Alma 40

Pasiuna

Samtang mipasidaan si Alma sa iyang anak nga lalaki nga si Corianton mahitungod sa sangputanan sa sala, gitudlo usab niya ang mahitungod sa kinabuhi human sa kamatayon. Iyang gipasabut nga pinaagi sa Pag-ula ni Jesukristo, ang tanang mga tawo mabanhaw. Iyang gitudlo ang mahitungod sa kalibutan sa espiritu, diin ang mga patay, depende sa ilang mga pagpili sa buhi pa, maghulat diha sa paraiso o bilanggoan hangtud sa pagkabanhaw.

Pahinumdom: Dinhi niining leksyon, ang estudyante makaangkon og oportunidad sa pagtudlo sa usag usa. Sa dili pa magklase, pag-andam og mga handout nga dunay mga instruksyon alang sa mga managkauban. Mahimong pamilyar sa matag set sa mga instruksyon aron imong matabangan ang mga estudyante samtang sila mag-andam sa pagtudlo.

Mga Sugyot alang sa Pagtudlo

Alma 40

Si Alma nagtudlo ni Corianton mahitungod sa kalibutan sa espiritu ug sa pagkabanhaw

Isulat ang mosunod nga mga pangutana diha sa pisara sa dili pa magklase:

Unsa ang nakapahimo niining posible alang kanato aron mabuhi human kita mamatay? Kinsa ang mabanhaw?
Asa ta padulong kon kita mamatay? Unsa kaha kini didto?
Unsa ang pagkabanhaw? Sa unsang paagi nga ang atong nabanhaw nga lawas lahi gikan sa atong lawas sa buhi pa? Unsa ang atong buhaton human kita mabanhaw?

Dapita ang mga estudyante sa paghunahuna nga sila mga misyonaryo ug kunohay aduna silay mga sabut nga makigkita og tawo kinsa nangita og mga tubag niining mga pangutana nga nasulat sa pisara. Ipasabut nga ang Alma 40 mao ang usa ka sumpay sa mga pagtulun-an ni Alma ngadto sa iyang anak nga si Corianton ug naglangkob og mga tubag niadtong mga pangutana.

Dapita ang mga estudyante sa pagbasa sa hilum sa Alma 40:1. Hangyoa ang mga estudyante sa pag-ila kon nganong si Alma mihisgot bahin sa pagkabanhaw uban sa iyang anak nga lalaki.

Nganong gitudloan ni Alma si Corianton mahitungod sa pagkabanhaw?
Sumala sa inyong mahinumduman sa mga pagpili ni Corianton, ngano kaha nga nabalaka siya mahitungod sa pagkabanhaw?

Ipares-pares ang mga estudyante. I-assign ang kada pares og usa ka numero: 1, 2, o 3. Dapita ang matag pares sa pagtrabaho nga kunohay sila ang managkompanyon nga misyonaryo, nangandam sa pagtudlo og usa ka mubo nga leksyon aron matubag ang mga pangutana diha sa pisara nga motugbang ngadto sa numero nga gi-assign. Aron matabangan sila nga mangandam, hatagi sila og kopya sa mga instruksyon nga tugbang ngadto sa ilang numero (tan-awa sa ubos). Samtang nagtrabaho ang mga estudyante, mahimo kang maglakaw-lakaw diha sa klase aron makapaminaw ka ug makatabang kon gikinahanglan.

Managkauban 1—Alma 40:1–5

Mga pangutana: Unsa ang nakapahimong posible alang kanato nga mabuhi human kita mamatay? Kinsa ang mabanhaw?

Pangandam sa paggamit sa Alma 40:1–5 sa pagtubag niining mga pangutana. Samtang nag-andam kamo, pagdesider kon asa nga bahin sa leksyon nga ang matag kompanyon magtudlo. Pangandam sa pagbuhat sa mosunod:

Paghatag og pipila ka kasayuran alang sa tudling nga gi-assign nganha kaninyo. (Kon kamo magtudlo gikan sa mga kasulatan, ipasabut kinsa ang nagsulti, kinsa ang gisultihan, ug bisan unsang mga kahimtang nga mahimong makatabang sa tigkat-on nga makasabut sa tudling.)

Basaha ang mga bersikulo nga maoy tubag sa mga pangutana. Ipasabut kon sa unsang paagi nga ang mga kamatuoran niining mga bersikulo makatabang sa pagtubag sa mga pangutana. Sa inyong pagbuhat sa ingon, siguroha nga masabtan sa tanan nga tungod ni Jesuskristo, tanang katawhan mabanhaw. Mahimo usab ninyong isugyot sa inyong gitudloan nga isulat kining kamatuoran diha sa ilang kasulatan tupad sa Alma 40:1–5.

Ipakigbahin kon nganong ang saad sa pagkabanhaw importante kaninyo. Mahimo usab ninyong pangutan-on kadtong inyong gitudloan kon nganong mapasalamaton sila sa saad sa pagkabanhaw.

Pagpamatuod sa mga kamatuoran nga inyong gitudlo.

Managkauban 2—Alma 40:6-14

Mga pangutana: Asa kita paingon kon kita mamatay? Unsa kaha kini didto?

Pangandam sa paggamit sa Alma 40:6–7, 11–14 sa pagtubag niining mga pangutana. Samtang nag-andam kamo, pagdesider kon asa nga bahin sa leksyon nga ang matag kompanyon magtudlo. Pangandam sa pagbuhat sa mosunod:

Basaha ang mga bersikulo nga maoy tubag sa mga pangutana. Ipasabut kon sa unsang paagi nga ang mga kamatuoran niining mga bersikulo makatabang sa pagtubag sa mga pangutana. (Tingali makatabang ang pagpasabut nga sa dihang migamit si Alma sa mga pulong nga “kawanangan sa kangitngit,” wala siya nagpasabut sa katapusang kahimtang ni Satanas ug kadtong kinsa gipanghimaraut. Siya mipasabut sa kahimtang sa dautan tali sa panahon sa ilang kamatayon ug sa panahon sa ilang pagkabanhaw. Karon kanunay natong tawgon kini nga kahimtang isip bilanggoan sa espiritu.) Sa inyong pagbasa niining mga bersikulo, siguroha nga ang tanan nakasabut nga tali sa kamatayon ug pagkabanhaw, ang mga espiritu sa matarung magpuyo sa paraiso ug ang mga espiritu sa dautan magpuyo sa bilanggoan. Mahimo ninyong isugyot sa inyong gitudloan nga isulat kining kamatuoran diha sa ilang kasulatan tupad sa Alma 40:11–14.

Ipakigbahin kon sa unsang paagi nga ang inyong pagsabut niining kamatuoran nakaimpluwensya sa mga pagpili nga inyong gihimo niining kinabuhia. Mahimo usab kamong mangutana niadtong inyong gitudloan kon sa unsang paagi nga ang ilang pagsabut sa kinabuhi human sa kamatayon nakatabang kanila.

Pagpamatuod sa mga kamatuoran nga inyong gitudlo.

Managkauban 3—Alma 40:21–26

Mga pangutana: Unsa ang pagkabanhaw? Sa unsang paagi nga ang atong nabanhaw nga lawas lahi gikan sa atong lawas sa buhi pa? Unsa ang atong buhaton human kita mabanhaw?

Pangandam sa paggamit sa Alma 40:21–26 sa pagtubag niining mga pangutana. Samtang nag-andam kamo, pagdesider kon asa nga bahin sa leksyon nga ang matag kompanyon magtudlo. Pangandam sa pagbuhat sa mosunod:

Basaha ang mga bersikulo nga maoy tubag sa mga pangutana. Ipasabut kon sa unsang paagi nga ang mga kamatuoran niining mga bersikulo makatabang sa pagtubag sa mga pangutana. (Samtang nag-andam kamo sa pagtudlo, mahimong makatabang ang pagsabut nga ang pulong nga kalag niini nga mga bersikulo nagpasabut sa espiritu sa tawo.) Siguroha nga ang tanan nakasabut nga ang pagkabanhaw mao ang pagpahiuli sa espiritu ug sa lawas, uban sa tanang butang ipahiuli ngadto sa ilang tukma ug hingpit nga bayanan. Mahimong mosugyot kamo nga kadtong inyong gitudloan mosulat niini nga kamatuoran diha sa ilang mga kasulatan tupad sa Alma 40:21–23.)

Ipakigbahin nganong mapasalamaton kamo sa pagkahibalo nga ang inyong lawas ug espiritu usa ka adlaw mahiusa ngadto sa ilang tukma ug hingpit nga bayanan. Mahimo usab ninyong ihulagway kon sa unsang paagi nga ang inyong mga pagpili naay epekto sa inyong kahibalo nga kamo usa ka adlaw mobarug atubangan sa Dios ug mahukman. Hangyoa kadtong inyong gitudloan sa pagpakigbahin sa ilang mga pagbati mahitungod sa mga doktrina sa pagkabanhaw ug sa katapusan nga paghukom.

Pagpamatuod sa mga kamatuoran nga inyong gitudlo.

Human makaandam ang mga estudyante sa pagtubag sa mga pangutana nga gi-assign ngadto kanila, grupoha sila aron makatudlo sila sa usag usa pinaagi sa pag-role-play isip misyonaryo. Matag grupo kinahanglan dunay tulo ka managkompanyon, nga sa matag kompanyon dunay naandam nga mga tubag ngadto sa lain-laing set sa mga pangutana. (Kon gamay ra ang klase, patudloa ang matag grupo sa tibuok klase.) Awhaga ang mga estudyante nga mosalig sa ilang kaugalingon samtang sila magtudlo ug samtang sila magkat-on sa usag usa atol sa role-play. Pasaligi sila nga ang Espiritu Santo makadasig nila ug niadtong ilang gitudloan kon sila sinsero sa ilang mga instruksyon ug mga tubag. Paminaw samtang sila magtudlo sa usag usa, ug magtanyag og mga panabut sumala sa imong nabati nga pag-aghat.

Human ang mga estudyante nakaangkon og panahon sa pagtudlo sa usag usa diha sa grupo, ikonsiderar ang pagpangutana sa klase sa pipila sa mosunod nga mga pangutana:

Unsa ang inyong nakat-unan samtang kamo nag-andam sa pagtubag sa gi-assign ninyo nga mga pangutana? Unsa ang inyong nakat-unan samtang kamo gitudloan sa uban nga managkompanyon?
Nasayud nga si Corianton nanglimbasug sa pagsunod sa balaod sa kaputli, sa unsang paagi nga ang pagsabut sa kahimtang sa kinabuhi human sa kamatayon mahimong makatabang kaniya sa paglikay sa mga tintasyon sa umaabut?
Nganong ang mga kamatuoran nga atong nahisgutan karon importante diha kaninyo?

Dapita ang mga estudyante sa pagbasa sa hilum sa Alma 40:25–26, nga mangita sa kalainan tali sa katapusan nga kahimtang sa mga matarung ug sa katapusan nga kahimtang sa mga dautan. Human nila ihulagway unsa ang ilang nakaplagan, hangyoa sila sa pagpakigbahin kon sa unsang paagi kini nga tudling nakaimpluwensya sa ilang mga pasalig sa pagsunod sa ebanghelyo. Mahimo nimong ipakigbahin ang imong tubag ngadto sa samang pangutana. Pagpamatuod sa katungdanan ni Jesukristo sa paghimo sa mga panalangin sa pagkabanhaw nga maanaa.

Ribyu sa Scripture Mastery

Ang pagsabut sa mga estudyante sa mga tudling sa kasulatan madugangan kon sila maghimo sa ilang kaugalingong mga pangutana mahitungod sa mga tudling. Dapita ang mga estudyante sa pagtinabangay, isip usa ka klase o sa ginagmayng grupo, sa pagsulat og mga clue nga magtudlo ngadto sa piho nga mga doctrinal mastery passage. (Mahimo kang magpili og usa ka pundok sa mga tudling nga gusto nimong makat-unan o maribyu sa mga estudyante.) Dayon ipabasa nila ang ilang mga clue diha nimo. Ang mga puntos iganti diha nimo kon imong matag-anan sa husto ang usa ka scripture mastery passage. Ang mga puntos iganti ngadto sa klase kon dili nimo hustong matag-anan.

Pahinumdom: Ang gitas-on niining leksyon mahimong makahatag og panahon alang niining kalihokan sa scripture mastery. Hinoon, aron masiguro nga ang mga estudyante adunay igong panahon sa pag-andam ug sa pag-apil sa leksyon, mahimo nimong gamiton kining kalihokan sa katapusan sa klase, kon duna pay panahon. Kon wala na kay panahon nga mogamit niining kalihokan isip kabahin niining leksyon, mahimo nimo kining gamiton sa laing adlaw. Alang sa ubang mga kalihokan sa pagribyu, tan-awa ang appendix sa katapusan niining manwal.

Komentaryo ug Background nga Impormasyon

Alma 40:11. “Dad-on sa panimalay ngadto niana nga Dios kinsa mihatag kanila sa kinabuhi”

Si Presidente Joseph Fielding Smith mipasabut nga ang mga pulong sa Alma 40:11 wala magtudlo nga kita dad-on dayon ngadto sa presensya sa Dios human dayon kita mamatay:

“Kini nga mga pulong ni Alma sa [Alma 40:11–14] sa akong pagsabut niini, wala magpasabut nga ang tanang espiritu mobalik ngadto sa presensya sa Dios aron mabutang ngadto sa usa ka lugar nga malinawon o usa ka lugar sa pagsilot ug sa atubangan niya madawat ang ilang mga indibidwal nga sentensya. Ang ‘mobalik ngadto sa Dios,’ [ikomparar sa Ecclesiastes 12:7] yanong nagpasabut nga ang ilang mortal nga pagpakabuhi motapus na, ug sila ibalik ngadto sa kalibutan sa mga espiritu, diin ibutang sila sa usa ka lugar sumala sa ilang mga buhat uban sa makiangayon o dili makiangayon, didto maghulat sa pagkabanhaw. Ang ‘balik ngadto sa Dios’ mao ang mga pulong nga ikatugbang sa daghan pang inila nga mga kondisyon. Sama pananglit: usa ka tawo migahin og gitakda nga panahon didto sa ubang langyaw nga natad sa misyon. Kon i-release na siya ug mobalik sa Estados Unidos, mahimo siyang moingon, ‘Pagkanindot nga makauli na’; apan ang iyang panimalay mahimong bisan asa sa Utah o sa Idaho o sa ubang bahin sa Kasadpan” (Answers to Gospel Questions, comp. Joseph Fielding Smith Jr., 5 vols. [1957–66], 2:85).

Alma 40:11–15. Asa ang kalibutan sa espiritu?

Si Presidente Brigham Young mitudlo:

“Asa ang kalibutan sa espiritu? Anaa ra kini dinhi. … Moadto pa ba sila [ang mga espiritu niadtong mga nangamatay] lapas sa mga utlanan sa gi-organisar nga yuta? Dili, sila dili moadto. Sila dad-on dinhi sa yuta” (Discourses of Brigham Young, sel. John A. Widtsoe [1954], 376).

Alma 40:11–15. Unsay mahitabo ngadto sa mga espiritu sa kalibutan sa espiritu?

“Kon ang pisikal nga lawas mamatay, ang espiritu padayon sa pagpakabuhi. Sa kalibutan sa espiritu, ang mga espiritu niadto kinsa mga matarung ‘pagadawaton ngadto sa kahimtang sa kalipay, diin gitawag og paraiso, usa ka kahimtang sa kapahulayan, usa ka kahimtang sa kalinaw, diin sila mopahulay gikan sa tanan nila nga mga kasamok ug tanan nga kabalaka, ug kasubo’ (Alma 40:12). Usa ka dapit nga gitawag og bilanggoan sa espiritu giandam alang ‘niadto kinsa namatay diha sa ilang mga sala, walay kahibalo sa kamatuoran, o sa kalapasan, nagsalikway sa mga propeta. (D&P 138:32). Ang mga espiritu sa bilanggoan ‘gitudloan sa hugot nga pagtuo sa Dios, paghinulsol sa sala, sa puli nga bunyag alang sa kapasayloan sa mga sala, sa gasa sa Espiritu Santo pinaagi sa pagpandong sa mga kamot, ug tanan nga ubang mga baruganan sa ebanghelyo nga gikinahanglan alang kanila nga mahibaloan’ (D&P 138:33–34). Kon dawaton nila ang mga baruganan sa ebanghelyo, maghinulsol sa ilang mga sala, ug modawat sa mga ordinansa nga gipahigayon alang sa ilang katungod didto sa mga templo, sila pagaabi-abihon sa paraiso” (Matinud-anon sa Tinuhoan: Usa ka Pakisayran sa Ebanghelyo [2004], 85 ).

Alma 40:13–14. Kawanangan sa kangitngit

Sa dihang migamit si Alma sa mga pulong nga “kawanangan sa kangitngit,” siya nagpasabut sa temporaryo nga dapit human didto sa kalibutan sa espiritu diin ang dautan mohulat alang sa pagkabanhaw (tan-awa sa Alma 40:13–14). Ang ubang mga propeta nagpasabut niining dapita nga usa ka bilanggoan (tan-awa sa 1 Pedro 3:18–20; D&P 76:73; 138:28–42).