Librarya
Leksyon 101: Alma 45–48

Leksyon 101

Alma 45–48

Pasiuna

Human mihatag si Alma sa katapusan nga mga instruksyon ngadto sa iyang anak nga si Helaman, mibiya siya gikan sa katawhan ni Nephi ug wala na idungog pag-usab. Si Helaman nahimong usa ka mahinungdanon nga espirituhanong lider ug si Kapitan Moroni nahimong usa ka importanting lider sa militar atol sa malisud nga panahon alang sa mga Nephite. Si Amalickiah, ang lider sa usa ka grupo sa rebelde nga mga Nephite, nangandam sa pagsugod og usa ka maliputon nga plano aron makaangkon og gahum batok sa mga Nephite. Si Kapitan Moroni mitabang sa mga Nephite sa pagpalig-on sa ilang mga kaugalingon batok sa pag-ataki sa ilang mga kaaway aron ilang mapatunhay ang ilang kalingkawasan ug kagawasan sa pagsimba.

Mga Sugyot alang sa Pagtudlo

Alma 45

Si Helaman mituo sa mga pulong ni Alma ug misugod sa iyang pagpangalagad

Dapita ang mga estudyante sa paghunahuna mahitungod sa usa sa ilang interbyu uban sa ginikanan o priesthood lider.

  • Unsang matang sa mga pangutana nga sagad ipangutana sa mga ginikanan ug mga priesthood lider diha sa mga interbyu?

Human sa usa ka mubo nga panaghisgutanay, ipasabut nga sa wala pa mihatag si Alma sa sagradong mga rekord ngadto sa iyang anak nga si Helaman ug mibiya sa yuta (tan-awa sa Alma 45:18–19), siya nangutana ni Helaman og sunod-sunod nga mga pangutana. Dapita ang mga estudyante sa pagbasa sa hilum sa Alma 45:2–8, nga mangita sa mga pangutana nga gipangutana ni Alma ug ang mga tubag nga gihatag ni Helaman.

  • Ang mga Nephite anaa sa pakiggubat sa mga Lamanite atol sa pakighinabi nila ni Alma ug Helaman. Sa inyong hunahuna sa unsang paagi nga ang pagtuo ni Helaman nakatabang kaniya atol sa gubat ug sa tibuok niyang pagpangalagad?

  • Kanus-a kamo nakadawat og kusog gikan sa inyong pagtuo ni Jesukristo ug sa mga pulong sa mga propeta ug gikan sa inyong mga pasalig sa pagtuman sa mga sugo?

I-summarize ang Alma 45:9–19 pinaagi sa pagsulti sa mga estudyante nga human si Alma nanagna mahitungod sa mahitabo nga kalaglagan sa nasud sa Nephite, mibiya siya sa yuta ug wala na idungog pag-usab. Sa wala pa siya mibiya, mihatag siya og katapusan nga panagna. Dapita ang usa ka estudyante sa pagbasa og kusog sa Alma 45:16.

  • Unsa nga mga kamatuoran ang atong makat-unan gikan niini nga panagna? (Ang mga estudyante mahimong mosulti og pipila ka mga baruganan, apan siguroha nga ilang mapakita ang pagsabut nga ang Ginoo dili makatan-aw sa sala uban sa labing gamay nga matang sa pagtugot.)

Ipasabut nga si Helaman nagsugod sa Iyang pagpangalagad pinaagi sa pagtudlo og mga pari [priest] ug mga magtutudlo [teacher] sa Simbahan sa tibuok yuta. Dapita ang mga estudyante sa pagsiksik sa Alma 45:23–24, nga mangita kon unsay rekasyon sa mga tawo ngadto niining mga lider sa Simbahan.

  • Unsay reaksyon sa mga tawo ngadto sa ilang mga lider sa Simbahan? Nganong ang ubang mga tawo midumili sa pagpaminaw ngadto sa mga lider sa Simbahan?

Alma 46

Si Kapitan Moroni mipundok sa mga matarung aron sa pagdepensa sa ilang mga katungod ug sa ilang relihiyon

I-summarize ang Alma 46:1–3 pinaagi sa pagpasabut nga kadtong kinsa wala mipatalinghug sa mga lider sa Simbahan gipangulohan sa usa ka tawo nga ginganlan og Amalickiah. Hangyoa ang mga estudyante sa pagbasa sa hilum sa Alma 46:4–5, nga mangita kon unsa ang gitinguha ni Amalickiah ug sa iyang mga sumusunod. Dapita ang mga estudyante sa pagpasabut kon unsa ang ilang nadiskubrihan.

Dapita ang mga estudyante sa pagbasa sa hilum sa Alma 46:6–7, nga mangita sa mga resulta sa impluwensya ni Amalickiah niadtong misunod kaniya.

  • Unsa ang nahitabo isip sangputanan sa impluwensya ni Amalickiah?

Dapita ang mga estudyante sa pagbasa sa hilum sa Alma 46:8–10, nga mangita sa mga leksyon nga gusto ni Mormon nga atong makat-unan gikan sa mga lihok ni Amalickiah. Mahimo nimong ipasabut nga ang pipila niining mga leksyon gipaila pinaagi sa mga pulong nga “sa ingon kita makakita” o “kita makakita.” (Mahimo kang mosugyot nga markahan sa mga estudyante kini nga mga leksyon diha sa ilang mga kasulatan.) Ang mga estudyante mahimong makadiskuobre sa mosunod nga mga leksyon:

Daghang mga tawo nga daling mahikalimot sa Ginoo ug magbuhat og kasaypanan.

Usa ka dautang tawo makapahinabo og dakong kadautan.

Sa pagtandi kang Amalickiah ngadto ni Kapitan Moroni, hangyoa ang mga estudyante sa pagbasa sa hilum sa Alma 46:11–18 ug Alma 48:11–13, 17. Dapita ang katunga sa klase sa pagsiksik kon unsa ang gitinguha ni Moroni. Dapita ang laing katunga sa klase sa pagpangita sa mga pulong nga naghulagway unsa si Moroni. (Tabangi ang mga estudyante nga makakita sa kalainan tali sa matarung nga mga motibo ni Moroni ug sa dautan nga mga motibo ni Amalickiah. Si Moroni miabag sa kawsa sa kalingkawasan ug pagkamatarung, samtang si Amalickiah gutom sa gahum ug nagtinguha sa pagdala sa mga Nephite ngadto sa pagkaulipon.)

  • Base sa unsay inyong nabasa, unsaon ninyo paghulagway si Kapitan Moroni? Unsa nga mga baruganan ang atong makat-unan gikan niini nga mga bersikulo? (Ang mga estudyante mahimong magsugyot og pipila ka managlahi nga mga baruganan, lakip sa kamatuoran nga ang usa ka matarung nga tawo makapahinabo og daghan kaayong pagkamatarung.)

  • Sumala sa Alma 46:11–18, unsa ang gi-ampo ni Moroni? (Alang sa mga panalangin sa kagawasan ug kalingkawasan nga magpabilin diha sa mga Nephite ug alang sa “kawsa sa mga Kristiyano” aron mahimong pinili sa Dios.)

Si Moroni nag-ampo mahitungod sa “kawsa sa mga Kristiyano.” Sumala sa Alma 46:12, unsa ang tulo ka mga sumbanan nga gibati ni Moroni nga angayng depensahan ug ipatunhay sa mga Kristiyano? (Tabangi ang mga estudyante nga makita nga ato kining katungdanan ang pagdepensa sa mga pamilya, atong relihiyon, ug sa atong kagawasan. Tan-awa usab sa Alma 43:45–48.)

  • Unsa nga mga hagit ang anaa karon batok sa mga pamilya, sa mga Kristiyano, ug sa kagawasan? Unsa ang pipila ka tukma nga mga paagi nga kita makadepensa sa atong mga pamilya, sa atong relihiyon, ug sa atong mga kalingkawasan?

Dapita ang mga estudyante sa pagbasa sa hilum sa Alma 46:18–22, nga mangita kon unsa ang gihangyo ni Moroni nga buhaton sa mga tawo. (Mahimo nimong isugyot sa mga estudyante nga markahan ang pulong nga pakigsaad niining mga bersikulo.)

  • Unsa nga pakigsaad ang buhaton sa katawhan? (Ipatunhay ang ilang mga katungod ug sa ilang relihiyon; dili mobiya sa Ginoo; dili molapas sa mga sugo sa Dios; ug dili ikaulaw ang pagdala diha kanila sa ngalan ni Kristo.)

  • Sumala sa Alma 46:22, unsa ang gibuhat sa mga tawo isip timaan sa pakigsaad nga ilang gihimo? (Sila migisi, o milangkat, sa ilang mga saput ug mibutang og mga piraso diha sa tiilan ni Moroni.)

Guniti pataas ang usa ka piraso nga panapton, ug gisia kini nga matunga. Mahimo nimong ipasabut nga pinaagi sa paglangkat, o paggisi, sa ilang mga saput, ang mga tawo nagpakita sa ilang mga pasalig ngadto sa pakigsaad nga ilang gihimo.

  • Sumala sa Alma 46:21–22, unsa ang gisulti sa mga tawo nga angayng mahitabo kon sila dili motuman sa ilang mga pakigsaad?

  • Sa unsang paagi nga kini makatabang kaninyo sa pagsabut sa kabug-at sa kinaiyahan sa mga pakigsaad nga atong gihimo uban sa Dios?

Pahinumdumi ang mga estudyante nga si Moroni ug ang iyang katawhan nagsagubang sa mga kaaway nga gustong mopatay kanila.

  • Sumala sa Alma 46:18, unsa ang gisulti ni Moroni nga makadala sa iyang katawhan ngadto sa kalaglagan?

Isulat ang mosunod sa pisara: Kon kita maghupot sa atong mga pakigsaad, ang Dios mo …

Dapita ang mga estudyante sa pagpakigbahin kon sa unsang paagi nga sila mahimong mokompleto sa pamahayag base sa unsa ang ilang nakat-unan gikan sa Alma 46:18–22. Hangyoa usab sila sa paghatag og ehemplo kon sa unsang paagi nga sila makahibalo nga ang pamahayag tinuod. Ang mga tubag mahimong magkalain-lain. I-summarize ang mga tubag pinaagi sa pagkompleto sa mga pulong diha sa pisara sama sa mosunod: Kon maghupot kita sa atong mga pakigsaad, ang Dios mopanalangin kanato. Awhaga ang mga estudyante sa pagpangita og mga ebidensya nga moabag niining baruganan samtang sila magtuon sa nahabilin nga mga kapitulo sa Alma. Mahimo ka nga mag-istorya mahitungod sa usa ka panahon sa dihang ang Ginoo mipanalangin kanimo tungod sa imong pagpasidungog sa imong mga pakigsaad.

I-summarize ang Alma 46:29–41. Ipasabut nga si Amalickiah ug ang iyang mga sumusunod nakaamgo nga sila nalabwan sa gidaghanon, busa miadto sila sa yuta sa Nephi, nagtinguha nga motipon sa mga Lamanite. Ang kasundalohan ni Moroni mipugong sa kadaghanan sa grupo ni Amalickiah nga makaabut sa yuta sa Nephi. Daghan sa mga sumusunod ni Amalickiah ang misulod sa usa ka pakigsaad sa pag-abag sa kagawasan. Ang pipila kinsa dili mosulod ngadto sa pakigsaad gipahamtangan og kamatayon. Si Amalickiah ug ang pipila sa iyang katawhan miikyas ug mitipon sa mga Lamanite.

Alma 47

Pinaagi sa lingla, si Amalickiah nahimong hari sa mga Lamanite

Pangutan-a ang mga estudyante kon unsa ang ilang gibati kon sila naa sa dula nga sangka o laing panag-indigay ug ilang gigunitan ang usa ka libro nga naglangkob sa listahan kon unsa ang planong buhaton sa ilang kaatbang aron makadaug sa kompetisyon. Sultihi ang mga estudyante nga pinaagi sa pagpahisama sa Alma 47 sa atong mga kaugalingon, makat-on kita og pipila ka importanting mga leksyon mahitungod sa mga taktika ni Satanas aron sa paglupig kanato.

I-summarize ang Alma 47:1–6 pinaagi sa pagsulti sa mga estudyante nga si Amalickiah wala moundang sa iyang tumong sa pag-angkon og gahum batok sa mga Nephite. Nagmugna siya og usa ka maliputon nga plano aron nga mapalagpot sa trono ang hari sa mga Lamanite ug mahimong ilang hari aron siya sa katapusan mangulo sa mga Lamanite sa pakiggubat batok sa mga Nephite. Sa dihang si Amalickiah mitipon sa mga Lamanite, nakakuha siya og pabor sa ilang hari, kinsa mihatag kaniya og pagmando sa usa ka porsyon sa kasundalohan sa Lamanite. Ang hari misugo kang Amalickiah ug sa iyang kasundalohan sa paggukod sa masinupakon nga pundok sa mga kasundalohan sa Lamanite, nga gipangulohan sa tawo nga ginganlan og Lehonti. Si Amalickiah gimandoan sa pagpugos sa kasundalohan ni Lehonti sa pagkuha sa ilang mga hinagiban batok sa mga Nephite, apan si Amalickiah adunay laing mga plano.

Dapita ang mga estudyante sa pagtuon sa Alma 47:7–19 kunohay sila si Lehonti ug kunohay si Amalickiah si Satanas. Hangyoa sila sa pagbasa sa hilum sa Alma 47:7–10, nga mangita kon asa miadto si Lehonti aron depensahan ang iyang kasundalohan ug unsa ang gitinguha ni Amalickiah nga buhaton ni Lehonti.

  • Asa gipundok ni Lehonti ang iyang kasundalohan agi og pagpangandam sa gubat? Unsa ang mga bintaha sa usa ka sundalo kon kini anaa sa mas taas nga lugar kay sa kaaway niini?

  • Unsa ang gusto ni Amalickiah nga buhaton ni Lehonti? Unsa ang uban nga mga taktika nga gamiton ni Satanas aron makakanaog kita gikan sa taas nga lugar? (Ang posible nga mga tubag maglakip sa pagtintal kanato sa pagpaubos sa atong mga sumbanan ug pag-agni kanato sa pag-adto sa dapit diin dili kita luwas sa espirituhanon nga paagi.)

Dapita ang pipila ka estudyante nga magpuli-puli sa pagbasa og kusog sa Alma 47:11–19. Hangyoa ang klase sa pagsunod, nga magkonsiderar kon sa unsang paagi ang mga taktika ni Amalickiah mahimong ikaparehas ngadto sa mga taktika nga gigamit ni Satanas aron sa paglaglag kanato.

  • Sa unsa nga mga paagi nga ang mga taktika ni Amalickiah susama ngadto sa mga taktika nga gigamit ni Satanas aron sa paglaglag kanato? (Ang posibling mga tubag maglakip nga si Satanas mapugsanon, malinglahon, ug maliputon, ug bangis.)

  • Unsa ang pipila ka ehemplo sa mga paagi ni Satanas sa paghilo kanato “sa hinay-hinay”?

I-summarize ang Alma 47:20–36 pinaagi sa pagpasabut nga si Amalickiah mipadayon sa paglingla ug pagpatay hangtud nga siya nahimong hari sa mga Lamanite. Ipasabut og maayo nga ang mga tumong ug mga taktika ni Amalickiah susama kaayo sa mga tumong ug mga taktika ni Satanas ngari kanato. Isulat ang mosunod nga baruganan diha sa pisara: Si Satanas nagtinguha sa paglaglag kanato, ug siya naglingla kanato pinaagi sa pagpaubos sa atong mga sumbanan sa hinay-hinay.

Alma 48

Si Kapitan Moroni midasig sa mga Nephite sa pagpangandam ug pagmatinud-anon

Dapita ang mga estudyante sa pagbasa sa hilum sa Alma 48:7–10, nga mangita kon unsa ang gibuhat ni Moroni samtang si Amalickiah nagtinguha og gahum diha sa mga Lamanite.

  • Unsa ang gibuhat ni Moroni samtang si Amalickiah nagtinguha og gahum diha sa mga Lamanite?

  • Unsa ang gibuhat ni Moroni aron mapalig-on ang iyang katawhan ug ang ilang mga siyudad batok sa umaabut nga mga pag-ataki? Hain sa piho nga mga dapit ang gihatagan og espesyal nga pagtagad ni Moroni?

Hatagi ang mga estudyante og panahon sa pagpamalandong sa mga huyang nga dapit sa ilang kinabuhi ug unsa ang ilang buhaton aron kadtong mga dapit mapalig-on. Hangyoa sila sa pagsulat sa ilang mga hunahuna.

  • Sumala sa Alma 48:10, nganong nagtrabaho og maayo si Moroni aron mapalig-on ang iyang katawhan batok sa mga pagpang-ataki sa ilang mga kaaway? (Ipasabut og maayo nga si Moroni gusto nga mapatunhay sa mga Nephite ang kagawasan sa pagbuhat sumala sa ilang relihiyon.)

  • Unsa ang pipila ka ehemplo sa mga butang nga gitudlo sa mga lider sa Simbahan sa modernong panahon aron matabangan kita nga mapalig-on ang atong espiritwal nga mga kahuyang?

  • Nganong nagtrabaho og maayo ang mga lider sa Simbahan aron sa pagpalig-on kanato sa espirituhanon nga paagi?

Pasaligi ang mga estudyante nga kon atong sundon ang tambag sa mga sulugoon sa Ginoo, mapalig-on kita batok sa mga tintasyon.

Awhaga ang mga estudyante nga tan-awon sa mainampingon nga paagi ang nahabilin nga mga kapitulo sa Alma alang sa mga baruganan mahitungod sa bili sa paghupot sa mga pakigsaad ug ang kaimportante sa pagpalig-on sa atong mga kaugalingon sa pagbatok ni Satanas.

Komentaryo ug Background nga Impormasyon

Alma 46:21–22. Ang kabug-aton sa mga pakigsaad

Si Elder Paul E. Koelliker sa Seventy mipamatuod sa kamahinungdanon sa pagsulod ngadto sa mga pakigsaad:

“Ang paghatag og mabinantayong pagtagad sa paghimo og mga pakigsaad kritikal kaayo alang sa atong mahangturong kaluwasan. Ang pakigsaad mao ang kasabutan nga atong gihimo uban sa atong Langitnong Amahan diin atong gipasaad ang atong mga kasingkasing, hunahuna, ug kinaiya alang sa pagsunod sa kasugoan nga gipasabut sa Ginoo. Kon kita matinud-anon nga mohimo sa atong kasabutan, Siya makigsaad o mosaad nga mopanalangin kanato, sa katapusan uban sa tanan nga anaa Kaniya” (“Mga Pakigsaad sa Ebanghelyo Nagdala sa Gisaad nga mga Panalangin,” Ensign o Liahona, Nob. 2005, 94).

Alma 48:19. “Sama sa pagkamaalagaron”

Si Presidente Howard W. Hunter mipasabut unsa ang gipasabut ni Mormon sa dihang misulat siya ni Helaman nga “sama sa pagkamaalagaron ngadto sa mga katawhan ingon kang Moroni”:

“Bisan kon si Helaman dili ingon nga nabantayan o nakit-an sama kang Moroni, ingon usab siya kamaalagaron; nga mao, ingon siya kamatinabangon o mapuslanon sama ni Moroni. …

“Dili kitang tanan mahimong sama kang Moroni, nakakuha sa pagdayeg sa atong mga kaubanan sa tibuok adlaw sa matag adlaw. Kadaghanan nato hilum ra, mga tawo nga wala kaayo mailhi kinsa motunga ug mawala ug nagbuhat sa atong trabaho nga walay pagpasundayag. Kaninyo kinsa maghunahuna niana nga makaguol o makahadlok o dili lang gayud talagsaon, ako moingon, kamo ‘sama sa pagkamaalagaron’ niadtong labing talagsaon ninyong mga kaubanan. Kamo, usab, kabahin sa kasundalohan sa Dios.

“Ikonsiderar, pananglit, ang tiunay nga pagserbisyo nga gihatag sa usa ka inahan o amahan diha sa hilum nga wala mailhi nga takus nga panimalay sa mga Santos sa Ulahing mga Adlaw. Hunahunaa ang mga magtutudlo sa Gospel Doctrine ug mga chorister sa Primary ug mga Scoutmaster ug mga visiting teacher nga Relief Society nga mialagad ug nakapanalangin sa minilyon apan kansang mga ngalan dili gayud mapasalamatan sa publiko o masibya sa media sa nasud.

“Napulo ka liboan ka mga tawo nga wala mailhi ang mihimong posible sa atong mga oportunidad ug kalipay matag adlaw. Sama sa gipahayag sa kasulatan, sila ‘sama sa pagkamaalagaron’ niadtong kansang mga kinabuhi anaa sa ulohang mga pahina sa mga pamantalaan [newspaper].

“Ang mahimong sentro sa kasaysayan ug modernong pagtagad sagad kaayong natutok diha sa indibidwal kay sa kadaghanan” (“No Less Serviceable,” Ensign, Abr. 1992, 64).