Leksyon 70: Alma 3–4

Leksyon 70

Alma 3–4

Pasiuna

Human miapil sa kasundalohan sa Lamanite, ang mga Amlicite palahi sa ilang kaugalingon gikan sa mga Nephite pinaagi sa paghimo og pula nga mga marka sa ilang mga agtang. Ang mga Amlicite ug ang mga Lamanite nakiggubat batok sa mga Nephite, ug “kaliboan ug mga napulo ka mga kaliboan” ang nangamatay sa gubat (tan-awa sa Alma 3:26). Ang misunod niining gubat, daghang mga Nephite ang nagmapainubsanon sa ilang kaugalingon ug “nahigmata sa usa ka panumduman sa ilang katungdanan” (Alma 4:3). Mga 3,500 ang nabunyagan ug mipasakop sa Simbahan. Hinoon, sa misunod nga tuig, daghang mga miyembro sa Simbahan ang nahimong magarbuhon ug nagsugod sa pagpanggukod sa uban. Nabalaka mahitungod niining pagkadautan, si Alma miluwat sa iyang katungdanan isip labaw nga maghuhukom ug mipadayon sa pagserbisyo isip halangdong pari sa tibuok Simbahan. Niining kapasidad, nagplano siya sa pagbiyahe libot sa rehiyon, magdala sa lunsay nga pagpamatuod ug magtawag sa katawhan ngadto sa paghinulsol.

Mga Sugyot alang sa Pagtudlo

Alma 3:1–19

Ang mga Nephite nakig-away sa mga Amlicite ug mga Lamanite

Bahina ang klase ngadto sa gagmayng mga grupo. Hatagi ang matag grupo og usa ka piraso nga papel nga gisulatan og: mga sinina, estilo sa buhok, ariyos ug mga alahas, mga patik. Hangyoa ang mga grupo sa paghisgot unsa nga mga mensahe nga mahimong ipadala, sa tinuyo o dili tinuyo, niini nga mga butang.

Pahinumdumi ang mga estudyante nga ang mga Amlicite mibulag gikan sa mga Nephite ug miapil sa kasundalohan sa Lamanite (tan-awa sa Alma 2). Dapita ang mga estudyante sa pagbasa sa Alma 3:4 ug ipapangita kon giunsa pag-usab sa mga Amlicite ang ilang mga hitsura.

Kang kinsa gusto sa mga Amlicite nga sila “[malahi]”?
Sa unsang paagi nga ang ubang mga tawo karon mapalahi ang ilang mga kaugalingon gikan sa pagkamatarung pinaagi sa ilang mga hitsura? (Samtang motubag ang mga estudyante, siguroha nga maklaro nga ang pipila ka mga tawo motuyo sa pag-usab sa ilang mga hitsura aron mabulag ang ilang kaugalingon gikan sa matarung o sa pagsupak batok sa mga sumbanan sa Simbahan. Ang uban nagsunod sa kalibutanon nga uso nga wala makaamgo nga naghatag sila og mga mensahe mahitungod sa ilang mga kaugalingon.)

Ipasabut nga sa dihang ang mga Amlicite nagmarka sa ilang mga agtang aron mailhan ang ilang mga kaugalingon gikan sa mga Nephite, ilang gipakita nga sila nagdala sa tunglo sa mga Lamanite diha sa ilang mga kaugalingon. Dapita ang pipila ka estudyante nga magpuli-puli sa pagbasa og kusog sa Alma 3:14–19. Tabangi ang klase sa pag-analisar niining mga bersikulo pinaagi sa pagpangutana sa pipila o sa tanan sa mosunod nga mga pangutana:

Unsa nga mga pulong diha sa Alma 3:18 ang naghulagway sa mga lihok ug mga kinaiya sa Amlicite ngadto sa Dios? (“Pagsukol batok sa Dios.”)
Sa unsang paagi nga ang mga Amlicite nagdala og tunglo “diha sa ilang mga kaugalingon”? (Alma 3:19).
Unsa ang pipila ka mga kamatuoran nga atong makat-unan gikan niini nga mga bersikulo? (Ang mga tubag mahimong maglakip nga kadtong mipakita og pagsukol batok sa Dios nagdala og negatibo nga mga sangputanan sa ilang mga kaugalingon ug kana kon kita mahibulag gikan sa Dios, kini tungod kay kita mibulag sa atong kaugalingon gikan Kaniya.)

Aron matabangan ang mga estudyante nga makasabut sa kaimportante sa pag-ila sa ilang mga kaugalingon sa matarung nga mga paagi, ipangutana ang mosunod:

Unsa ang pipila ka mga paagi nga atong mapakita pinaagi sa atong sininaan ug panagway nga kita mga disipulo ni Jesukristo? (Kon naglisud ang mga estudyante sa pagtubag niining pangutana, mahimo nimong ipabasa nila ang “Sinina ug Panagway” sa Alang sa Kalig-on sa mga Kabatan-onan [2011], mga pahina 6–8. Ipasabut og maayo nga ang atong pagpamatuod sa ebanghelyo kinahanglang makaimpluwensya sa atong sininaan ug panagway.)

Awhaga ang mga estudyante sa pagpakita nga sila nagsunod sa Ginoo samtang sila naghimo og inadlaw-adlaw nga mga pagpili, lakip sa mga pagpili mahitungod sa ilang sinina ug panagway. Ipasabut og maayo nga pinaagi sa atong sinina ug panagway maila nato ang atong kaugalingon isip mga disipulo ni Jesukristo.

Alma 3:20–27

Liboan ang nangamatay sa gubat tali sa mga Nephite ug sa mga Lamanite ug mga Amlicite

I-summarize ang Alma 3:20–25 pinaagi sa pagpahayag nga ang mga Nephite miabug sa mga Lamanite, apan ang duha ka habig adunay liboan ka mga naangol. Dapita ang usa ka estudyante sa pagbasa og kusog sa Alma 3:26–27. Hangyoa ang klase sa pagpaminaw alang sa usa ka leksyon nga gusto ni Mormon nga atong masabtan.

Sumala niining mga bersikulo, unsa nga ganti ang moabut niadtong kinsa mosunod sa Ginoo?
Unsa ang sangputanan nga moabut niadtong kinsa dili mosunod sa Ginoo?

Isip summary, mahimo nimong isulat ang mosunod nga baruganan sa pisara: Makadawat kita og kalipay o kaalautan depende kon si kinsa ang atong gipili nga sundon.

Dapita ang mga estudyante sa paghunahuna mahitungod sa mga panalangin nga moabut gikan sa pagpili sa pagsunod sa Ginoo.

Unsa nga mga panalangin ang inyong nadawat gikan sa Ginoo samtang mipili kamo sa pagsunod Kaniya?

Alma 4:1–14

Human sa usa ka panahon sa paglambo sa Simbahan, ang mga miyembro sa Simbahan nahimong mapagarbuhon ug nakig-away sa usag usa

Isulat ang mapainubsanon ug mapagarbuhon diha sa pisara.

Unsa ang buot ipasabut sa mapainubsanon? (Ang pagkahimong mapainubsanon mao ang matudloan ug ang pag-ila uban sa pasalamat sa atong pagsalig ngadto sa Ginoo—ang pagsabut nga kita kanunayng nanginahanglan sa Iyang suporta.)

Dapita ang pipila ka mga estudyante nga magpuli-puli sa pagbasa og kusog sa Alma 4:1–5. Hangyoa ang klase sa pagpangita og ebidensya nga ang mga Nephite nagmapainubsanon. Samtang ang mga estudyante nagpasabut unsay ilang nakit-an, tingali makatabang ang pagpasabut nga dili kita kinahanglang molahutay sa trahedya aron mamahimong mapainubsanon—makapili kita nga magmapainubsanon.

Ipasabut nga ang paghulagway sa mga Nephite diha sa Alma 4:6 lahi ra kaayo gikan sa paghulagway diha sa Alma 4:3–5. Itudlo ang pulong mapagarbuhon diha sa pisara.

Unsa ang buot ipasabut sa mapagarbuhon? (Ang garbo mao ang sukwahi sa kamapainubsanon. Ang mga tawo nga mapagarbuhon nagbutang sa ilang kaugalingon sa oposisyon sa usag usa ug ngadto sa Dios. Ilang gipataas ang ilang mga kaugalingon nga molabaw niadtong anaa naglibot kanila ug mosunod sa ilang kaugalingong mga tinguha kay sa kabubut-on sa Dios.)

Dapita ang katunga sa klase sa pagbasa sa hilum sa Alma 4:6–8 ug ang laing katunga sa klase sa pagbasa sa hilum sa Alma 4:9–12. Hangyoa ang duha ka grupo sa pag-ila sa mapagarbuhon nga mga lihok sa pipila ka mga Nephite ug sa unsang paagi kadtong mga lihok nakaapekto sa uban. Human sa igong panahon, ipasulti sa duha ka grupo unsa ang ilang nakit-an.

Unsa ang gitudlo niini nga mga bersikulo mahitungod kon sa unsang paagi ang garbo nakaimpluwensya sa paagi sa atong pagtratar sa uban?
Unsa nga pasidaan ang inyong nakita sa Alma 4:10? (Siguroha nga ang mga estudyante makasabut nga kon magpakita kita og dili matarung nga ehemplo, ang atong mga lihok mahimong makababag sa uban sa pagdawat sa ebanghelyo.)

Dapita ang usa ka estudyante sa pagbasa og kusog sa Alma 4:13–14. Hangyoa ang klase sa pagpangita og mga ehemplo kon giunsa sa ubang mga Nephite nga nagmapainubsanon bisan kon ang uban nagmapagarbuhon.

Unsa ang gitudlo niini nga mga bersikulo mahitungod kon sa unsang paagi ang pagkamapainubsanon nakaimpluwensya sa paagi sa atong pagtratar sa uban?

Ipasabut og maayo nga ang atong mga desisyon nga magmapainubsanon o magmapagarbuhon makaapekto kanato ug sa uban. Kon duna pay oras, dapita ang mga estudyante sa pagsulat diha sa mga notebook o scripture study journal mahitungod sa mga kasinatian nga ilang naagian nga nagpakita sa kamatuoran niining pamahayag.

Alma 4:15–20

Si Alma miluwat isip labaw nga maghuhukom aron siya makapahinungod sa iyang panahon sa pagtawag sa katawhan sa paghinulsol

Dapita ang mga estudyante sa paghunahuna kon sila ang naa sa dapit ni Alma. Sila ang labaw nga maghuhukom, ug daghang tawo ang nahimong mapagarbuhon ug nanggukod niadtong nagpabilin nga mapainubsanon.

Unsa ang mahimo ninyong buhaton aron matabangan ang mga tawo nga mausab?

Dapita ang usa ka estudyante sa pagbasa og kusog sa Alma 4:15–19. Hangyoa ang klase sa pagpangita kon unsay gipili nga buhaton ni Alma.

Unsa ang desisyon ni Alma nga buhaton? (Siya midesisyon sa pagbiya sa iyang posisyon isip labaw nga maghuhukom aron siya makapahinungod sa iyang panahon sa pagtudlo sa katawhan.)
Unsa ang gisugyot sa mga pulong “sa paghatag sa lunsay nga pagpamatuod” (Alma 4:19) mahitungod kon giunsa sa pagtudlo ni Alma?
Kanus-a kamo nakadungog og mga tawo nga naghatag og “lunsay nga pagpamatuod”? Sa unsa nga paagi kining mga kasinatian nakaimpluwensya kaninyo?
Unsa nga mga kamatuoran ang atong makat-unan gikan sa mga ehemplo ni Alma sa Alma 4:19?

Ang mga tubag sa mga estudyante niini nga pangutana mahimong maglakip sa mosunod:

Ang pagtuman sa atong espirituhanon nga mga katungdanan mahimong maglakip og sakripisyo.

Ang paghatag og lunsay nga pagpamatuod makatabang sa uban nga mas maduol sa Dios.

Awhaga ang mga estudyante sa pagpangita sa lunsay nga pagpamatuod ni Alma samtang magbasa sila sa Alma 5–16 sa ilang personal nga pagtuon ug samtang sila maghisgot niining mga kapitulo sa umaabut nga mga leksyon. Awhaga usab sila sa paghatag og pagtagad sa epekto sa pagpamatuod ni Alma diha sa mga tawo.

Ribyu sa Scripture Mastery

Ipaila ang mga estudyante sa pipila ka bag-ong mga scripture mastery passage, o ribyuha ang pipila ka mga tudling sa kasulatan nga ilaha nang nahibaloan. Pag-andam og mga pangutana nga motabang nila nga makadiskubre sa mga baruganan sa mga tudling sa kasulatan. Dapita sila sa pagsulat og usa ka tumong diha sa ilang mga notebook o mga scripture study journal mahitungod sa unsay ilang buhaton aron mas masunod ang usa niining mga baruganan. Hatagi sila og piho nga panahon sa pagkompleto sa ilang mga tumong, ug hangyoa sila sa pagpangandam sa pagreport ngadto sa sakop sa klase o sa tibuok klase kon sila makakompleto na niini.

Pahinumdom: Kon wala na kay panahon sa paggamit niining kalihokan isip kabahin niining leksyon, mahimo nimo kining gamiton sa laing adlaw. Alang sa ubang mga kalihokan sa pagribyu, tan-awa ang appendix sa katapusan niining manwal.

Komentaryo ug Background nga Impormasyon

Alma 3:4. Mga patik ug pagpatusok sa lawas

Ang mga Amlicite nagmarka sa ilang kaugalingon aron sila “mailhan gikan sa mga Nephite” (Alma 3:4). Sa atong panahon, ang mga propeta mipahimangno sa batan-ong mga lalaki ug mga babaye nga ipabilin nga sagrado ang ilang mga lawas pinaagi sa dili pagmarka sa ilang mga kaugalingon sa mga patik o pagpatusok sa lawas. Si Presidente Gordon B. Hinckley miingon:

“Dili nako masabtan kon nganong ang usa ka batan-ong lalaki—o batan-ong babaye, tungod nianang butanga—mangandoy nga moagi sa sakit nga proseso sa pagdaut sa panit sa nagkalain-laing kolor nga mga representasyon sa mga tawo, hayop, ug nagkalain-laing simbolo. Pinaagi sa mga patik, ang proseso permanente, gawas lang kon dunay laing sakit ug mahal nga paagi sa pagtangtang niini. Mga amahan, pahimangnoi ang inyong mga anak nga lalaki batok sa pagpapatik sa ilang mga lawas. Mahimong ibaliwala nila ang inyong istorya karon, apan moabut ang panahon nga magpasalamat sila kaninyo. Ang patik usa ka pagdrowing diha sa templo sa lawas. Ingon man ang pagpatusok sa lawas para sa dinaghan nga mga ariyos sa dalunggan, diha sa ilong, gani sa dila.

“Makahunahuna ba kaha sila nga matahum kana? … Ang Unang Kapangulohan ug ang Korum sa Napulog Duha namahayag nga kami nagsaway sa mga patik ug usab ‘sa pagpatusok sa lawas gawas sa medikal nga katuyoan.’ Kami, hinoon, wala magdili ‘sa ginagmay nga pagpatusok sa dalunggan sa mga babaye para sa usa ka parisan nga ariyos’—usa ka parisan” (“Great Shall Be the Peace of Thy Children,” Ensign, Nob. 2000, 52).

Alma 3:5. Pagsunod sa mga uso sa fashion

Ang mga Amlicite miusab sa ilang hitsura aron mas mahisamang tan-awon sa mga Lamanite. Daghang mga Santos sa Ulahing mga Adlaw karon mibati nga napugos sa pagsunod sa mga nauso nga fashion aron makita sila nga mas nahisama sa mga tawo kinsa popular sa kalibutan. Apan ang pipila ka mga uso magdala sa mga tawo ngadto sa “pagsupak sa propeta ug, hinoon, misunod sa hilig sa kalibutan” (“Questions and Answers,” New Era, Mar. 2006, 14; tan-awa usab sa Alang sa Kalig-on sa mga Kabatan-onan [2011], 6–8).

Si Elder M. Russell Ballard mitudlo sa mga batan-ong lalaki nga naghupot sa priesthood nga ang ubang mga uso nakapakunhod sa ilang abilidad sa pagbarug sa kamatuoran:

“Adunay usa ka subculture nga nagdasig sa kontemporaryo nga mga gang ug sa ilang kriminal nga gawi nga inubanan sa musika, estilo sa sininaan, pinulongan, kinaiya, ug mga pamatasan. Daghan kaninyo ang nakakita nga ang mga higala nga tigpa-uso mihangop sa estilo isip usa ka butang nga ‘nindot’ ug ‘ngilngig,’ para lang mabira ngadto sa subculture. …

“… Dili ko motuo nga makabarug kamo sa kamatuoran ug matarung samtang nagsul-ob og bisan unsa nga dili tukma nga butang alang sa tawo nga naghupot sa priesthood sa Dios” (“Standing for Truth and Right,” Ensign, Nob. 1997, 38–39).

Alma 3:6–17. Ang marka ug ang tunglo

Samtang magtuon ang mga estudyante sa Alma 3, tingali aduna silay mga pangutana mahitungod sa marka ug sa tunglo nga gibutang sa mga Lamanite. Mahimo nimong ipasabut nga adunay kalainan tali sa marka ug sa tunglo. Ang marka nga gibutang diha sa mga Lamanite mao ang itum nga panit (tan-awa sa Alma 3:6). Ang katuyoan niining marka mao ang pag-ila ug paglain sa mga Lamanite gikan sa mga Nephite (tan-awa sa Alma 3:8). Ang tunglo, mas bug-at, mao ang kahimtang nga “ipahimulag gikan sa atubangan sa Ginoo” (2 Nephi 5:20). Ang mga Lamanite ug mga Amlicite nagdala niining tunglo sa ilang kaugalingon tungod sa ilang pagsukol batok sa Dios (tan-awa sa 2 Nephi 5:20; Alma 3:18–19). Bisan tuod og itum nga pamanit ang gigamit niining higayuna isip usa ka marka sa tunglo sa mga Lamanite, ang Basahon ni Mormon nagtudlo nga ang Ginoo “wala maglimud kang bisan kinsa nga moduol ngadto kaniya, itum ug puti, ulipon ug gawasnon, lalaki ug babaye; … ug ang tanan managsama ngadto sa Dios” (2 Nephi 26:33). Ang ebanghelyo ni Jesukristo alang sa tanan. Ang Simbahan klaro nga nanghimaraut sa diskriminasyon sa pamanit, lakip na sa bisan unsa ug sa tanan nga nangaging diskriminasyon sa pamanit sa mga indibidwal sa sulod ug gawas man sa Simbahan. Gipahayag ni Presidente Gordon B. Hinckley:

“Walay usa nga mosulti og pagpangdaut kabahin sa ubang kaliwatan nga makakonsiderar sa iyang kaugalingon nga tinuod nga tinun-an ni Kristo. Ni makonsiderar niya ang iyang kaugalingon nga nahiuyon sa mga pagtulun-an sa Simbahan ni Kristo. …

“Atong ilhon nga ang matag usa kanato anak sa atong Amahan sa Langit kinsa nahigugma sa tanan Niyang mga anak” (“Ang Panginahanglan sa Mas Labaw nga Pagkamabination,” Ensign o Liahona, Mayo 2006, 58). Alang sa dugang nga tabang niini nga hilisgutan, tan-awa sa leksyon 27.

Alma 4:9–12. “Usa ka dako nga babag”

Samtang ang pipila ka mga miyembro sa Simbahan sa mga Nephite nahimong mapahitas-on, ang ilang negatibo nga mga ehemplo nahimong dako nga babag niadtong wala mahisakop sa Simbahan (tan-awa sa Alma 4:9–12; tan-awa usab sa Alma 39:11). Si Presidente Gordon B. Hinckley miasoy sa mosunod nga istorya, nga naghulagway sa mga sangputanan sa ngil-ad ug maayo nga mga ehemplo:

“Siya dili miyembro sa Simbahan. Siya ug ang iyang mga ginikanan aktibo sa laing tinuohan.

“Nahinumdom siya nga sa nagdako pa siya pipila sa iyang mga kaubang LDS motamay kaniya, mipabati kaniya nga wala siya sa sakto nga lugar ug mobugal-bugal kaniya.

“Dinhi siya naglagot sa Simbahan ug sa mga tawo niini. Wala siyay nakita nga maayo niini.

“Unya ang iyang papa nawad-an og trabaho ug kinahanglan silang mamalhin. Sa bag-ong dapit, sa edad nga 17, nagpa-enrol siya sa kolehiyo. Didto, sa unang higayon sa iyang kinabuhi, iyang nabati ang kasuod sa mga amigo, usa niini ginganlan og Richard, mihagad kaniya sa pag-apil sa usa ka club nga siya mao ang presidente. Siya misulat: ‘Sa unang higayon sa akong kinabuhi adunay gusto nga makig-uban kanako. Wala ko makahibalo unsay itubag, pero mapasalamaton ako nga miapil. … Kadto ang pagbati nga gusto nako, ang mobati nga aduna kay amigo. Nag-ampo ako niini sa tibuok kong kinabuhi. Ug karon human sa 17 ka tuig nga paghulat, ang Dios mitubag sa akong pag-ampo.’

“Sa edad nga 19 nakauban niya sa usa ka tulda si Richard atol sa ilang pagpanarbaho pagka-summer. Iyang namatikdan si Richard nga magbasa og libro kada gabii. Nangutana siya kon unsay iyang gibasa. Giingnan siya nga nagbasa siya sa Basahon ni Mormon. Siya mipuno: ‘Dali-dali nakong giusab ang istorya ug natulog dayon. Total, mao kana ang libro nga nakapaguba sa akong pagkabata. Misulay ko sa pagkalimot niini, pero milabay ang usa ka semana ug dili ako makatulog. Nganong magbasa man siya niini kada gabii? Dili ko mahimutang nga wala matubag ang pangutana diha sa akong hunahuna. Mao nga usa ka gabii ako siyang gipangutana kon unsay importante kaayo sa mao nga libro. Unsa man ang naa niini? … Misugod siya og basa diin siya dapit mihunong. Mibasa siya kabahin ni Jesus ug kabahin sa pagpakita niya sa Amerika. Nakuratan ko. Wala ko magtuo nga ang mga Mormon nagtuo kang Jesus.’ …

“Sa misunod nga okasyon kining batan-ong lalaki ug iyang amigo nagbiyahe. Si Richard mihatag kaniya og Basahon ni Mormon ug mihangyo nga basahon niya kini og kusog. Misunod siya, ug sa kalit ang inspirasyon sa Balaang Espiritu mihikap kaniya.

“Nanglabay ang panahon ug ang iyang pagtuo mitubo. Miuyon siya nga magpabunyag. …

“Mao kadto ang katapusan sa istorya, apan adunay talagsaon nga mga pamahayag diha sa istorya. Usa mao ang makaulaw nga gipanghimo kaniya sa iyang mga batang higala sa usa ka Mormon nga komunidad.

“Sunod mao ang giunsa siya pagtagad sa iyang bag-ong higala nga si Richard. Managlahi gayud kaayo kay sa iyang unang kasinatian. Kini misangput sa iyang pagkakabig ug pagpabunyag taliwala sa makalilisang nga kalisdanan” (“Ang Panginahanglan sa Mas Labaw nga Pagkamabination,” Ensign o Liahona, Mayo 2006, 59–60).

Alma 42:19). “Lunsay nga pagpamatuod”

Sa dihang nakita ni Alma nga gikinahanglan niyang tubson ang mga tawo pinaagi sa “paghatag sa lunsay nga pagpamatuod batok kanila” (Alma 4:19), siya mitawag sa katawhan ngadto sa paghinulsol. Hinoon, sa atong mga miting sa pagpuasa ug pagpamatuod, ang atong mga pagpamatuod kinahanglang yano nga pagpamahayag sa atong hugot nga pagtuo, dili mga pagtudlo. Si Presidente Spencer W. Kimball miingon:

“Ayaw sultihi ang uban unsaon sa pagpakabuhi. Isulti lang kon unsa ang inyong gibati. Kana mao ang pagpamatuod. Sa higayon nga kamo magsugod sa pagsangyaw ngadto sa uban, ang inyong pagpamatuod natapos” (The Teachings of Spencer W. Kimball, ed. Edward L. Kimball [1982], 138).