Alma 17–24 (Unit 17)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga summary sa mga doktrina ug mga baruganan nga nakat-unan sa mga estudyante samtang sila nagtuon sa Alma 17–24 (unit 17) dili tuyo nga itudlo isip kabahin sa imong leksyon. Ang leksyon nga imong itudlo mosentro lamang diha sa pipila niini nga mga doktrina ug mga baruganan. Sunda ang mga pag-aghat sa Balaang Espiritu samtang imong ikonsiderar ang mga panginahanglan sa imong mga estudyante.

Day 1 (Alma 17–18)

Gikan sa ehemplo ni Ammon ug sa iyang igsoon nga mga lalaki nga nagtudlo sa mga Lamanite, nakat-on ang mga estudyante nga pinaagi sa pagsiksik sa mga kasulatan, pag-ampo, ug pagpuasa, makadawat kita sa Espiritu Santo ug makatudlo sa uban nga may gahum. Ang pagserbisyo ni Ammon ngadto ni Haring Lamoni nagtudlo usab og importanting aspeto sa misyonaryo nga pagserbisyo—nga kon ipakita nato ang maayong mga ehemplo, ang Ginoo mohimo kanato nga mga instrumento sa Iyang mga kamot. Nakita sa mga estudyante nga ang pagserbisyo ni Ammon ngadto ni Lamoni miandam sa nangulo sa Lamanite ug sa uban sa pagdawat sa ebanghelyo. Ang pagkakabig ni Haring Lamoni nagtudlo nga kon kita nakasabut sa atong panginahanglan sa Manluluwas, kita magtinguha sa paghinulsol.

Day 2 (Alma 19–20)

Nakat-unan sa mga estudyante nga ang pagpamatuod ni Ammon ug ang matarung nga ehemplo nakatabang sa amahan ni Lamoni nga moduol ngadto sa Ginoo. Nakat-unan usab nila nga ang atong mahigugmaong lihok makapahimo sa uban nga mopahumok sa ilang mga kasingkasing ug magtinguha sa pagkahibalo sa kamatuoran.

Day 3 (Alma 21–22)

Ang istorya bahin sa misyonaryo nga mga paghago ni Aaron nakatabang sa mga estudyante nga makita nga kon kita magmatinuoron sa paglahutay sa atong mga pagsulay, ang Ginoo motabang kanato nga makahimo sa Iyang buhat. Si Aaron mitabang sa amahan ni Haring Lamoni nga makasabut nga makadawat lamang siya sa kaluwasan pinaagi sa mga kalooy ni Jesukristo. Sama sa hari, kita kinahanglan nga andam sa pagbiya sa tanan natong mga sala aron espirituhanong mausab ug matawo sa Dios.

Day 4 (Alma 23–24)

Ang liboan ka mga Lamanite kinsa midawat sa ebanghelyo mipakita nga ang pagkakabig usa ka espirituhanon nga kausaban—mamahimong usa ka bag-ong tawo pinaagi sa gahum sa Dios. Pinaagi sa ehemplo sa mga Lamanite kinsa nahimong mga Anti-Nephi-Lehi, ang mga estudyante nakat-on nga kon buhaton nato ang tanan natong mahimo sa paghinulsol, ang Dios motangtang sa atong pagkasad-an ug motabang kanato nga magpabiling limpyo. Ang pagkakabig sa mga Lamanite nagpakita nga makatabang kita sa uban nga mamahimong kinabig kon kita magmatinuoron.

Pasiuna

Ang upat ka mga anak nga lalaki ni Haring Mosiah mipili sa pagbalibad sa mga oportunidad ug mga luho sa panimalay aron sila makasangyaw sa ebanghelyo ngadto sa mga Lamanite. Ang istorya niining upat ka mga misyonaryo nagpakita kon unsaon sa mga estudyante nga makaandam aron epektibong makatudlo sa ebanghelyo ni Jesukristo ngadto sa uban.

Mga Sugyot alang sa Pagtudlo

Alma 17–22

Si Ammon ug ang iyang kaigsoonan nakatudlo og duha ka mga hari sa Lamanite

Sa dili pa magklase, isulat ang mosunod nga dili kompleto nga pamahayag diha sa pisara o sa usa ka piraso nga papel: “Ang bugtong nga labing importanting butang nga inyong mahimo sa pagpangandam alang sa usa ka tawag aron sa pagserbisyo og [usa ka misyon] mao ang …”

Dapita ang pipila ka estudyante sa pagsulti kon unsay bation kon ilang makita ang usa ka sakop sa pamilya o usa ka higala nga mobalik gikan sa pagserbisyo og full-time nga misyon. Dayon ipangutana sa mga estudyante: Unsay kalainan sa tawo human sa iyang misyon? Unsa sa inyong hunahuna ang hinungdan sa kausaban?

Ipangutana sa mga estudyante kon unsaon nila pagkompleto ang pamahayag sa pisara. Human makatubag ang mga estudyante, ipakigbahin kanila kon giunsa pagkompleto ni Elder David A. Bednar sa Korum sa Napulog Duha ka mga Apostoles ang pamahayag: “Ang bugtong nga labing importanting butang nga inyong mahimo sa pagpangandam alang sa usa ka tawag aron sa pagserbisyo mao ang pagkahimong usa ka misyonaryo sa dili pa nga kamo moadto sa usa ka misyon” (“Pagkahimong usa ka Misyonaryo,” Ensign o Liahona, Nob. 2005, 45).

Ipangutana: Sa unsa nga mga paagi nga ang young men ug young women makasunod sa tambag ni Elder Bednar ug mahimong mga misyonaryo sa dili pa magserbisyo og full-time nga mga misyon?

Ipakigbahin ang mosunod nga pamahayag ni Presidente Thomas S. Monson:

“Ang misyonaryo nga pagserbisyo usa ka katungdanan sa priesthood—usa ka obligasyon nga gipaabut sa Ginoo kanato kinsa gihatagan og hilabihan ka daghan. Batan-ong mga lalaki, gi-awhag ko kamo sa pagpangandam alang sa pagserbisyo isip misyonaryo. Ipabilin ang inyong kaugalingon nga limpyo ug putli ug takus nga morepresentar sa Ginoo. Imintinar ang inyong kahimsug ug kalig-on. Pagtuon sa mga kasulatan. Kon kini anaa, apil sa seminary o institute. Himoa nga kamo mapamilyar sa handbook sa misyonaryo nga Isangyaw ang Akong Ebanghelyo.

“Usa ka tambag alang kaninyo batan-ong mga sister: ingon nga kamo wala sa samang responsibilidad sa priesthood sama sa batan-ong mga lalaki sa pagserbisyo isip full-time nga mga misyonaryo, makahimo usab kamo og bililhong kontribusyon isip mga misyonaryo, ug among gihangup ang inyong pagserbisyo” (“Samtang Kita Nagkatigum Pag-usab,” Ensign o Liahona, Nob. 2010, 6).

Isulat ang mosunod sa pisara: Ang Ginoo mopanalangin kanato uban sa Espiritu Santo ug gahum sa pagtudlo sa Iyang pulong kon kita …

Bahina ang klase ngadto sa upat ka grupo. I-assign ang matag grupo og usa sa mosunod nga mga tudling sa kasulatan: Alma 17:1–4; Alma 17:9–13; Alma 17:19–25; 18:1–9; Alma 17:26–30. (Ipahaum kini nga kalihokan kon gamay ra ang gidak-on sa imong klase.)

Dapita ang mga estudyante sa pagbasa sa hilum sa mga tudling nga gi-assign ngadto nila, nga mangita sa unsa ang gibuhat sa anak nga mga lalaki ni Mosiah nga nakapanalangin kanila uban sa Espiritu ug gahum samtang sila nagtudlo sa ebanghelyo. Ipasabut nga kon ang mga estudyante nahuman na, imo silang hangyoon sa pagpakigbahin unsa ang ilang nadiskubrihan ug unsaon nila pagkompleto ang hugpong sa mga pulong diha sa pisara.

Human sa igong panahon, pagdapit og usa ka tawo gikan sa matag grupo sa pagpasabut unsa ang gibuhat sa anak nga mga lalaki ni Mosiah ug sa unsang paagi nga ang mga sakop sa grupo makakompleto sa baruganan diha sa pisara. Ang mga tubag sa mga estudyante mahimong maglakip sa mosunod: siksika ang mga kasulatan, magpuasa ug mag-ampo, magmapailubon, magpakita og maayong ehemplo, mosalig sa Ginoo, magmatinud-anong moserbisyo sa uban, ug mohigugma sa uban isip mga kaigsoonan. Samtang mopakigbahin ang mga estudyante sa ilang mga tubag, ilista kini sa pisara. Hangyoa ang mga estudyante sa pagpasabut kon unsay ilang hunahuna sa matag aksyon o kinaiya nga makatabang sa usa ka indibidwal nga mas epektibong mopakigbahin sa ebanghelyo.

Kon dunay bisan usa sa imong mga estudyante nga nakabig sa ebanghelyo human matudloi sa full-time nga mga misyonaryo, mahimo nimo silang hangyoon sa pagpakigbahin kon unsa ang ilang gibati samtang nagkat-on sa ebanghelyo.

Pahinumdumi ang mga estudyante nga human nanalipod si Ammon sa panon sa hari, si Haring Lamoni natingala sa gahum ni Ammon ingon man usab sa iyang kamasulundon ug kamatinud-anon sa pagtuman sa mga kasugoan sa hari (tan-awa sa Alma 18:8–10). Si Lamoni andam na nga makadungog sa mensahe nga gidala ni Ammon aron ipakigbahin ngadto kaniya. Dapita ang mga estudyante nga magpuli-puli sa pagbasa og kusog sa Alma 18:24–29. Hangyoa ang klase sa pagpangita kon sa unsang paagi nga si Ammon miugmad sa pagsabut ni Lamoni bahin sa Dios aron iyang maandam si Lamoni nga makasabut sa tinuod nga doktrina.

Ipangutana sa mga estudyante ang mosunod :

Kon kamo adunay panag-istoryahanay mahitungod sa Dios uban sa usa ka higala sa laing tinuohan, unsaon ninyo sa paggamit ang pagtuo nga inyong gisaw-an, sama sa gibuhat ni Ammon? Sa unsang paagi nga kining paningkamot makatabang sa inyong higala?
Unsay uban nga mga hilisgutan sa ebanghelyo nga mahimo kamong makig-istorya uban sa inyong mga higala aron maabli ang oportunidad sa pagpakigbahin sa ebanghelyo ngadto nila?

Pahinumdumi ang mga estudyante nga si Haring Lamoni nahimong andam sa pagpaminaw mahitungod sa ebanghelyo ni Jesukristo, sama sa iyang amahan. Hangyoa ang usa ka estudyante sa pagbasa og kusog sa Alma 18:39–41—tubag ni Lamoni sa pagkakat-on mahitungod ni Jesukristo. Hangyoa ang laing estudyante sa pagbasa sa Alma 22:14–18—tubag sa amahan ni Lamoni. Dapita ang klase sa pagsunod diha sa ilang mga kasulatan ug pangitaon ang susama nga mga tubag niining mga kalalakin-an.

Ipangutana: Unsay gustong buhaton sa duha ka lalaki sa dihang ilang nakat-unan ang mahitungod ni Jesukristo?

Ipasabut nga si Lamoni ug ang iyang amahan natandog sa Espiritu pinaagi sa mga pagtulun-an sa mga misyonaryo. Agi og resulta, gusto nila ang mga panalangin sa ebanghelyo ug andam nga mobiya sa ilang mga sala ug maghinulsol. Pahinumdumi ang mga estudyante sa kamatuoran nga ilang natun-an niining semanaha: Kita kinahanglan nga andam sa pagbiya sa tanan natong mga sala aron mausab sa espirituhanong paagi ug matawo sa Dios.

Dapita ang usa ka estudyante sa pagbasa og kusog sa pamahayag ni Elder Dallin H. Oaks nga makit-an diha sa ilang giya sa pagtuon: “Ang ebanghelyo ni Jesukristo naghagit kanato nga mag-usab. ‘Paghinulsol’ mao ang pirme nga mensahe niini, ug ang paghinulsol nagpasabut sa pagsalikway sa tanan natong mga binuhatan—ma-personal, pamilya, kaliwat, ug sa nasudnon—nga kanang sukwahi sa mga sugo sa Dios. Ang katuyoan sa ebanghelyo mao ang pag-usab sa kasarangang mga nilalang ngadto sa celestial nga mga lungsuranon, ug kana nagkinahanglan og kausaban” (“Paghinulsol ug Kausaban,” Ensign o Liahona, Nob. 2003, 37).

Dapita ang mga estudyante sa paghunahuna mahitungod sa ilang mga kinabuhi ug ikonsiderar kon kinahanglan ba nilang biyaan ang bisan unsang mga sala aron mausab sa espirituhanong paagi, sama ni Lamoni ug sa iyang amahan. Tapusa pinaagi sa pagpakigbahin sa imong pag-awhag ug pagpamatuod nga samtang andam kita sa paghunong sa atong mga sala, ang Ginoo motabang kanato nga mag-usab ug molambo.

Sunod nga Unit (Alma 25–32)

Hangyoa ang mga estudyante sa pagkonsiderar niining pangutana: Unsa ang inyong isulti sa usa ka tawo nga usa ka anti-Kristo? Sa sunod nga unit, ang mga estudyante makakat-on kon giunsa sa pagdala ni Alma ang mga pangutana ug pagsaway ni Korihor, kinsa usa ka anti-Kristo. Agi og dugang, mas makat-on sila mahitungod sa hugot nga pagtuo samtang sila magbasa mahitungod kon giunsa pagtrabaho ni Alma ug sa uban ang pagtudlo sa mga Zoramite nga mibiya sa kamatuoran, kinsa mituis sa mga pamaagi sa Ginoo.