1 Nephi 20–2 Nephi 3 (Unit 5)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga summary sa mga doktrina ug mga baruganan nga nakat-unan sa mga estudyante dihang gitun-an nila ang 1 Nephi 20 hangtud 2 Nephi 3 (unit 5) dili tuyo nga itudlo isip kabahin sa imong leksyon. Ang leksyon nga imong itudlo alang sa unit 5 mosentro lamang diha sa pipila niini nga mga doktrina ug mga baruganan. Sunda ang mga pag-aghat sa Balaang Espiritu samtang imong ikonsiderar ang mga panginahanglan sa imong mga estudyante.

Day 1 (1 Nephi 20–22)

Samtang gikutlo ni Nephi ang pipila ka mga panagna ni Isaias ngadto sa iyang mga igsoong lalaki, nakat-unan sa mga estudyante nga gidapit sa Ginoo kadtong dili masulundon sa paghinulsol ug mobalik ngadto Kaniya. Nagpakita kini kanato nga ang Ginoo nahigugma kanato ug dili gayud malimot kanato. Nakat-unan usab sa mga esudyante nga bisan tuod nga ang Israel magkatibulaag tungod sa ilang pagkadili masulundon, misaad ang Ginoo nga ipahiuli ang ebanghelyo ug pundukon ang Israel sa ulahing mga adlaw.

Day 2 (2 Nephi 1)

Gitun-an sa mga estudyante ang katapusang mga pagtulun-an ni Lehi ngadto sa iyang pamilya sa wala pa siya namatay. Gihatagan og gibug-aton ni Lehi nga panalanginan kita sa Ginoo kon mosunod kita sa Iyang mga sugo ug pugngan Niya ang mga panalangin kon dili kita mosunod sa Iyang mga sugo. Sa dihang nasayud si Lehi nga sa dili madugay mamatay na siya, giawhag niya ang iyang pamilya nga mosunod ni Nephi. Nakita sa mga estudyante nga samtang mosunod kita niadtong gitawag sa Dios nga mangulo kanato, mapanalanginan kita og espirituhanong pag-uswag ug kasiguroan.

Day 3 (2 Nephi 2)

Gipasabut ni Lehi ngadto sa iyang anak nga si Jacob ang duha ka sukaranang mga kamatuoran: (1) nga ang Pagkapukan ni Adan ug ni Eva usa ka mahinungdanong bahin sa plano sa kalipay sa Langitnong Amahan ug (2) nga pinaagi sa Pag-ula, gitubos kita ni Jesukristo gikan sa mga epekto sa Pagkapukan ug nagtanyag og katubsanan gikan sa atong mga sala. Gipasabut ni Lehi nga isip resulta sa Pagkapukan ug Pag-ula, gawasnon kita sa pagpili sa kalingkawasan ug kinabuhing dayon o sa pagkabihag ug kamatayon (tan-awa sa 2 Nephi 2:27).

Day 4 (2 Nephi 3)

Namulong ngadto sa iyang anak nga si Joseph, gisaysay ni Lehi ang panagna bahin ni Jose sa Ehipto nga makita diha sa mga palid nga tumbaga. Kini nga panagna nag-ingon na daan nga ang Ginoo mipatunhay ni Propeta Joseph Smith aron motabang sa pagpahinabo sa Pagpahiuli sa ebanghelyo. Gihangyo ang mga estudyante sa pagsulat diha sa ilang mga scripture study journal mahitungod kon sa unsang paagi nga ang mga kontribusyon ni Propeta Joseph Smith nahimong dako nga bili ngadto kanila.

Pasiuna

Kini nga leksyon gituyo aron matabangan ang mga estudyante nga makasabut sa mahangturong mga katuyoan sa Dios. Nasayud si Lehi nga ang iyang kaliwatan makahimo og mga pagpili nga modala kanila sa hingpit nga kalipay, kalingkawasan, ug kinabuhing dayon kon makasabut ug motuo lamang sila sa mahinungdanong mga doktrina—sama sa Pagkapukan, sa Pag-ula ni Jesukristo, kabubut-on, ug pagkamasulundon (tan-awa sa 2 Nephi 2:25, 27). Awhaga ang mga estudyante sa pagpili sa kinabuhing dayon aron nga sa katapusan sila “[ma]liyokan sa kahangturan sa mga bukton sa gugma [sa Dios]” (2 Nephi 1:15), sama ni Lehi.

Mga Sugyot alang sa Pagtudlo

2 Nephi 1–2

Sa wala pa siya namatay, giawhag ni Lehi ang iyang mga anak nga motuman sa mga sugo sa Dios ug nagtudlo kanila sa sukaranang mga doktrina bahin sa plano sa kaluwasan

Sugdi pinaagi sa pagpabasa sa mga estudyante sa katapusang sentence sa 2 Nephi 3:25 (“Hinumdumi ang mga pulong sa himatyon nimo nga amahan”). Pangutan-a sila kon sa unsang paagi nga ang ilang atensyon ngadto sa tambag sa usa ka sakop sa pamilya mahimong mausab kon nasayud sila nga kanang tawhana himatyon na.

Ang mosunod nga kalihokan makatabang sa mga estudyante nga mas makasabut sa mga kamatuoran nga gihatagan og gibug-aton ni Lehi diha sa katapusan niyang mga pulong ngadto sa iyang pamilya. Mopakita usab kini kanila sa pagpakigbahin sa usag usa kon sa unsang paagi nga kining mga kamatuoran makatabang kanila sa pagsunod sa plano sa Langitnong Amahan alang sa ilang kaluwasan.

I-assign ang matag usa sa mosunod nga mga tudling sa kasulatan ngadto sa indibidwal nga mga estudyante o mga managpares: 2 Nephi 1:16–20; 2 Nephi 2:6–10; 2 Nephi 2:19–20, 22–25; ug 2 Nephi 2:11–13, 27–29. (Kon ikaw dunay mas minos sa upat ka mga estudyante, mahimo nimong gamiton kini nga kalihokan pinaagi sa pag-assign sa mga estudyante og sobra pa sa usa ka tudling sa kasulatan o pinaagi sa pagpili og mas gamay nga mga tudling nga hisgutan.)
Samtang magtuon ang mga estudyante niini nga mga tudling, patubagi nila ang mosunod nga mga pangutana diha sa ilang mga scripture study journal. (Mahimo nimong ikonsiderar ang pagsulat sa mga pangutana diha sa pisara.)
1. Unsa nga mahinungdanong mga kamatuoran ang gitudlo ni Lehi?
2. Ngano nga kining mga kamatuoran importante man alang sa atong walay katapusang kaayohan?
Human mahatagi og panahon ang mga estudyante sa pagkompleto sa ilang assignment, dapita ang matag estudyante o managpares sa pagreport sa unsay ilang nadiskubrihan. Awhaga ang daghang mga estudyante kutob sa mahimo sa pagpakigbahin sa unsay ilang nakit-an ug nganong makahuluganon kini ngadto kanila.

Human sa kalihokan, isulat sa pisara ang mosunod nga kamatuoran: Ang Pagkapukan ni Adan ug ni Eva usa ka mahinungdanong bahin sa plano sa kalipay sa Langitnong Amahan.

Ipakigbahin ang mosunod nga pamahayag ni Presidente Joseph Fielding Smith:

“Gibuhat ni Adan ang unsay kinahanglan niyang buhaton. Mikaon siya nianang bunga tungod sa usa ka maayong rason, ug kana mao ang pag-abli sa pultahan aron sa pagdala kaninyo ug kanako ug sa tanan nganhi niining kalibutana. …

“… Kon dili pa tungod ni Adan, wala unta ko dinhi; wala unta kamo dinhi; maghulat unta kita didto sa kalangitan isip mga espiritu” (sa Conference Report, Okt. 1967, 121–22).

Pangutan-a ang mga estudyante sa mosunod:

Unsa ang pipila ka mga sangputanan sa Pagkapukan nga gihulagway ni Lehi diha sa 2 Nephi 2:21–24?
Sa unsang paagi nga kining mga sangputanan mihimong posible nga kita mouswag sumala sa plano sa Langitnong Amahan alang sa atong kaluwasan?

Idugang ang mosunod nga kamatuoran diha sa pisara: Pinaagi sa Pag-ula, si Jesukristo mitubos kanato gikan sa Pagkapukan ug mitanyag og katubsanan gikan sa atong mga sala.

Aron matabangan ang mga estudyante nga makabaton og mas lawom nga panabut bahin niini nga kamatuoran, ipabasa og kusog sa usa ka estudyante ang mosunod nga pamahayag ni Elder Joseph B. Wirthlin sa Korum sa Napulog Duha ka mga Apostoles:

“Ang Pag-ula ni Jesukristo, usa ka buhat sa putli nga gugma, mibuntog sa mga epekto sa Pagkapukan ug mihatag sa paagi nga ang tanang katawhan makabalik sa presensya sa Dios. Isip kabahin sa Pag-ula, nabuntog sa Manluluwas ang pisikal nga kamatayon ug mihatag og imortalidad alang sa matag usa sa mga anak sa Dios pinaagi sa Pagkabanhaw. Nabuntog usab Niya ang espirituhanong kamatayon ug mihatag sa posibilidad sa kinabuhing dayon, ang kinabuhi nga gipuy-an sa Dios ug ang labing dako sa tanang mga gasa sa Dios” (“Christians in Belief and Action,” Ensign, Nob. 1996, 71).

Pangutan-a ang mga estudyante: Unsa ang pipila sa mga panalangin sa Pag-ula?

Aron matabangan ang mga estudyante nga makasabut sa kaimportante sa kabubut-on diha sa plano sa Langitnong Amahan, basaha ang mosunod nga pamahayag ni Elder Neal A. Maxwell sa Korum sa Napulog Duha ka mga Apostoles:

“Kon wala ang mga pagpili, kon wala ang atong kagawasan sa pagpili ug kon wala ang pagsupak, walay tinuod nga pagpakabuhi. … Usa kini ka kamatuoran nga dili kita molambo sa espirituhanong paagi ni dunay tinuod nga kalipay gawas ug hangtud nga makahimo kita og maalamong paggamit sa atong moral nga kabubut-on” (One More Strain of Praise [1999], 80).

Isulat ang mosunod nga baruganan diha sa pisara: Gawasnon kita sa pagpili og kalingkawasan ug kinabuhing dayon o pagkabihag ug kamatayon.

Ipapakli sa mga estudyante ngadto sa assignment 4 ubos sa day 3 diha sa ilang mga scripture study journal. Dapita ang pipila kanila sa pagpasabut kon unsay ilang nakat-unan mahitungod sa kabubut-on gikan sa 2 Nephi 2:26–29.

Basaha og kusog ang mosunod nga pamahayag ni Propeta Joseph Smith:

“Aron makabaton og kaluwasan dili lamang kita kinahanglan nga magbuhat og pipila ka mga butang, apan sa tanang butang nga gisugo sa Dios” (Mga Pagtulun-an sa mga Presidente sa Simbahan: Joseph Smith [2007], 190).

Aron matabangan ang mga estudyante nga makasabut sa kaimportante sa pagkamasulundon, mahimo nimong ipangutana ang mosunod:

Sa inyong hunahuna nganong gihatagan man og gibug-aton ni Lehi ang pagkamasulundon diha sa katapusan niyang tambag ngadto sa iyang pamilya sa wala pa siya namatay?
Unsa ang inyong mga kasinatian nga nakatabang ninyo nga masayud nga panalanginan kita sa Ginoo kon mosunod kita sa Iyang mga sugo, ug pugngan Niya ang mga panalangin kon dili kita mosunod sa Iyang mga sugo? (Idugang kini nga kamatuoran ngadto sa lista diha sa pisara.)

Sa pagtapos niini nga leksyon, basaha ang mosunod nga pamahayag ni Presidente Boyd K. Packer, Presidente sa Korum sa Napulog Duha ka mga Apostoles:

“Ang pagkamasulundon usa ka gamhanan nga espirituhanong tambal. Hapit na kini makatambal sa tanan” (“Balm of Gilead,” Ensign, Nob. 1987, 18).

Ipakigbahin ang imong pagsaksi mahitungod sa gugma sa Dios alang sa imong mga estudyante ug sa Iyang tinguha sa pagtabang kanila nga mabuntog ang mga epekto sa Pagkapukan ug makadawat og kinabuhing dayon.

Sunod nga Unit (2 Nephi 4–10)

Human sa pagkamatay ni Lehi, nagtinguha na usab sila si Laman ug Lemuel sa pagkutlo sa kinabuhi ni Nephi. Unsa nga pasidaan ang gihatag sa Ginoo nga nakaluwas sa kinabuhi ni Nephi? Usab, unsay mahitabo sa atong mga lawas ug mga espiritu kon wala ang Pag-ula? Makit-an sa mga estudyante ang mga tubag niini nga pangutana diha sa 2 Nephi 9:7–9.