Alma 39–44 (Unit 20)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga summary sa mga doktrina ug mga baruganan nga nakat-unan sa mga estudyante samtang sila nagtuon sa Alma 39–44 (unit 20) dili tuyo nga itudlo isip kabahin sa imong leksyon. Ang leksyon nga imong itudlo mosentro lamang diha sa pipila niini nga mga doktrina ug mga baruganan. Sunda ang mga pag-aghat sa Balaang Espiritu samtang imong ikonsiderar ang mga panginahanglan sa imong mga estudyante.

Day 1 (Alma 39)

Samtang magtuon sa mga pulong ni Alma ngadto sa iyang badlungon nga anak nga lalaki nga si Corianton, ang mga estudyante makakat-on nga ang sekswal nga sala usa ka salawayon diha sa panan-aw sa Ginoo. Gitudlo usab ni Alma sa iyang anak nga ang paghinulsol naglakip sa pag-angkon ug pagbiya sa atong mga sala ug pagbalik ngadto sa Ginoo uban sa tibuok natong hunahuna, gahum, ug kusog. Basahon sa mga estudyante ang pagpamatuod ni Alma nga si Jesukristo mianhi aron sa pagkuha sa mga sala sa kalibutan.

Day 2 (Alma 40–41)

Nabalaka si Corianton mahitungod sa pagkabanhaw ug sa Katapusan nga Paghukom. Gikan sa tubag ni Alma ngadto niining mga kabalaka, ang mga estudyante nakakat-on og lain-laing mga doktrina kalabut sa pagkabanhaw, lakip sa kamatuoran nga kita ipahiuli ngadto sa kalipay o kaalaot sumala sa atong mga binuhatan ug tinguha sa mortalidad. Gipasabut usab og maayo ni Alma nga “ang pagkadautan dili mahitabo nga mahimo nga kalipay” (Alma 41:10).

Day 3 (Alma 42)

Gitabangan ni Alma si Corianton nga makita nga ang pagkadili masulundon maoy hinungdan nga ang mga indibidwal ipahimulag sa atubangan sa Dios. Sa laing bahin, ang mga estudyante makat-on kon sa unsang paagi nga ang plano sa katubsanan magtugot sa mga indibidwal sa pagbuntog sa ilang napukan nga kahimtang. Ang mga pagtulun-an ni Alma nagkompirmar nga ang pag-antus ni Jesukristo mitagbaw sa gipangayo sa kaangayan aron ang kalooy mapadangat niadtong kinsa maghinulsol.

Day 4 (Alma 43–44)

Nakakat-on ang mga estudyante mahitungod sa gubat tali sa mga Lamanite ug sa mga Nephite. Usa ka leksyon nga ilang nakat-unan gikan sa Alma 43–44 mao nga kon kita magtinguha ug mosunod sa propetikanhon nga tambag, mas mahimo natong madepensahan ang atong mga kaugalingon batok sa kaaway. Agi og dugang, nadiskubrihan sa mga estudyante nga kon kita mag-ampo sa Ginoo mahitungod sa atong matarung nga mga plano ug mga tinguha, motabang Siya kanato sa pagtuman niini.

Pasiuna

Sumala sa narekord sa Alma 39–42, gitabangan ni Alma ang iyang anak nga si Corianton nga masabtan ang kabug-at sa sekswal nga sala, mga doktrina nga may kalabutan sa pagkabanhaw ug Katapusan nga Paghukom, ug sa mahangturon nga mga sangputanan sa mga balaod sa kaangayan ug kalooy. Kini nga leksyon mohatag sa mga estudyante og mga oportunidad sa pagtudlo ug pagpasabut niining mga doktrina sa usag usa.

Mga Sugyot alang sa Pagtudlo

Sa dili pa magklase, pag-andam og mga handout nga dunay mga instruksyon bahin niining leksyon. Ipamilyar ang imong kaugalingon sa mga instruksyon aron makatabang ka sa mga estudyante nga molampus sa ilang mga paningkamot sa pagtudlo sa usag usa.

Alma 39–41

Nagtudlo si Alma nga ang paghinulsol makahatag og kalipay

Sugdi ang klase pinaagi sa pagdapit og mga estudyante nga magdungan sa pag-recite sa Alma 39:9, usa ka scripture mastery passage nga giawhag sila sa pagmemorya isip kabahin sa ilang pagtuon niining semanaha. Ipangutana kon aduna bay makapahinumdom sa klase kon nganong si Alma mitambag sa iyang anak nga si Corianton sa paghinulsol ug sa pagbiya sa iyang mga sala dinhi niining bersikulo.

Pahinumdumi ang mga estudyante nga sa Alma 40–41, namulong usab si Alma kabahin sa mga kabalaka ni Corianton mahitungod sa pagkabanhaw sa patay ug sa Katapusan nga Paghukom. Aron matabangan ang mga estudyante sa pagpasabut kon unsa ang ilang nakat-unan ug sa pagpakigbahin sa ilang mga pagbati ug mga pagpamatuod mahitungod sa mga kamatuoran nga makita sa Alma 39–41, isulat ang mosunod nga mga pangutana ug mga pakisayran sa kasulatan diha sa pisara sa dili pa sugdan ang klase:

Nganong importante man ang pagsunod sa balaod sa kaputli? (Tan-awa sa Alma 39:1–9.)
Unsa ang pagkabanhaw? Unsa ang kalainan tali sa mortal nga mga lawas ug sa nabanhaw nga mga lawas? Unsay mahitabo human kita mabanhaw? (Tan-awa sa Alma 40:21–26.)
Sa unsa nga paagi ako hukman sa Katapusan nga Paghukom? (Tan-awa sa Alma 41:1–7.)
Morag ang uban nga misupak sa mga kasugoan malipayon man. Tinuod ba kana? (Tan-awa sa Alma 41:10–15.)

Hangyoa ang mga estudyante sa paghunahuna nga sila mga misyonaryo ug kunohay aduna silay mga sabut nga makigkita og tawo kinsa nangita og tubag niining mga pangutana. Pahibaloa sila nga hatagan sila og panahon nga makaandam, ug unya aduna silay oportunidad sa pagtubag niining pipila ka pangutana gamit kon unsa ang ilang nakat-unan gikan sa Alma 39–41.

Kon igo ra ang gidaghanon sa imong klase, bahina nga mapares-pares aron morepresentar nga managkompanyon nga misyonaryo. I-assign ang matag managkompanyon og usa sa mga pangutana gikan sa pisara. (Kon gamay ra ang gidaghanon sa imong klase, mahimo nimong ihatag ang mga pangutana ngadto sa tagsa-tagsa ka estudyante.) Hatagi ang matag kompanyon og kopya sa mga instruksyon sa ubos, ug hangyoa sila sa paggamit sa mga bersikulo nga gi-refer sa katapusan sa gi-assign ngadto nila nga pangutana aron matubag ang mga pangutana sa ilang investigator. Hatagi og panahon ang mga estudyante aron sa pagribyu sa mga bersikulo ug makaandam og mubo nga leksyon alang sa ilang investigator. Awhaga ang managkompanyon sa pagdesisyon kon hain nga porsyon sa mga instruksyon nga ang matag usa nila responsable sa pagtudlo.

Samtang nag-andam ang mga estudyante, mahimo kang moduol sa mga estudyante aron ka makapaminaw ug makatabang kon gikinahanglan. Kon gikinahanglan, tabangi ang mga estudyante nga mailhan ang mga doktrina gikan sa Alma 39–41 nga motabang sa pagtubag sa mga pangutana nga gitahas ngadto nila. Gamita ang mosunod nga mga doktrina isip giya:

Ang sekswal nga sala usa ka salawayon diha sa atubangan sa Ginoo (tan-awa sa Alma 39:1–9).

Ang pagkabanhaw mao ang subli nga paghiusa sa kalag ug lawas, uban sa tanang butang nga ipahiuli ngadto sa tukma ug hingpit nga bayanan (tan-awa sa Alma 40:21–26).

Ipahiuli kita ngadto sa kalipay o kaalaot sumala sa atong mga binuhatan ug mga tinguha sa mortalidad (tan-awa sa Alma 41:1–7).

Ang pagkadautan dili mahitabo nga mahimo nga kalipay (tan-awa sa Alma 41:10–15).

Mga Instruksyon

Pangandam sa pagbuhat sa mosunod samtang ikaw magtudlo:

Paghatag og pipila ka kasayuran mahitungod sa mga bersikulo (sama sa pagpasabut kinsa ang namulong, ngadto ni kinsa kini namulong, ug ngano).
Basaha ang mga bahin sa tudling sa kasulatan nga gihatag aron matabangan ka nga matubag ang mga pangutana nga gi-assign nimo.
Isulat ang doktrina o baruganan nga gitudlo diha sa mga bersikulo nga imong gitun-an nga magamit sa pangutana nga gi-assign diha nimo.
Ipasabut kon sa unsang paagi nga ang doktrina o baruganan nga imong gisulat makatabang sa pagtubag sa pangutana nga gi-assign diha nimo. Mahimo nimong isugyot nga isulat sa imong gitudloan kining doktrina o baruganan sa ilang mga kasulatan.
Ipakigbahin kon ngano nga kining doktrina o baruganan importante nimo, ug ipamatuod ang mga kamatuoran nga imong gitudlo.

Human makaandam ang mga estudyante sa pagtubag sa mga pangutana nga gi-assign diha nila, grupoha sila aron makatudlo sila sa usag usa. (Kon gamay ra ang imong klase, patudloa ang matag estudyante o ang managkompanyon magtudlo sa tibuok klase.) Pagkahuman og tudlo sa mga estudyante sa usag usa, pangutan-a ang klase sa mosunod:

Sa inyong pagkonsiderar sa mga sala ni Corianton, nganong makatabang man ang pagsabut niining mga doktrina ngadto kaniya?
Nganong importante man nga makapasabut niining mga kamatuoran ngadto niadtong inyong makauban sa inyong kinabuhi?
Nganong importante man nga kamo makasabut ug mosunod niining mga kamatuoran?

Alma 42

Nagtudlo si Alma ni Corianton mahitungod sa kaangayan ug kalooy

Pagdrowing og usa ka yano nga parisan sa timbangan diha sa pisara. Dapita ang usa ka estudyante sa pagtudlo sa mga konsepto sa kaangayan ug kalooy ngadto sa klase gamit ang paghulagway ug unsa ang iyang nakat-unan gikan sa mga instruksyon ni Alma ngadto ni Corianton sa Alma 42. Dapita ang mga estudyante sa pagpakli sa ilang mga kasulatan sa Alma 42 ug pangitaon ang mga pulong ug mga pamahayag mahitungod sa kaangayan ug kalooy nga ilang gimarkahan o gilinyahan.

Aron matabangan ang mga estudyante nga masabtan ang mga kahimtang diin magamit ang kalooy, ipangutana ang mosunod:

Unsa ang angay buhaton ni Jesukristo aron ang kalooy magamit nato?
Unsa ang kinahanglan natong buhaton aron makadawat og kalooy?

Dapita ang pipila ka estudyante sa pagpakigbahin kon nganong mapasalamaton sila alang sa Pag-ula ni Jesukristo.

Alma 43–44

Ang pagpaminaw sa tambag sa mga propeta makapanalipod kanato gikan sa kaaway

Kon naa pay oras, ikonsiderar ang paghangyo sa mga estudyante sa pagribyu kon unsa ang ilang nakat-unan gikan sa Alma 43–44 pinaagi sa pagpakigbahin unsa ang ilang nasulat sa ilang mga scripture study journal mahitungod sa pagpakigbatok sa ilang espirituhanon nga mga gubat (day 4, mga assignment 3 ug 4). Ipamatuod ang mahitungod ni Jesukristo ug ang Iyang gahum sa pagpadangat sa kalooy kon kita maghinulsol ug aron mapanalipdan kita samtang kita moduol ngadto Kaniya.

Sunod nga Unit (Alma 45–63)

Nganong ang mga Nephite malampuson kaayo batok sa ilang mga kaaway? Sa unsang paagi nga sila nakigbatok uban sa kusog sa Ginoo? Ang mga tubag mahimong makit-an pinaagi sa pagtuon sa mga ehemplo ni Kapitan Moroni ug ni Helaman ug sa iyang batan-on nga mga manggugubat.