Leksyon 56
Mosiah 7–8
Pasiuna
Mga 80 ka tuig sa wala pa ang anak nga lalaki ni Haring Benjamin nga si Mosiah nahimong hari, usa ka lalaki nga ginganlan og Zeniff nangulo og pundok sa mga Nephite gikan sa Zarahemla aron mopuyo diha sa yuta sa Nephi nga ilang gihunahuna nga “ang yuta sa ilang kabilin” (tan-awa sa Omni 1:27–30). Gihatagan og awtoridad ni Haring Mosiah ang usa ka tawo nga ginganlan og Ammon sa pagpangulo og usa ka gamay nga pundok ngadto sa yuta sa Nephi aron mahibaloan ang kapalaran sa pundok ni Zeniff. Gikaplagan ni Ammon ug sa iyang mga kauban ang mga kaliwat sa pundok ni Zeniff nga nagpuyo nga ulipon sa mga Lamanite. Ang apo nga lalaki ni Zeniff nga si Limhi mao ang ilang hari. Ang pag-abut ni Ammon nagdala og paglaum ngadto ni Limhi ug sa iyang mga katawhan. Gipangutana ni Limhi si Ammon kon makahubad ba siya sa mga kinulit diha sa 24 ka bulawan nga mga palid nga nadiskubrihan sa iyang mga katawhan. Gipasabut ni Ammon nga ang hari sa Zarahemla, si Haring Mosiah, usa ka manalagna kinsa makahubad niadtong karaan nga mga rekord.
Mga Sugyot alang sa Pagtudlo
Mosiah 7
Nakaplagan ni Ammon ang yuta sa Lehi-Nephi ug nahibalo kon sa unsa nga paagi ang mga katawhan ni Haring Limhi nahimong ulipon
Isulat ang mosunod diha sa pisara: nagbangutan: mibati og pagbasol o kaguol
-
Unsa ang pipila ka mga rason nga ang mga tawo mahimong magbangutan?
Dapita ang usa ka estudyante sa pagbasa og kusog sa Mosiah 7:24 ug hangyoa ang uban sa klase sa pagsunod. Ipasabut ang mga pulong “ang tanan tungod sa kadautan.” Ipasabut nga kini nga bersikulo nagpasabut ngadto sa mga kahimtang nga miabut tungod sa dili matarung nga mga pagpili sa usa ka pundok sa mga katawhan. Dapita ang mga estudyante sa pagpamalandong kon sila sukad nagbangutan ba kalabut sa usa ka sitwasyon nga nahitabo “tungod sa pagkadautan.” Ipasabut nga karon ilang tun-an ang Mosiah 7–8 aron makat-unan ang mahitungod sa usa ka hari nga ginganlan og Limhi ug ang mga hinungdan sa pagbasol sa iyang mga katawhan. Dapita ang mga estudyante sa pagpangita sa unsay giawhag ni Limhi sa iyang mga katwahan nga buhaton aron sa pagbuntog sa ilang kasubo.
Dapita ang usa ka estudyante sa pagbasa og kusog sa Mosiah 7:1. Hangyoa ang klase sa pag-ila sa duha ka mga dapit nga gihisgutan niini nga bersikulo. Kopyaha ang unang diagram nga nag-uban niini nga leksyon diha sa pisara, ug dapita ang mga estudyante sa pagbuhat sa sama niini diha sa ilang mga scripture study journal o mga class notebook. Samtang inyong gamiton kini nga diagram, ipasabut nga ang Simbahan walay opisyal nga sukaranan mahitungod sa hiyograpiya sa Basahon ni Mormon gawas nga ang mga panghitabo nahitabo didto sa Amerika.
Pahinumdom: Sa panahon sa ilang pagtuon sa basahon ni Mosiah, modugang pa ang mga estudyante og mga detalye ngadto sa ilang mga diagram. Aron sa pagsiguro nga sila adunay igo nga luna sa pagdugang niini nga mga detalye, kopyaha ang diagram diha sa pisara ingon sa gipakita. Ipasabut ang sobra nga luna sa dili pa magsugod ang mga estudyante sa pagdrowing. (Ang nakompleto nga diagram anaa sa appendix diha sa katapusan niini nga manwal.)
Ipasabut nga sa dihang miabut ang pamilya ni Lehi sa gisaad nga yuta, gipahimutang nila ang ilang mga kaugalingon diha sa yuta sa Nephi (usahay gipasabut isip ang yuta sa Lehi-Nephi o ang yuta sa unang kabilin). Sa wala madugay human mamatay si Lehi, gimandoan sa Ginoo si Nephi sa paglayas ngadto sa kamingawan, dad-on ang tanan kinsa mokuyog kaniya. Mipadayon sa pagpuyo ang mga katawhan ni Nephi sa yuta sa Nephi apan nahibulag gikan niadtong kinsa misunod ni Laman ug Lemuel. Daghang mga katuigan ang nanglabay, gimandoan sa Ginoo ang usa ka pundok sa mga Nephite sa paglayas gikan sa yuta sa Nephi. Kini nga pundok sa kadugayan mipuyo sa usa ka yuta nga gitawag og Zarahemla, nga amihanan sa yuta sa Nephi.
Daghang mga henerasyon ang milabay, usa ka tawo nga ginganlan og Zeniff nangulo og usa ka pundok sa mga Nephite ngadto sa yuta sa Nephi aron sa “pagpanag-iya sa yuta sa ilang kabilin” (tan-awa sa Omni 1:27–30). Si Zeniff kaniadto kabahin sa laing pundok nga napakyas sa pagbaton og yuta diha niana nga dapit (tan-awa sa Mosiah 9:1–2). Dapita ang mga estudyante sa pagdrowing og arrow gikan sa Zarahemla ngadto sa yuta sa Nephi ug sa pagngalan niini og “pundok sa Nephite nga gipangulohan ni Zeniff.” Kini nga pundok mibiya sa Zarahemla mga 80 ka tuig sa wala pa mahimong hari si Mosiah.
Dapita ang mga estudyante sa pag-scan sa Mosiah 7:1 pag-usab, mangita sa unsay gustong mahibaloan ni Mosiah. Human sila moreport, dapita sila sa pagbasa sa Mosiah 7:2–3 aron mahibaloan unsay gibuhat ni Mosiah aron makakuha og tubag sa iyang pangutana. Hangyoa ang mga estudyante sa pagdrowing og ikaduhang arrow gikan sa Zarahemla ngadto sa yuta sa Nephi, nga nagrepresentar sa panaw sa grupo nga nangita nga gipangulohan ni Ammon, og sa pagpangalan niini ug husto.
I-summarize ang Mosiah 7:4–11 pinaagi sa pagpasabut nga nakaplagan ni Ammon ang siyudad diin ang mga kaliwat sa mga katawhan ni Zeniff mipuyo ubos sa pagmando sa apo nga lalaki ni Zeniff nga si Limhi. Nakita ni Limhi ang grupo ni Ammon sa gawas sa mga paril sa siyudad. Naghunahuna nga sila pipila sa dautan nga mga pari sa iyang namatay nga amahan, si Noah, gipadakop ug gipabilanggo niya sila sa iyang mga magbalantay (tan-awa sa Mosiah 21:23). Gisukit-sukit niya sila human milabay ang duha ka adlaw. Hangyoa ang mga estudyante sa pagbasa og hilum sa Mosiah 7:12–15, nga mangita sa reaksyon ni Limhi sa dihang iyang nahibaloan kinsa si Ammon ug diin siya gikan.
-
Ngano nga si Limhi nalipay og maayo sa pagkahibalo nga si Ammon gikan sa yuta sa Zarahemla?
I-refer og usab ngadto sa pulong nagbangutan diha sa pisara. I-summarize ang Mosiah 7:16–19 pinaagi sa pagpasabut nga gipundok ni Haring Limhi ang iyang mga katawhan aron sa pagpaila ni Ammon ngadto kanila, sa pagsulti ngadto kanila mahitungod sa mga hinungdan sa ilang kasubo ug pagmahay, ug sa pagtabang kanila nga mahibalo asa modangup alang sa kaluwasan.
Isulat sa pisara ang pulong nga mga hinungdan diha sa pisara ubos sa kahulugan sa nagbangutan. Pagdapit og pipila ka mga estudyante sa pagpuli-pulig basa og kusog gikan sa Mosiah 7:20–28. Hangyoa ang klase sa pagpangita og mga lihok nga giila ni Limhi isip mga hinungdan sa mga pagsulay ug mga kasubo sa iyang mga katawhan. (Tingali makatabang ang pagpahibalo sa mga estudyante nga ang gihisgutan nga propeta diha sa Mosiah 7:26 mao si Abinadi, kinsa gisunog ngadto sa pagkamatay sa panahon sa pagmando sa amahan ni Limhi, nga si Noah.) Human mabasa ang mga bersikulo, dapita ang pipila ka mga estudyante sa paglista diha sa pisara ubos sa mga hinungdan unsa ang ilang nadiskubrihan.
-
Unsa ang ingon og nahimong pinakahinungdan sa kasubo niini nga mga katawhan? (Kadautan, o sala.)
Hangyoa ang mga estudyante sa pagbasa og hilum sa Mosiah 7:29–32. Dapita sila sa pagpili og hugpong sa mga pulong nga nagpakita sa pagsabut ni Limhi sa koneksyon tali sa mga sala sa mga katawhan ug sa kasubo sa mga katawhan. (Mahimo nimong ipasabut nga ang pulong nga tahup nagpasabut og dugmok nga salin human ang lugas gibulag gikan sa mga uhay sa trigo. Sa Mosiah 7:30, ang “moani sa tahup” nagpasabut sa pagkuha og usa ka butang nga walay gamit.) Dapita ang pipila ka mga estudyante sa pagbasa ug sa pagpasabut sa mga hugpong sa mga pulong nga ilang napilian.
-
Sa unsa nga paagi nga ang pag-ila sa mga sangputanan sa atong mga sala makatabang kanato?
Dapita ang usa ka estudyante sa pagbasa og kusog sa Mosiah 7:33. Hangyoa ang klase sa pagpangita unsay giawhag ni Limhi sa iyang mga katawhan nga buhaton.
-
Unsa nga mga baruganan ang atong makat-unan gikan ni Limhi ug sa iyang mga katawhan mahitungod sa epekto sa pag-ila ug pagbati og kasubo alang sa atong mga sala? (Samtang ang mga estudyante nag-ila og mga kamatuoran gikan niini nga kapitulo, tabangi sila sa pagsabut nga ang pag-ila ug pagbati og kasubo alang sa atong mga sala makagiya kanato sa pagbalik ngadto sa Ginoo alang sa kaluwasan. Mahimo nimong isulat sa pisara kini nga baruganan.)
Aron matabangan ang mga estudyante nga mas makasabut niini nga baruganan, hangyoa sila sa paghanduraw nga sila adunay minahal nga tawo kinsa mibati og pagbasol alang sa iyang mga sala ug kinsa nagtinguha sa paghinulsol ug pagbalik ngadto sa Ginoo apan dili sigurado unsaon sa paghimo sa mao. Pagpamatuod nga ang tambag ni Limhi ngadto sa iyang mga katawhan diha sa Mosiah 7:33 naglangkob sa mga yawe sa pagbuntog sa kasubo ug pagmahay nga nag-uban sa sala. Dapita ang mga estudyante sa pagpangita og hilum sa Mosiah 7:33 nangita sa mga hugpong sa mga pulong nga motabang sa usa ka tawo nga mahibalo kon sa unsa nga paagi nga “mobalik ngadto sa Ginoo.” (Mahimo nimong isugyot nga markahan nila kini nga mga hugpong sa mga pulong.)
Human sa igong panahon, dapita ang pipila ka mga estudyante sa pagpakigbahin og mga hugpong sa mga pulong nga importante nganha kanila. Himoa nga ang matag estudyante mopasabut sa kahulugan sa hugpong sa mga pulong nga iyang napili pinaagi sa (1) pagsulti niini sa iyang kaugalingon nga mga pulong o (2) paghatag og mga ehemplo sa mga lihok o kinaiya sa usa ka tawo kinsa naninguha sa paggamit sa mga baruganan nga gipahayag sa hugpong sa mga pulong.
Hangyoa ang mga estudyante sa pagpamalandong kon sila nakasala ba nga wala nila mahinulsoli nga maoy nakaingon sa kasubo ug pagmahay alang kanila ug niadtong ilang gihigugma. Dapita ang mga estudyante sa pagsulat og tubag ngadto sa mosunod nga pangutana diha sa ilang mga scripture study journal:
-
Unsaon ninyo sa paggamit ang Mosiah 7:33 diha sa inyong kinabuhi karon?
Ipakigbahin ang imong pagpamatuod nga samtang kita mobalik ngadto sa Ginoo uban sa atong tibuok nga mga kasingkasing ug mga hunahuna, Siya moluwas kanato gikan sa pagbangutan nga mosangput gumikan sa atong mga sala.
Mosiah 8
Nahibaloan ni Ammon ang 24 ka bulawan nga mga palid ug nagsulti kang Limhi kabahin sa usa ka manalagna kinsa makahubad sa mga kinulit nga gilangkob niini.
Pagdapit og duha ka estudyante sa pagduol sa atubangan sa klase. Taptapi ang mga mata sa usa ka estudyante, ug dayon pagkatag og mga basahon, mga palid sa papel, o ubang dili makasakit nga mga butang diha sa salog sa klasehanan. Hangyoa ang ikaduhang estudyante sa paghatag og gisulti nga mga panudlo aron sa pagtabang sa unang estudyante sa pagtabok sa klasehanan nga dili makaigo og bisan unsa nga butang diha sa salog. Dayon pataptapi ang ikaduhang estudyante. Usba pagpahimutang ang mga butang diha sa salog, ug ipahatag sa unang estudyante ang mga panudlo. Niini nga higayon, ang gitaptapan nga estudyante motuyo sa pagbale-wala sa mga panudlo. (Sultihi sa sekreto kini nga estudyante sa wala pa ang klase, ug hangyoa siya sa pagbale-wala sa mga panudlo.)
-
Unsa ang bili sa pagpaminaw ngadto sa usa ka tawo kinsa makakita sa mga butang nga dili nato makita?
I-summarize ang Mosiah 8:5–12 pinaagi sa pagpasabut nga si Limhi nagpadala og panaw aron sa pagpangayo og tabang gikan sa Zarahemla kaniadtong wala pa moabut si Ammon. Ang pundok nangawala sa kamingawan, ug imbes makaplagan ang Zarahemla, ilang nakaplagan ang mga bukog sa usa ka naguba nga sibilisasyon. Didto ilang nadiskubrihan ang 24 ka bulawan nga mga palid nga may kinulit diha niini. (Mahimo nimong ipasabut nga ang mga guba nga nadiskubrihan sa mga katawhan ni Limhi mao ra ang nahibilin sa sibilisasyon sa Jaredite. Usa ka rekord sa mga Jaredite, nakuha gikan sa 24 nga bulawang mga palid, gilakip diha sa Basahon ni Mormon isip ang basahon ni Ether.) Idugang kini nga panaw ngadto sa diagram diha sa pisara, ingon nga gipakita diha sa hulagway niini nga pahina. Ipadugang kini sa mga estudyante ngadto usab sa ilang mga diagram. Ipasabut nga si Haring Limhi buot nga makasabut sa mga panulat nga gikulit diha sa 24 ka bulawang mga palid. Gipangutana niya si Ammon kon may nailhan ba siyang tawo kinsa makahubad niini.
Dapita ang usa ka estudyante sa pagbasa sa tubag ni Ammon diha sa Mosiah 8:13–15. Hangyoa ang klase sa pagpangita sa ulohan nga gigamit ni Ammon sa pagpaila sa usa ka tawo kinsa adunay gahum sa paghubad sa mao nga mga rekord. Hangyoa ang mga estudyante sa pagsiksik og hilum sa Mosiah 8:16–19, nga mangita og dugang nga mga abilidad sa usa ka manalagna. Hangyoa ang pipila ka mga estudyante sa pagsulti unsa ang ilang nakit-an.
Isulat ang mosunod nga pamahayag diha sa pisara: Ang Ginoo naghatag og mga propeta, mga manalagna, ug mga tigpadayag sa kaayohan sa mga katawhan.
-
Pila ka mga manalagna kita aduna karon sa yuta? (Napulog lima—ang mga miyembro sa Unang Kapangulohan ug Ang Korum sa Napulog Duha ka mga Apostoles.)
-
Unsa ang pipila ka mga butang nga ang mga propeta, mga manalagna, ug mga tigpadayag mopahibalo kanato? (Kon ang mga estudyante maglisud sa pagtubag, pangutana unsay napahibalo sa mga manalagna mahitungod sa mga hilisgutan sama sa kaminyoon ug pamilya, edukasyon, kalingawan ug media, o sekswal nga kaputli.)
-
Sa unsang paagi napanalanginan ang inyong kinabuhi pinaagi sa mga propeta, manalagna, ug mga tigpadayag karong panahona?
Mahimo nimong isulti ang mahitungod sa unsa nga paagi ang mga propeta, mga manalagna, ug mga tigpadayag nagpanalangin sa imong kinabuhi. Dapita ang mga estudyante sa pagbasa ug pagpamalandong sa ilang kaugalingon sa usa ka bag-ohay nga pakigpulong sa komperensya sa usa ka miyembro sa Unang Kapangulohan o Korum sa Napulog Duha ka mga Apostoles ug sa pagsunod niana nga pakigpulong.
Komentaryo ug Background nga Impormasyon
Mosiah 1–29. Historical nga kinatibuk-ang pagpasabut
Alang sa usa ka historical nga kinatibuk-ang pagpasabut sa basahon ni Mosiah, tan-awa ang pasiuna sa basahon ni Mosiah niini nga manwal.
Mosiah 8:16. “Ang usa ka manalagna usa ka tigpadayag ug usa ka propeta usab”
Si Elder John A. Widtsoe sa Korum sa Napulog Duha ka mga Apostoles mipasabut sa ulohan nga “propeta, manalagna, ug tigpadayag”:
“Ang tulo ka lahi nga mga ulohan diha sa kinatibuk-ang ulohan adunay daghang panagsama sa kahulugan nga gigamit sa kadaghanan, apan adunay mga kalainan igo ka importante sa paghatag og katarungan sa ilang paggamit.
“Ang usa ka propeta usa ka magtutudlo. Mao kana ang importanting kahulugan sa pulong. Nagtudlo siya sa kamatuoran, sa ebanghelyo, nga gipadayag sa Ginoo ngadto sa tawo; ug ubos sa inspirasyon nagpasabut niini aron masabtan sa mga katawhan. Tigpatin-aw siya sa kamatuoran. Labaw pa, nagpakita siya nga ang dalan sa tawhanong kalipay mao ang pinaagi sa pagkamasulundon ngadto sa balaod sa Dios. Nagtawag siya og paghinulsol niadtong kinsa nahisalaag palayo gikan sa kamatuoran. Usa siya ka manggugubat alang sa katumanan sa mga katuyoan sa Ginoo kabahin sa tawhanong pamilya. Ang katuyoan sa iyang kinabuhi mao ang pagsuporta sa plano sa kaluwasan sa Ginoo. Iyang gihimo kining tanan pinaagi sa suod nga pakigsulti sa Ginoo, hangtud siya ‘puno og kagahum pinaagi sa espiritu sa Ginoo.’ (Micah 3:8; tan-awa usab D. & P. 20:26; 34:10; 43:16) …
Samtang naglakaw ang panahon ang pulong nga ‘propeta’ niabut nga nagpasabut, tingali labaw sa tanan, usa ka tawo kinsa nagdawat og mga pagpadayag, ug mga panudlo gikan sa Ginoo. Ang labing importanting buhat sa usa ka propeta kanunay nga nasaypan sa paghunahuna nga nagtagna sa umaabut nga mga panghitabo, nagsulti og mga panagna, nga usa lamang sa daghang propetikanhon nga mga buhat.
“Sa paghunahuna nga ang usa ka propeta maoy usa ka tawo kinsa nagdawat og mga panagna gikan sa Ginoo, ang mga ulohan nga ‘manalagna ug tigpadayag’ nagpadako lamang sa mas dako ug lakip nga kahulugan sa ulohan nga ‘propeta.’ Sa dayag, hinoon, adunay dako nga kaalam diha sa piho nga pamahayag sa mga buhat sa propeta isip usa ka manalagna ug tigpadayag, ingon nga gibuhat diha sa mga komperensya sa Simbahan.
“Ang usa ka propeta nagdawat usab og mga pagpadayag gikan sa Ginoo. Kini tingali mga pagpasabut sa mga kamatuoran nga nadawat na, o bag-ong mga kamatuoran nga wala maangkon kaniadto sa tawo. Ang mao nga mga pagpadayag kanunay nga kutob ra diha sa opisyal nga posisyon nga gihuptan. Ang anaa sa ubos dili makadawat og mga pagpadayag alang sa mas taas nga katungdanan.
“Ang usa ka manalagna maoy usa ka tawo kinsa makakita pinaagi sa espiritwal nga mga mata. Siya nakasabut sa kahulugan kabahin niana nga ingon og lisud ngadto sa uban; busa siya usa ka tighubad ug tigpatin-aw sa mahangturong kamatuoran. Makita niya ang umaabut gikan sa nanglabay ug sa karon. Naghimo siya niini pinaagi sa gahum sa Ginoo nga direktang naglihok pinaagi kaniya, o sa dili direkta nga paagi uban sa tabang sa balaan nga mga instrumento sama sa Urim ug Thummim. Sa daklit, usa siya ka tawo kinsa makakita, kinsa naglakaw diha sa kahayag sa Ginoo nga nagbuka ang mga mata. (Basahon ni Mormon, Mosiah 8:15–17)
“Ang usa ka tigpadayag nagpahibalo, uban sa panabang sa Ginoo, og usa ka butang nga kaniadto wala mahibaloi. Kini mahimong bag-o o nakalimtan nga kamatuoran, o usa ka bag-o o nakalimtan nga paggamit sa nahibaloan nga kamatuoran sa panginahanglan sa tawo. Sa kanunay, ang tigpadayag may kalabutan sa kamatuoran, piho nga kamatuoran (D. & P. 100:11) ug sa kanunay kini moabut uban ang balaan nga pagtugot. Ang pagpadayag mahimong madawat sa lain-laing mga paagi, apan kini kanunay nagdahum nga ang tigpadayag nagpuyo ug nagbaton sa iyang kaugalingon aron mahiuyon o mahiangay sa balaang espiritu sa pagpadayag, sa espiritu sa kamatuoran, ug busa makahimo sa pagdawat sa balaan nga mga mensahe.
“Sa laktod: Ang usa ka propeta usa ka tigtudlo sa nahibaloan nga kamatuoran; ang manalagna usa ka tigsabut sa natago nga kamatuoran; ang tigpadayag usa ka tigdala sa bag-ong kamatuoran. Sa dako nga pagsabut, ang usa nga kasagarang gigamit, ang ulohan nga propeta, naglakip sa ubang mga ulohan ug naghimo sa propeta nga usa ka tigtudlo, tigsabut, ug tigdala sa kamatuoran” (Evidences and Reconciliations, arr. G. Homer Durham, 3 vols. in 1 [1960], 257–58; emphasis added).
Mosiah 8:17. “Ang usa ka manalagna masayud sa mga butang … diin umaabut”
Si Presidente Boyd K. Packer sa Korum sa Napulog Duha ka mga Apostoles mipakigbahin og usa ka panig-ingnan kon giunsa sa mga propeta, mga manalagna, ug mga tigpadayag sa ulahing mga adlaw paglihok isip mga manalagna:
“Ang mga kasulatan nagsulti kabahin sa mga propeta isip ‘tigbalantay [nga mga tawo] diha sa tore’ kinsa nakakita sa ‘kaaway samtang siya [anaa] pa sa layo kaayo’ ug kinsa nahimong ‘nakakita usab og mga butang nga dili pa makita sa kinaiyanhong mata … [kay] ang usa ka manalagna ang gipasanay sa Ginoo ngadto sa iyang mga katawhan.’
“[Daghang katuigan ang nanglabay] ang mga Kaigsoonan mipasidaan kanato kabahin sa pagkabungkag sa pamilya ug misulti kanato sa pagpangandam. … Ang senimanang family home evening gipaila sa Unang Kapangulohan. … Gihatagan ang mga ginikanan og maayo kaayo nga mga kagamitan alang sa pagtudlo sa ilang mga anak, uban sa saad nga ang matinud-anon mapanalanginan.
Samtang ang mga doktrina ug ang gipadayag nga mga organisasyon nagpabilin nga wala mausab, ang tanan nga mga ahensya sa Simbahan gihan-ay og usab diha sa ilang relasyon ngadto sa usag usa ug ngadto sa panimalay. … Ang tibuok nga kurikulum sa Simbahan giusisa og maayo—base sa mga kasulatan. … Ug mga katuigan gigahin sa pag-andam og bag-ong mga edisyon sa Biblia, sa Basahon ni Mormon, sa Doktrina ug mga Pakigsaad, ug sa Perlas nga Labing Bililhon. …
“Kita makahanduraw lamang kon hain kita kon karon lamang kita nag-react ngadto niining makalilisang nga kausaban sa pamilya. Apan dili kana ang sitwasyon. Wala kita mataranta mahitungod sa pagsulay og hukom kon unsa ang buhaton. Nahibalo kita unsa ang buhaton ug unsa ang itudlo. …
“Ang agianan nga atong gisunod dili atong binuhat. Ang plano sa kaluwasan, ang mahinungdanong plano sa kalipay, gipadayag ngari kanato, ug ang mga propeta ug mga Apostoles nagpadayon sa pagdawat og pagpadayag samtang ang Simbahan ug ang mga miyembro niini nanginahanglan og daghan pa” (“The Father and the Family,” Ensign, Mayo 1994, 20).