Leksyon 80
Alma 15–16
Pasiuna
Human ang Ginoo mipagawas ni Alma ug Amulek gikan sa pagkabilanggo, miadto sila aron sa pagsangyaw ngadto sa katawhan sa Sidom. Didto ilang nakit-an ang mga tumutuo kinsa gipapahawa sa Ammonihah, lakip ni Zeezrom, kinsa nag-antus sa pisikal ug espirituhanon nga paagi tungod sa iyang mga sala. Sa dihang si Zeezrom namahayag sa iyang pagtuo ni Jesukristo, si Alma miayo kaniya ug mibunyag kaniya. Mitukod si Alma og Simbahan didto sa Sidom, ug unya mibalik siya uban ni Amulek ngadto sa Zarahemla. Agi og katumanan sa panagna ni Alma, ang mga Lamanite miguba sa siyudad sa Ammonihah sa usa ka adlaw. Agi og dugang, ang mga Lamanite misikop sa pipila sa mga Nephite gikan sa nagpalibut nga kayutaan. Sa pagpili nga mosunod sa mapanagnaon nga giya ni Alma, ang mga sundalo sa Nephite mibawi sa mga binilanggo ug miabug sa mga Lamanite gikan sa yuta. Atol sa panahon sa kalinaw, si Alma, Amulek, ug daghan pa mipalig-on sa Simbahan sa tibuok yuta sa mga Nephite.
Mga Sugyot alang sa Pagtudlo
Alma 15
Si Alma miayo ni Zeezrom, mitukod sa Simbahan didto sa Sidom, ug mibalik uban ni Amulek ngadto sa Zarahemla
Aron matabangan ang mga estudyante nga mahinumdom sa mahinungdanong mga tawo ug mga panghitabo nga giasoy sa Alma 11–14, isulat ang mosunod nga mga pulong sa pisara:
Zeezrom
Onties
Kalayo
Alma
Amulek
Ammonihah
Hatagi ang mga estudyante og usa ka minuto aron makasulay og gamit sa tanang pangalan ug mga pulong diha sa pisara sa pag-summarize sa mga panghitabo nga giasoy sa Alma 11–14. (Mahimo nimong isugyot nga sila mo-refer sa mga summary sa kapitulo alang sa tabang.) Human ang pipila ka mga estudyante makatubag, papasa ang tanang mga pulong gawas sa Zeezrom.
Ipasabut nga human mibiya sa Ammonihah, si Alma ug Amulek miadto sa Sidom, diin ilang nakit-an ang mga tumutuo kinsa gipapahawa sa Ammonihah, lakip ni Zeezrom. Dapita ang mga estudyante sa pagbasa sa hilum sa Alma 15:3–5, nga mangita sa mga pulong nga naghulagway sa kahimtang ni Zeezrom. Samtang ang mga estudyante magreport sa unsay ilang nakit-an, isulat ang ilang mga tubag diha sa pisara sa ubos sa pangalan ni Zeezrom.
-
Ngano kaha nga ang tanlag ni Zeezrom midala kaniya sa pag-antus sa espirituhanon ug pisikal nga paagi? Unsa ang gikinahanglang buhaton sa mga tawo nga anaa niining kahimtang aron mausab ang ilang kahimtang?
-
Kang kinsang tabang ang gitinguha ni Zeezrom? (Tan-awa sa Alma 15:4.) Ngano kaha nga siya nagpatawag ni Alma ug Amulek? (Ang mga tubag mahimong maglakip nga siya misalig kanila ug nga siya nasayud nga sila mga tawo sa Dios ug adunay katungod sa priesthood.)
Dapita ang pipila ka estudyante nga magpuli-puli sa pagbasa og kusog sa Alma 15:6–10. Hangyoa ang klase sa pagpangita sa mga pulong nga gisulti ni Alma aron matabangan si Zeezrom nga makapakita og pagtuo kang Jesukristo ug sa Iyang Pag-ula.
-
Ngano kaha nga si Zeezrom nagkinahanglan nga magpakita og pagtuo ni Jesukristo ug sa Iyang Pag-ula sa dili pa siya maayo?
Hangyoa ang mga estudyante sa pagbasa sa hilum sa Alma 15:11–12 aron masusi kon unsa ang nahitabo ni Zeezrom. Kon sila adunay igong panahon sa pagbasa, papasa ang tanang mga pulong diha sa pisara ubos sa pangalan ni Zeezrom.
-
Unsa nga ebidensya ang inyong makita nga si Zeezrom naghinulsol ug nakadawat sa kalooy sa Ginoo? (Siya naayo pinaagi sa hugot nga pagtuo kang Jesukristo, siya nabunyagan, ug siya nagsugod sa pagsangyaw sa ebanghelyo.)
Isulat ang mosunod nga baruganan sa pisara: Pinaagi sa atong hugot nga pagtuo ni Jesukristo kita mamaayo ug mapalig-on.
Ipasabut nga si Alma, isip usa ka priesthood lider, wala makakuha og pagtagad alang sa iyang kaugalingon. Ang iyang katuyoan niining panag-istorya uban ni Zeezrom mao ang pagtabang ni Zeezrom nga makapakita og hugot nga pagtuo ni Jesukristo ug makadawat og kalooy pinaagi sa Pag-ula. Sa paghulagway sa usa ka paagi nga ang atong mga priesthood lider nagtabang kanato nga makadawat sa mga panalangin sa Pag-ula, basaha ang mosunod nga kasinatian nga gipakigbahin ni Elder Jay E. Jensen sa Seventy:
“Samtang nagserbisyo isip usa ka bishop, ako nakasaksi sa mga panalangin sa Pag-ula diha sa mga kinabuhi sa mga miyembro sa Simbahan kinsa nakahimo og grabe nga mga kalapasan. …
“Usa ka young single adult sa among ward nakigdeyt og usa ka batan-ong babaye. Sila mipatuyang sa ilang mga pagbati nga wala na kini mapugngi. Siya miduol kanako alang sa tambag ug panabang. Base sa unsay gikumpisal ug sa mga pag-aghat sa Espiritu ngari kanako, uban sa pipila ka mga butang, siya wala tuguti sa pag-ambit sa sakrament sulod sa usa ka panahon. Kanunay kami nga magkita aron sa pagsiguro nga ang paghinulsol mahitabo, ug, human sa saktong panahon, ako mitugot kaniya sa pag-ambit pag-usab sa sakrament.
“Samtang ako milingkod sa atubangan niana nga miting sa sakrament, ako mitan-aw kaniya samtang siya karon takus nga miambit sa sakrament. Akong nasaksihan ang mga bukton sa kalooy, gugma, ug kaluwasan nga naggakos kaniya samtang ang pag-ayo sa Pag-ula midasig sa iyang kalag ug mikuha sa iyang gipas-an, hinungdan sa gisaad nga kapasayloan, kalinaw ug kalipay” (“Mga Bukton sa Kaluwasan,” Ensign o Liahona, Nob. 2008, 49).
Ipamatuod nga ang mga bishop ug ubang mga priesthood lider makatabang kanato sa pagdawat og kalooy ug kalig-on nga atong gikinahanglan pinaagi sa Pag-ula ni Jesukristo.
Aron matabangan ang mga estudyante nga makita nga ang mga lider sa Simbahan nagserbisyo sa grupo sa mga tawo ug mga indibidwal, patun-i nila ang Alma 15:13–18. I-assign sila nga magpares sa pagtrabaho. Hangyoa ang usa ka estudyante sa matag parisan sa pagsiksik sa Alma 15:13–15, 17, nga mangita sa mga paagi nga ang mga tawo sa Sidom napanalanginan pinaagi sa pagpangalagad ni Alma. Hangyoa ang laing estudyante sa matag parisan sa pagsiksik sa Alma 15:16, 18, nga mangita sa mga paagi nga si Amulek napanalanginan pinaagi sa pagpangalagad ni Alma. Human nga sila nakagahin na og igong panahon, dapita sila sa pagpasabut sa usag usa unsa ang ilang nakit-an.
Dapita ang managkauban sa paghunahuna og tulo ngadto sa lima ka mga paagi nga ang mga lider sa Simbahan karon makatabang sa mga grupo ug sa mga indibidwal. Awhaga ang mga estudyante sa paghunahuna sa ilang kaugalingong mga responsibilidad isip mga lider sa korum sa priesthood ug sa mga klase sa Young Women. Hangyoa ang matag kauban sa pagpakigbahin sa ilang mga mga ideya diha sa klase.
Alma 16:1–12
Ang mga Lamanite miguba sa Ammonihah apan wala makalupig sa mga Nephite kinsa misunod sa tambag ni Alma
Hangyoa ang mga estudyante sa paghunahuna og higayon nga nasurprisa sila o kalit nga nahadlok. Mahimo kang mohangyo og usa o duha ka mga estudyante nga ipakigbahin ang ilang mga kasinatian. Dapita ang mga estudyante sa pagbasa sa hilum sa Alma 16:1–3, nga mangita kon sa unsang paagi ang mga Nephite didto sa Ammonihah nasurprisa ug nganong ang pipila kanila morag nangahadlok. Hangyoa ang mga estudyante sa pagreport unsay ilang nakit-an. (Kon gikinahanglan, tabangi sila nga makita nga ang mga Lamanite kalit nga miataki sa siyudad sa Ammonihah ug milaglag sa mga lumulupyo sa wala pa nakapundok ang mga Nephite og kasundalohan aron sa pagpakigbatok kanila.)
Dapita ang usa ka estudyante sa pagbasa og kusog sa Alma 16:4–6, ug hangyoa ang klase sa pagpangita kon diin ang matarung nga mga Nephite nangita sa giya. Hangyoa ang laing estudyante sa pagbasa og kusog sa Alma 16:7–8 samtang ang nahabilin sa klase mangita sa resulta sa tabang nga ilang nadawat.
-
Sa unsang paagi nga ang propetikanhong giya ni Alma nakatabang sa mga Nephite?
-
Unsa nga mga baruganan ang atong makat-unan gikan niini nga istorya? (Ang mga estudyante mahimong mangita sa nagkalain-laing mga baruganan. Siguroha nga ilang masabtan nga kon kita magtinguha ug magsunod sa giya gikan sa mga propeta sa Ginoo, ang Ginoo molig-on ug mopanalipod kanato. Isulat kini nga baruganan diha sa pisara.)
-
Sa unsang paagi nga ang kabatan-onan napanalanginan samtang sila magsunod sa propetikanhon nga giya? (Aron matabangan ang mga estudyante nga matubag kining pangutana, ikonsiderar nga moabli sila ngadto sa duha o tulo ka mga seksyon sa Alang sa Kalig-on sa mga Kabatan-onan nga booklet. Dapita sila sa pagtubag niining pangutana mahitungod sa matag seksyon nga imong gipili.)
Hangyoa ang mga estudyante sa paghunahuna og mga kasinatian sa dihang ang propetikanhong giya nakatabang kanila nga mohimo og sakto nga mga pagpili diha sa malisud nga mga sitwasyon. Dapita ang pipila ka mga estudyante sa pagpakigbahin sa ilang mga kasinatian diha sa klase. (Siguroha nga sila makasabut nga dili sila kinahanglan nga mobati nga obligado sa pagpakigbahin og mga kasinatian nga personal o pribado kaayo.) Mahimong ikaw usab mopakigbahin og usa ka kasinatian nga imong kaugalingon. Aron maabagan ang kamatuoran nga ang mga pulong sa mga propeta kanunayng matuman, mahimo nimong itudlo nga ang Alma 16:9–11 nagpakita sa katumanan sa pagpanagna ni Alma mahitungod sa katawhan sa Ammonihah (tan-awa sa Alma 9:12).
Alma 16:13–21
Si Alma, Amulek, ug ang uban nagtukod og Simbahan diha sa mga Nephite
Samtang nagtiwas ang mga estudyante sa pagtuon sa Alma 16, awhaga sila sa pagpangita sa mga ehemplo sa duha ka mga baruganan nga imong gisulat sa pisara. I-summarize ang Alma 16:13–15 pinaagi sa pagpasabut nga si Alma ug si Amulek mipadayon sa pagsangyaw sa pulong sa Dios sa tibuok yuta, inubanan sa tabang sa uban “kinsa napili alang sa buhat” (Alma 16:15). Dapita ang mga estudyante sa pagbasa sa hilum sa Alma 16:16–21, nga mangita sa resulta niining mga paningkamot. Human sa igong panahon, hangyoa ang mga estudyante sa pagsulti mahitungod sa unsa ang ilang nakit-an. Pangutan-a sila kon sa unsang paagi kining mga ehemplo naghulagway sa usa o duha ka mga baruganan nga nasulat diha sa pisara.
Tapusa ang leksyon pinaagi sa pag-awhag sa mga estudyante sa pagkopya niining mga baruganan diha sa mga notebook o scripture study journal. Dapita sila sa pagsulat og usa ka summary sa unsay ilang nakat-unan karon mahitungod niana nga baruganan. Hangyoa usab sila sa pagsulat mahitungod kon sa unsang paagi sila nagplano sa paggamit sa unsay ilang nakat-unan.
Ribyu sa Scripture Mastery
Kini nga leksyon mao ang tunga-tungang bahin niini nga kurso. Aron matabangan ang mga estudyante nga mapalig-on ang ilang kahibalo sa mga scripture mastery passage, ikonsiderar ang paghatag nila og usa ka eksamin o test aron pagsukod kon unsa na sila ka pamilyar sa mga scripture mastery passage nga imong natudlo diha sa klase. Tingali imong andamon ang usa ka yanong berbal o sinulat nga eksamin, sama sa paghatag og timailhan gikan sa mga bookmark sa seminary ug tuguti ang mga estudyante sa pagsulat sa sakto nga pakisayran, o tingali imong ikonsiderar ang paghimo og usa ka pagribyu sa pipila ka mga tudling nga namemorya sa mga estudyante. Mahimo nimong pasiunhan og sulti ang mga estudyante mahitungod sa eksamin o test aron sila makaandam alang niini.
Pahinumdom: Kon wala na kay panahon sa paggamit niining kalihokan isip kabahin niining leksyon, mahimo nimo kining gamiton sa laing adlaw. Alang sa ubang mga kalihokan sa pagribyu, tan-awa ang appendix sa katapusan niining manwal.
Komentaryo ug Background nga Impormasyon
Alma 15:3–5. Ang pisikal nga pag-antus maoy hinungdan sa espirituhanon nga mga pagkasakit
Samtang si Zeezrom naghinulsol, ang iyang mga sala “nakapahasol sa iyang hunahuna hangtud nga kini nahimo nga hilabihan ka sakit” (Alma 15:3). Si Presidente Boyd K. Packer sa Korum sa Napulog Duha ka mga Apostoles namulong sa katinuod sa pisikal nga pag-antus nga hinungdan sa espirituhanong pagkasakit:
“Ako [makausa] nangutana sa doktor sa family medicine kon unsa ka dako sa panahon nga kinahanglan niyang ipahinungod sa pagkorihir sa pisikal nga pagkasakit. Siya dugay-dugay nang nagpraktis, ug human sa mahunahunaong pagkonsiderar, mitubag siya, ‘Dili molabaw sa 20 porsyento. Ang nahabilin nga panahon ingon og gitrabaho nako ang mga problema nga nakaapekto kaayo sa pisikal nga panglawas sa akong mga pasyente apan wala nagagikan sa lawas.’
“‘Kining pisikal nga mga pagkasakit,’ ang doktor mitapos, ‘mga simtoma lang sa pipila sa.ubang matang sa problema.’
“Sa kasamtangang henerasyon usa ngadto sa lain sa dinagkong mga sakit makontrolar na o matambalan. Ang pipila nga grabe kaayo nagpabilin gihapon, apan karon ingon og aduna na kami mahimo mahitungod sa kadaghanan niini.
“Adunay laing bahin kanato, dili kaayo mahikap, apan sama katinuod sa atong pisikal nga lawas. Kining dili mahikap nga bahin nga naa nato gihulagway isip hunahuna, emosyon, panghunahuna, buot, ug daghan pang ubang mga butang. Talagsa ra kaayo nga kini gihulagway isip espirituhanon.
“Apan adunay usa ka espiritu sa tawo; ang pagbaliwala niini mao ang pagbaliwala sa reyalidad. Adunay mga espirituhanong diperensya, usab, ug espirituhanong mga sakit nga makaingon sa hilabihang pag-antus.
“Ang lawas ug ang espiritu sa tawo nabugkos” (“The Balm of Gilead,” Ensign, Nob. 1977, 59).