Leksyon 91

Alma 33

Pasiuna

Usa ka grupo sa mga Zoramite nagtinguha nga masayud kon unsaon pagsunod sa tambag ni Alma sa pagtanom sa pulong sa Ginoo diha sa ilang mga kasingkasing ug sa pagbansay og hugot nga pagtuo. Gamit ang mga kasulatan, si Alma mitudlo sa mga tawo mahitungod sa pagsimba, pag-ampo, ug ang kalooy nga atong madawat gikan sa Dios tungod sa Manluluwas. Siya miawhag sa mga tawo sa pagtan-aw kang Jesukristo ug sa pagtuo diha sa gahum sa Iyang Pag-ula.

Pahinumdom: Ang leksyon 94 naghatag og oportunidad alang sa tulo ka estudyante sa pagtudlo. Mahimo ka nga magpili og tulo ka mga estudyante karon ug hatagi sila og mga kopya sa gitagana nga porsyon sa leksyon 94 aron sila makapangandam. Awhaga sila nga tun-an ang materyal sa leksyon sa mainampoong paagi ug tinguhaon ang giya sa Espiritu Santo aron sila makahibalo unsaon sa pagpahiangay sa leksyon ngadto sa mga panginahanglan sa ilang mga kaklase.

Mga Sugyot alang sa Pagtudlo

Alma 33

Si Alma nagtudlo sa mga Zoramite nga magsugod sa pagtuo diha kang Jesukristo

Isulat ang pagbansay diha sa pisara.

• Unsa ang buot ipasabut sa pagbansay sa usa ka butang? (Samtang motubag ang mga estudyante niining pangutana, mahimo kang mangutana sa usa ka estudyante aron mapakita kon unsaon sa pagbansay ang iyang mga bukton, tingali pinaagi sa mga push-up, o sa iyang mga bitiis, tingali sa pagdagan diha sa gibarugan.)

Ipabasa sa mga estudyante sa hilum ang Alma 33:1, nga motino sa pagbansay nga gustong masabtan sa mga Zoramite. Human makareport ang mga estudyante kon unsa ang ilang nakit-an, isulat ang mosunod nga pangutana diha sa pisara: Unsaon nato pagbansay ang atong hugot nga pagtuo? Dapita ang mga estudyante sa pagpangita og bisan tulo lang ka tubag niining pangutana samtang sila magtuon ug maghisgot sa Alma 33.

Ipasabut nga samtang si Alma misugod sa pagtubag sa pangutana sa mga Zoramite kon unsaon sa pagbansay sa hugot nga pagtuo, siya mikorihir sa ilang sayop nga ideya mahitungod sa pagsimba. Dapita ang usa ka estudyante sa pagbasa og kusog sa Alma 33:2. Hangyoa ang klase nga pangitaon ang sayop nga ideya sa mga Zoramite mahitungod sa pagsimba sa Dios.

• Ngano nga kining mga Zoramite naghunahuna nga sila dili makasimba sa Dios? (Tungod kay sila wala tuguti sa ilang mga sinagoga.)

Hangyoa ang mga estudyante sa pag-summarize sa ilang nakat-unan sa Alma 31 mahitungod sa matang sa pagsimba sa mga Zoramite. (Tan-awa sa Alma 31:22–23. Ang mga Zoramite mihalad og sama nga pag-ampo kausa matag semana diha sa sinagoga, ug sila dili na gayud mohisgot sa Dios pag-usab atol sa tibuok semana.)

• Nganong ang pagtambong sa Simbahan importanting bahin sa atong pagsimba? Unsa ang pipila ka paagi nga kita makasimba sa Dios agi og dugang sa pagtambong sa atong sinemana nga mga miting sa Simbahan?

Ipasabut nga si Alma mikutlo og mga pagtulun-an sa usa ka propeta nga ginganlan og Zenos sa pagkorihir sa sayop nga mga ideya sa mga Zoramite kabahin sa pagsimba sa Dios. Hangyoa ang mga estudyante sa pagbasa sa hilum sa Alma 33:3, nga mangita sa pulong nga gigamit ni Alma nga ikapuli sa pagsimba. (Ang pulong mao ang pag-ampo.)

Dapita ang mga estudyante sa pagbasa sa hilum sa Alma 33:4–10, sa pag-ila sa matag sirkumstansya diin miingon si Zenos nga siya nag-ampo.

• Kanus-a ug diin si Zenos nag-ampo?

• Unsa ang gitudlo ni Alma kabahin sa pagsimba sa dihang siya mikutlo sa mga pulong ni Zenos? (Tabangi ang mga estudyante sa pag-ila sa mosunod nga kamatuoran: Makapadayon kita sa pagsimba sa Dios pinaagi sa pag-ampo.)

I-refer ngadto sa pangutana diha sa pisara: Unsaon nato sa pagbansay ang hugot nga pagtuo? Sa ubos niana nga pangutana, isulat ang Pag-ampo kanunay.

• Sa unsang paagi nga ang pag-ampo usa ka pagbansay sa hugot nga pagtuo sa Langitnong Amahan ug ni Jesukristo?

• Kanus-a kamo nag-ampo sa usa ka sitwasyon sama niadtong nahisgutan ni Zenos? Sa unsang paagi gidungog ang inyong pag-ampo? (Pahinumdumi ang mga estudyante nga dili nila kinahanglan nga ipakigbahin ang mga kasinatian nga personal o pribado kaayo.)

Dapita ang mga estudyante sa pagribyu sa hilum sa Alma 33:4–5, 8–9. Hangyoa sila sa pagpangita sa mga pulong nga naghisgot sa kalooy sa Dios (sama sa “ikaw maloloy-on” ug “ikaw nagmaloloy-on”).

Aron matabangan ang mga estudyante nga makita ang koneksyon tali sa Pag-ula ni Jesukristo ug sa kalooy sa Langitnong Amahan, dapita ang usa ka estudyante sa pagbasa og kusog sa Alma 33:11–16. Hangyoa ang klase sa pagsunod, nga mangita sa mga pulong nga makita sa kaupat ka higayon dinhi niining mga bersikulo. (Ang mga pulong mao ang “tungod sa imong Anak.” Mahimo nimong awhagon ang mga estudyante nga markahan kini nga mga pulong.)

Pag-ila sa nagbalik-balik nga mga pulong

Ang mga propeta kanunay nga mihatag og gibug-aton sa kamatuoran pinaagi sa pagbalik-balik. Samtang ang mga estudyante makadiskubre sa gibalik-balik nga mga pulong, ug mga ideya, hangyoa sila sa pagkonsiderar unsa nga kamatuoran ang gitudlo sa tigsulat ug nganong importante nga masabtan kini.

• Unsa kaha ang gipasabut ni Zenos sa dihang siya miingon, “Ikaw milikay sa imong mga paghukom gikan kanako, tungod sa imong Anak”? (Tabangi ang mga estudyante sa pag-ila sa mosunod nga kamatuoran: Atong madawat ang kalooy sa Langitnong Amahan, lakip sa kapasayloan alang sa atong mga sala, tungod sa Pag-ula ni Jesukristo. Mahimo nimong dapiton ang mga estudyante sa pagsulat niining kamatuoran diha sa ilang mga kasulatan duol sa Alma 33:11–16.)

Aron matabangan ang mga estudyante nga mas makasabut sa kalooy nga atong madawat pinaagi sa Pag-ula ni Jesukristo, ikonsiderar ang pagpakigbahin sa mosunod nga istorya nga gikutlo ni Presidente Gordon B. Hinckley:

President Gordon B. Hinckley

“Ang magtutudlo miingon, ‘Maayong buntag, mga bata, mianhi kita aron ipahigayon ang pag-eskwela.’ Sila naninggit ug ilang gikataw-an og maayo. ‘Karon, gusto ko og maayo nga pag-eskwela, apan motug-an ko nga ako wala masayud unsa nga paagi gawas kon inyo kong tabangan. Unsa kaha kon kita adunay pipila ka mga lagda. Sultihi ko ninyo, ug akong isulat kini sa pisara.’

“Usa ka kauban misinggit, ‘Walay mangawat!’ Lain ang misinggit, ‘Moabut sa hustong oras.’ Sa katapusan, ang napulo ka mga lagda makita diha sa pisara.

“‘Karon,’ miingon ang magtutudlo, ‘ang balaod dili maayo gawas kon adunay usa ka silot nga kauban. Unsay atong buhaton sa usa nga mosupak sa mga lagda?

“‘Latuson siya sa buko-buko og napulo ka higayon nga walay kupo,’ maoy tubag sa klase.

“‘Bug-at ra kana, mga bata. Sigurado ba kamo nga andam kamo nga barugan kini?’ May laing misinggit, ‘Mouyon ko’, ug ang magtutudlo miingon, ‘Sige, ato kining sundon nga lagda! Class, paghilum ug paminaw!’

“Usa ka adlaw niana, nahibaloan ni ‘Big Tom’ nga gikawat ang iyang balon alang sa paniudto. Ang nangawat nakit-an—usa ka gamayng gutom nga bata, mga dyes anyos ang edad. ‘Atong nakit-an ang nangawat ug kinahanglan siyang silutan sumala sa inyong lagda—napulo ka mga latos sa buko-buko. Jim, duol nganhi!’ miingon ang magtutudlo.

“Ang gamayng bata, nagkurog, hinayng miduol nga nagsul-ob og dakong kupo nga gihigot hangtud sa iyang liog ug mihangyo, ‘Titser, mahimo ko nimong latuson og maayo kutob sa imong gusto, apan palihug, ayaw tangtanga ang akong kupo!’ [Pahinumdom: Mahimong gikinahanglan nimong ipasabut nga ang pulong latos nagpasabut nga bunalan ang usa ka tawo.]

“‘Huboa ang imong kupo,’ miingon ang magtutudlo. ‘Mitabang ka sa paghimo sa mga lagda!’

“‘O, titser, ayaw ko pahuboa!’ Misugod siya sa pagtangtang sa butones, ug unsa ang nakita sa magtutudlo? Ang batang lalaki walay gisul-ob nga kamisin, ug nakita ang bukogon nga piang nga lawas.

“‘Unsaon man nako sa paglatos niining bataa?’naghunahuna siya. ‘Apan kinahanglan gayud nakong buhaton, kinahanglan gayud nga duna koy buhaton kon akong ipabiling hapsay kining eskwelahan.’ Ang tanan nahilum.

“‘Nganong wala kay gisul-ob nga kamisin, Jim?’

“Mitubag siya, ‘Ang akong amahan namatay ug ang akong inahan hilabihan ka kabus. Aduna lang koy usa ka kamisin ug gilabhan pa kini ni mama karon, ug akong gisul-ob ang dako nga kupo sa akong magulang nga lalaki aron mainitan ko.’

“Ang magtutudlo, naggunit sa bunal, nagduha-duha. Nianang higayuna si ‘Big Tom’ mibarug ug miingon, ‘Titser, kon dili ka mobalibad, ako ang modawat sa pagbunal alang ni Jim.’

“‘Maayo kaayo, dunay usa ka piho nga balaod nga usa ka tawo mahimong ipuli sa lain. Mouyon ba kamong tanan?’

“Gihubo ang kupo ni Tom, ug human sa lima ka latos nabali ang bunal! Ang magtutudlo miduko ug naghunahuna, ‘Unsaon ko man pagtapos niining mangil-ad nga tahas?’ Dayon nakadungog siya sa klase nga nagbakho, ug unsay iyang nakita? Ang gamayng bata nga si Jim miduol ug migakos ni Tom. ‘Tom, pasayloa ko nga gikawat nako ang imong balon, apan gigutom ko pag-ayo. Tom, higugmaon ko ikaw hangtud sa akong kamatayon tungod sa pag-angkon sa pagbunal nga para unta nako! Oo, ako mohigugma nimo hangtud sa kahangturan!’” [Tagsulat wala mailhi.]

Human sa pagkutlo niini nga istorya, si Presidente Hinckley miingon, “Sa paggamit og usa ka pulong gikan niining yano nga istorya, si Jesus, akong Manunubos, nagkuha sa ‘paglatos nga para unta nako’ ug sa inyo nga alang unta kaninyo” (“The Wondrous and True Story of Christmas,” Ensign, Dis. 2000, 4).

• Unsay kalabutan niini nga istorya sa mga pagtulun-an ni Alma kabahin sa Pag-ula sa Manluluwas? (Kon gikinahanglan, ipasabut nga ang pagkaandam ni Tom sa “pagkuha sa paglatos ni Jim” nagrepresentar sa Pag-ula. Ang Manluluwas midala sa silot alang sa atong mga sala diha sa Iyang kaugalingon aron dili kita moantus niana nga silot kon kita maghinulsol.)

Ipasabut nga human sa pagkutlo sa mga pulong ni Zenos, si Alma mikutlo sa mga pulong ni Zenock, laing propeta. Basaha og kusog ngadto sa mga estudyante ang Alma 33:15–16. Ipasabut og maayo ang kaguol sa Langitnong Amahan kon ang mga tawo dili mosabut sa unsay nabuhat sa Iyang Anak alang kanila.

Hangyoa ang mga estudyante sa pagbasa sa hilum sa Alma 33:12–14, nga mangita sa mga kapanguhaan nga gigamit ni Alma sa dihang siya mipakigbahin niining mga pagtulun-an.

• Nganong si Alma pamilyar sa mga pulong ni Zenos ug Zenock? (Tungod kay ang mga pulong anaa sa mga kasulatan. Mahimo nimong ipasabut nga ang mga pulong ni Alma sa bersikulo 12 ug 14 nagsugyot nga ang mga Zoramite migamit usab niining mga kasulatan. Ipasabut og maayo nga ang mga kasulatan nagpamatuod ni Jesukristo.)

Sa ubos sa pangutana diha sa pisara, isulat ang Magtuon ug motuo sa mga kasulatan.

Moses and the Brass Serpent

Ipasabut nga si Alma mi-refer ngadto sa lain nga istorya sa kasulatan aron sa pagtabang sa mga Zoramite nga makaugmad og hugot nga pagtuo kang Jesukristo. Ipakita ang litrato nga Moises ug ang Tumbaga [Brass] nga Bitin (62202; Libro sa mga Hulagway sa Ebanghelyo [2009], nu. 16). I-summarize kini nga istorya pinaagi sa pagpasabut nga dihang si Moises nangulo sa mga Israelite didto sa kamingawan, daghang katawhan ang misugod sa pagrebelde batok kaniya ug sa Ginoo. Agi og tubag niining kamasinupakon, ang Ginoo mipadala sa malala nga mga bitin nga mipaak sa mga tawo. Ang katawhan miadto kang Moises alang sa tabang. Si Moises nag-ampo ug gitudloan sa paghimo og usa ka bitin nga ibutang sa tumoy sa sungkod aron ipatan-aw sa mga tawo. Misunod siya, naghimo og usa ka bitin nga ginama sa tumbaga. (Tan-awa sa Numeros 21:4–9.) Ipabasa og kusog sa usa ka estudyante ang Alma 33:19–20. Dapita ang klase sa pag-ila unsay nahitabo niadtong mitan-aw sa bitin nga tumbaga ug unsay nahitabo niadtong kinsa mipili nga dili motan-aw.

• Sumala sa Alma 33:20, nganong daghan ang mipili nga dili motan-aw?

Hangyoa ang mga estudyante sa pagpamalandong kon sila mopili sa pagtan-aw kon anaa pa sila nianang sitwasyon.

The Crucifixion

Ipakita ang litrato sa Ang Paglansang sa Krus (62505; Libro sa mga Hulagway sa Ebanghelyo, nu. 57). Ipasabut nga ang bitin nga tumbaga diha sa sungkod usa ka “hulagway” (Alma 33:19). Sa laing pagkasulti, usa kini ka simbolo sa usa ka butang nga mahitabo sa umaabut. Kini nagrepresentar ni Jesukristo diha sa krus (tan-awa sa Juan 3:14).

Hangyoa ang mga estudyante sa pagbasa sa hilum sa Alma 33:21–23, nga mangita kon giunsa ni Alma sa pagpahisama niini nga istorya ngadto sa mga Zoramite. Human ang mga estudyante makareport kon unsa ang ilang nadiskubrihan, i-refer og usab ngadto sa pangutana diha sa pisara: Unsaon nato pagbansay ang atong hugot nga pagtuo?

• Unsa ang gitudlo sa istorya sa mga Israelite ug sa bitin nga tumbaga mahitungod sa unsa gayud ang atong buhaton aron mamaayo sa espirituhanong paagi?

• Giunsa pagtubag sa Alma 33:22–23 niining pangutana? (Ang mga estudyante kinahanglang mahibalo sa mosunod nga kamatuoran: Mabansay nato ang atong hugot nga pagtuo pinaagi sa pagpili nga motuo ni Jesukristo ug sa Iyang Pag-ula.)

Ubos sa pangutana diha sa pisara, isulat ang Nagtuo kang Jesukristo ug sa Iyang Pag-ula.

• Unsa nga mga buhat o kinaiya ang inyong nakita sa mga tawo kinsa nagtuo sa Pag-ula sa Manluluwas?

Aron mapasabut og maayo nga ang pagtuo diha kang Jesukristo usa ka pagpili nga atong himoon, idirekta ang atensyon sa mga estudyante sa mosunod nga mga pulong sa Alma 33:23: “Ug gani kining tanan kamo makabuhat kon kamo buot.” Mahimo nimong awhagon nga markahan sa mga estudyante kini nga mga pulong.

Isulat sa pisara ang mosunod nga pamahayag, ug ikonsiderar ang pag-awhag sa mga estudyante nga isulat kini sa ilang mga kasulatan. (Ang pamahayag makita diha sa “Inquire of the Lord” [pakigpulong sa mga CES religious educator, Peb. 2, 2001], 1, si.lds.org.)

“Ang matag bata sa matag henerasyon magpili sa pagtuo o kawalay pagtuo. Ang hugot nga pagtuo dili usa ka kabilin; kini pilion” (Presidente Henry B. Eyring).

Hangyoa ang mga estudyante sa pagtubag sa usa sa mosunod nga mga pangutana diha sa ilang mga notebook o scripture study journal. (Mahimo nimong isulat kini nga mga pangutana diha sa pisara sa dili pa magklase, pag-andam og handout nga dunay mga pangutana, o basaha og hinay ang mga pangutana aron masulat kini sa mga estudyante.)

• Sa unsang paagi nga ang inyong pagpili nga motuo sa Manluluwas nakaimpluwensya sa inyong inadlaw-adlaw nga kinabuhi?

• Sa unsang paagi nga ang personal nga pagtuon sa kasulatan mipalig-on sa inyong pagtuo sa Langitnong Amahan ug ni Jesukristo?

• Sa unsang paagi nga ang inadlaw-adlaw nga personal nga pag-ampo ug pagsimba nakapalig-on sa inyong pagtuo sa Langitnong Amahan ug ni Jesukristo?

• Unsa ang inyong gibati nga gustong ipabuhat sa Langitnong Amahan aron kamo makabansay og mas dakong pagtuo?

Dapita ang pipila ka mga estudyante sa pagpakigbahin sa ilang mga tubag. Ipamatuod ang kaimportante sa pagpili nga motuo sa Manluluwas.