Leksyon 24
2 Nephi 2 (Part 2)
Pasiuna
Ang miaging leksyon sa 2 Nephi 2 naka-focus sa Pagkapukan ni Adan ug ni Eva ug sa Pag-ula ni Jesukristo. Kini nga leksyon nakasentro sa mga pagtulun-an ni Lehi bahin sa doktrina sa kabubut-on, lakip na sa kamatuoran nga gawasnon kita sa pagpili sa kalingkawasan ug kinabuhing dayon pinaagi ni Jesukristo.
Niini nga leksyon, ang mga estudyante makabaton og oportunidad sa pagtudlo sa usag usa. Sa dili pa ang klase, pag-andam og mga handout nga naglangkob sa mga instruksyon niini nga leksyon. I-pamilyar ang matag hugpong sa mga instruksyon aron makatabang ka sa mga estudyante samtang mangandam sila sa pagtudlo.
Mga Sugyot alang sa Pagtudlo
2 Nephi 2:11–18, 25–30
Nagtudlo si Lehi bahin sa kabubut-on ug sa mga sangputanan sa atong mga pagpili
Pahinumdumi sa daklit ang mga estudyante nga sa miaging leksyon, gitun-an nila ang mga pagtulun-an ni Lehi diha sa 2 Nephi 2 bahin sa Pagkapukan ni Adan ug ni Eva ug sa mga panalangin sa Pag-ula ni Jesukristo. Ang pagpili ni Adan ug ni Eva mitugot kanato nga makaanhi sa yuta (tan-awa sa 2 Nephi 2:25), diin makasinati kita og kagul-anan, kasakit, ug kamatayon. Pinaagi sa Pag-ula, si Jesukristo mitubos kanato gikan sa Pagkapukan ug mitanyag og katubsanan gikan sa atong mga sala (tan-awa sa 2 Nephi 2:26). Tungod sa Pag-ula, gawasnon kita sa pagpili sa kalingkawasan ug kinabuhing dayon o sa pagkabihag ug kamatayon (tan-awa sa 2 Nephi 2:27).
Ipasabut nga samtang magpadayon ang mga estudyante sa ilang pagtuon sa 2 Nephi 2 niini nga leksyon, makabaton sila sa oportunidad sa pagtudlo sa usag usa sa mga baruganan sa kabubut-on nga gipasabut ni Lehi ngadto sa iyang anak nga si Jacob. Bahina ang mga estudyante ngadto sa upat ka mga grupo. Hatagi ang matag grupo sa usa sa mosunod nga hugpong sa mga instruksyon aron matabangan sila nga makaandam sa pagtudlo (sa dili pa ang klase, pag-andam og mga handout nga naglangkob niining mga instruksyon). Kon ang klase mas minos sa upat ka mga estudyante, hatagi og hugpong sa mga instruksyon ang matag estudyante ug itudlo nimo mismo ang materyal nga nalangkob sa nahabiling mga hugpong.
Ang matag hugpong sa mga instruksyon naglangkob og lima ka mga assignment. Awhaga ang tanang mga estudyante sa pag-apil pinaagi sa pagsiguro nga ang matag tawo sa matag grupo makadawat og assignment. Sa mga grupo nga sobra sa lima, ang mga estudyante mahimong makigbahin sa mga assignment. Sa mga grupo nga mas minos sa lima ka mga estudyante, ang pipila ka mga indibidwal kinahanglan mobuhat og sobra sa usa ka assignment. Pahibaloa ang mga estudyante nga sila dunay mga tulo ka minuto sa pag-andam ug ang matag grupo dunay mga lima ka minutos sa pagtudlo.
Group 1: Ang Dios milalang kanato aron molihok
-
Iisa ang usa ka bato sa atubangan sa klase. Dapita ang usa ka estudyante sa pagbasa og kusog sa 2 Nephi 2:14. Sa dili pa siya mobasa, hangyoa ang klase sa pagpangita sa paghulagway ni Lehi sa duha ka matang sa mga butang nga gilalang sa Dios didto sa kalangitan ug sa yuta. (“Mga butang nga palihukon ug mga butang nga aghaton sa pagpalihok.”) Ipangutana: Sa unsang paagi nga kining bersikulo may kalabutan nato ug sa bato? (Gilalang kita aron palihukon, samtang ang bato gilalang nga aghaton sa pagpalihok. Ang bato, sama sa ubang mga gilalang, dili makalihok kon kini ra.)
-
Hangyoa ang usa ka estudyante sa pagbasa sa unang sentence sa 2 Nephi 2:16. Pangutan-a ang klase: Sa plano sa Langitnong Amahan sa kaluwasan, sa inyong hunahuna nganong importante man nga molihok kita alang sa atong kaugalingon? Human makatubag ang mga estudyante, ipangutana: Sa unsang paagi nga usahay maghulat kita nga pagaaghaton imbis nga molihok alang sa atong kaugalingon?
-
Isulat ang D&P 58:26–28 diha sa pisara. Dapita ang klase sa pagpakli ngadto niini nga tudling. Giyahi sila sa pagbasa niini og kusog nga magdungan.
-
Ipangutana: Unsay atong makat-unan gikan sa Doktrina ug mga Pakigsaad 58:26–28 bahin sa paglihok alang sa atong kaugalingon? Unsa ang pipila ka mga paagi nga matinguhaon kitang makaapil sa pagpahinabo sa daghan nga pagkamatarung? Kanus-a kamo nakakita nga ang inyong pagkugi nakapahinabo sa daghan nga pagkamatarung? (Human makatubag ang usa o duha ka mga estudyante, mahimo usab nga mopakigbahin ka og usa ka kasinatian.)
-
Ipakigbahin ang imong pagpamatuod mahitungod sa kaimportante sa paglihok alang sa atong kaugalingon ug sa pagtinguha sa pagpahinabo sa daghan nga pagkamatarung.
Group 2: Maayong pagdani ug dautang pagdani
-
Dapita ang usa ka estudyante sa pagbasa sa ikaduhang sentence sa 2 Nephi 2:16. Pangutan-a ang klase: Unsa ang gipasabut sa pulong nga pagdani? (Pagdapit, pag-agni, o pagkabig.)
-
Pangutan-a ang klase: Unsa ang pipila ka mga paagi sa pagdani sa Langitnong Amahan kanato sa pagbuhat og maayo? (Ang mga estudyante mahimong maghisgot sa mga pag-aghat gikan sa Espiritu Santo, gisaad nga mga panalangin tungod sa pagsunod sa mga sugo, ug mga pagtulun-an sa mga propeta sa ulahing mga adlaw.)
-
Basaha og kusog ang 2 Nephi 2:17–18, ug dapita ang mga estudyante nga magsunod diha sa ilang mga kasulatan. Hangyoa sila sa pag-ila kon unsay gitinguha sa yawa alang natong tanan. (Gusto siya nga mauyamot kita.)
-
Ipangutana: Sa unsang paagi nga kamo masayud kon hain nga mga pagdani ang nagagikan sa Dios ug hain ang nagagikan sa yawa? (Isip kabahin niini nga panaghisgutan, mahimo kang mo-refer sa Moroni 7:16–17.) Human makatubag ang klase, ipangutana: Unsa ang pipila ka mga ehemplo sa mga butang nga makapadani sa mga tawo nga mobuhat sa dautang paagi ug moresulta sa pagkauyamot?
-
Ipakigbahin ang imong pagpamatuod bahin sa mga pagdani sa Dios nga moresulta sa kamaayo ug kalipay ug sa mga pagdani sa yawa nga moresulta sa pagkadautan ug pagkauyamot. Isip kabahin sa imong pagpamatuod, mahimo nga mopakigbahin ka og usa ka kasinatian nga nagpakita kon giunsa nimo pagkasayud nga tinuod kini.
Group 3: Kita ang manubag sa atong mga pagpili
-
Basaha kini nga pamahayag ngadto sa klase:
“Gawasnon ka nga mopili ug molihok, apan dili ka gawasnon sa pagpili sa sangputanan sa imong mga binuhatan. Ang mga sangputanan mahimong dili diha-diha dayon, apan mosunod gayud kini” (Matinud-anon sa Tinuhoan: Usa ka Pakisayran sa Ebanghelyo [2004], 65).
Ipangutana: Unsa ang pipila ka mga ehemplo sa mga sangputanan nga mahimong dili diha-diha dayon apan mahimong moabut? (Usa ka posibling tubag mao nga ang kanser sa kasagaran moresulta gikan sa pagpanigarilyo.)
-
Dapita ang mga estudyante sa pagbasa og hilum sa 2 Nephi 2:26–27, nga mangita sa mga pulong nga nagpakita sa umaabut nga mga sangputanan sa mga pagpili nga atong gihimo karon. Hangyoa ang mga estudyante sa pagreport kon unsay ilang nakit-an. (Ang mga tubag mahimong maglakip sa “silot sa balaod sa mahinungdanon ug katapusan nga adlaw,” “kalingkawasan,” “kinabuhing dayon,” “pagkabihag,” “kamatayon,” ug “mauyamot.”) Isulat diha sa pisara ang mga tubag sa mga estudyante.
-
Ipangutana: Sa inyong hunahuna nganong importante man alang kanato nga masayud sa mga sangputanan sa atong mga pagpili niining kinabuhia? Human makatubag ang mga estudyante, ipangutana: Sa unsang paagi nga ang pagkasayud niining mga sangputanan makapadasig nato sa paghimo og matarung nga mga pagpili?
-
Ipasabut nga sa 2 Nephi 2:27, miingon si Lehi nga kita “gawasnon sa pagpili sa kalingkawasan.” Ipangutana: Sa inyong kasinatian, sa unsang paagi nga ang matarung nga mga pagpili makatabang nato nga magpabiling gawasnon nga mopili? Makahatag ba kamo og mga ehemplo niini? (Mangandam sa pagpakigbahin og kaugalingon nimong ehemplo.)
-
Ipakigbahin ang imong pagpamatuod nga kita ang manubag sa Dios sa atong mga pagpili ug ang mga sangputanan kanunay nga mosunod sa atong mga pagpili.
Group 4: Pagpili sa maayong bahin
-
Ipabasa og kusog sa usa ka estudyante ang 2 Nephi 2:28. Hangyoa ang klase sa pagpangita sa upat ka mga butang nga gitinguha ni Lehi alang sa iyang mga anak nga lalaki. Human mabasa ang bersikulo, dapita ang mga estudyante sa pagpakigbahin sa unsay ilang nakit-an.
-
Ipangutana: Unsa ang pipila ka mga paagi nga makatan-aw kita sa bantugang Tigpataliwala, si Jesukristo, nga motabang nato sa paghimo og matarung nga mga pagpili?
-
Dapita ang usa ka estudyante sa pagbasa og kusog sa 2 Nephi 2:29. Pangutan-a ang klase: Sa unsang paagi nga ang atong mga pagpili makahatag sa yawa og gahum sa pagbihag kanato? Isip kabahin niini nga panaghisgutan, ipasabut nga daghan sa mga pagtintal ni Satanas mo-target sa “kabubut-on sa tawo,” o sa atong pisikal nga mga gana. Kon monunot ang mga tawo niining mga pagtintal, mahimo silang maadik sa makadaut nga mga butang ug mga kinaiya. Basaha ang mosunod nga pamahayag ni Elder Russell M. Nelson sa Korum sa Napulog Duha ka mga Apostoles:
“Gikan sa inisyal nga eksperimento nga gihunahuna nga dili importante, mosunod ang usa ka magbalik-balik nga dautang binuhatan. Gikan sa pagsulay moabut ang usa ka gawi [habit]. Gikan sa usa ka gawi moabut ang pagdepende. Gikan sa pagdepende moabut ang pagkaadik. Ang pagkupot niini hinay-hinay. Ang makapaulipon nga mga higot sa gawi gamay ra kaayo aron mabantayan hangtud nga lig-on na kaayo kini aron putlon. … Ang pagkaadik motahan sa dili madugay sa kagawasan sa pagpili” (“Addiction or Freedom,” Ensign, Nob. 1988, 6–7).
Ipakigbahin ang imong pagpamatuod bahin sa pagkamatarung nga moresulta sa kagawasan gikan sa makadaut nga mga gawi ug mga pagkaadik.
-
Basaha ang 2 Nephi 2:30 ngadto sa klase. Samtang magsunod sila, dapita sila sa pag-focus niining mga pulong: “Ako mipili sa maayo nga bahin.” Ipangutana: Unsa ang gitudlo niini nga bersikulo bahin ni Lehi?
-
Hangyoa ang mga estudyante sa pagpamalandong sa mosunod nga mga pangutana: Kinsa man ang inyong nailhan nga “mipili sa maayo nga bahin” sama ni Lehi? Sa unsang mga paagi nga ganahan kamong mosunod sa ehemplo niini nga tawo? Human ang mga estudyante adunay igong panahon sa pagpamalandong, hangyoa ang usa o duha sa pagpakigbahin sa ilang mga hunahuna. Dayon ipakigbahin ang imong kaugalingong mga hunahuna.
Pahinumdom ngadto sa magtutudlo: Sa pagtapos, dapita ang mga estudyante sa pagpamalandong kon ang ilang mga pagpili nagdala ba nila paingon sa kalingkawasan ug kinabuhing dayon o paingon sa pagkabihag, espirituhanong kamatayon, ug pagkauyamot. Pasaligi ang mga estudyante nga ang bisan unsa nga dili maayong mga pagpili nga ila nang nabuhat mahimong mabuntog pinaagi sa hugot nga pagtuo diha ni Jesukristo ug paghinulsol. Pamatuod bahin sa Manluluwas, sa Iyang Pag-ula, ug sa Iyang abilidad sa paglig-on kanato sa atong mga paningkamot sa paghimo og mga pagpili nga moresulta sa kalipay ug kinabuhing dayon.
Scripture Mastery—2 Nephi 2:27
Aron matabangan ang mga estudyante nga mamemorya ang 2 Nephi 2:27, isulat sa pisara ang unang letra sa matag pulong, sama sa mosunod: B, a m t g s s u; u a t n m b g k d a n s t. U s g s p s k u s k n d, p s h n T s t n m t, o p s p u s k, s s p u s g s y; k s n n a t n m t u m n m s n k. (Mahimo usab nimong awhagon ang mga estudyante sa pagmarka niining tudling sa lahi nga paagi aron dali kining makit-an.)
Ipa-recite og dungan sa mga estudyante ang 2 Nephi 2:27 (gamit ang ilang mga kasulatan kon gikinahanglan) hangtud nga maka-recite sila sa tibuok nga bersikulo gamit lamang ang unang mga letra sa pagtabang kanila. Dayon papasa ang pipila ka mga letra ug ipa-recite na usab nila og dungan ang kasulatan. Ipadayon kini nga proseso hangtud nga ang tanang mga letra mapapas na ug ang klase maka-recite sa tibuok bersikulo gikan sa hunahuna. Isip kabahin niini nga kalihokan, mahimo nimong ipakigbahin ang mosunod nga pamahayag ni Elder Richard G. Scott sa Korum sa Napulog Duha ka mga Apostoles: “Ang namemorya nga kasulatan mao ang higalang molahutay nga dili magkahuyang sa paglabay sa panahon” (“Ang Gahum sa Kasulatan,” Ensign o Liahona, Nob. 2011, 6).
Pahinumdom: Mahimong aduna kay panahon sa paggamit niining kalihokan sa usa ka higayon niini nga leksyon. Kon ikaw walay panahon, ikonsiderar ang paggamit niini sa laing leksyon.
Komentaryo ug Background nga Impormasyon
2 Nephi 2:29. “Sa kabubut-on sa tawo ug sa dautan nga anaa niana”
Kini nga bersikulo wala magpasabut nga ang atong mga lawas dautan. Hinoon, naghulagway kini sa usa ka aspeto sa atong napukan nga kahimtang. Ang Matinud-anon sa Tinuhoan naglakip niining pagpasabut: “Niining napukan nga kahimtang, aduna kita’y panagbangi tali kanato. Kita espiritu nga mga anak sa Dios, nga may potensyal nga mahimong ‘mag-aambit sa diosnong kinaiya’ (2 Pedro 1:4). Bisan pa niana, ‘[kita] dili takus sa atubangan sa [Dios]; tungod sa pagkapukan ang [atong] mga kinaiyahan nahimo nga mangil-ad sa kanunay’ (Ether 3:2). Kinahanglan nga kanunay kita nga maningkamot sa pagbuntog sa dili matarung nga mga malawom nga pagbati ug mga tinguha” (Matinud-anon sa Tinuhoan: Usa ka Pakisayran sa Ebanghelyo [2004], 146).