2 Nephi 26

Pasiuna

Gipanagna ni Nephi nga ang iyang kaliwatan sa umaabut nga adlaw bisitahan sa nabanhaw nga si Jesukristo ug nga human niini nga kasinatian magpuyo sila sulod sa tulo ka mga henerasyon diha sa pagkamatarung. Hinoon, naguol si Nephi nga diha sa ikaupat nga henerasyon sa iyang kaliwatan, ang uban mapukan gikan sa pagkamatarung, mosalikway sa Mesiyas, ug sa katapusan pagalaglagon. Gipasidan-an ni Nephi kadtong nagpuyo sa katapusang mga adlaw batok sa garbo, tinago nga mga kalihokan, ug panapi sa mga pari. Nagtudlo siya nga gihigugma sa Ginoo ang tanang katawhan ug midapit kanila nga moduol Kaniya.

Mga Sugyot alang sa Pagtudlo

2 Nephi 26:1–13

Nanagna si Nephi nga ang iyang katawhan pagalaglagon tungod kay ilang isalikway si Jesukristo

Isulat sa pisara ang Mga Paghukom sa Dios.

Kon makakita o makadungog kamo niini nga mga pulong, unsa man ang inyong mahunahunaan?

Ipasabut nga bisan tuod nga daghang mga tawo ang dunay negatibong mga hunahuna kon makakita sila nini nga mga pulong, ang mga paghukom sa Dios sa tinuod lang nagdala og mga panalangin sa daghang mga tawo. Diha sa 2 Nephi 26, atong mabasa ang bahin sa mga sangputanan nga gidala sa kaangayan ngadto sa mga dautan ug sa mga matarung.

Aron maestablisar ang konteksto alang sa nag-unang mensahe sa 2 Nephi 26, ipasabut nga miingon si Nephi nga daghang mga timailhan ang mag-uban sa pagkatawo, kamatayon, ug Pagkabanhaw ni Jesukristo. Gipanagna niya nga daghang mga tawo ang malaglag sa dili madugay human sa kamatayon sa Manluluwas tungod kay ilang isalikway ang mga propeta ug ang matinud-anong mga sumusunod ni Jesukristo nga nagpuyo uban kanila. Gipanagna usab niya nga bisan human mabisitahi sa nabanhaw nga Manluluwas, daghan sa iyang kaliwatan ang “[mo]pili sa mga buhat sa kangitngit kay sa kahayag” ug pagalaglagon. (Tan-awa sa 2 Nephi 26:1–11.)

Dapita ang usa ka estudyante sa pagbasa og kusog sa 2 Nephi 26:7. Hangyoa ang klase sa pagpangita sa reaksyon ni Nephi ngadto sa panan-awon bahin sa pagkalaglag sa katawhan. Dapita ang mga estudyante sa pagpakigbahin sa unsay ilang nakit-an. Mahimo nimong isugyot nga ilang markahan ang pamahayag ni Nephi diha sa katapusan sa bersikulo: “Ang imong mga paagi makiangayon.”

Unsa ang kahulugan sa pamahayag nga “Ang imong mga paagi makiangayon” nganha kaninyo? (Mahimong kinahanglan nimong ipasabut nga ang tawo nga makiangayon kanunay nga motratar sa mga tawo sa patas nga paagi.)

Human matabangi ang mga estudyante nga makasabut nga ang kaangayan sa Dios nagkinahanglan nga ang mga dautan pagasilutan tungod sa ilang mga lihok, ipasabut nga ang kaangayan sa Dios nagkinahanglan usab nga ang mga matarung pagagantihan tungod sa ilang mga lihok. Isip kabahin niini nga pagpasabut, mahimo nimong dapiton ang mga etudyante sa pagbasa sa Doktrina ug mga Pakigsaad 130:20–21. Ipabasa sa mga estudyante ang 2 Nephi 26:8–9, 13, nga mangita sa mga panalangin nga giingon ni Nephi nga moabut sa iyang matarung nga kaliwatan.

Diha sa mga bersikulo 8 ug 13, unsa nga mga pulong ang naghulagway sa mga lihok sa mga matarung?
Kanus-a ninyo nasaksihan ang mga panalangin nga gihisgutan diha sa bersikulo 13? Unsa ang pipila ka lain-laing mga paagi nga gipakita sa Ginoo ang Iyang kaugalingon ngari kanato?

Isulat sa pisara ang mosunod nga baruganan: Samtang nagpakita kita og hugot nga pagtuo diha ni Jesukristo, ipakita Niya ang Iyang kaugalingon ngari kanato pinaagi sa gahum sa Espiritu Santo.

Sa unsang paagi nga ang pagkasayud niini nga kamatuoran makapalambo sa inyong pagtuo diha ni Jesukristo?

2 Nephi 26:14–33

Nanagna si Nephi kalabut sa katapusang mga adlaw ug nagdapit sa tanan nga moduol ngadto ni Kristo

I-summarize ang 2 Nephi 26:14–19 pinaagi sa pagpasabut nga gipanagna ni Nephi nga ang Basahon ni Mormon mapagawas sa katapusang mga adlaw sa usa ka panahon nga daghang mga tawo ang mapahitas-on ug dili matuohon.

Hangyoa ang mga estudyante sa paghunahuna og panahon sa dihang napandol sila sa usa ka butang (o mahimo nimo silang pahunahunaon nga nakatunob og butang diha sa ngitngit). Dapita sila sa pagsiksik og hilum sa 2 Nephi 26:20–21, nga mangita sa mga babag nga makapandol sa mga tawo sa katapusang mga adlaw.

Sumala sa 2 Nephi 26:20–21, unsa ang pipila ka mga babag nga nakita ni Nephi nga maoy makapandol sa mga Hentil?
Unsa ang pipila ka mga ehemplo sa mga babag nga gigamit ni Satanas aron mapandol ang mga tawo?

Ipasabut nga agig dugang sa pagbutang og “mga babag” diha sa atong agianan aron mapalayo kita sa Dios, nagtinguha si Satanas sa paggapos kanato. Iisa ang usa ka hilo ug dapita ang mga estudyante sa pagbasa sa 2 Nephi 26:22, nga mangita sa unsay gisulat ni Nephi bahin sa susama nga butang. Dapita ang usa ka estudyante nga moduol sa atubangan sa klase. Gapusa ang duha ka kamot sa estudyante gamit ang hilo. Hangyoa siya sa pagputol sa hilo. Sublia ang proseso, niining higayuna mobugkos sa hilo og pipila ka higayon sa iyang mga kamot. Ipadayon ang pagbuhat niini hangtud nga dili na maputol sa estudyante ang hilo—nga mopasidaan sa estudyante nga mag-amping nga dili masakitan ang iyang kaugalingon. (Kon ikaw walay hilo, mahimo nimong hangyuon ang mga estudyante sa paghunahuna niini nga demonstrasyon.) Hangyoa ang mga estudyante sa pagtuon sa 2 Nephi 26:22, nga mangita kon sa unsang paagi nga ang bersikulo dunay kalabutan sa demonstrasyon.

Diha sa 2 Nephi 26:22, unsa kaimportante ang mga pulong nga “hangtud nga siya makahigot kanila”? Unsa ang gitudlo niini nga bersikulo kaninyo bahin sa unsang paagi motrabaho si Satanas?
Sa unsang paagi nimo nakita si Satanas nga midala sa katawhan gamit ang “linino nga pisi”? (Ang lino [flax] mao ang materyal nga gigamit sa paghimo og linen.)
Sa inyong hunahuna hain niining mga sala (linino nga pisi) ang pinakakuyaw alang sa mga tawo nga inyong kaedad?

Pahinumdumi ang mga estudyante nga si Satanas modani kanato sa paghimo sa mga buhat sa kangitngit aron iya kitang magapos ug iya kitang madala gikan sa dalan sa pagkamatarung. Ipasabut nga ang katapusang mga bersikulo diha sa 2 Nephi 26 nagpakita og kalainan tali sa mga paagi ni Satanas ug sa mga paagi sa Dios. Hangyoa ang mga estudyante sa pagbasa og hilum sa 2 Nephi 26:23–24.

Sumala niini nga mga bersikulo, sa unsang paagi motrabaho ang Ginoo? Unsa ang katuyoan sa tanang gibuhat sa Ginoo? (Mahimo nimong isugyot nga markahan sa mga estudyante ang bahin sa 2 Nephi 26:24 nga nagtudlo nga ang tanang gibuhat sa Ginoo alang sa kaayohan sa kalibutan.)

Hangyoa ang mga estudyante sa pagpamalandong og kadiyot mahitungod sa usa ka higayon sa dihang mibati sila og pagkawalay kadasig o mipalayo sa Ginoo. Aron matabangan ang mga estudyante nga mobati nga ang mensahe ni Nephi bahin sa gugma sa Ginoo magamit diha sa ilang kinabuhi, dapita sila sa pagsiksik sa 2 Nephi 26:24–28, 33. Mahimo nimong isugyot nga ilang markahan ang mga pulong nga tanan, bisan kinsa, ug walay (gawas sa unang higayon sa pulong nga walay sa bersikulo 33). Pagahina og pipila ka minuto ang mga estudyante sa pagbasa og usab sa mga sentence nga naglangkob niining mga pulong.

Hangyoa ang matag estudyante nga moatubang ngadto sa laing sakop sa klase ug maghisgot sa daklit sa unsay atong masabtan niining mga bersikulo. Human nga mapakigbahin sa mga estudyante ang ilang mga hunahuna sa usag usa, ikonsiderar ang pagdapit sa pipila ka mga estudyante sa pagpakigbahin sa nag-unang mga ideya gikan sa ilang mga panag-istoryahanay. Usa ka nag-unang ideya nga kinahanglang magagikan niini nga panaghisgutan mao nga ang Ginoo nahigugma sa tanang katawhan ug nagdapit sa tanan nga moduol Kaniya ug moambit sa Iyang kaluwasan. Mahimo nimong isulat sa pisara kini nga pamahayag. Mahimo usab nimong dapiton ang mga estudyante sa pagsulat sa mga tubag sa mosunod nga mga pangutana diha sa ilang mga scripture study journal o mga class notebook:

Kanus-a man ninyo nabantayan ang pagkamaayo sa Ginoo diha sa inyong kinabuhi?”
Sa unsang paagi kini makatabang kaninyo nga masayud nga gihigugma sa Ginoo ang tanang katawhan ug nagdapit sa tanan nga moduol Kaniya?

Sa pagtapos, dapita ang usa ka estudyante sa pagbasa og kusog sa 2 Nephi 26:25, 33. Sa dili pa siya mobasa, isugyot nga markahan sa mga estudyante ang mga pulong nga nakapadasig kanila. Aron matabangan ang mga estudyante nga makakita og dugang nga paggamit niini nga mga bersikulo, basaha ang mosunod nga pamahayag ni Presidente Dieter F. Uchtdorf sa Unang Kapangulohan:

“Manghinaut ako nga atong abi-abihon ug higugmaon ang tanang mga anak sa Dios, lakip na kadtong kinsa tingali lahi og sinul-oban, panagway, sinultihan, o naghimo lang og lahi nga mga butang. Dili maayo ang paghimo sa uban nga mobati nga sila adunay kakulangan. Kita, mobayaw niadtong anaa sa atong palibut. Atong ipaabut ang atong maabi-abihon nga kamot. Atong ipakita nganha sa atong mga kaigsoonan sa Simbahan ang usa ka espesyal nga sukod sa kamabination, kalooy, ug gugmang putli aron ilang mabati, nga sa katapusan, nakaplagan na gayud nila ang panimalay. …

“Kini daw husto ug angayan lamang nga atong ipadangat sa uban kanang hilabihan nato nga tinguha alang sa atong kaugalingon.

“Wala ako magsugyot nga atong dawaton ang sala o pasagdan ang dautan, sa atong personal nga kinabuhi o sa kalibutan. Hinoon, sa atong kadasig, usahay atong malibgan ang sala sa makasasala, ug dali kaayo kitang makapanghimaraut ug may gamay ra kaayo og kalooy. …

“… Tuguti nga ang atong mga kasingkasing ug mga kamot sa kalooy matunol ngadto sa uban, kay ang tanan naglakaw diha sa iyang kaugalingong lisud nga agianan” (“Kamo ang Akong mga Kamot,” Liahona, Mayo 2010, 68–69).

Unsa ang ubang mga paagi nga atong magamit ang 2 Nephi 26:33 ug ang mga pagtulun-an ni Presidente Uchtdorf?

Dapita ang mga estudyante sa pagkonsiderar kon unsay ilang mabuhat aron makatabang sa uban nga nanginahanglan ug makatabang kanila nga mobati sa gugma sa Ginoo.

Dugang nga Ideya sa Pagtudlo

2 Nephi 26:29–31. Mipasidaan si Nephi bahin sa sala sa panapi sa mga pari

Isulat sa pisara ang mosunod nga mga pangalan: Sherem, Nehor, Korihor. Pangutan-a ang mga estudyante kon unsay ilang nahibaloan bahin niining mga tawhana. Kon maglisud ang mga estudyante sa pagtubag, ipasabut sa daklit nga kining mga tawhana misulay sa pagdala sa mga tawo palayo sa hugot nga pagtuo diha ni Jesukristo. Sad-an sila sa sala sa panapi sa mga pari.

Gipasidan-an ni Nephi ang iyang katawhan—ug kita nga nagpuyo sa katapusang mga adlaw—bahin sa panapi sa mga pari. Dapita ang usa ka estudyante sa pagbasa og kusog sa 2 Nephi 26:29–31. Hangyoa ang klase sa pagpaminaw alang sa kahulugan sa panapi sa mga pari.

Unsa ang tumong sa mga tawo nga nalambigit sa panapi sa mga pari?

Si Elder M. Russell Ballard sa Korum sa Napulog Duha ka mga Apostoles mipasidaan nga ang panapi sa mga pari mahimong mahitabo diha sa Simbahan. Hangyoa ang usa ka estudyante sa pagbasa sa iyang tambag:

“Magbantay kita sa mini nga mga propeta ug mini nga mga magtutudlo, mga lalaki ug babaye, kinsa nagtudlo lang sa kaugalingon nga mga tigpamahayag sa mga doktrina sa Simbahan ug kinsa nagtinguha sa pagpakatap sa ilang sayop nga ebanghelyo ug modani og mga sumusunod pinaagi sa pagpasiugda og mga symposium, mga libro, ug mga journal kansang mga sulod [content] mohagit sa sukaranang mga doktrina sa Simbahan. Pagbantay niadtong mamulong ug momantala batok sa tinuod nga mga propeta sa Dios ug aktibong mangabig sa uban pinaagi sa pagbaliwala sa mahangturong kaayohan niadtong ilang giagni. Sama nila ni Nehor ug Korihor diha sa Basahon ni Mormon, nagsalig sila sa morag nindot apan sayop nga argumento aron makalingla ug makadani sa uban ngadto sa ilang mga panglantaw. Sila ‘mopahiluna sa ilang mga kaugalingon ingon og usa ka kahayag ngadto sa kalibutan, nga sila makaangkon og bahandi ug pagdayeg sa kalibutan; apan sila wala magtinguha sa kaayohan sa Zion’ (2 Ne. 26:29)” (“Beware of False Prophets and False Teachers,” Ensign, Nob. 1999, 63).

Sa unsang paagi kaha nga ang mga miyembro sa Simbahan malit-ag sa panapi sa mga pari?
Sumala sa 2 Nephi 26:30, unsay makapugong sa panapi sa mga pari? (Tabangi ang mga estudyante nga makasabut nga malikayan nato ang sala sa panapi sa mga pari pinaagi sa pagbaton og gugmang putli sa tanang mga tawo.)