Alma 8

Pasiuna

Pagkahuman sa daghan nga mga tawo nga midawat sa mensahe ni Alma didto sa Zarahemla, Gideon, ug sa Melek, ang katawhan sa Ammonihah wala midawat ni Alma ug misalikway kaniya gikan sa ilang siyudad. Samtang si Alma nagbangutan tungod sa kadautan niining mga tawhana, ang sama nga anghel nga mipakita kaniya ug sa anak nga mga lalaki ni Mosiah miadto pag-usab kaniya. Ang anghel midayeg ni Alma sa iyang kamatinud-anon ug mimando kaniya sa pagbalik ngadto sa Ammonihah. Si Alma matinud-anon nga misunod sa mga sugo sa Ginoo, ug ang Ginoo mitawag ni Amulek aron sa pagtabang kaniya sa iyang pagpangalagad. Si Alma ug Amulek matinud-anong misugod sa pagtudlo sa katawhan sa Ammonihah, napuno sa Espiritu Santo ug gahum aron sa paghimo sa buhat sa Ginoo.

Mga Sugyot alang sa Pagtudlo

Alma 8:1–6

Daghan sa mga tawo sa Melek ang midawat sa mensahe ni Alma ug nabunyagan

Hangyoa ang mga estudyante sa pag-isa sa ilang mga kamot kon sila aduna bay paryente o higala nga nagserbisyo og misyon alang sa Simbahan. Dapita ang duha o tulo ka mga estudyante sa pagpakigbahin og kasinatian nga ang ilang paryente o higala misaysay kanila nga makita kon unsa ang gibati sa mga misyonaryo sa dihang gidawat ang ilang mensahe. (Mahimo usab nimong ikonsiderar ang pagdapit sa mga estudyante sa pagsulti mahitungod sa mga higayon sa dihang adunay tawo nga andam nga modawat sa ilang mga paningkamot sa pagpakigbahin sa ebanghelyo. Mahimong ikaw usab gustong mopakigbahin og usa ka kasinatian nga imong kaugalingon.)

Dapita ang mga estudyante sa pagbasa sa hilum sa Alma 8:1–5. Ipaila kanila ang tulo ka mga siyudad diin gisangyaw ni Alma ang ebanghelyo. Isulat ang mga pangalan niining tulo ka mga siyudad diha sa pisara. (Zarahemla, Gideon, ug Melek.)

Unsa ang mga resulta sa pagsangyaw ni Alma niining tulo ka mga siyudad? (Mahimo nimong isugyot nga ang mga estudyante mo-refer ngadto sa mga summary sa kapitulo sa Alma 6–8 aron matabangan sila nga matubag kining pangutana.)

Ipasabut nga bisan og ang katawhan niining mga siyudad midawat sa mensahe ni Alma, ang iyang misyonaryo nga pagserbisyo naa gihapoy mga hagit.

Alma 8:7–32

Pagkahuman nga gisalikway si Alma sa Ammonihah, ang Ginoo misugo kaniya sa pagbalik

Pangutan-a ang mga estudyante kon ang ilang mga paryente o mga higala kinsa nagserbisyo og full-time nga mga misyon nakakita na ba og mga tawo nga wala modawat sa mensahe sa ebanghelyo. Ikonsiderar ang pagdapit og pipila ka mga estudyante sa pagsulti mahitungod kon unsay reaksyon sa ilang mga paryente o mga higala sa ingon nga mga kasinatian.

Dapita ang pipila ka estudyante nga magpuli-puli sa pagbasa og kusog sa Alma 8:7–14. Awhaga ang klase sa paghunahuna mahitungod kon unsa ang gibati ni Alma samtang misulay siya sa pagtudlo sa ebanghelyo ngadto sa katawhan sa Ammonihah. Samtang nagbasa ang mga estudyante niining mga bersikulo, pahunonga sila panagsa aron matubag ang mga pangutana sama sa mosunod:

Unsa man ang gisulti niini nga mga bersikulo ngari kanato mahitungod sa kinaiya ni Alma? (Tan-awa sa Alma 8:8–10.)
Unsa kaha ang inyong reaksyon ngadto sa mga pagtratar nga nadawat ni Alma? (Tan-awa sa Alma 8:11–13.)
Sa unsang paagi nga ang reaksyon ni Alma susama o lahi gikan sa inyohang reaksyon sa sama nga sitwasyon? (Tan-awa sa Alma 8:14. Mahimo nimong isugyot nga ang desisyon ni Alma sa pagpadayon sa buhat sa Ginoo didto sa siyudad sa Aaron nagpakita nga siya adunay hugot nga pagtuo sa Ginoo ug nga siya wala moundang.)

Ipasabut nga bisan og sinsero ang mga pag-ampo ni Alma alang sa katawhan sa Ammonihah (tan-awa sa Alma 8:10), ang iyang mga hangyo wala diha dayon gitugot. (Ang pipila ka tawo sa Ammonihah naghinulsol sa kaulahian. Tan-awa sa Alma 14:1.)

Basaha ang mosunod nga pamahayag ni Elder Russell M. Nelson sa Korum sa Napulog Duha ka mga Apostoles:

“Nahibaloan nako nga usahay, ang atong ubang labing mainiton nga pag-ampo ingon og wala tubaga. Kita matingala, ‘Ngano?’ Nasayud ako niana nga pagbati! Nasayud ako sa mga kahadlok ug mga luha sa maong mga higayon. Pero nasayud usab ako nga ang atong mga pag-ampo dili ibaliwala. Dili mahitabo nga ang atong pagtuo dili mamatikdan. Nasayud ako nga ang panglantaw sa maalamon nga Langitnong Amahan mas klaro kay sa atoa. Samtang nakahibalo kita sa atong mortal nga mga problema ug kasakit, nasayud Siya sa atong imortal nga kauswagan ug potensyal” (“Jesukristo—Gamhanang Tig-ayo,” Ensign o Liahona, Nob. 2005, 86).

Unsa ang gitudlo ni Elder Nelson nga makatabang kanato nga makaangkon og hugot nga pagtuo bisan kon ang matarung nato nga mga pag-ampo dili dayon matubag o sa paagi nga atong gilauman o gidahum?

Dapita ang usa ka estudyante sa pagbasa og kusog sa Alma 8:14–17. Hangyoa ang klase sa pagsunod, nga mangita sa makahupay nga mga mensahe sa mga pulong sa anghel ug sa mga sugo nga tingali lisud tumanon alang kang Alma.

Sa unsang paagi nga ang mga pulong diha sa Alma 8:15 makahupay ngadto ni Alma? Sa unsang paagi nga ang mga pulong sa anghel makahupay nganha kaninyo?
Nganong lisud alang kang Alma nga magmasulundon sa ingon niining sitwasyon?

Ipabasa sa mga estudyante ang Alma 8:18, nga mangita sa pulong nga naghulagway sa reaksyon ni Alma ngadto sa sugo sa Ginoo sa pagbalik ngadto sa siyudad sa Ammonihah. (Mahimo nimong isugyot nga markahan sa mga estudyante ang pulong nga pagdali.)

Unsa ang atong makat-unan mahitungod ni Alma gikan sa pagkatinuod nga siya mibalik nga nagdali ngadto sa Ammonihah?

Basaha ang mosunod nga pamahayag ni Presidente Henry B. Eyring sa Unang Kapangulohan. Hangyoa ang mga estudyante sa pagpaminaw kon sa unsang paagi nga kita makabenepisyo kon magdali sa pagsunod sa Ginoo:

“Bisan pa man unsa ang gidak-on sa pagtuo sa pagsunod sa Dios nga anaa kanato karon, kinahanglan kitang magpadayon sa paglig-on niini ug kanunay kining palagsikon. Ato kanang mabuhat pinaagi sa pagdesisyon karon nga mahimong mas abtik sa pagtuman ug mas determinado nga molahutay. Ang pagkat-on sa pagsugod og sayo ug magmakanunayon mao ang mga yawe sa espirituhanong pagpangandam. …

“… Ang usa ka mahigugmaong Langitnong Amahan ug ang Iyang Pinalanggang Anak mihatag kanato sa tanang tabang nga Ilang mahatag aron makapasar sa pagsulay sa kinabuhi nga giandam alang kanato. Pero kinahanglan kitang modesisyon ug dayon mobuhat niini. Nagpalambo kita sa pagtuo aron makapasar sa mga pagsulay sa pagkamasulundon sulod sa dugayng panahon ug pinaagi sa atong inadlaw-adlaw nga mga pagpili. Makahimo kita sa pagdesisyon karon sa pagbuhat og dali sa bisan unsa nga gisugo sa Dios kanato. Ug makahimo kita sa pagdesisyon nga mahimong makanunayon diha sa ginagmay nga mga pagsulay sa pagkamasulundon nga nagpalambo sa pagtuo nga magdala kanato agi sa dagkong mga pagsulay, nga siguradong moabut” (“Espirituhanong Pagkaandam: Pagsugod og Sayo ug Magmakanunayon,” Ensign, Nob. 2005, 38, 40).

Sumala ni Presidente Eyring, unsa ang mahitabo sa atong pagtuo kon mopili kita nga magdali sa pagsunod sa Ginoo?
Kanus-a nga higayon nga inyong gibati nga ang inyong pagtuo sa Ginoo napalig-on tungod sa inyong dali ug makanunayon nga pagkamasulundon?

Alang sa mosunod nga mga sitwasyon, pangutan-a ang mga estudyante kon sa unsang paagi nga ang dali nga pagsunod makapanalangin kanila:

Sa pagbiya sa usa ka batan-ong babaye paingon sa eskwelahan, ang iyang inahan mihangyo nga magsul-ob siya og tarung nga kamisin.
Diha sa interbyu sa iyang bishop, usa ka priest gihagit sa pag-angkon og Duty to God Award.
Duha ka mga misyonaryo atol sa ilang inadlaw nga sesyon sa pagplano nadasig nga mobisita sa dili kaayo aktibo nga pamilya diin ang inahan dili miyembro sa Simbahan.

Ipasabut nga ang Ginoo mipanalangin ni Alma tungod sa iyang dali nga pagsunod. Dapita ang tulo ka estudyante sa pag-adto sa atubangan sa klase aron dramahon ang panagtagbo ni Alma ug Amulek sa Alma 8:19–26. Ipabasa sa usa ka estudyante ang mga pulong ni Alma, ang ikaduhang estudyante ang mga pulong ni Amulek, ug ang ikatulo nga estudyante ang mga pulong nga nagsulti sa istorya. Awhaga ang mga estudyante nga basahon ang ilang bahin inubanan sa mga emosyon nga sa ilang hunahuna nasinati ni Alma ug Amulek.

Human sa pagdrama, ipangutana:

Giunsa sa pagpanalangin sa Ginoo kang Alma tungod sa pagkamasulundon?
Sa unsang paagi nga ang kasinatian ni Alma uban ni Amulek usa ka pagpakita nga ang Ginoo nakadungog ug mitubag sa mga pag-ampo ni Alma? (Tan-awa sa Alma 8:10.)
Unsa nga baruganan ang atong makat-unan gikan sa kasinatian ni Alma? (Ang mga estudyante mahimong mosulti og lain-laing mga baruganan. Usa sa posibling tubag mao nga kon kita daling motubag sa pulong sa Ginoo, motabang Siya kanato nga masunod ang Iyang mga sugo.)

Dapita ang mga estudyante sa pagbasa sa hilum sa Alma 8:27–32, nga mangita og dugang ebidensya nga kon kita magmatinud-anon ug makugihon, ang Ginoo motabang kanato sa pagsunod sa Iyang mga sugo.

Unsa nga mga hagit ang giatubang ni Alma ug Amulek samtang sila miadto sa pagtudlo sa katawhan? (Tan-awa sa Alma 8:28–29. Ang mga tawo nag-anam og pagkadautan, ug ang Ginoo misugo ni Alma ug Amulek sa pagtawag kanila ngadto sa paghinulsol.)
Giunsa pagtabang sa Ginoo si Alma ug Amulek? (Tan-awa sa Alma 8:30–31. Napuno sila sa Espiritu Santo ug nakadawat og balaanong gahum aron sa pagpanalipod kanila. Mahimo kang mosugyot nga markahan sa mga estudyante ang paghulagway niini nga mga panalangin diha sa ilang mga kasulatan.)
Kanus-a nga higayon nga inyong nabati nga ang Ginoo mitabang kaninyo sa dihang kamo nagmatinud-anon ug nagmakugihon?

Dapita ang mga estudyante sa pagsulat sa mosunod nga pamahayag ni Presidente Howard W. Hunter diha sa mga notebook o mga scripture study journal:

“Sigurado nga ang Ginoo ganahan, labaw pa kay sa bisan unsang butang, sa usa ka walay kausaban nga determinasyon sa pagsunod sa iyang tambag” (“Commitment to God,” Ensign, Nob. 1982, 58).

Dayon hatagi sila og pipila ka minuto sa pagsulat og usa ka tubag ngadto sa mosunod nga pangutana:

Unsang butanga ang inyong buhaton karon aron ipakita sa Langitnong Amahan nga kamo daling mosunod sa Iyang mga tambag ug moserbisyo Kaniya sa matinud-anon ug makugihon nga paagi?

Ipamatuod ang mga panalangin nga atong madawat kon magmatinud-anon kita sa pagsunod sa tambag sa Ginoo. Mahimo usab nimong hatagan ang mga estudyante og oportunidad sa pagpakigbahin sa ilang mga pagpamatuod niining kamatuoran.

Komentaryo ug Background nga Impormasyon

Alma 8:10. “Mainiton nga pag-ampo”

Ang mga pulong nga “mainiton nga pag-ampo” nagpakita og gamhanan, puno sa hugot nga pagtuo nga pagkighinabi uban sa Dios. Si Elder Joseph B. Wirthlin sa Korum sa Napulog Duha ka mga Apostoles misugyot og mga paagi nga kita makatimbang-timbang ug magtinguha sa pagpalambo sa kusog sa atong mga pag-ampo:

“Pwede ba nga mohangyo ako kaninyo karon sa pagkonsiderar sa kaepektibo sa inyong mga pag-ampo? Unsa kasuod ang inyong gibati ngadto sa inyong Langitnong Amahan? Nabati ba ninyo nga natubag ang inyong mga pag-ampo? Nabati ba ninyo nga ang panahon nga inyong gigahin sa pag-ampo nakapalambo ug nakapabayaw sa inyong kalag? Aduna pa bay lawak alang sa kalamboan?

“Adunay daghang mga rason nga ang atong mga pag-ampo kulang sa gahum. Usahay mahimo na lang kining naandan nga buhaton. Ang atong mga pag-ampo mahimong haw-ang kon atong gilitok ang samang pulong nga balik-balik ug sa kanunay ang mga pulong nahimong sinag-ulo imbis nga panag-istorya. Mao kini ang gihulagway sa Manluluwas nga ‘pamulongpulong nga walay kapuslanan’ (Mateo 6:7). Ang ingon nga mga pag-ampo, matud Niya, dili dunggon. …

“Ang inyo bang mga pag-ampo ingon og nagbalik-balik ug bation ninyo nga parehas ra? Nakaampo ba kamo sukad nga dili sinsero, ang mga pulong nga gilitok naingon sa demakina? Laayon ba kamo usahay samtang kamo nag-ampo?

“Ang mga pag-ampo nga wala mangayo og dako sa inyong hunahuna maglisud og kuha og dakong atensyon gikan sa atong Langitnong Amahan. Kon inyong namatngunan ang inyong kaugalingon nga nagbalik-balik na ang inyong mga pag-ampo, hunong ug paghunahuna. Hinuktuki sa makadiyot ang mga butang nga ikaw mapasalamaton kaayo” (“Improving Our Prayers,” [debosyonal nga pakigpulong sa Brigham Young University, Ene. 21, 2003], 2, speeches.byu.edu).