2 Nephi 11–25 (Unit 7)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga summary sa mga doktrina ug mga baruganan nga nakat-unan sa mga estudyante samtang nagtuon sila sa 2 Nephi 11–25 (unit 7) dili tuyo nga itudlo isip kabahin sa imong leksyon. Ang leksyon nga imong itudlo mosentro lamang diha sa pipila niini nga mga doktrina ug mga baruganan. Sunda ang mga pag-aghat sa Balaang Espiritu samtang imong ikonsiderar ang mga panginahanglan sa imong mga estudyante.

Day 1 (2 Nephi 11–16)

Gihulagway ni Isaias ang garbo ug pagkadautan sa karaang Israel ug ang mga paghukom nga naghulat kanila. Nanagna usab siya bahin sa usa ka templo nga pagatukuron sa katapusang mga adlaw ug nagtudlo nga giestablisar sa Dios ang mga templo aron sa pagtudlo kanato sa Iyang mga paagi ug sa pagtabang kanato nga maglakaw diha sa Iyang mga dalan. Nakita ni Isaias ang Ginoo ug nalimpyuhan gikan sa sala. Gikan sa kasinatian ni Isaias, nakat-unan sa mga estudyante nga mahimo kitang malimpyuhan sa atong pagkadili takus pinaagi sa Pag-ula ni Jesukristo.

Day 2 (2 Nephi 17–20)

Gipanton ni Isaias ang gingharian sa Juda tungod sa pagkapakyas sa pagbutang sa ilang pagsalig diha sa Langitnong Amahan ug ni Jesukristo. Nakat-unan sa mga estudyante nga ang Dios magauban kanato kon ibutang nato ang atong pagsalig diha Kaniya, bisan atol sa mga panahon sa kalisdanan ug kahadlok. Gihulagway ni Isaias ang pagkalaglag sa dautan atol sa Ikaduhang Pag-anhi ug nagtudlo nga si Jesukristo mao ang Dios sa paghukom ug kalooy, ug ang Iyang kalooy gipadangat ngadto niadtong maghinulsol ug motuman sa Iyang mga sugo.

Day 3 (2 Nephi 21–24)

Niini nga leksyon, nakat-unan sa mga estudyante nga si Jesukristo mohukom diha sa pagkamatarung ug nga sa katapusan, pinaagi ni Propeta Joseph Smith, ipahiuli sa Ginoo ang Iyang Simbahan aron sa pagpundok sa Iyang katawhan sa katapusang mga adlaw. Nahimuot usab si Nephi sa panagna ni Isaias nga panahon sa Milenyum, ang kalinaw ug ang kasayuran sa Ginoo mopuno sa yuta. Giawhag ang mga estudyante sa paghunahuna bahin niini nga kamatuoran ug sa unsang paagi nga mas maandam sila alang niining panahona.

Day 4 (2 Nephi 25)

Samtang gi-summarize ni Nephi ang nag-unang mga mensahe sa mga sinulat ni Isaias, giribyu niya ang yano nga mga kamatuoran kalabut sa buhat sa Dios taliwala sa katawhan: si Jesukristo mao lamang ang ngalan ubos sa langit “diin ang tawo mahimo nga maluwas” (2 Nephi 25:20), ug si Jesukristo mao lamang ang tinubdan nga mahimo kitang modangup alang sa kapasayloan sa atong mga sala. Gusto ni Nephi nga masayud ang tanan nga kon atong buhaton ang “tanan nga atong mabuhat,” panalanginan kita ni Jesukristo og grasya—balaanong tabang ug kalig-on (tan-awa sa 2 Nephi 25:23).

Pasiuna

Karong semanaha gitun-an sa mga estudyante ang pinili nga mga kapitulo sa Isaias nga gilakip ni Nephi diha sa iyang mga sinulat. Miingon si Presidente Boyd K. Packer sa Korum sa Napulog Duha ka mga Apostoles bahin niining mga kapitulo ni Isaias: “Ayaw og hunong sa pagbasa! Padayon agi niadtong lisud sabton nga mga kapitulo bahin sa panagna sa Daang Tugon, bisan kon gamay ra kaayo ang inyong nasabtan niini. Padayon, kon ang tanan ninyong mabuhat mao ang paspas nga pagbasa ug pagkuha og gamay lang nga impresyon dinhi ug didto” (“The Things of My Soul,” Ensign, Mayo 1986, 61).

Sa pagpakigkita nimo sa mga estudyante karong semanaha, awhaga sila nga magmapailubon samtang magtuon sila sa mga pulong ni Isaias. Mahimo usab nimo silang dapiton sa pagpakigbahin kon sa unsang paagi nga ang mga sinulat ni Isaias nakatabang kanila nga “mobayaw sa ilang mga kasingkasing ug magmaya” diha sa pagkamaayo sa Dios (2 Nephi 11:8).

Mga Sugyot alang sa Pagtudlo

2 Nephi 11–25

Gikutlo ni Nephi ang mga panagna ni Isaias bahin ni Jesukristo

Pag-display og magnifying glass o pagdrowing og hulagway niini diha sa pisara. Dapita ang usa ka estudyante sa pagbasa og kusog sa 2 Nephi 25:13. Hangyoa ang klase sa pagpangita kon unsay “napalambo” ni Nephi. Ipasabut nga usa ka rason nga girekord ni Nephi ang mga pulong ni Isaias, nga makita diha sa 2 Nephi 11–25, mao nga mapalambo ang ngalan, pangalagad, ug Pag-ula ni Jesukristo diha sa kinabuhi niadtong mobasa sa mga pulong ni Nephi.

Ipabasa og kusog sa usa ka estudyante ang 2 Nephi 11:4–8. Hangyoa ang klase sa pagpangita sa mga pulong nga nagtino sa mga katuyoan ni Nephi sa pagkutlo sa mga pulong ni Isaias.

Sa ilang pagtuon diha sa panimalay, gihangyo ang mga estudyante nga markahan ang ngalan nga “Kristo” sa matag higayon nga makita kini diha sa 2 Nephi 25:20–30. Dapita sila sa pagpakli sa 2 Nephi 25:28–29 ug mangita sa mga pulong nga gibalik-balik diha niining mga bersikulo. (“Ang matarung nga paagi mao ang pagtuo diha kang Kristo ug dili molimud kaniya.”)

Pangutan-a ang mga estudyante: Unsa nga mga kasinatian sa inyong kinabuhi ang nagtudlo kaninyo nga ang pagtuo ug pagsunod kang Jesukristo mao ang hustong paagi sa pagpakabuhi?

Ang mosunod nga lista naglangkob sa mga kamatuoran, mga doktrina, ug mga baruganan nga gitun-an sa mga estudyante diha sa 2 Nephi 11–25 karong semanaha. Isulat sa pisara ang mosunod nga siyam ka mga pamahayag o iapil kini sa usa ka handout alang sa matag estudyante. Dapita ang mga estudyante sa pagbasa sa lista ug sa pagpangita alang niining mga kamatuoran, mga doktrina, ug mga baruganan diha sa mga bersikulo nga gihisgutan.

Pagsabut sa mga Pagtulun-an ni Isaias sa Atong Panahon

Giestablisar sa Dios ang mga templo aron matudloan kita sa Iyang mga pamaagi ug aron matabangan kita nga mosubay sa Iyang mga dalan (tan-awa sa 2 Nephi 12:2–3).
Malimpyuhan kita sa atong pagkadili takus pinaagi sa Pag-ula ni Jesukristo (tan-awa sa 2 Nephi 16:5–7).
Ang Dios magauban kanato kon mosalig kita Kaniya, bisan atol sa mga panahon sa kalisdanan ug kahadlok (tan-awa sa 2 Nephi 17:4, 7, 14).
Si Jesukristo mao ang Dios sa paghukom ug kalooy. Ang Iyang kalooy mapadangat ngadto niadtong maghinulsol ug motuman sa Iyang mga sugo (tan-awa sa 2 Nephi 19:12, 17, 21; 20:4).
Gipahiuli sa Ginoo ang Iyang ebanghelyo ug ang Iyang Simbahan pinaagi ni Propeta Joseph Smith ug nagpundok karon sa Iyang katawhan sa katapusang mga adlaw (tan-awa sa 2 Nephi 21:10, 12).
Panahon sa Milenyum, ang yuta mahimo nga usa ka dapit sa kalinaw tungod kay mapuno kini sa kasayuran bahin sa Ginoo (tan-awa sa 2 Nephi 21:6–9).
Ang Ginoo magmaloloy-on ngadto sa Iyang mga katawhan, apan ang mga dautan malaglag (tan-awa sa 2 Nephi 23:22).

Mga Pagtulun-an ni Nephi

Tungod ni Jesukristo, maluwas kita pinaagi sa grasya human sa tanan nga atong mabuhat (tan-awa sa 2 Nephi 25:23).
Pinaagi sa Pag-ula sa Manluluwas, makadawat kita og kapasayloan sa atong mga sala (tan-awa sa 2 Nephi 25:26).

Human sa igong panahon, ipangutana ang mosunod:

Unsa nga mga tema ang inyong nakita diha niining mga pagtulun-an gikan nila ni Isaias ug Nephi? (Ang posible nga mga tema mao ang: Gipadala sa Langitnong Amahan ang Iyang Anak, si Jesukristo, aron ipadangat ang kaluwasan ug kalinaw ngadto sa Iyang mga anak. Makasalig kita sa Dios sa bisan unsa nga kahimtang. Ang mga templo nagtudlo kanato bahin sa Dios.)
Hain niining siyam ka mga pamahayag ang inyong nakita nga labing makahuluganon? Ngano man?

I-assign sa matag estudyante ang usa ka doktrina o baruganan gikan sa lista sa ibabaw, ug ipabuhat sa mga estudyante ang mosunod:

Basaha ang tudling sa kasulatan diin gikuha ang doktrina o baruganan.
Tubaga kini nga pangutana: Sa unsang paagi nga kining doktrina o baruganan makatabang kaninyo nga “mahimuot” diha sa Ginoo? (Tan-awa sa 2 Nephi 11:4–6.)
Hunahunaa ang usa ka kahimtang diin ang pagbaton og kahibalo bahin niining doktrina o baruganan makahatag kaninyo og paglaum ug kalig-on.

Dapita ang mga estudyante sa pagpakigbahin sa ilang mga hunahuna. Sa pagbuhat nila sa ingon, mahimo nimong ipangutana, “Kinsa pa man ang dunay pagpamatuod o hunahuna bahin sa unsay bag-ohay lang nga gitudlo?” Ang pagtugot kanila nga mopakigbahin sa ilang mga hunahuna ug pagpamatuod mopanghimatuod sa mga kamatuoran ngadto sa ilang kasingkasing ug sa kasingkasing sa ilang mga kaedad. Pasalamati sila sa ilang pag-apil.

Dapita ang usa ka estudyante sa pagbasa og kusog sa 2 Nephi 25:13. Hangyoa ang klase sa pagsunod, nga mangita sa mga rason nga si Nephi nahimuot sa pagpalambo sa ngalan sa Ginoo. Hangyoa ang mga estudyante sa pagsulti sa unsay ilang makit-an.

Dapita ang usa ka estudyante sa pagbasa sa mosunod nga pamahayag ni Presidente Thomas S. Monson:

“Ako nagtuo nga walay usa nato ang nakasabut sa hingpit sa kaimportante sa unsay gibuhat ni Kristo alang kanato didto sa Getsemani, apan ako mapasalamaton kada adlaw sa akong kinabuhi tungod sa Iyang maulaong sakripisyo alang kanato.

“Sa katapusang gutlo, mahimo unta Siyang motalikod. Apan wala Niya buhata. Giagian Niya ang tanang mga butang aron nga Siya makaluwas sa tanang mga butang. Sa pagbuhat sa ingon, Siya mihatag nato sa kinabuhi lapas niining mortal nga kinabuhi. Giluwas Niya kita gikan sa Pagkapukan ni Adan.

“Sa kahiladman sa akong kalag, ako mapasalamaton kaayo Kaniya. Siya mitudlo nato unsaon sa pagpakabuhi. Siya mitudlo nato unsaon sa pagpakamatay. Iyang gisiguro ang atong kaluwasan” (“Sa Pagpanamilit,” Liahona, Mayo 2011, 114).

Ipangutana: Unsa nga mga pagkasusama ang inyong nakita tali sa mga pulong ni Nephi diha sa 2 Nephi 25:13 ug sa mga pulong ni Presidente Monson?

Tapusa ang leksyon karon pinaagi sa paghangyo sa mga estudyante sa paghulagway sa mga paagi nga ang batan-ong mga Santos sa Ulahing mga Adlaw makapalambo sa ngalan sa Ginoo. Human makatubag ang mga estudyante, awhaga sila sa pagpalambo sa ngalan sa Ginoo matag adlaw.

Sunod nga Unit (2 Nephi 26–31)

Sa sunod nga unit, ang mga estudyante magtuon sa pipila ka mga panagna ni Nephi bahin sa ulahing mga adlaw. Nakita ni Nephi nga ang sayop nga mga simbahan ug ang tinago nga mga kalihokan magkadaghan. Nakita usab niya nga ang Ginoo mobuhat og usa ka “kahibulongan nga buhat ug usa ka katingalahan” (2 Nephi 27:26) ug nga daghan ang mosalikway sa Basahon ni Mormon tungod kay sila duna nay Biblia. Agig dugang, gipasabut ni Nephi ang doktrina ni Kristo.