Alma 5:1–36

Pasiuna

Sa dihang ang Simbahan nahulga sa unay nga panagbingkil ug kadautan (tan-awa sa Alma 4:9–11), si Alma miluwat sa hukmanan aron matutukan niya ang iyang mga paningkamot sa pagpalig-on sa Simbahan. Mialagad siya sa usa ka misyon sa pagtubos sa katawhan ni Nephi pinaagi sa “paghatag sa lunsay nga pagpamatuod batok kanila” (Alma 4:19). Gisugdan ni Alma ang iyang misyon pinaagi sa pagpahinumdom sa katawhan sa Zarahemla nga ang Ginoo miluwas sa ilang mga katigulangan gikan sa pisikal ug espirituhanon nga pagkaulipon. Siya miawhag kanila sa pagpangandam alang sa katapusan nga adlaw sa paghukom pinaagi sa pagtuo sa pulong sa Dios ug pagtimbang-timbang sa espirituhanon nga kahimtang sa ilang mga kasingkasing.

Mga Sugyot alang sa Pagtudlo

Alma 5:1–14

Si Alma miasoy mahitungod sa pagkakabig sa iyang amahan ug kadtong misunod kaniya

Isulat ang pulong kausaban diha sa pisara. Hangyoa ang mga estudyante sa pagpakigbahin og mga sanglitanan sa mga paagi nga ang mga tawo mahimong mousab sa ilang hitsura o sa ilang pamatasan. Dapita sila sa pagpasabut unsa kaha ang magdala o makaingon sa pipila niining mga kausaban sa katawhan.

Pahinumdumi ang mga estudyante nga si Alma nagpakabana mahitungod sa kadautan nga nagsugod sa pagtubo diha sa mga Nephite. Iyang nakita nga kon sila dili mag-usab, mawad-an sila sa gisaad nga mga panalangin sa pakigsaad nga ilang gihimo. Siya miluwat sa hukmanan ug mipahinungod sa iyang kaugalingon sa pagpangalagad ngadto sa katawhan ug sa pagtawag kanila sa paghinulsol. Nagsugod siya sa pagtudlo sa katawhan sa Zarahemla.

Dapita ang pipila ka estudyante nga magpuli-puli sa pagbasa og kusog gikan sa Alma 5:3–6. Hangyoa ang klase sa pagsunod, nga mangita sa mga panghitabo nga gipasabut og maayo ni Alma samtang nagsugod siya sa pagtudlo sa katawhan.

Sa unsa kaha nga paagi nga nakatabang kini sa katawhan ni Alma sa pagkadungog sa istorya sa pagkaulipon, pagtubos, ug sa pagkakabig sa amahan ni Alma ug kadtong misunod kaniya?
Tan-awa sa Alma 5:7. Sumala niining bersikulo, unsang matang sa kausaban ang nahitabo sa mga kinabuhi sa amahan ni Alma ug sa iyang katawhan?

Sa pisara, idugang ang mga pulong sa kasingkasing human sa kausaban, aron kini mabasa nga kausaban sa kasingkasing.

Unsa sa inyong hunahuna ang gipasabut sa “kausaban sa kasingkasing”? (Aron matabangan ang mga estudyante nga matubag kining pangutana, mahimo nimo silang sultihan nga si Elder Gerald N. Lund sa Seventy mitudlo nga diha sa mga kasulatan, ang pulong kasingkasing sa kanunay nagpasabut ngadto sa “tinuod, kahiladman sa tawo” [“Understanding Scriptural Symbols,” Ensign, Okt. 1986, 25].)
Unsa ang kalainan tali sa kausaban sa kasingkasing ug sa mga matang sa kausaban nga atong nahisgutan sa sinugdanan sa leksyon?

Ipasabut nga sa Alma 5:7–9, 14, migamit si Alma og nagkalain-laing mga pulong sa paghulagway sa kausaban diha sa kasingkasing. Idugang ngadto sa mga pulong diha sa pisara aron mabasa sa ingon niini, Ang kausaban sa kasingkasing nahisama sa …

Hangyoa ang mga estudyante sa pagbasa sa hilum sa Alma 5:7–9, 14, nga mangita sa paghulagway ni Alma kon unsa gayud ang kausaban sa kasingkasing. Dapita sila sa pagreport unsay ilang nakit-an. Samtang nagreport ang mga estudyante, idugang ang mga pulong ngadto sa pisara. (Ang inyong lista mahimong mahisama sa mosunod: Ang kausaban sa kasingkasing nahisama sa … pagkahigmata sa hinanok nga pagkatulog; napuno sa kahayag; nahimong gawasnon gikan sa mga kadena; paglambo sa inyong kalag; nanag-awit mahitungod sa matubsanong gugma; natawo sa Dios; nakadawat sa imahe sa Ginoo diha sa inyong panagway.)

Sa unsang paagi nga ang kausaban sa kasingkasing nahisama sa paghulagway nga nalista diha sa pisara?
Sa unsang paagi nga ang kausaban sa kasingkasing makita sa linihokan sa tawo? Sa unsang paagi nga ang kausaban sa kasingkasing usahay mamatikdan diha sa panagway sa tawo? (Mahimo nimong pangutan-on ang mga estudyante sa paghulagway sa hitsura o gawi sa usa ka tawo nga ilang nailhan kinsa mibati nga “nakadawat sa imahe [sa Ginoo] diha sa [iyang] panagway.”)

Dapita ang usa ka estudyante sa pagbasa og kusog sa Alma 5:10, ug hangyoa ang klase sa pag-ila sa tulo ka pangutana nga gipangutana ni Alma sa katawhan. (Mahimo nimong isugyot nga markahan sa mga estudyante kining mga pangutana.) Ang pagbasa niining mga pangutana makatabang sa mga estudyante sa pag-ila diha sa nagsunod nga mga bersikulo sa mga rason nga nagdala ni Alma ug sa iyang katawhan sa pagsinati og usa ka dako nga kausaban sa kasingkasing.

Dapita ang mga estudyante sa pagbasa ug kusog sa Alma 5:11–13, ug hangyoa ang klase sa pag-ila unsa ang nakadala og dako nga kausaban sa kasingkasing sa amahan ni Alma ug sa iyang mga sumusunod. (Ang ilang pagtuo sa pulong sa Dios ug, pinaagi sa ekstensyon, ang ilang hugot nga pagtuo ug pagsalig diha sa Dios. Mahimo usab nimong ipasabut ang impluwensya sa pulong sa Dios nga gihisgutan sa Alma 5:5, 7.)

Unsa ang koneksyon nga inyong nakita tali sa pagtuo sa pulong sa Dios ug pagsinati ug kausaban sa kasingkasing? (Tabangi ang mga estudyante sa pag-ila sa mosunod nga baruganan: Kon motuo kita sa pulong sa Dios ug magpakita og hugot nga pagtuo ni Jesukristo, makasinati kita og dakong kausaban sa kasingkasing. Ipasabut og maayo nga ang pulong sa Dios sumala sa gisangyaw ni Abinadi ug ni Alma nagtutok sa pagtubos nga moabut pinaagi ni Jesukristo [tan-awa sa Mosiah 16:4–9; 18:1–2].)

Ipasabut nga ang laing paagi sa pagpahayag nga ang usa ka tawo adunay dakong kausaban sa kasingkasing mao ang pag-ingon nga sila natawo pag-usab. Tabangi ang mga estudyante nga masabtan nga ang “matawo sa Dios” o “matawo pag-usab” nagpasabut sa kausaban nga masinati sa usa ka tawo kon sila modawat ni Jesukristo ug magsugod og bag-ong kinabuhi isip Iyang disipulo. Aron matabangan ang mga estudyante nga makasabut nga ang pagsinati sa dakong kausaban sa kasingkasing, o matawo pag-usab, sa kasagaran inanay nga proseso, basaha ang mosunod nga pamahayag ni Elder D. Todd Christofferson sa Korum sa Napulog Duha ka mga Apostoles:

“Tingali makapangutana kamo, Ngano nga kining dakong kausaban dili diha-diha dayon moabut kanako? … Alang sa kadaghanan kanato, ang mga kausaban mas hinay-hinay ug mahitabo sa kadugayan. Ang pagpakatawo pag-usab … mas labaw nga proseso kay sa usa ka hitabo. Ug ang pag-apil niana nga proseso mao ang labing importante nga katuyoan sa pagkamortal” (“Natawo Pag-usab,” Ensign o Liahona, Mayo 2008, 78).

Kanus-a ang higayon nga inyong nabati ang kausaban sa inyong kasingkasing samtang naningkamot kamo sa pagpakabuhi sumala sa pulong sa Dios?
Unsaon ninyo sa paghulagway ang mga pagbati ug mga lihok nga inubanan sa kausaban sa kasingkasing?
Sa unsang paagi nga nausab ang inyong kasingkasing samtang nagtuon kamo sa Basahon ni Mormon diha sa seminary niining tuiga?

Hatagi og pipila ka minuto ang mga estuyante sa pagsulat diha sa mga notebook o scripture study journal bahin sa usa o duha ka mga butang nga ilang buhaton sa mas matinguhaong paagi nga magpakabuhi sumala sa pulong sa Dios.

Alma 5:15–36

Nagtudlo si Alma nga ang dakong kausaban sa kasingkasing gikinahanglan aron makasulod sa gingharian sa langit

Hatagi ang matag estudyante og handout sa mosunod nga tsart, o ipakita ang tsart diha sa pisara aron makopya sa mga estudyante.

Imahe

Cardiogram

Ipasabut nga ang cardiogram mao ang usa ka tsart nga usahay gamiton sa mga doktor sa pagtimbang-timbang o pagmonitor sa lihok sa atong kasingkasing. Makatabang kini nila sa pag-ila sa mga problema o mga kondisyon nga kinahanglang tambalan.

Sultihi ang mga estudyante nga human si Alma nagtudlo sa pulong sa Dios nga midala sa iyang amahan ug sa uban aron makasinati og dakong kausaban sa kasingkasing, siya nangutana sa katawhan nga makatabang kanila sa pagtimbang-timbang sa kondisyon sa ilang kaugalingong kasingkasing. Dapita ang mga estudyante sa pagbasa sa hilum sa Alma 5:14, nga mangita sa tulo ka mga pangutana nga gipangutana ni Alma sa katawhan. (Mahimo nimong isugyot nga markahan sa mga estudyante kining mga pangutana).

Ipasabut nga si Alma nangutana og dugang pang mga pangutana aron matabangan ang iyang katawhan sa pagkonsiderar sa kondisyon sa ilang mga kasingkasing. Dapita ang mga estudyante sa paggahin og pipila ka minuto sa pagtuon ug pagpamalandong sa mga tudling sa kasulatan nga nalista sa ibabaw sa espirituhanon nga cardiogram. Awhaga sila sa pagmarka sa mga kahon diha sa tsart nga labing naghulagway kon unsa ang ilang gibati sa ilang gibuhat kabahin sa mga pangutana diha sa matag tudling. (Hinumdumi nga ang pipila ka bersikulo adunay kapin sa usa ka pangutana.) Tungod sa personal nga kinaiyahan niining kalihokan, ang mga estudyante kinahanglan dili hangyoon sa pagpakigbahin sa ilang mga tubag diha sa klase.

Kon nakakompleto na ang mga estudyante sa ilang mga cardiogram, dapita sila sa pagbasa sa hilum sa Alma 5:29–31, nga mangita og dugang pang mga pangutana nga gipangutana ni Alma aron matabangan ang iyang katawhan sa pagtimbang-timbang sa ilang mga kasingkasing. (Mahimo nimong isugyot sa mga estudyante nga usbon og gamay ang mga pangutana aron magamit sa ilang kaugalingon: “Hubo ba ako sa kasina?” “Nagbiay-biay ba ako sa uban?” “Mihimo ba ako og pagpanggukod sa uban?”)

Dapita ang pipila ka estudyante nga magpuli-puli sa pagbasa og kusog sa Alma 5:17–18, 20–25. Hangyoa ang klase sa pagpangita sa mga rason kon nganong ang atong mga kasingkasing kinahanglang mausab agi og pagpangandam sa adlaw sa paghukom. Ipangutana ang mosunod aron matabangan ang mga estudyante nga makasabut nga pinaagi sa pagsinati og kausaban sa kasingkasing, atong giandam ang atong kaugalingon sa pagdawat sa usa ka dapit sa gingharian sa langit:

Unsa nga mga pulong ang gigamit ni Alma nga mahulagway ang kahimtang nga inyong gusto kon kamo mobarug atubangan sa Dios aron mahukman? (Samtang motubag ang mga estudyante niining pangutana, mahimo nimong idirekta ang ilang pagtagad ngadto sa Alma 5:16, 19.)
Sa unsang paagi nga ang pagsinati og kausaban sa kasingkasing karon makatabang ninyo sa pagpangandam nga makadawat og usa ka dapit diha sa gingharian sa langit?

Isulat ang mosunod nga mga pangutana diha sa pisara. (Mahimo nimong isulat kini sa pisara sa dili pa magklase.)

Unsa ang imbitasyon sa Ginoo nga atong buhaton?

Unsa ang mga sangputanan sa pagdawat o pagsalikway niining imbitasyon?

Unsa ang gitudlo niini nga mga bersikulo mahitungod sa Manluluwas?

Hangyoa ang usa ka estudyante sa pagbasa og kusog sa Alma 5:33–36 samtang ang uban sa klase mangita sa mga tubag sa mga pangutana diha sa pisara. Dapita ang mga estudyante sa pagpakigbahin sa unsay ilang nakit-an.

Tapusa pinaagi sa paghatag sa mga estudyante og pipila ka minuto sa pagsulat. Hangyoa sila sa pagpili og usa ka bersikulo o mga pulong gikan sa Alma 5:1–36. Dapita sila sa pagsulat mahitungod kon unsa ang kahulugan sa bersikulo o mga pulong ngadto kanila ug kon unsa ang ilang mahimo sa gisugyot niini samtang sila nagtinguha og kausaban sa ilang mga kasingkasing pinaagi sa Pag-ula ni Jesukristo. Ipamatuod nga kon magpadayon kita sa pagsinati og kausaban sa kasingkasing ug maghimo sa mga buhat sa katarung, maandam kita sa pagsulod sa gingharian sa Dios.

Komentaryo ug Background nga Impormasyon

Alma 5:14, 26. “Kamo nakasinati ba niining dako nga kausaban diha sa inyong mga kasingkasing?”

Si Presidente Ezra Taft Benson mipasabut nga ang pagsinati og “dako nga kausaban sa kasingkasing” sa kasagaran hinay-hinay nga proseso:

“Ang pagkahimong sama ni Kristo usa ka tibuok kinabuhi nga paningkamot ug sa kasagaran naglakip og kalamboan ug kausaban nga hinay, hapit dili himatikdan. Ang mga kasulatan nagrekord sa dalaygon nga mga istorya sa mga kalalakin-an kansang mga kinabuhi adunay dakong kausaban, sa kalit lang, sama ni: Alma nga Batan-on, ni Pablo sa dalan paingon sa Damasco, ni Enos nga nag-ampo hangtud sa lawom nang kagabhion, ni Haring Lamoni. Ang ingon nga makapahingangha nga mga ehemplo sa gahum sa pag-usab bisan niadtong lubog na kaayo sa sala naghatag og pasalig nga ang Pag-ula makatabang gani niadtong anaa sa kinalawman sa kawalay paglaum.

“Apan kita kinahanglan gayud nga magmaampingon samtang maghisgot niining dalaygon nga mga ehemplo. Bisan kon kini tinuod ug gamhanan, mao kini ang eksepsyon nga labaw pa sa lagda. Kay sa kada Pablo, kada Enos, ug sa kada Haring Lamoni, adunay gatusan ug liboan ka mga tawo nga miisip nga ang proseso sa paghinulsol dili daling buhaton, dili daling sabton. Kada adlaw sila nagkaduol ngadto sa Ginoo, sa ginagmay ilang naamguhan nga sila nag-ugmad og kinabuhi nga sama sa dios. Sila nagpakabuhi sa kamaayo, pagserbisyo, ug pasalig. Sama sila sa mga Lamanite, nga giingon sa Ginoo nga ‘gibunyagan uban sa kalayo ug uban sa Espiritu Santo, ug sila wala masayud niini’ (3 Ne. 9:20; italics gidugang)” (“A Mighty Change of Heart,” Ensign, Okt. 1989, 5).

Alma 5:21–24, 27. “Walay usa ka tawo nga maluwas gawas kon ang iyang mga saput mahugasan nga puti”

Si Presidente Boyd K. Packer sa Korum sa Napulog Duha ka mga Apostoles misulti kon sa unsang paagi nga iyang nasabtan ang kaimportante sa kalimpyo sa espirituhanon nga paagi:

“Kapin sa 50 ka tuig ang milabay panahon sa Ikaduhang Gubat sa Kalibutan, aduna koy kasinatian. Ang among kauban nga tigpamomba gibansay didto sa Langley Field, Virginia, sa paggamit sa labing bag-ong imbensyon—ang radar. Gimandoan kami nga moadto sa West Coast ug dayon ngadto sa Pacific.

“Gisakay kami sa usa ka dekarga nga tren nga dunay mga boxcar nga dunay mga piot nga higdaanan nga birahon gikan sa bongbong inig ka gabii. Walay kan-anan. Hinoon, dunay temporaryong kusina nga gipahimutang diha sa boxcar nga hugaw ang salog.

“Nagsul-ob kami og hayag nga kolor nga mga uniporme sa summer. Ang butanganan sa bagahe naiskala, mao nga wala mi ilisan nga sinina sulod sa unom ka adlaw nga biyahe. Init kaayo ang paglatas sa Texas ug Arizona. Ang aso ug mga agipo [cinder] gikan sa makina napahimo niini nga dili gayud komportable. Walay paagi nga makaligo o malabhan ang among mga uniporme. Milabay mi sa Los Angeles usa ka buntag—usa ka bulingit nga gisul-ob—ug gisultihan kami nga mobalik sa tren nianang gabhiuna.

“Naghunahuna kami una sa pagkaon. Ang 10 namo nag-amutay sa among mga kwarta ug mipaingon sa kinanindotan nga restaurant nga among makit-an.

“Danghang tawo, ug mao nga miapil mi sa taas nga linya sa naghulat nga makalingkod. Nag-una ko, diha sa luyo lang gyud sa pipila ka mga babaye nga maayo og panamit. Bisan dili pa molingi, ang mga babaye nga maayo og panamit sa among atubangan wala madugay nakabantay nga naa mi didto.

“Milingi siya ug mitan-aw kanamo. Unya mitan-aw siya nako gikan sa ulo hangtud sa tiil. Anaa nagbarug ko nga nagkadusingot, bulingit, nagkaabu, gum-os ang uniporme. Misulti siya sa tuno nga gihugawan, ‘Pastilan, pagkabulingit nga mga tawo!’ Ang tanan nanan-aw namo.

“Walay duda nanghinaut siya nga unta wala mi didto; parehas mi og panghinaut. Akong gibati ang kabulingit, ang pagkadili komportable, ug naulaw.

“Sa kaulahian, sa dihang nagseryuso ko sa pagtuon sa mga kasulatan, nabantayan nako ang mga pakisayran sa pagkalimpyo sa espirituhanon nga paagi. Usa ka bersikulo nag-ingon, ‘Kamo labaw pa nga mauyamot nga mopuyo uban sa usa ka balaan ug makiangayon nga Dios, ubos sa usa ka kasayuran sa inyong pagkahugaw sa iyang atubangan, kay sa kamo mopuyo uban sa mga sinilutan nga kalag sa impyerno.’ [Mormon 9:4.]

“Makasabut ko niana. Nahinumdom ko unsa ang akong gibati niadtong adlawa sa Los Angeles. Moingon ko nga ang pagkadili limpyo sa espirituhanon nga paagi magdala og kaulaw ug walay sukod nga pagpakaulaw nga mas grabe pa sa akong nabati kaniadto. Nakit-an nako ang mga pakisayran—adunay dili mominos sa walo niini—nga nag-ingon nga walay mahugaw nga butang nga makasulod sa presensya sa Dios [tan-awa sa 1 Nephi 10:21; 15:34; Alma 7:21; 11:37; 40:26; 3 Nephi 27:19; D&P 94:9; Moises 6:57]. Samtang nakaamgo ko nga kadtong mga pakisayran gamay ra ang kalabutan sa hugaw nga sinina o bulingit nga mga kamot, mihukom ko nga gusto nako nga magpabiling limpyo sa espirituhanon nga paagi” (“Washed Clean,” Ensign, Mayo 1997, 9).