Leksyon 99

Alma 42

Pasiuna

Gitapos ni Alma ang iyang tambag ngadto sa iyang anak nga si Corianton pinaagi sa pagpasabut nga ang Langitnong Amahan naghatag og usa ka paagi alang niadtong kinsa makasala aron makabaton og kalooy. Gitudlo niya nga gipangayo diha sa kaangayan sa Dios nga ang mga makasasala ipahimulag gikan sa presensya sa Dios. Mipamatuod dayon siya nga si Jesukristo “mopatagbaw sa gipangayo sa kaangayan” (Alma 42:15) pinaagi sa pag-antus alang sa tanan kinsa nakasala ug pinaagi sa paghatag og kalooy ngadto sa mahinulsulon.

Mga Sugyot alang sa Pagtudlo

Alma 42:1–14

Nagtudlo si Alma ni Corianton mahitungod sa kaangayan sa Dios

Sa dili pa magklase, pagdrowing og usa ka yano nga parisan sa timbangan diha sa pisara, sumala sa gipakita sa mosunod nga pahina. (Ayaw idugang ang mga pulong ngadto sa drowing hangtud masultihan sa paghimo sa ingon diha sa leksyon. Mahimo nimong awhagon ang mga estudyante sa pagkopya niining drowing diha sa mga notebook o scripture study journal.)

Ibabaw sa timbangan, isulat ang mosunod nga pamahayag: Gusto ko nga ang Katapusan nga Paghukom makiangayon.

Dapita ang mga estudyante sa pagpataas sa ilang mga kamot kon mouyon sila sa pamahayag nga naa sa pisara.

• Nganong gusto man ninyo nga ang Katapusan nga Paghukom mahimong makiangayon?

• Unsa ang gipasabut sa pulong nga makiangayon ?

Isugyot nga ang makiangayon mahimong nagpasabut nga makuha ang unsay angay kaninyo. Ang ideya sa pagkamakiangayon may kalabutan sa termino sa kasulatan nga kaangayan. Isulat ang pulong nga Kaangayan diha sa pisara ubos sa timbangan.

Aron matabangan ang mga estudyante nga makasabut sa konsepto sa kaangayan, paghangyo og usa ka estudyante sa pagbasa sa mosunod nga pagpasabut ni Elder Dallin H. Oaks sa Korum sa Napulog Duha ka mga Apostoles:

“Ang kaangayan adunay daghang kahulugan. Ang usa balanse. Usa ka inila nga simbolo sa kaangayan mao ang timbangan nga gabalanse. Sa ingon, kon ang mga balaod sa tawo nalapas, ang kaangayan sa kasagaran nagkinahanglan nga usa ka silot ang ipahamtang, usa ka bayad nga magpahiuli sa balanse [sa timbangan]. …

“[Ang] mga balaod sa Dios susama ra nga nagpakabana sa kaangayan. Ang ideya sa kaangayan kon unsa ang angay sa tawo mao ang sukaranan nga kapasikaran sa tanang kasulatan nga namulong bahin sa mga tawo nga nahukman sumala sa ilang mga binuhatan” (“Sins, Crimes, and Atonement” [pakigpulong ngadto sa mga CES religious educator, Peb. 7, 1992], 1, si.lds.org).

Ipasabut nga ang anak ni Alma nga si Corianton nabalaka mahitungod sa pagkamakiangayon sa Katapusan nga Paghukom. Dapita ang usa ka estudyante sa pagbasa og kusog sa Alma 42:1 samtang ang klase mangita kon unsa ang gihunahuna ni Corianton bisan og mahimo kining dili makiangayon, o makatarunganon, mahitungod sa Katapusan nga Paghukom.

• Unsa man ang gibati ni Corianton nga dili makiangayon? (Nga ang mga makasasala itugyan ngadto, o ihatud ngadto sa, usa ka kahimtang nga mauyamot.)

• Ngano kaha nga si Corianton adunay gustong tuohan nga dili kini makatarunganon alang niadtong nakasala nga pagasilutan? (Kon ang mga estudyante nagkinahanglan nga pahinumduman nga si Corianton nanglimbasug sa nagkadaiyang sala, i-refer sila ngadto sa Alma 39:2–3.)

• Kon ang kaangayan nagpasabut sa pagdawat sa unsay angay nato ug masilutan alang sa atong mga sala, sa unsang paagi nga kini makapaguol kanato? (Nakasala kitang tanan ug naubos ngadto sa gipangayo sa kaangayan.)

I-summarize ang Alma 42:2–11 pinaagi sa pagpasabut nga si Alma misulbad sa problema ni Corianton. Gitudlo niya nga ang Pagkapukan ni Adan nagdala sa tanang katawhan ngadto sa napukan nga kahimtang diin kinahanglan gayud silang makasinati og pisikal ug espiritwal nga kamatayon (tan-awa sa Alma 42:9). Gipasabut usab niya nga kon walay paagi nga makabawi gikan niining napukan nga kahimtang, ang mga kalag sa tanang katawhan mamahimong uyamot ug ipahimulag gikan sa presensya sa Dios hangtud sa kahangturan (tan-awa sa Alma 42:11).

Dapita ang usa ka estudyante sa pagbasa og kusog sa Alma 42:12. Ipasabut nga kining bersikulo naghatag og gibug-aton sa Pagkapukan ug ang mga sangputanan niini, naglakip sa pagkahimulag gikan sa presensya sa Dios, napahinabo pinaagi sa pagkadili masulundon ni Adan sa mga sugo sa Dios. Tabangi ang mga estudyante nga makasabu nga kon mosupak kita sa mga sugo sa Dios—kon makasala kita—nagpadayon kita sa pagdistansya sa atong kaugalingon gikan sa Dios sa espirituhanon nga paagi ug nagbutang sa atong kaugalingon ngadto sa gipangayo sa kaangayan. (Mahimo nimong dapiton ang usa ka estudyante sa pagbasa og kusog sa Mga Artikulo sa Hugot nga Pagtuo 1:2.) Hangyoa ang mga estudyante sa pagbasa sa hilum sa Alma 42:14, nga mangita sa sangputanan nga gikinahanglan sa kaangayan tungod sa pagkamasinupakon.

• Unsay ipasabut niining “ipahimulag” sa presensya sa Dios? (Mapalayo gikan sa Dios ug dili na makabalik aron makapanimuyo diha sa Iyang presensya. Mahimo usab nimong hisgutan nga kon kita makasala, atong gipalayo ang atong kaugalingon gikan sa pagpakig-uban sa Espiritu Santo, kinsa usa ka sakop sa Dios nga Kapangulohan.)

Diha sa pisara, idugang ang mga pulong Pagkamasinupakon o sala ug Pagkahimulag gikan sa presensya sa Dios ngadto sa diagram, sumala sa gipakita sa ubos.

scale

Gikan sa unsay inyong nakat-unan sa Alma 42:1–14, unsaon ninyo sa pag-summarize sa usa ka sentence unsa ang gikinahanglan sa balaod sa kaangayan kon ang usa ka indibidwal masinupakon? (Isulat ang mosunod nga kamatuoran diha sa pisara ubos sa timbangan: Tungod sa atong pagkamasinupakon, ang balaod sa kaangayan nagkinahanglan nga kita ipahimulag gikan sa presensya sa Dios. Mahimong mosugyot ka nga ang mga estudyante mosulat niini nga kamatuoran diha sa ilang mga kasulatan tupad sa Alma 42:1–14.)

Dapita ang mga estudyante sa pagbasa sa hilum sa Alma 42:18, nga mangita sa laing sangputanan sa sala.

• Unsay ipasabut niining pagbaton og kahasol sa tanlag?

Dapita ang mga estudyante sa pagpamalandong og usa ka higayon sa dihang sila nakasinati og pagbasol ug kaguol o sa pagkawala sa Espiritu Santo tungod kay sila nakasala. Hangyoa sila sa paghunahuna niana nga pagbati nga midaghan pinaagi sa tanang kasaypanan nga ilang nabuhat. Dayon hangyoa sila sa paghunahuna nianang pagbati nga magpabilin kanila hangtud sa kahangturan.

Aron matabangan ang mga estudyante nga makasabut ug mabati ang panginahanglan sa kalooy, mahimo nimong ipangutana ang mosunod:

• Base sa unsay inyong nakat-unan sa Alma 42:1–14, gusto ba ninyo nga ang Katapusan nga Paghukom mahimong ibase lamang sa kaangayan?

Alma 42:15–31

Nagtudlo si Alma ni Corianton mahitungod sa plano sa kalooy

Aron matabangan ang mga estudyante nga makasabut nga ang mga gipangayo sa kaangayan kinahanglan matagbaw, itudlo ang habig nga silot diha sa timbangan nga anaa sa pisara. Mahimo nimong ikonsiderar nga maggunit og usa ka eraser nga daw imong papason ang gipangayo sa kaangayan. Ipangutana:

• Aduna bay bisan unsa nga paagi alang sa gipangayo sa kaangayan nga mapapas o mapapha? (Wala. Kon ang balaod sa Dios masupak, ang kaangayan nagkinahanglan sa silot. Ang gipangayo sa kaangayan kinahanglan gayud nga makab-ot sa bisan unsang paagi.)

Tabangi ang mga estudyante nga masabtan nga dili makiangayon ang pagpapas sa mga sangputanan nga gipangayo sa kaangayan. Dapita ang usa ka estudyante sa pagbasa og kusog sa Alma 42:25.

• Sumala sa Alma, unsa ang mahitabo kon ang mga sangputanan sa sala matangtang ug ang kaangayan magpabiling walay katagbawan?

Dapita ang mga estudyante sa pagpamalandong sa usa ka pangutana

Ang pagpangutana nga nagkinahanglan sa mga estudyante nga maghunahuna sa dili pa motubag makapadasig sa ilang mga tinguha aron makahibalo sa tubag ug makapahimo nila nga mangita pa og mas lawom ngadto sa mga kasulatan o ngadto sa ilang personal nga kasinatian alang sa pagsabut. Tuguti ang mga estudyante sa paghunahuna mahitungod sa pangutana sa dili pa motudlo nila ngadto sa mga kasulatan alang sa tubag.

Hangyoa ang mga estudyante sa pagpamalandong sa mosunod nga pangutana sa dili pa maghatag kanila sa pakisayran sa kasulatan aron makita ang tubag:

• Kon ang mga gipangayo sa kaangayan dili mapapas, nan unsaon man niadtong mga nakasala (matag usa kanato) nga makaangkon og kalinaw sa tanlag ug mapahiuli ngadto sa presensya sa Dios? (Human mahatagan og panahon ang mga estudyante sa pagpamalandong sa pangutana, dapita ang usa ka estudyante sa pagbasa sa Alma 42:15. Mahimong makatabang ang pagpasabut nga ang mga pulong nga “pagtagbaw sa gipangayo sa kaangayan” nagpasabut sa pagbayad sa bili, o mag-antus sa silot, nga gipangayo sa kaangayan.)

• Sumala sa Alma 42:15, giunsa kini pagkahimong posible nga ang kalooy mapadangat gayud kanato?

Magkuha gikan sa tubag sa mga estudyante, papasa ang mga pulong nga “Ipahimulag gikan sa presensya sa Dios” diha sa pisara ug isulat ang Pag-ula ni Jesukristo ug Kalooy. Sa ubos sa timbangan, isulat ang mosunod nga kamatuoran: Ang Pag-ula ni Jesukristo mitagbaw sa mga gipangayo sa kaangayan aron ang kalooy mahimong mapadangat kanato.

scale

• Unsa ang kahulugan niini diha kaninyo sa pagkahibalo nga ang Manluluwas andam sa pagsakripisyo alang kaninyo aron nga kamo makaangkon sa kalooy nga gipaabut diha kaninyo?

Dapita ang mga estudyante sa pagbasa sa Alma 42:22–24 ug mangita sa unsay gikinahanglan aron ang kalooy mapadangat ngari kanato.

• Unsa ang gikinahanglan alang kanato aron makabaton og kalooy ug malikayan ang hingpit nga gipangayo sa kaangayan? (Kon mailhan sa mga estudyante ang paghinulsol isip ang pamaagi diin atong mabatunan ang kalooy, isulat ang mosunod nga baruganan diha sa pisara ubos sa timbangan: Kon maghinulsol kita, makadawat kita og kalooy pinaagi sa Pag-ula sa Manluluwas. Mahimong mosugyot ka nga ilang isulat kini diha sa ilang mga kasulatan duol sa Alma 42:22–24.)

• Sa inyong hunahuna unsa kaha ang gipasabut sa mga pulong nga “tinuod nga mahinulsulon”? (Sinsero nga naghinulsol.)

• Nganong importante alang kanato nga makasabut nga ang Manluluwas miantus sa mga silot alang sa atong mga sala?

Ipasabut nga si Jesukristo mao ang atong Tigpataliwala. Ang tigpataliwala mao ang tawo kinsa mobarug tali sa duha ka partido aron sa pagtabang sa pagresolba sa usa ka kasungian. Hangyoa ang usa ka estudyante sa pagbasa og kusog sa mosunod nga pamahayag ni Presidente Boyd K. Packer sa Korum sa Napulog Duha ka mga Apostoles. Dapita ang klase sa pagpaminaw alang sa mga rason kon nganong ang ikatulo nga tawo gikinahanglan alang sa kalooy nga mapadangat ngadto sa makasasala:

“Pinaagi sa mahangturong balaod, ang kalooy dili ikahatag gawas kon adunay usa ka tawo nga andam ug makahimo sa pagdala sa atong utang ug mobayad sa bili ug mopahimutang sa mga kondisyon alang sa atong katubsanan.

“Gawas kon adunay usa ka tigpataliwala, gawas kon kita adunay higala, ang tibuok gibug-aton sa kaangayan dili kapugngan, dili mobati, kinahanglan gayud, sa positibong paagi maania gayud kanato. Ang hingpit nga bayad sa kada kalapasan, bisan unsa pa ka gamay o bisan unsa pa ka lawom, paninglon gikan kanato hangtud kabayran na ang katapusang sintabo.

“Apan hibaloi kini: Ang kamatuoran, mahimayaon nga kamatuoran, nagpahayag nga adunay usa ka Tigpataliwala. …

“Pinaagi Kaniya ang kalooy hingpit nga mapadangat ngadto sa matag usa kanato nga dili makapasilo sa mahangturong balaod sa kaangayan. …

“Ang paghatag og kalooy dili awtomatik. Pinaagi kini sa pakigsaad uban Kaniya. Mag-agad kini sa Iyang termino, sa Iyang manggihatagon nga termino” (“The Mediator,” Ensign, Mayo 1977, 55–56).

Hangyoa ang mga estudyante sa pagbasa sa hilum sa Alma 42:29–31 nga mangita kon unsa ang gitinguha ni Alma alang kang Corianton. (Mahimo nimong isugyot nga pamarkahan sa mga estudyante ang ilang nakit-an.)

• Unsa kaha ang ipasabut sa pasagdan ang kaangayan ug kalooy ug ang pag-antus sa Ginoo nga “adunay hingpit nga luna diha sa imong kasingkasing”?

Dapita ang mga estudyante sa pagsulat og mubo nga plano sa leksyon nga magpakita unsaon kaha sa pagtudlo niining konsepto sa kaangayan ug kalooy ngadto sa uban. Awhaga sila sa pagtudlo sa ilang mga pamilya kon unsa ang ilang nakat-unan karon.

Pahinumdumi ang mga estudyante mahitungod sa problema ni Corianton mahitungod sa pagkamakiangayon sa kaangayan sa Dios. Mahimo nimong ipamatuod nga ang Katapusan nga Paghukom mahimong makiangayon ug nga kita sa katapusan makakuha kon unsa ang angay kanato, sumala sa kaangayan ug kalooy sa Dios. Mahimo usab nimong ipasabut nga si Corianton naghinulsol sa iyang mga sala ug nakaangkon og positibo nga epekto sa paglambo sa Simbahan (tan-awa sa Alma 49:30). Hangyoa ang mga estudyante sa pagpamalandong kon unsaon kaha nila sa pagpadayon sa ilang kaugalingong proseso sa paghinulsol.

Dapita ang pipila ka estudyante sa pagpakigbahin sa ilang pasalamat ug pagpamatuod sa kaandam sa Manluluwas sa pag-ula sa atong mga sala ug pagtagbaw sa mga gipangayo sa kaangayan alang kanato. Ipakigbahin ang imong pagpamatuod sa kalooy ug katubsanan nga anaa pinaagi sa maulaon nga sakripisyo sa Manluluwas.

Komentaryo ug Background nga Impormasyon

Alma 42:1. Ang kaangayan sa Dios

Si Elder D. Todd Christofferson sa Korum sa Napulog Duha ka mga Apostoles mitudlo nga ang kalipay makaplagan lamang pinaagi sa paghinulsol:

“Ang tinuod nga kalipay wala mag-agad sa paglimud sa hustisya sa Dios o mosulay sa pagpalikay sa mga sangputanan sa sala apan uban sa paghinulsol ug pagpasaylo pinaagi sa matubsanong grasya sa Anak sa Dios” (“Ang Panalangin sa mga Kasulatan,” Ensign o Liahona, Mayo 2010, 34).

Alma 42:15. “Ang Dios mismo miula alang sa mga sala sa kalibutan”

Aron matabangan ang mga estudyante nga makasabut nga ang “Dios mismo” ang nag-ula alang sa atong mga sala, basaha ang mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:

“Si Kristo dili lamang usa ka tigpataliwala apan maghuhukom usab. Anaa kini niana nga katungdanan sa pagkamaghuhukom nga kita mahimong makakaplag og mas dakong kahulugan diha [sa] pagpadayag nga ang ‘Dios mismo’ mokanaog aron sa pagtubos sa iyang katawhan. Maingon kini nga daw ang maghuhukom nianang dakong hukmanan sa langit, dili buot nga mohangyo ni bisan kinsa apan siya mismo sa pagdala sa mga palas-anon sa mga sad-an nga katawhan nga mibarug diha sa pantalan, mihubo sa iyang kupo sa paghukom ug mikanaog sa yuta aron dad-on sa iyang kaugalingon ang ilang mga kasakit. Si Kristo isip maloloy-on nga maghuhukom ingon kanindot ug katalagsaon nga konsepto sama nga si Kristo isip magtatambag, tigpataliwala, ug manlalaban” (Christ and the New Covenant: The Messianic Message of the Book of Mormon [1997], 81).

Dugang nga Ideya sa Pagtudlo

Alma 42. Video presentation

Aron matabangan ang mga estudyante nga makasabut sa katungdanan ni Jesukristo sa pagpadangat sa kalooy ngadto sa mga makasasala, ipatan-aw ang video presentation nga “The Mediator,” nga makita sa Book of Mormon DVD Presentations 1–19 (54011) ug sa LDS.org. Kini nga video presentation mahimong magamit agi og hulip sa pamahayag ni Presidente Boyd K. Packer diha sa leksyon. Kon imong pilion ang paggamit sa video, i-adjust ang imong plano sa leksyon aron masiguro nga aduna kay igong panahon nga mahuman ang video ug matudlo ang baruganan sa paghinulsol ug pagdawat sa kalooy pinaagi sa Pag-ula sa Manluluwas.