Leksyon 11: 1 Nephi 7

Leksyon 11

1 Nephi 7

Pasiuna

Ang 1 Nephi 7 naglakip sa mga ehemplo sa pagkamahalaron ni Nephi ngadto sa Dios. Si Nephi misunod sa dihang ang Ginoo misugo kaniya ug sa iyang mga igsoong lalaki sa pagbalik sa paghangyo ni Ishmael ug sa iyang pamilya sa pag-apil kanila sa kamingawan aron sila makaminyo ug makaanak. Bisan sila si Laman ug Lemuel misukol batok ni Nephi ug misulay sa pagpatay kaniya, nagpabilin siya nga matinud-anon ug misulay sa pagtabang nila nga mahimong magmatinud-anon usab.

Mga Sugyot alang sa Pagtudlo

1 Nephi 7:1–5

Ang Ginoo misugo ni Nephi sa pagbalik ngadto sa Jerusalem alang kang Ishmael ug sa iyang pamilya

Ipakita ang litrato sa minyo nga magtiayon ug sa ilang mga anak. (Mahimo nimo gamiton ang litrato sa imong kaugalingong pamilya.)

Dapita ang usa ka estudyante sa pagbasa og kusog sa 1 Nephi 7:1–2.

Unsa ang gisugo sa Ginoo nga buhaton sa mga anak nga lalaki ni Lehi? Unsa nga kamatuoran ang atong makat-unan gikan niini nga sugo? (Siguroha nga ang mga estudyante nakasabut nga ang Ginoo misugo nato sa pagminyo ug sa pagpamatuto og mga anak ngadto Kaniya.)

Ikonsiderar ang paggamit niini nga hugna nga gikan sa Mga Video sa Basahon ni Mormon samtang nagtudlo niini nga bahin (tan-awa ang Mga Video sa Basahon ni Mormon: Mga Instruksyon sa Seminary Teacher).

Pahinumdumi ang mga estudyante nga molungtad og pipila ka adlaw sa malisud nga panaw agi sa kamingawan aron si Nephi ug ang iyang mga igsoon lalaki makabalik ngadto sa Jerusalem.

Ngano nga ang kaminyoon ug pamilya importante kaayo alang ni Nephi ug sa iyang mga igsoong lalaki nga mopanaw balik ngadto sa Jerusalem aron ikahimamat si Ishmael ug ang iyang pamilya?

Sa dili pa mopadayon, mahimo nimong hatagan ang matag estudyante og kopya sa “Ang Pamilya: Usa ka Pamahayag ngadto sa Kalibutan” o ipapakli nila ang kopya sa pamahayag diha sa ilang mga scripture study journal.

Paggamit sa pamahayag sa pamilya

Si Sister Julie B. Beck, kinatibuk-ang presidente sa Relief Society, miawhag sa mga magtutudlo sa seminary ug institute sa pagtudlo mahitungod sa kaimportante sa mga pamilya ug sa paggamit sa pamahayag sa pamilya sa ilang mga leksyon:

“Sa Simbahan, ang nag-unang panginahanglan mao ang pagtudlo … sa mga baruganan sa pamilya, sa mga baruganan nga motudlo sa [mga estudyante] sa paghimo og pamilya, sa pagtudlo niana nga pamilya, ug sa pag-andam niana nga pamilya alang sa mga ordinansa ug mga pakigsaad. …

“…Kon ikaw nagtudlo nila, imong ikasumpay ang mga pagtulun-an ngadto sa importante nga mga pamahayag ug mga pulong nga anaa sa pamahayag sa pamilya. Ang pamahayag dili usa ka nagbinugtong nga leksyon” (“Teaching the Doctrine of the Family” [Seminaries and Institutes of Religion satellite broadcast, Ago. 4, 2009], 5, si.lds.org).

Hangyoa ang usa ka estudyante sa pagbasa og kusog sa mosunod nga pamahayag gikan sa “Ang Pamilya: Usa ka Pamahayag ngadto sa Kalibutan.” Dapita ang mga estudyante sa pagpaminaw pag-ayo ug pag-ila kon unsay gipamahayag sa mga propeta sa ulahing mga adlaw mahitungod sa kaimportante sa kaminyoon.

“Kami, ang Unang Kapangulohan ug Konseho sa Napulog Duha ka mga Apostoles sa Ang Simbahan ni Jesukristo sa mga Santos sa Ulahing mga Adlaw, sa maligdong nga paagi mopahayag nga ang kaminyoon tali sa usa ka lalaki ug usa ka babaye gi-orden sa Dios ug ang pamilya mahinungdanon ngadto sa plano sa Tiglalang alang sa walay katapusan nga destinasyon sa Iyang mga anak” (“Ang Pamilya: Usa ka Pamahayag ngadto sa Kalibutan,” Liahona, Nob. 2010, 129).

Dapita ang pipila ka estudyante sa pagpakigbahin unsay ilang nakat-unan gikan niini nga pamahayag. Siguroha nga sila nakasabut nga ang pamilya mao ang sentro sa plano sa Tiglalang alang sa atong mahangturong kapalaran. Ipasabut og maayo nga mao kini ang rason nga gisugo sa Ginoo si Nephi ug ang iyang mga igsoong lalaki sa pagdapit sa pamilya ni Ishmael sa pag-uban kanila. Ipasabut usab nga usa sa labing importante nga mga rason alang sa kaminyoon mao ang pagdala og mga anak dinhi sa kalibutan.

Unsa sa inyong hunahuna ang gipasabut sa pagpasanay og mga anak “ngadto sa Ginoo”? (1 Nephi 7:1).

Human makatubag ang mga estudyante niini nga pangutana, awhaga sila sa pagpaminaw sa dugang nga mga pagpasabut samtang imong basahon ang mosunod nga pamahayag gikan sa pamahayag sa pamilya. Kon sila dunay ilang kaugalingong mga kopya sa pamahayag, mahimo kang mosugyot nga ilang markahan ang mga pulong nga importante ngadto kanila.

“Kami mopahayag nga ang sugo sa Dios alang sa Iyang mga anak sa pagdaghan ug pagpuno sa yuta nagpabilin nga ipatuman. …

“… Ang mga ginikanan adunay sagrado nga katungdanan sa pag-amuma sa ilang mga anak sa paghigugma ug pagkamatarung, sa pagsangkap alang sa ilang pisikal ug espirituhanon nga mga panginahanglan, ug sa pagtudlo kanila sa paghigugma ug pag-alagad sa usag usa, pagsunod sa mga sugo sa Dios, ug kinsa mosunod sa mga balaod sa ilang nasud bisan asa sila magpuyo. Mga bana ug mga asawa—mga inahan ug mga amahan—adunay tulubagon sa atubangan sa Dios sa pagtuman niini nga mga kapangakohan.” (“Ang Pamilya: Usa ka Pamahayag ngadto sa Kalibutan,” 129).

Dapita ang usa ka estudyante sa pagbasa og kusog sa 1 Nephi 7:3–5.

Sa unsa nga paagi nga ang asoy sa 1 Nephi 7:3–5 usa ka ehemplo sa kamatuoran sa 1 Nephi 3:7? (Tabangi ang mga estudyante nga makakita nga ang Ginoo miandam og paagi alang ni Nephi ug sa iyang mga igsoong lalaki sa pagsunod sa sugo sa pagminyo ug pagbaton og mga anak.)
Sa unsa nga paagi ang mga kabatan-onan makaandam karon sa pagminyo ug “pagpamatuto” og mga anak diha sa ebanghelyo?

1 Nephi 7:6–15

Nag-atubang sa pagsukol nila ni Laman ug Lemuel, si Nephi mipamatuod sa gahum sa Ginoo sa paggiya kanila ngadto sa yuta sa saad

Dapita ang usa ka estudyante sa pagbasa og kusog sa 1 Nephi 7:6–7.

Ngano nga sila si Laman, Lemuel, ug ubang mga anak ni Ishmael misukol panahon sa ilang panaw sa kamingawan?

Awhaga ang mga estudyante sa paghunahuna mahitungod sa unsay ilang ikasulti ngadto nila ni Laman, Lemuel, ug sa masukulon nga mga anak nga lalaki ug babaye ni Ishmael sa pagdani kanila sa pagpadayon sa ilang panaw ngadto sa yuta sa saad. Dayon hangyoa ang mga estudyante sa pagbasa sa hilum sa 1 Nephi 7:8–12 ug ipapangita ang mga pangutana nga gipangutana ni Nephi ngadto nila ni Laman ug Lemuel.

Unsa nga mga kamatuoran ang gipakigbahin ni Nephi samtang siya nangutana niini nga mga pangutana? (Siya mipahinumdom sa iyang mga igsoong lalaki sa mga panalangin nga ila nang nadawat gikan sa Ginoo ug ang abilidad sa Ginoo sa pagpadayon sa pagpanalangin kanila sumala sa ilang hugot nga pagtuo.)
Nganong importante man alang kanato nga mohinumdom niining mga kamatuoran?

Dapita ang mga estudyante sa pagbasa sa 1 Nephi 7:13–15 ug ipapangita ang mga sangputanan kon sila si Laman, Lemuel, ug ang masukulon nga mga anak nga lalaki ug babaye ni Ishmael mibalik pa ngadto sa Jerusalem.

1 Nephi 7:16–22

Si Nephi giluwas sa Ginoo

Ipasabut nga human makapahinumdom si Nephi nila ni Laman ug Lemuel sa kalaglagan nga moabut niadtong atua sa Jerusalem, nasuko sila kaniya.

Dapita ang usa ka estudyante sa pagbasa og kusog sa 1 Nephi 7:16. Hangyoa ang klase sa paghunahuna nga anaa sila sa sitwasyon ni Nephi.

Unsay inyong bation kon kamo pa ang anaa sa sitwasyon ni Nephi? Unsa ang inyong buhaton?

Itudlo nga si Nephi mitubag niini nga sitwasyon pinaagi sa pag-ampo alang sa panabang. Dapita ang usa ka estudyante sa pagbasa og kusog sa 1 Nephi 7:17–18.

Unsay giampo ni Nephi? Unsay inyong nakita nga importante sa iyang pag-ampo?

Samtang ang mga estudyante nagpakigbahin sa ilang mga tubag, siguroha nga ilang makita nga si Nephi nanghangyo nga siya luwason “sumala sa [iyang] hugot nga pagtuo.” Ipasabut usab nga samtang siya nanghangyo nga luwason gikan sa iyang mga igsoon nga lalaki, nangamuyo siya sa Dios nga lig-unon siya aron iyang masulbad ang problema. Ipasabut nga ang pag-ampo pinaagi sa pagtuo nagpasabut nga kita mag-ampo uban sa pagsalig sa Ginoo ug uban sa kaandam sa pagbuhat. Dapita ang usa ka estudyante sa pagbasa sa mosunod nga pamahayag ni Elder David A. Bednar sa Korum sa Napulog Duha ka mga Apostoles:

Imahe

Elder David A. Bednar

“Si Nephi maoy usa ka ehemplo sa usa ka tawo kinsa nahibalo ug nakasabut, ug nagsalig sa makaabag nga gahum sa Manluluwas. … Palihug timan-i ang pag-ampo ni Nephi sa bersikulo 17: ‘O Ginoo, sumala sa akong hugot nga pagtuo diha kanimo, luwasa ako gikan sa mga kamot sa akong igsoon nga mga lalaki; oo, gani hatagan mo ako sa kusog nga ako makabugto niini nga mga pisi diin ako gigapos” (emphasis gidugang).

“… Nakapaikag kaayo nako nga si Nephi wala mag-ampo … nga usbon ang iyang mga kahimtang. Hinoon, nag-ampo siya alang sa kalig-on sa pag-usab sa iyang mga kahimtang. Ug ako mosugyot nga siya nag-ampo niini nga paagi tungod kay siya nakahibalo ug nakasabut ug nakasinati siya sa makaabag nga gahum sa Pag-ula sa Manluluwas” (“In the Strength of the Lord” [Brigham Young University devotional address, Okt. 23, 2001], 4, speeches.byu.edu).

Ipakigbahin ang imong pagpamatuod nga ang Dios motubag sa mga pag-ampo sumala sa atong hugot nga pagtuo. Ipasabut nga niini nga sitwasyon, ang Dios mitubag sa pag-ampo ni Nephi hapit diha-diha dayon. Hinoon, ang mga pag-ampo dili kanunay tubagon niini nga paagi. Ang Langitnong Amahan motubag og mga pag-ampo sa Iyang kaugalingong panahon, sa Iyang kaugalingong paagi, ug sumala sa Iyang kabubut-on. Hatagi ang mga estudyante og oportunidad sa pagpamatuod sa gahum sa pag-ampo pinaagi sa pagpangutana nila sa mosunod nga pangutana:

Kanus-a kamo nakaampo pinaagi sa hugot nga pagtuo ug nakadawat og kusog o tabang gikan sa Ginoo, diha-diha o paglabay sa pipila ka higayon? (Mahimo usab nga ikaw mopakigbahin og kasinatian nga imong nasinati uban niini nga baruganan.)

Sultihi ang mga estudyante nga human maluwas gikan sa iyang mga gapos, ang iyang mga igsoong lalaki misulay sa pag-ataki niya pag-usab. Dapita ang usa ka estudyante sa pagbasa og kusog sa 1 Nephi 7:19–20.

Kinsa ang nagkumbinser nila ni Laman ug Lemuel sa paghunong sa pagsulay sa pagpatay ni Nephi?

Ipasabut nga ang atong mga pag-ampo sa kasagaran matubag ug ang atong mga panginahanglan mahatag pinaagi sa matinud-anong mga buhat sa uban. Samtang ang imong klase magtuon sa nahibilin nga mga bersikulo sa 1 Nephi 7, dapita ang mga estudyante sa pagtan-aw unsay reaksyon ni Nephi sa iyang mga igsoong lalaki, bisan human sa ilang tanang gibuhat kaniya. Hangyoa ang mga estudyante sa paghunahuna mahitungod sa mosunod nga pangutana nga dili motubag og kusog:

Giunsa ninyo pagtubag sa dihang ang uban misulay sa pagpasakit kaninyo?

Hangyoa ang usa ka estudyante sa pagbasa og kusog sa 1 Nephi 7:21. Mahimo nimong isugyot nga markahan sa mga estudyante ang pamahayag ni Nephi mahitungod sa pagpasaylo.

Unsay buot ipasabut sa walay lipud-lipod nga pagpasaylo? (Kon ang mga estudyante dili sigurado, ipasabut nga ang pulong walay lipud-lipod nagpasabut nga matinuoron ug direkta.)
Unsa ang giawhag ni Nephi sa iyang mga igsoon nga lalaki nga buhaton? Nganong kini nga tambag bililhon?

Ipamatuod nga ang pagtinguha nga mapasaylo ug pagpasaylo sa uban makahatag og panaghiusa ug kalinaw. Dapita ang mga estudyante sa paghunahuna mahitungod sa mga sitwasyon sa ilang mga pamilya nga nagkinahanglan og kapasayloan.

Ngano nga ang kapasayloan importante kaayo sa atong mga pamilya?
Paghunahuna og higayon diin kamo nakapasaylo og sakop sa panimalay o sa dihang usa ka sakop sa pamilya nakapasaylo kaninyo. Sa unsa nga paagi kini nakaimpluwensya sa inyong relasyon ug sa espiritu diha sa inyong panimalay?

Tapusa pinaagi sa pagpahinumdom sa mga estudyante nga ang Ginoo misugo ni Nephi ug sa iyang mga igsoong lalaki sa pagpakigminyo ug magbaton og mga pamilya ug nga ang Ginoo misugo usab niana karon. Ipamatuod usab nga ang Ginoo motubag sa atong mga pag-ampo ug mohatag nato og kusog sa pagbuntog sa atong mga kalisud sumala sa atong hugot nga pagtuo Kaniya. Dapita sila sa pagkonsiderar kon unsaon nila paggamit ang usa sa mga baruganan sa leksyon karon sa pagtabang sa ilang mga pamilya.

Ribyu sa Scripture Mastery

Pahibalo: Ang mga pagribyu sa scripture mastery makita niini nga manwal. Nagpakita kini og lain-laing mga pamaagi nga inyong magamit sa pagtabang sa mga estudyante sa pagribyu kanunay sa mga bersikulo sa scripture mastery.

Ang gitas-on niini nga leksyon makahatag og panahon sa mosunod nga kalihokan sa pagribyu sa scripture mastery. Mahimo nimong ipahigayon ang kalihokan sa sinugdanan sa klase, isip break tali sa mga seksyon sa leksyon, o sa katapusan sa klase. Siguroha nga mubo ra kini aron paghatag og panahon alang sa leksyon. Alang sa ubang mga kalihokan sa pagribyu, tan-awa ang appendix.

Kon ang mga estudyante sayon nga makatultol og scripture mastery passage ug nakasabut sa kahulugan, sulod, ug kagamitan niini, mas masaligon sila sa ilang personal nga pagtuon, sa ilang abilidad sa paggamit sa mga baruganan sa ebanghelyo, ug sa ilang mga oportunidad sa pagtudlo gikan sa mga kasulatan. Ikonsiderar ang mosunod nga deklarasyon ni Presidente Howard W. Hunter: “Manghinaut kami nga walay usa sa atong mga estudyante ang mobiya sa classroom nga nahadlok o naulawan nga sila wala makakita sa tabang nga ilang gikinahanglan tungod kay wala kaayo sila makahibalo sa mga kasulatan sa pagpangita sa sakto nga mga tudling” (“Eternal Investments” [pakigpulong ngadto sa mga CES religious educator, Peb. 10, 1989], 2, si.lds.org).

Sa pagtabang sa mga estudyante nga makapamilyar sa nahimutangan sa mga scripture mastery passage, dapita sila sa paggamit sa scripture mastery bookmark, mangita sa unang lima ka mga tudling sa mastery sa ilang mga kasulatan, ug pagbasa niini. Mahimo nimong awhagon ang mga estudyante sa pagmarka sa scripture mastery passage sa lahi nga paagi aron sila sayon nga makakita niini.

Komentaryo ug Background nga Impormasyon

1 Nephi 7:2. Si Ishmael nagagikan ni Ephraim

Ang Basahon ni Mormon usahay gipasabut nga “ang sungkod ni Jose” (Ezequiel 37:19) o “ang sungkod ni Ephraim” (D&P 27:5). Si Lehi kaliwat ni Manases (tan-awa sa Alma 10:3) ug si Ishmael kaliwat ni Ephraim (tan-awa sa Erastus Snow, Deseret News, Ago. 18, 1882). Ang mga panagna ni Jacob (tan-awa sa Genesis 48:16; 49:22) natuman sa dihang si Ishmael (gikan ni Ephraim) miadto sa kayutaan sa Amerika uban ni Lehi (gikan ni Manases).

1 Nephi 7:3–5. Ang kaimportante sa kaminyoon

Si Presidente Howard W. Hunter mipasabut og maayo sa kaimportante sa kaminyoon sa templo:

“Sama nga ang bunyag usa ka sugo sa Ginoo, mao usab ang kaminyoon diha sa templo. Ingon nga ang bunyag importante sa pagsulod sa Simbahan, mao usab ang kaminyoon diha sa templo importante ngadto sa kahimayaan diha sa presensya sa Dios. Kabahin kini sa atong padulngan. Dili nato matuman ang atong katapusan nga mga katuyoan nga wala kini.

“Ayaw katagbaw sa bisan unsa nga minos niini.

“Dili kamo modawat og kalibutanong matang sa bunyag, di ba?

“Ang Dios adunay iyang paagi sa bunyag—pinaagi sa pagpaunlod pinaagi sa usa ka tawo kinsa naghupot sa awtoridad.

“Dayon modawat mo og kalibutanong matang sa pagminyo?

“Siya aduna usab sa iyang matang sa kaminyoon: Mao kini ang kaminyoon sa templo” (Teachings of Howard W. Hunter, ed. Clyde J. Williams [1997], 131–32; tan-awa usab sa D&P 131:1–4).

1 Nephi 7:15. “Kon kamo mobalik sa Jerusalem kamo usab mangamatay uban kanila”

Gipasidan-an ni Nephi ang iyang mga igsoong lalaki ug mga sakop sa pamilya ni Ishmael nga sila mangamatay kon mobalik sila sa Jerusalem. Ang kasaysayan nagpakita nga sakto si Nephi. Pipila ka mga tuig human ang pamilya nila ni Lehi ug Ishmael mibiya sa Jerusalem, ang mga taga-Babelonia milibut sa siyudad. Sumala sa Biblia, sa mga 18 ka bulan nga pag-ataki ang mga tawo nahutdan og pagkaon, ang siyudad “gibuhoan,” ug ang kasundalohan ni Haring Sedecias nagkatibulaag (tan-awa sa 2 Mga Hari 25:1–7). Ang mga taga-Babelonia miguba dayon sa templo ug midala sa daghang mga tawo nga bihag ngadto sa Babelonia. Kon sila si Laman, Lemuel, ug ang uban mibalik pa sa Jerusalem, mag-antus unta sila sa pagkabihag o kamatayon (tan-awa sa 2 Nephi 1:4). Apan tungod kay mipili sila sa pagsunod nila ni Lehi ug Nephi, nakatagamtam sila sa bunga ug dugos sa yuta sa Bountiful (tan-awa sa 1 Nephi 17:3–6) ug nakabaton og usa ka yuta nga kabilin (tan-awa sa 2 Nephi 1:5). Agig dugang, ang Ginoo nagmaloloy-on ngadto sa mga kaliwat sa ulahing mga adlaw nila ni Laman ug Lemuel, mipanalangin nila sa ebanghelyo (tan-awa sa 2 Nephi 4:7–9).