Leksyon 39
2 Nephi 29–30
Pasiuna
Nanagna si Nephi bahin sa Pagpahiuli sa ebanghelyo sa ulahing mga adlaw, nga giingon sa Ginoo nga “usa ka kahibulongan nga buhat” (2 Nephi 29:1). Mipamatuod si Nephi nga sa katapusang mga adlaw, ang tanang mga kasulatan maghiusa aron sa pagpakita nga nahinumdom ang Dios sa Iyang mga anak. Nanagna siya nga daghan ang mosalikway sa Basahon ni Mormon apan kadtong motuo pagapundukon ngadto sa Simbahan. Agig dugang, nagtudlo siya nga ang mga katawhan sa pakigsaad sa Dios mao kadtong maghinulsol ug motuo sa Anak sa Dios.
Mga Sugyot alang sa Pagtudlo
2 Nephi 29
Gipanagna ni Nephi nga sa katapusang mga adlaw, daghan ang mosalikway sa Basahon ni Mormon
Dapita ang mga estudyante sa paghunahuna nga dunay usa ka higala sa eskwelahan ang sinsero nga nangutana, “Nganong ang mga Mormon duna may laing Biblia?” Mahimo nimong hangyuon ang mga estudyante nga moisa sa ilang mga kamot kon napangutan-an na ba sila og susama niini. Dayon dapita ang pipila sa pagpakigbahin kon giunsa nila pagtubag ang pangutana.
Ipasabut nga naghatag si Nephi og pipila ka mga tubag niini nga pangutana pinaagi sa pagrekord sa mga pulong sa Ginoo bahin sa tahas sa Basahon ni Mormon diha sa Pagpahiuli sa ebanghelyo sa ulahing mga adlaw, nga gitawag sa Ginoo og “usa ka kahibulongan nga buhat.” Dapita ang mga estudyante sa pagbasa og hilum sa 2 Nephi 29:1–2 ug sa pagtino kon unsay mabuhat sa mga pulong sa Ginoo sa katapusang mga adlaw. (Kini “mogula” ngadto sa binhi ni Nephi, o mga kaliwatan, ug sila usab “motuhop ngadto sa mga lumulupyo sa yuta.”) Gipasabut ni Presidente Ezra Taft Benson nga “kita, ang mga miyembro sa Simbahan, ug ilabi na sa mga misyonaryo, kinahanglang mahimo nga ‘mga tigtuhop,’ o mga tigsulti ug mga tigpamatuod, bahin sa Basahon ni Mormon ngadto sa mga lumulupyo sa yuta” (“The Book of Mormon Is the Word of God,” Ensign, Mayo 1975, 65).
Ipasabut nga ang pulong nga sumbanan diha sa 2 Nephi 29:2 nagpasabut sa usa ka butang nga gigamit aron sa pagpundok ug sa paghiusa sa katawhan. Ang mga bandera [flag] sa kasagaran gitawag og mga sumbanan. (Tan-awa ang pagpasabut sa pulong nga bandila [ensign] diha sa leksyon 32.)
-
Sumala sa 2 Nephi 29:2, unsa man ang “sumbanan” nga mogula “ngadto sa mga lumulupyo sa yuta” aron sa pagpundok sa katawhan sa Ginoo? (Ang Basahon ni Mormon—ang mga pulong sa binhi ni Nephi, o mga kaliwatan.)
-
Sumala sa 2 Nephi 29:1–2, unsa man ang katuyoan sa Ginoo sa paghatag og dugang nga kasulatan, sama sa Basahon ni Mormon? (Tabangi ang mga estudyante nga makasabut nga ang Ginoo mihatag og mga kasulatan isip ikaduhang saksi ug sa pagpundok sa katawhan ngadto sa Iyang pakigsaad.)
Diha sa pisara, isulat ang mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles (gikan sa Christ and the New Covenant: The Messianic Message of the Book of Mormon [1997], 4.):
“Ang Basahon ni Mormon mao ang labing importante nga pamahayag bahin sa pakigsaad sa Dios ug sa iyang gugma alang sa iyang mga anak dinhi sa yuta.” (Elder Jeffrey R. Holland)
Ipasabut nga diha sa 2 Nephi 29, ang pulong nga mga Hentil nagpasabut sa katawhan nga wala mahisakop sa balay ni Israel. Ang pulong nga mga Judeo nagpasabut sa katawhan nga nahisakop sa balay ni Israel, lakip na ang pamilya ug mga kaliwatan ni Lehi. Ipabasa og hilum sa mga estudyante ang 2 Nephi 29:3–6, nga mangita sa reaksyon sa pipila ka mga Hentil bahin sa dugang nga kasulatan.
-
Unsa may reaksyon sa uban bahin sa dugang nga kasulatan?
-
Unsay gisulti sa Ginoo bahin sa mga tawo nga dunay reaksyon niini nga paagi?
Ipasabut nga mapanagnaon si Nephi sa iyang paghulagway bahin sa reaksyon sa katawhan ngadto sa Basahon ni Mormon. Ang katawhan karon kasagaran mopahayag og mga pagduha-duha bahin sa Basahon ni Mormon tungod kay duna na silay Biblia.
I-assign ang mga estudyante sa pagtuon sa 2 Nephi 29:7–11 nga magpares. Dapita sila nga mangita sa mga katuyoan sa Ginoo sa paghatag og kasulatan agig dugang sa Biblia. Human sa pipila ka minuto, hangyoa sila sa pagpakigbahin sa unsay ilang nakit-an. Ang posible nga mga tubag maglakip nga (1) ang Ginoo nahinumdom sa tanang katawhan ug nagpadala sa Iyang pulong sa tanang mga nasud (tan-awa sa bersikulo 7); (2) ang Ginoo namulong sa samang mensahe ngadto sa tanang mga nasud, ug ang Basahon ni Mormon mao ang ikaduhang saksi sa mga kamatuoran diha sa Biblia (tan-awa sa bersikulo 8); (3) ang Ginoo kanunay nga mao ra, ug Siya namulong sumala sa Iyang kahimuot (tan-awa sa bersikulo 9); (4) ang buhat sa Dios wala pa mahuman, ug magpadayon Siya nga mamulong aron matuman ang Iyang buhat (tan-awa sa bersikulo 9); (5) ang katawhan dili kinahanglang maghunahuna nga ang Biblia naglangkob sa tanang mga pulong sa Ginoo o ang Ginoo wala magpasulat og dugang nga mga pulong (tan-awa sa bersikulo 10); ug (6) ang Ginoo nagmando sa katawhan sa tanang mga nasud sa pagrekord sa Iyang mga pulong (tan-awa sa bersikulo 11). Aron matabangan ang mga estudyante nga ma-summarize ug magamit kon unsay ilang nakat-unan gikan niining bahin sa leksyon, ipangutana ang pipila o ang tanan sa mosunod nga mga pangutana:
-
Sa unsa kahang paagi nga ang 2 Nephi 29 magamit sa pagsulbad sa mga problema bahin sa Basahon ni Mormon isip dugang nga basahon sa kasulatan?
-
Sa unsang paagi nga kining mga bersikulo nakapalambo sa inyong pasalamat alang sa Basahon ni Mormon?
Ipares-pares og usab ang mga estudyante. Hangyoa sila nga magpraktis sa pagtubag sa pangutana nga “Nganong ang mga Mormon duna may laing Biblia?” Dapita ang usa ka tawo nga ipangutana kana ug ang uban motubag sa pangutana. Dayon hangyoa sila nga magbaylo og mga tahas ug balikon ang panaghisgutan. Sa katapusan niini nga kalihokan, mahimo nimong awhagon ang mga estudyante sa paghunahuna sa mga tawo nga ilang nailhan nga mahimong makabenepisyo sa panaghisgot bahin niining mga baruganan ug magtinguha og giya gikan sa Balaang Espiritu kon unsaon sa pagpakig-istoryahanay niining mga tawhana.
Sa pagtapos nimo niining bahin sa leksyon, siguroha nga nasabtan sa mga estudyante nga ang Ginoo nahinumdom sa tanang katawhan ug mopadala sa Iyang mga pulong ngadto kanila.
2 Nephi 30:1–8
Gipanagna ni Nephi ang tahas sa Basahon ni Mormon sa katapusang mga adlaw
Ipasabut nga human matudlo nga ang Dios mahinumdom sa balay ni Israel, gipasidan-an ni Nephi ang iyang katawhan nga dili maghunahuna nga mas matarung sila kay sa mga Hentil. Gipahinumduman usab niya sila nga ang tanang katawhan mahimong mga katawhan sa pakigsaad sa Dios. Hangyoa ang usa ka estudyante sa pagbasa og kusog sa 2 Nephi 30:2, ug dapita ang klase sa pagpangita sa duha ka mga butang nga kinahanglan gayud natong buhaton aron mahimong kabahin sa mga katawhan sa pakigsaad sa Dios. Dapita ang mga estudyante sa pagpakigbahin sa unsay ilang nakit-an. Siguroa nga nasabtan nila nga mahimo kitang kabahin sa mga katawhan sa pakigsaad sa Dios kon maghinulsol ug motuo kita kang Jesukristo.
Ipasabut nga diha sa 2 Nephi 30:3, gihulagway ni Nephi ang usa ka paagi sa pagpundok sa Ginoo sa Iyang katawhan ngadto sa pakigsaad sa katapusang mga adlaw. Dapita ang mga estudyante sa pagbasa og hilum sa 2 Nephi 30:3 ug sa pagtino niini nga proseso. (Gipadala sa Ginoo ang Basahon ni Mormon. Daghan ang mituo niini ug mipakigbahin niini ngadto sa uban.) Mahimo nimong ipasabut nga si Nephi piho nga naghisgot nga ang mga pulong sa Basahon ni Mormon ipadala “ngadto sa salin sa atong binhi,” buot ipasabut ang mga kaliwatan ni Lehi.
Hangyoa ang mga estudyante sa pagbasa og hilum sa 2 Nephi 30:4–8, nga mangita sa mga pulong nga nagpakita kon sa unsang paagi nga ang mga tawo mapanalanginan sa pagdawat nila sa Basahon ni Mormon.
-
Sa unsang mga paagi nga ang mga kaliwatan ni Lehi mapanalanginan samtang magkat-on sila bahin sa ilang mga katigulangan?
-
Unsay gitudlo niining mga bersikulo bahin sa epekto sa Basahon ni Mormon ngadto sa tanang katawhan?
Siguroha nga nasabtan sa mga estudyante nga ang Basahon ni Mormon makatabang sa tanang katawhan nga makaila kang Jesukristo ug motuman sa Iyang ebanghelyo. Mahimo nimong isulat kini nga pamahayag diha sa pisara.
-
Unsa man ang atong mahimo aron makatabang sa uban nga makaila kang Jesukristo pinaagi sa Basahon ni Mormon?
-
Sa unsang paagi kamo natabangan sa Basahon ni Mormon nga makaila sa Manluluwas?
Dapita ang mga estudyante sa pagsaysay og usa nila ka kasinatian sa pagpakigbahin sa Basahon ni Mormon. Awhaga ang mga estudyante nga mag-ampo alang sa mga oportunidad sa pagpakigbahin sa Basahon ni Mormon ngadto sa uban.
2 Nephi 30:9–18
Gipanagna ni Nephi ang mga kahimtang sa yuta sa panahon sa Milenyum
Ipasabut nga nanagna usab si Nephi kalabut sa Milenyum—ang 1,000 ka tuig human sa Ikaduhang Pag-anhi sa Manluluwas.
I-summarize ang 2 Nephi 30:9–10 pinaagi sa pagpasabut nga atol sa Ikaduhang Pag-anhi sa Ginoo, ang mga dautan pagalaglagon. Dapita ang mga estudyante sa pagbasa og hilum sa 2 Nephi 30:12–18, nga mangita sa mga paghulagway sa kinabuhi atol sa Milenyum. Dapita ang mga estudyante sa paghunahuna nga nagsulat sila og artikulo sa pamantalaan panahon sa Milenyum, nga naghulagway sa kahimtang nga ilang nakit-an. Hangyoa sila sa pagsulat og mga headline alang sa artikulo ug sa pagpakigbahin sa ilang mga headline ngadto sa usag usa.
-
Bahin sa milenyal nga mga kahimtang nga inyong natun-an diha sa 2 Nephi, hain ang labi ninyong gipaabut? Ngano man?
Idirekta ang atensyon sa mga estudyante sa mosunod nga pamahayag diha sa 2 Nephi 30:18: “Si Satanas wala nay gahum diha sa mga kasingkasing sa mga katawhan, sulod sa dugay nga panahon.” Mahimo nimong isugyot nga markahan sa mga estudyante kini nga pamahayag diha sa ilang mga kasulatan.
-
Nganong makatabang nga mahibalo nga ang pagkamatarung sa katapusan magmadaugon batok sa pagkadautan?
Human makatubag ang mga estuadyante, ipamatuod nga si Satanas wala nay gahum diha sa mga kasingkasing sa mga katawhan panahon sa Milenyum, ug ang pagkamatarung ug kalinaw maoy mopatigbabaw. Dapita ang usa ka estudyante sa pagbasa og kusog sa mosunod nga pamahayag ni Presidente George Q. Cannon sa Unang Kapangulohan. Hangyoa ang klase sa pagpaminaw alang sa mga rason nganong si Satanas wala nay gahum panahon sa Milenyum.
“Gihisgutan nato ang mahitungod ni Satanas nga gigapos. Si Satanas gapuson pinaagi sa gahum sa Dios; apan gapuson usab siya pinaagi sa determinasyon sa mga katawhan sa Dios sa dili pagpaminaw kaniya, nga sila dili madumala kaniya. Ang Ginoo dili mogapos kaniya ug mokuha sa iyang gahum gikan sa yuta samtang dunay mga lalaki ug mga babaye nga andam nga magpadumala kaniya. Sukwahi kana sa plano sa kaluwasan. Ang paghikaw sa mga tawo sa ilang kabubut-on sukwahi sa mga katuyoan sa atong Dios. Dihay panahon niini nga kontinente, diin kita dunay usa ka istorya, sa dihang ang katawhan hilabihan ka matarung nga si Satanas walay gahum taliwala kanila. Dul-an sa upat ka mga henerasyon ang milabay diha sa pagkamatarung. Nagpuyo sila sa kaputli, ug namatay nga walay sala. Pinaagi kana sa ilang pagdumili nga monunot ngadto ni Satanas. Wala narekord nga si Satanas walay gahum sa ubang mga bahin sa yuta atol nianang panahona. Sumala sa tibuok kasaysayan nga anaa kanato, si Satanas dunay sama nga gahum sa mga tawo nga andam nga maminaw kaniya. Apan niini nga yuta wala siyay gahum, ug sa literal nga paagi gigapos gayud siya. Nagtuo ko nga mao kini ang mahitabo sa milenyum; ug nangatarungan ako niini sama sa akong gibuhat ngadto nianang malipayong kahimtang nga gihulagway diha sa rekord nga akong gipamulong. Gipaabut nako nga sa dili pa hingpit nga gapuson si Satanas ang mga dautan pagalaglagon” (sa Conference Report, Okt. 1897, 65).
-
Unsaon man paggapos kang Satanas panahon sa Milenyum?
Awhaga ang mga estudyante nga magpakabuhi sa matarung nga paagi aron ang kaaway walay gahum ibabaw kanila.
Komentaryo ug Background nga Impormasyon
2 Nephi 30:9–10. “Ang Dios mohimo og usa ka dako nga pagkabahin”
Diha sa 2 Nephi 30:9–10, gipanagna ni Nephi ang usa ka panahon nga “ang Ginoong Dios mohimo og usa ka dako nga pagkabahin taliwala sa mga katawhan, ug ang mga dautan siya molaglag; ug siya mopanalipod sa iyang mga katawhan.” Tabangi ang mga estudyante nga makasabut nga aron mahilakip sa katawhan sa Ginoo nianang adlawa, kinahanglan kitang molahi sa atong kaugalingon gikan sa kalibutanong mga paagi karon. Miingon si Presidente Boyd K. Packer sa Korum sa Napulog Duha ka mga Apostoles:
“Ang distansya tali sa Simbahan ug sa kalibutan nga anaa sa usa ka agianan nga dili nato masunod magkaanam og kadako.” (“The Father and the Family,” Ensign, Mayo 1994, 21).
Nagtudlo si Elder Robert D. Hales sa Korum sa Napulog Duha ka mga Apostoles:
“Isip mga Santos sa Ulahing mga Adlaw dili kinahanglan nga makita kita sama sa kalibutan. Dili kinahanglan nga maglingaw kita sama sa kalibutan. Ang atong personal nga mga gawi kinahanglang lahi. Ang atong kalingawan kinahanglang lahi” (“Gifts of the Spirit,” Ensign, Peb. 2002, 17).
Miingon si Elder Larry W. Gibbons sa Seventy:
“Niining panahon sa moral nga panagkalahi kinahanglan kita andam nga mobarug ug moingon, ‘Kini mao ang husto, ug kini sayop.’ Dili kita mosunod sa kinabag-an! Karon, wala ako magsugyot, nga kita moadto sa kamingawan ug manira sa atong mga pultahan. Mahimo kitang anaa sa kalibutan, moadto sa eskwelahan, motrabaho, moapil og mga organisasyon sa komunidad, ug uban pa. Pero mohupot gyud kita sa mga sumbanan sa Ginoo. …
“Mga kaigsoonan, subay sa tul-id ug pig-ot nga dalan. Dili, subay diha sa tunga sa tul-id ug pig-ot nga dalan. Ayaw og kaharag; ayaw paglatagaw; ayaw pagmantinil; pag-amping.
“Hinumdumi, ayaw pagdula sa dautan. Palayo sa teritoryo sa yawa. Ayaw hatagig higayon si Satanas nga makabintaha. Ang pagsunod sa mga sugo magdala kaninyo og kalipay nga daghan kaayo ang nangita niini sa ubang dapit” (“Busa Ipahimutang Ninyo sa Inyong Kasingkasing,” Ensign o Liahona, Nob. 2006, 103–4).
2 Nephi 30:9–18. Unsa man ang Milenyum?
“Ang milenyum usa ka panahon sa 1,000 ka tuig. Kon maghisgut kita og ‘ang Milenyum,’ nagpasabut kita sa 1,000 ka tuig ka tuig human sa Ikaduhang Pag-anhi sa Manluluwas (tan-awa sa Pinadayag 20:4; D&P 29:11). Atol sa Milenyum, ‘si Kristo mohari dinhi sa yuta’ (Mga Artikulo sa Hugot nga Pagtuo 1:10).
“Ang Milenyum mahimong usa ka panahon sa pagkamatarung ug kalinaw sa yuta. Ang Ginoo mipadayag nga ‘niana nga adlaw ang pagdinumtanay sa tawo, ug ang pagdinumtanay sa mga mananap, oo, ang pagdinumtanay sa tanan nga mga unod, mohunong’ (D&P 101:26; tan-awa usab sa Isaias 11:6–9). Si Satanas ‘pagagapuson, nga siya wala nay dapit sa mga kasingkasing sa mga katawhan’ (D&P 45:55; tan-awa usab sa Pinadayag 20:1–3).
“Atol sa Milenyum, ang tanang mga tawo sa yuta mahimong maayo ug makiangayon, apan daghan ang wala pa makadawat sa kahingpitan sa ebanghelyo. Isip resulta, ang mga miyembro sa Simbahan moapil sa misyonaryo nga buhat.
“Ang mga miyembro sa Simbahan moapil usab sa buhat sa templo atol sa Milenyum. Ang mga Santos mopadayon sa pagtukod og mga templo ug modawat og mga ordinansa alang sa ilang namatay na nga mga katigulangan. Giniyahan pinaagi sa pinadayag, moandam sila sa mga rekord sa ilang mga katigulangan hangtud ngadto nila ni Adan ug Eva.
“Ang hingpit nga pagkamatarung ug kalinaw magpadayon hangtud sa katapusan sa 1,000 ka tuig, sa dihang si Satanas “pagabuhian sa mubo nga panahon, nga siya mopundok sa iyang mga kasundalohan.’ Ang mga kasundalohan ni Satanas makig-away batok sa mga kasundalohan sa langit, kinsa pagapangulohan ni Miguel, o Adan. Si Satanas ug ang iyang mga sumusunod mapildi ug papahawaon hangtud sa kahangturan. (Tan-awa sa D&P 88:111–115.)” (Matinud-anon sa Tinuhoan: Usa ka Pakisayran sa Ebanghelyo [2004], 110–11).