Alma 45–63 (Unit 21)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga summary sa mga doktrina ug mga baruganan nga nakat-unan sa mga estudyante samtang sila nagtuon sa Alma 45–63 (unit 21) dili tuyo nga itudlo isip kabahin sa imong leksyon. Ang leksyon nga imong itudlo mosentro lamang diha sa pipila niini nga mga doktrina ug mga baruganan. Sunda ang mga pag-aghat sa Balaang Espiritu samtang imong ikonsiderar ang mga panginahanglan sa imong mga estudyante.

Day 1 (Alma 45–49)

Si Alma mipasabut ngadto sa iyang anak nga lalaki nga si Helaman nga ang Ginoo dili makatan-aw diha sa sala uban sa labing gamay nga matang sa pagtugot. Pinaagi sa pagtandi sa mga gubat sa mga Nephite uban sa ilang kaugalingong mga gubat, ang mga estudyante nakat-on sa mosunod nga mga kamatuoran: Kon kita maisugon sa pagtuman sa mga sugo sama sa gibuhat ni Kapitan Moroni, ang Dios molig-on ug mopanalangin kanato. Nagtinguha si Satanas sa pagdaut kanato, ug molingla siya kanato pinaagi sa ginagmayng pagpaubos sa atong mga sumbanan.

Day 2 (Alma 50–52; 54–55)

Bisan og ang mga Nephite miuswag sulod sa usa ka higayon human sa pagbiya ni Amalickiah, si Moroni nagpadayon sa pag-andam sa mga tawo alang sa umaabut nga mga pag-ataki. Ang ehemplo sa mga Nephite atol sa malisud nga mga kahimtang nakatabang sa mga estudyante nga masabtan nga ang kamatinud-anon ngadto sa Dios makahatag og kalipay, bisan taliwala sa kasamok—apan ang pagkabahin-bahin ug panagbingkil makaguba sa atong kalinaw. Nakat-unan usab sa mga estudyante nga samtang mobarug kita nga lig-on alang sa unsay husto, makalikay kita sa mga impluwensya sa dautan gikan sa pag-angkon og gahum batok kanato.

Day 3 (Alma 53; 56–58)

Atol sa pipila ka labing lisud nga mga panahon sa gubat, si Helaman nangulo sa kasundalohan nga batan-ong mga lalaki nga mga katawhan ni Ammon. Sila ang batan-ong mga manggugubat nga mipakita nga kon kita molihok diha sa hugot nga pagtuo, makadawat kita og kusog gikan sa Dios. Nakat-on ang mga estudyante gikan sa ehemplo niining walay kahadlok nga mga manggugubat nga kon mosalig kita sa Ginoo ug mosunod Kaniya nga walay pagkasayop, Siya moabag kanato sa atong mga gubat. Bisan sa kadaghan sa mga samad nga ilang naangkon ug daghang kalisud nga ilang naantus, ang kasundalohan sa Nephite ug ang batan-ong mga manggugubat mipakita nga kon kita mobalik ngadto sa Dios sa panahon sa kalisdanan, makadawat kita og balaanong kasiguraduhan nga makapalig-on sa atong pagtuo ug maghatag kanato og paglaum.

Day 4 (Alma 59–63)

Tungod sa panag-unay nga rebelyon, ang mga Nephite nawad-an og pipila ka mga siyudad; kini nagpakita sa mga estudyante nga mas sayon ug mas maayo nga magpabiling matinud-anon kay sa mobalik kini sa pagtuo human mahisalaag. Si Moroni sayo nga miakusar sa labaw nga maghuhukom nga si Pahoran sa pagbaliwala sa iyang mga katungdanan, ug nakat-unan sa mga estudyante gikan sa tubag ni Pahoran nga mahimo kitang mopili nga dili masilo sa mga pulong ug buhat sa uban. Agi og dugang, ang mga estudyante nakat-on nga kon maghiusa kita sa pagkamatarung uban sa laing mga tawo, mas malig-on kita sa atong mga gubat batok sa dautan, sumala sa gipakita nila ni Moroni ug Pahoran.

Pasiuna

Tungod kay kining leksyon naglangkob sa 19 ka mga kapitulo sa basahon ni Alma, dili na nimo matudlo o mapasabut og maayo ang tanang konteksto sa kasaysayan ug tanang mga doktrina ug mga baruganan nga makat-unan sa mga estudyante sa tibuok semana. Ang mosunod nga mga sugyot sa pagtudlo maghatag sa mga estudyante og usa ka oportunidad sa paggamit sa mga kamatuoran nga ilang nakat-unan gikan sa pagtuon sa mga gubat sa Nephite ngadto sa mga gubat sa ilang kaugalingong mga kinabuhi. Mainampuon nga magtuon sa mga kasulatan alang niining leksyon aron madasig ka sa pagpasabut og maayo sa mga kamatuoran nga gikinahanglang tutokan sa mga estudyante atol sa klase.

Mga Sugyot alang sa Pagtudlo

Alma 45–63

Pinaagi sa pagsalig sa Dios ug sa pagsunod sa dinasig nga mga lider, ang mga Nephite milupig sa mga Lamanite

Isulat ang mosunod nga pamahayag ni Presidente Ezra Taft Benson diha sa pisara sa dili pa magklase: “Gikan sa Basahon ni Mormon makat-unan nato kon sa unsang paagi ang mga disipulo ni Kristo nagpakabuhi panahon sa gubat” (“The Book of Mormon—Keystone of Our Religion,” Ensign, Nob. 1986, 7).

Hangyoa ang mga estudyante sa paghingalan og pipila ka gubat nga gipakigbatukan sa nasud nga ilang gipuy-an. Unya hangyoa sila sa paghingalan og pipila ka hagit nga giatubang sa mga tawo panahon sa gubat.

Ipangutana: Nganong lisud kaha ang mahimong disipulo ni Jesukristo panahon sa gubat?

Dapita ang mga estudyante sa paghunahuna mahitungod sa mga gubat nga ilang natun-an sa miaging semana, sumala sa narekord sa Alma 45–63. Mahimo nimo silang awhagon nga magribyu og kadali sa pipila ka summary sa kapitulo sa Alma 45–63. Dapita sila sa paghingalan og pipila ka hagit nga giatubang sa mga Nephite panahon sa gubat.

Pahinumdumi ang mga estudyante nga bisan kon wala gayud kita nakigbatok sa tinud-anay nga gubat, kitang tanan naapil sa usa ka espirituhanon nga gubat. Dapita ang usa ka estudyante sa pagbasa sa mosunod nga pamahayag ni Presidente Henry B. Eyring sa Unang Kapangulohan, kinsa mihulagway sa espirituhanon nga gubat nga atong giapilan sa kasamtangan. Mahimo nimong hatagan og kopya ang matag estudyante.

“Kamo nahilakip sa kasundalohan sa Ginoo sa katapusang dispensasyon. Dili kini panahon sa kalinaw. Mao na kana sukad nga giorganisar ni Satanas ang iyang mga pwersa batok sa plano sa atong Langitnong Amahan didto sa kinabuhi sa wala pa dinhi sa kalibtuan. Wala kita masayud sa mga detalye sa panagsangka nianang higayuna. Apan nasayud kita sa usa ka resulta. Si Satanas ug ang iyang mga sumusunod gilabay paingon ngari sa yuta. Ug sukad sa paglalang kang Adan ug Eva, ang panag-away nagpadayon. Ato kining nakita nga nagkagrabe. Ug ang mga kasulatan nagsugyot nga ang gubat mahimong mas bayolente ug ang mangamatay sa espirituhanong paagi diha sa habig sa Ginoo mas magkadaghan” (“Dunay Nasamdan!” Ensign o Liahona, Mayo 2009, 63).

I-refer ang mga estudyante ngadto sa pamahayag ni Presidente Benson diha sa pisara. Sultihi sila nga bisan kon maghisgot kita mahitungod sa pisikal nga gubat o espirituhanon nga gubat, ang pamahayag tinuod. Ipasabut nga ang pagtuon sa mga kinabuhi sa mga disipulo nga nabuhi atol sa mga gubat sa panahon sa Basahon ni Mormon makatabang kanato sa pag-ugmad og mga kinaiya nga importante sa atong kaugalingong espirituhanon nga mga gubat.

Isulat ang mosunod nga mga pangalan ug mga pakisayran sa kasulatan diha sa pisara, o andama kini isip usa ka handout. Hangyoa ang mga estudyante sa pagpili og usa niining mga indibidwal o mga grupo sa pagtuon. Sulayi nga dunay labing minos usa ka estudyante nga tun-an ang matag tawo o grupo.

Moroni—Alma 46:11–21; 48:7–17
Helaman—Alma 48:19–20; 56:2–9; 58:4–12, 32–37
Ang 2,060 ka batan-ong mga manggugubat—Alma 53:16–22; 56:47–56; 57:19–27
Pahoran—Alma 50:39–40; 51:1–7; 61:1–21

Hatagi ang mga estudyante og pipila ka minuto sa pagtuon og daghang kasulatan kutob sa mahimo mahitungod sa indibidwal o grupo nga ilang napili. Hangyoa sila sa pagpangandam sa pagtudlo sa mosunod nga mga ideya ngadto sa klase (mahimo nimo kining isulat sa pisara o ibutang usab sa handout):

Usa ka panghitabo gikan sa kinabuhi niining tawo o grupo nga magpakita sa mga tawo nga tinuod nga mga disipulo sa Manluluwas.
Usa o mas daghang mga kinaiya niining tawo o grupo nga nakatabang nila nga magpabiling walay kahadlok panahon sa gubat uban sa mga Lamanite.
Usa ka baruganan sa ebanghelyo nga atong makat-unan gikan niining tawo o grupo nga makapalig-on kanato sa atong espirituhanon nga mga gubat karon.

Pagdapit og daghang estudyante kutob sa mahimo aron sa pagpakigbahin unsa ang ilang nakat-unan sa klase. Mahimo nimong hangyoon ang mga estudyante sa pagsulat sa mga baruganan sa ebanghelyo nga ilang nakat-unan.

Ikonsiderar ang pagpangutana sa mosunod aron matabangan ang mga estudyante sa paggamit kon unsa ang ilang nakat-unan gikan sa ilang pagtuon sa Alma 45–63:

Hunahunaa ang mahitungod sa mga kinaiya sa usa ka disipulo ni Jesukristo nga inyong nakita sa mga tawo kinsa nabuhi panahon sa mga gubat tali sa mga Lamanite. Asa niining mga kinaiya ang gusto ninyong gamiton nga mopalambo sa inyong kinabuhi? Ngano man?
Unsa ang espirituhanon nga mga gubat nga atong giatubang karon? Sa unsang paagi nga ang mga ehemplo niining mga disipulo sa Manluluwas nakatabang ninyo nga makaangkon og hugot nga pagtuo ug kaisug samtang nag-atubang kamo niining mga gubat?

Mahimo nimong ipakigbahin ang usa sa imong paborito nga mga tudling gikan sa Alma 45–63. Ipamatuod nga ang mga baruganan nga atong nakat-unan gikan niining mga kapitulo makatabang kanato nga mamahimong tinuod nga mga disipulo ni Jesukristo panahon sa espirituhanon nga giyera sa ulahing mga adlaw.

Sunod nga Unit (Helaman 1–9)

Sultihi ang mga estudyante nga ang unang kapitulo sa Helaman nagrekord sa kamatayon sa tulo ka labaw nga mga maghuhukom. Sultihi sila nga makit-an nila ang mga tubag sa mosunod nga mga pangutana: Sa unsang paagi namatay ang mga maghuhukom? Unsa nga mga milagro ang nahitabo ni Nephi ug Lehi sa dihang gibilanggo sila? Kang kinsang tingog ang ilang nadunggan? Sultihi ang mga estudyante nga ang propeta nga si Nephi nakasulbad og usa ka pagpatay pinaagi sa gahum sa pagpanagna.