Leksyon 6

1 Nephi 1

Pasiuna

Ang Basahon ni Mormon nagsugod kang Lehi nga matinud-anong mituman sa iyang tahas isip usa ka propeta. Si Lehi mao ang usa sa “daghang mga propeta nga nanagna ngadto sa mga katawhan nga sila kinahanglan maghinulsol” (1 Nephi 1:4). Sa dihang nanagna siya sa kalaglagan sa Jerusalem ug mipamatuod sa katubsanan pinaagi sa Mesiyas, daghang mga tawo mibugal-bugal kaniya ug gusto nga mopatay kaniya. Bisan pa niana, si Lehi nagmaya sa kalooy sa Ginoo ug gahum sa kaluwasan. Samtang ang mga estudyante magkat-on sa pangalagad ni Lehi, molambo ang ilang pagsabut sa tahas sa mga propeta karon. Samtang mangita sila og ebidensya sa kalooy sa Dios ug tinguha sa ilang kinabuhi, ang ilang relasyon Kaniya molawom.

Kada adlaw nga pagtuon sa kasulatan

Makatabang ka sa mga estudyante nga matuman ang ilang tahas diha sa proseso pinaagi sa pag-awhag kanila sa pagtuon sa Basahon ni Mormon kada adlaw. Sa tibuok tuig, pagmainampoon sa pagkonsiderar og mga paagi sa pagtabang kanila nga makapalambo og kinaiya sa kada adlaw nga pagtuon sa kasulatan. Matag karon ug unya, mahimo nimong ipakigbahin ang imong pagpamatuod sa mga panalangin sa pagtuon sa Basahon ni Mormon kada adlaw.

Mga Sugyot alang sa Pagtudlo

1 Nephi 1:1–3

Gisugdan ni Nephi ang iyang rekord

Dapita ang mga estudyante sa pagbasa sa hilum sa 1 Nephi 1:1–3. Hangyoa sila sa pag-ila kon nganong misulat si Nephi sa iyang rekord.

• Unsa nga mga rason ang gihatag ni Nephi sa paghimo og rekord sa iyang mga kasinatian?

• Ngano sa inyong hunahuna nga gibati ni Nephi nga siya “gipangga sa Ginoo” bisan og siya nakasinati og “daghang mga kasakit”?

1 Nephi 1:4–20

Nakadawat si Lehi og panan-awon ug mipasidaan sa mga katawhan nga ang Jerusalem pagalaglagon

Dapita ang mga estudyante sa paghunahuna og higayon nga ang ilang mga ginikanan nagpasidaan nila sa kakuyaw.

• Ngano nga ang inyong mga ginikanan nagpasidaan ninyo sa kakuyaw?

• Sa unsa nga mga paagi ang Langitnong Amahan mopasidaan sa Iyang mga anak?

Ipasabut nga ang unang asoy sa Basahon ni Mormon nagsugod sa panahon sa dihang daghang mga tawo sa Jerusalem mga dautan. Dapita ang usa ka estudyante sa pagbasa sa 1 Nephi 1:4. Hangyoa ang klase sa pagpangita sa paagi sa pagpasidaan sa Ginoo sa mga katawhan sa Jerusalem.

Ikonsiderar ang paggamit niini nga hugna nga gikan sa Mga Video sa Basahon ni Mormon samtang nagtudlo niini nga bahin (tan-awa ang Mga Video sa Basahon ni Mormon: Mga Instruksyon sa Seminary Teacher).

Ipasabut nga ang amahan ni Nephi, nga si Lehi, giapil sa “daghan nga mga propeta” nga gihisgutan niini nga bersikulo. Iyang gipasidan-an ang mga katawhan nga sila kinahanglang maghinulsol. Sa pagtabang sa mga estudyante nga madiskobrehan ang mga pasidaan ug mga pagtulun-an ni Lehi, ipares-pares ang mga estudyante ug ipabasa sa matag pares ang 1 Nephi 1:5–13. Hangyoa sila sa pag-ila unsa ang nakita ni Lehi sa panan-awon, pinaagi sa pagmarka sa ilang mga kasulatan o paglista niini sa papel. Hatagi og pipila ka minuto ang matag pares sa paghisgot sa mosunod nga pangutana. (Mahimo nimong isulat kini nga pangutana diha sa pisara.)

• Unsay inyong bation kon kamo nakakita og panan-awon nga ang inyong siyudad pagalaglagon?

Human sa kalihokan, dapita ang mga estudyante sa pag-scan sa hilum sa 1 Nephi 1:15, mangita sa mga pagbati ni Lehi human sa iyang panan-awon.

• Unsa ang tubag ni Lehi sa mga butang nga iyang nakita?

Dapita ang usa ka estudyante sa pagbasa og kusog sa 1 Nephi 1:14–15. Awhaga ang klase sa pagpangita og mga rason ngano nga si Lehi nagmaya. (Mahimo nimong ipasabut nga bisan si Lehi nakahibalo nga ang Jerusalem pagalaglagon, nakita usab niya nga kadtong misalig sa Dios dili mawala.)

• Kanus-a kamo nakahimo sa pagdayeg sa Dios, bisan sa malisud nga panahon sa inyong kinabuhi?

• Unsa ang pipila ka mga panalangin sa pag-ila sa “kaayo ug kalooy” sa Ginoo atol sa malisud nga mga panahon?

Ipabasa og kusog sa usa ka estudyante ang mosunod nga pamahayag:

“Sama sa mga propeta sa karaan, ang mga propeta karon mopamatuod kabahin ni Jesukristo ug motudlo sa Iyang ebanghelyo. Gibutyag nila ang kabubut-on ug tinuod nga kinaiya sa Dios. Nagsulti sila sa maisugon ug klaro nga paagi, manghimaraut sa sala ug magpahimangno sa mga sangputanan niini. Usahay, mahimo nga gidasig sa pagpanagna sa umaabot nga mga panghitabo alang sa atong kaayohan” (Matinud-anon sa Tinuhoan: Usa ka Pakisayran sa Ebanghelyo [2004], 207).

Ipasabut og maayo nga si Lehi usa ka ehemplo sa kamatuoran nga ang mga propeta mopasidaan batok sa sala ug motudlo og kaluwasan pinaagi ni Jesukristo. (Mahimo nimong isulat kini nga kamatuoran sa pisara.)

Ikonsiderar ang paggamit niini nga hugna nga gikan sa Mga Video sa Basahon ni Mormon samtang nagtudlo niini nga bahin (tan-awa ang Mga Video sa Basahon ni Mormon: Mga Instruksyon sa Seminary Teacher).

Dapita ang mga estudyante sa pagbasa sa 1 Nephi 1:19–20.

• Unsa man ang gitudlo ni Lehi?

• Unsay reaksyon sa mga katawhan sa mga pagtulun-an ni Lehi?

• Ngano nga ang pipila ka mga tawo sa atong panahon misalikway sa mga mensahe gikan sa mga propeta sa Ginoo?

• Kanus-a kamo napanalanginan o naprotektahan tungod kay inyong gisunod ang propeta?

1 Nephi 1:20

Mipamatuod si Nephi sa mga kalooy sa Dios

Itudlo nga sa ikaduhang sentence sa 1 Nephi 1:20, si Nephi miputol sa iyang asoy aron sa pagpakigbahin sa usa ka mensahe niadtong mobasa sa iyang mga pulong. Ipabasa sa mga estudyante ang 1 Nephi 1:20 tagsa-tagsa, mangita sa mensahe nga gusto ni Nephi nga atong makita. Kon gikinahanglan, idirekta ang atensyon ngadto sa mga pulong nga gigamit ni Nephi sa pagtudlo sa mensahe (“Ako, si Nephi, mopakita kaninyo …”).

Pangitaa ang importante nga mga pulong

Usa ka paagi sa pagtabang sa mga estudyante nga makaangkon og mas maayo nga kasinatian sa ilang kada adlaw nga personal nga pagtuon sa kasulatan mao ang pagtudlo nila sa pagpangita sa importante nga mga pulong. Ang mga tagsulat sa Basahon ni Mormon sa kasagaran mogamit og importante nga mga pulong sa pagpasabut og maayo sa mga leksyon nga ilang gipaningkamutan nga itudlo o sa pag-summarize sa mga baruganan nga ilang gitudlo—mga pulong sama sa “Ako mopakita kaninyo,” “sa ingon kami nakakita,” ug “ako mamulong nganha kaninyo.” Awhaga ang mga estudyante sa paghatag og atensyon sa mga leksyon nga nag-uban sa maong mga pulong.

• Sa unsa nga paagi nga ang paghatag og atensyon niini nga matang sa mga pulong makatabang ninyo sa inyong tagsa-tagsa nga pagtuon sa Basahon ni Mormon?

• Unsay gusto ni Nephi nga ipakita nato?

Hangyoa ang usa ka estudyante sa pagbasa og kusog sa 1 Nephi 1:20. Dapita ang laing estudyante sa pagbasa sa Moroni 10:3. Hangyoa ang klase sa pagpangita og susama nga mga punto sa duha ka mga bersikulo.

• Unsa ang susama nga ideya nga gusto ni Nephi ug Moroni nga mamatikdan sa mga magbabasa sa Basahon ni Mormon?

Tabangi ang mga estudyante sa pag-ila niini nga baruganan: Ang malumo nga kalooy sa Ginoo ihatag ngadto niadtong kinsa magpakita og hugot nga pagtuo diha Kaniya. (Mahimo nimong isulat ang baruganan diha sa pisara.)

Aron matabangan ang mga estudyante nga makasabut kon unsa ang malumo nga mga kalooy sa Ginoo ug unsaon sa pag-ila niini sa ilang mga kinabuhi, ipakigbahin ang mosunod nga pamahayag ni Elder David A. Bednar sa Korum sa Napulog Duha ka mga Apostoles:

“Ang malumo nga mga kalooy sa Ginoo mao ang mismong personal ug sa tinagsa-tagsa nga mga panalangin, kalig-on, proteksyon, pagpasalig, paggiya, mahigugmaong kalooy, paghupay, pag-abag, ug espirituhanong mga gasa diin atong nadawat sa ug pinaagi ni Ginoong Jesukristo. …

“… Ang malumo nga mga kalooy sa Ginoo dili moabut nga sulagma lamang o dili ba nahiatol lang. Ang pagkamatinud-anon ug pagkamasulundon makapahimo kanato nga makadawat niining importanting mga gasa ug, sa kanunay, ang pagpahigayon sa Ginoo motabang kanato sa pag-ila niini.

“Dili gayud nato ipakaminos o ibalewala ang gahum sa malumong mga kalooy sa Ginoo” (“Ang Malumo nga mga Kalooy sa Ginoo,” Ensign o Liahona, Mayo 2005, 99–100).

• Giunsa ni Elder Bednar pagpasabut ang pulong “malumo nga mga kalooy sa Ginoo”?

• Unsa nga mga ehemplo sa malumo nga mga kalooy sa Ginoo ang inyong nakita nga gihatag nganha kaninyo o sa usa ka tawo nga inyong nailhan?

Human ang mga estudyante dunay panahon sa pagtubag niini nga mga pangutana, dapita sila sa pagkonsiderar kon sa unsa nga paagi sila mas makaila sa malumo nga mga kalooy sa Ginoo sa ilang kinabuhi. Awhaga sila nga mas mabinantayon sa malumo nga mga kalooy sa Ginoo nga gihatag nganha kanila. Mahimo nimong isugyot nga ilang irekord ang mga kasinatian sa malumo nga mga kalooy diha sa ilang personal nga mga journal. Ikonsiderar ang paghatag nila og panahon sa pagsulat diha sa ilang mga scripture study journal o mga class notebook mahitungod sa usa o duha ka mga paagi nga karong bag-o gihatag sa Ginoo ang Iyang malumo nga mga kalooy ngadto kanila.

Tapusa pinaagi sa pagsubli sa pagpamatuod ni Nephi sa 1 Nephi 1:20 kabahin sa malumo nga mga kalooy sa Ginoo. Ipakigbahin ang imong pagpamatuod sa katinuod sa indibidwal nga mga panalangin ug pag-amuma sa Ginoo. Awhaga ang mga estudyante sa pagpangita og mga ehemplo sa malumo nga mga kalooy sa Ginoo sa ilang kinabuhi ug sa tibuok Basahon ni Mormon.

Komentaryo ug Background nga Impormasyon

1 Nephi 1:2. “Ang pinulongan sa mga Ehiptohanon”

Miingon si Nephi nga iyang gihimo ang iyang rekord “sa pinulongan sa mga Ehiptohanon” (1 Nephi 1:2). Paglabay sa mga 470 ka tuig, si Haring Benjamin mitudlo sa iyang anak nga mga lalaki “sa pinulongan sa mga Ehiptohanon” (Mosiah 1:1–4). Ang pulong “inusab nga Ehiptohanon” makita sa Mormon 9:32. Gisulti ni Moroni nga sa iyang panahon nga mga 1,000 ka tuig gikan sa panahon nila ni Lehi ug Nephi, ang mga katawhan miusab sa Ehiptohanon ug Hebreohanon nga gigamit nila ni Lehi ug Nephi.

1 Nephi 1:4. “Daghang mga propeta”

Miingon si Nephi nga “daghang mga propeta” miabut taliwala sa mga katawhan sa Jerusalem. Nailhan nato sila si Jeremias, Abdias, Nahum, Habacuc, ug Sofonias kadungan-dungan nga mga propeta kinsa nagpamatuod sa Gingharian ni Juda. Ang Jeremias 35:15 naglakip sa susama nga komentaryo mahitungod sa daghang mga propeta nga gipadala sa Ginoo sa pagpasidaan sa mga katawhan (tan-awa usab sa 2 Cronicas 36:15–16).

Si Jeremias usa ka bantugan nga propeta sa panahon nila ni Lehi ug Nephi ug gihisgutan sa 1 Nephi 5:13 ug 7:14. Nangalagad siya ngadto sa mga Judeo gikan sa 626 B.C. hangtud 586 B.C. Dili sama ni Lehi, si Jeremias nagpabilin sa Jerusalem ug nagpadayon sa pagtawag sa mga katawhan sa paghinulsol (tan-awa sa Giya ngadto sa mga Kasulatan, “Jeremias”). Human mibiya si Lehi sa Jerusalem, si Jeremias gipriso. Samtang diha sa prisohan, gisulat niya ang basahon sa Lamentaciones, diin siya nagsubo sa kalaglagan sa Jerusalem ug sa kamatuoran nga ang mga katawhan wala maghinulsol.

Dugang nga mga Ideya sa Pagtudlo

1 Nephi 1:2–3, 20. Pagrekord sa malumo nga mga kalooy sa atong kinabuhi

• Unsa ang bili sa pagrekord sa inyong mga kasinatian diha sa usa ka journal?

Si Nephi mipamatuod sa malumo nga mga kalooy sa Dios sa iyang kinabuhi. Mitudlo siya nga kadtong adunay hugot nga pagtuo kang Jesukristo makasinati sa mao nga mga panalangin. Si Presidente Henry B. Eyring sa Unang Kapangulohan mihulagway sa usa ka panahon sa dihang siya naaghat sa pagsulat sa mga ebidensya sa kaayo sa Dios ngadto sa iyang pamilya:

“Dugay akong nakauli gikan sa usa ka buluhaton sa Simbahan. Mingitngit na. Ang akong ugangang lalaki, kinsa nagpuyo duol namo, misurprisa kanako samtang naglakaw ako padulong sa atubangang pultahan sa akong balay. Nagpas-an siya og mga tubo, kusog kaayong naglakaw ug nagsul-ob sa iyang saput pangtrabaho. Nasayud ko nga siya naghimo og sistema sa pagbomba og tubig gikan sa usa ka tubod sa ubos namo padulong sa among yuta.

Siya mipahiyom, hinay nga misulti, ug unya nagdaling miagi nako ngadto sa kangitngit aron magpadayon sa iyang gibuhat. Mipaduol ako sa balay og pipila ka lakang, naghunahuna sa unsay iyang gihimo alang kanamo, ug sa akong pag-abut sa pultahan, akong nabati sa akong hunahuna—ang dili akong kaugalingon nga tingog—kining mga pulonga: “Wala nako gihatag kanimo kining kasinatian alang sa imong kaugalingon. Isulat kini.’

“Misulod ako. Wala ako mohigda. Bisan gikapoy ako, mikuha ko og pipila ka papel ug misugod sa pagsulat. Ug sa akong pagsulat, akong nasabtan ang mensahe nga akong nadungog sa akong hunahuna. Angay nakong irekord aron adunay mabasa ang akong mga anak, sa umaabut nga mga adlaw, giunsa pagpanalangin sa Dios ang akong pamilya. …

“Nagsulat ako og pipila ka mga linya matag adlaw sulod sa mga katuigan. Wala akoy gisal-angan nga adlaw bisan unsa ako kakapoy o unsa ako kasayo mosugod pagkaugma. Sa dili pa ako mosulat, ako mamalandong niini nga pangutana: ‘Nakita ba nako ang kamot sa Dios nga nagkab-ot aron paghikap kanamo o sa among mga anak o sa among pamilya karon?’ Samtang nagpadayon ako sa paghimo niini, adunay butang nga misugod og hitabo. Samtang naghanduraw sa nanghitabo sulod nianang adlawa, akong nakita ang timaan sa unsay gibuhat sa Dios alang sa usa kanamo nga wala nako namatikdi sa kabise nianang adlawa. (“O Hinumdumi, Hinumdumi,” Ensign o Liahona, Nob. 2007, 66–67).

1 Nephi 1:4–20. Mga kapareho tali ni Lehi ug Joseph Smith

Dapita ang mga estudyante sa pagbasa sa 1 Nephi 1:4–20, mangita sa dagko nga mga panghitabo gikan sa panahon sa kinabuhi ni Lehi. Dayon hangyoa sila pagribyu sa Joseph Smith—Kasaysayan 1:1–35, mangita sa dagkong mga panghitabo sa kinabuhi ni Propeta Joseph Smith. Hangyoa ang mga estudyante sa pagpangita sa mga kapareha tali sa kinabuhi ni Lehi ug Joseph Smith. (Mga tubag mahimong maglakip nga ang duha nagtinguha sa Dios pinaagi sa sinsero nga pag-ampo, nakakita sa Amahan ug sa Anak, misulti sa uban sa ilang mga panan-awon, gisalikway sa daghang mga tawo, gihulga ang ilang mga kinabuhi, kinahanglang mobalhin ngadto sa bag-ong mga lugar, ug miuna sa Dios ibabaw sa kalibutanon nga mga kabtangan ug sa pagdayeg sa kalibutan.)