Librarya
Leksyon 69: Alma 1–2

Leksyon 69

Alma 1–2

Pasiuna

Wala madugay human nga si Alma nahimong labaw nga maghuhukom, usa ka tawo nga ginganlan og Nehor mibutang sa iyang kaugalingon isip magsasangyaw sa katawhan. Namulong siya batok sa Simbahan ug sa doktrina niini, ug siya mikombinser og daghan nga motuo ngadto kaniya ug mihatag kaniya og kwarta. Sa dihang si Nehor mipatay ni Gideon, kinsa matinud-anon nga miyembro sa Simbahan, gidala siya sa atubangan ni Alma. Nasuta nga si Nehor sad-an sa pagpanapi sa mga pari ug pagsulay sa pagpanapi sa mga pari pinaagi sa espada, si Alma mihukom ni Nehor og kamatayon. Ang Simbahan miuswag, gipangulohan sa makugihon ug mapainubsanon nga mga pari, apan ang panapi sa mga pari nagpadayon. Si Amlici, usa ka maliputon nga tawo sama ni Nehor, nakakuha og suporta sa daghang katawhan ug misulay nga wala magmalampuson sa pagkahimong hari sa mga Nephite. Siya ug ang iyang mga sumusunod nakalitan, og nakiggubat sa mga Nephite, ug sa katapusan nakighiusa sa ilang mga pwersa uban sa kasundalohan sa Lamanite. Napalig-on pinaagi sa Ginoo, ang mga Nephite namatyan og daghan apan nabuntog ang mga pagpang-ataki niining mga sundalo.

Mga Sugyot alang sa Pagtudlo

Alma 1

Bisan pa sa pagkuyanap sa panapi sa mga pari ug pagpanggukod, daghang mibarug nga lig-on sa pagtuo

Isulat ang popular diha sa pisara.

  • Unsa ang pipila ka mga kakuyaw sa pagtinguha og popularidad? Unsa ang mga kakuyaw sa pagsunod sa tawo tungod lang kay sila popular?

Ipasabut nga ang usa ka tawo nga ginganlan og Nehor nahimong popular sa ubang tawo didto sa Zarahemla. Dapita ang mga estudyante sa pagbasa sa hilum sa Alma 1:2–6, nga mangita kon unsa ang gitudlo ni Nehor ug giunsa kini pagtubag sa mga tawo. Human og report sa mga estudyante unsa ang ilang nakit-an, ikonsiderar ang pagpangutana sama sa mosunod:

  • Nganong ang pagtulun-an ni Nehor sa Alma 1:4 makuyaw? (Kon maglisud ang mga estudyante sa pagtubag niining pangutana, ipasabut nga si Nehor mitudlo nga “ang tanan nga mga tawo makaangkon og kinabuhi nga dayon,” bisan unsa pa ang ilang gibuhat. Kini nga pagtulun-an nagbaliwala sa panginahanglan sa paghinulsol, mga ordinansa, ug pagsunod sa mga sugo sa Dios. (Tan-awa usab sa Alma 15:15.)

  • Unsa nga mga sangputanan ang mahimong moabut sa usa ka tawo kinsa nagtuo niining doktrina?

  • Sa unsang paagi nga ang kalampusan ni Nehor nakaapekto kaniya? (Tan-awa sa Alma 1:6.)

I-summarize ang Alma 1:7–15 pinaagi sa pagpasabut nga usa ka adlaw si Nehor nagsangyaw ngadto sa usa ka grupo sa iyang mga sumusunod sa dihang nahimamat niya si Gideon, kinsa mitabang sa pagluwas sa katawhan ni Limhi gikan sa pagkaulipon ug kinsa sa kasamtangan nagserbisyo isip magtutudlo sa Simbahan. Si Nehor “misugod sa pakiglalis uban kaniya sa mahait nga paagi, nga siya unta modala sa mga katawhan palayo sa simbahan; apan ang tawo [si Gideon] nakasanta kaniya, nagbadlong kaniya uban sa mga pulong sa Dios” (Alma 1:7). Si Nehor, sa kasuko, mihulbot sa iyang espada ug mipatay ni Gideon. Ang mga tawo sa Simbahan midala ni Nehor ngadto kang Alma, nga mao ang labawng maghuhukom, aron mahukman sa iyang mga krimen. Si Alma mihukom ni Nehor nga patyon, ug si Nehor “nag-antus og makauulaw nga kamatayon” (Alma 1:15). Mahimo nimong ipasabut nga ang makauulaw nagpasabut og pagkasinalikway, pagpakaulaw, o pagkuha sa dungog.

Dapita ang mga estudyante sa pagsiksik sa unang pipila ka linya sa Alma 1:12 alang sa pulong nga gigamit ni Alma sa paghulagway unsa ang gipaila ni Nehor ngadto niining mga tawo sa unang higayon. Dapita ang mga estudyante sa pagtan-aw sa footnote 12a. Ipapakli nila ngadto sa unang pakisayran nga nalista sa: 2 Nephi 26:29. Hangyoa sila nga basahon sa hilum kini nga bersikulo.

  • Sa inyong kaugalingong mga pulong, unsa ang panapi sa mga pari? Unsa kaha ang gipasabut niini alang sa mga tawo nga “mowali ug mopahiluna sa ilang mga kaugalingon ingon og usa ka kahayag ngadto sa kalibutan”? Ngano nga kini makuyaw?

  • Sa unsang paagi nga ang pagtudlo ni Nehor usa ka ehemplo sa panapi sa mga pari?

  • Sumala sa Alma, unsa ang mahitabo ngadto sa mga tawo kon ang panapi sa mga pari gipatuman diha kanila?

  • Ngano kaha nga makatintal alang sa tawo ang pagtudlo aron ang ubang tawo modayeg kanila?

Dapita ang usa ka estudyante sa pagbasa og kusog sa Alma 1:16. Hangyoa ang klase sa pagtino kon sa unsang paagi ug nganong ang panapi sa mga pari nagpadayon sa pagkuyanap, bisan human sa kamatayon ni Nehor. Human makareport ang mga estudyante sa ilang nakit-an, pangutan-a:

  • Sumala sa Alma 1:16, unsa ang mga tumong sa mga tawo kinsa nagbuhat og pagpanapi sa mga pari? (Sila mibuhat niini “alang sa mga katigayunan ug dungog”—sa laing pagkasulti, aron makaangkon og kwarta ug popularidad.)

Ipasabut nga ang pagpanapi sa mga pari ug ang mga epekto niini midagsa sa mga Nephite sulod sa daghang katuigan (tan-awa sa Alma 2; 15:15; 24:28). Ipasabut nga sa atong panahon, kinahanglan kitang magmatngon sa pagpanapi sa mga pari, sulod sa Simbahan ingon man sa gawas sa Simbahan. Kinahanglan dili nato itugot ang atong mga kaugalingon nga malingla sa mga tawo nga nagbuhat sa pagpanapi sa mga pari. Magbantay usab kita batok sa mga kinaiya ug mga lihok sa pagpanapi sa mga pari sa atong kaugalingong paningkamot sa pagtudlo sa ebanghelyo.

  • Unsa nga mga oportunidad nga aduna kamo sa pagtudlo sa ebanghelyo? (Tabangi ang mga estudyante nga makita nga sila adunay daghang oportunidad sa pagtudlo sa ebanghelyo. Makatudlo sila sa usag usa samtang miapil sa seminary ug sa ilang mga korum ug klase. Makatudlo sila sa ilang mga pamilya diha sa mga family home evening. Ang mga batan-ong lalaki magsilbing mga home teacher. Ang batan-ong mga lalaki ug batan-ong mga babaye mahimong hangyoon sa pagpamulong diha sa miting sa sakrament. Makapaambit sila sa ebanghelyo sa uban karon, ug mahimong mangandam sila sa pagserbisyo isip full-time nga mga misyonaryo.)

Dapita ang usa ka estudyante sa pagbasa sa mosunod nga pamahayag ni Elder David A. Bednar sa Korum sa Napulog Duha ka mga Apostoles:

Elder David A. Bednar

“Bisan unsang butang nga inyong buhaton o akong buhaton isip magtutudlo nga nakahibalo ug gituyo nga makakuha og pagtagad sa kaugalingon—sa mensahe nga atong gitudlo, sa mga paagi nga atong gigamit, o sa atong personal nga batasan—usa ka matang sa pagpanapi sa mga pari nga nagpugong sa epektibo nga pagtudlo sa Espiritu Santo” (“Seek Learning by Faith,” Ensign, Sep. 2007, 66–67).

Ipasabut og maayo nga kon kita nakahibalo nga mikuha og pagtagad sa atong kaugalingon diha sa atong mga paningkamot sa pagtudlo sa ebanghelyo, nakapugong kita sa epektibong pagtudlo sa Espiritu Santo.

Basaha ang mosunod nga lista sa mga pagdasig nga mahimong anaa sa mga tawo kon sila magtudlo. Dapita ang mga estudyante sa paghisgot hain nga mga pagdasig ang mahimong ehemplo sa pagpanapi sa mga pari ug ngano.

Sa pagdala sa uban ngadto sa Manluluwas.

Sa pagpakita unsa sila ka kataw-anan.

Sa pagtabang sa uban nga mobati sa Espiritu.

Sa pagpakita sa ilang kaalam.

Sa pagtabang sa uban nga magamit ang mga kamatuoran sa ebanghelyo sa ilang mga kinabuhi.

Dapita ang usa ka estudyante sa pagbasa og kusog sa Alma 1:26–27. Hangyoa ang klase sa pagpangita sa mga paagi nga ang mga pari sa Dios milihok sa lahi nga paagi gikan kang Nehor.

  • Sa unsang paagi nga ang mga ehemplo sa mga pari nga Nephite makatabang kanato nga malikayan ang pagpanapi sa mga pari?

  • Sa unsang paagi nga kining mga pari mipakita sa ilang pasalig ngadto sa Dios?

Ipasabut nga ang pagpanapi sa mga pari misangput sa panagbingkil ug pagpanggukod sa mga Nephite. Aron matabangan ang mga estudyante nga makaandam sa pagtuon sa Alma 1:19–33, ipangutana ang mosunod:

  • Kanus-a kamo nakakita og mga tawo nga nanungog, nagbugal-bugal, o nanggukod niadtong nagsunod sa mga sugo sa Dios?

  • Nasulayan na ba ninyo sukad nga mibati nga gisungog, gibugal-bugalan, o gigukod tungod sa pagsunod sa mga sugo? Kon mao, giunsa ninyo pagtubag?

Dapita ang mga estudyante sa pagbasa sa hilum sa Alma 1:19–20, nga mangita sa mga ehemplo sa mga miyembro sa Simbahan nga gipanggukod. Human ang mga estudyante makareport kon unsa ang ilang nakit-an, isulat ang mosunod nga mga pangutana sa pisara ug dapita ang mga estudyante sa pagkopya niini diha sa ilang mga notebook o scripture study journal. Hatagi sila og panahon sa pagbasa sa hilum sa mga tudling sa kasulatan ug motubag sa mga pangutana nga sila ra.

Sumala sa Alma 1:21–24, giunsa sa pagtubag sa pipila ka mga miyembro ang pagpanggukod? Unsa man ang mga sangputanan sa ilang mga binuhatan?

Sumala sa Alma 1:25–31, giunsa sa pagpuyo sa ubang miyembro sa Simbahan bisan sa mga pagpanggukod? Unsa nga mga panalangin ang ilang nadawat?

Kon aduna pay igong panahon ang mga estudyante sa pagtuon niining mga tudling, pangutan-a sila unsa ang atong makat-unan gikan niining mga tudling. Tingali ang mga estudyante makaila sa pipila o tanan sa mosunod nga mga baruganan:

Bisan kon ang mga tawo sa atong palibut dili masulundon, kita mahimong magmalig-on ug dili matarog sa pagsunod sa kasugoan.

Kon kita mosunod sa ebanghelyo, makaangkon kita og kalinaw sa atong mga kinabuhi, bisan kon kita gipanggukod.

  • Kanus-a ninyo nakita nga kining mga baruganan tinuod?

Alma 2

Si Amlici ug ang uban mirebelde ug sa katapusan mipasakop sa mga Lamanite aron makiggubat sa mga Nephite

Ipasabut nga mga upat ka tuig human sa kamatayon ni Nehor, ang mga Nephite nag-atubang og laing dautan nga tawo kinsa nakaangkon og popular nga suporta. Ipares-pares ang mga estudyante. Sa matag parisan, ipabasa sa usa ka estudyante ang Alma 2:1–7 samtang ang lain sa Alma 2:8–18. Tudloi ang mga estudyante sa pag-andam og ulohan [headline] sa mga artikulo sa balita base sa gi-assign ngadto nila nga mga bersikulo, nga naghulagway unsa ang gibuhat sa matarung nga mga tawo sa pagbarug batok sa kadautan. Human sa upat o lima ka minuto, dapita ang mga estudyante sa pagpakigbahin sa ilang mga ulohan ngadto sa ilang mga kauban. Mahimo nimong hangyoon ang pipila ka mga estudyante sa pagpakigbahin sa ilang mga ulohan diha sa klase.

Ipangutana ang mosunod aron masiguro nga ang mga estudyante nakasabut sa mga bersikulo nga ilang gitun-an:

  • Unsa ang gustong buhaton ni Amlici?

  • Sumala sa Alma 2:18, nganong nasumpo man sa mga Nephite ang paningkamot ni Amlici nga mahimong hari? (“Ang Ginoo mihatag og kusog sa kamot sa mga Nephite.” Mahimo nimong awhagon ang mga estudyante sa pagmarka niini nga pamahayag diha sa ilang mga kasulatan.)

Hangyoa ang klase sa paglista og mga ehemplo sa mga kadautan nga giatubang sa mga kabatan-onan karon. Tingali mahisgutan nila ang mga tintasyon, ug tingali mahisgutan usab nila ang mga pagsulay nga ilang giatubang tungod sa kadautan sa uban. Samtang nagpadayon sila sa pagtuon sa Alma 2, dapita sila sa pagpamalandong og mga pamaagi nga sila mahimong makadawat og tabang sa Ginoo aron mabuntog ang mga tintasyon ug mga hagit nga ilang giatubang.

Ipasabut nga ang mga manggugubat nga Nephite nakapildi sa daghang mga Amlicite, apan nahingangha sila sa pagkakita nga ang nahabilin nga mga Amlicite mipasakop sa mga sundalo sa mga Lamanite (tan-awa sa Alma 2:19–25). Sa wala pa makabalik ang mga kasundalohan sa Nephite ngadto sa siyudad sa Zarahemla, ang hiniusang kasundalohan miataki kanila. Hangyoa ang mga estudyante sa pagsiksik sa Alma 2:27 ang mga pulong nga nagpakita sa gidaghanon sa hiniusang kasundalohan sa mga Lamanite ug mga Amlicite.

Dapita ang mga estudyante sa paghunong sa makadiyot ug maghunahuna unsa ang ilang bation kon sila kabahin pa sa mga kasundalohan sa Nephite. Hangyoa ang usa ka estudyante sa pagbasa og kusog sa Alma 2:28–31, 36 ug hangyoa ang klase sa pagpangita sa paagi nga natapos ang gubat. Human makareport ang mga estudyante unsa ang ilang nakit-an, mahimong isugyot nga ilang markahan ang mga pulong milig-on ug nalig-on dinhi niining mga bersikulo.

  • Sumala sa Alma 2:28, ngano nga ang Ginoo milig-on sa mga Nephite? (Ang mga estudyante mahimong mopakigbahin og lain-laing mga tubag niining pangutana. Tabangi sila sa pag-ila sa mosunod nga barunganan: Kon kita motawag sa Dios aron tabangan kita sa pagbarug batok sa kadautan, Siya molig-on kanato.)

  • Ngano kaha nga importante man nga makadawat og kalig-on gikan sa Dios sa pagbarug batok sa kadautan kay sa hingpit nga ipatangtang ang dautan nga mga impluwensya sa atong mga kinabuhi.

  • Unsaon ninyo pagsunod sa mga ehemplo ni Alma kon kamo mobarug batok sa kadautan?

Dapita ang mga estudyante sa pagsulat sa mga tubag sa usa sa mosunod nga mga pangutana:

  • Giunsa kamo pagpalig-on sa Ginoo samtang kamo nag-atubang sa kadautan?

  • Unsa ang usa ka paagi nga kamo makabarug batok sa kadautan karon?

Kon aduna pay oras ang mga estudyante sa pagsulat, dapita ang pipila kanila sa pagpakigbahin sa ilang mga tubag. Mahimo usab nimong ipaambit ang imong mga tubag. Awhaga ang mga estudyante sa pagsunod sa ehemplo sa mga Nephite—sa pag-ampo alang sa tabang sa Ginoo ug aron mamahimong takus nga mapalig-on sa Dios diha sa ilang mga paningkamot. Tapusa pinaagi sa pagpamatuod nga ang Dios molig-on kanato samtang kita mobarug batok sa kadautan.

Komentaryo ug Background nga Impormasyon

Alma 1:3–4. Kaisug sa pagpili sa matarung

Si Nehor migamit og mga ulog-ulog aron makaagni og mga sumusunod, ug migamit siya og bakak nga doktrina sa pag-ataki sa Simbahan sa Dios. Ang iyang mga pagtulun-an inila tungod kay wala niini giapil ang sala sa pangalan sa relihiyon. Nag-awhag siya og kadautan, nag-ingon nga “sa katapusan, ang tanan nga mga tawo kinahanglan makaangkon og kinabuhi nga dayon,” bisan unsa pa ang ilang kinaiya (Alma 1:4).

Si Elder L. Tom Perry sa Korum sa Napulog Duha ka mga Apostoles miawhag kanato sa pagbaton og kaisug sa pagsalikway sa modernong mga Nehor ug sa ilang mga mensahe:

“Ang mga pulong ni Nehor nakapadani ngadto sa mga tawo, apan ang iyang doktrina, samtang popular ngadto sa kadaghanan, dili husto. Samtang mag-atubang kita sa daghang mga desisyon sa kinabuhi, ang sayon ug popular nga mga mensahe sa kalibutan dili sa kasagaran maoy mahimong hustong pilion, ug gikinahanglan ang dakong kaisug sa pagpili sa matarung” (“Choose the Right,” Ensign, Nob. 1993, 67).

Alma 1:17–18. Bug-at nga silot

Samtang magbasa ang mga estudyante mahitungod sa paghukom ni Alma kang Nehor sa kamatayon, tingali aduna silay mga pangutana mahitungod sa panglantaw sa Simbahan bahin sa bug-at nga silot. Ang mosunod nga mga pamahayag mahimong makatabang kanimo nga matubag ang ilang mga pangutana.

Ngadto ni Noe, ang Ginoo mipadayag nga “bisan kinsa nga maga-ula og dugo sa tawo, tungod sa tawo ang iyang dugo pagaulaon” (Genesis 9:6).

Niadtong 1889, ang Unang Kapangulohan ug ang Korum sa Napulog Duha ka mga Apostoles mimantala og usa ka opisyal nga pamahayag bahin sa bug-at nga silot:

“Kami mahinuklugon nga mohimo sa mosunod nga pamahayag, nga sa ato pa:

“Nga kining Simbahan naglantaw nga dili gayud mouyon sa pagpaagas sa dugo sa tawo. Nga kami miisip nga ang pagpatay sa tawo, gawas kon pinasikad sa sibil nga balaod, sama sa usa ka bug-at nga krimen nga kinahanglang silutan pinaagi sa pagpaagas sa dugo sa kriminal, human sa usa ka paghusay sa publiko atubangan sa legal nga napasiugdahan nga hukmanan sa yuta. …

“… Ang makasala batok sa kinabuhi ug kabtangan [kinahanglan] dalhon ug hukman pinaagi sa mga balaod sa yuta” (“Official Declaration,” Millennial Star, Ene. 20, 1890, 33–34).

Ang Simbahan bag-ohay lang nga mimantala sa mosunod nga opisyal nga pamahayag bahin sa bug-at nga silot: “Ang Simbahan ni Jesukristo sa mga Santos sa Ulahing mga Adlaw miisip sa pangutana kon sa unsa nga sirkumstansya nga ang gobyerno kinahanglang mopatuman og bug-at nga silot nga usa ka butang nga angayang desisyunan lamang pinasikad sa proseso sa sibil nga balaod. Kami wala magdasig o mosupak sa bug-at nga silot” (newsroom.lds.org/official-statement/capital-punishment; nabasa niadtong, Hulyo 23, 2012).

Alma 1:19–20, 25. Paglahutay sa pagpanggukod

Si Presidente Harold B. Lee miingon nga kinahanglan kitang mobarug alang sa sakto bisan pa man sa mga pagpanggukod:

“Ang pagagukuron tungod sa pagkamatarung diha sa usa ka dakong kawsa diin namiligro ang kamatuoran ug hiyas ug dungog usa ka diniyos. … Ang dakong kadaut nga mahimong moabut tungod sa pagpanggukod dili gikan sa pagpanggukod mismo apan gikan sa posible nga epekto diha sa gigukod kinsa pinaagi niana mahimo nga mapugngan ang ilang dakong tinguha sa katarung sa ilang katuyoan. Ang kadaghanan niana nga pagpanggukod nagagikan sa kakulang sa pagsabut, kay ang mga tawo hilig sa pagsupak nianang wala nila masabti. Ang pipila niini gikan sa mga tawo nga nagtinguha sa dautan. Apan gikan sa bisan unsa nga hinungdan, ang pagpanggukod ingon og tibuok gayud nga kalibutan batok niadtong nagbuhat sa matarung nga katuyoan. …

“…Kon kamo lig-on nga mobarug alang sa katarung bisan pa sa mga pagbugal-bugal sa kadaghan o gani sa pisikal nga pagdagmal, pagapurong-purongan kamo uban sa kabulahanan sa mahangturong hingpit nga kalipay. Kinsay nasayud nga usab sa atong panahon pipila sa mga santos o gani ang mga apostoles, sama sa nanglabay nga mga adlaw, gikinahanglan nga mohalad sa ilang mga kinabuhi agig panalipod sa kamatuoran? Kon kana nga panahon moabut, ang Dios motugot nga dili sila mapakyas!” (Decisions for Successful Living [1973], 61–62).

Si Elder Russell M. Nelson sa Korum sa Napulog Duha ka mga Apostoles mitudlo nga ang pagpanggukod makadasig kanato nga mamahimong mas maisugon:

“Tungod kay ang malisud nga mga adlaw anaa sa unahan. Panagsa ra unya sa umaabut nga mahimong sayon o sikat ang mamahimong Santos sa Ulahing mga Adlaw. Matag usa kanato pagasulayan. Si Apostol Pablo mipahimangno nga sa ulahing mga adlaw, kadtong matinguhaon nga nagsunod sa Ginoo ‘pagalutoson gayud’ [2 Timoteo 3:12]. Kana nga paglutos mahimong mobitad kaninyo ngadto sa pagkahuyang o modasig kaninyo nga mas masulundon ug maisugon sa inyong inadlaw-adlaw nga kinabuhi” (“Atubanga ang Umaabut uban sa Hugot nga Pagtuo,” Ensign o Liahona, Mayo 2011, 35–36).