2 Nephi 26–31 (Unit 8)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga summary sa mga doktrina ug mga baruganan nga nakat-unan sa mga estudyante samtang sila nagtuon sa 2 Nephi 26–31 (unit 8) dili tuyo nga itudlo isip kabahin sa imong leksyon. Ang leksyon nga imong itudlo mosentro lamang diha sa pipila niini nga mga doktrina ug mga baruganan. Sunda ang mga pag-aghat sa Balaang Espiritu samtang imong ikonsiderar ang mga panginahanglan sa imong mga estudyante.

Day 1 (2 Nephi 26–27)

Ang mga estudyante nagtuon sa mga panagna ni Nephi kalabut sa katapusang mga adlaw. Ilang nakat-unan nga ang tanang gibuhat sa Ginoo alang sa kaayohan sa kalibutan ug nga ang Ginoo nahigugma sa tanang katawhan ug nagdapit sa tanan nga moduol Kaniya ug moambit sa Iyang kaluwasan. Nadiskubrihan usab sa mga estudyante ang kamatuoran nga ang pag-abut sa Basahon ni Mormon usa ka paagi nga matuman sa Dios ang Iyang buhat sa ulahing mga adlaw. Agig dugang, ilang nakat-unan nga ang Basahon ni Mormon ug ang gipahiuli nga ebanghelyo makadala og hingpit nga kalipay ug panabut niadtong magtuon ug modawat niini.

Day 2 (2 Nephi 28)

Samtang nagtuon sa mga pasidaan ni Nephi bahin sa sayop nga mga pagtulun-an nga naglabi sa katapusang mga adlaw, nakat-unan sa mga estudyante nga ang Basahon ni Mormon mipakita sa sayop nga mga ideya sa yawa ug naglig-on kanato batok sa dautang mga tinguha. Dugang pa niana, ilang nakat-unan kon giunsa paggamit ni Satanas ang daghang mga taktika aron sa pagsulay sa pagbuntog kanato, sama sa pag-aghat kanato nga masuko, paghupay kanato ug pagpakatulog kanato, ug pag-ulog-ulog kanato.

Day 3 (2 Nephi 29–30)

Nakat-unan sa mga estudyante nga ang Ginoo mihatag sa mga kasulatan aron sa pagpundok sa katawhan ngadto sa Iyang pakigsaad ug nga ang Basahon ni Mormon makatabang sa tanang katawhan nga makaila kang Jesukristo ug motuman sa Iyang ebanghelyo. Gipakita sa Ginoo kang Nephi nga daghang mga tawo sa katapusang mga adlaw ang mosalikway sa Basahon ni Mormon. Ang mga estudyante dunay oportunidad nga maghunahuna bahin sa kaugalingon nilang kinabuhi ug sa unsang paagi nga ang ilang komunidad malahi panahon sa Milenyum tungod kay si Satanas wala nay gahum sa mga kasingkasing sa mga tawo, ug ang pagkamatarung ug kalinaw maoy mopatigbabaw.

Day 4 (2 Nephi 31)

Ang mosunod nga mga kamatuoran kalabut sa doktrina ni Kristo ug ang ehemplo sa Manluluwas gihatagan og gibug-aton: Gituman ni Jesukristo ang tanang pagkamatarung pinaagi sa pagtuman sa tanang mga sugo sa Amahan, ug kinahanglan gayud kitang mosunod sa ehemplo sa pagkamasulundon ni Jesukristo pinaagi sa pagpabunyag ug pagdawat sa Espiritu Santo. Ang Espiritu Santo nagsaksi sa Amahan ug sa Anak ug nagdala og kapasayloan sa mga sala. Kon magpuyo kita sumala sa doktrina ni Kristo, makadawat kita og kinabuhing dayon.

Pasiuna

Kini nga leksyon naghatag og gibug-aton nga tanang gibuhat sa Langitnong Amahan alang sa kaayohan sa kalibutan ug nadasig pinaagi sa gugma alang sa Iyang mga anak. Kini nga leksyon naghisgot usab kon giunsa pagpakita sa Basahon ni Mormon ang sayop nga mga pagtulun-an ni Satanas nga naglabi sa atong panahon ug sa unsang paagi nga ang kinabuhing dayon moabut ngadto niadtong mosunod sa doktrina ni Kristo.

Mga Sugyot alang sa Pagtudlo

Pangutan-a ang mga estudyante kon sila duna bay mga hunahuna o ideya gikan sa ilang pagtuon sa kasulatan nga gusto nilang ipakigbahin sa klase sa dili pa nimo sugdan ang leksyon. Awhaga ang mga estudyante nga mangutana bisan unsa nga mga pangutana bahin sa ilang gitun-an. Dapita sila sa pagsulat og espirituhanong mga impresyon nga ilang nadawat samtang nagbasa ug namalandong sila sa mga kasulatan ug sa ilang mga assignment. Modapit kini sa espiritu sa pagpadayag ngadto sa ilang kinabuhi.

Hangyoa ang mga estudyante sa pagtabang nimo sa paglista diha sa pisara o diha sa piraso nga papel sa pipila ka mga tubag sa mosunod nga pangutana: Kon nasayud mo nga ang inyong panahon sa yuta hapit na matapos ug mahimo kamong mosulat nga mabasa sa inyong kaliwatan ug sa tibuok kalibutan, unsa nga mga hilisgutan ang inyong pilion nga iapil sa inyong mensahe?

Dapita ang mga estudyante nga mopakli og daklit sa 2 Nephi 26–31 ug sa ilang mga scripture study journal aron makita kon unsa nga mga hilisgutan ang gihisgutan ni Nephi samtang nagkaduol na siya sa katapusan sa iyang kinabuhi. Itandi kon unsay ilang nakit-an ngadto sa mga tubag nga ilang gisulat sa pisara. Ang katapusang tambag ni Nephi gisulat alang kanato nga nagpuyo sa katapusang mga adlaw ug naglangkob og mga timaan aron sa pagtabang kanato nga makaila sa kamatuoran, malikayan ang mga babag ni Satanas, ug mosunod sa doktrina ni Jesukristo.

2 Nephi 26

Human nanagna si Nephi kalabut sa pagkalaglag sa iyang katawhan, nanagna siya bahin sa katapusang mga adlaw ug nagdapit sa tanan nga moduol kang Kristo

Dapita ang mga estudyante sa pagbasa sa 2 Nephi 26:29–31 ug mangita sa usa sa mga taktika ni Satanas nga gipasidaan ni Nephi kanato. Human makatubag ang pipila ka mga estudyante sa unsay ilang nakit-an, ipangutana ang mosunod:

Sumala sa 2 Nephi 26:29, unsa man ang mga panapi sa mga pari?
Unsa man ang nakapadasig sa uban nga mobuhat og panapi sa mga pari?
Unsa man ang gipaabut sa Ginoo nga makapadasig kanato samtang nagtrabaho kita diha sa Simbahan? Kinsa ang inyong nailhan nga usa ka maayong ehemplo bahin niini?

Ribyuha ang 2 Nephi 26:23–28, 33 ug ang day 1, assignment 3. Ipangutana: Unsay nakapadasig sa Ginoo diha sa Iyang pagbuhat?

Human makatubag ang pipila ka mga estudyante, ipatubag sa klase ang mosunod nga mga pangutana:

Unsa nga mga pulong diha sa 2 Nephi 26:23–28, 33 ang nagtudlo kanato nga ang Ginoo nahigugma sa tanang katawhan ug nagdapit sa tanan nga moduol Kaniya ug moambit sa Iyang kaluwasan ug nga ang tanan nga gibuhat sa Ginoo alang sa kaayohan sa kalibutan?
Nganong importante alang kanato nga madasig pinaagi sa gugma alang sa uban imbis nga pinaagi sa kahakog nga makadawat og pagdayeg gikan sa uban?
Sa inyong hunahuna sa unsang paagi nga kita mahimong mas matinabangon, mahigugmaon, ug sama kang Kristo diha sa atong mga gipangbuhat sa Simbahan?

2 Nephi 28

Nagpasidaan si Nephi bahin sa mga pagpanglingla ni Satanas

Sultihi ang mga estudyante nga diha sa 2 Nephi 28, nagpadayon si Nephi sa pagpakita sa sayop nga mga ideya nga gitudlo sa yawa. Ribyuha ang “sayop ug kawang ug binuang nga mga doktrina” nga gihulagway diha sa 2 Nephi 28:3–9, ug ipangutana sa mga estudyante ang mosunod nga mga pangutana. Mahimo nilang iapil ang mga tubag nga ilang gisulat diha sa ilang mga scripture study journal sa miaging semana.

Unsay buot ipasabut sa “pagpahimulos sa usa tungod sa iyang mga pulong”? (2 Nephi 28:8). (Sama pananglit sa pagbiay-biay sa uban ug sayop nga pagkutlo o pagpasulabi sa unsay gisulti sa uban.)
Sa unsang mga paagi ang mga tawo karon “[n]agkalot og gahong” (2 Nephi 28:8) alang sa ilang silingan?
Unsa ang peligro sa pagsulay sa pagtago sa mga sala gikan sa Ginoo o sa pagpabilin sa atong mga binuhatan diha sa kangitngit? (Tan-awa sa 2 Nephi 28:9.)
Unsang sayop nga pagtulun-an diha sa 2 Nephi 28:3–9 sa inyong hunahuna ang labing makadaut sa mga kabatan-onan karon? Sa inyong hunahuna nganong makadaut man kini? Sa unsang paagi nga ang mga kabatan-onan maagni nianang sayop nga pagtulun-an? (Tan-awa sa day 2, assignment 1.)

Ribyuha ang 2 Nephi 28:20–23 ug ang istorya ni Presidente Boyd K. Packer bahin sa espirituhanong mga buaya gikan sa day 2 nga leksyon. Dapita ang mga estudyante sa pagpakigbahin sa klase sa mga timaan nga pasidaan [warning sign] nga ilang gidrowing diha sa ilang mga scripture study journal (day 2, assignment 5) nga naghulagway sa espirituhanong mga peligro nga sa ilang hunahuna gikinahanglan sa mga kabatan-onan aron mapasidan-an karon.

Ipangutana: Sa tanang mga butang nga masulat ni Nephi sa pagtapos niya sa iyang rekord, sa inyong hunahuna ngano kaha nga nagsulat man siya bahin sa mga pagpanglingla ug mga taktika ni Satanas? (Mahimo nimong ipamatuod ang bahin sa tabang ug kalig-on nga atong madawat aron sa pagbatok sa mga taktika ni Satanas samtang magtuon kita og maayo sa Basahon ni Mormon.)

2 Nephi 31

Nagtudlo si Nephi kon giunsa sa pagpakita sa Manluluwas og hingpit nga ehemplo alang kanato

Pagdrowing og simple nga litrato sa usa ka dalan nga nagpadulong sa usa ka ganghaan. Dapita ang mga estudyante sa pagbasa sa 2 Nephi 31:17–18 ug mangita kon giunsa paggamit ni Nephi kini nga hulagway sa usa ka dalan ug sa usa ka ganghaan aron hatagan og gibug-aton ang bugtong paagi sa pagduol ngadto ni Jesukristo. Dayon ipangutana ang mosunod:

Sumala niini nga mga bersikulo, unsay girepresentar sa ganghaan ug sa dalan? (Ang ganghaan nagrepresentar sa paghinulsol, bunyag, ug sa pagdawat sa Espiritu Santo.)
Gikan sa inyong nakat-unan sa inyong personal nga pagtuon sa 2 Nephi 31, nganong ang pagdawat sa Espiritu Santo nagpasabut man isip “bunyag sa kalayo”? (Tan-awa sa 2 Nephi 31:13; tan-awa usab sa bersikulo 17.)

Dapita ang usa ka estudyante sa pagbasa og kusog sa 2 Nephi 31:19–21. Hangyoa ang mga estudyante nga mangita sa unsay gikinahanglan kanato human nga makaagi kita sa “ganghaan.” Human makatubag ang mga estudyante sa unsay ilang nakit-an, ipangutana ang mosunod:

Sa inyong hunahuna unsa man ang gipasabut ni Nephi sa dihang siya misulat, “kini mao ang doktrina ni Kristo”? (2 Nephi 31:21).
Ikonsiderar kon unsay inyong gitun-an karon, sa inyong hunahuna unsa may gusto sa Langitnong Amahan nga inyong buhaton aron matabangan kamo nga mouswag diha sa higpit ug pig-ot nga dalan? (Mahimo nimong awhagon ang mga estudyante sa paghimo og tumong agig tubag niini nga pangutana.)

Sunod nga Unit (2 Nephi 32–Jacob 4)

Ganahan mong mokaon? Sa sunod nga unit, ang mga estudyante makakat-on bahin kon unsay gipasabut sa “pagbusog sa mga pulong ni Kristo” (2 Nephi 32:3). Unsaon sa usa ka propeta pagkorihir ang mga tawo nga nasugdan na pagkaimpluwensya sa gugma sa katigayunan o sa mga kalalakin-an nga misupak sa balaod sa kaputli? Bantayi kon giunsa pagsulbad ni Jacob kini nga mga problema.