa pagkanta sa pangbukas nga himno, pagdala sa mga kasulatan ngadto sa klase ug paggamit niini matag adlaw, kaandam sa pagtubag sa mga pangutana ug sa pagpakigbahin og mga kasinatian, pag-ampo alang sa usag usa, ug pagpangamuyo alang sa giya sa Espiritu Santo.)

Aron matabangan ang mga estudyante nga makasabut nga ang negatibo nga mga buhat maka-impluwensya usab sa tibuok klase, ipangutana:

• Unsa nga matang sa mga kinaiya ang makapasilo sa Espiritu diha sa usa ka klase sa seminary?

Dapita ang mga estudyante sa paghunahuna sa bili sa pagbaton sa Balaang Espiritu isip ilang magtutudlo.

• Kanus-a kamo nakasinati sa Espiritu nga naglihok sa Iyang tahas isip usa ka magtutudlo?

Tapusa pinaagi sa pagdapit sa mga estudyante nga magkat-on pinaagi sa pagtuon ug sa hugot nga pagtuo samtang nagtuon sila sa Basahon ni Mormon diha sa seminary karong tuiga. Mahimo kang mangumusta sa mga estudyante sa tibuok tuig aron awhagon sila nga magpadayon niini nga paningkamot.

Komentaryo ug Background nga Impormasyon

Inadlaw nga pagtuon sa kasulatan

“Ang ulahing adlaw nga mga propeta nagtambag kanato sa pagtuon sa mga kasulatan kada adlaw, sa indibidwal nga paagi ug uban sa atong mga pamilya. Sila miawhag kanato, sama sa pag-awhag ni Nephi sa iyang mga kaigsoonan, sa pagpahisama sa mga kasulatan sa atong mga kaugalingon, pagpangita og mga paagi nga ang sagrado nga mga asoy sa karaan magamit sa atong kinabuhi karon (tan-awa sa 1 Nephi 19:23–24). Sila miawhag kanato sa ‘pagsusi sa mga kasulatan’ (Juan 5:39) ug ‘pagbusog sa mga pulong ni Kristo’ (2 Nephi 32:3).

“Ikaw makapahimulos og dako pinaagi sa pagsunod niini nga tambag. Ang makahuluganon nga pagtuon sa kasulatan kada adlaw makatabang kanimo nga mahimong madawat sa mga paghunghong sa Espiritu Santo. [Mopalig-on] kini sa imong pagtuo, mopalig-on nimo batok sa tintasyon, ug motabang kanimo nga mopaduol sa Langitnong Amahan ug sa Iyang Hinigugmang Anak.

“Pagpalambo og plano alang sa imong personal nga pagtuon sa mga kasulatan. Hunahunaa ang paggahin og piho nga gidugayon sa panahon kada adlaw sa pagtuon sa mga kasulatan. Atol nianang higayona, pagbasa og maayo, mabinantayon sa mga pag-aghat sa Espiritu. Hangyoa ang imong Langitnong Amahan sa pagtabang kanimo nga masayud kon unsay gusto Niya nga makat-unan nimong buhaton.

“Padayon sa pagbasa sa mga kasulatan, ilabi na gayud ang Basahon ni Mormon, sa tibuok nimo nga kinabuhi. Mabalik-balik nimo sa pagdiskubre pag-usab ang mga bahandi sa kasulatan, makakaplag og bag-ong kahulugan ug paggamit niini samtang ikaw nagtuon niining nagkalainlaing mga yugto sa kinabuhi” (Matinud-anon sa Tinuhoan: Usa ka Pakisayran sa Ebanghelyo [2004], “Kasulatan, Mga,” 97).

Si Presidente Henry B. Eyring sa Unang Kapangulohan miingon:

“Kon dili kita mag-seryuso sa atong pagtuon sa mga kasulatan, mahitabo nga dili usab kita seryuso sa atong mga pag-ampo.

“Tingali dili kita mohunong sa pag-ampo, apan ang atong mga pag-ampo mahimong pabalik-balik, mas mekanikal, kulang sa tinuod nga katuyoan. Dili mapaduol ang atong mga kasingkasing ngadto sa usa ka Dios nga wala kita makaila, ug ang mga kasulatan ug ang mga pulong sa buhi nga mga propeta nagtabang kanato nga makaila Kaniya” (“Prayer,” Ensign, Nob. 2001, 17).

2 Nephi 33:1. Pag-abli sa atong mga kasingkasing ngadto sa Espiritu Santo

Isip kabahin sa inyong panaghisgot sa 2 Nephi 33:1, ikonsiderar ang pagbasa sa mosunod nga pamahayag ni Elder David A. Bednar sa Korum sa Napulog Duha ka mga Apostoles:

“Si Nephi nagtudlo kanato, ‘Kon ang tawo mamulong pinaagi sa gahum sa Espiritu Santo ang gahum sa Espiritu Santo modala [sa mensahe] ngadto sa mga kasingkasing sa katawhan’ (2 Nephi 33:1). Palihug timan-i kon sa unsa nga paagi nga ang gahum sa Espiritu modala sa mensahe paingon pero dili gayud sa sulod sa kasingkasing. Ang usa ka magtutudlo makapasabut, makapakita, makadani, ug makapamatuod, ug makabuhat og daghang espirituhanong gahum ug sa kaepektibo. Sa kaulahian, hinoon, ang sulod sa usa ka mensahe ug ang saksi sa Espiritu Santo mosulod lamang ngadto sa kasingkasing kon ang nagdawat motugot niini nga mosulod. …

“Ang usa ka tigkat-on nga naggamit sa kabubut-on pinaagi sa paglihok sumala sa sakto nga mga baruganan nagbukas sa iyang kasingkasing ngadto sa Espiritu Santo —ug nagdapit sa Iyang pagtudlo, gahum sa pagpamatuod, ug panghimatuod nga saksi” (“Seek Learning by Faith” [pamulong ngadto sa mga CES Religious Educator, Peb. 3, 2006], 1, 3, si.lds.org).

Dugang nga mga Ideya sa Pagtudlo

Mopasabut, mopakigbahin, ug mopamatuod

Ipasabut nga kon mopasabut kita sa mga doktrina ug mga baruganan, mopakigbahin og mga kasinatian, ug mopamatuod sa balaan nga kamatuoran, nagpakita kita sa atong kaandam nga mokat-on pinaagi sa Espiritu. Kon mokat-on kita pinaagi sa Espiritu, molambo kita sa atong pagsabut, mouswag sa atong abilidad sa pagtudlo sa ebanghelyo, ug molig-on ang atong mga pagpamatuod ug ang mga pagpamatuod sa uban.

• Ngano kahang importante nga mopasabut, mopakigbahin ug mopamatuod sa mga kamatuoran sa ebanghelyo sa sulod sa klase ug sa gawas sa klase?

• Kanus-a ba nga ikaw nakapasabut, nakapakigbahin, o nakapamatuod og usa ka kamatuoran sa ebanghelyo ngadto sa usa ka higala o miyembro sa pamilya?

D&P 50:21–22. Pagkat-on pinaagi sa Espiritu

Aron sa pagpausbaw sa panaghisgot sa mga estudyante sa Doktrina ug mga Pakigsaad 50:21–22, ikonsiderar ang paghimo og kopya sa mosunod nga pamahayag alang sa matag estudyante. Dapita ang mga estudyante sa pagpulipuli og basa sa mga bahin niini nga pamahayag samtang nagsunod ang uban. Hangyoa ang tanang mga estudyante nga maminaw alang sa mga katarungan nganong ang pipila ka mga indibidwal mas makadawat og espirituhanon nga kaayohan gikan sa mga miting sa Simbahan kay sa uban. Si Brother A. Roger Merrill, usa ka kanhing kinatibuk-ang presidente sa Sunday School, mipasabut unsay gipasabut sa pagkat-on pinaagi sa Balaang Espiritu:

“Kita kanunay nakatutok, kay maoy angay, sa kaimportante sa pagtudlo pinaagi sa Espiritu. Apan kita angay mahinumdom nga ang Ginoo nagbutang og katugbang, gani labaw pa, sa kaimportante sa pagdawat pinaagi sa Espiritu. (Tan-awa sa D&C 50:17–22.) …

“Sa atong mga miting sa Simbahan, sa atong personal ug sa pamilya nga pagtuon sa kasulatan, ug bisan niining adlawa sa atong pagpaminaw sa mga propeta ug mga apostoles sa Ginoo, ang uban kanato mahimong modawat og mas daghan kay sa uban. Ngano? Akong nakat-unan nga kinsa kadtong tinud-anay nga midawat mobuhat dili mominos sa tulo ka mga butang nga wala mabuhat sa uban.

“Una, sila mangita. Nagpuyo kita sa usa ka kalibutan sa kalingawan, usa ka kalibutan nga manan-away. Wala makaamgo niini, makita nato ang atong kaugalingon nga moanhi sa komperensya o mosimba nga may kinaiya nga, ‘Ania ako, karon dasiga ako.’ Mahimo kitang paling-paling nga espiritu.

“Kon kita mopunting hinoon sa pagdawat sa Espiritu, kita mahimo nga dili na kaayo interesado sa magtutudlo o mamumulong nga mokuha sa atong pagtagad ug labaw nga mainteresado kita kabahin sa atong paghatag sa atong pagtagad sa Espiritu. Hinumdumi, nga ang dawata usa ka pulong nga aksyon [verb]. Kini usa ka prinsipyo nga aksyon. Kini ang basihanan sa pagpakita sa hugot nga pagtuo.

“Ikaduha, kadtong modawat, mobati. Samtang ang pagpadayag moabot sa hunahuna ug kasingkasing, kasagaran kini mabati. Hangtud makat-on kita sa pagpanumbaling niining espirituhanon nga mga pagbati, kasagaran kita dili gani makaila sa Espiritu. …

“Ikatulo, kadtong kinsa nakadawat pinaagi sa Espiritu may tuyo sa pagbuhat. Sama sa gisugo sa propeta nga si Moroni, aron makadawat og pamatuod sa Basahon ni Mormon, kita kinahanglang mangutana ‘uban sa tinuod nga katuyoan’ (Moroni 10:4). Ang Espiritu motudlo kon kita tinuod nga may katuyoan nga mobuhat sa atong nakat-unan” (“Pagdawat pinaagi sa Espiritu,” Ensign o Liahona, Nob. 2006, 93–94).

• Sumala ni Brother Merrill, ngano man nga ang pipila ka mga tawo makaangkon og mas daghan kay sa uban kon modawat sila og pagtulun-an sa ebanghelyo?

• Unsa ang tulo ka mahinungdanon nga mga elemento nga gipakigbahin ni Brother Merrill mahitungod sa pagkat-on pinaagi sa Espiritu? (Isulat ang mga tubag diha sa pisara.)

1 Nephi 15. Mga sangputanan sa dili pagkat-on pinaagi sa Espiritu

Aron matabangan ang mga estudyante nga makakita og usa ka ehemplo sa kasulatan kon sa unsang paagi ang pagpatig-a sa atong mga kasingkasing makabalda sa atong abilidad nga makat-on pinaagi sa gahum sa Espiritu, papaklia ang mga estudyante sa 1 Nephi 15. Ipasabut nga nakasabut si Nephi sa relasyon tali sa magtutudlo, sa estudyante, ug sa Espiritu Santo. Ang 1 Nephi 15 naghisgot og balik sa usa ka panaghisgot ni Nephi uban sa iyang mga igsoong lalaki human ang ilang amahan, si Lehi, mitudlo kanila unsay gipadayag sa Ginoo diha kaniya. Ipabasa sa mga estudyante ang 1 Nephi 15:2–3, 7–11 sa indibidwal nga paagi.

• Unsay hinungdan sa mga panagbangi ni Laman ug Lemuel?

• Ngano man nga si Laman ug Lemuel wala makasabut sa mga pulong sa ilang amahan? (Mipatig-a sila sa ilang mga kasingkasing, wala sila naningkamot sa pagkat-on pinaagi sa Espiritu, ug wala sila mangutana sa Ginoo.)

Mahimo nimong ipasabut nga diha sa 1 Nephi 15:11, mipahinumdom si Nephi kang Laman ug Lemuel sa pipila ka mga butang nga mahimo unta nilang buhaton aron makadawat og pagpadayag. Malampuson si Nephi nga misulay sa matag aksyon ug kinaiya nga iyang gilista. Wala siya mopatig-a sa iyang kasingkasing, nangutana siya sa Ginoo diha sa hugot nga pagtuo, mituo siya nga makadawat siya og mga tubag gikan sa Ginoo, ug makugihon siyang mihupot sa mga kasugoan.