Alma 25–32 (Unit 18)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga summary sa mga doktrina ug mga baruganan nga nakat-unan sa mga estudyante samtang sila nagtuon sa Alma 25–32 (unit 18) dili tuyo nga itudlo isip kabahin sa imong leksyon. Ang leksyon nga imong itudlo mosentro lamang diha sa pipila niini nga mga doktrina ug mga baruganan. Sunda ang mga pag-aghat sa Balaang Espiritu samtang imong ikonsiderar ang mga panginahanglan sa imong mga estudyante.

Day 1 (Alma 25–29)

Nakat-unan sa mga estudyante ang mosunod nga mga baruganan samtang ilang gitun-an ang mahitungod sa kalipay ni Ammon sa iyang kalampusan ug sa kasinatian sa iyang mga igsoon sa pagsangyaw sa ebanghelyo: Kon kita mopaubos sa atong mga kaugalingon, ang Ginoo molig-on kanato ug mogamit nato isip usa ka instrumento sa Iyang mga kamot; makasinati kita og kalipay samtang matinud-anon kitang moserbisyo sa Ginoo ug sa Iyang mga anak. Samtang ang mga Lamanite nakabig ngadto sa ebanghelyo ug mibalibad sa paggamit sa ilang mga hinagiban, ang mga estudyante makakat-on nga kon hingpit kitang nakabig ngadto sa Ginoo, atong tumanon ang mga pakigsaad nga atong gihimo uban Kaniya. Gikan sa ehemplo ni Alma, makaamgo ang mga estudyante nga kita mosinati og kalipay samtang motabang sa uban sa paghinulsol ug moduol ngadto ni Jesukristo.

Day 2 (Alma 30)

Pinaagi sa pagbasa mahitungod sa mga pagtulun-an ni Korihor, usa ka anti-Kristo, ang mga estudyante makakat-on nga si Satanas mogamit og mini nga mga doktrina aron sa pagdani kanato sa pagpakasala. Mitubag si Alma ngadto sa pagtulun-an ni Korihor pinaagi sa pagdeklarar nga ang tanang butang nagpamatuod sa Dios isip Labawng Tiglalang. Human sa pagbasa nga si Korihor gitunob-tunoban hangtud namatay, masabtan sa mga estudyante ang baruganan nga narekord ni Mormon: “Ang yawa dili mobulig sa iyang mga anak [iyang mga sumusunod] sa katapusan nga adlaw” (Alma 30:60).

Day 3 (Alma 31)

Samtang magbasa ang mga estudyante mahitungod sa tumong in Alma sa pagbawi sa mga Zoramite gikan sa apostasiya, ilang makat-unan ang mosunod nga mga baruganan: Samtang atong tun-an ang pulong sa Dios, mogiya kini kanato sa pagbuhat unsa ang matarung. Ang inadlaw-adlaw nga paningkamot sa pag-ampo ug paghupot sa mga kasugoan makapalig-on kanato batok sa tintasyon. Kon kita mag-ampo ug molihok inubanan sa pagtuo, nan makadawat kita sa balaan nga tabang sa atong mga pagsulay.

Day 4 (Alma 32)

Samtang magbasa ang mga estudyante mahitungod sa kalampusan ni Alma sa pagsangyaw ngadto sa kabus nga mga Zoramite, ang mga estudyante makat-on nga ang pagkamapainubsanon mag-andam kanato sa pagdawat sa pulong sa Dios. Gikomparar ni Alma ang paggamit sa hugot nga pagtuo ngadto sa pagtanom og usa ka liso ug sa pag-amuma niini. Makat-on ang mga estudyante nga kon magkugi kita sa pag-amuma sa atong pagtuo sa pulong sa Dios diha sa atong mga kasingkasing, ang atong pagtuo ug pagpamatuod ni Jesukristo ug sa Iyang ebanghelyo molambo.

Pasiuna

Sugdi kining leksyon gamit ang usa ka kalihokan aron matabangan ang mga estudyante nga magtinguha nga mamahimong instrumento sa mga kamot sa Dios. Ang kadaghanan sa leksyon, hinoon, magtutok sa mga sangputanan sa pagtuo ug pagbuhat sa mini nga mga ideya agi og pagtandi sa pagtuo ug pagbuhat sa pulong sa Dios, sumala sa gihulagway sa Alma 30–32.

Mga Sugyot alang sa Pagtudlo

Alma 25–29

Si Ammon ug ang anak nga mga lalaki ni Mosiah mihimaya sa Ginoo kay daghan sa mga Lamanite ang nakabig ngadto sa ebanghelyo

Sumala sa narekord sa Alma 26, si Ammon ug ang iyang mga kaigsoonan nagmaya sa ilang kalampusan diha sa buhat sa Ginoo. Ipabasa sa mga estudyante ang Alma 26:1–4, 11–13 ug mangita kon unsa ang nahimo ni Ammon ug sa iyang mga kaigsoonan ug giunsa nila kini pagtuman. Pahinumdumi ang mga estudyante nga kining mga bersikulo nagtudlo sa mosunod nga mga baruganan: Kon kita magmapainubsanon sa atong kaugalingon, ang Ginoo molig-on kanato ug gamiton kita isip mga instrumento sa Iyang mga kamot.

Alma 30

Si Korihor misaway sa doktrina ni Kristo

Ipakita sa klase ang usa ka liso. Hangyoa sila sa paglista og mga ehemplo sa mga butang nga ilang nagustuhan nga gikan sa mga liso. Agi og pagtandi ngadto sa uban nga mga tanom, mga prutas, ug mga utanon nga mahimong mahisgutan sa mga estudyante, ipasabut nga posible nga ang liso motubo ngadto sa usa ka tanom nga magbunga og pait o gani makahilo nga mga prutas o makapatay sa uban nga maayo nga mga tanom.

Isulat ang mga pulong nga ideya ug tinuohan diha sa pisara ug ipangutana: Sa unsang paagi nga ang ideya o usa ka tinuohan nahisama sa usa ka liso?

Ipasabut nga samtang ang mga estudyante magtuon ug maghisgot sa Alma 30–32 sa klase karon, sila motandi sa mga sangputanan sa pagsunod sa mini nga mga ideya ngadto sa mga sangputanan sa pagsunod sa pulong sa Dios.

Hangyoa ang mga estudyante sa pagpasabut kon kinsa si Korihor. Dapita sila sa pagbasa sa Alma 30:12–18, 23 ug ipaila ang mini nga mga ideya nga gitudlo ni Korihor. Human nga nakagahin sila og panahon sa pagbasa, dapita sila sa paglista diha sa pisara o sa piraso nga papel og duha o tulo ka mini nga mga ideya ni Korihor nga sa ilang hunahuna makuyaw ngadto sa relihiyuso nga gituohan sa usa ka tawo. Dayon ipangutana ang mosunod:

Unsa ang pipila ka mga buhat nga lagmit sangputan niining mga ideya? (Samtang motubag ang mga estudyante, ipasabut nga ang usa ka ideya mosangput ngadto sa usa ka buhat sama sa liso nga nagtubo ngadto sa usa ka tanom.)
Sumala sa Alma 30:18, Unsa ang gisangputan sa mga tawo tungod sa mga pagtulun-an ni Korihor? (Samtang motubag ang mga estudyante, ipasabut og maayo nga si satanas mogamit og sayop nga mga doktrina aron sa pagdani kanato sa pagpakasala.)

Dapita ang usa ka estudyante sa pag-summarize unsa ang nahitabo kang Korihor. (Kon nagkinahanglan og tabang ang mga estudyante, dapita sila sa paggamit sa ulohan sa kapitulo para sa Alma 30 o sa pagbasa sa Alma 30:52–53, 59–60.)

Alma 31

Si Alma nangulo sa usa ka misyon sa pagbawi sa mga Zoramite nga mitalikod sa kamatuoran

Pahinumdumi ang mga estudyante nga ang mga Zoramite mituo sa sayop nga mga ideya ug natumpawak sa sayop, o wala mahisubay sa kamatuoran, nga mga binuhatan. Sa Alma 31:5 atong nakat-unan nga kon magtuon kita sa pulong sa Dios, modala kini nato ngadto sa pagbuhat kon unsa ang matarung.

Alma 32

Si Alma nagtudlo sa kabus nga mga Zoramite kon unsaon sa paggamit ang hugot nga pagtuo

Pahinumdumi ang mga estudyante nga bisan og daghan sa mga Zoramite ang mibalibad sa pagdawat sa pulong sa Dios, si Alma nagsugod sa pag-angkon og kalampusan diha sa mga kabus. Gitudloan niya sila kon unsaon sa pagpakita og hugot nga pagtuo. Iparibyu sa mga estudyante ang Alma 32:21, usa ka bersikulo sa scripture mastery. Hangyoa sila sa pagpasabut kon unsa ang gitudlo niini nga bersikulo ngadto nila mahitungod sa hugot nga pagtuo.

Pahinumdumi ang mga estudyante nga si Alma migamit sa usa ka liso aron sa pagtudlo mahitungod sa proseso sa pagpalambo sa hugot nga pagtuo. Dayon ipangutana ang mosunod:

Unsa nga mga pulong sa Alma 32:28 nga nagpakita nga ang usa ka liso, o niining kahimtang ang pulong sa Dios, maayo?
Unsay epekto sa pulong sa Dios ngari kanato kon itugot nato kini nga matanom sa atong mga kasingkasing?

Sultihi ang mga estudyante nga si Alma miawhag sa mga Zoramite nga eksperimentuhan ang pulong, o sa pagtanom niini diha sa ilang mga kasingkasing pinaagi sa pagtuo niini ug sa paglihok niini. Dapita sila sa pagbasa sa Alma 33:22–23, nga mangita kon unsa ang “pulong” nga pihong gitinguha ni Alma nga itanom sa mga tawo sa ilang mga kasingkasing. Mahimo nimong awhagon ang mga estudyante sa pagsulat niining mga bersikulo isip usa ka cross-reference tupad sa Alma 32:28.

Ipabasa sa mga estudyante ang Alma 32:28–29, 31, 37, 41–43, nga mangita sa mga ganti nga atong madawat gikan sa pagtuo ug paglihok sa pulong sa Dios. Samtang motubag ang mga estudyante, siguroha nga ang mosunod nga baruganan maklaro: Kon makugihon kita sa pag-amuma sa atong pagtuo sa pulong sa Dios diha sa atong mga kasingkasing, ang atong hugot nga pagtuo ug ang atong pagpamatuod ni Jesukristo ug sa Iyang ebanghelyo motubo.

Sa pagtapos niini nga leksyon, dapita ang mga estudyante sa pagpakigbahin sa ilang mga tubag sa leksyon 4, assignment 4 sa ilang scripture study journal—mahitungod sa mga resulta nga ilang nakita sa ilang mga kinabuhi samtang sila misunod sa eksperimento nga gihulagway ni Alma sa Alma 32.

Sunod nga Unit (Alma 33–38)

Unsa ang kakuyaw sa paglangay sa paghinulsol? Gitubag ni Amulek kini nga pangutana ug mihatag og pasidaan. Usab, mitambag si Alma sa duha niya ka anak nga mga lalaki sa naghinapos na ang iyang kinabuhi. Naghatag siya sa mga detalye mahitungod sa iyang pagkakabig—pagkausab gikan sa usa ka tawo nga nakigbatok sa Dios ngadto sa usa ka tawo nga nakig-away alang sa Dios—ug mahitungod sa iyang gibati sa dihang siya nahimong gawasnon gikan sa pagkasad-an ug kasakit sa iyang mga sala.