Jacob 5:52–77; Jacob 6

Pasiuna

Sa miagi nga leksyon, nagsugod ang mga estudyante sa pagtuon sa sambingay ni Zenos sa maayo ug ihalas nga mga kahoy nga oliba. Dinhi niini nga leksyon, ilang tun-an ang katapusan nga bahin sa sambingay, diin ang agalon sa ubasan miugmad uban sa iyang mga sulugoon alang sa katapusang higayon aron sa pagtabang sa mga kahoy nga mamunga og maayo nga bunga. Tun-an usab nila ang Jacob 6, diin mikomentaryo si Jacob sa sambingay ug mipasidaan sa iyang mga katawhan sa paghinulsol.

Mga Sugyot alang sa Pagtudlo

Jacob 5:52–60

Diha sa sambingay sa maayo ug ihalas nga mga kahoy nga oliba, ang agalon sa ubasan miluwas sa mga kahoy ug mitabang niini nga mamunga og maayo nga bunga

Sa dili pa magklase, pagdrowing diha sa pisara og litrato sa tulo ka kahoy.

Imahe

tulo ka oliba nga mga kahoy

Pahinumdumi ang mga estudyante nga sa miagi nga leksyon, misugod sila sa pagtuon sa sambingay ni Zenos sa maayo ug ihalas nga mga kahoy nga oliba diha sa Jacob 5. Sa katapusan niana nga leksyon, ang tanang mga kahoy sa ubasan namunga ug ihalas nga bunga (tan-awa sa Jacob 5:30–42). Nagrepresentar kini sa Dakong Apostasiya.

Sa pagribyu sa miaging leksyon, Ipares-pares ang mga estudyante. Ipahisgot sa matag pares ang ilang mga tubag sa mosunod nga dili kompleto nga mga pamahayag (mahimo nimong isulat kini nga mga pamahayag diha sa pisara):

Nagrepresentar ang agalon sa ubasan ni …
Ang mga paningkamot sa agalon sa ubasan aron sa pagluwas sa iyang mga kahoy nagrepresentar sa …
Usa ka butang nga akong nakat-unan mahitungod ni Jesukristo gikan sa mga pulong o mga binuhatan sa agalon sa ubasan mao ang …
Human madunot ang tanang mga kahoy ug mga bunga diha sa ubasan, mihukom ang agalon nga …

Human makahisgot ang mga estudyante niini nga mga pamahayag isip mga pares, ribyuha sa daklit ang ilang mga tubag isip usa ka klase. Samtang moreport ang mga estudyante sa ilang mga tubag ngadto sa unang duha ka mga pamahayag, ipaklaro gayud nga ang agalon sa ubasan nagrepresentar ni Jesukristo ug nga ang iyang mga paningkamot sa pagluwas sa iyang mga kahoy nagrepresentar sa mga paningkamot sa Manluluwas nga tabangan ang Iyang mga katawhan nga mobalik ngadto Kaniya. Mahimong mopakigbahin og lainlaing bililhon nga mga leksyon ang mga estudyante samtang kompletuhon nila ang ikatulong pamahayag. Ipasusi sa mga estudyante ang ilang mga tubag ngadto sa ika-upat nga pamahayag pinaagi sa pagtan-aw sa Jacob 5:51, nga nag-ingon nga ang agalon mihukom nga kaloy-an ang ubasan “og diyutay pa.”

Ipasabut nga ang leksyon karon naglangkob sa katapusang bahin sa sambingay, diin nagrepresentar sa katapusang mga adlaw, naglakip sa Pagpahiuli sa ebanghelyo.

Ipasabut nga ang agalon sa ubasan mihukom nga luwason ang ubasan pinaagi sa pagsumbak og dugang pa nga mga sanga. Papuli-puliha ang pipila ka mga estudyante sa pagbasa og kusog gikan sa Jacob 5:52–58. Dapita ang klase nga mangita alang sa unsay gibuhat sa agalon aron mapalig-on ang mga sanga ug mga gamot. (Tabangi ang mga estudyante nga makasabut nga ang agalon sa ubasan misumbak sa mga sanga gikan sa natural nga mga kahoy balik ngadto sa ilang gigikanan nga kahoy—ang kahoy nga nagrepresentar sa balay ni Israel. Dayon gisumbak niya ang mga sanga gikan niana nga kahoy ngadto sa ubang natural nga mga kahoy. Gitambug usab niya ang pait kaayong mga sanga ngadto sa kalayo. Mahimo nimong gamiton ang mga kahoy diha sa pisara aron sa paghulagway niini nga pagpasabut. Sama pananglit, tingali imong papason ang usa ka sanga gikan sa usa ka kahoy ug modrowing og bag-ong sanga diha sa laing kahoy.)

Dapita ang usa ka estudyante sa pagbasa og kusog sa Jacob 5:59. Hangyoa ang klase nga maminaw kon unsay gilauman sa agalon gumikan sa paghimo niini nga mahitabo sa gamot sa mga kahoy.

Unsay gilauman sa agalon nga mahitabo sa mga gamot? (Gusto niya nga kini “makakuha og kalig-on.”)

Pahinumdumi ang mga estudyante nga niini nga higayon, ang tanang mga kahoy namunga og dautan nga bunga, nagrepresentar sa tibuok kalibutan sa usa ka kahimtang sa apostasiya. Ipasabut nga sa dihang ang mga gamot makakuha og kalig-on, ang mga sanga sa tibuok ubasan mausab “nga ang maayo makabuntog sa dautan” (Jacob 5:59).

Siguroha nga makasabut ang mga estudyante nga kining mga bersikulo nagtudlo nga ang impluwensya sa mga pakigsaad sa ebanghelyo nagtugot sa mga anak sa Langitnong Amahan nga makabuntog sa sala ug makapakita og pagkamatarung.

Sa unsang mga pamaagi ang mga pakigsaad sa ebanghelyo makapalig-on kanato? Sa unsang paagi ang inyong mga pakigsaad nakaimpluwensya sa inyong kinabuhi? (Mahimo nimong ipakigbahin ang imong kaugalingong mga pagbati ug pagpamatuod mahitungod niini nga baruganan.)

Jacob 5:61–77

Ang agalon sa ubasan nag-ugmad sa ubasan uban sa iyang mga sulugoon

Dapita ang mga estudyante nga basahon ang Jacob 5:61–62 sa hilum nga paagi, nga mangita kon unsay gisugo sa agalon sa ubasan nga buhaton sa iyang mga sulugoon ug nganong mihangyo siya kanila nga buhaton kini.

Diha sa sinugdanan sa sambingay ang sulugoon nagrepresentar sa mga propeta sa Ginoo. Kinsa kaha ang girepresentaran sa daghang mga sulugoon diha sa Jacob 5:61? (Tabangi ang mga estudyante nga makasabut nga kining mga sulugoon mahimong nagrepresentar sa tanang mga miyembro sa Simbahan: mga propeta ug mga apostoles, kinatibuk-an ug lokal nga mga lider sa Simbahan, mga misyonaryo, mga home teacher, mga visiting teacher, ug bisan kinsa nga moapil sa buhat sa Ginoo.)
Unsay nakamahinungdanon mahitungod sa mga pulong nga kita, atong, ug nato diha sa Jacob 5:61–62? (Ang Ginoo nag-ugmad uban kanato. Wala kita pasagdi nga kita lamang ang magtrabaho sa Iyang buhat.)
Sumala sa Jacob 5:62, unsay nakatalagsaon mahitungod sa panahon diin kining mga sulugoon gitawag sa pag-ugmad? (Mao kadto ang “katapusan nga higayon” nga ang agalon mopul-ong sa ubasan. Ang mga propeta nagpasabut niini nga “katapusan nga higayon” isip “ang dispensasyon sa kahingpitan sa mga panahon.” Sama pananglit, tan-awa sa Mga Taga-Efeso 1:10 ug D&P 128:20.)

Imahe

Elder Dean L. Larsen

Aron matabangan ang mga estudyante nga makasabut kon sa unsang paagi kini nga bahin sa sambingay may kalabutan kanila, ipabasa sa usa ka estudyante ang mosunod nga pamahayag ni Elder Dean L. Larsen sa Seventy:

“[Karon] ang panahon diin ang Ginoo ug ang iyang mga sulugoon mohimo sa katapusang dakong paningkamot sa pagdala sa mensahe sa kamatuoran ngadto sa tanang mga katawhan sa kalibutan ug bawion ang mga kaliwat sa karaang Israel kinsa nawad-an sa ilang tinuod nga pagkasila. …

“Mianhi kamo sa kalibutan sa dihang naandam na ang pundasyon alang niini nga dakong buhat. Napahiuli na ang ebanghelyo sa katapusang higayon. Na-establisar na ang Simbahan sa hapit matag bahin sa kalibutan. Naandam na ang entablado alang sa katapusang mga hugna nga isadula. Kamo ang nag-unang mga magdudula. Apil kamo sa katapusang mga mag-uugmad [trabahante] diha sa ubasan. … Mao kini ang pangalagad diin kamo gipili” (“A Royal Generation,” Ensign, Mayo 1983, 33).

Sa unsang paagi nakaimpluwensya kaninyo ang kahibalo nga gitawag kamo nga moalagad uban sa Ginoo sa panahon niining katapusan nga bahin sa pag-ugmad [trabaho]?
Kanus-a kamo mibati nga ang Ginoo miugmad [nagtrabaho] uban kaninyo samtang misalmot kamo sa Iyang buhat?
Unsa ang pipila ka mga oportunidad ninyo nga moalagad sa Ginoo ug motabang sa uban nga makapamunga og “maayo nga bunga”? (Mahimong maghisgot ang mga estudyante sa ilang mga calling ug mga assignment sa Simbahan; ilang responsibilidad nga motabang sa mga miyembro sa pamilya, mga higala, ug sa uban nga mapaduol ngadto sa Manluluwas; ug ang oportunidad nga sila makabaton sa pag-alagad sa Ginoo isip full-time nga mga misyonaryo.)

Isulat ang Jacob 5:70–75 diha sa pisara. Ipaila kini nga mga bersikulo pinaagi sa pagpasabut nga nagtudlo kini mahitungod sa relasyon sa Ginoo ngadto sa Iyang mga sulugoon. Naghulagway usab kini kon unsay mahimo sa Ginoo ug sa Iyang mga sulugoon pinaagi sa ilang tinabangay nga pag-ugmad [pagtrabaho]. Dapita ang mga estudyante sa pagbasa niini nga mga bersikulo sa hilum nga paagi ug mopili og usa ka bersikulo nga naghatag sa ilang paborito nga paghulagway sa relasyon sa Ginoo ngadto sa Iyang mga sulugoon. Human ang mga estudyante nahatagan og panahon sa pagbasa, dapita ang pipila kanila sa pagsulti kon hain nga bersikulo ang ilang napilian, nganong ganahan sila niini, ug sa unsang paagi kini makatabang kanila samtang nag-alagad sila sa Ginoo.

Samtang moapil ang mga estudyante niini nga kalihokan, siguroa nga makasabut sila nga misaad ang Ginoo kanato og hingpit nga kalipay samtang nag-ugmad [nagtrabaho] kita uban Kaniya aron sa pagtuman sa Iyang buhat. Aron matabangan ang mga estudyante nga mapalawom ang ilang pagsabut sa Jacob 5:70–75, ikonsiderar nga ipangutana ang pipila sa mosunod:

Unsay gisaad sa agalon sa ubasan ngadto niadtong kinsa nag-ugmad uban kaniya? (Tan-awa sa Jacob 5:71, 75.) Kanus-a kamo mibati og hingpit nga kalipay diha sa buhat sa Ginoo?
Ngano kahang mahinungdanon nga ang mga sulugoon miugmad “uban sa ilang mga kusog” ug “uban sa tanan nga kakugi”? (Tan-awa sa Jacob 5:72, 74.) Unsa nga mga leksyon ang inyong makuha gikan niini nga mga pulong samtang nag-alagad kamo sa Ginoo?

Tapusa kini nga bahin sa leksyon pinaagi sa paghangyo sa mga estudyante nga tubagon ang mosunod nga pangutana diha sa ilang mga scripture study journal o mga class notebook (mahimo nimo kining isulat diha sa pisara):

Samtang nagkonsiderar kamo sa inyong mga oportunidad sa pag-alagad sa Ginoo, unsaon man ninyo paggamit ang mga kamatuoran nga atong gihisgutan diha sa Jacob 5?

Human ang mga estudyante nahatagan og igong panahon sa pagsulat, mahimo nimong hangyuon ang usa o duha kanila sa pagbasa sa ilang mga tubag ngadto sa klase.

Jacob 6

Nagtudlo si Jacob sa kalooy ug kaangayan sa Ginoo ug nagdapit sa iyang mga katawhan nga maghinulsol

Ipaila sa daklit ang Jacob 6 pinaagi sa pagpasabut nga naglangkob kini sa summary ni Jacob sa importante nga mga kamatuoran gikan sa sambingay sa maayo ug ihalas nga mga kahoy nga oliba.

Dapita ang usa ka estudyante sa pagbasa sa Jacob 6:4–6. Hangyoa ang katunga sa klase nga mangita kon unsay gusto ni Jacob nga makat-unan sa iyang mga katawhan mahitungod sa Ginoo. (Nga nakahinumdom Siya sa Iyang mga katawhan, nga Siya “nagmatinud-anon nganha [kanila],” ug nga ang Iyang “bukton sa kalooy gipatuy-od nganha [kanila].” Tingali kinahanglan nimong ipasabut nga dinhi sa mao nga tudling, ang pulong nga magmatinud-anon nagpasabut sa pagpaduol gayud ngadto sa usa ka butang o sa usa ka tawo.) Hangyoa ang pikas katunga sa klase nga mangita kon unsay giawhag ni Jacob nga buhaton sa iyang mga katawhan isip resulta niini nga kahibalo. (Nga dili magpatig-a sa ilang mga kasingkasing, maghinulsol, moduol sa Ginoo “uban ang hingpit nga katuyoan sa kasingkasing,” ug “magmatinud-anon ngadto sa Dios ingon nga siya nagmatinud-anon nganha [kanila].”) Human makasulti ang mga estudyante ngadto sa klase kon unsay ilang nakat-unan, ipangutana:

Giunsa paghulagway ni Jacob ang Ginoo? Unsay kahulugan diha kaninyo nga ang “bukton sa kalooy [sa Ginoo] gipatuy-od paingon nganha kaninyo”?
Unsay inyong nakat-unan mahitungod sa Ginoo gikan sa sambingay sa mga kahoy nga oliba nga nagpakita kon sa unsang paagi Siya nagmatinud-anon nganha kaninyo? Unsay mahimo ninyong buhaton aron ipakita nga nagmatinud-anon kamo sa Ginoo?

I-summarize ang Jacob 6:7–10 pinaagi sa pagpasabut nga human kita “maalimahi sa maayo nga pulong sa Dios,” kinahanglan nga kita dili modala og dautan nga bunga. Kinahanglan natong sundon ang mga pulong sa mga propeta. Kon dili kita maghinulsol, mipasidaan si Jacob, manubag kita alang sa atong mga sala diha sa hukmanan sa Ginoo. Awhaga ang mga estudyante nga basahon ang Jacob 6:11–13 sa hilum nga paagi ug mangita sa katapusang tambag ni Jacob. Human sila mopakigbahin kon unsay ilang nakit-an, ipangutana:

Nganong maalamon man nga mopili sa paghinulsol ug mangandam karon nga mobarug sa atubangan sa Ginoo ug Iyang hukman?

Ipanghimatuod nga maalamon kita nga mangandam karon alang sa paghukom pinaagi sa paghinulsol ug pagdawat sa kalooy sa Ginoo.

Sa pagtapos niini nga leksyon, hatagi og gibug-aton nga ang paghinulsol nag-andam kanato dili lamang sa umaabut nga paghukom apan usab sa pag-alagad sa Ginoo karon. Ipamatuod ngadto sa mga estudyante nga gusto sa Ginoo nga moalagad sila uban Kaniya ug magkaplag og hingpit nga kalipay uban Kaniya ug nga sila mahimong takus nga mobuhat sa ingon samtang magsunod sila sa Iyang mga sugo, maghinulsol, ug modawat sa Iyang kalooy.

Komentaryo ug Background nga Impormasyon

Jacob 5. Overview sa sambingay sa maayo ug ihalas nga mga kahoy nga oliba

Imahe

allegory of the olive tree