Leksyon 77
Alma 12
Pasiuna
Human nga ang mga gipamulong ni Amulek nakapahimo ni Zeezrom “sa pagpangurog ubos sa usa ka kasayuran sa iyang kasaypanan” (Alma 12:1), si Alma mibarug sa pagpatin-aw sa unsay gitudlo ni Amulek. Si Alma mitutok sa mga kamatuoran nga makatabang sa katawhan sa Ammonihah nga maghinulsol sa katig-a sa ilang mga kasingkasing ug sa ubang mga sala. Iyang gipasabut og maayo nga ang maliputon nga lit-ag ni Satanas, ang mga paghukom nga moabut sa mga dautan, ug ang plano sa katubsanan, nga naghimong posible alang niadtong maghinulsol aron mapasaylo sa ilang mga sala.
Mga Sugyot alang sa Pagtudlo
Alma 12:1–7
Gibutyag ni Alma ang plano ni Zeezrom—ug ang plano sa kaaway—ngadto sa katawhan sa Ammonihah
Sunda ang kauban nga hulagway sa pagbugkos sa usa ka pisi, o lit-ag, ginamit ang usa ka pisi o hilo. Ipakita unsaon paggamit ang lit-ag pinaagi sa paggunit sa laang atubangan sa usa ka kendi o pagkaon diha ibabaw sa lamesa. Hangyoa ang usa ka estudyante sa pagkab-ot sa lit-ag alang sa pagkaon. Kon iyang buhaton kini, hugti ang lit-ag. (Pag-amping nga dili masakitan ang estudyante.)
Dapita ang usa ka estudyante sa pagribyu sa klase kon sa unsang paagi si Zeezrom misulay sa paglaang ni Amulek diha sa usa ka lit-ag (tan-awa sa Alma 11:21–25). Ipasabut nga human nasabtan ni Amulek ang tumong ni Zeezrom ug mitubag kaniya, si Alma mibarug usab aron mamulong ngadto kang Zeezrom ug sa katawhan nga naminaw (tan-awa sa Alma 12:1–2). Dapita ang mga estudyante sa pagbasa sa hilum sa Alma 12:3–6, nga mangita sa mga pulong nga gigamit ni Alma sa paghulagway sa mga taktika ni Zeezrom. (Mahimo nimong awhagon ang mga estudyante sa pagmarka niining mga pulong.) Ipareport nila kon unsay ilang nakit-an.
-
Kinsang mga plano ang gisunod ni Zeezrom?
-
Unsa ang gisulti ni Alma nga mga intensyon sa yawa?
-
Unsa ang nakahimo ni Alma nga makita kini nga plano?
Dapita ang mga nga estudyante sa pagpamahayag sa mga baruganan nga mag-summarize unsa ang ilang nakat-unan sa Alma 12:3 mahitungod kon sa unsang paagi nga makabantay sila sa mga pagpanglingla sa kaaway. Bisan og ang mga estudyante mahimong mogamit og lain-laing mga pulong, kinahanglan nilang mailhan ang mosunod nga baruganan: Ang Espiritu Santo makatabang kanato sa pag-ila sa mga pagpanglingla sa kaaway. Mahimo nimong pahinumduman ang mga estudyante nga sa miaging leksyon, nakat-unan nila nga kon kita mosalig sa Espiritu Santo, makabuntog kita sa tintasyon. Ipasabut nga sa pagbuntog sa tintasyon o pagpanglingla, kinahanglan makaila gayud una kita niini ug ang kakuyaw nga mahimo niini ngari kanato. Dayon kinahanglan gayud kita nga molikay niini kutob sa atong mahimo.
-
Kanus-a ang Espiritu Santo nakatabang kaninyo sa pag-ila ug paglikay sa tintasyon? (Human makatubag ang mga estudyante, mahimo usab nimong ipakigbahin ang imong kaugalingon nga kasinatian).
Hatagi ang mga estudyante og pipila ka minuto sa pagsulat diha sa mga notebook o mga scripture study journal mahitungod kon unsaon nila nga madugangan ang ilang kasensitibo sa mga pag-aghat sa Espiritu Santo aron sila makaila ug makalikay sa mga lit-ag sa kaaway.
Alma 12:8–18
Nagtudlo si Alma mahitungod sa katapusang paghukom sa tanang katawhan
Hangyoa ang mga estudyante sa paghunahuna mahitungod sa mga trabaho nga gusto nilang makab-ot. Dapita ang pipila kanila sa paghisgot mahitungod sa trabaho nga ilang gusto. Hangyoa sila sa pagbana-bana kon pila kaha ang ilang bayranan nga matrikula sa kolehiyo, unibersidad, o trade school aron makaangkon sa kahibalo ug mga kahanas nga gikinahanglan aron mahimong malampuson niana nga trabaho. Dapita ang usa ka estudyante sa pagbasa og kusog sa mosunod nga pamahayag ni Elder David A. Bednar sa Korum sa Napulog Duha ka mga Apostoles. Hangyoa ang klase sa pagpaminaw sa “bayranan” nga giingon ni Elder Bednar nga kinahanglan gayud natong bayaran aron makadawat og espirituhanong kahibalo.
“Ang espirituhanon nga pagsabut … dili yano nga mahatag ngari [kanato]. Ang bayranan sa kakugi ug sa pagkat-on pinaagi sa pagtuon ug usab pinaagi sa hugot nga pagtuo kinahanglan gayud nga mabayran aron maangkon ug personal nga makapanag-iya sa mao nga kahibalo. Niini lamang nga paagi makahimo nga unsa ang nahibaloan sa hunahuna mabati usab diha sa kasingkasing” (“Magtukaw uban sa Bug-os nga Pagkamapadayunon,” Ensign o Liahona, Mayo 2010, 43).
Dapita ang usa ka estudyante sa pagbasa og kusog sa Alma 12:7–8. Hangyoa ang klase sa pagsunod, nga mangita sa ebidensya nga si Zeezrom nagsugod sa pagbayad sa espirituhanon nga “bayranan” nga gikinahanglan aron makaangkon og espirituhanong kahibalo. Dapita ang mga estudyante sa pagpasabut unsay ilang nakita niini nga mga bersikulo nga nagpakita nga ang kasingkasing ni Zeezrom nagsugod sa pag-usab.
Ipasabut nga si Zeezrom nangutana kang Alma mahitungod sa pagkabanhaw. Imbis motubag dayon sa gipangutana, si Alma mitudlo kaniya mahitungod sa pag-angkon og espirituhanong kahibalo. Dapita ang usa ka estudyante sa pagbasa og kusog sa Alma 12:9–11. Hangyoa ang klase sa pagpangita unsa ang gitudlo ni Alma kang Zeezrom mahitungod sa pag-angkon og espirituhanong kahibalo. Ipasabut nga ang “mga misteryo sa Dios mao ang espirituhanong mga kamatuoran nga mahibaloan lamang pinaagi sa pagpadayag … niadtong kinsa mga masulundon sa ebanghelyo” (Giya ngadto sa mga Kasulatan, “Misteryo sa Dios,” scriptures.lds.org). (Mahimo nimong isulat kini nga pamahayag diha sa pisara. Mahimo usab nimong isugyot nga isulat kini sa mga estudyante diha sa ilang mga kasulatan tupad sa Alma 12:9.)
Hangyoa ang mga estudyante sa pagpahayag sa ilang kaugalingong mga pulong unsa ang gitudlo sa Alma 12:9 mahitungod sa unsay angay natong buhaton aron makadawat og espirituhanong kamatuoran. (Ang mga estudyante mahimong mogamit og lain-laing mga pulong, apan ang ilang mga tubag kinahanglan mopahayag nga ang Ginoo mopadayag og espirituhanong mga kamatuoran ngari kanato sumala sa atong pagpatalinghug ug kakugi ngadto sa Iyang mga pulong. Mahimo nimong awhagon ang mga estudyante sa pagsulat niini nga baruganan diha sa ilang mga kasulatan duol sa Alma 12:9.)
-
Unsa ang relasyon tali sa kahimtang sa atong mga kasingkasing ug sa atong abilidad sa pagdawat og espirituhanong kamatuoran?
Sa Alma 12:10–11, ipasabut ang kasukwahi sa mga sangputanan alang niadtong dili magpatig-a sa ilang mga kasingkasing batok sa kamatuoran ug alang niadtong magpatig-a.
-
Sa unsang paagi ang pagkahibalo niini nga mga sangputanan makaimpluwensya sa inyong tinguha sa pagpangita og mas dako nga espirituhanong kahibalo?
Ipasabut nga human si Alma mitudlo kon unsaon nato sa pagkahibalo sa espirituhanong kamatuoran, siya mitubag sa gipangutana ni Zeezrom. Hangyoa ang mga estudyante nga balikon ang gipangutana ni Zeezrom diha sa Alma 12:8 sa ilang kaugalingong mga pulong. Dapita sila sa pagbasa sa hilum sa Alma 12:12–15, nga mangita sa unsay gitudlo ni Alma kang Zeezrom mahitungod sa pagkabanhaw ug paghukom. Samtang nagbasa ang mga estudyante, isulat sa pisara ang mosunod: Kita adunay tulubagon atubangan sa Dios alang sa atong … , … , ug …
Inig human og basa sa mga estudyante, hangyoa sila sa pagkompleto sa mga pulong diha sa pisara: Kita adunay tulubagon atubangan sa Dios alang sa atong mga hunahuna, mga pulong, ug mga lihok.
-
Sa inyong hunahuna sa unsang paagi nga kining kamatuoran nakaapekto kang Zeezrom? (Ipapakli sa mga estudyante ang Alma 14:6 ug 15:3 aron pangitaon ang tubag.) Ngano kaha nga kining kamatuoran adunay gamhanang epekto kang Zeezrom? (Mahimo nimong ipasabut nga si Zeezrom wala lang nagpakabana sa iyang kaugalingon. Siya nagpakabana mahitungod sa mga tawo nga iyang gipahisalaag.)
-
Unsang matang sa mga hunahuna, mga pulong, ug mga lihok nga gipanglimbasugan sa mga tawo nga mahimong mohukom kanila kon sila dili maghinulsol? (Aron matabangan ang mga estudyante sa pagpamalandong ug paghisgot kon sa unsang paagi ang ilang mga pagpili sa mga kalingawan ug media makaimpluwensya sa ilang mga hunahuna, mga pulong, ug mga lihok, mahimo nimong i-refer ngadto sa tambag sa kalingawan ug media diha sa Alang sa Kalig-on sa mga Kabatan-onan.)
-
Unsay mahimong kalainan niini sa inyong inadlaw nga mga pagpili kon inyong hinumduman ang kamatuoran nga gisulat sa pisara?
Ipasabut ang cross-reference sa Mosiah 4:30 sa Alma 12:14, footnote 14a, ug dapita ang usa ka estudyante sa pagbasa og kusog sa Mosiah 4:30. (Mahimo nimong isugyot nga markahan sa mga estudyante kini nga cross-reference.) Kon adunay igong panahon, ipa-refer og balik sa mga estudyante ngadto sa unsay ilang gisulat mahitungod sa pagpalambo sa ilang kasensitibo sa mga pag-aghat sa Espiritu Santo. Dapita sila sa pagdugang og pipila ka mga hunahuna mahitungod kon sa unsang paagi nga ang ilang personal nga pagsabut sa pagkamay-tulubagon diha sa Dios makaimpluwensya sa ilang tinguha sa pag-ila ug paglikay sa tintasyon.
Alma 12:19–37
Si Alma mipasabut kon sa unsang paagi nakatabang kanato ang plano sa katubsanan sa pagbuntog sa mga epekto sa Pagkapukan
Ipakita sa mga estudyante ang hulagway nga Adan ug Eva Nangluhod sa Altar (Libro sa mga Hulagway sa Ebanghelyo [2009], nu. 4). Ipasabut nga ang usa ka tawo nga ginganlan og Antionah, kinsa mao ang usa sa mga labaw nga magmamando sa Ammonihah, nangutana kabahin sa unsa ang gitudlo ni Alma ug Amulek mahitungod sa pagkabanhaw. Miabut siya aron mangutana kang Alma kon sa unsang paagi nga ang katawhan mahimong imortal. (Tan-awa sa Alma 12:20–21.)
Pangutan-a ang mga estudyante unsa sila kamasaligon sa pagpasabut ngadto sa usa ka tawo nga dili miyembro sa Simbahan kon sa unsang paagi kita matubos gikan sa Pagkapukan. Aron matabangan sila nga maandam sa pagtudlo niining kamatuoran ngadto sa laing tawo, ipapangita nila ang mga bersikulo sa mosunod nga tsart ug isulat unsa ang ilang nakat-unan diha sa tukma nga mga kolum. (Mahimo nimong kopyahon kining tsart diha sa pisara sa dili pa magsugod ang klase. Dapita ang mga estudyante sa pagkopya niini sa mga notebook o scripture study journal.)
|
Ang mga epekto sa Pagkapukan (Alma 12:22, 24) |
Unsa ang gibuhat sa Dios aron sa pagpahinabo sa atong katubsanan (Alma 12:24–25, 28–33) |
Unsa ang angay natong buhaton aron matubos (Alma 12:24, 30, 34, 37) |
|---|---|---|
Samtang nagkompleto ang mga estudyante sa tsart, ang uban nila tingali nanginahanglan sa imong tabang. (Usa ka paagi aron matabangan ang mga estudyante nga makasabut sa mga kasulatan mao ang pagtudlo nila ngadto sa mga footnote. Sama pananglit, ang mga pakisayran sa kasulatan nga gihatag diha sa footnote 22c tingali makatabang sa mga estudyante nga masabtan kon unsa ang kahulugan niini alang sa tanang mga tawo nga nawala ug napukan.) Kon makompleto na sa mga estudyante ang tsart, ipangutana ang mosunod: (Mahimo nimong isulat kini nga mga pangutana diha sa pisara sa dili pa magklase aron ang mga estudyante makakonsiderar sa ilang mga tubag samtang ilang sulatan ang tsart.)
-
Sa unsang paagi ang Pag-ula ni Jesukristo nagtugot kanato nga mabuntog ang mga epekto sa Pagkapukan? (Tungod sa Pag-ula ni Jesukristo, kitang tanan makabuntog sa pisikal nga kamatayon pinaagi sa pagkabanhaw. Ug pinaagi sa Pag-ula sa Manluluwas ug sa atong paghinulsol, kita makabalik ngadto sa Dios gikan sa atong kahimtang sa “pagkawala ug pagkapukan”.)
-
Sumala sa Alma 12:24, unsay gitudlo ni Alma nga katuyoan sa kinabuhi? (Siya miingon nga kini nga kinabuhi mao ang usa ka panahon alang kanato sa pagpangandam sa pagsugat sa Dios. Mahimo nimong isugyot nga markahan sa mga estudyante ang mga pulong sa Alma 12:24 nga nagtudlo niini nga baruganan.)
Aron matabangan ang mga estudyante sa paggamit unsa ang ilang nakat-unan, pangutana og sama sa mosunod:
-
Sa unsang paagi nga ang pagkahibalo sa katuyoan sa kinabuhi nakatabang sa paggiya kaninyo?
-
Sa unsang paagi ang inyong hugot nga pagtuo sa Langitnong Amahan ug ni Jesukristo nakatabang kaninyo sa pagpangandam sa pagsugat Kanila?
Tapusa uban sa imong pagpamatuod nga karon mao ang panahon sa pagpangandam sa pagsugat sa Dios.
Komentaryo ug Background nga Impormasyon
Alma 12:24. “Kahimtang sa pagsulay”
Diha sa tanan nga mga kasulatan, ang mga pulong “kahimtang sa pagsulay” o “panahon sa pagsulay” makita lamang diha sa basahon sa Alma (tan-awa sa Alma 12:24; 42:4, 10, 13). Si Elder L. Tom Perry sa Korum sa Napulog Duha ka mga Apostoles mihulagway niining panahon sa pagsulay:
“Ang nag-unang katuyoan sa kinabuhi sa yuta mao ang pagtugot sa atong mga espiritu, nga nabuhi na sa wala pa ang kalibutan, aron mahiusa sa atong mga lawas sulod sa usa ka panahon sa talagsaon nga oportunidad sa pagka-mortal. Ang pagpakig-uban sa duha naghatag kanato sa pribilehiyo sa pagtubo, paglambo, ug pagkahingkod nga mahimo lamang nato sa nahiusa nga espiritu ug lawas. Pinaagi sa atong mga lawas, kita mosinati sa piho nga gidaghanon sa pagsulay nga ginganlan og usa ka kahimtang sa pagsulay sa atong pagpakabuhi. Kini usa ka panahon sa pagkat-on ug pagsulay aron pamatud-an ang atong kaugalingon nga takus sa mahangturon nga mga oportunidad. Kining tanan kabahin sa usa ka balaang plano sa atong Amahan alang sa Iyang mga anak” (“Proclaim My Gospel from Land to Land,” Ensign, Mayo 1989, 14).
Alma 12:32. Ang pagdawat sa mga sugo human makadawat og kahibalo sa plano
Si Presidente Boyd K. Packer sa Korum sa Napulog Duha ka mga Apostoles mitudlo nga ang kahibalo sa plano sa Dios nagtabang kanato sa pagsabut nganong kinahanglan kita nga motuman sa mga sugo. Namulong ngadto sa mga magtutudlo sa mga kabatan-onan, siya miingon:
“Ang mga batan-on matingala ‘ngano?’—Ngano nga kita gisugo sa pagbuhat sa pipila ka mga butang, ug ngano nga kita gisugo sa dili pagbuhat sa ubang mga butang? Ang kahibalo sa plano sa kalipay, bisan anaa sa outline nga porma, makahatag sa batan-ong mga hunahuna og usa ka ‘ngano’. …
“Kadaghanan sa lisud nga mga pangutana nga atong giatubang diha sa Simbahan karon, ug mahimo nato kining ilista—aborsyon ug sa tanan niini, tanang mga hagit niadtong naghupot sa priesthood ug niadtong kinsa wala—dili matubag kon walay pipila ka mga kahibalo sa plano isip usa ka background.
“Si Alma misulti niini, ug mao kini, naghunahuna ko bag-o lang, ang akong paborito nga kasulatan, bisan tuod og akong usbon karon ug unya: ‘ang Dios mihatag ngadto kanila sa mga sugo, human ikapahibalo ngadto kanila ang laraw sa katubsanan’ (Alma 12:32; emphasis gidugang). …
“… Kon kamo naningkamot sa paghatag sa [mga estudyante] og usa ka ‘ngano,’ sunda kana nga sumbanan: ‘ang Dios mihatag ngadto kanila sa mga sugo, human ikapahibalo ngadto kanila ang plano sa katubsanan” (”The Great Plan of Happiness” [pakigpulong ngadto sa CES religious educators, Ago. 10, 1993], si.lds.org).