Leksyon 98
Alma 41
Pasiuna
Sa pagpadayon og tambag sa iyang anak nga si Corianton, si Alma mitudlo nga ang plano sa pagpahiuli dili lang naglakip sa pisikal nga pagkabanhaw apan sa espiritwal nga pagpahiuli usab diin ang atong mahangturon nga kahimtang makita sa atong mga buhat ug mga tinguha sa kinabuhi. Gipasabut og maayo ni Alma nga ang kadautan dili gayud mosangput ngadto sa kalipay.
Mga Sugyot alang sa Pagtudlo
Alma 41
Nagtudlo si Alma ni Corianton mahitungod sa plano sa pagpahiuli
Hangyoa ang klase sa pagkonsiderar kon sa unsang paagi nga ang mga buhat sa tawo mahimong maimpluwensyahan kon sila motuo sa mosunod nga pamahayag (mohunong human sa matag aytem aron makatubag ang mga estudyante):
Walay kinabuhi human sa kamatayon.
Human kita mamatay, mamahimo kitang hingpit bisan unsa pa ang atong mga binuhatan sa yuta.
Sa Katapusan nga Paghukom, magantihan kita alang sa atong maayong mga binuhatan ug masilutan sa atong dautan nga mga binuhatan.
-
Nganong importante nga makaangkon og hustong pagsabut sa unsay mahitabo kanato human kita mamatay?
Pahinumdumi ang mga estudyante nga sa Alma 40 ilang makat-unan ang mahitungod sa mga pagtulun-an ni Alma ngadto ni Corianton mahitungod sa kalibutan sa mga espiritu, pagkabanhaw, ug paghukom. Ipasabut nga sa Alma 41 atong makat-unan nga si Corianton naglibug sa unsay gitudlo sa ubang mga tawo mahitungod sa pagkabanhaw. Ipasabut ang mga pulong nga “nahisalaag sa layo” sa Alma 41:1, ug dapita ang mga estudyante sa pagbasa niining bersikulo nga mangita kon unsa ang hinungdan sa pagkahisalaag sa ubang mga tawo.
-
Ngano nga ang ubang mga tawo nangahisalaag? (Mahimo nimong ipasabut nga ang pagtuis sa mga kasulatan mao ang paghiwi, pagdaut, o pag-usab sa kahulugan niini.)
-
Unsa ang gisulti ni Alma nga iyang ipasabut ngadto ni Corianton?
Sa higayon nga maila sa mga estudyante ang pulong nga pagpahiuli, mahimo nimo kining isulat sa pisara. Ipasabut nga ang pagpahiuli nagpasabut sa pagdala og balik o pagbutang og balik ngadto sa kanhing kahimtang.
Ipasabut nga gusto ni Alma nga masabtan ni Corianton nga adunay pisikal nga aspeto ug usa ka espirituhanon nga aspeto nga gitawag niya og “laraw sa pagpahiuli” (Alma 41:2). Dapita ang mga estudyante sa pagsiksik sa hilum ang Alma 41:2–5, nga mangita sa mga butang nga pisikal nga ipahiuli ngari kanato human sa kamatayon ug mga butang nga espirituhanon nga ipahiuli. Mahimo nimong isugyot nga pamarkahan sa mga estudyante ang ilang nakit-an. Sa dili pa basahon sa mga estudyante, tingali makatabang nga imong ipasabut nga kanang kinahanglanon nagpasabut nga kinahanglan o importante.
-
Unsa ang pisikal nga aspeto sa plano sa pagpahiuli nga gihisgutan diha sa Alma 41:2? (Sa pagkabanhaw, ang espiritu ipahiuli ngadto sa lawas, ug ang tanang bahin sa lawas ipahiuli.)
-
Unsa ang espiritwal nga aspeto sa plano sa pagpahiuli nga gihulagway sa Alma 41:3–5? (Samtang motubag ang mga etudyante, isulat ang mosunod nga kamatuoran diha sa pisara: Kita ipahiuli bisan hain sa kalipay o kasakit sumala sa atong mga binuhatan ug mga tinguha dinhi sa mortalidad.)
Dapita ang mga estudyante sa paghunahuna nga sila nagtudlo niining mga bersikulo ngadto sa klase sa Primary.
-
Unsaon ninyo sa pagpasabut sa doktrina sa espirituhanon nga pagpahiuli aron ang mga bata makasabut niini?
Pahinumdumi ang mga estudyante nga si Corianton nakalapas sa balaod sa kaputli ug gibiyaan ang iyang mga responsibilidad isip misyonaryo (tan-awa sa Alma 39:2–4).
-
Sa unsang paagi nga ang husto nga pagsabut sa doktrina sa espirituhanon nga pagpahiuli nakatabang ni Corianton nga maghimo og mas maayo nga mga pagpili? Sa unsang paagi nga ang pagsabut niining doktrina makaimpluwensya sa atong mga lihok ug mga tinguha?
Ipamatuod ang kamatuoran niining doktrina, ug ipakigbahin ang imong mga hunahuna mahitungod sa kaangayan sa Dios sa pagpahiuli sa matag usa kanato sa maayo o dautan sumala sa atong mga tinguha ug sa atong mga binuhatan.
Isulat sa pisara ang mosunod nga pangutana: Unsa kaha kon ako makasala?
-
Sumala ngadto sa plano sa pagpahiuli, unsa ang atong madawat kon kita makasala?
-
Aduna bay bisan unsang paagi nga mapahiuli ang kamaayo ug kalipay ngari kanato kon kita adunay sayop nga nahimo?
Dapita ang usa ka estudyante sa pagbasa og kusog sa Alma 41:6–9. Hangyoa ang klase nga mangita kon unsa ang atong mabuhat aron mapahiuli ang kamaayo ug kalipay ngari kanato bisan kon kita nakasala. (Kinahanglan gayud kitang maghinulsol ug magtinguha og pagkamatarung sa tibuok natong mga kinabuhi.)
-
Unsa nga mga pulong sa Alma 41:6–7 ang nagsugyot nga kita ang responsable sa unsa ang atong madawat panahon sa pagkabanhaw? Sa unsa nga diwa nga kita mismo ang maghukom sa atong kaugalingon? (Ang atong mga pagpili sa mortalidad nagpakita sa matang sa paghukom nga atong madawat kon kita mobarug na sa atubangan sa Dios.)
Ipasabut nga ang pipila sa mga tawo naghunahuna nga sila makabalik sa pagpuyo uban sa Dios nga walay paghimo sa personal nga responsibilidad alang sa ilang mga lihok. Kasagaran moingon sila nga ang ilang sayop nga mga pagpili makalingaw. Usahay kadtong naapil sa pagpakasala makita nga daw malipayon.
Dapita ang mga estudyante sa pagtindog ug kusgon sa pagbasa ang Alma 41:10 nga magdungan. Ipasabut nga ang Alma 41:10 usa ka scripture mastery passage. Mahimo kang mosugyot nga markahan sa mga estudyante kini nga tudling sa lahi nga paagi aron sila sayon nga makapangita niini. (Tungod kay kini usa ka scripture mastery passage, mahimo nimo silang pabalik-balikon niini nga magdungan sa makadaghang higayon. Tingali imong ipangutana kon aduna bay usa diha sa klase ang makabalik niini nga magmemorya.) Kon mahuman na sila, hangyoa ang klase nga manglingkod. Diha sa pisara, isulat “Ang pagkadautan dili mahitabo nga mahimo nga kalipay.”
-
Nganong tinuod man kini nga “ang pagkadautan dili mahitabo nga mahimo nga kalipay”?
-
Unsa man ang usa ka ehemplo kon sa unsang paagi nga si Satanas makapahimo nato nga molapas sa sugo ug magtuo nga makasinati gihapon kita og kalipay?
Aron matabangan ang mga estudyante nga mapasalamatan ang kalainan tali sa lumalabay nga kalibutanong kalipay ug sa kalipay nga gitanyag sa Ginoo, basaha ang mosunod nga pamahayag ni Elder Glenn L. Pace sa Seventy:
“Ang mga kalihokan nga kanunayng ginadili sa Ginoo ug sulod sa daghang katuigan giyam-iran sa katilingban nga karon gidawat ug gituboy pinaagi gihapon niana nga katilingban. Ang media mao ang nagpadako niining mga kalihokan sa matang nga makapahimo niining nindot kaayong tan-awon. …
“… Ayaw og saypa ang telestial nga kalipay alang sa celestial nga hingpit nga kalipay. Ayaw og saypa ang kakulang og pagpugong sa kaugalingon nga kagawasan. Ang kompletong kagawasan nga walay tukma nga pagpugong makapahimo natong ulipon sa atong mga gana. Ayaw og kasina sa kinabuhi nga mas minos ug walay hinungdan. …
“… Ang mga sugo nga inyong gisunod wala gihatag pinaagi sa usa ka walay pagbati nga Dios aron sa paglikay ninyo nga malingaw, apan pinaagi sa usa ka mahigugmaong Langitnong Amahan kinsa gusto nga kamo magmalipayon samtang nagpuyo kamo nining kalibutana ingon man usab sa umaabut” (“They’re Not Really Happy,” Ensign, Nob. 1987, 39–40).
Isulat ang mosunod nga pamahayag diha sa pisara. Mahimong mosugyot ka nga ang mga estudyante mosulat niini diha sa ilang mga kasulatan tupad sa Alma 41:10. (Ang pamahayag makita sa “To ‘the Rising Generation,’” New Era, Hunyo 1986, 5.)
“Dili mahimo nga mobuhat kamo og sayop ug mobati nga husto. Imposible kini!” (Presidente Ezra Taft Benson).
Sultihi ang mga estudyante nga sa Alma 41:11 gipasabut nganong imposible nga mahimong tinud-anay nga malipayon kon maghimo og sayop nga mga pagpili. Kopyaha ang mosunod nga tsart diha sa pisara (mahimo nimong buhaton sa dili pa magsugod ang klase), o andama isip usa ka handout alang sa matag estudyante. Ihan-ay ang mga estudyante nga magpares, ug tudloi sila nga motukma ang mga pulong gikan sa Alma 41:11 ngadto sa kahulugan niini. Dapita usab sila sa paghisgot sa kauban nga mga pangutana.
|
Ang mga pulong diha sa Alma 41:11 nga naghulagway sa usa ka “kahimtang sa kinaiyanhon” |
Kahulugan | |
|---|---|---|
|
| |
|
| |
|
| |
|
Dinhi niining bersikulo, atong makita nga “ang kinaiyahan sa Dios” mao “ang kinaiyahan sa kalipay.” Unsa ang gisulti niini diha kaninyo mahitungod kon ngano nga ang pagkamakasasala sukwahi ngadto sa kinaiyahan sa kalipay? Unsa ang pipila ka piho nga mga ehemplo kon nganong ang mga tawo makakaplag sa ilang mga kaugalingon diha sa kahimtang sa pagkadili malipayon? | ||
(Mga tubag: 1-c, 2-a, 3-b)
Aron matabangan ang mga estudyante nga makita kon sa unsang paagi nga ang pagpadayon diha sa “kahimtang sa kinaiyahan” may kalabutan sa doktrina sa pagpahiuli, dapita ang usa ka estudyante sa pagbasa sa Alma 41:12. Pagkahuman nga nabasa na ang bersikulo, hangyoa ang mga estudyante sa pagtubag sa pangutana ni Alma. Dayon ipabasa sa mga estudyante ang tubag ni Alma sa iyang kaugalingong pangutana sa Alma 41:13. (Mahimo nimong isugyot nga ilang markahan unsay gisulti ni Alma nga mobalik ngari kanato isip kabahin sa plano sa pagpahiuli.)
Hangyoa ang mga estudyante sa paghunahuna nga aduna silay usa ka higala kinsa nagpili sa pagbuhat sa paagi nga supak ngadto sa mga sugo sa Ginoo apan gustong mahiuli ngadto sa pagkamatarung. Dapita ang mga estudyante sa pagpasabut sa doktrina sa pagpahiuli ngadto sa iyang pares, nga daw sila kadto nga higala, gamit ang Alma 41:12–13. (Ang mga estudyante mahimong mogamit sa ilang kaugalingong mga pulong o ang mga pamulong sa pamahayag nga nasulat diha sa pisara: “Kita mapahiuli ngadto sa kalipay o kasakit sumala sa atong mga binuhatan ug mga tinguha sa mortalidad.”)
Ipakita sa mga estudyante ang usa ka boomerang o pag-drowing sa larawan diha sa pisara.
Pangutan-a ang mga estudyante unsa ang mahimo sa usa ka boomerang kon kini husto nga pagkalabay. (Mobalik kini ngadto sa dapit kon diin kini gilabay.) Hangyoa sila sa pagbasa sa hilum sa Alma 41:14–15, nga mangita sa mga paagi diin ang usa ka boomerang mahimong magrepresentar sa mga kamatuoran nga gitudlo niining mga bersikulo. (Mahimo nimong isugyot nga markahan sa mga estudyante kining mga bersikulo.) Dapita ang mga estudyante sa pagpasabut sa ilang nakit-an.
-
Unsa ang pipila ka mga butang nga inyong gilauman nga madawat gikan sa uban ug gikan sa Ginoo niining kinabuhia ug sa sunod? (Ang mga tubag mahimong maglakip sa pagkamabination, kalooy, ug gugma. Ikonsiderar ang paglista sa mga tubag sa mga estudyante diha sa pisara.)
-
Kanus-a ang higayon nga kamo nakahatag og kamaayo, kamanggiloy-on, o kamabination ngadto sa uban ug sa wala madugay nakadawat niini og balik?
Awhaga ang mga estudyante sa paggahin og tumong sa pagbuhat sa mga paagi nga makapalambo og mga kinaiya nga magpakita kon unsa ang ilang gilauman nga mapahiuli ngadto kanila niining kinabuhia ug sa sunod. Ipamatuod ang kalipay nga moabut samtang kita magbuhat sa pagkamatarung.
Scripture Mastery—Alma 41:10
Pahinumdom: Tungod sa matang ug gitas-on niining leksyon, ang mosunod nga kalihokan labing maayong gamiton sa laing adlaw kon ikaw adunay sobra nga panahon.
Isulat ang mosunod diha sa pisara: … mao ang kalipay.
Dapita ang mga estudyante sa paghimo og mga nabaliktad nga pamahayag sa doktrina nga gitudlo sa Alma 41:10. (Usa ka posible nga tubag mao ang “Ang pagkamatarung mao ang kalipay.”) Dayon dapita ang mga estudyante sa paglista og piho nga matarung nga mga buhat nga ilang nabati nga mohaum diha sa blangko. (Sama pananglit, “Ang pagserbisyo sa uban mao ang kalipay.”) Hangyoa ang mga estudyante kon sila makapamatuod nga bisan usa niining matarung nga mga buhat mosangput ngadto sa kalipay. Human ang pipila ka mga estudyante nakapaambit sa ilang mga kasinatian ug mga pagpamatuod, dapita ang klase sa pagsulat diha sa usa ka pocket-size nga kard o piraso nga papel sa usa o duha ka matarung nga mga buhat nga ilang mahimo atol sa semana aron madugangan ang ilang kalipay. Awhaga sila sa pagdala sa ilang mga papel isip usa ka pahinumdom ug sa pagreport sa ilang mga paningkamot sa umaabut nga mga adlaw.
Komentaryo ug Background nga Impormasyon
Alma 41:10. Ang pagkadautan dili mahitabo nga mahimo nga kalipay
Ang mosunod nga pamahayag gikan sa Matinud-anon sa Tinuhoan nagpalig-on sa ideya nga ang mga estudyante makaangkon og kalingawan ug makakaplag og kalipay sa matarung nga mga paagi:
“Daghang mga tawo ang misulay sa pagpangita og kalipay ug katumanan diha sa mga kalihokan nga supak sa mga sugo sa Ginoo. Nagbaliwala sa plano sa Dios alang kanila, ilang gisalikway ang bugtong tinubdan sa tinuod nga kalipay. Minunut sila ngadto sa yawa, kinsa ‘nagtinguha nga ang tanan nga mga tawo unta mahimo nga mauyamot sama ngadto kaniya’ (2 Nephi 2:27). Sa katapusan sila makakat-on sa kamatuoran sa pasidaan ni Alma ngadto sa iyang anak nga si Corianton: ‘Ang pagkadautan dili mahitabo nga mahimo nga kalipay’ (Alma 41:10). …
“Samtang nagtinguha ka nga mahimong malipayon, hinumdumi nga ang bugtong paagi ngadto sa tinuod nga kalipay mao ang pagsunod sa ebanghelyo. Makakita ka og malinawon, walay katapusan nga kalipay samtang maningkamot ka nga motuman sa mga sugo, mag-ampo alang sa kalig-on, maghinulsol sa imong mga sala, moapil sa maayo nga mga kalihokan, ug mohatag og makahuluganon nga serbisyo. Makakat-on ka nga maglingaw-lingaw sulod sa mga limitasyon nga gitakda sa usa ka mahigugmaon nga Amahan sa Langit” (Matinud-anon sa Tinuhoan: Usa ka Pakisayran sa Ebanghelyo [2004], 72–73).
Alma 41:10–11. Ang tanang mga tawo anaa sa “usa ka kahimtang sa kinaiyahan”
Si Presidente David O. McKay mitudlo nga kita adunay duha ka kinaiyahan ug abilidad sa pagpili sa pagkamalipayon pinaagi sa pag-master sa kaugalingon:
“Ang pagpuyo og kinabuhi sa kamatuoran ug moral nga kaputli makahatag og kalipay ug kamaya, samtang ang mga pagsupak sa moral ug sosyal nga mga balaod moresulta lamang sa pagkawalay katagbawan, kasubo, ug, kon masobrahan, sa pagkaalaot.
“Ang tawo dunay duha ka kinaiyahan—usa, may kalabutan sa kalibutanon o kinabuhi sa hayop; ang lain, mao ang espirituhanon nga kinabuhi, nasumpay ngadto sa kabalaanon. Ang lawas sa tawo usa lamang ka tabernakulo nga gipuy-an sa iyang espiritu. Daghan kaayo, daghan gyud kaayo, ang nagtuo nga ang lawas mao ang tawo ug, busa ang katuyoan sa ilang mga pagpaningkamot mao ang pagtagbaw sa kalipay sa lawas, sa mga gana niini, sa mga tinguha niini, sa mga kahinam niini. Pipila lamang ang nakahibalo nga ang tinuod nga tawo mao ang usa ka imortal nga espiritu, nga [mao] ‘ang salabutan o ang kahayag sa kamatuoran’ buhi isip usa ka indibidwal nga binuhat sa wala pa matawo ang lawas, ug nga kining espirituhanong binuhat uban sa tanang naila nga mga hiyas niini magpadayon human ang lawas mohunong sa paglihok sa iyang yutan-ong kahimtang.
“Kon ang usa ka tawo magpabilin nga matagbaw sa unsay atong gitudlo nga kalibutan sa mga hayop, matagbaw sa unsay ikahatag kaniya sa kalibutan sa mga hayop, sayon nga magpadala ngadto sa kapritso sa iyang gana ug mga kahinam, ug magkalayo ug magkalayo ngadto sa kahimtang sa pagpatuyang, o kaha, pinaagi sa pag-master sa kaugalingon, siya maningkamot ngadto sa intelektwal, moral, ug espirituhanong kalipay magdepende kana sa matang sa pagpili nga iyang himoon matag adlaw—dili, sa matag oras sa iyang kinabuhi” (sa Conference Report, Abr. 1967, 6–7).
Alma 41:11 “Sukwahi ngadto sa kinaiyahan sa kalipay”
Si Elder F. Enzio Busche sa Seventy mipasabut nga ang mapahinunguron nga pagtuon sa mga pulong sa mga sulugoon nga dinihugan sa Ginoo motabang kanato nga masayud kon kita nadakin-as ngadto sa usa ka kahimtang nga sukwahi sa kinaiyahan sa kalipay:
“Kitang tanan may kalagmitan nga, usahay, maanaa sa kahimtang nga sukwahi ngadto sa kinaiyahan sa kalipay, ug dili tungod kay mipadayon kita sa kadautan o kasaypanan ngadto sa hilabihan. Apan hangtud nga kita anaa niining yutan-on nga kahimtang sa pagsulay, ang kaaway makaimpluwensya kanato. Tingali mahimong dili kaayo kita mabinantayon. Tingali gipasagdan lang nato ang atong mga relasyon uban niadtong suod kanato. … Tingali kita adunay pagtugot sa ginagmayng bati nga batasan o mga kinaiya nga makasulod sa atong mga kinabuhi; o tingali nawad-an kita og pipila ka ang-ang sa pagsabut sa kaimportante sa paghupot sa pakigsaad nga walay pagkasayop. Kon mao, kita anaa sa makuyaw nga kahimtang. Kinahanglan gayud kitang magmatngon niini. Dili kita mahimong mobaliwala sa sitwasyon. Mahimong nakaobserbar kita nga sulod sa pipila ka panahon kita dili gayud magmalipayon, nga kinahanglang gayud nga kanunayng pugson ang atong kaugalingon sa pagpahiyom, o basin nga naa na kita sa kahimtang duol sa depresyon. … Bisan og tingali malingla nato ang ubang tawo, kita dili makalingla sa atong kaugalingon, ug dili kita makalingla sa Ginoo. …
“Ang ebanghelyo nga anaa sa kahingpitan gisangyaw sa tibuok kalibutan pinaagi sa mga dinihugan nga mga sulugoon sa Ginoo, nga ang tanan mahimong maduol ngadto sa usa ka pagmatngon sa iyang kahimtang. Aron mahiduol ngadto sa mga pulong sa dinihugan sa Ginoo, kinahanglan kining basahon ug tun-an ang mga kasulatan uban sa pasalig ug pagpahinungod. …
“… Ang Ginoo dili gusto nga kita mamahimong makamatngon sa atong kawad-on ug kauyamot (tan-awa sa Mosiah 4:11; Alma 26:12; Hel. 12:7; Moises 1:10) sa Adlaw lamang sa Paghukom. Karon ug sa matag adlaw sa atong mortal nga mga kinabuhi, gusto Niya nga mapalantip ang atong pagmatngon, nga kita mahimong mga maghuhukom sa atong kaugalingon, samtang Siya nagtawag kanato sa mapadayonong proseso sa paghinulsol” (“University for Eternal Life,” Ensign, Mayo 1989, 72).
Alma 41:11 Makausab kita sa atong kinaiyahan pinaagi sa grasya ni Kristo
Si Elder David A. Bednar sa Korum sa Napulog Duha ka mga Apostoles mitudlo:
“Ang lintunganay sa ebanghelyo ni Jesukristo nagkinahanglan sa sukaranan ug permanente nga kausaban sa atong pagkatawo nga mahimong posible pinaagi sa atong pagsalig sa ‘maayo nga buhat, ug kalooy, ug grasya sa Balaan nga Mesiyas’ (2 Nephi 2:8). Kon kita mopili sa pagsunod sa Ginoo, kita mipili nga mag-usab—espirituhanong magpakatawo pag-usab” (“Kinahanglan Matawo Kamo Pag-usab,” Ensign o Liahona, Mayo 2007, 20).