Alma 5–10 (Unit 15)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga summary sa mga doktrina ug mga baruganan nga nakat-unan sa mga estudyante samtang sila nagtuon sa Alma 5–10 (unit 15) dili tuyo nga itudlo isip kabahin sa imong leksyon. Ang leksyon nga imong itudlo mosentro lamang diha sa pipila niini nga mga doktrina ug mga baruganan. Sunda ang mga pag-aghat sa Balaang Espiritu samtang imong ikonsiderar ang mga panginahanglan sa imong mga estudyante.

Day 1 (Alma 5:1–36)

Samtang nagtuon ang mga estudyante sa wali ni Alma ngadto sa mga tawo sa Zarahemla, ilang nadiskubrian nga kon motuo kita sa pulong sa Dios ug magpakita og hugot nga pagtuo ni Jesukristo, makasinati kita og usa ka gamhanang kausaban sa kasingkasing. Samtang tubagon sa mga estudyante ang mga pangutana ni Alma, makat-unan usab nila nga pinaagi sa pagsinati og kausaban sa kasingkasing, atong giandam ang atong kaugalingon nga makadawat og usa ka dapit diha sa gingharian sa langit.

Day 2 (Alma 5:37–62)

Samtang nagtuon ang mga estudyante sa ikaduhang katunga sa Alma 5, makakat-on sila niining mga baruganan: Kon mosunod kita sa tingog sa Ginoo (ang Maayo nga Magbalantay), pagapundukon kita ngadto sa Iyang gingharian. Ato mismong mahibaloan, pinaagi sa Espiritu Santo, nga si Jesukristo mao ang Manunubos sa katawhan.

Day 3 (Alma 6–7)

Pinaagi sa pagtuon sa Alma 6, makat-unan sa mga estudyante nga sa panahon sa mga Nephite ug sa atong panahon ang Simbahan naestablisar alang sa kaayohan sa tanang katawhan. Gikan sa wali ni Alma ngadto sa mga tawo sa Gideon, makat-unan sa mga estudyante nga si Jesukristo nag-antus aron sa pagluwas kanato gikan sa sala ug kamatayon ug aron sa pagtabang kanato sa mga hagit sa mortalidad. Makat-unan usab nila nga pinaagi sa pagsunod sa mga baruganan sa ebanghelyo, atong gisubay ang dalan ngadto sa gingharian sa Dios.

Day 4 (Alma 8–10)

Pinaagi sa pagtuon mahitungod sa kaandam ni Alma sa pagbalik ngadto sa mga tawo sa Ammonihah human sila misalikway kaniya, makat-unan sa mga estudyante nga kon dali kitang motubag sa pulong sa Ginoo, motabang Siya kanato nga matuman ang Iyang mga sugo. Gitawag ni Alma ang mga tawo sa paghinulsol ug mitudlo kanila sa panginahanglan sa pagpangandam alang sa pag-abut sa Manluluwas. Gikan sa kasinatian ni Amulek uban sa usa ka anghel, makat-unan sa mga estudyante nga kon atong dunggon ug mosunod sa tawag sa Ginoo, ang mga panalangin moabut kanato ug ngadto sa uban.

Pasiuna

Dinhi niining leksyon, tinguhaa ang pagtabang sa mga estudyante nga matutokan ang mga baruganan nga makagiya ngadto sa kausaban sa kasingkasing. Pangita og mga paagi aron matabangan sila nga mosalig sa pulong sa Dios ug madugangan ang ilang mga pagpamatuod sa Manluluwas.

Mga Sugyot alang sa Pagtudlo

Alma 5:1–36

Nagtudlo si Alma nga ang dakong kausaban sa kasingkasing gikinahanglan aron makasulod sa gingharian sa langit

Isulat ang pulong nga kausaban diha sa pisara o sa usa ka piraso nga papel. Hangyoa ang mga estudyante sa pagpakigbahin og mga ehemplo sa mga paagi nga mahimong makapausab sa tawo, sama sa ilang pamustura, pamatasan, o kinaiya. Dapita sila sa pagpasabut kon unsa kaha ang hinungdan nga ang tawo mohimo niining kausaban.

Hangyoa ang mga estudyante sa pagbasa sa Alma 5:14 ug motino sa tulo ka mga pangutana nga gihangyo ni Alma nga ikonsiderar sa mga tawo sa Zarahemla . Ikonsiderar ang pagdapit og pipila ka estudyante sa paghulagway kon unsa ang gipasabut sa “dako nga kausaban diha sa inyong mga kasingkasing.”

Dapita ang mga estudyante sa pagbasa sa Alma 5:3–7 ug motino kon unsa ang gisulti ni Alma sa mga tawo sa Zarahemla nga nakatabang sa pag-andam sa ilang mga kasingkasing ngadto sa kausaban.

Misulti si Alma sa mga tawo sa Zarahemla mahitungod sa pagkakabig sa iyang amahan ug sa uban, ingon man usab sa ilang pagkatubos gikan sa pagkabinihag. Ipangutana: Sa inyong hunahuna sa unsang paagi nga ang pagkat-on mahitungod niining mga kasinatian nakatabang sa mga tawo nga maandam sa pagsinati og kausaban sa kasingkasing? (Mahimo nimong pahinumduman ang mga estudyante nga misulat sila og tubag niining pangutana diha sa leksyon sa day 1 diha sa ilang giya sa pagtuon sa estudyante.)

Pangutana kon ang usa ka estudyante andam ba nga mopakigbahin og usa ka kasinatian nga mosangput ngadto sa kausaban sa iyang kasingkasing. Mahimong ikaw usab gustong mopakigbahin og usa ka kasinatian nga imong kaugalingon. Mahimo nimong pahinumduman ang mga estudyante sa pamahayag ni Elder D. Todd Christofferson (diha sa leksyon alang sa day 1 sa giya sa pagtuon sa estudyante). Ipasabut nga alang sa kadaghanan sa mga tawo, ang dakong kausaban sa atong mga kasingkasing anam-anam nga mahitabo samtang nagkat-on kita ug naglambo diha sa ebanghelyo.

Hangyoa ang mga estudyante sa pagpangita sa tsart nga “Alma 5 Spiritual Cardiogram” diha sa leksyon alang sa day 1 sa giya sa pagtuon sa estudyante. Dapita sila sa pagribyu sa pipila ka mga kasulatan sa Alma 5 nga anaa sa tsart. Dayon ipangutana ang mosunod:

Hain sa mga pangutana ni Alma ang partikular nga makahuluganon diha kaninyo?
Sa unsang paagi nga kining mga pangutana makatabang sa usa ka tawo nga makasinati og usa ka kausaban sa kasingkasing?

Ipasabut ngadto sa mga estudyante nga ang Manluluwas nagtinguha og dako kaayo nga ang tanang tawo moduol ngadto Kaniya ug makasinati og dako nga kausaban sa kasingkasing aron sila makadawat og kinabuhing dayon. Dapita ang usa ka estudyante sa pagbasa og kusog sa Alma 5:33–36. Ipangutana:

Unsa ang imbitasyon sa Ginoo nga atong buhaton?
Unsa ang mga ganti sa pagdawat sa Iyang imbitasyon?

Alma 5:43–52

Nagsulti si Alma kon sa unsang paagi nga nakaangkon siya og pagpamatuod ug nagtudlo mahitungod sa paghinulsol

Ipasabut nga aron maawhag ang mga tawo sa Zarahemla sa pagtinguha og kausaban sa kasingkasing, si Alma mihatag sa iyang pagpamatuod ug mipasabut kon sa unsang paagi nga nadawat niya kini. Gikan sa iyang tambag, atong makat-unan kon unsaon sa pag-angkon o pagpalig-on sa atong mga pagpamatuod. Dapita ang mga estudyante sa pagbasa sa hilum sa Alma 5:45–48. Hangyoa sila sa pag-ila kon unsa ang gisulti ni Alma nga iyang nasayran. Hangyoa usab sila sa pag-ila sa mga tubag ni Alma sa pangutana nga “Ug giunsa ninyo pagdahum nga ako nasayud sa ilang kasiguroan?”

Hangyoa ang mga estudyante sa pagpakigbahin unsay ilang nakat-unan, ug ipasulat ang ilang mga tubag diha sa pisara. Isulat usab kini nga baruganan: Kita makahibalo mismo pinaagi sa Espiritu Santo nga si Jesukristo mao ang Manunubos sa katawhan.

Tabangi ang mga estudyante nga makasabut nga ugma damlag ang ilang mga pagpamatuod mahimong mahagit pinaagi sa usa ka tawo o butang. Mahimong nahitabo na kini. Ang tambag ni Alma nagtanyag kanato og usa ka paagi sa pagbarug nga ligdong ug lig-on bisan sa mga hagit sa atong mga pagpamatuod. Ikonsiderar ang pagsulti mahitungod sa usa ka panahon sa dihang imong giatubang ang usa ka hagit sa imong pagpamatuod ug nabuntog kini o usa ka panahon sa dihang dunay tawo nga imong kaila nga nag-atubang sa ingon nga hagit. Mahimo usab nimong ipakigbahin ang usa ka kasinatian gikan sa pakigpulong sa kinatibuk-ang komperensya o sa usa ka artikulo sa magasin sa Simbahan. Mahimo usab nimong dapiton ang usa ka estudyante sa pagpakigbahin sa ingon nga kasinatian.

Ipasabut nga si Alma nagpadayon sa pagsangyaw ngadto sa mga tawo mahitungod sa paghinulsol. Mahimo nimong ipabasa sa estudyante ang Alma 5:50 ug ang pamahayag ni Elder Dallin H. Oaks nga makit-an diha sa unit 15, day 2 sa giya sa pagtuon sa estudyante. Hangyoa ang mga estudyante sa pagpakigbahin sa ilang mga ideya kon nganong kinahanglan natong magpakabuhi sa matag adlaw nga daw kita nangandam sa pagsugat sa Ginoo.

Alma 7–10

Si Alma nagtudlo didto sa Gideon ug sa Ammonihah

Ipakita ang mosunod nga sitwasyon ug hangyoa ang mga estudyante nga magtimaan samtang ilang ribyuhon ang mga pagtulun-an ni Alma ngadto sa mga tawo sa Gideon:

Usa ka batan-ong babaye nakasabut nga ang Pag-ula makatabang niya sa pagbuntog sa mga sala, apan siya na-diagnose nga dunay grabe nga sakit ug wala maghunahuna nga ang Pag-ula makatabang.
Ang usa ka batan-ong lalaki nanglimbasug samtang ang iyang mga ginikanan nagdiborsyo, apan wala siya nagtinguha sa tabang sa Manluluwas.
Usa ka batan-ong babaye nanglimbasug sa pagkontrolar sa iyang mubo nga pailub. Wala niya gikonsiderar kon sa unsang paagi ang Pag-ula makatabang kaniya.

Dapita ang mga estudyante sa pagbasa sa Alma 7:11–13 ug ribyuha ang mga kahimtang nga ang Manluluwas andam nga “modala diha” Kaniya alang sa atong kaayohan. Dapita ang pipila ka mga estudyante sa pag-summarize kon unsa ang gitudlo niining mga bersikulo mahitungod sa Pag-ula ni Jesukristo. Awhaga usab ang mga estudyante sa pagtan-aw ngadto sa tsart nga nagpakita og mga kahimtang nga atong giantus sa mortalidad (sa leksyon alang sa day 3 sa giya sa pagtuon sa estudyante).

Ipasabut ngadto sa mga estudyante nga pinaagi sa gahum sa Pag-ula, ang kasakit ug kapait sa mga pag-antus sa kinabuhi mahimong matangtang gikan kanato. Siguroha nga masabtan sa mga estudyante kining baruganan: Si Jesukristo nag-antus aron sa pagluwas kanato gikan sa sala ug kamatayon ug aron sa pagtabang kanato sa mga hagit sa mortalidad.

Dapita ang mga estudyante sa pagpakigbahin unsa ang ilang ikasulti ngadto sa batan-ong lalaki ug sa babaye sa tulo ka mga sitwasyon nga imong gipresentar. Ipangutana: Sa unsang paagi nga ang pagtulun-an ni Alma magamit ngadto niining mga sitwasyon?

Pahinumdumi ang mga estudyante sa tulo ka mga litrato ug mga pakisayran sa kasulatan mahitungod ni Alma didto sa Ammonihah (diha sa leksyon alang sa day 4 sa giya sa pagtuon sa estudyante), nga ilang natun-an ug nasulatan og kapsyon. Mahimo ka nga maghangyo og pipila ka estudyante sa pagpakigbahin sa mga kapsyon nga ilang nasulat mahitungod sa kasinatian ni Alma uban sa anghel. Hangyoa ang mga estudyante sa pagpakigbahin sa ilang mga pagbati mahitungod kon sa unsang paagi nga kining kasinatian may kalabutan ngadto sa mosunod nga baruganan: Kon motubag kita dayon sa pulong sa Ginoo, Siya motabang kanato nga masunod ang Iyang mga sugo.

Sunod nga Unit (Alma 11–16)

Hangyoa ang mga estudyante sa paghunahuna mahitungod sa mosunod nga mga pangutana samtang mag-andam sila sa pagtuon sa assignment sa sunod semana: Unsay inyong bation kon kamo gipugos sa pagtan-aw sa inosenteng tawo nga gipatay tungod sa ilang pagtuo ni Jesukristo ug sa Iyang ebanghelyo? Sa inyong hunahuna unsay gibati nilang Alma ug Amulek sa pagtan-aw niini nga nahitabo? Unsa ang ilang gisulti sa usag usa sa dihang nakita nila kini nga nahitabo? Unsay ilang gihimo?