3 Nephi 23–30 (Unit 27)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga summary sa mga doktrina ug mga baruganan nga nakat-unan sa mga estudyante samtang sila nagtuon sa 3 Nephi 23–30 (unit 27) dili tuyo nga itudlo isip kabahin sa imong leksyon. Ang leksyon nga imong itudlo mosentro lamang diha sa pipila niini nga mga doktrina ug mga baruganan. Sunda ang mga pag-aghat sa Balaang Espiritu samtang imong ikonsiderar ang mga panginahanglan sa imong mga estudyante.

Day 1 (3 Nephi 23)

Ang mga estudyante mipadayon sa pagtuon sa mga pulong ni Jesukristo ngadto sa mga Nephite. Nakat-unan nila nga ang Manluluwas misugo sa mga katawhan nga magkugi sa pagsiksik sa mga pulong ni Isaias ug sa ubang mga propeta. Sa dihang ang Manluluwas mipanton sa katawhan nga wala magtipig og tukma nga mga rekord sa ilang kaugalingong espirituhanon nga kasaysayan, nakat-unan sa mga estudyante nga kon atong irekord ang espirituhanong mga kasinatian, kita nagdapit sa Ginoo sa paghatag kanato og dugang nga pagpadayag.

Day 2 (3 Nephi 24–26)

Samtang namalandong ang mga estudyante sa mga pulong ni Malaquias nga gipakigbahin ni Jesukristo ngadto sa mga Nephite, sila napahinumduman nga sa Ikaduhang Pag-anhi sa Manluluwas, Siya molimpyo sa Iyang katawhan ug mohukom sa mga dautan. Dugang nga pagpamalandong kabahin sa mga baruganan sa ikapulo ug ang gipanagna nga pagbalik ni Elijah sa ulahing mga adlaw nakatabang sa mga estudyante nga makaamgo nga kon mobalik kita ngadto sa Ginoo, Siya mobalik ngari kanato ug kon ang atong mga kasingkasing mabalik ngadto sa atong mga amahan, kita nagtabang sa pag-andam sa yuta alang sa Ikaduhang Pag-anhi ni Jesukristo. Ang pagpasabut ni Mormon kon nganong wala niya gilakip ang tanang pagtulun-an sa Manluluwas diha sa mga Nephite nakatabang sa mga estudyante sa pagdiskubre nga kon kita motuo sa unsay gipadayag sa Dios, nangandam kita sa atong mga kaugalingon sa pagdawat og mas daghan nga pagpadayag.

Day 3 (3 Nephi 27)

Samtang ang napulog duha ka disipulo nga mga Nephite mipadayon diha sa pag-ampo ug pagpuasa, ang Manluluwas mibisita kanila ug mipasabut nga ang tinuod nga Simbahan ni Jesukristo gitawag pinaagi sa Iyang ngalan ug natukod diha sa Iyang ebanghelyo. Gikan sa gitudlo sa Manluluwas ngadto sa Iyang mga disipulo, ang mga estudyante nakakat-on usab nga ang pundasyon sa ebanghelyo ni Jesukristo mao nga Siya mibuhat sa kabubut-on sa Iyang Amahan sa pagtuman sa Pag-ula. Uban niini nga panabut sa ebanghelyo, ang mga estudyante nakat-on usab nga kon kita magsunod sa mga baruganan sa ebanghelyo, nan, kita makabarug nga walay lama sa atubangan sa Dios sa katapusan nga adlaw.

Day 4 (3 Nephi 28–30)

Sama nga ang nabanhaw nga si Jesukristo mitahud sa tinguha sa Iyang mga disipulo, nakat-unan sa mga estudyante nga ang Ginoo mopanalangin kanato sumala sa atong matarung nga mga tinguha. Gikan sa ehemplo ni Mormon sa paghangyo sa Ginoo alang sa dugang nga kahibalo kabahin sa Tulo ka mga Nephite, ang mga estudyante nakakat-on nga kon kita mangayo sa Ginoo alang sa panabut, kita makadawat og pagpadayag. Ang panapos nga pagpamulong ni Mormon sa pagpangalagad sa Manluluwas taliwala sa mga Nephite nagtudlo sa mga estudyante nga ang pagtungha sa Basahon ni Mormon maoy usa ka timailhan nga ang Ginoo nagtuman sa Iyang pakigsaad uban sa balay ni Israel ug nga kon kita moduol kang Kristo, kita malakip taliwala sa Iyang mga katawhan.

Pasiuna

Samtang daghang bililhon nga mga baruganan ang makit-an diha sa 3 Nephi 23–30, ang unang katunga niining leksyon nag-focus kon unsay makat-unan sa mga estudyante sa 3 Nephi 24–25 mahitungod sa pagpangandam alang sa Ikaduhang Pag-anhi ni Jesukristo. Ang ikaduhang katunga sa leksyon nag-focus sa mga baruganan diha sa 3 Nephi 27 nga makatabang sa mga estudyante sa pagpamalandong kon unsay ipasabut sa pagkahimong disipulo ni Jesukristo ug sa unsang paagi sila mahimong mas mahisama Kaniya.

Mga Sugyot alang sa Pagtudlo

3 Nephi 23–26

Ang nabanhaw nga si Jesukristo mipatin-aw sa mga kasulatan ngadto sa mga Nephite

Dapita ang mga estudyante sa paghatag og mga kalihokan nga nagkinahanglan og mainampingon nga pagpangandam sulod sa usa ka panahon. (Ang mga ehemplo mahimong maglakip sa lagyo nga lumba, usa ka konsyerto sa musika, o usa ka talagsaon nga drama.) Hangyoa ang mga estudyante sa paghulagway kon unsa ang lagmit mahitabo sa usa ka tawo kinsa misulay sa pag-apil niining mga kalihokan nga wala ang gikinahanglang pagpangandam.

Dapita ang usa ka estudyante sa pagbasa sa 3 Nephi 24:2, ug dayon pangutan-a ang klase kon unsa sa ilang hunahuna ang panghitabo nga gipanagna ni propeta Malaquias. Sa higayon nga mailhan na sa mga estudyante “ang adlaw sa iyang pag-anhi” isip ang Ikaduhang Pag-anhi ni Jesukristo, dapita sila nga markahan ang gipangutana ni Malaquias: “Kinsa ang makasugakod sa adlaw sa iyang pag-anhi, ug kinsa ang mobarug kon siya magpakita?”

Ipangutana: Nganong importante man kini nga pangutana nga angayang ikonsiderar niadtong nagpuyo sa katapusang mga adlaw?

Dapita ang usa ka estudyante sa pagbasa og kusog sa mosunod nga pagpasabut ni Presidente Henry B. Eyring sa Unang Kapangulohan mahitungod kon sa unsang paagi nga ang pagbayad og ikapulo makatabang kanato nga maandam alang sa Ikaduhang Pag-anhi sa Manluluwas:

“Pinaagi sa atong desisyon karon nga mahimong usa ka hingpit nga tigbayad sa ikapulo ug sa atong makanunayong mga paningkamot sa pagtuman, malig-on kita diha sa atong pagtuo ug, moabut ang panahon, ang atong mga kasingkasing malukmay. Mao kana nga kausaban sa atong mga kasingkasing pinaagi sa Pag-ula ni Jesukristo, sobra pa sa paghalad sa atong kwarta o mga butang, nga mihimong posible alang sa Ginoo nga mosaad sa panalipod alang sa mga hingpit nga tigbayad sa ikapulo sa ulahing mga adlaw. Makabaton kita og pagsalig nga mahimo kitang takus alang nianang panalangin sa panalipod kon mopasalig kita karon sa pagbayad og hingpit nga ikapulo ug makanunayon sa pagbuhat niini” (“Espirituhanong Pagkaandam: Pagsugod og Sayo ug Magmakanunayon,” Ensign o Liahona, Nob. 2005, 40).

Ipangutana: Sumala ni Presidente Eyring, sa unsang paagi nga ang pagbayad sa ikapulo makatabang kanato sa pagpangandam sa pagsugat sa Manluluwas?

Dapita ang usa ka estudyante sa pagbasa og kusog sa panagna ni Malaquias kalabut sa pag-anhi ni Elijah diha sa 3 Nephi 25:5–6. Aron matabangan sila nga mas masabtan kon sa unsang paagi nga ang katumanan niining panagna makaapekto kanila, dapita ang usa ka estudyante sa pagbasa sa mosunod nga imbitasyon gikan ni Elder David A. Bednar sa Korum sa Napulog Duha ka mga Apostoles:

“Akong dapiton ang kabatan-onan sa Simbahan sa pagkat-on ug pagsinati sa Espiritu ni Elijah. …

“Kon kamo motuman niini nga pagdapit uban sa pagtuo, ang inyong kasingkasing mobati sa inyong mga amahan. Ang saad nga gihimo ngadto nila ni Abraham, Isaac, ug Jacob matisok diha sa inyong mga kasingkasing. … Ang inyong gugma ug pasalamat alang sa inyong mga katigulangan motubo. Ang inyong pagpamatuod ug pagkakabig ngadto sa Manluluwas mahimong lig-on ug malungtaron. Ug ako mosaad nga kamo panalipdan batok sa grabe nga impluwensya sa yawa. Samtang kamo moapil ug mohigugma niining balaan nga buhat, kamo panalipdan sa inyong kabatan-on ug sa tibuok ninyong kinabuhi” (“Ang mga Kasingkasing sa mga Anak Mobati,” Ensign o Liahona, Nob. 2011, 26–27).

Ipangutana: Unsa nga mga kasinatian ang inyong naangkon sa pagbuhat sa family history ug buhat sa templo nga nakapalig-on kaninyo sa espirituhanon nga paagi?

3 Nephi 27–30

Si Jesukristo nagpadayag sa ngalan ug importanting mga butang kalabut sa Iyang Simbahan ug nagpasidungog sa mga matarung nga tinguha sa Iyang mga disipulo; si Mormon mitapos sa Iyang rekord sa pagpangalagad sa Manluluwas taliwala sa mga Nephite

Isulat ang mosunod nga pamahayag ni Propeta Joseph Smith diha sa pisara (mahimo nimo kining buhaton sa dili pa magklase ug tabuni kini hangtud niining puntoha sa leksyon). Hangyoa ang usa ka estudyante sa pagbasa og kusog sa pamahayag. (Kini nga pamahayag makita sa Mga Pagtulun-an sa mga Presidente sa Simbahan: Joseph Smith [2007], 58.)

“Ang sukaranan nga mga baruganan sa atong relihiyon mao ang pagpamatuod sa mga Apostoles ug sa mga Propeta, mahitungod ni Jesukristo, nga Siya namatay, gilubong, ug mibangon sa ikatulong adlaw, ug mikayab ngadto sa langit” (Joseph Smith).

Ipasabut nga sumala sa gipahayag ni Propeta Joseph Smith, ang Manluluwas mitudlo sa mga Nephite nga ang sentro sa Iyang ebanghelyo mao ang Iyang maulaong sakripisyo. Isulat ang mosunod nga kamatuoran diha sa pisara: Ang pundasyon sa ebanghelyo ni Jesukristo mao nga Siya mibuhat sa kabubut-on sa Iyang Amahan sa pagtuman sa Pag-ula.

Dapita ang mga estudyante sa pag-scan sa 3 Nephi 27 ug ilhon ang mga pulong diin ang Manluluwas mitudlo niini nga doktrina. Hangyoa ang mga estudyante sa pagpakigbahin sa mga tudling nga ilang nadiskubrihan.

Ipasabut nga ang 3 Nephi 27:16–20 naglangkob sa mga pagtulun-an sa Manluluwas kon sa unsang paagi nga kita makadapit sa gahum sa Iyang Pag-ula diha sa atong kinabuhi. Isulat ang mosunod nga pamahayag diha sa pisara: Kon kita … , nan atong. … Dapita ang mga estudyante sa pagbasa og hilum sa 3 Nephi 27:20 nga mangita sa mga pulong nga ilang magamit sa pagsulat sa mga blangko diha sa pisara. Ipangutana: Sa unsang paagi nga ang pagsunod niini nga baruganan makatabang kanato nga mahimong tinuod nga disipulo ni Jesukristo?

Ipasabut ngadto sa klase nga ang labing mahinungdanong hagit sa atong pagkadisipulo makita sa 3 Nephi 27:21, 27. Dapita ang mga estudyante sa pagbasa og hilum niining mga bersikulo. Samtang magbasa sila, isulat sa pisara ang mosunod nga pamahayag: Si Ginoong Jesukristo naglaum sa Iyang mga disipulo sa paghimo sa Iyang mga buhat ug mahimong. …

Pangutan-a ang mga estudyante kon unsaon nila sa pagkompleto kini nga pamahayag, base sa unsay ilang nabasahan sa 3 Nephi 27:27. (Samtang motubag ang mga estudyante, kompletuha ang pamahayag diha sa pisara aron mabasa sama sa mosunod: Si Ginoong Jesukristo naglaum sa Iyang mga disipulo sa paghimo sa Iyang mga buhat ug mahimong sama Kaniya.) Basaha og kusog ang mosunod nga pamahayag ni Presidente James E. Faust sa Unang Kapangulohan:

“Atong hunahunaon ang pipila sa mga butang nga gibuhat ni Jesus nga masunod natong tanan.

“1. Si Jesus ‘nagpangadto-adto sa paghimo og mga kaayohan.’ [Mga Buhat 10:38.] Makahimo kitang tanan og butang nga maayo matag adlaw—alang sa usa ka sakop sa pamilya, usa ka higala o gani sa usa ka estranghero—kon mangita kita niadtong mga oportunidad.

“2. Si Jesus mao ang Maayong Magbalantay, kinsa nagbantay sa Iyang karnero ug nagpakabana niadtong kinsa nangawala. Makahimo kita sa pagpangita sa nagmagul-anon o niadtong dili kaayo aktibo ug makighigala kanila.

“3. Si Jesus adunay kalooy sa daghan, lakip na ang usa ka pobreng sanglahon. Kita usab mahimong makabaton og kalooy. Gipahinumduman kita sa Basahon ni Mormon nga kinahanglan kitang ‘magbangutan uban niadtong nagbangutan.’ [Mosiah 18:9.]

“4. Si Jesus mihatag og pagsaksi kabahin sa Iyang balaan nga misyon ug kabahin sa mahinungdanong buhat sa Iyang Amahan. Unsay atong mahimo mao, nga kitang tanan ‘mobarug ingon nga mga saksi sa Dios sa tanang panahon.’ [Mosiah 18:9.]” (“Pagkadisipulo,” Ensign o Liahona, Nob. 2006, 21).

Ipares-pares ang mga estudyante o bahina ngadto sa gagmay nga mga grupo. Dapita ang matag paresan o grupo sa pagsulat og duha o tulo ka mga paagi nga ilang magamit ang upat ka mga sugyot ni Presidente Faust sa ilang kinabuhi.

Kon mahuman na sila, dapita ang matag paresan o grupo nga mopakigbahin og usa ka ideya sa usa ka higayon gikan sa ilang mga lista. Diha sa pisara, isulat ang ilang mga ideya kon unsaon nato paghimo ang mga buhat sa Manluluwas ug mahimong mas mahisama Kaniya. Dapita ang mga estudyante nga mopasalig sa hilum sa pagbuhat sa usa o duha niining mga ideya sa umaabut nga semana. Ihatag ang imong pagpamatuod nga kitang tanan mahimong sama sa Manluluwas kon kita mogamit sa hugot nga pagtuo diha Kaniya.

Sunod nga Unit (4 Nephi 1–Mormon 8)

Awhaga ang mga estudyante sa pagpangita og mga tubag sa mosunod nga mga pangutana samtang nagtuon sila sa sunod nga unit: Sa unsang paagi nga ang mga tawo nga gikan sa kamalinawon ug kamauswagon mahimong dautan? Sa unsang paagi nga ang mga Nephite nga gikan sa labing mauswagon ug malipayon nga mga katawhan nga nanimuyo sa yuta nahimong hingpit nga dautan? Unsa man ang katapusang mga pulong ni Mormon?