Leksyon 85
Alma 23–24
Pasiuna
Sunod sa iyang pakighinabi, ang hari sa mga Lamanite miproklamar sa relihiyusong kagawasan sa iyang katawhan. Kini nga proklamasyon nagtugot kang Aaron ug sa iyang mga kaigsoonan sa pagsangyaw sa ebanghelyo ug sa pagtukod og mga simbahan sa mga siyudad sa Lamanite. Liboan ka mga Lamanite ang nakabig ug wala gayud mawala. Kini nga nakabig nga mga Lamanite mihimo og usa ka pakigsaad sa pagbutang sa ilang mga hinagiban sa gubat, ug sila miila sa ilang kaugalingon isip mga Anti-Nephi-Lehi. Sa dihang ang wala makabig nga mga Lamanite miataki kanila, pipila sa mga Anti-Nephi-Lehi misakripisyo sa ilang mga kinabuhi aron magpabilin sa ilang mga pakigsaad.
Pahinumdom: Sa leksyon 83, mahimong giawhag nimo ang mga estudyante nga itugot nga ang ilang mga pagpamatuod ug matarung nga ehemplo makaimpluwensya sa uban, sama sa bato nga mihimo og gagmayng mga balud diha sa usa ka lim-aw. Kon imong gibuhat, ikonsiderar ang pagsugod niining leksyon pinaagi sa pagpangutana sa mga estudyante sa pagreport sa ilang mga paningkamot.
Mga Sugyot alang sa Pagtudlo
Alma 23
Liboan sa mga Lamanite ang nakabig ngadto sa Ginoo
Diha sa pisara, pagdrowing og hulagway sa duha ka tawo (igo na ang yano nga stick figure). Basaha ang mosunod nga pamahayag ni Elder Richard G. Scott sa Korum sa Napulog Duha ka mga Apostoles. Hangyoa ang klase sa pagpaminaw sa gihulagway ni Elder Scott sa duha ka managlahi nga klase sa mga tawo.
“Matag usa kanato nakaobserbar kon sa unsang paagi ang pipila ka mga indibidwal nagpakabuhi sa makanunayong paagi sa pagbuhat sa hustong mga butang. Sila ingon og malipayon, gani madasigon mahitungod sa kinabuhi. Kon ang lisud nga mga kapilian kinahanglang himoon, sila ingon og dili mapakyas sa paghimo og husto, bisan og adunay madanihon nga mga alternatibo nga magamit nila. Nakahibalo kita nga sila ubos usab sa mga tintasyon, apan ingon og wala sila makamatngon niini. Sa samang higayon, nakaobserbar kita kon sa unsang paagi nga ang uban dili kaayo ligdong sa ilang desisyon nga gihimo. Diha sa palibut nga kusog ang espiritu, sila nagresolbar sa pagbuhat og mas maayo, aron mausab ang dagan sa ilang kinabuhi, aron mapadaplin ang makapaluya nga mga kinaiya. Sila mga sinsero kaayo sa ilang determinasyon sa pag-usab, pero sa wala madugay mobalik sila sa samang butang nga sila midesider nga biyaan.
“Unsa man ang nakahimo og kalainan sa mga kinabuhi niining duha ka grupo? Unsaon man ninyo nga magmakanunayon sa paghimo og husto nga mga pagpili?” (“Full Conversion Brings Happiness,” Ensign, Mayo 2002, 24).
Pangutan-a ang mga estudyante kon unsaon nila sa pagbutang og ngalan ang duha ka drowing diha sa pisara base sa komentaryo ni Elder Scott. Butangi og ngalan ang usa ka drowing diha sa pisara Matinud-anon ug ang laing drowing Dili makanunayon. Pangutan-a ang mga estudyante kon unsaon nila pagtubag ang mga gipangutana ni Elder Scott:
-
Unsa man ang nakahimo og kalainan sa mga kinabuhi niining duha ka grupo?
-
Unsaon man ninyo nga magmakanunayon sa paghimo og husto nga mga pagpili?
Samtang magtuon ang klase sa Alma 23–24, awhaga ang mga estudyante sa paghunahuna mahitungod kon unsa ang makadasig sa daghang mga miyembro sa Simbahan sa pagpabilin nga matinuoron ug matinud-anon sa tibuok nilang kinabuhi.
I-summarize ang Alma 23:1–5 pinaagi sa pagpasabut nga human ang hari sa Lamanite nakabig, mipadala siya og usa ka proklamasyon sa mga tawo nga nagdeklarar nga sila kinahanglang motugot ni Aaron ug sa ilang mga kaigsoonan sa pagsangyaw sa pulong sa Dios sa tibuok yuta nga walay babag ug dili madagmalan. Kini nga proklamasyon nakapahimong posible sa mga misyonaryo nga makatukod og mga simbahan sa mga Lamanite. Isip resulta, liboan ka mga Lamanite ang nakabig.
Dapita ang usa ka estudyante sa pagbasa og kusog sa Alma 23:6. Hangyoa ang klase sa pagsunod, nga mangita og duha ka butang nga nakatabang nga mapahinabo ang pagkakabig sa mga Lamanite. Dapita ang mga estudyante sa pagreport unsa ang ilang nakit-an.
-
Ngano kaha nga importante nga si Ammon ug ang iyang mga kaigsoonan mitudlo sa mga Lamanite “sumala sa espiritu sa pagpadayag ug sa pagpanagna”?
-
Unsa kahay gipasabut sa “gahum sa Dios nga [mi]buhat og mga milagro” diha sa mga Lamanite?
-
Kanus-a ang higayon nga inyong nasinati ang gahum sa Dios nga nagtabang kaninyo nga makabig? Kanus-a ang higayon nga inyong nakita ang gahum sa Dios nga nagtabang sa laing tawo nga makabig?
Dapita ang mga estudyante nga basahon pag-usab ang Alma 23:6, nga magtino sa mga pulong nga naghulagway sa mga Lamanite kinsa mituo sa pagsangyaw ni Ammon ug sa iyang kaigsoonan. (Siguroha nga masabtan sa mga estudyante nga kining mga Lamanite “nakabig ngadto sa Ginoo,” dili ngadto sa Simbahan o ngadto sa mga misyonaryo nga nagtudlo kanila. Siguroha usab nga ang mga estudyante makakita nga kini nga katawhan “wala gayud mobiya.” Isulat ang Nakabig ngadto sa Ginoo ug Wala gayud mobiya diha sa pisara ubos sa hulagway nga gibutangan og pangalan nga Matinud-anon.)
-
Kon kita mag-atubang og lisud nga mga kahimtang ug mga kalisdanan, nganong importante nga kita makabig ngadto sa Ginoo imbis ngadto sa laing tawo o mga ideya?
Dapita ang mga estudyante sa pagbasa sa hilum sa Alma 23:7, 16–18, nga mangita sa mga pulong nga naghatag og ebidesiya sa pagkakabig sa mga Lamanite. Hangyoa ang mga estudyante nga moreport sa unsay ilang nakit-an. Mahimo nimong ilista kining mga pulong diha sa pisara ubos sa hulagway nga gibutang og pangalan nga Matinud-anon. Aron matabangan ang mga estudyante nga makapadayon sa pag-analisar niining mga bersikulo, mahimo nimong ipangutana ang mosunod:
-
Sa unsang paagi nga ang tinguha sa katawhan alang sa usa ka bag-ong ngalan nagmatuod nga sila nagbag-o na?
-
Unsaon man niadtong kinsa nakabig karon nga “mahimong mailhan” gikan sa uban?
-
Sumala sa Alma 23:18, ang mga nakabig nga mga Lamanite nagsugod nga nagmakugihon ug nagmahigalaon sa mga Nephite. Kon ang usa ka tawo naningkamot sa paghinulsol o pag-usab sa iyang kinabuhi, sa unsang paagi kaha nga makatabang ang iyang pakig-uban sa ubang mga tawo nga kinabig?
Isulat ang mosunod nga mga pulong diha sa pisara: Ang pagkakabig nagpasabut …
Dapita ang mga estudyante sa pag-summarize unsa ang ilang nakat-unan gikan sa Alma 23 pinaagi sa pagkompleto sa mga pamahayag diha sa pisara. Ang mga estudyante mahimong mogamit og lain-laing mga pulong sa ilang mga tubag, apan kinahanglan ilang ipahayag ang mosunod nga kamatuoran: Ang pagkakabig nagpasabut sa pag-usab ug mahimong bag-o nga tawo pinaagi sa gahum sa Dios. Kompletuha ang pamahayag diha sa pisara.
I-refer ang mga estudyante ngadto sa mga pulong nga Matinud-anon ug Dili makanunayon diha sa pisara. Awhaga sila sa pagkonsiderar hain niining mga termino ang naghulagway gayud sa ilang ang-ang sa pagkakabig.
Alma 24
Ang mga Anti-Nephi-Lehi nakigsaad nga dili na gayud mogamit pag-usab sa ilang mga hinagiban
Dapita ang mga estudyante nga ikonsiderar sa hilum kon sila determinado ba gayud sa paglikay nga masubli ang piho nga sayop o sala apan sa kaulahian mibuhat na usab niana nga sayop. Ipasabut nga kon sila nakasinati niini, kinahanglang magpadayon sila sa pagpaningkamot sa paglambo. Samtang magtuon sila sa Alma 24, sila makat-on sa mga kamatuoran nga makatabang kanila.
I-summarize ang Alma 24:1–5 pinaagi sa pagpasabut nga ang mga Amalekite ug mga Amulonite, nga kanhi mga Nephite, misulsol sa daghang mga Lamanite ngadto sa pagkasuko batok sa ilang hari ug sa uban nga mga Anti-Nephi-Lehi. Sa ilang kasuko, kini nga mga Lamanite nangandam sa pag-ataki sa mga Anti-Nephi-Lehi. Atol niining panahona sa kagubot, ang hari sa Anti-Nephi-Lehi namatay. Ang gingharian nahatag ngadto sa usa sa iyang anak nga mga lalaki. Si Ammon mipundok uban sa bag-ong hari ug uban ni Lamoni ug sa uban aron makigtambag ug matino kon unsaon pagdepensa ang ilang mga kaugalingon batok sa mga Lamanite.
Dapita ang mga estudyante sa pagbasa sa hilum sa Alma 24:6, nga mangita kon unsa ka determinado ang mga Anti-Nephi-Lehi nga dili gayud nila buhaton. Human makareport ang mga estudyante sa ilang nakit-an, paghangyo og pipila ka estudyante nga magpuli-puli sa pagbasa og kusog sa Alma 24:7–10, 12–14. Hangyoa ang klase sa pagsunod, sa pagpaminaw sa tanang paagi nga ang hari sa Anti-Nephi-Lehi miila nga ang Dios mipanalangin kanila.
-
Sumala sa Alma 24:9, unsa ang usa sa mga kanhi sala nga nahimo sa mga Anti-Nephi-Lehi?
-
Sumala sa Alma 24;13, nganong mibalibad sila sa pakig-away sa gubat?
Bahina ang klase ngadto sa duha ka grupo. Dapita ang unang grupo sa pagbasa sa Alma 24:11, 15, nga mangita sa mga pulong nga nagpakita sa mga paningkamot sa mga Anti-Nephi-Lehi sa paghinulsol. Hangyoa ang ikaduhang grupo sa pagbasa sa Alma 24:16–19, nga mangita sa unsay gibuhat sa mga Anti-Nephi-Lehi aron masiguro nga sila magpabilin nga limpyo. Kon ang mga estudyante nakagahin na og igong oras sa pagbasa, dapita sila sa pagpakigbahin unsa ang ilang nakit-an. Mahimo ka nga mogamit sa mosunod nga mga pangutana aron makagawas ang dugang nga mga ideya:
-
Sa inyong hunahuna unsa ang gipasabut sa hari sa dihang siya miingon,“Tungod kini lamang ang tanan nga atong mahimo … aron maghinulsol”? (Alma 24:11). (Kini nga mga pulong naghulagway sa dagkong mga paningkamot ug determinasyon sa mga Anti-Nephi-Lehi sa paghinulsol sa ilang mga sala.)
-
Ang pulong nga pagpamatuod makita katulo ka higayon sa Alma 24:15–16, 18. Sa unsang paagi nga ang paglubong sa ilang mga hinagiban sa ilawom sa yuta nagsilbing usa ka pagpamatuod? (Kini nagpakita sa ubang mga tawo ug ngadto sa Dios nga sila tinud-anay nga misalikway, o mibiya, sa ilang mga sala.)
Dapita ang usa ka estudyante sa pagbasa sa mosunod nga pamahayag ni Presidente Spencer W. Kimball:
“Sa pagbiya sa sala ang usa ka tawo dili lamang mangandoy alang sa mas maayo nga mga kahimtang. … Kinahanglang makasiguro siya nga dili basta lang siya mibiya sa sala apan nga siya nag-usab sa mga sitwasyon nga naglibut sa sala. Kinahanglan gayud niyang likayan ang mga dapit ug mga kahimtang ug mga higayon diin ang sala nahitabo, kay kini labing dali nga makapasubli niini. Kinahanglan gayud nga iyang biyaan ang mga tawo kinsa kauban sa paghimo sa sala. Mahimong dili niya kasilagan ang mga tawo nga naapil apan kinahanglan gayud nga likayan sila ug ang tanan nga may kalabutan sa sala” (The Miracle of Forgiveness [1969], 171–72).
-
Unsa ang gibuhat sa mga Anti-Nephi-Lehi aron malikayan ang mga kahimtang ug mga tawo nga lagmit moagni kanila nga padayunon ang ilang kanhi mga sala?
Mahimong hatagan nimo og gamayng panahon ang mga estudyante sa pagpamalandong kon adunay bisan unsang kahimtang sa ilang mga kinabuhi nga kinahanglan nilang usbon aron sa paghinulsol ug pagbiya sa usa ka sala nga ilang gipanglimbasugan.
Isulat ang mosunod sa pisara: Kon kita … , ang Dios …
Hangyoa ang mga estudyante sa pagribyu sa Alma 24:10–18, nga mangita og mga paagi nga mahimo nilang makompleto ang pamahayag diha sa pisara. (Mahimong mosugyot ka nga ang mga estudyante mosulat og usa ka pamahayag sama sa mosunod diha sa ilang mga kasulatan: Kon kita mobuhat kutob sa atong mahimo nga makahinulsol, ang Dios motangtang sa atong kahasol sa tanlag ug motabang kanato nga magpabilin nga limpyo.)
I-refer og usab ang mga estudyante ngadto sa Alma 24:17.
-
Unsa ang pipila ka mga ehemplo sa mga hinagiban sa rebelyon (tan-awa sa Alma 23:7) nga mahimong ibutang o ilubong sa katawhan samtang sila nakabig ngadto sa Ginoo? (Tabangi ang mga estudyante nga makita nga ang mga hinagiban sa rebelyon mahimong maglakip sa makasasala nga kinaiya o mga buhat nga kinahanglang undangon sa katawhan aron makabig ngadto sa Ginoo.)
Dapita ang usa ka estudyante sa pagbasa sa mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:
“Ang paghinulsol eksaktong mahitabo lang hangtud nga kamo moingon nga ‘mag-usab na ko’—ug buhaton gayud kini. Oo adunay mga problema nga sulbaron ug mga pagpahiuli nga himoon. Mahimong maayo kaayo ninyong nagahinan—sa pagkatinuod mas maayo gayud nga inyong igahin—ang nahabilin sa inyong kinabuhi sa pagmatuod sa inyong paghinulsol pinaagi sa kapermanente niini” (“For Times of Trouble,” New Era, Okt. 1980, 11–12).
Hangyoa ang mga estudyante sa pagpasabut sa mga lihok nga mahimong buhaton sa usa ka batan-ong lalaki o batan-ong babaye aron malikayan ang pagsubli sa matag usa sa mosunod nga mga sala: paglapas sa Pulong sa Kaalam, sa pagtan-aw og pornograpiya, ug dili magmabination ngadto sa mga igsoon.
Dapita ang mga estudyante sa paghunahuna kon unsa kaha ang gibati sa mga Anti-Nephi-Lehi human sila milubong sa ilang mga hinagiban ug dayon nakadiskubre nga ang kasundalohan sa Lamanite nagsingabut aron sa pag-ataki kanila. Hangyoa ang mga estudyante sa pagbasa sa hilum sa Alma 24:20–22.
Isulat ang mosunod nga kamatuoran diha sa pisara: Kon kita mohupot sa atong mga pakigsaad, makahimo kita sa pagtabang sa uban nga makabig. Dapita ang pipila ka estudyante nga magpuli-puli sa pagbasa og kusog sa Alma 24:23–27. Hangyoa ang klase sa pagsunod, nga mangita sa mga pulong nga nagtudlo sa mga baruganan nga nasulat sa pisara.
-
Sa unsang paagi nga kining istorya nakaimpluwensya sa inyong tinguha sa paghupot sa inyong mga pakigsaad?
-
Unsa ang atong mahimo aron mapalig-on ang atong mga tinguha ug abilidad sa paghupot sa mga pakigsaad nga atong gihimo uban sa Ginoo?
Dapita ang mga estudyante sa pagpakigbahin sa bisan unsang mga kasinatian nga ilang naagian uban sa baruganan nga naa sa pisara. Tapusa pinaagi sa pagpakigbahin sa imong pagpamatuod sa mga baruganan nga gitudlo niini nga leksyon.
Komentaryo ug Background nga Impormasyon
Alma 23:17. “Sila mitawag sa ilang mga ngalan og Anti-Nephi-Lehi”
“Ang mga Lamanite nga nakabig pinaagi sa upat ka anak nga mga lalaki ni Mosiah ug sa ilang mga kompanyon nga misyonaryo mitawag sa ilang mga kaugalingon sa pangalan nga ‘mga Anti-Nephi-Lehi.’ (Alma 23:17; Alma 24:1–5.) Ang ‘Nephi-Lehi’ nga kabahin sa ulohan tingali adunay kalabutan sa mga yuta sa Nephi ug Lehi (o sa mga tawo sa una nga nanimuyo niadto nga kayutaan) kay sa ngadto sa mga kaliwatan ni Nephi o Lehi.
“Hinoon, si Dr. Hugh Nibley nakakaplag og ‘usa ka Semitic ug komon nga Indo-European nga kagikan nga magsumpay ngadto sa anti nga nagpasabut nga “sa panag-atubang” o “pag-atubang,” nga daw nag-atubang sa salamin, ug pinaagi sa sumpay kon “ang usa misupak” o “mosundog.”’ (Kinutlo sa Eldin Ricks, Book of Mormon Study Guide, p. 63.) Mao nga ang termino nga ‘mga Anti-Nephi-Lehi’ tingali nagpasabut niadtong kinsa misundog sa mga pagtulun-an sa kaliwatan ni Nephi ug Lehi” (Daniel H. Ludlow, A Companion to Your Study of the Book of Mormon [1976], 209–10).