Leksyon 94

Alma 37

Pasiuna

Mipadayon si Alma sa pagtambag sa iyang anak nga si Helaman ug mihatag kaniya sa sagradong mga rekord. Mipahinumdom siya ni Helaman nga ang mga kasulatan mao ang nahimong pamaagi sa pagdala sa liboan ka mga Lamanite ngadto sa Ginoo, ug nanagna siya nga ang Ginoo adunay dakong katuyoan sa mga rekord sa umaabut. Mitudlo si Alma sa iyang anak nga lalaki kon unsa ang itudlo sa katawhan. Nagkomparar sa mga pulong ni Kristo ngadto sa Liahona, gipasabut niya og maayo si Helaman sa kaimportante sa pagtan-aw niini alang sa giya.

Pahinumdom: Kini nga leksyon naghatag og usa ka oportunidad alang sa tulo ka mga estudyante sa pagtudlo sa klase. Aron matabangan kining mga estudyante nga maandam sa pagtudlo, hatagi ang matag estudyante og kopya sa seksyon nga iyang itudlo usa o duha ka adlaw sa dili pa ang klase. O mahimo ka nga mopili nga ikaw mismo ang motudlo niining leksyon.

Mga Sugyot alang sa Pagtudlo

Alma 37

Gisalig ni Alma ngadto ni Helaman ang mga rekord, mitambag kaniya sa pagsunod sa kasugoan, ug mipahinumdom kaniya nga ang Liahona molihok pinaagi sa hugot nga pagtuo

Kopyaha ang mosunod nga diagram diha sa pisara:

Hangyoa ang mga estudyante sa paglista diha sa pisara og mga gagmay ug yano nga mga butang nga nakahimo og dakong epekto alang sa maayo nilang kinabuhi. Mahimo nimong hangyoon sila sa pagpasabut sa ilang mga tubag.

Ipasabut nga ang Alma 37 naglangkob sa mga tambag ni Alma aron matabangan ang iyang anak nga si Helaman sa pagpangandam aron mamahimong tigtipig sa sagradong mga rekord. Mitudlo si Alma kaniya mahitungod sa papel sa gagmay ug yano nga mga butang sa buhat sa Ginoo. Dapita ang usa ka estudyante sa pagbasa og kusog sa Alma 37:6–7.

Unsa ang atong makat-unan gikan niini nga mga bersikulo kabahin sa bili sa “gagmay ug yano nga mga butang”? (Ang mga estudyante mahimong mogamit og lain-laing mga pulong, apan kinahanglan silang mopahayag sa kamatuoran nga ang Ginoo magtrabaho pinaagi sa gagmay ug yano nga mga pamaagi sa pagpahinabo sa Iyang mahangturong katuyoan.)

Dapita ang mga estudyante sa pagbasa sa hilum sa Alma 37:1–5, nga mangita sa ehemplo sa usa ka gagmay ug yano nga butang nga dunay dakong epekto sa kinabuhi sa katawhan (ang sagrado nga mga rekord, o mga kasulatan). Human makareport ang mga estudyante kon unsa ang ilang nakit-an, isulat ang pulong nga Kasulatan diha sa pisara ug ubos sa Gagmay ug yano nga mga butang.

Hangyoa ang mga estudyante sa pagsiksik sa Alma 37:8–10 alang sa mga paagi nga ang kasulatan miimpluwensya sa katawhan sa Basahon ni Mormon. Samtang magreport ang mga estudyante sa unsay ilang nakit-an, mahimo nimong isulat ang ilang mga tubag ubos sa DAKONG EPEKTO.

• Sa unsang paagi nga ang mga kasulatan adunay epekto sa inyong kinabuhi?

I-summarize ang Alma 37:11–32 pinaagi sa pagsabut nga si Alma mitudlo ni Helaman nga ang Ginoo magpakita sa Iyang gahum sa pag-abut sa Basahon ni Mormon. Siya misugo ni Helaman sa pagsunod sa mga sugo sa Ginoo ug mainampingon nga motipig sa mga rekord. Misugo usab siya ni Helaman sa paggamit sa mga rekord sa pagtudlo sa mga tawo ug likayan ang pagbutyag sa tanang detalye sa mga kadautan sa mga Jaredite ug ang miresulta nga pagkalaglag.

Dapita ang mga estudyante sa pagsiksik sa hilum sa Alma 37:13–16, nga mangita sa mga baruganan nga gitudlo ni Alma kang Helaman samtang siya misugo kaniya nga ampingan ang mga rekord. (Ang mga estudyante mahimong mopakigbahin og nagkalain-laing mga baruganan, apan siguroha nga ang ilang tubag magpakita nga kon sila mosunod sa mga sugo sa Ginoo, motabang Siya kanato nga matuman ang atong mga katungdanan. Mahimo ka nga mangutana kon sa unsang paagi nga kining baruganan may kalabutan sa ideya nga ang gagmay ug yano nga mga butang adunay dakong epekto.)

Ang nahabilin niining leksyon gidesinyo aron itudlo sa tulo ka mga estudyante. Kon ang klase dako, hangyoa ang mga magtudlo nga estudyante nga mopahimutang sa tulo ka lain-laing dapit sa klasehanan. Bahina ang klase ngadto sa tulo ka grupo. Dapita ang matag grupo sa pagdala sa ilang mga kasulatan, mga notebook o scripture study journal, ug mga bolpen o lapis ug moapil sa pundok sa usa sa mga magtudlo nga estudyante. Human ang mga magtutudlo nga estudyante motapos sa ilang mga leksyon, ang mga grupo magpuli-puli. Kon gamay ra ang klase, ang mga magtutudlo nga estudyante magpuli-puli sa pagtudlo sa tibuok klase. Sa bisan hain nga kahimtang, ang mga magtudlo nga estudyante kinahanglang mogahin og pito ka minuto sa pagpresentar sa ilang mga leksyon ug giya sa panaghisgutan.

Estudyante nga Magtutudlo 1—Alma 37:33–34

Hangyoa ang inyong isig ka estudyante sa paghunahuna sa usa ka lokal nga lider sa Simbahan o General Authority kinsa mitudlo kanila og usa ka butang nga nakahimo og kalainan sa ilang kinabuhi. Dapita ang pipila ka estudyante sa pagpakigbahin unsa ang gitudlo niining lider ug sa unsang paagi nga nakaimpluwensya kini kanila. Mahimo usab nimong ipakigbahin ang usa ka panig-ingnan gikan sa imong kinabuhi.

Dapita ang duha ka estudyante nga magpuli-puli sa pagbasa og kusog sa Alma 37:33–34. Hangyoa ang uban nga mga estudyante sa pagsunod, nga mangita kon unsay gitambag ni Alma kang Helaman sa pagtudlo sa katawhan. Mahimo nimong isugyot nga ilang markahan ang mga pulong nga “tudloi sila” ug “magsangyaw ngadto kanila” samtang sila magbasa. Diha sa pisara o sa usa ka piraso nga papel, isulat ang Mga Pagtulun-an sa mga lider sa Simbahan. Human mabasa sa mga estudyante ang mga bersikulo, hangyoa sila sa pagreport sa ilang nakit-an. Isulat ang ilang mga tubag ubos sa Mga Patulun-an sa mga lider. Ipangutana ang mosunod:

• Sa unsang paagi kining mga pagtulun-an makatabang kanato ilabi na karong panahona? Ngano man?

Hangyoa ang imong isigka estudyante sa pagtan-aw sa katapusan nga pulong sa Alma 37:34 aron makita unsa ang mga panalangin nga moabut gikan sa pagsunod sa mga pagtulun-an sa mga lider sa Simbahan. Isulat ang mosunod nga baruganan diha sa pisara: Pinaagi sa pagsunod sa mga pagtulun-an sa mga lider sa Simbahan, makakaplag kita og kapahulayan sa atong mga kalag. Pangutan-a sila unsa sa ilang hunahuna ang gipasabut sa “makakaplag og kapahulayan sa ilang mga kalag.” (Ang mga tubag mahimong maglakip sa pagkagawasnon gikan sa mga sangputanan sa sala, pagdawat og kalinaw gika sa Espiritu, ug ang pagkabulahan inubanan sa kusog sa paglahutay ug pagbuntog sa mga hagit.)

Ipakigbahin ang imong pagpamatuod kon sa unsang paagi nga kining baruganan tinuod diha sa imong kinabuhi. Kon aduna pa kay oras, dapita ang uban sa pagpakigbahin sa ilang mga pagpamatuod niining baruganan.

Estudyante nga Magtutudlo 2—Alma 37:35–37

Ipasabut sa imong isigka estudyante nga sagad niadtong nagtanom og kahoy nga ihigot o bantingan ang linghod nga kahoy ngadto sa usa ka istaka [stake] ug dayon tangtangon ang suportar sa higayon nga ang kahoy mohingkod na. Pangutan-a sila ngano kaha nga gihimo kana. Unya basaha ang mosunod nga istorya mahitungod sa usa ka kahoy nga gitanom ni Presidente Gordon B. Hinckley sa iyang nataran:

Si Presidente Gordon B. Hinckley mitanom og linghod pa nga kahoy duol sa iyang balay dili lang dugay human siya naminyo. Gihatagan lang niya kini og gamayng pagtagad samtang nanglabay ang mga katuigan. Usa ka adlaw nakamatngon siya nga ang kahoy nagharag ngadto sa kasadpan. Misulay siya sa pagduot niini nga matul-id, apan ang punoan bahi na kaayo. Misulay siya og gamit og pisi ug mga pulley aron sa pagtul-id niini, apan dili kini mabawog. Sa katapusan, nagkuha siya og gabas ug giputol ang dakong sanga sa kasadpang bahin, nga nagbilin og bati nga pinutlan. Sa kaulahian miingon siya mahitungod sa kahoy:

“Sobra sa tunga sa siglo na ang milabay sukad sa akong pagtanom nianang kahoya. … Sa miaging adlaw akong gitan-aw pag-usab ang kahoy. Dako na kini. Mas maayo na ang porma. Dako na kining tabang sa balay. Apan unsa ka seryuso ang truma sa linghod pa kini ug unsa ka pintas nga pamaagi ang akong gigamit aron sa pagtul-id niini.

“Sa dihang una nako kining gitanom, ang usa ka piraso nga higot makapugong na unta niini batok sa mga kusog nga hangin. Unta akong nahimo ug naabagan kana nga higot uban sa gamay lang kaayo nga kahago. Apan wala nako buhata, ug mibawog kini uyon sa pwersa nga miabut batok niini” (“Bring Up a Child in the Way He Should Go,” Ensign, Nob. 1993, 59).

Ipabasa sa mga estudyante ang tambag ni Alma ngadto ni Helaman sa Alma 37:35. Hangyoa sila sa paghunahuna mahitungod niining bersikulo kon sa unsang paagi kini may kalabutan sa nasinati ni Presidente Hinckley sa punoan sa kahoy.

Ang Alma 37:35 usa ka scripture mastery passage. Mahimo nimong tabangan ang mga estudyante sa ilang pag-master niining tudling pinaagi sa pagdapit kanila sa pagkompleto sa assignment sa katapusan sa leksyon karong adlawa.

Dapita ang mga estudyante sa pag-summarize sa Alma 37:35 sa ilang kaugalingong mga pulong. (Ang ilang mga tubag kinahanglang mopahayag nga kita kinahanglang makat-on diha sa atong kabatan-on sa pagsunod sa mga sugo sa Dios.) Dapita usab sila sa pagsulat sa ilang mga tubag sa mosunod nga mga pangutana. (Mahimo nimong isulat ang mga pangutana diha sa pisara o basahon kini og hinay aron ang mga estudyante makasulat niini.)

• Unsay kalainan ang mahimo niini sa kinabuhi sa usa ka tawo nga magkat-on sa pagsunod sa mga sugo sa Dios samtang bata pa?

• Makahunahuna ba kamo og mga tawo kinsa napanalanginan sa tibuok nilang kinabuhi tungod kay sila nagkat-on sa pagsunod sa mga sugo sukad sa ilang kabatan-on? Isulat kon sa unsang paagi sila napanalanginan.

Dapita ang pipila ka estudyante nga moreport sa unsay ilang nasulat. Dapita ang usa ka estudyante sa pagbasa og kusog sa Alma 37:36–37. Hangyoa ang ubang mga estudyante sa pagsunod, nga mangita og piho nga tambag nga makatabang nila sa pagsunod sa mga sugo samtang sila batan-on pa.

• Sa unsang paagi nga ang pagsunod niining tambag sa matag adlaw makatabang ninyo sa pagsunod sa mga sugo?

• Unsa ang mga paagi nga kamo naningkamot sa pagbutang sa Ginoo og una diha sa inyong mga hunahuna, mga pulong, mga buhat, ug mga pagbati? (Awhaga ang mga estudyante sa pagkonsiderar kon unsaon nila paglambo.)

Ipakigbahin ang imong mga pagbati mahitungod kon sa unsang paagi nga ang pagtambag sa Ginoo nakatabang nimo sa pagsunod sa mga sugo. Awhaga ang imong isigka estudyante sa pagpakigtambag uban sa Ginoo sa tanan nilang buhaton.

Magtudlo nga Estudyante 3—Alma 37:38–45

Ipakita ang litrato nga Ang Liahona (62041; Libro sa mga Hulagway sa Ebanghelyo [2009], nu. 68). Pahinumdumi ang imong isigka estudyante sa kompas nga gigamit sa Ginoo aron pagtabang sa pagbiyahe sa pamilya ni Lehi ngadto sa yuta nga saad. Sa Alma 37:38, atong makat-unan nga ang kompas gitawag og Liahona. Ipasabut nga si Alma namulong bahin sa Liahona aron sa pagtudlo kang Helaman sa importanting baruganan mahitungod kon giunsa sa Ginoo paggiya ang Iyang mga anak.

Ipasabut sa imong isigka estudyante nga ikaw mangutana kanila ug dayon papuli-puliha sila sa pagbasa og kusog sa pipila ka bersikulo samtang ang tanan mangita sa mga tubag. Ipatubag nila ang matag pangutana human mabasa ang kauban nga mga tudling sa kasulatan.

• Sa unsang paagi molihok ang Liahona? (Tan-awa sa Alma 37:38–40.)

• Nganong may panahon nga mohunong ang Liahona sa pagtrabaho? (Tan-awa sa Alma 37:41–42.)

• Unsaon kaha nato pagkomparar ang Liahona ngadto sa mga pulong ni Kristo? (Tan-awa sa Alma 37:43–45.)

Mahimo nimong ipasabut nga niining mga bersikulo, ang mga pulong nga anino ug matang nagpasabut sa “usa ka tawo, panghitabo, o ritwal nga may kaparehas sa laing tawo, panghitabo, o ritwal nga mas dako ang importansya nga sundon. … Ang tinuod nga mga matang adunay mga punto nga mamatikdan, nagpakita og ebidensya sa balaanong pagtudlo, ug mahimong propetikanhon nga panghitabo sa umaabut” (Joseph Fielding McConkie, Gospel Symbolism [1985], 274). Ang kapilian sa pagsunod o sa dili pagsunod sa direksyon sa Liahona sama sa atong pagpili mahitungod kon giunsa nato sa pagtubag ang direksyon nga moabut pinaagi sa mga pulong ni Kristo.

• Asa man nato makaplagan ang mga pulong ni Kristo? (Ang mga tubag mahimong maglakip sa mga kasulatan, sa mga pulong sa mga propeta sa ulahing mga adlaw, sa patriyarkal nga mga panalangin, ug sa mga pag-aghat sa Espiritu.)

Dapita ang imong isigka estudyante sa pag-summarize sa mga pulong ni Alma diha sa Alma 37:38–45, ilabi na sa mga bersikulo 44–45. Kini nga panaghisgutan kinahanglang maglakip sa mosunod nga kamatuoran: Kon mosunod kita sa mga pulong ni Jesukristo, kini motudlo kanato sa pagdawat sa kinabuhing dayon.

Ipakigbahin kon sa unsang paagi nga ang mga pulong ni Kristo adunay impluwensya kaninyo sa espirituhanong paagi ug sa unsang paagi kini nakatabang kaninyo sa pag-uswag ngadto sa kinabuhing dayon. Mahimo nimong isugyot nga ang mga estudyante mokonsiderar sa pag-angkon og patriyarkal nga panalangin o, kon nakadawat na sila, basahon kini sa regular ug mainampoon nga paagi.

Pahinumdom sa magtutudlo: Human ang mga estudyante nakatudlo na sa ilang porsyon sa leksyon, pasalamati sila ug, kon may panahon pa, dapita ang pipila ka estudyante sa pagpamatuod sa usa sa mga baruganan nga ilang nakat-unan karon. Mahimong ikaw usab gustong mopakigbahin sa imong pagpamatuod niining mga baruganan. Tapusa pinaagi sa pagdapit sa klase sa pagsunod samtang imong basahon og kusog ang Alma 37:46–47.

Scripture Mastery—Alma 37:35

Pahinumdom: Ang mosunod nga take-home activity moandam sa mga estudyante alang sa pagsugod sa sunod nga leksyon sa (Alma 38). Pagplano og panahon sa klase sa pagpasabut sa mga assignment sa mga estudyante ug pahibaloa sila sa imong plano sa pag-follow up sa ilang mga kasinatian sa sunod ninyong panagkita.

Ipasabut nga ang Alma 37:35 usa ka scripture mastery passage. Mahimo nimong awhagon ang mga estudyante sa pagmarka niini sa lahi nga paagi aron sayon nila kining matultolan. Dapita sila sa pagmemorya niining tudling didto sa balay karong gabii ug isag-ulo kini ngadto sa usa ka ginikanan o sa laing masaligan nga hamtong. (O makabasa sila sa bersikulo uban sa usa ka hamtong.) Awhaga sila sa pagpangutana sa hamtong sa mosunod: (Mahimo nimong ipasulat sa mga estudyante kini nga mga pangutana diha sa piraso sa papel aron madala sa balay.)

Sa unsang paagi nga ang pagkamasulundon ngadto sa kasugoan sa Dios nakatabang kaninyo?

Unsa ang imong ikatambag alang kanako nga makatabang nako nga mahimong mas maalamon sa akong pagkabatan-on?

Pahibaloa ang mga estudyante nga mohangyo ka nila sa pagreport sa ilang mga kasinatian sa sunod nga klase.

Komentaryo ug Background nga Impormasyon

Alma 37:6–7. Gagmay ug yano nga mga butang

Sa paghulagway sa baruganan nga gagmay ug yano nga mga butang nga makahimo og dakong kalainan, si Presidente Gordon B. Hinckley misaysay sa mosunod:

“Daghang katuigan ang milabay nagtrabaho ko sa usa ka riles sa sentro nga mga buhatan sa Denver. Gisaligan ko sa gitawag og head-end traffic. Mao kadto ang panahon nga hapit ang tanang tawo manakay sa de-pasahero nga mga tren. Usa ka buntag nakadawat ko og usa ka tawag gikan sa akong kauban sa trabaho didto sa Newark, New Jersey. Miingon siya, ‘Ang tren nga mao-ni-mao-na miabut na, apan kini walay sakyanan sa bagahe. Gibana-bana nga, 300 ka mga pasahero ang nawad-an sa bagahe, ug sila nangasuko.’

“Diha-diha dayon miadto ko aron susihon kon asa kini naabut. Nahibaloan nako nga husto ang pagkakarga niini ug husto ang pagbiyahe sa Oakland, California. Gibalhin kini sa among tren didto sa Siyudad sa Salt Lake, gidala ngadto sa Denver, ngadto na sa Pueblo, nabutang sa laing rota, ug nabalhin ngadto sa St. Louis. Didto angay unta kining gidala sa lain nga riles nga padulong sa Newark, New Jersey. Apan usa ka dili mahunahunaon nga switchman didto sa istasyon sa St. Louisang mipasibog sa usa ka gamay nga piraso sa puthaw nga tulo ka pulgada lamang, usa ka switch point, ug dayon mibira sa ligwat aron sa pagpabulag sa sakyanan. Among nadiskubrihan nga usa ka sakyanan sa bagahe nga unta nahatud sa Newark, New Jersey, sa pagkatinuod nahatud sa New Orleans, Louisiana—1,500 ka milya gikan sa iyang padulnganan. Ang tulo ka pulgada lamang nga pagsibog sa switch didto sa istasyon sa St. Louis tungod sa usa ka dili mabinantayon nga empleyado ang misugod niini sa sayop nga dalan, ug ang distansya gikan sa iyang tinuod nga padulnganan midako og maayo. Sama usab niana ang atong mga kinabuhi. Imbis nga magsunod sa usa ka dili matipason nga dalan, nabira kita pinaagi sa sayop nga ideya ngadto sa lain nga direksyon. Ang pagsibog nato palayo gikan sa atong unang padulnganan mahimong gamay ra kaayo, apan, kon magpadayon, kana nga gamay kaayo nga pagsibog mahimong dako kaayo nga kang-a ug makita nato ang atong kaugalingon nga layo na gikan sa dapit nga atong gitumong nga adtuon.

“Nakatan-aw ba kamo sukad niadtong 16 ka pye nga ganghaan sa umahan?” Kon maablihan kini, halapad ang labyog niini. Ang mga bisagra gamay ra kaayo ang pagsibog, samtang ang gawas nga dapit dako kaayo. Anaa sa gagmayng mga butang diin ang kinabuhi makahimo og dako nga kalainan sa atong mga kinabuhi, akong minahal nga batan-ong mga higala” (“A Prophet’s Counsel and Prayer for Youth,” Ensign, Ene. 2001, 5–7).

Alma 37:35 “Pagkat-on diha sa imong kabatan-on sa paghupot sa mga sugo sa Dios”

Si Elder L. Tom Perry sa Korum sa Napulog Duha ka mga Apostoles misaysay sa istorya ni Creed Haymond, ang usa ka tawo kinsa nakat-on sa iyang pagkabatan-on sa pagsunod sa mga sugo sa Dios:

“Si Creed Haymond [usa] ka batan-on nga Mormon kinsa miaplay ug nadawat sa University of Pennsylvania. Usa siya ka kanhi atleta nga naila sa iyang kakusog, ug tungod sa iyang linihokan ug pag-apil, napili siya nga mahimong captain sa track team.

“Ang tinuig nga palaro sa Intercollegiate Association of Amateur Athletes of America gipahigayon didto sa Stadium sa Harvard sa hinapos sa Mayo niadtong 1919. Sa Cambridge nagagikan ang mga banggiitan nga mga atleta sa kolehiyo—1,700 tanan. Sa mga tryout, ang Penn nakahimo og 17 ka tawo nga kwalipikado. Ang Cornell, mao ang ilang gikaintapan nga kaatbang nianang tuiga, nakahimo lang og 10 nga kwalipikado. Ang team sa Penn nakapuwesto na nga makoronahan nga kampyon. Ang mga score gihimo sa unang lima ka dapit—lima alang sa una, upat alang sa ikaduha, ug tulo sa ikatulo, duha sa ikaupat, ug usa alang sa ikalima. Dayag lang, ang team nga kadaghanan nahimong kwalipikado adunay labing dako nga oportunidad sa pagdaug sa palaro.

“Ang coach sa Penn nahubog sa bino nianang pagkagabii sa wala pa ang palaro. Milibut siya sa iyang mga sakop sa team sa wala pa siya mipahulay. Miadto siya sa kwarto ni Creed ug miingon, ‘Creed, ugma kon buhaton nato ang atong labing maayo ugma, dali ra ang atong pagdaug.’

“Ang coach nagduha-duha. ‘Creed, akong gipainom og gamayng bino sa sherry ang mga bata karong gabii. Gusto ko nga moinom ka, gamay lang siyempre.’

“‘Dili ko ana, Coach.’

“Pero, Creed, wala ko moingon nga hubgon ko ikaw. Nakahibalo ko kon unsa ang pagtuo sa mga “Mormon”. Naghatag ko nimo niini isip pangpalagsik, para makahimo ka sa imong labing maayo.’

“‘Dili kana makahatag nako og kaayohan, Coach; dili ko moinom niini.’

“Ang coach mitubag, ‘Hinumdumi, Creed, ikaw ang kapitan sa team ug ang among kinamaayohan. Katorse ka libo ka mga estudyante ang personal nga manan-aw nimo nga modaug niining palaro. Kon pakyason nimo kami mapilde kita. Nakahibalo ko unsay maayo para nimo.’

“Nakahibalo si Creed nga ang uban nga mga coach mibati nga ang gamayng bino mapuslanon kon ang mga tawo nga nagbansay sa mga muscle ug mga ugat hangtud sa punto nga hapit mabugto. Nasayud usab siya nga ang gihangyo sa coach nga iyang buhaton batok sa tanan nga gitudlo kaniya sukad pa sa iyang pagkabata. Gitan-aw niya ang coach sa mata ug miingon, ‘dili ko modawat niini.’

“Mitubag ang coach, ‘Kataw-anan ka nga tawo, Creed. Dili ka modawat og tsaa didto sa training table. Duna kay imong kaugalingong ideya. Aw, tugutan tika sumala sa imong gusto.’

“Dayon ang coach mibiya sa kapitan sa team sa mabalak-on kaayo nga kahimtang. Unsa kaha kon dili maayo ang iyang mapakita ugma. Unsa may ikasulti niya sa iyang coach? Makigsangka siya sa labing kusog nga mga tawo sa kalibutan. Bisan unsa nga ubos sa iyang pinakamaayo dili magsilbi. Ang iyang katig-a lagmit makapapilde sa palaro alang sa Penn. Ang iyang mga kauban sa team gisultian unsa ang buhaton, ug sila mitando. Mituo sila sa ilang coach. Unsa may iyang katungod sa pagsupak? Adunay usa lang ka rason. Siya natudloan sa tibuok niyang kinabuhi sa pagsunod sa Pulong sa Kaalam.

“Kritikal kadto nga takna sa kinabuhi niining batan-ong lalaki. Uban sa tanang espirituhanong pwersa sa iyang kinaiyahan nga diha kaniya, miluhod siya ug matinguhaong naghangyo sa Ginoo sa paghatag kaniya og usa ka pagpamatuod agi og tinubdan niining pagpadayag nga siya mituo ug misunod. Dayon natulog sa higdaanan ug nahinanok.

“Pagkabuntag ang coach miadto sa iyang kwarto ug nangutana, ‘Kumusta imong pamati, Creed?’

“‘Maayo,’ malipayon nga mitubag ang kapitan.

“‘Ang tanang kaubanan nangasakit. Wala ko kahibalo unsay nahitabo nila,’ ang coach seryuso nga nagsulti.

“‘Basin tungod sa ilimnon nga imong gihatag, Coach.’

“‘Basin tuod,’ tubag sa coach.

“Alas dos makita na ang 20,000 ka mga tumatan-aw nga maglingkod nga naghulat sa pagsugod sa palaro. Sa pagsugod sa dula, maklaro nga dunay dili mao sa maanindot nga Penn team. Dula human sa laing dula, ang Penn team mihimo og ubos sa unsay gilauman kanila. Pipila sa mga sakop nagluya nga misalmot.

“Ang 100- ug 220-yard dash mao ang lumba ni Creed. Nagkinahanglan gyud kaayo ang Penn team nga siya modaug alang kanila. Makigbatok siya sa lima nga labing kusog nga kalalakin-an sa mga kolehiyo sa Amerika. Samtang ang kalalakin-an mipwesto na alang sa 100-yard dash ug sa pagbuto sa pistola, ang matag lalaki misutoy sa pagdagan—ang tanan gawas lang sa usa—si Creed Haymond. Ang runner nga naggamit sa ikaduha nga lane sa mga trial—ang lane nga daganan ni Creed niining partikular nga dula—gilungagan og usa o duha ka pulgada sa luyo nga dapit diin gipili ni Haymond alang kaniya. Wala sila naggamit og starting blocks niadtong panahona. Tungod sa grabeng paghunat ni Creed, may tipik sa yuta nga nakabkab, ug nadagma siya.

“Mibangon siya ug misulay sa pag-apas sa dili maayong pagsugod. Sa 60 ka yard, siya ang kinaulahian sa lumba. Unya ingon og iyang giluparan ang ikalima nga lalaki, unya ang ikaupat, unya ang ikatulo, unya ang ikaduha. Duol na lang ang tape, ang kasingkasing kabuthunon na sa pagpangusog, mas mikusog pa gayud ang iyang dagan daw alimpos ang katulin ug naapsan ang nag-unang lalaki ngadto na sa kadaugan.

“Tungod sa pipila ka sayop sa pagkahan-ay, ang semifinal alang sa 220 wala makompleto hangtud sa hinapos sa palaro. Sa sama lang gihapon nga pagkamalas nga misunod sa Penn team sa tibuok adlaw, si Creed Haymond nabutang sa katapusang sangka aron makaapil sa 220-yard dash. Unya, lima ka minuto human sa pagdaug niini, gitawag na usab siya aron masugdan ang final sa 220, ang katapusan nga dula sa adlaw. Usa sa kalalakin-an nga midula bag-ohay lang miadto niya. ‘Sultihi ang starter nga kinahanglan ka nga mopahulay sa dili pa modagan pag-usab. Ubos sa lagda may katungod ka niini. Wala pa ko makabawi sa akong kakutas ug midagan na ko sa wala pa ka.’

“Si Creed midagan ngadto sa starter nga naghangak ug mihangyo og dugang panahon. Ang opisyal miingon nga hatagan siya og 10 minutos. Apan naghugyaw na ang katawhan aron masugdan ang katapusan nga lumba. Magul-anon siya nga mitawag sa kalalakin-an nga mopwesto na. Ubos sa ordinaryo nga kahimtang si Creed wala mahadlok niini nga lumba. Tingali siya ang kinakusgan sa tibuok kalibutan sa ingon ana nga distansya, apan tulo na ka lumba ang iyang gidagan nianang hapona—usa na ang kulbahinam nga 100-yard dash.

“Mimando ang starter sa gikutasan pa nga mga kalalakin-an sa pagpwesto, miisa sa iyang pistola, ug sa pagbuto, ang lumba nagsugod. Niining higayuna ang Penn captain misutoy gikan sa iyang gipanukaran. Sa wala madugay si Creed nag-una. Misutoy siya sa field ug, sa kalit nga kakusog ug nag-una siya og walo ka yarda gikan sa kinadul-an nga lalaki, siya mibugto sa tape, midaug sa ikaduha nga lumba—ang 220-yard dash.

“Napilde ang Penn sa palaro, apan ang ilang captain mipahingangha sa mga tigdayeg [fans] sa iyang labing maayong pagdagan.

“Sa katapusan nianang talagsaon nga adlaw, samtang padulong nang matulog si Creed Haymond, kalit niyang nahinumduman ang iyang pangutana sa miaging gabii kabahin sa kabalaan sa Pulong sa Kaalam. Ang prosesyon sa lahi nga sunod-sunod nga panghitabo iyang nahinumduman—ang iyang mga kauban sa team nga miinom sa bino ug nangapakyas; ang iyang paglikay nakahatag og kadaugan nga gani nakapahingangha sa iyang kaugalingon. Ang tam-is ug yano nga kasigurohan sa Espiritu miabut kaniya: ang Pulong sa Kaalam iya sa Dios (gipahiangay gikan sa Joseph J. Cannon, “Speed and the Spirit,” Improvement Era, Okt. 1928, 1001–7)” (“Run and Not Be Weary,” Ensign, Nob. 1996, 37–38).

Alma 37:38–46. Ang Espiritu Santo sama sa Liahona

Si Elder David A. Bednar sa Napulog Duha ka mga Apostoles mikompara sa Liahona ngadto sa Espiritu Santo:

“Samtang kita magpadayon subay sa dalan sa kinabuhi, makadawat kita og giya gikan sa Espiritu Santo ingon nga si Lehi gigiyahan pinaagi sa Liahona. …

“Ang Espiritu Santo molihok sa atong kinabuhi sama gayud sa gihimo sa Liahona alang kang Lehi ug sa iyang pamilya, sumala sa kahugot sa atong pagtuo ug kakugi ug pagtagad. …

“Ug ang Espiritu Santo naghatag kanato karon og paagi diin kita makadawat, sa gagmay ug yano nga mga butang’ (Alma 37:6), og labaw nga panabut kabahin sa mga pamaagi sa Ginoo. …

“Ang Espiritu sa Ginoo mahimo natong giya ug mopanalangin kanato sa paggiya, panudlo, ug espirituhanong proteksyon panahon sa atong mortal nga panaw. Madapit nato ang Espiritu Santo sa atong kinabuhi pinaagi sa makahuluganong pag-ampo sa personal ug sa pamilya, magbusog sa mga pulong ni Kristo, magkugi ug hingpit nga pagkamasulundon, pagkamatinud-anon ug pagtahud sa mga pakigsaad, ug pinaagi sa hiyas, pagkamapainubsanon, ug pag-alagad. Ug kanunay gayud kitang molikay sa mga butang nga dili ligdong, dili maayo, mahugaw, makasasala, o dautan nga makapalayo kanato sa Espiritu Santo.

“Ato usab nga madapit ang mapadayunon nga pagpakig-uban sa Espiritu Santo samtang kita takus nga mokalawat sa sakrament kada adlawng Igpapahulay” (“Nga Kita unta sa Kanunay Makabaton sa Iyang Espiritu uban Kanato,” Ensign o Liahona, Mayo 2006, 30–31).