Leksyon 88
Alma 30
Pasiuna
Sunod sa dakong gubat tali sa mga Nephite ug mga Lamanite, ang kalinaw nagpabilin sa tibuok kayutaan. Mga duha ka tuig human niana, usa ka tawo nga ginganlan og Korihor nagsugod sa pagsangyaw nga walay Dios, nga walay Kristo, ug nga walay sala. Mibiay-biay siya sa mga lider sa Simbahan, nagpasangil nga sila nagtudlo og binuang nga mga tradisyon. Ang iyang bakak nga pagtudlo nakadala sa daghang mga tawo sa paghimo og bug-at nga mga sala. Si Korihor gidala sa atubangan ni Alma, kinsa mipamatuod ni Jesukristo ug nagtudlo nga ang tanang butang nagpamatuod sa Labawng Tiglalang. Sa katapusan si Korihor naamang pinaagi sa gahum sa Dios ug nakumbinsir sa kamatuoran. Hinoon, sa dihang siya mihangyo nga ipahiuli ang iyang tingog, si Alma nagdumili sa iyang hangyo, nag-ingon nga siya mousab pa sa pagtudlo og bakak nga doktrina kon siya maulian sa iyang tingog. Si Korihor migahin sa nahabilin sa iyang kinabuhi sa pagpangayo og pagkaon hangtud nga siya nayatak-yatakan sa grupo sa mga Nephite nga mibiya sa kamatuoran nga gitawag og mga Zoramite ngadto na sa iyang pagkamatay.
Mga Sugyot alang sa Pagtudlo
Alma 30:1–18
Si Korihor, usa ka anti-Kristo, misaway sa doktrina ni Kristo
Sa dili pa magsugod ang klase, lungagi og gamay ang lubot sa lata sa softdrink ug pasagdi nga mahurot ang sulod. Ipakita ang lata ngadto sa klase nga dili ipakita nga kini basiyo. Ipangutana kon kinsay ganahan niini ug pila ang gusto nilang ibayad niini. Paduola ang usa ka estudyante sa atubangan, ipahiling ang lata, ug sultihi ang klase unsa ang sulod. (Imbis lata sa softdrink, mahimo kang mogamit usab og bisan unsang basiyo nga kahon, usa ka bag, o usa ka putos nga sagad sudlan og butang nga magustuhan sa mga estudyante.)
-
Sa unsang paagi nga ang bakak nga mga pagtulun-an sama niining lata sa softdrink? (Sa kasagaran kini makapadani sa gawas apan basiyo ang sulod.)
Ipasabut nga sa leksyon karon, ang mga estudyante makakat-on mahitungod sa usa ka tawo nga ginganlan og Korihor. Samtang sila magtuon sa Alma 30, awhaga sila sa pagkonsiderar kon sa unsang paagi nga ang pagtulun-an ni Korihor nagpabilin kaniya ug sa uban nga walay sulod sa espirituhanong paagi.
Sultihi ang mga estudyante nga human sa panahon sa gubat batok sa mga Lamanite, ang katawhan ni Ammon (ang mga Anti-Nephi-Lehi) ug ang mga Nephite misulod sa panahon sa kalinaw. Dayon si Korihor mibalda sa ilang kalinaw. Hangyoa ang mga estudyante sa pagbasa sa Alma 30:6, 12, nga mangita sa pulong nga naghulagway niining tawhana. (Ang pulong mao ang Anti-Kristo. Ipasabut nga ang usa sa kahulugan niining pulonga mao nga “bisan kinsa o bisan unsa nga mahasupak sa tinuod nga ebanghelyo sa laraw sa kaluwasan ug nga dayag o sa tinago misupak kang Kristo” [Giya ngadto sa mga Kasulatan, “Anti-kristo,” scriptures.lds.org].)
(Aron matabangan ang pagpaila kang Korihor ug sa iyang mga pagtulun-an ngadto sa mga estudyante, mahimo nimong ipatan-aw ang usa ka segment sa video, “All Things Denote There Is a God” [time codes 0:00 to 1:14]. Samtang magtan-aw ang mga estudyante sa video, dapita sila sa pagpaminaw alang sa unsa ang gitudlo ni Korihor nga anti-Kristo. Dayon ipahimo sa mga estudyante ang mosunod nga mga kalihokan.)
Andama ang mosunod nga buluhaton isip handout o diha sa pisara sa dili pa magklase. Kon imo kining ibutang sa pisara, hangyoa ang mga estudyante sa pagkopya niini sa ilang mga notebook o mga scripture study journal. Makatabang kini nila nga makita kon unsaon ni Satanas ug kadtong kinsa nag-alagad kaniya sa paggamit ang sayop nga mga doktrina sa pagdani kanato sa pagpakasala.
Bakak nga mga Pagtulun-an ni Korihor ang Anti-Kristo
|
Bakak nga Pagtulun-an |
Mensahe |
|---|---|
|
a. Dili kamo makahibalo sa bisan unsang butang nga tinuod hangtud nga inyo kining makita. Busa, dili kamo masayud nga adunay Kristo. | |
|
2. Alma 30:15 |
b. Walay ingon nga butang nga sala. Walay universal nga sumbanan sa unsay husto o sayop. |
|
3. Alma 30:16 |
c. Ang katawhan mouswag pinaagi sa ilang kaugalingong paningkamot lamang. Walay ingon nga butang nga pag-ula. |
|
4. Alma 30:17 (magsugod sa “matag tawo makasinati …”) |
d. Imposible nga mahibaloan ang mahitungod sa mga butang nga mahitabo sa umaabut, busa dili kamo angay nga motuo ni Kristo o mosunod sa mga pulong sa mga tawo kinsa moingon nga sila mga propeta. |
|
5. Alma 30:17 (magsugod sa “bisan unsa ang buhaton sa tawo …”) |
e. Ang pagpasaylo sa sala usa ka binuang nga ideya nga naggikan sa bakak nga mga tradisyon. |
|
6. Alma 30:18 |
f. Walay kinabuhi human sa kamatayon, busa dili kinahanglan mabalaka mahitungod sa paghukom human niining kinabuhia. |
Ipares-pares ang mga estudyante. Hangyoa sila nga magdungan sa pagbasa sa Alma 30:12–18. Itudlo nila nga ipares ang bakak nga mga pagtulun-an ni Korihor, nga naa sa habig sa wala sa buluhaton, ngadto sa mga mensahe niadtong mga pagtulun-an, nga naa sa habig sa tuo. (Mga tubag: 1–d, 2–a, 3–e, 4–c, 5–b, 6–f.)
Aron matabangan ang mga estudyante sa pag-analisar sa mga pagtulun-an ni Korihor ug magamit unsa ang ilang nakat-unan, ipangutana ang mosunod:
-
Unsa nga mga pagtulun-an nga kamo na-expose na nga susama sa mga pagtulun-an ni Korihor?
-
Sumala sa Alma 30:18, Unsa ang gisangputan sa mga tawo tungod sa mga pagtulun-an ni Korihor?
-
Ngano kaha nga kining mga pagtulun-an nakadala sa mga tawo nga monunot ngadto sa tintasyon?
-
Unsa ang atong makat-unan niining mga bersikulo mahitungod sa mga kakuyaw sa bakak nga mga doktrina? (Tabangi ang mga estudyante sa pag-ila sa mosunod nga baruganan: Si Satanas mogamit og bakak nga mga doktrina aron sa pagdani kanato sa pagpakasala.)
Hangyoa ang mga estudyante sa paghunahuna sa ilang mga kaugalingon sa mosunod nga kahimtang:
Usa ka higala nagdapit nimo ngadto sa usa ka party. Pag-abut nimo didto sa balay sa imong higala, inyong nadiskubrihan nga daghang bisita nga dili ligdong ang sinina, dunay dili tukma nga nagtukar nga mga musika, ug ang mga bisita naggamit og mga butang nga supak sa Pulong sa Kaalam. Sa dihang nagduha-duha ka nga magpabilin sa party, ang imong higala mihangyo nimo sa pagpasabut kon nganong dili ka gustong magpabilin.
-
Unsay imong isulti? (Tingali ang mga estudyante mopasabut nga ang mga kalihokan ug palibut sa party nakalapas sa sumbanan sa ilang pagtuo.)
-
Kon ang imong higala magsugod sa pagpanaway nimo o sa imong pagtuo, nga mag-ingon nga ilang gilimitahan ang imong kagawasan, unsay imong itubag?
Alma 30:19–60
Si Korihor nangayo og timailhan gikan ni Alma ug mao nga naamang pinaagi sa gahum sa Dios
I-summarize ang Alma 30:19–30 pinaagi sa pagpasabut nga si Korihor nagtudlo og bakak nga mga doktrina sa tulo ka managlahi nga siyudad sa Nephite. Sa katapusan, siya gidala sa atubangan sa labaw nga maghuhukom sa yuta ug sa atubangan ni Alma, kinsa mao ang lider sa Simbahan. Mahimo nimong ipasabut nga usa sa dakong argumento ni Korihor mao nga ang mga lider sa Simbahan miulipon sa mga tawo—nga ang ilang relihiyon mikuha sa kagawasan sa katawhan. Giakusahan usab niya ang mga lider sa Simbahan sa pagtinguha og personal nga kaayohan gikan sa kahago sa mga tawo.
(Imbis mag-summrize sa Alma 30:19–30, mahimo nimong ipasalida ang laing segment sa “All Things Denote There Is a God” [time codes 1:14 to 5:22]. Hangyoa ang mga estudyante sa pagpaminaw sa mga rason nga gihatag ni Korihor sa pagtudlo niining mga butanga ngadto sa mga tawo.)
Hangyoa ang mga estudyante sa pagbasa sa hilum sa Alma 30:31, nga mangita sa mga pasangil ni Korihor batok ni Alma ug sa ubang mga lider sa Simbahan.
Dapita ang mga estudyante sa pagbasa sa Alma 30:32–35 sa pagdiskubre kon giunsa pagtubag ni Alma si Korihor.
-
Sa unsang paagi nga inyong nakita ang katinuod sa tubag ni Alma sa mga kinabuhi sa mga lider sa Simbahan?
Dapita ang duha ka mga estudyante ngadto sa atubangan sa klase. Hangyoa sila sa pagbasa og kusog sa Alma 30:37–45, nga ang usa magbasa sa mga pulong ni Alma ug ang usa magbasa sa mga pulong ni Korihor. Dapita ang uban sa klase sa pagpangita sa unsay gipakita ni Alma nga ebidensya sa buhi nga Dios.
(Imbis magdapit og duha ka mga estudyante sa pagbasa sa Alma 30:37–45 diha sa atubangan sa klase, mahimo nimong ipasalida ang laing segment sa “All Things Denote There Is a God” [time codes 5:22 hangtud 7:30]. Dapita ang klase sa pagpangita sa unsay gipakita ni Alma nga ebidensya sa buhi nga Dios.)
-
Unsa nga mga ebidensya ang nahatag ni Alma nga buhi ang Dios? (Samtang motubag ang mga estudyante, mahimo nimong isulat sa pisara ang ilang mga tubag. Mahimo usab nimong awhagon ang mga estudyante sa pagmarka niini diha sa ilang mga kasulatan. Isip kabahin niini nga hilisgutan, ipasabut og maayo nga ang tanang butang nagpamatuod sa Dios.)
-
Sa unsang paagi nga ang tubag ni Alma nagpawalay bili sa bakak nga mga pagtulun-an ni Korihor?
-
Sa mga ebidensya nga nalista ni Alma, hain ang labing gamhanan para ninyo? Ngano man?
Hatagi ang mga estudyante og pipila ka minuto sa pagsulat. Hangyoa sila sa paglista sa mga ebidensya nga ilang nakita nga “nagpasabut nga dunay Dios” (Alma 30:44). Pagdapit og pipila ka mga estudyante nga mopakigbahin sa ilang mga nalista diha sa klase.
-
Sa unsang paagi nga kining mga ebidensya nakaimpluwensya kaninyo? Unsa ang mga paagi nga kini makapalig-on sa inyong pagtuo ug pagpamatuod?
I-summarize ang Alma 30:46–50 pinaagi sa pagpasabut nga si Korihor, nga wala gihapon midawat sa mga timailhan nga nahatag, mibungat nga pakit-on siya ni Alma og usa ka timailhan nga buhi ang Dios. Agi og tubag, si Korihor naamang pinaagi sa gahum sa Dios.
(Imbis mag-summrize sa Alma 30:46–50, mahimo nimong ipasalida ang “All Things Denote There Is a God” [time codes 7:30 hangtud 11:17]. Hangyoa ang mga estudyante sa pagpangita sa pagpili ni Korihor ug unsa ang nahitabo isip resulta.)
Dapita ang usa ka estudyante sa pagbasa og kusog sa Alma 30:51–53. Hangyoa ang mga estudyante sa pagpangita sa unsay gisulat ni Korihor mahitungod kon nganong nagtudlo siya batok sa Dios nga Amahan ug ni Jesukristo.
-
Unsa kaha ang gipasabut ni Korihor sa dihang miingon siya nga nagtudlo siya sa mga butang nga “nakapahimuot ngadto sa kalibutanon nga hunahuna”? (Mahimo nimong ipasabut nga ang mga pagtulun-an ni Korihor nakapadani sa dili matarung nga pisikal nga mga tinguha sa mga tawo kay sa ilang matarung nga espirituhanong mga tinguha )
I-summarize ang Alma 30:54–59 pinaagi sa pagpasabut nga si Korihor mihangyo ngadto ni Alma sa pag-ampo aron ang tunglo matangtang gikan kaniya. May mga panahon nga ang Ginoo maghatag ngadto sa Iyang mga anak og dugang nga mga oportunidad sa pagdawat sa kamatuoran (tan-awa sa Alma 15:1–12). Hinoon, dinhi niining kahimtang si propeta Alma nakasabut nga kon si Korihor makadawat og abilidad sa pagpamulong, siya magtudlo pag-usab sa bakak nga doktrina ngadto sa mga tawo. Gisalikway si Korihor ug miadto sa mga balay-balay, nagpangayo og pagkaon. Sa katapusan miadto siya sa mga Zoramite, kinsa nabulag gikan sa mga Nephite, ug gitunob-tunoban hangtud siya namatay.
Hangyoa ang mga estudyante sa pagbasa sa hilum sa Alma 30:60, nga mangita sa baruganan nga gitudlo ni Mormon.
-
Unsa nga baruganan ang gitudlo ni Mormon? (Ang mga estudyante kinahanglang mahibalo sa mosunod nga baruganan: Ang yawa dili mosuporta sa iyang mga anak [iyang sumusunod] sa katapusan nga adlaw.)
-
Unsay nakalahi niini gikan sa paagi nga ang Langitnong Amahan ug si Jesukristo nag-amuma kanato? (Samtang naghisgot ang mga estudyante niining pangutana, mahimo nimong dapiton sila sa pagbasa sa Alma 36:3.)
Pagpamatuod sa mga kamatuoran nga inyong nahisgutan dinhi niining leksyon.
Komentaryo ug Background nga Impormasyon
Alma 30:52. “Ako sa kanunay nasayud nga adunay Dios”
Si Elder Robert D. Hales sa Korum sa Napulog Duha ka mga Apostoles mitudlo mahitungod sa kaimportante sa pag-ila sa mga timailhan nga atong nadawat kabahin sa katinuod sa ebanghelyo:
“Kon kita dili monunot ngadto sa malumo nga impluwensya sa Espiritu Santo, namiligro kita nga mahimong sama ni Korihor, usa ka anti-Kristo diha sa Basahon ni Mormon. Dili lamang kay si Korihor wala motuo og Dios, apan iya usab nga gibugal-bugalan ang Manluluwas, ang Pag-ula, ug ang espiritu sa panagna, sayop nga nagtudlo nga walay Dios ug walay Kristo.
“Si Korihor wala makontento sa pagsalikway lamang sa Dios ug sa hilum mihimo og kaugalingon niyang paagi. Iyang gibugal-bugalan ang mga tumutuo ug namugos nga si propetang Alma mosiguro kaniya og timailhan sa pagkaanaa ug sa gahum sa Dios. Ang tubag ni Alma makahuluganon karon sama kini sa kaniadto: ‘Ikaw aduna nay igo nga mga timailhan; ikaw mosulay ba sa imong Dios? Ikaw moingon ba, Ipakita ngari kanako ang usa ka timailhan, nga ikaw aduna sa pagpamatuod sa tanan niini nga imong mga kaigsoonan, ug usab sa tanan nga balaan nga mga propeta? Ang mga kasulatan gibukhad sa imong atubangan, oo, ug ang tanan nga mga butang nagpakita nga adunay Dios; oo, bisan ang yuta, ug ang tanan nga mga butang nga anaa sa ibabaw niini, oo, ug ang paglihok niini, oo, ug usab ang tanan nga mga planeta diin naglihok sa ilang naandan nga paagi nagsaksi nga adunay Makagagahum nga Tiglalang.’ [Alma 30:44.]
“Sa katapusan si Korihor gihatagan og timailhan. Siya naamang. Ug si Korihor mipahiluna sa iyang kamot ug misulat, nag-ingon: … Ako nasayud nga walay lain gawas sa gahum sa Dios ang makadala niini ngari kanako; oo, ug ako sa kanunay nasayud nga adunay Dios.’ [Alma 30:52.]
“Mga kaigsoonan, tingali nakahibalo na kamo, sa kinahiladman sa inyong kalag, nga ang Dios buhi. Tingali kamo wala makahibalo sa tanan mahitungod Kaniya ug wala makasabut sa tanan Niya nga mga pamaagi, apan ang kahayag sa pagtuo anaa sulod kaninyo, naghulat nga pukawon ug palig-unon pinaagi sa Espiritu sa Dios ug sa Kahayag ni Kristo, diin ikaw natawo uban niini” (“Nagpangita aron Makaila sa Dios, Atong Langitnong Amahan, ug sa Iyang Anak, si Jesukristo,” Ensign o Liahona, Nob. 2009, 31–32).