2 Nephi 11 ug 16

Pasiuna

Diha sa 2 Nephi 11, gipahayag ni Nephi ang iyang gugma alang sa mga pulong ni Isaias. Mipamatuod usab siya nga sila si Jacob ug Isaias nakakita sa “Manunubos, gani sama nga ako nakakita kaniya” (2 Nephi 11:2). Ang 2 Nephi 16 naglangkob sa istorya ni Isaias nga nalimpyuhan sa iyang mga sala ug gitawag isip usa ka propeta sa dihang siya “nakakita … sa Ginoo nga naglingkod sa trono” (tan-awa sa 2 Nephi 16:1, 5–8). Sila si Nephi ug Jacob nagtudlo sa bili sa pagpahisama sa mga sinulat ni Isaias ngari sa atong kaugalingon (tan-awa sa 1 Nephi 19:23; 2 Nephi 6:5; 11:2), ug ang Ginoo namahayag, “mahinungdanon ang mga pulong ni Isaias” (3 Nephi 23:1). Ang 2 Nephi 11 naglangkob sa pipila ka pagpasabut ni Nephi alang sa paglakip niya sa mga panagna ni Isaias diha sa iyang rekord, sa ingon nagsilbi isip pasiuna sa mga pulong ni Isaias diha sa 2 Nephi 12–24. Ang 2 Nephi 25 nagsilbi isip panapos niining mga kapitulo, nga naglangkob sa tambag ni Nephi kon unsaon pagsabut sa mga pulong ni Isaias (tan-awa sa leksyon 35 niini nga manwal).

Mga Sugyot alang sa Pagtudlo

2 Nephi 11

Gipahayag ni Nephi ang iyang kahimuot sa pagpamatuod nga ang kaluwasan moabut pinaagi ni Jesukristo

Dapita ang tulo ka mga estudyante nga hilum nga mosulat og usa ka sentence ang matag usa bahin sa unsay nahitabo sa miagi nga klase. Ayaw sila tuguti nga motandi o mohisgot sa unsay ilang gisulat. Aron mapakita ang mga kaayohan sa pagbaton og sobra sa usa ka saksi, ipabasa og kusog sa tulo ka mga estudyante ang ilang mga sentence. Human mabasa sa unang estudyante ang iyang sentence, pangutan-a ang klase kon kompleto ba kini nga representasyon sa unsay nahitabo sa ilang miagi nga klase. Dayon ipakigbahin sa ikaduhang estudyante ang iyang sentence, ug ipangutana kon kompleto ba kini nga representasyon sa ilang miagi nga klase. Human makabasa ang ikatulong estudyante, ipangutana ang sama nga pangutana:

Unsa ang mga kaayohan kon dunay daghang mga saksi?

Ipasabut nga ang Ginoo mitawag og mga propeta nga mahimo Niyang mga saksi sa kalibutan. Awhaga ang mga estudyante sa pagpamalandong kon unsay kahulugan niini ngadto kanila nga makadungog sa mga propeta nga magpamatuod bahin ni Jesukristo.

Isulat sa pisara ang mosunod nga pamahayag: Pinaagi sa pagtuon sa mga pagpamatuod sa mga propeta bahin ni Jesukristo, mapalig-on nato ang atong pagtuo diha ni Jesukristo ug magmaya diha Kaniya.

Dapita ang usa ka estudyante sa pagbasa sa 2 Nephi 11:2–3.

Sumala niini nga mga bersikulo, unsay nasinati nila ni Nephi, Isaias, ug Jacob nga nakapahimo kanila nga espesyal nga mga saksi ni Jesukristo?
Sa inyong hunahuna nganong importante man nga dunay saksi ni Jesukristo gikan sa daghang mga propeta? (Tan-awa usab sa Mosiah 13:33–35.)

Dapita ang mga estudyante sa pag-scan sa unang mga linya sa matag bersikulo diha sa 2 Nephi 11:4–6, nga mangita sa mga pulong nga gibalik-balik ni Nephi sa matag bersikulo.

Unsay buot ipasabut sa “mahimuot sa” usa ka butang? (Mahimo nimong ipasabut nga ang pulong nga mahimuot nagsugyot sa usa ka pagbati nga mas lawom pa kay sa nagustohan lamang o nainteresado sa usa ka butang. Nagpasabut kini og usa ka kasinatian sa kalipay ug katagbawan.)

Ipabasa og hilum sa mga estudyante ang 2 Nephi 11:4–7, nga motino sa mga butang nga nakapahimuot ni Nephi. Ipares-pares dayon ang mga estudyante. Hangyoa ang mga estudyante sa pagpakigbahin sa mga pulong nga nakatandog gayud nila ug ngano man. Dapita usab sila sa pagpakigbahin kon unsay nakapahimuot kanila o nakapamaya kanila bahin ni Jesukristo.

Basaha og kusog ang 2 Nephi 11:8, ug ipapangita sa mga estudyante ang mga rason nganong gilakip ni Nephi ang mga sinulat ni Isaias diha sa iyang rekord.

Unsay gilauman ni Nephi nga masinati sa iyang katawhan ug sa umaabut nga mga magbabasa sa Basahon ni Mormon kon makabasa sila sa mga pulong ni Isaias?

Ang mosunod nga lista naghatag sa pipila ka mga ehemplo kon nganong gilakip ni Nephi ang mga sinulat ni Isaias diha sa iyang rekord:

Nakakita si Isaias sa Manluluwas, sama sa nahitabo nila ni Nephi ug Jacob (tan-awa sa 2 Nephi 11:2–3; tan-awa usab sa 2 Nephi 16:1–5, nga naglakip sa paghulagway ni Isaias sa usa ka panan-awon diin nakita niya ang Manluluwas).
Nahimuot si Nephi sa pagpamatuod bahin ni Kristo, ug mipamatuod usab si Isaias bahin ni Kristo (tan-awa sa 2 Nephi 11:4, 6; tan-awa usab sa 2 Nephi 17:14 ug 19:6–7, duha ka mga ehemplo sa mga panagna ni Isaias bahin sa Manluluwas).
Nahimuot si Nephi diha sa mga pakigsaad sa Ginoo (tan-awa sa 2 Nephi 11:5). Ang mga panagna ni Isaias may kalabutan sa mga pakigsaad sa Ginoo. Pananglitan, nanagna siya bahin sa buhat sa templo sa ulahing mga adlaw (tan-awa sa 2 Nephi 12:1–3).

Ipasabut nga niini nga leksyon ug sa nagsunod nga tulo, ang mga estudyante magtuon ug maghisgot sa mga pulong ni Isaias diha sa 2 Nephi 12–24. Awhaga sila nga mangita sa mga kamatuoran niini nga mga kapitulo nga makapalig-on sa ilang mga pagpamatuod bahin sa Manluluwas ug makatabang kanila nga magmaya diha Kaniya. Dapita ang mga estudyante sa pagpakigbahin sa ilang paborito nga mga bersikulo gikan niining mga kapitulo uban sa mga sakop sa ilang pamilya ug mga higala.

2 Nephi 16

Gitawag si Isaias nga magserbisyo isip usa ka propeta

Ipasabut nga sunod nga tun-an sa klase ang 2 Nephi 16 tungod kay naglangkob kini sa istorya bahin sa usa ka panan-awon diin iyang nadawat ang tawag nga mahimong usa ka propeta. Aron matabangan ang mga estudyante nga maandam sa pagsabut niining panan-awon, ipasabut nga ang mga sinulat ni Isaias naglakip sa simbolikanhong pinulongan. Ang mga kasulatan puno sa mga simbolo, mga paghulagway, ug mapasumbingayon nga mga pagpahayag. Ipasabut nga sa usa sa mga bersikulo nga ilang nabasahan sa sayo pa, namahayag si Nephi, “Ang tanan nga mga butang diin gikahatag sa Dios gikan sa sinugdanan sa kalibutan, ngadto sa tawo, mao ang naghulagway [ni Jesukristo]” (2 Nephi 11:4). Ang paggamit sa mga simbolo ug mga paghulagway usa ka paagi sa pagtudlo sa mga kasulatan kanato bahin sa makaluwas nga misyon sa Ginoo.

Isulat diha sa pisara ang mosunod nga mga pulong: kapa, serafines (mga anghel) nga ang matag usa dunay unom ka mga pako, aso, nagsiga nga uling.

Pangutan-a ang mga estudyante kon unsay mosantup sa ilang mga hunahuna kon makakita o makadungog sila niining mga pulong. Human sa mubo nga panaghisgutan, ipasabut nga gigamit ni Isaias kining mga pulong diha sa iyang istorya bahin sa iyang tawag nga mahimong usa ka propeta sa Dios. (Sulayi sa pagtabang ang mga estudyante nga masabtan ang mga kahulugan nga gitinguha ni Isaias. Pagbantay nga dili masobrahan og analisar ang mga kahulugan sa simbolikanhong pinulongan. Hinoon, tabangi ang mga estudyante nga makita kon sa unsang paagi nga ang mensahe ni Isaias magamit diha sa ilang kinabuhi.)

Dapita ang usa ka estudyante sa pagbasa sa 2 Nephi 16:1. (Kon ang mga estudyante dunay access sa edisyon sa Mga Santos sa Ulahing mga Adlaw sa King James Version sa Biblia, mahimo nimo silang papaklion ngadto sa Isaias 6, nga naglangkob sa mga footnote ug mga tabang sa pagtuon nga makapalambo sa panabut bahin sa mga tudling sa kasulatan nga mahisgutan niini nga leksyon.)

Ipasabut nga dinhi niini nga bersikulo, ang pulong nga kapa nagpasabut sa sidsid o pinil-an sa usa ka kupo.

Dapita ang usa ka estudyante sa pagbasa og kusog sa 2 Nephi 16:2–3. Ipasabut nga ang “serafines” mga anghel nga nagpuyo sa presensya sa Dios.

Unsa ang girepresentar sa unom ka mga pako sa serafines? (Mahimo nimong isugyot nga basahon sa mga estudyante ang Doktrina ug mga Pakigsaad 77:4 alang sa usa ka timailhan. Ang imahe sa mga pako nagsimbolo sa gahum sa paglihok ug sa pagbuhat.)
Unsa nga mga pulong ang nagpakita sa kinaiya sa serafines ngadto sa Ginoo?
Kanus-a ninyo nabati ang susama nga kinaiya ngadto sa Dios?

Ipabasa og kusog sa usa ka estudyante ang 2 Nephi 16:4 ug Pinadayag 15:8. Hangyoa ang klase sa pagpangita sa kahulugan sa mga pulong nga “napuno sa aso.” (Mahimong kinahanglan nimong tabangan ang mga estudyante nga makasabut nga ang aso nagrepresentar sa presensya, gahum, ug himaya sa Ginoo.) Ikonsiderar ang pagsugyot nga isulat sa mga estudyante ang Pinadayag 15:8 diha sa margin sa ilang mga kasulatan tupad sa 2 Nephi 16:4.

Dapita ang usa ka estudyante sa pagbasa og kusog sa 2 Nephi 16:5. Hangyoa ang klase sa pagpangita sa mga pulong nga nagpahayag kon unsay gibati ni Isaias diha sa presensya sa Ginoo. (Kon anaa ang edisyon sa Mga Santos sa Ulahing mga Adlaw sa King James Version sa Biblia, ipapangita sa mga estudyante ang Isaias 6:5, mga footnote a ug b.)

Sa inyong hunahuna unsa man ang gipasabut ni Isaias sa dihang siya miingon, “Patay na ako; tungod kay usa ako ka tawo nga mahugaw og mga ngabil”? (Mahimong kinahanglan nimong ipasabut nga diha sa Isaias 6:5, ang pulong nga patay gihubad gikan sa Hebreohanon nga pulong nga nagpasabut og “nalaglag,” ug ang mga pulong nga mahugaw og mga ngabil nagpasabut sa kasayuran ni Isaias bahin sa iyang mga sala ug sa mga sala sa iyang mga katawhan. Gipahayag ni Isaias nga mibati siya nga dili takus nga mahimutang sa presensya sa Ginoo.)

Hatagi ang mga estudyante og higayon aron mamalandong nganong mibati si Isaias niining paagiha. Ipasabut nga pipila ka mga propeta ang mipahayag kon unsa ang ilang gibati nga dili angayan sa dihang nadawat nila ang ilang mga tawag. Gihulagway ni Presidente Spencer W. Kimball ang tawag sa telepono diin si Presidente J. Reuben Clark Jr. sa Unang Kapangulohan mipahibalo kaniya nga gitawag siya ngadto sa Korum sa Napulog Duha:

“‘Oh, Brother Clark! Dili ako? Dili tingali ako ang buot nimong ipasabut no? Duna man gyuy sayop ani ba. Sigurado kong nasayop ra ko sa akong nadungog nimo.’ Nahitabo kini samtang nalahus ko sa salog sa ako untang paglingkod. …

“‘Oh, Brother Clark! Morag imposible gayud kini. Huyang kaayo ako ug dili importante ug limitado ug dili makahimo’” (Edward L. Kimball ug Andrew E. Kimball Jr., Spencer W. Kimball: Twelfth President of The Church of Jesus Christ of Latter-day Saints [1977], 189).

Tabangi ang mga estudyante nga makasabut nga si Isaias, nga usa ka matarung nga tawo, mibati nga “patay” ug “mahugaw” diha sa presensya sa Ginoo. Kinsa man kanato ang dili mobati nga dili takus nga mobarug sa atubangan sa Dios?

Isulat sa pisara ang mosunod nga kamatuoran: Mahimo kitang malimpyuhan sa atong pagkadili takus pinaagi sa Pag-ula ni Jesukristo.

Kon posible, ipakita sa mga estudyante ang usa ka pirasong uling o usa ka nasunog nga piraso sa kahoy. Pangutan-a sila kon unsa kaha kini tan-awon kon bag-o pa lang kining gikuha gikan sa kalayo.

Unsa ang mahitabo sa usa ka tawo nga mihikap sa init nga uling?

Basaha og kusog ang 2 Nephi 16:6–7. Hangyoa ang mga estudyante nga mosunod sa pagbasa og hilum, nga mangita sa kasinatian ni Isaias nga naglambigit sa usa ka nagsiga nga uling. (Kon anaa ang edisyon sa Mga Santos sa Ulahing mga Adlaw sa King James Version sa Biblia, ipapangita sa mga estudyante ang Isaias 6:6, footnote a, ug Isaias 6:7, mga footnote a ug b.)

Sumala sa 2 Nephi 16:7, unsa may kahulugan niini sa dihang ang anghel simbolikanhong mihikap sa mga ngabil ni Isaias gamit ang usa ka init nga uling? (Mahimong kinahanglan nimong ipasabut nga ang nagsiga nga uling usa ka simbolo sa paglimpyo. Sa dihang ang anghel diha sa panan-awon ni Isaias mihikap sa iyang mga ngabil gamit ang uling, nagrepresentar kini sa paglimpyo sa Ginoo ni Isaias sa iyang pagkadili takus ug mipasaylo kaniya sa iyang mga sala.)

Hatagi ang mga estudyante og pipila ka gutlo sa paghunahuna og mga panahon sa dihang nakasinati sila sa makapalimpyo nga gahum sa Pag-ula ni Jesukristo.

Dapita ang mga estudyante sa pagbasa og hilum sa 2 Nephi 16:8–13. Dapita ang usa ka estudyante sa pag-summarize sa unsay giingon sa Ginoo bahin sa pangalagad ni Isaias taliwala sa mga katawhan. (Mahimong kinahanglan nimong ipasabut nga gitambagan sa Ginoo si Isaias nga ang iyang pagsangyaw ngadto sa masinupakong mga Israelite ibaliwala lamang gayud apan kinahanglan siya nga magpadayon sa pagsangyaw hangtud nga “ang yuta maawaaw sa hingpit.” Sa ato pa, ang Ginoo mopadayon sa Iyang misyon sa pagluwas pinaagi sa iyang mga sulugoon “samtang ang panahon mohangtud, o ang yuta mobarug, o adunay usa ka tawo diha sa nawong niini nga pagaluwason” [Moroni 7:36].)

Ipasabut nga si Isaias nahimong usa ka gamhanang saksi ni Ginoong Jesukristo ug sa Iyang ebanghelyo. Ipamatuod nga ang Manluluwas tinuod ug makapasaylo kanato sa atong mga sala, ug nga samtang makasinati kita sa gahum sa Pag-ula diha sa atong kinabuhi, kita usab mahimong mga saksi sa Manluluwas.

Komentaryo ug Background nga Impormasyon

2 Nephi 16:2–3. Duna bay mga pako ang mga anghel?

“Ang anghel sa Dios wala gayuy mga pako” (Joseph Smith, sa History of the Church, 3:392). Nan nganong gihulagway man ni Isaias ang mga anghel nga dunay mga pako? Si Elder Bruce R. McConkie mipasabut nga ang paghulagway simbolikanhon: “Ang kamatuoran nga kining balaang mga nilalang gipakita ngadto kaniya nga dunay mga pako usa lamang ka pagsimbolo sa ilang ‘gahum, sa paglihok, sa pagbuhat, ubp.’ nga mao usab ang nahitabo diha sa mga panan-awon nga nadawat sa uban. (D. & P. 77:4.)” (Mormon Doctrine, 2nd ed. [1966], 703).