Jacob 7

Pasiuna

Misalig si Jacob sa Ginoo ug sa iyang dili matarug nga pagpamatuod sa pagbuntog sa sayop nga mga ideya ug mga argumento ni Sherem, usa ka anti-Kristo. Mikuha siya og kalig-on gikan sa miaging mga kasinatian nga mipalig-on sa iyang hugot nga pagtuo diha kang Jesukristo. Misalig usab siya sa giya sa Balaang Espiritu, sa iyang kahibalo sa mga kasulatan ug sa mga pulong sa mga propeta, ug sa iyang pagpamatuod kang Jesukristo. Sa dihang si Sherem nangita og timailhan nga mopamatuod sa mga pulong ni Jacob, gisakit siya sa Dios. Mitapos si Jacob sa iyang rekord pinaagi sa paghulagway kon sa unsang paagi misalig ang mga Nephite diha sa Ginoo sa dihang mipalig-on sila sa ilang mga kaugalingon batok sa mga Lamanite. Sa wala pa mamatay si Jacob, iyang gisalig ang gagmay nga mga palid ngadto sa iyang anak nga lalaki nga si Enos.

Mga Sugyot alang sa Pagtudlo

Jacob 7:1–14

Misalig si Jacob diha sa Ginoo sa dihang miatubang siya kang Sherem, usa ka anti-Kristo

Sa dili pa magklase, isulat sa pisara ang mosunod nga pamahayag ni Elder Robert D. Hales sa Korum sa Napulog Duha ka mga Apostoles (gikutlo gikan sa “Kristohanong Kaisug: Ang Bugti sa Pagkadisipulo,” Ensign o Liahona, Nob. 2008, 72):

“Usa sa dakong mga pagsulay sa mortalidad moabut kon ang atong mga gituohan gikwestyon o gisaway” (Elder Robert D. Hales).

Hangyoa ang mga estudyante sa paghunahuna og usa ka higayon nga ang usa ka tawo mikwestyon o misaway sa ilang mga gituohan. Dapita ang pipila kanila sa pagpakigbahin kon unsay ilang gibati sa dihang kana nahitabo. Mahimo usab ikaw nga sa daklit mopakigbahin og usa ka kasinatian gikan sa imong kinabuhi.

Ipasabut nga ang Jacob 7 nag-istorya og balik sa kasinatian ni Jacob uban ni Sherem nga usa ka anti-Kristo. (Mahimo nimong ipasabut nga ang usa ka anti-Kristo mao ang “bisan kinsa o bisan unsa nga mahasupak sa tinuod nga ebanghelyo sa laraw sa kaluwasan ug nga sa dayag o sa tinago misupak kang Kristo” [Giya ngadto sa mga Kasulatan, “Anti-Kristo”].) Gipangita ni Sherem si Jacob aron sa paghagit sa iyang hugot nga pagtuo.

Ikonsiderar ang paggamit niini nga hugna nga gikan sa Mga Video sa Basahon ni Mormon samtang nagtudlo niini nga bahin (tan-awa ang Mga Video sa Basahon ni Mormon: Mga Instruksyon sa Seminary Teacher).

Dapita ang mga estudyante sa pagbasa sa hilum sa Jacob 7:1–5. Hangyoa sila sa pag-ila (1) kon unsay gipaninguha ni Sherem nga buhaton ug (2) kon giunsa niya pagpaninguha nga matuman ang iyang mga tumong. Human mobasa ang mga estudyante, hangyoa sila sa paghulagway kon unsay ilang nakat-unan mahitungod ni Sherem. Mahimo nimong ipangutana ang mosunod aron sa pagpalambo sa panaghisgot:

Unsay epekto nga nahatag ni Sherem ngadto sa mga katawhan?
Unsay inyong makita diha sa Jacob 7:1–5 nga mopahinumdom kaninyo sa mga higayon nga ang uban mikwestyon o misaway sa inyong hugot nga pagtuo? (Samtang maghisgot kamo niini nga pangutana, mahimo nimong tabangan ang mga estudyante sa pagsabut nga dili tanang tawo kinsa mokwestyon o mosaway sa atong hugot nga pagtuo adunay sama nga mga motibo kang Sherem. Samtang adunay mga tawo sama ni Sherem nga tuyong maninguha sa pagdaut sa atong hugot nga pagtuo, ang uban mahimong mokwestyon sa atong hugot nga pagtuo tungod kay kuryuso sila o tungod kay sayop ang ilang nahibaloan kabahin sa atong mga gituohan.)
Ngano kahang usahay lisud panalipdan ang atong hugot nga pagtuo batok sa mga tawo nga sama ni Sherem?

Kopyaha diha sa pisara ang mosunod nga mga pakisayran sa kasulatan ug mga pamahayag. (Aron makadaginot og panahon, mahimo nimo kining kopyahon diha sa pisara sa dili pa magklase. Mahimo usab nimo kining andamon isip usa ka handout.)

1. Jacob 7:5	a. Mipamatuod sa mga kasulatan ug mga pulong sa mga propeta.
2. Jacob 7:8	b. Gisalig ang resulta ngadto sa mga kamot sa Dios.
3. Jacob 7:10–11	c. Misalig sa paggiya ug kalig-on gikan sa Espiritu Santo.
4. Jacob 7:12	d. Nakahinumdom sa miaging mga kasinatian nga mipalig-on sa iyang pagtuo.
5. Jacob 7:13–14	e. Mipakigbahin sa pagpamatuod nga iyang nadawat pinaagi sa Espiritu Santo.

Ipasabut nga ang mga bersikulo niini nga lista naghulagway sa mga tubag ni Jacob sa dihang gihagit ni Sherem ang iyang mga gituohan. Ang mga pamahayag diha sa tuo nagrepresentar sa mga tubag ni Jacob, apan wala magsunod ang pagkalista niini ug kinahanglang itugma-tugma ngadto sa ilang katugma nga mga bersikulo. Dapita ang pipila ka mga estudyante nga magpuli-puli og basa og kusog gikan sa Jacob 7:5–14. Samtang nagbasa sila, pahunonga sila human sa matag tudling nga nakalista diha sa pisara. Hangyoa ang mga estudyante nga itugma-tugma ang matag tudling ngadto sa ilang katugma nga mga pamahayag. Mahimo nimong dapiton ang usa ka estudyante nga moduol ngadto sa pisara ug mohimo og mga linya gikan sa mga pakisayran sa kasulatan ngadto sa katugma nga mga pamahayag. (Mga tubag: 1-d; 2-c; 3-a; 4-e; 5-b.)

Human makompleto sa mga estudyante ang pagtugma-tugma nga kalihokan, ipangutana:

Unsa nga mga baruganan ang inyong makita nga gitudlo sa mga bersikulo nga atong gibasa?

Kon walay mosugyot niini, siguroha nga makasabut ang mga estudyante nga samtang mosalig kita sa Ginoo, makabuntog kita sa mga hagit ngadto sa atong hugot nga pagtuo. (Mahimo nimong isulat sa pisara kini nga baruganan.)

Ipasabut nga ang mga tubag ni Jacob ngadto kang Sherem naghatag og usa ka ehemplo nga atong masunod samtang motubag kita niadtong mokwestyon o mosaway sa atong hugot nga pagtuo.

Ang follow-up nga mga pangutana nga nalista diha sa ubos gidisenyo sa pagtabang sa mga estudyante nga maghunahuna og mas lawom mahitungod sa unsay gibuhat ni Jacob aron mosalig sa Ginoo. Ang pagtubag niini nga mga pangutana mohatag sa mga estudyante og oportunidad sa paghulagway ug pagpamatuod kon sa unsang paagi ang susamang mga binuhatan mitabang kanila sa dihang gihagit sa uban ang ilang hugot nga pagtuo. Makatabang usab kini kanila nga makat-on kon unsaon pagtubag og husto sa umaabut nga mga hagit sa ilang hugot nga pagtuo. Tungod kay daghan ra kaayo ang mga pangutana diha sa ubos nga lagmit imong magamit diha sa klase, pilia lamang ang pipila ka mga pangutana nga gamiton diha sa inyong panaghisgot. Samtang nagbuhat ka niini, tinguhaa ang giya sa Espiritu Santo, ug hinumdumi ang mga kasinatian nga gipakigbahin sa mga estudyante diha sa sinugdanan sa klase. Mahimo usab nimong ikonsiderar ang pagpangutana sa mga estudyante kon hain sa mga binuhatan ni Jacob ang gusto nilang hisgutan pa.

Unsay nahitabo kang Jacob sa miagi nga mipahimo sa iyang hugot nga pagtuo nga dili matarug? (Tan-awa sa Jacob 7:5.)
Unsay pipila ka mga kasinatian nga mipalig-on sa inyong pagtuo? (Mahimo nimong hatagan og panahon ang mga estudyante nga mamalandong niini nga pangutana sa dili pa sila hangyuon sa pagtubag. Pasaligi ang mga estudyante nga dili sila kinahanglang mopakigbahin og mga kasinatian nga personal o pribado kaayo.) Sa unsang paagi ang paghinumdom niini nga mga kasinatian makatabang kaninyo sa dihang ang usa ka tawo mohagit o mosaway sa inyong hugot nga pagtuo?
Kanus-a ba ang Espiritu Santo mitabang kaninyo nga motubag sa mga pangutana o mga pagsaway mahitungod sa inyong hugot nga pagtuo? (Tan-awa sa Jacob 7:8.)
Sa unsang paagi ang naandang kinaiya sa pagtuon sa mga kasulatan ug sa mga pulong sa mga propeta sa ulahing mga adlaw motabang kaninyo sa dihang ang uban mokwestyon o mosaway sa inyong hugot nga pagtuo? (Tan-awa sa Jacob 7:10–11.)
Kanus-a ba kamo mipakigbahin sa inyong pagpamatuod ngadto sa usa ka tawo kinsa mikwestyon o misaway sa inyong hugot nga pagtuo? (Tan-awa sa Jacob 7:12.) Unsa may resulta?
Sa dihang nangita si Sherem ug usa ka timailhan, nganong maalamon man alang ni Jacob nga iyang gisalig ang resulta ngadto sa mga kamot sa Ginoo imbis nga maninguha sa iyang kaugalingon nga pamatud-an ang katinuod sa iyang pagpamatuod? (Tan-awa sa Jacob 7:14.) Sa unsang paagi makatabang kaninyo nga masayud nga dili ninyo kinahanglang pamatud-an ang katinuod sa inyong pagpamatuod ngadto niadtong mohagit sa inyong hugot nga pagtuo?

Jacob 7:15–27

Human gisakit si Sherem, mikumpisal siya sa iyang mga sala, mipamatuod sa kamatuoran, ug dayon namatay siya, migiya sa pundok sa mga Nephite nga mobalik ngadto sa Ginoo

Basaha ang mosunod nga pamahayag ni Elder Robert D. Hales:

“Sa tibuok katuigan atong nakat-unan nga ang mga pagsulay sa atong pagtuo dili mga bag-o, ug dili sila ingon nga mahanaw sa umaabut. Apan ang tinuod nga mga disipulo ni Kristo makakita sa kahigayunan taliwala sa oposisyon. …

“… Maayo na lang, ang Ginoo nasayud sa mga kasingkasing sa mga tig-akusar kanato ug unsaon nato sila sa pagtubag sa maayong paagi. Samtang ang tinuod nga disipulo mangayo og giya sa Espiritu, makadawat sila og inspirasyon gikan sa matag panag-abut. Ug sa matag panag-abut, ang tinuod nga mga disipulo motubag sa mga paagi nga modapit sa Espiritu sa Ginoo” (“Kristohanon nga Kaisug: Ang Bugti sa Pagkadisipulo,” 72–73; mga italic sa orihinal).

Unsa kaha ang gipasabut sa “makakita sa kahigayunan taliwala sa oposisyon”? (Samtang motubag ang mga estudyante niini nga pangutana, tabangi sila nga makasabut nga maayo ang mahimong resulta kon motubag kita sa mga hagit ngadto sa atong hugot nga pagtuo diha sa mga pamaagi nga nagdapit sa Espiritu sa Ginoo.)

Ipares-pares ang mga estudyante. Ipabasa sa matag pares ang Jacob 7:15–23, nga mangita sa bisan unsa nga maayo nga miresulta gikan sa pakig-atubang ni Jacob uban kang Sherem. Human makabasa ang mga estudyante, dapita ang pipila kanila sa pagpasabut kon unsay ilang nakit-an. Ikonsiderar ang paggamit sa pipila sa mosunod nga mga pangutana aron matabangan ang mga estudyante sa pagtuki niini nga mga bersikulo:

Unsa nga ebidensya ang inyong nakita nga gilauman ni Jacob nga ang iyang pakigharong ni Sherem makatabang sa uban? (Tan-awa sa Jacob 7:22. Tabangi ang mga estudyante nga makakita nga nag-ampo si Jacob alang sa pundok sa mga Nephite kinsa nakasaksi sa pagkumpisal ug kamatayon ni Sherem.)
Sumala sa Jacob 7:23, sa unsang paagi ang pakigharong ni Jacob kang Sherem sa katapusan nakaapekto sa pundok sa katawhan?
Unsa nga mga kamatuoran ang atong makat-unan gikan sa mga resulta sa pagkigharong ni Jacob kang Sherem? (Mahimong makakita og daghang mga tubag ang mga estudyante ngadto niini nga pangutana. Mahimong ang pipila mosugyot sa mga baruganan nga nakalista diha sa ubos.)

Ang tanang mga propeta nagpamatuod ni Jesukristo.
Samtang motubag kita sa mga pangutana o mga pagsaway sa atong hugot nga pagtuo diha sa mga pamaagi nga nagdapit sa Espiritu, makatabang kita sa uban nga modangup ngadto sa Ginoo.
Motabang ang mga propeta kanato sa pag-ila ug pagbuntog sa mga panglingla ni Satanas.
Kadtong mosupak batok sa Dios ug aktibong magsangyaw batok sa kamatuoran moatubang og mabug-at nga mga sangputanan gikan sa Ginoo.
Ang pagsiksik sa mga kasulatan makatabang kanato nga makalikay sa pagkalingla.

Samtang gipangita sa mga estudyante ang mga baruganan nga sama sa nalista diha sa ibabaw, ikonsiderar ang paghatag sa follow-up nga mga pangutana aron matabangan sila sa paggamit sa mga baruganan diha sa ilang kinabuhi.

Sa unsang paagi makatabang kaninyo ang pagpakabuhi sumala niini nga baruganan?
Sa unsang paagi ang pagkasayud niini nga baruganan makatabang kaninyo sa pagtabang sa uban?
Sa unsa kahang paagi nga kamo maninguha sa paggamit niini nga baruganan diha sa inyong kinabuhi?

Dapita ang mga estudyante sa pagtubag sa mosunod nga pangutana diha sa ilang mga scripture study journal:

Unsa ang usa ka butang nga inyong sugdan og buhat (o padayunon sa pagbuhat) aron matabangan mo sa pagpangandam sa panahon kon ang usa ka tawo mohagit sa inyong hugot nga pagtuo?

Ipakigbahin ang imong pagpamatuod nga mahimo natong malampusong buntogon ang mga hagit sa atong hugot nga pagtuo samtang mosunod kita sa ehemplo ni Jacob sa pagsalig diha sa Ginoo.

Pagribyu sa Jacob

Paggahin og panahon nga tabangan ang mga estudyante sa pagribyu sa basahon ni Jacob. Hangyoa sila sa paghunahuna mahitungod sa unsay ilang nakat-unan gikan niini nga basahon, diha sa seminary ug diha sa ilang personal nga pagtuon sa kasulatan. Kon gikinahanglan, dapita sila sa pagsusi sa pito ka kapitulo sa Jacob aron matabangan sila nga makahinumdom. Hangyoa sila nga mangandam sa pagpakigbahin og usa ka butang mahitungod ni Jacob o sa iyang mga sinulat nga mipahinuklog kanila. Mahimo nimo silang pahinumduman nga natawo si Jacob didto sa kamingawan sa yuta sa Bountiful (duol sa Pulang Dagat) ug namatay siya didto sa yuta sa Nephi. Gipanalanginan usab siya ni Lehi (tan-awa sa 2 Nephi 2:1–4), ug nakita niya ang Manluluwas (tan-awa sa 2 Nephi 11:3). Ang iyang magulang nga lalaki nga si Nephi milakip sa pipila sa iyang mga wali diha sa gagmay nga mga palid (tan-awa sa 2 Nephi 6–10). Human sa igo nga panahon, dapita ang pipila ka mga estudyante sa pagpakigbahin sa ilang mga hunahuna ug mga pagbati. Ikonsiderar ang pagpakigbahin sa imong pagpamatuod mahitungod sa unsang paagi ang ehemplo ug mga pagtulun-an ni Jacob mipanalangin sa imong kinabuhi.

Komentaryo ug Background nga Impormasyon

Jacob 7:5. “Ug siya adunay paglaum sa pag-uyog kanako gikan sa hugot nga pagtuo”

Si Presidente Dieter F. Uchtdorf sa Unang Kapangulohan mihatag og tambag nga makatabang kanato nga masayud kon unsay buhaton sa dihang ang mga pangutana, mga kabalaka, o mga panghitabo mohulga sa pag-uyog kanato gikan sa hugot nga pagtuo:

“Unsa man ang mahitungod sa mga pagduhaduha ug mga pangutana? Unsaon ninyo pagsuta nga tinuod ang ebanghelyo? Husto ra ba nga adunay mga pangutana mahitungod sa Simbahan o sa mga doktrina niini? Akong minahal nga batan-ong mga higala, kita usa ka tigpangutana nga mga katawhan tungod kay nasayud kita nga ang pagpangutana modala ngadto sa kamatuoran. Mao kana ang paagi nga misugod ang Simbahan―gikan sa usa ka batan-ong lalaki kinsa adunay mga pangutana. Sa pagkatinuod, dili ko sigurado kon unsaon sa usa ka tawo pagdiskubre sa kamatuoran kon dili mangutana. Diha sa mga kasulatan talagsa ra kaayo kamo makadiskubre og pagpadayag nga wala miabut agig tubag ngadto sa usa ka pangutana. Sa matag higayon ang usa ka pangutana motungha ug dili sigurado si Joseph Smith sa tubag, nangutana siya sa Ginoo, ug ang mga resulta mao ang talagsaon nga mga pagpadayag diha sa Doktrina ug mga Pakigsaad. Kasagaran ang kahibalo nga nadawat ni Joseph milabaw pa kay sa orihinal nga pangutana. Kana tungod kay dili lamang makatubag ang Ginoo sa mga pangutana nga atong gipangutana apan, gani mas importante, makahatag Siya kanato og mga tubag ngadto sa mga pangutana nga angay unta natong gipangutana. Maminaw kita niadto nga mga tubag.

“Ang misyonaryo nga paningkamot sa Simbahan natukod diha sa matinuoron nga mga investigator nga nagpangutana og kinasingkasing nga mga pangutana. Ang pagpangutana mao ang sinugdanan sa pagpamatuod. Ang uban tingali mobati og kaulaw o nga dili takus tungod kay aduna silay seryuso nga mga pangutana mahitungod sa ebanghelyo, apan dili sila kinahanglan nga mobati sa ingon. Ang pagpangutana dili timailhan sa kahuyang; usa kini ka mag-una sa paglambo.

“Ang Dios nagsugo kanato nga tinguhaon ang mga tubag ngadto sa atong mga pangutana (tan-awa sa Santiago 1:5–6) ug naghangyo lamang nga magtinguha kita nga ‘kinasingkasing, uban sa tinuod nga katuyoan, nga may hugot nga pagtuo kang Kristo’ (Moroni 10:4). Kon mobuhat kita sa ingon, ang kamatuoran sa tanang butang mapahayag ngari kanato ‘pinaagi sa gahum sa Espiritu Santo’ (Moroni 10:5).

“Ayaw kahadlok; pangutana. Mahimong kuryuso, apan ayaw pagduhaduha! Kanunay nga maghupot og maayo sa hugot nga pagtuo ug sa kahayag nga inyo nang nadawat. Tungod kay dili hingpit ang atong panglantaw dinhi sa mortalidad, dili nato masabtan ang tanan karon. Sa pagkatinuod, naghunahuna ko nga kon masabtan nato ang tanan, ebidensya kini nga kining tanan gihimo-himo lamang pinaagi sa usa ka mortal nga hunahuna. Hinumdumi nga miingon ang Dios:

“‘Kay akong mga hunahuna dili mao ang inyong mga hunahuna, ni ang inyong mga dalan akong mga dalan. …

“‘Kay maingon nga ang mga langit hataas kay sa yuta, mao man ang akong mga dalan labi pang hataas kay sa inyong mga dalan, ug ang akong mga hunahuna kay sa inyong mga hunahuna” (Isaias 55:8–9).

“Bisan pa niana, nasayud kamo nga ang usa sa mga katuyoan sa mortalidad mao ang mahisama sa inyong Langitnong Amahan diha sa inyong mga hunahuna ug diha sa inyong mga pamaagi. Kon tan-awon gikan niini nga panglantaw, ang pagsiksik alang sa mga tubag ngadto sa inyong mga pangutana makapaduol kaninyo ngadto sa Dios, mopalig-on sa inyong pagpamatuod imbis nga mouyog niini. Tinuod nga ‘ang hugot nga pagtuo … dili hingpit nga kasayuran’ (Alma 32:21), apan samtang nagpakita kamo sa inyong hugot nga pagtuo, naggamit sa mga baruganan sa ebanghelyo matag adlaw ubos sa bisan unsa nga kahimtang, makatilaw kamo sa tam-is nga mga bunga sa ebanghelyo, ug pinaagi niini nga bunga masayud kamo sa katinuod niini (tan-awa sa Mateo 7:16–20; Juan 7:17; Alma 32:41–43)” (“The Reflection in the Water” [Fireside sa Church Educational System alang sa mga young adult, Nob. 1, 2009]).

Aron matabangan ang mga estudyante sa pagtubag sa mga pagkwestyon o mga pagsaway sa ilang hugot nga pagtuo, mahimo nimo silang i-refer ngadto sa mosunod nga mga kapanguhaan:

Robert D. Hales, “Kristohanon nga Kaisug: Ang Bugti sa Pagkadisipulo,” Ensign o Liahona, Nob. 2008, 72–75.

Dinhi niini nga pakigpulong sa kinatibuk-ang komperensya, mitudlo si Elder Hales kon unsaon nato pagtubag ang pagsaway o pagdaug-daug uban sa kaisug, pagkamatugtanon, ug gugma nga putli.
Matinud-anon sa Tinuhoan: Usa ka Pakisayran sa Ebanghelyo (2004).

Kini nga basahon naglangkob sa alpabetikal nga lista sa mga hilisgutan ug komentaryo sa ebanghelyo. Ang Unang Kapangulohan misulat nga ang usa ka katuyoan niini nga basahon mao ang pagtabang sa mga miyembro sa Simbahan nga “motubag sa mga pangutana kabahin sa Simbahan” (Matinud-anon sa Tinuhoan, 1).
www.lds.org/study/topics

Ang opisyal nga website sa Simbahan naglangkob og alpabetikal nga lista sa mga hilisgutan ug komentaryo sa ebanghelyo, uban ang mga link ngadto sa may kalabutan nga mga materyal sa pagtuon ug mga pakigpulong, mga artikulo, ug mga pamahayag sa mga lider sa Simbahan.