2 Nephi 6–8

Pasiuna

Samtang girekord ni Nephi ang pangalagad sa iyang katawhan, gilakip niya ang duha ka adlaw nga wali sa iyang manghud nga lalaki nga si Jacob. Ang wali makita diha sa 2 Nephi 6–10, ug kini ang una sa tulo ka mga leksyon bahin niini. Atol sa pagsugod sa wali, gibasa ni Jacob ang mga panagna ni Isaias kalabut sa pagkatibulaag ug pagpundok sa Israel, nagpakita nga “ang Ginoong Dios motuman sa iyang mga pakigsaad diin siya mihimo ngadto sa iyang mga anak” (2 Nephi 6:12).

Mga Sugyot alang sa Pagtudlo

2 Nephi 6

Nagpamatuod si Jacob nga ang Ginoo mahinumdom sa Iyang mga katawhan sa pakigsaad

Aron matabangan ang mga estudyante nga makita nga ang mga pagtulun-an ni Jacob dunay kalabutan sa ilang kinabuhi, hangyoa sila sa pagpamalandong kon unsay ilang reaksyon kon ang usa ka higala o sakop sa pamilya dili maayo ang tinagdan ngadto nila, dili motuo sa unsay ilang gisulti, o mipakita pinaagi sa ilang mga lihok o kinaiya nga ang relasyon dili na importante ngadto nila.

Hangyoa ang mga estudyante nga mamalandong sa hilum sa mosunod nga pangutana:

Nakapakita na ba kamo og susama nga mga lihok o mga kinaiya ngadto sa Ginoo?

Ipasabut nga diha sa 2 Nephi 6–8, atong makita kon unsay reaksyon sa Ginoo niadtong mipalayo Kaniya. Kini nga mga kapitulo naglangkob sa rekord ni Nephi isip kabahin sa usa ka wali sa iyang igsoon nga si Jacob. Ang nahabilin sa wali ni Jacob narekord diha sa 2 Nephi 9–10. Kini nga mga kapitulo mahisgutan sa mosunod nga duha ka leksyon.

Dapita ang usa ka estudyante sa pagbasa og kusog sa 2 Nephi 6:3–4 ug 9:1, 3. Hangyoa ang klase sa pagtino sa mga rason nganong gihatag ni Jacob kini nga wali.

Dapita ang usa ka estudyante nga maoy magsilbi nga tigsulat. Hangyoa siya sa pagsulat diha sa pisara sa ulohan nga Mga Katuyoan sa Wali ni Jacob. Dayon hangyoa ang mga estudyante nga ipakigbahin kon unsay ilang nadiskubrihan diha sa mga bersikulo nga bag-ohay lang nga gibasa. Ipasulat sa tigsulat ang ilang mga tubag ubos sa ulohan. Tabangi ang mga estudyante nga makita nga gitudloan ni Jacob ang iyang mga katawhan alang sa “kaayohan sa [ilang] mga kalag” (2 Nephi 6:3). Gusto siya nga tabangan sila nga “maghimaya sa ngalan sa [ilang] Dios” (2 Nephi 6:4), “masayud mahitungod sa mga pakigsaad sa Ginoo” (2 Nephi 9:1), ug “magmaya, ug ihangad ang [ilang] mga ulo sa kahangturan” (2 Nephi 9:3). Siguroha nga kining mga katuyoan nahilakip diha sa lista sa mga estudyante. Isugyot nga samtang ang mga estudyante magtuon sa wali ni Jacob, mahimo nga pangitaon nila ang mga pagtulun-an nga makatabang aron matuman kining mga katuyoan.

Kopyaha diha sa pisara ang mosunod nga han-ay sa mga panghitabo [time line]. (Mahimo nimo kining kopyahon sa dili pa magsugod ang klase.) Dapita ang usa ka estudyante sa pagbasa sa 2 Nephi 6:4. Ipasabut nga gisugdan ni Jacob ang iyang wali pinaagi sa pag-ingon nga maghisgot siya bahin sa mga kahimtang nga nahitabo sa iyang panahon ug sa mahitabo sa umaabut (“mga butang nga anaa na ug kana nga moabut pa”).

Imahe

Timeline

Tudloa ang numero 1 diha sa time line.

Diha sa 2 Nephi 6:8, unsa may gisulat ni Jacob nga nahitabo sa mga Judeo didto sa Jerusalem tungod kay mipalayo sila sa Ginoo? (Ang uban napatay, ug ang uban nabihag. Mahimo nimong pahinumduman ang mga estudyante nga sila si Lehi, Jeremias, ug ubang mga propeta nanagna nga kini nga mga butang mahitabo. Ang ilang mga panagna natuman mga 587 B.C., sa dihang ang mga taga-Babelonia misakop sa Jerusalem ug mibihag sa daghang mga Judeo paingon sa Babelonia. Tan-awa sa “Sunodsunod nga Panghitabo” diha sa Giya ngadto sa mga Kasulatan alang niini nga petsa ug sa uban.)

Tudloa ang numero 2.

Sumala sa unang sentence sa 2 Nephi 6:9, unsa may mahitabo sa katapusan ngadto sa mga kaliwatan sa mga Judeo nga gibihag sa Babelonia? (Mobalik sila ngadto sa Jerusalem. Kini nga panagna natuman mga 537 B.C., sa dihang si Haring Ciro mitugot sa mga Judeo nga mobalik ngadto sa ilang yutang natawhan.)

Tudloa ang numero 3, ug ipasabut nga nanagna si Jacob nga ang Manluluwas magpakabuhi sa Iyang mortal nga kinabuhi taliwala sa mga Judeo.

Diha sa 2 Nephi 6:9–10, unsa nga mga pulong ang naghulagway kon unsay buhaton ug bation sa pipila ka mga Judeo ngadto sa Manluluwas atol sa Iyang mortal nga pangalagad? (Ang mga tubag mahimong maglakip sa “mohampak kaniya,” “molansang kaniya,” ug “mopatig-a sa ilang mga kasingkasing ug magpatikig sa ilang mga liog batok” Kaniya.)
Sumala sa 2 Nephi 6:10–11, unsa may mahitabo sa mga Judeo nga mosalikway sa Mesiyas? (Sila masakit diha sa lawas, pagakatagon, pagahampakon, ug pagadumtan.)

Dapita ang mga estudyante sa pagbasa og hilum sa 2 Nephi 6:6–7, 11–12, 14, 17. Mahimo nimong ipasabut nga diha sa mga bersikulo 6–7, gibasa ni Jacob ang usa ka panagna ni Isaias bahin sa Pagpahiuli sa ebanghelyo ug sa pagpundok sa balay ni Israel. Hangyoa ang mga estudyante sa pagtino sa mga pulong nga naghulagway kon unsay reaksyon sa Ginoo ngadto sa balay ni Israel, ang mga katawhan sa pakigsaad sa Ginoo, bisan kon sila mosalikway Kaniya. Hangyoa ang mga estudyante sa pagpakigbahin sa mga pulong nga ilang nakit-an. Tabangi sila nga makasabut sa kahulugan sa pipila niining mga pulong pinaagi sa pagpangutana sa mosunod:

Diha sa 2 Nephi 6:7, sa inyong hunahuna unsa may gipasabut sa “maghulat” sa Ginoo?
Misaad si Jacob nga ang “Ginoo magmaloloy-on” sa Israel (2 Nephi 6:11). Sa unsang mga paagi nga ang pipila sa mga pulong nga inyong natino nagpasabut sa kalooy sa Ginoo?
Misaad usab si Jacob nga ang Ginoo “[mo]bawi” sa Israel (2 Nephi 6:14). Unsa sa inyong hunahuna ang gipasabut sa pagbawi sa Manluluwas sa usa ka tawo?
Sumala sa 2 Nephi 6:11–12, 14, unsay kinahanglan gayud natong buhaton aron makadawat sa kalooy sa Ginoo?

Samtang magpakigbahin ang mga estudyante sa ilang mga hunahuna, siguroha nga nasabtan nila nga ang Ginoo maloloy-on niadtong mobalik ngadto Kaniya.

Ipasabut nga diha sa 2 Nephi 6, nagsulti si Jacob bahin sa pagkamanggiloloy-on sa Ginoo ngadto sa Iyang mga katawhan sa pakigsaad bisan human nga sila nahimong hilabihan ka dautan. Pasaligi ang mga estudyante nga kon ang Ginoo maloloy-on ngadto niining mga tawhana, sigurado gayud nga maloloy-on Siya sa tagsa-tagsa kanato samtang moduol kita Kaniya ug motuman sa atong mga pakigsaad ngadto Kaniya. Dapita ang mga estudyante nga mamalandong sa mga paagi nga ang Ginoo nagmaloloy-on ngadto kanila. Hangyoa sila sa pagsulat sa mosunod nga mga pulong diha sa ilang mga scripture study journal o mga class notebook: Nasayud ko nga maloloy-on ang Ginoo tungod. … Dayon dapita sila sa pagpakigbahin sa ilang mga hunahuna ug mga pagbati sa pagkompleto sa pamahayag. Human sila makabaton og igong panahon sa pagsulat, mahimo nimong dapiton ang pipila sa pagpakigbahin sa unsay ilang gisulat.

2 Nephi 7–8

Mipakigbahin si Jacob sa panagna ni Isaias bahin sa abilidad sa Manluluwas sa pagtubos sa Iyang mga katawhan sa pakigsaad

Ipasabut nga diha sa 2 Nephi 7 ug 8, gibasa ni Jacob ang usa ka panagna gikan sa mga sinulat ni Isaias. Ang kapitulo 7 naglangkob sa pulong sa Ginoo ngadto sa mga sakop sa balay ni Israel kinsa nagkatibulaag ug nabihag isip resulta sa ilang mga sala. Dapita ang usa ka estudyante sa pagbasa sa 2 Nephi 7:1. Mahimo nimong dapiton ang klase sa pagmarka sa mga pangutana nga gipangutana sa Ginoo.

Aron matabangan ang mga estudyante nga makasabut sa mga pangutana diha sa bersikulo 1, ipasabut nga ang mga pulong nga “nakabiya ba kaninyo,” “ang kalig-unan sa panagbulag sa kaminyoon sa inyong inahan,” ug “mibaligya kaninyo” nagpasabut sa ideya sa paglapas o pagputol sa usa ka pakigsaad. Tabangi ang mga estudyante nga makasabut nga ang mga pangutana sa Ginoo mahimong mausab sama sa mosunod: “Mipahilayo ba Ako kaninyo? Ako bang gibaliwala ang pakigsaad nga atong nahimo?”

Unsa man ang tubag niining mga pangutana? (Ang tubag kay dili. Ang Ginoo dili gayud mopahilayo kanato o makalimot sa mga pakigsaad nga Iyang nahimo.)
Sumala sa katapusan sa 2 Nephi 7:1, nganong kining mga tawhana nahibulag man gikan sa Ginoo ug nag-antus sa pagkabihag? (Tungod kay sila nakasala ug mipahilayo sa Ginoo.)

Ipasabut nga diha sa 2 Nephi 7:2, nangutana ang Ginoo og laing pangutana nga makatabang kanato nga makita nga gusto Niya nga motabang kanato ug nga Siya dunay gahum sa pagbuhat sa ingon. Dapita ang mga estudyante sa pagpangita ug sa paglinya sa pangutana. (“Ang akong bukton gipamub-an ba nga kini dili makatubos, o Ako wala bay gahum sa pagluwas?”)

Aron matabangan ang mga estudyante nga makasabut niini nga pangutana, pangutan-a sila kon unsaon nila sa pag-usab ang pangutana diha sa ilang kaugalingong mga pulong. (Kon maglisud sila sa pagsabut sa pahayag nga “ang akong bukton gipamub-an ba,” dapita ang usa ka estudyante sa pagpatuyhad sa iyang kamot ngadto sa laing estudyante nga morag nagtanyag og tabang. Dayon hangyoa ang unang estudyante sa “pagpamubo” sa iyang kamot, nga nagpakita sa ideya sa pagbakwi sa tabang o pagpugong.) Mahimong isulti og balik sa mga estudyante ang pangutana sa Ginoo pinaagi sa pag-ingon og susama niini: “Gipugngan ba nako o wala motabang aron sa pagtubos kaninyo? Mituo ba kamo nga Ako dunay gahum sa pagluwas kaninyo?”

Sultihi ang mga estudyante nga agig tubag niini nga pangutana, ang nahabilin sa 2 Nephi 7 ug 8 naglangkob og pipila ka mga ehemplo nga nagpakita sa tinguha sa Manluluwas sa pagtubos sa Iyang mga katawhan sa pakigsaad ug sa mga ehemplo nga nagpakita nga Siya dunay gahum sa pagbuhat sa ingon.

Aron matabangan ang mga estudyante nga madiskubrihan ang ebidensya nga ang Manluluwas nagtinguha sa pagtubos sa Iyang mga katawhan sa pakigsaad ug dunay gahum sa pagbuhat sa ingon, bahina ang mosunod nga unom ka mga tudling sa kasulatan gikan sa 2 Nephi 8 diha sa mga grupo sa mga estudyante: mga bersikulo 1–3, 4–6, 7–8, 10–11, 12–13, ug 14–16. (Kon ikaw dunay 12 o sobra pa nga mga estudyante diha sa imong klase, i-assign ang mga tudling ngadto sa mga parisan o sa ubang gagmay nga mga grupo. Kon ikaw dunay mas minos sa 12 ka mga estudyante, i-assign ang sobra sa usa ka tudling ngadto sa pipila ka mga grupo.) Hangyoa ang matag grupo sa pagpangita og mga pulong diha sa ilang na-assign nga tudling o mga tudling nga nagpakita sa tinguha sa Ginoo sa pagtubos kanato ug sa Iyang gahum sa pagbuhat sa ingon. Human sa igong panahon, dapita ang matag grupo sa pagbasa sa mga pulong nga ilang napilian ngadto sa klase. Hangyoa sila sa pagpakigbahin kon unsa ang ilang nakat-unan gikan niini nga tudling. Mahimong dapiton nimo ang mga estudyante sa pagmarka sa mga pulong nga gipakigbahin sa ilang mga classmate.

Sa pagtapos, i-refer ngadto sa lista sa mga katuyoan ni Jacob nga nakasulat sa pisara. Dapita ang mga estudyante sa paghunahuna bahin sa mga pakigsaad nga ilang gihimo ngadto sa Ginoo ug sa mga panalangin nga Iyang gisaad kanila samtang nagtuman sila niadtong mga pakigsaad. Ipakigbahin ang inyong pagpamatuod bahin sa pagkamatinud-anon sa Ginoo ngari kanato ug sa Iyang mga pakigsaad ngari kanato, ug ipamatuod ang bahin sa kalooy ug katubsanan nga atong madawat samtang magmatinud-anon kita sa atong mga pakigsaad ngadto Kaniya.

Komentaryo ug Background nga Impormasyon

2 Nephi 6:2. Unsa nga priesthood ang gihuptan nila ni Lehi, Nephi, ug Jacob?

Miingon si Jacob nga siya “gitawag sa Dios, ug gi-orden subay sa iyang balaan nga kapunongan” ug nga siya “gipahinungod pinaagi sa [iyang] igsoon nga lalaki nga si Nephi” (2 Nephi 6:2). Sa dihang misulti siya bahin niining “balaan nga kapunongan,” nagpasabut siya sa Melchizedek Priesthood. Misulat si Presidente Joseph Fielding Smith nga “ang mga Nephite midumala pinaagi sa katungod sa Melchizedek Priesthood gikan sa panahon ni Lehi ngadto sa panahon sa pagpakita sa atong Manluluwas taliwala kanila” (Answers to Gospel Questions, comp. Joseph Fielding Smith Jr., 5 vols. [1957–66], 1:124).

2 Nephi 8. Ang pagpundok sa ulahing mga adlaw

Ang panagna ni Isaias nga gikutlo diha sa 2 Nephi 8 naghisgot bahin sa pagpundok sa Israel sa ulahing mga adlaw. Si Elder Bruce R. McConkie sa Korum sa Napulog Duha ka mga Apostoles nagtudlo bahin sa espirituhanong kahimtang niini nga pagpundok:

“Nan, unsa man ang nalambigit sa pagpundok sa Israel? Ang pagpundok sa Israel naglangkob sa pagtuo ug sa pagdawat ug sa pagpakabuhi pinasubay sa tanan nga kausa gitanyag sa Ginoo sa iyang pinili nga katawhan sa karaan. Naglangkob kini sa pagbaton og hugot nga pagtuo diha ni Ginoong Jesukristo, paghinulsol, pagpabunyag ug pagdawat sa gasa sa Espiritu Santo, ug sa pagtuman sa mga sugo sa Dios. Naglangkob kini sa pagtuo sa ebanghelyo, pagpasakop sa Simbahan, ug pagduol ngadto sa gingharian. Naglangkob kini sa pagdawat sa balaang priesthood, pagkatinugahan og gahum gikan sa kahitas-an diha sa balaang mga dapit, ug sa pagdawat sa tanang mga panalangin ni Abraham, Isaac, ug Jacob, pinaagi sa ordinansa sa celestial nga kaminyoon” (A New Witness for the Articles of Faith [1985], 515).