Alma 52–55

Pasiuna

Dinhi niining puntoha sa gubat sa mga Lamanite, ang mga Nephite nawad-an og daghang mga siyudad tungod sa panagbingkil tali sa ilang kaugalingon. Sila si Moroni, Teancum, ug Lehi misakop sa siyudad sa Mulek ug milupig sa usa sa kinadak-ang mga sundalo nga Lamanite. Si Moroni mibalibad sa hangyo ni Ammoron, ang lider sa Lamanite, sa pagpakigbaylo og mga binilanggo ug miimplementar sa usa ka plano nga buhian ang mga binilanggo nga mga Nephite nga dili magpaagas og dugo. Si Moroni mibarug nga lig-on ug wala mokompromiso uban sa kadautan ni Ammoron ug sa iyang mga sumusunod.

Pahinumdom: Kini nga leksyon nagtutok bahin sa mga panghitabo sa mga kinabuhi nila ni Moroni, Teancum, ug Lehi. Sa sunod nga leksyon, ang mga estudyante makakat-on og dugang mahitungod sa 2,000 ka batan-ong mga manggugubat ni Helaman nga nahisgutan diha sa Alma 53:16–23.

Mga Sugyot alang sa Pagtudlo

Alma 52–53

Sila si Moroni, Teancum, ug Lehi nagtambayayong sa paglupig sa mga Lamanite

Sa dili pa magklase, isulat sa pisara ang mosunod nga pamahayag:

“Ang kabatan-onan karon gipadako diha sa teritoryo sa kaaway” (Presidente Boyd K. Packer).

Sa pagsugod sa klase, pagdapit og usa ka estudyante sa pagbasa sa pamahayag. Dayon ipangutana:

Kinsa man ang kaaway? (Satanas.)
Unsa ang ebidensya sa impluwensya ni Satanas nga inyong makita diha sa kalibutan sa inyong palibut? (Ang mga estudyante tingali maghisgot sa dili tukma nga pinulongan ug panamit, dili matinuoron ug imoral nga kinaiya, ug mga tintasyon nga kasagaran gitanyag pinaagi sa media ug teknolohiya.)

Awhaga ang mga estudyante sa pagkonsiderar og mga paagi nga ilang makomparar ang mga hagit nga ilang giatubang ngadto sa mga panghitabo ug sitwasyon nga gihulagway diha sa Alma 52–55. Dayon basaha ang sumpay sa pamahayag ni Presidente Packer:

“Ang kabatan-onan karon gipadako diha sa teritoryo sa kaaway nga adunay nagkakunhod nga sumbanan sa moralidad. Apan isip sulugoon sa Ginoo, ako mosaad nga kamo mapanalipdan ug maprotektahan gikan sa pagpangataki sa kaaway kon mopatalinghug mo sa mga aghat nga gikan sa Balaang Espiritu” (“Tambag ngadto sa mga Kabatan-onan,” Ensign o Liahona, Nob. 2011, 18).

Awhaga ang mga estudyante sa pagtinguha sa giya sa Espiritu Santo aron nga sila makabarug batok sa dautan.

Pahinumdumi ang mga estudyante nga samtang si Moroni nag-atiman sa pagrebelde sa king-men, ang mga Lamanite misakmit sa danghang napalig-on nga mga siyudad sa mga Nephite (tan-awa sa Alma 51:26). Dapita ang mga estudyante sa pagbasa sa hilum sa Alma 52:14–22, nga mangita sa gihulagway ni Mormon nga kahimtang sa mga Nephite niining panahona. Dayon hangyoa ang usa ka estudyante sa pagbasa og kusog sa Alma 53:9. Hangyoa ang klase sa pag-ila nganong anaa sa kakuyaw ang mga kahimtang sa mga Nephite.

Unsa ang uban nga mga paagi nga ang mga tawo mobutang sa ilang mga kaugalingon sa mga kahimtang nga makuyaw sa espirituhanong paagi?

Isulat ang mosunod nga pakisayran sa kasulatan diha sa pisara: Alma 52:5–10, 16–19. Aron matabangan ang mga estudyante nga makasabut sa konteksto ug sa dagan sa istorya nga naglibut niining mga bersikulo, paghangyo og duha ka mga estudyante sa pagbasa og kusog sa mga summary sa kapitulo alang sa Alma 52 ug 53. Dayon dapita ang mga estudyante sa pagtuon sa mga bersikulo nga inyong nasulat diha sa pisara, nga mangita sa mga baruganan nga makatabang nila nga makalikay o makabarug batok sa dautan. Human sa igo nga panahon, ipangutana:

Unsa nga mga baruganan ang atong makat-unan gikan niini nga mga bersikulo? (Nalakip sa uban nga mga baruganan, ang mga estudyante mahimong moila sa mosunod nga mga kamatuoran: Kon atong likayan ang mga kota sa kaaway, mas makahimo kita sa paglikay ug pagbatok sa tintasyon.)

Dapita ang mga estudyante sa pagpamalandong sa pisikal nga mga lugar, sosyal nga mga kahimtang, o mga sitwasyon nga nalakip sa paggamit sa teknolohiya (sama sa internet) nga sila mibati nga mahimong mosangput ngadto sa makuyaw nga kahimtang sa ilang mga kinabuhi.

Ipasabut nga si Mormon mihulagway sa depensa ni Teancum batok sa mga Lamanite nga naggamit og mga pulong sama sa pagdepensa, paglig-on, pagsiguro, pagpasakit, ug pagpalig-on. Hangyoa ang mga estudyante sa pagpamalandong unsa ang gikinahanglan nga mahimong “sakiton,” o gipugos, gikan sa ilang kaugalingong kinabuhi aron matabangan sila nga mahimong mas siguro sa espirituhanon nga paagi.

Dapita ang usa ka estudyante sa pagbasa og kusog sa Alma 52:19. Pangutan-a ang klase:

Unsa ang gibuhat sa mga lider sa Nephite sa wala pa mosulong ngadto sa gubat? (Nagpahigayon sila og usa ka konseho sa gubat.)
Sa unsa nga mga paagi nga lagmit ang konseho sa pamilya o konseho sa Simbahan mahimong susama ngadto sa “konseho sa gubat”? Sa unsa nga paagi nga ang mga konseho makapalig-on kanato sa atong mga gubat batok sa kaaway?

I-summarize ang Alma 52:20–40 ug Alma 53 pinaagi sa pagpasabut nga human sa konseho sa gubat, si Kapitan Moroni ug ang iyang kasundalohan mibawi sa siyudad sa Mulek pinaagi sa pagpapahawa sa mga Lamanite sa ilang mga kota. Ang mga Nephite mikuha og daghan sa mga binilanggo nga mga Lamanite ug mipadala kanila aron sa pagtrabaho sa pagpalig-on sa siyudad sa Bountiful. Apan, ang mga Lamanite nagpadayon sa pag-angkon og kalampusan sa uban nga mga rehiyon tungod sa panagsumpaki taliwala sa mga Nephite.

Alma 54–55

Si Moroni misalikway sa tanyag ni Ammoron sa pagpakigbaylo og mga binilanggo ug migamit og pamaagi sa pagluwas sa mga binilanggo nga mga Nephite

Ipasabut nga ang Alma 54 mao ang rekord sa mga sulat nga gipadala tali ni Ammoron (ang hari sa Lamanite) ug ni Kapitan Moroni. Sa wala pa kini, ang mga Lamanite ug mga Nephite aduna nay daghang binilanggo sa gubat. Kini nga kapitulo nagrekord sa mga tubag ni Moroni ngadto sa hangyo ni Ammoron nga ang mga Lamanite ug mga Nephite magbinayloay og mga binilanggo.

Ipasabut nga ang Alma 54:9–12 naglangkob sa mga pulong ni Kapitan Moroni ngadto ni Ammoron. Dapita ang usa ka estudyante sa pagbasa og kusog niining mga bersikulo. Dayon paghangyo og laing estudyante sa pagbasa sa tubag ni Ammoron ngadto ni Kapitan Moroni sa Alma 54:18–20.

Sa unsang paagi nga ang motibo ni Kapitan Moroni sa pagbinayloay og mga binilanggo lahi kay sa kang Ammoron? (Mahimo nimong ipasabut nga si Moroni nagpakabana mahitungod sa mga pamilya, samtang si Ammoron nabalaka lamang sa iyang katawhan sa gubat tungod kay ang iyang gusto mao ang paglaglag sa mga Nephite.)
Sa unsang paagi nga ang pamahayag ni Ammoron diha sa Alma 54:18–20 nagpakita sa motibo ni Satanas sa iyang pakiggubat batok kanato?

Dapita ang usa ka estudyante sa pagbasa og kusog sa Alma 55:1–2. Hangyoa ang klase sa pagpangita sa tubag ni Moroni ngadto sa mga gibungat ni Ammoron.

Nganong dili gusto si Moroni nga mobuhat kon unsa ang gisulti ni Ammoron? (Nasayud siya nga si Ammoron namakak, ug dili siya gusto nga hatagan pa si Ammoron og bisan unsang gahum kay sa unsay anaa na niya.)
Unsay atong makat-unan gikan sa tubag ni Moroni ngadto kang Ammoron? (Bisan og ang mga estudyante mahimong mamulong og pipila ka mga kamatuoran, siguroha nga sila makasabut nga samtang mobarug kita nga lig-on alang sa unsay husto, makalikay kita sa mga impluwensya sa dautan gikan sa pag-angkon og gahum ngari kanato.)

Ang mosunod nga mga pamahayag ni Joseph Smith mahimong makatabang sa inyong panaghisgot bahin niining mga bersikulo:

“Si Satanas dili makatintal kanato pinaagi sa iyang mga pagdani gawas kon kita motugot ug monunot diha sa atong mga kasingkasing” (Mga Pagtulun-an sa mga Presidente sa Simbahan: Joseph Smith [2007], 255).

“Ang yawa walay gahum ibabaw kanato gawas lamang kon ato siyang tugotan” (Mga Pagtulun-an sa mga Presidente sa Simbahan: Joseph Smith, 255).

Isulat ang mosunod nga pakisayran sa kasulatan diha sa pisara: Alma 55:15–24, 28–31.

Ipasabut nga sa Alma 55 atong makat-unan nga si Kapitan Moroni mibuhi sa mga binilanggo nga mga Nephite didto sa siyudad sa Gid gamit ang mga laang (usa ka pamaagi nga gigamit diha sa gubat aron sa paglingla o paglupig sa kaaway). Sa Alma 55:3–14, atong makat-unan nga si Moroni migamit og sundalo nga Nephite nga ginganlan og Laman aron ang mga sundalo nga Lamanite nga nagbantay sa mga binilanggong Nephite mahubog. Dapita ang mga estudyante sa pagbasa sa hilum sa mga bersikulo nga imong gisulat sa pisara, nga mangita kon unsa ang gibuhat ni Kapitan Moroni sa higayon nga iyang napalibutan ang mga Lamanite sa siyudad sa Gid. Pahinumdumi ang mga estudyante sa pagpangita og mga baruganan samtang sila magtuon. Human sa igong panahon, hangyoa sila sa pagreport unsa ang ilang nadiskubrihan. Mahimo usab kang mangutana:

Unsa ang gitudlo niini nga mga bersikulo kanato mahitungod ni Moroni?

Isulat ang mosunod nga pamahayag diha sa pisara ug dapita ang mga estudyante nga sulatan ang mga blangko:

Kita dili maglipay diha sa … ; hinoon, kita kinahanglan maglipay diha sa …

Unsaon nato sa paggamit ang mga ehemplo ni Moroni nga dili maglipay diha sa pagpaagas og dugo? Sama pananglit, sa unsang paagi nga kita mogamit sa ehemplo ni Moroni ngadto sa mga butang nga atong nabasa ug natan-aw o ngadto sa atong mga dula?

Dapita ang mga estudyante sa paghunahuna sa mosunod nga pangutana:

Unsa ang inyong gibati nga gusto ni Mormon nga inyong makat-unan sa mga leksyon karon nga makatabang ninyo nga mahimong matinud-anon samtang kamo nakiggubat batok sa kaaway?

Ikonsiderar ang paghatag og panahon sa mga estudyante sa pagsulat diha sa ilang mga notebook o scripture study journal mahitungod sa unsay ilang buhaton aron malikayan ang pagsulod sa teritoryo ni Satanas ug mobarug nga lig-on batok sa iyang mga pagpang-ataki.

Tapusa pinaagi sa pagpamatuod sa mga kamatuoran nga imong gihisgutan sa klase karong adlawa.

Dugang nga Ideya sa Pagtudlo

Alma 53:20–21. Maglakaw nga matarung sa atubangan sa Dios

Dapita ang usa ka estudyante sa pagbasa og kusog sa Alma 53:20–21.

Unsay buot ipasabut sa maglakaw nga matarung sa atubangan sa Dios?

Hangyoa ang mga estudyante sa pagpamalandong kon sa unsang paagi nga sila, sama sa batan-ong mga manggugubat, mahimong “tinuod sa tanang pahanon bisan unsa pang butanga nga gisalig diha kanila.” Basaha ang mosunod nga pamahayag, diin si Presidente George Albert Smith mipakigbahin og maalamon nga tambag nga gihatag sa iyang apohan nga si George A. Smith:

“Ang akong apohan nga lalaki kanunayng mosulti ngadto sa iyang pamilya, ‘Adunay linya sa utlanan nga maayo kaayong pagkahimo tali sa teritoryo sa Ginoo ug teritoryo sa yawa. Kon kamo magpabilin diha sa linya nga habig sa Ginoo kamo anaa ubos sa iyang impluwensya ug walay tinguha sa paghimo og sayop; apan kon kamo makatabok og usa ka pulgada ngadto sa linya nga habig sa yawa anaa kamo sa gahum sa maninintal ug kon siya molampus, kamo dili na makahimo sa paghunahuna o bisan makapangatarungan og maayo tungod kay mawala kaninyo ang Espiritu sa Ginoo.’

“Kon ako usahay tintalon sa pagbuhat og piho nga butang, mangutana ko sa akong kaugalingon, ‘Sa asa man ko nga linya nahimutang?’ Kon akong nakita nga anaa sa luwas nga habig, sa habig sa Ginoo, buhaton nako ang husto nga butang sa tanang higayon. Busa kon ang mga tintasyon moabut paghunahuna sa mainampoong paagi mahitungod sa inyong problema ug ang impluwensya sa Ginoo motabang kaninyo sa maalamong pagdesisyon. Luwas lamang kita diha sa linya nga habig sa Ginoo” (“A Faith Founded upon Truth,” Deseret News, Hunyo 17, 1944, Church section, 9).

Ikonsiderar ang pagdrowing og usa ka pinabarug nga linya sa tunga-tunga sa pisara. Sulati ang usa ka habig sa pisara og Ang teritoryo sa Ginoo ug ang laing habig sa pisara Ang teritoryo sa yawa. Pangutan-a ang mga estudyante:

Agi og kalabutan sa linya nga nagbulag sa duha ka mga teritoryo, asa man ang labing luwas nga dapit nga angayang mahimutangan. (Sa habig sa Ginoo, magpalayo sa linya kutob sa mahimo.)
Unsa nga kakuyaw ang anaa sa pagsulay og puyo diha sa habig sa Ginoo apan magpaduol ngadto sa linya kon mahimo?
Unsay makatabang ninyo sa pagpalayo gikan sa linya?