Leksyon 92
Alma 34–35
Pasiuna
Human si Alma mitudlo sa mga Zoramite aron motuo sa Anak sa Dios, si Amulek mipahayag sa iyang kaugalingong pagpamatuod mahitungod ni Jesukristo, nga naghatag og ikaduhang pagsaksi. Si Amulek, ang kompanyon ni Alma, mipasabut og maayo nga ang Pag-ula ni Jesukristo gikinahanglan alang sa kaluwasan sa tanang katawhan ug ang mga indibidwal makadawat sa tanan nga mga panalangin sa Pag-ula kon sila mopakita og hugot nga pagtuo ngadto sa paghinulsol. Daghang mga Zoramite naminaw sa pagdapit ni Amulek sa paghinulsol. Sa dihang ang mahinulsulon nga mga Zoramite gisalikway gikan sa yuta pinaagi sa ilang dautan nga mga magmamando ug mga pari, ang mga Nephite ug ang katawhan ni Ammon mihatag kanila og pagkaon, sinina, ug mga yuta alang sa ilang kabilin. Isip resulta, ang mga Lamanite ug ang dili mahinulsulon nga mga Zoramite misugod sa pagpangandam alang sa gubat batok sa mga Nephite ug sa katawhan ni Ammon.
Mga Sugyot alang sa Pagtudlo
Alma 34:1–14
Si Amulek nagtudlo sa mga Zoramite mahitungod sa Pag-ula ni Jesukristo
Isulat ang mosunod nga mga pamahayag diha sa pisara sa dili pa magklase. Hangyoa ang mga estudyante sa pagsulat diha sa mga notebook o piraso sa papel kon sila nagtuo nga ang matag pamahayag tinuod o sayop.
-
Sa dihang si Jesukristo miula alang sa mga sala sa katawhan, Siya nag-antus lamang alang sa matarung nga katawhan.
-
Ang tanang mga tawo nagkinahanglan sa Pag-ula aron maluwas.
-
Si bisan kinsa nga tawo mahimong moula o mobayad sa mga sala sa laing tawo.
Human ang mga estudyante nakagahin og panahon sa pagrekord sa ilang mga tubag, pahinumdumi sila nga si Alma mitudlo sa grupo sa mga Zoramite kon unsaon sa pagdawat sa pulong sa Dios ug pagpakita sa hugot nga pagtuo kang Jesukristo (tan-awa sa Alma 32–33). I-summarize ang Alma 34: 1–7 pinaagi sa pagpasabut nga si Amulek misunod ni Alma pinaagi sa pagpakigbahin sa iyang kaugalingong pagpamatuod mahitungod sa Manluluwas. Hangyoa ang mga estudyante sa pagsiksik sa hilum sa mga pagtulun-an ni Amulek sa Alma 34: 8–9, 11, nga motino sa mga pulong nga nagpakita kon ang matag pamahayag sa pisara husto ba o sayop. Dayon ribyuha ang mga pamahayag isip usa ka klase. Ang sakto nga mga tubag mao:
-
Sayop—“Siya moula sa iyang dugo alang sa mga sala sa kalibutan” (Alma 34: 8).
-
Tinuod—“Kinahanglan gayud nga adunay pag-ula nga pagahimoon, o kon dili ang tanan nga mga katawhan dili makalikay nga mamatay” (Alma 34:9).
-
Sayop—“Walay usa ka tawo nga makahimo sa pagsakripisyo sa pag-ula sa iyang kaugalingon nga dugo alang sa mga sala sa uban”. (Alma 34:11).
Human mahisguti sa mga estudyante ang tubag sa ika-3 nga pamahayag, ipangutana:
-
Ngano kaha nga si Jesukristo mao lang ang bugtong makaula alang sa mga sala sa kalibutan?
Aron matabangan ang mga estudyante nga matubag kining pangutana, dapita sila sa pagbasa sa hilum sa Alma 34:10, 14. Dayon basaha ang mosunod nga mga pamahayag ni Elder Russell M. Nelson sa Korum sa Napulog Duha ka mga Apostoles:
“Ang Iyang Pag-ula walay kinutuban—walay katapusan. Wala usab kini kinutuban diha sa pagluwas sa tanang katawhan gikan sa walay katapusan nga kamatayon. Wala kini kinutuban sa paagi nga dili masukod ang Iyang pag-antus. … Walay kinutuban ang kalapdon niini—kinahanglan kausa lamang kining buhaton alang sa tanan. Ug ang kalooy sa Pag-ula makaabut dili lang sa walay kinutuban nga gidaghanon sa mga tawo, apan ngadto usab sa walay kinutuban nga gidaghanon sa mga kalibutan nga Iyang gilalang. Wala kini kinutuban lapas pa sa bisan unsang pagsukod sa tawo o mortal nga salabutan.
“Si Jesus mao lamang ang bugtong ikahalad sa ingon nga pag-ula nga walay kinutuban, gumikan kay gipakatawo Siya sa mortal nga inahan ug usa ka imortal nga Amahan. Tungod nianang kalahi nga katungod sa pagkatawo, si Jesus mao ang walay kinutuban nga Nilalang,” ( “The Atonement,” Ensign, Nob. 1996, 35).
“Sumala sa mahangturong balaod, ang pag-ula nagkinahanglan og personal nga pagsakripisyo sa usa ka imortal nga dili ulipon sa kamatayon. Gani Siya kinahanglang mamatay ug mopabangon pag-usab sa Iyang kaugalingong lawas. Ang Manluluwas mao ang bugtong tawo nga makatuman niini. Gikan sa Iyang inahan Siya nakapanunod sa gahum nga mamatay. Gikan sa Iyang Amahan Siya nakabaton og gahum batok sa kamatayon” (“Constancy amid Change,” Ensign, Nob. 1993, 34).
-
Sa unsang paagi nga ang mga pagtulun-an ni Amulek ug ang mga pamahayag ni Elder Nelson makatabang kanato nga masabtan kon ngano nga si Jesukristo mao lamang ang bugtong makaula sa mga sala sa kalibutan?
-
Unsaon ninyo pag-summarize kon unsa ang inyong nakat-unan gikan sa Alma 34 mahitungod sa Pag-ula ni Jesukristo? (Ang mga estudyante mahimong mosugyot sa ubang mga kamatuoran, apan siguroha nga sila makasabut nga ang walay kinutuban ug mahangturong Pag-ula ni Jesukristo nakapahimong posible sa kaluwasan alang sa tanang katawhan.)
Aron matabangan ang mga estudyante nga mas mapasalamaton pa sa panginahanglan sa Pag-ula diha sa plano sa Langitnong Amahan bahin sa kaluwasan, ikonsiderar ang paggamit sa mosunod nga kalihokan. Mahimo nimong ipahaum kini nga kalihokan aron makab-ot ang mga panginahanglan ug interes sa mga estudyante nga imong gitudloan.
Isulat ang mosunod nga mga pulong diha sa pisara: Hunahunaa ang kinabuhi nga walay …
Guniti pataas ang usa ka butang nga bililhon sa daghang batan-on (sama sa cell phone) ug ipangutana:
-
Unsay inyong mahunahuna sa kinabuhi kon wala kining butanga?
Sunod, guniti pataas ang usa ka botelya o baso nga naay tubig (o butang nga importante sa pagpatunhay sa kinabuhi).
-
Unsa kaha ang mahitabo sa kinabuhi kon walay tubig?
Human makahisgot ang mga estudyante sa kaimportante sa tubig, kompletuha ang pamahayag diha sa pisara aron mabasa kini sama sa mosunod: Hunahunaa ang kinabuhi kon wala ang Pag-ula ni Jesukristo.
-
Unsay kalainan sa kinabuhi kon wala ang Pag-ula ni Jesukristo? (Hatagi ang mga estudyante og panahon sa pagpamalandong niining pangutana sa dili pa mangayo sa mga tubag. Kon itugot sa panahon, mahimo nimong dapiton sila sa pagsulat sa mga tubag niining pangutana.)
Alma 34:15–41
Si Amulek nagtudlo sa mga Zoramite unsaon sa pagpakita og hugot nga pagtuo ngadto sa paghinulsol
Ipasabut nga bisan og si Jesukristo mihimo sa Pag-ula alang sa tanang katawhan, dili awtomatik nga atong madawat ang tanang panalangin niini. Si Amulek mitudlo kon unsay gikinahanglan natong buhaton aron makadawat sa tanang mga panalangin nga anaa pinaagi sa Pag-ula. Dapita ang mga estudyante sa pagbasa sa hilum sa Alma 34: 15–17 ug motino sa mga pulong nga gisulit ni Amulek sa kaupat ka higayon. (“Hugot nga pagtuo ngadto sa paghinulsol.”)
-
Unsa man ang atong makat-unan gikan sa Alma 34:15–17 mahitungod sa unsa gayud ang atong buhaton aron makadawat sa hingpit nga mga panalangin sa Pag-ula? (Siguroha nga ang mga estudyante nakasabut nga aron makadawat sa hingpit nga mga panalangin sa Pag-ula, kita kinahanglang magpakita og hugot nga pagtuo ngadto sa paghinulsol.)
-
Sa inyong hunahuna unsay gipasabut sa pagpakita og hugot nga pagtuo ngadto sa paghinulsol?
Aron matabangan ang mga estudyante nga masabtan ang ipasabut sa pagpakita og hugot nga pagtuo ngadto sa paghinulsol, basaha ang mosunod nga pamahayag ni Presidente Dieter F. Uchtdorf sa Unang Kapangulohan:
“Nagkinahanglan kita og lig-on nga pagtuo ni Kristo aron makahimo sa paghinulsol. … Ang pagtuo diha kang Kristo mousab sa atong mga hunahuna, mga gituohan, ug mga kinaiya nga wala mahiuyon sa kabubut-on sa Dios. … Ang paghinulsol nagpasabut og kausaban sa hunahuna ug kasingkasing—mohunong kita sa pagbuhat sa mga butang nga sayop, ug mosugod kita sa pagbuhat sa mga butang nga matarung” (“Punto sa Luwas nga Pagbalik,” Ensign o Liahona, Mayo 2007, 100).
-
Nganong importanting masabtan nga ang paghinulsol nagkinahanglan nga dili lamang kita mohunong sa pagbuhat niana nga sayop, apan mosugod kita sa pagbuhat sa mga butang nga matarung?
-
Sumala sa Alma 34: 16, unsa ang mga resulta kon kita magpakita og hugot nga pagtuo ngadto sa paghinulsol?
-
Unsa ang mahitabo kon kita dili magpakita og hugot nga pagtuo ngadto sa paghinulsol? (Mahimo nimong ipasabut nga ang “walay panalipod sa tibuok balaod nga gipangayo sa kaangayan” nagpasabut sa pag-antus sa tibuok sangputanan sa atong mga sala ug mawala ang panalangin sa kinabuhing dayon.)
-
Sumala sa Alma 34:17, unsa ang usa ka butang nga atong mabuhat aron sa pagpakita og hugot nga pagtuo ngadto sa paghinulsol?
Dapita ang mga estudyante sa pagbasa sa hilum sa Alma 34:17–28. Hangyoa sila sa pagpangita kon unsay gitudlo ni Amulek sa mga Zoramite mahitungod sa pag-ampo, lakip na kon kanus-a mag-ampo ug unsa ang i-ampo.
-
Unsa ang gitudlo ni Amulek mahitungod sa pag-ampo nga may kalabutan sa inyong kinabuhi? Ngano kaha nga ang pag-ampo importante nga bahin sa pagpakita og hugot nga pagtuo ngadto sa paghinulsol?
-
Si Amulek miingon nga ang atong mga pag-ampo dili nato mapuslan, o walay gamit, kon dili kita motabang niadtong nagpalibut kanato (tan-awa sa Alma 34:28). Ngano kahang tinuod man kini?
Aron matabangan ang mga estudyante sa pagkonsiderar og dugang nga mga paagi nga kita makapakita og hugot nga pagtuo ngadto sa paghinulsol, hangyoa sila sa pagtubag sa mosunod nga mga panag-ingnan:
-
Usa ka batan-ong lalaki nakapalambo og batasan sa paggamit sa dili angay nga pinulongan. Unsa ang pipila ka paagi nga siya makapakita og hugot nga pagtuo ngadto sa paghinulsol aron mahimong gawasnon niini nga batasan? (Ang mga tubag mahimong maglakip sa pag-ampo alang sa tabang, paghangyo sa mga sakop sa pamilya ug mga higala alang sa tabang, ug pag-apil sa mga kalihokan nga magdapit sa Espiritu.)
-
Usa ka batan-ong babaye ug batan-ong lalaki nalambigit sa dili angay nga pagpakigrelasyon. Nabati nila ang Espiritu Santo nga nag-aghat kanila nga tapuson diha-diha dayon ang ilang relasyon. Sa unsang paagi kaha ang pagsunod niining pag-aghat nagpakita og hugot nga pagtuo ngadto sa paghinulsol? Unsa pay laing lakang nga tingali ilang gikinahanglan aron masiguro nga anaa sila sa dalan sa hingpit nga paghinulsol? (Ang mga tubag mahimong maglakip sa pagpangayo og giya gikan sa bishop o branch president ug sa pag-ampo alang sa kalig-on ug kapasayloan.)
-
Unsay buot ipasabut sa paglangay? Unsay pipila ka mga rason nganong ang mga tawo maglangay?
Dapita ang mga estudyante sa pagbasa sa hilum sa Alma 34:33, nga mangita og usa ka butang nga gipasidaan ni Amulek sa mga Zoramite nga dili maglangay sa pagbuhat . Dapita ang pipila ka estudyante nga magpuli-puli sa pagbasa og kusog sa Alma 34:32–35. Samtang sila magbasa, ipapangita sa klase ang mga sangputanan sa paglangay-langay sa atong paghinulsol. Samtang magreport ang mga estudyante sa unsay ilang nakat-unan, isulat sa pisara ang mosunod nga kamatuoran: Kini nga kinabuhi mao ang panahon alang kanato sa pag-andam sa pagsugat sa Dios.
-
Unsaon man ninyo sa pagpasabut niini nga kamatuoran ngadto sa usa ka tawo?
-
Hunahunaa nga ikaw adunay usa ka higala nga mituyo sa pagsupak sa pipila ka sugo apan nagplano nga maghinulsol sa kaulahian. Unsa ang inyong itudlo niining higala base sa unsa ang inyong nakat-unan sa Alma 34:32–35?
Ipasabut nga si Amulek wala lang nagpasidaan sa mga sangputanan sa paglangay-langay sa paghinulsol; gitudlo usab niya ang mahitungod sa mga panalangin sa pagpili sa paghinulsol karon. Dapita ang mga estudyante sa pagbasa sa hilum sa Alma 34:30–31 ug motino niini nga panalangin.
-
Sa Alma 34:31, unsa nga kasiguraduhan ang ihatag niadtong maghinulsol karon? (“Diha-diha dayon ang mahinungdanong plano sa katubsanan mapadangat nganha kaninyo.”)
Basaha ang mosunod nga pamahayag ni Presidente Boyd K. Packer sa Korum sa Napulog Duha ka mga Apostoles:
“Wala gikinahanglan nga mahibaloan ninyo ang tanang butang sa dili pa moepekto diha kaninyo ang gahum sa Pag-ula. Pagbaton og hugot nga pagtuo kang Kristo; magsugod kini sa pag-epekto sa adlaw nga inyo kining pangayoon!” (“Washed Clean,” Ensign, Mayo 1997, 10.
-
Sa unsang paagi nga ang pagsabut niini nga kasiguraduhan makatabang kanato? Sa unsang paagi kamo mibati nga ang Pag-ula nagsugod sa paglihok alang kaninyo sa dihang kamo nagsugod sa pagsalig niini?
Basaha ang mosunod nga pamahayag ni Presidente Harold B. Lee: Hangyoa ang mga estudyante sa pagpaminaw sa unsay gitawag ni Presidente Lee nga “ang labing importante nga sugo.”
“Karon, kon kamo nakahimo og mga sayop, himoa karon nga sinugdanan sa kausaban sa inyong mga kinabuhi. Biya sa mga butang nga inyong kanunay gibuhat nga sayop. Ang labing importante sa tanang mga sugo sa Dios mao kana ang pinakalisud ninyong sundon karon. Kon kini bahin sa pagkadili matinuoron, kon kini bahin sa pagkadili putli, kon kini bahin sa pagpamakak, dili mosulti sa kamatuoran, karon mao ang adlaw alang kaninyo sa pagpaningkamot niana hangtud kamo makabuntog niana nga kahuyang. … Buntuga kana ug dayon sugdi ninyo ang sunod nga pinakalisud ninyong sundon” (Mga Pagtulun-an sa mga Presidente sa Simbahan: Harold B. Lee [2000], 36).
-
Sumala ni Presidente Lee, unsa ang labing importante nga sugo? Ngano man?
Isulat sa pisara ang mosunod nga dili kompleto nga mga pamahayag. Hangyoa ang mga estudyante sa pagkompleto niini diha sa ilang mga notebook o scripture study journal.
Karon, ang labing importante nga sugo alang kanako mao ang …
Magsugod ko karon sa pagpakita og hugot nga pagtuo ngadto sa paghinulsol pinaagi sa …
Alma 35
Ang mahinulsulon nga mga Zoramite mipuyo uban sa matarung
I-summarize ang Alma 35 pinaagi sa pagpasabut nga daghan nga mga Zoramite ang naghinulsol sa ilang mga sala. Gisalikway sila gikan sa yuta sa ilang dautan nga mga magmamando ug mga pari, ug sila miadto aron mopuyo sa yuta sa Jershon uban sa mga katawhan ni Ammon. Ang mga katawhan ni Ammon mihatag ngadto kanila og mga yuta, ug ang mga Nephite mipadala sa ilang mga kasundalohan aron sa pagpanalipod kanila.
Ipamatuod nga kita makadawat sa mga panalangin sa Pag-ula sa Manluluwas kon kita mopakita og hugot nga pagtuo ngadto sa paghinulsol. Awhaga ang mga estudyante sa pagsunod sa ehemplo sa mga katawhan ni Ammon ug sa mga Nephite pinaagi sa pagpakita og kamabination ug paghatag og suporta niadtong kinsa nagtinguha sa paghinulsol.